.

.

جــمــعـــة أيـــن مـنشــــأتــى ؟؟!!  

Posted by: فاتيما in







مصــــاء الخـــير 
مش ناوية اكتب عن تفاصيل
مليونية استرداد الثورة بتاعت امبارح ...
عشان ليس هناك الكثير لكى ُيذكر ...
عن الأيام العادية يعنى  


و لو قولت .. فغالبا هكتب كلام ميصحش 
عن سخصية فيه ناس بتحبها وتحترمها
ومفيش داعى ازعلهم واضايقهم 
و اجيب سيرته بقى ..
و اللى هو بدون ذكر اسماء 
 الحاج البركة ... صلاح ابو سماعين


انما برضو هوه ارحم من غيره
اللى قالوا معاكو
ومشفناش لا وشهم ولا قفاهم ...
قصره 
بلاش نجيب ف سيرتهم .. 
و ميستاهلوش خالص بالمرة  




بس ممكن اتكلم شوية عن اليافطة دى
واللى جبت فكرتها من موقع تويتر 
و اكتشفت امبارح بعد 12 ساعة وقوف بس
... ان الشعب المصرى دا اجدع  
من انه ينضحك عليه و من انه يسيب حقه 
وان السؤال اللى مبطلتش اسمعه كان ..
فين البدلة الحمرا ؟!!!





السؤال اللى بيؤكد ان الناس دى
اللى اولياء دم 
او حتى بشر عاديين زى حالاتى كدا 
بس معتبرين الشهداء .. اهلهم و من دمهم 
 الكل ... مش ناوى يسيب حقه
وليس اندفاعا وراء شهوة انتقام ..
وانما عشان يكونوا عبرة ..لمن يأتى بعدهم 
ويفكر يصوب رصاصاته ناحية 
مواطن مصرى أعزل بيهتف للحرية



و احد اصدقاء وليد كنج توت العزاز 
اطلق نبوءة قصادى امبارح و استغربتها 
بإن حبيب العادلى هيتعدم ف ميدان التحرير 
ولسه هقاوح .. واقوله انى اظن السفاح دا
لأنه شايل اسرار ياما فغالبا هينقتل ف سجنه 
جه وليد و أكدلى ان صديقه العزيز ..
لا تخيب رؤياه




و ملقتش تفسير لذلك ... لو حصل 
غير ان الثورة هتاخد منحنى مختلف 
وان الثوار و أهالى الشهدا هيروحوا يجيبوه
من سجنه وينفذوا الحكم بنفسهم
و بإيدهم .. والله أعلم 




اما اللى يستوجب من وجهة نظرى الغلبانة
انى اكتب عنه ... وبشدة 
هوه حكاية البيانات العسكرية
بتاعة المجلس الأعلى 




واللى للمرة التانية 
بيجيبوا فيها سيرة حاجة 
باتت تحيرنى انا سخصياً كل جيمعة 
وتقض مضجعى
ومحدش يسأل يعنى ايه ... 
مضجعى ؟!!





الملخص يا سادة 
ان اول بيان جت فيه السيرة 
كان رقم 58 والخاص بجمعة 27 مايو
أيووووون .. 
الجمعة بتاعة الوقيعة دى 
وساعتها قريت مصطلح 
المنشأت الهامة و الحيوية ..اول نوبة كدا 
و طَرَف عينى



و كاتب البيان قال و فيما معناه 
ان المجلس ناوى ميسألش فينا
احنا المتظاهرين و لا هتكون مسئوليته 
يدافع عنا او يحمينا 
ولا يهمه اللى هيجرالنا بوتيتاااا
و ما دمنا رزلين و متربسين و مصرين 
ع النزول يبقى نستحمل اللى هيجرالنا 
من أى مندسين و بلطجية يهاجمونا
و لو هتطربق فوق نافوخنا نستاهل 
و إياكش تولع ...





المرة التانية ... كانت البيان رقم  75
 والذى بيحذرنا برضو كمتظاهرين قلالة الاصل
ونازلين جمعة استراد السخامة
اللى اسمها ثورة 
انه كمجلس ... ملوش دعوة بينا 
واياكش برضو نولع  
وانه هيحمى المنشأت الهامة والحيوية 
وأى نفر هيهوب ناحيتها 
هيعرف شغله و قد أعذر من أنذر 



و 
بس كدا خلاص 
وبعد امارات الدهشة 
التى تعلو وجهى قليلاً
عاوزة ابعت كام سؤالاية حايرة طايرة
تبدأ بـــ  الله!!!!

ايه الحكاية  ؟!!
فيه ايه يا جماعة ؟
هوه المجلس كارهنا ليه كدا  ؟

وبيتنصل ليه من حمايتنا كشعب 
مع انها جزء من مهامه كحامى للثورة ... 
زى ما بيقول على نفسه 
وكشريك فيها .. زى ما بيصر يدبسنا 
وكحاكم فعلى للبلاد
زى الإعلان الدستورى ما بينص ؟!!!



ماله كدا مقموص مننا
وكل ما نقوله مليونية يقولنا انا مخاصمكو ؟!!




نكونش احنا 
اللى قاعدين على نفَسَهم
وذلك تحريفاً لنص
تصريح دوك اوسامة الغزالى حرب 
واحنا مش واخدين بالنا ؟!!!






طب دحنا قولنا الجمعة ف التحرير 
الميدان و لا غيره مكان 
و لا حد قال رايحين ناحية المنشأت
و لا دياولو




مع كامل احترامى للى راحوا ف اى حتة
وتحفظى على ان العدد كان قليل
و غير مؤثر والمفروض المرة الجاية 
تترتب المسيرات دى 
بشكل احسن عشان تفرق وتعّلم 





انما نرجع لمرجوعنا 
 فيه ايه   ؟!!





ايه نوظام المنشأت الهامة والحيوية
دى اللى باينها أهم منينا 
و تبدو و كأنها فلذة كبدة المجلس 
و محروق عشانها بالقوى كدا ؟!!!
و كل مرة يلّوح لنا 
بإن انتهاكها خط احمر 
بينما الناس المتظاهرة دى
ولا يهموه  ولا يلزموه ف حاجة
و لا يساوا عنده جناح بعوضة
وانشالله يولعوا 
و اهو يخفوا م التعداد ...!!!



الله 


طب لو احنا مش مهمين عندكو 
ولا الامن و حماية البشر دى اساسا مهمتكم
وانتوا بشوقكوا  .. بتختاورا امتى
ومين اللى يستحق حمايتكم  ومين لأ ...


مش هنتحايل عليكو 
كنا اتحايلنا ع اللى دى شغلتهم اصلاً 
لكن .. ماشى معلش يا زهر 






وعندى أوقتراح بسيط 
قد يرضى كل الاطراف 
مدام المنشأت الهامة و الحيوية دى 
عاملة هسس ف النافوخ كدا ف كل مليونية 
و مبوظة العلاقات فيما بيننا 
طب ما تدوهالنا يا إخواننا 
واحنا كفاءة نقوم بيها ونحميها 
و نقطع رجلين اللى يهوب يمتها 


هيا مش المنشأت الهامة والحيوية دى 
تبقى بتاعتنا برضك كشعب مصرى
ولا انا غلطانة  ؟!!






طيب ادونا منشأتنا بس  وملكوش دعوة
و متحطوش ف بالكوا و لا تشيلوا هم 
حتى احنا حمينا المنشأت التمأشر يوم 
ولا حدش استجرى يخربها 
ولا نسيتوا ؟!!!





يعنى الشعب حافظ عليها 
وعمل دروع بشرية حوالين المتحف 
واماكن الأثار .. و لحق وثائق م الفرم
ف امن الدولة  ... ولا مش فاكرين ؟!!!




و لا حدش  مثلااااااا
استولى على شرايط الكاميرا بتاعة المتحف 
و لا خرب التسجيلات اللى مفروض انها احراز
ولا سرق مقتنيات قصور الرياسة
ولا حرق ف وثائق امنية هامة 
ولا ساب وزرا تخرج من المطارات 
ولا فلوس تتهرب م البنوك
ولا ساب مسئولين ف مكاتبهم 
يخفوا اثار جرايمهم
ولا أى حاجة م الحاجات دى  ..




الشعب وثق فيكم 
و سلّم عساكركم كل المطارح ..
خالصة مخلصة 
ولا فتح بوقه معاكم بربع كلمة 
الشعب المصرى ..... كله 
بثواره 
و كنبته 
واغلبيته الصامتة 
كانوا ناس كومل ومحترمين 
وحافظوا ع البلد ومنشأتها
  اما اللى خرّبها احنا عارفينه كويس
وعارفين بلطجيته
اللى سمنهم 30 سنة 
عشان يبقوا كلابه المخلصين 
و يطلقهم وقت اللزوم علينا .. ولا يزال


فإيه ؟!!!
 عيب لما تعايرونا كدا 
كل شوية



لأ عيب قوى 
اللى بينكتب ف البيانات دا 
مش إحنا اللى يتقلنا الجمل والعبارات دى 
دحنا الثورة السلمية بنت الحاجة سلمية 
المؤدبة البيضا و بنت الحلال 
 اللى العيبة مبطلعش منها فمتزودهاش بقى  ..
عشان احنا خلاص هرمنا 
وبقينا وحياة النبى ... على آخرنا






ثم ان المنشأت مش اهم م البشر
مش أبقى من البنى آدم 
مش أغلى م الدم 
والثورة قامت عشان الإنسان وكرامته 
فبلاش والنبى النعرة دى ف كتابة البيانات 
عشان بتخلى شكلكوا زى الموظف 
اللى ماضى على عهدة
مش ناس ماسكة بلد كبير ف لحظات مصيرية


وبما ان المنظر امبارح بيقول 
ان الجمع ستتوالى  ... ان شاء الله
لحد ما يبنلها آخر
فنا بقترح الجمعة الجاية نسميها 
جــــمعة  
أين منشأتى ؟! 





عشان انا حاسة اننا بقينا تقال
وكفاية علينا استعباط  و رمى ف مسئوليات
و كتر خيره المجلس 
الراجل كان ماشى ف حاله 
واترمت عليه الثورة زى البلوة من بلكونة مبارك 
وهوه مكنش ليه لا ف الثورات 
و لا ف لماضة العيال الثوار دول و قرفهم 





فياريت نلم نفسينا بسرعة 
كشعب و كمتظاهرين و نشيل شيلتنا
ونريحهم بدل ما كل شوية نضيق خلقهم
ونزهقهم ف عيشتهم
فيطلعولنا بيانات يشرشحونا فيها 
و يفضحونا وسط الجيران كدا 
زى على الشريف 
فى نص الأفلام العربى القديمة 
ف انصاص الليالى بكلام من عينة 
انتى يا ولية
مش كل ليلة بنتك خارجة تتصرمح مع خطيبها 
و عينى تبقى ف وسط راسى 
... دنا حيالله جوز امها 
و مش عينى منها و لا حاجة  
و اصلا مكنتش موافق ع الواد الصايع دا ...!!!



مش كدا بجد
يعنى يا تجوزوا البت 
يا الحاج يستهدى بالله و يفهم انها متجوزلوش
يا يشوفله حتة يسافر فيها يهدى اعصابه
لحد البت ما تغور على بيت جوزها 
ونخلص




انما نظام المعايرة دا مش نافع
الجماعة تعبوا و احنا عاوزين نريحهم 
و احنا ..
واخدين ع التعب 


واللى مسمعش يسلك ودانه 
عشان يسمع الهتاف الذى لا ينقطع ف كل
مليونية أو مظاهرة او مسيرة 
بتاع 


متعبناش متعبناش 
الحرية مش ببلاش 




يعنى مكملين ان شاء الله 
اصل مورناش غيرها 
و لا عندناش بلد تانى نحبها
مستعدين نتبهدل كدا ف غرامها .. 
و متوقعين نسيبها بعد دا كله لحد ... مثلاااااا



و الجمعة الجاية وما بعدها ..
 
يا تدونا المنشأت
يا تبطلوا الذل بتاعكو  ف البيانات






و يا مجلس القرموطى ... بيقولك 
ابنى وحيد ف التحرير 
اظن 
الماسيدج وصلت 


------------------------------------------
---------------------------------------------------
عرّافة ماشية تطوي أرض الله سفر
قالت لي خُط الرمل ووشوش الدكر
حكيت لها عن ثورتي إستغربت
وقالت لي مين الأغلى ؟ الناس ولاّ الحجر
KINGTOOOT
-------------------------------------------------
أهو دا اللى صــــار 
و اللى عنده كلمة حلوة يقولها
وبلاش بستفة ... 
---------------------------------------------
----------------------------------------------------

 صباحاتى الأحد  2 أكتوبر
 العـــار .. لقد خلقنا الله احرارا
screw the revoultion ... dr.Lecter
إختبارات الثورة .. ابراهيم رزق 

-----------------------------------------------

This entry was posted on السبت, أكتوبر 01, 2011 and is filed under . You can leave a response and follow any responses to this entry through the .

48 كــــلام بيطــبطـــب عـــلى قــــلبى و روحــــى

حفيدة عرابى
----------

من قبل ما تعلقى

ميرسى ع اللينك
وع الصورة
جداااااااااااا


والأهم من كله دا

الصباح الحلو بتاعك
يا حبيبة قلب طمطم


------------------------
وكل اللى حضر معايا الجمعة دى
كانت حلوة بيكم
والصحبة كانت ممتعة
فيدو
و منامينو
وليد كنج توت و اصدقائه
ابراهيم رزق وساليناز
عمرو يسرى
كيمو محمد كمال
وليد الدوغرى
عسقول
رامى الجميل اللى اتكلم يطمن علينا
الناس الحلوة اللى بشوفها دايما
ف الميدان
واللى لسه بعرفهم ..لأول مرة



افتقدت الواد أزهرى
و ناس تانية


كل مليونية
وانتوا طيبين

اليافطة تجننننننننننننننن

هههههههههههههههههههههههههه

حلوة بجد فعلا


سلام

اختك خوخة

(:

تصدقى عندك حق يا فاتيما

أيوة

أين مُنشأتى

هه و لا أيه

(:

.................

بامانة أنا قلت الجماعة دول عاوزين حتة كدة من الثورة الفرنسية
علشان يعرفوا النعمة اللى هما فيها

و ان لله حق

بس هنقول ايه

الطبع فيهم غالب
...........................

كنت عاوز أكلم باقى الناس بس معلش بقى (:

ربنا معاكى يا فتيما

و يهديهم اللى بالى بالك

إيه ده؟


انا كنت كاتبة كلمة طمطومة فى التعليق الاولاني
راحت فييييييين ؟

انا كنت كاتبة
اليافطة تجننننننننن يا طمطومة


فين طمطومة؟
فين طمطووووووووومة ؟


اذن .... فلتكن الجمعة القادمة
جمعة اين طمطومتي

فاتيما
روح القلب الملائكية

تصدقى يا فاتيما انا كان غالب عليا الاحباط
و راجع محبط بعد الكلمة الفظيعة اللى قالها صلاح ابو اسماعيل
لكن حاجة غريبة اللى خلتنى اتفائل
اليافطة اللى انتى اديتها لساليناز
حسيت ان فى اللى يكمل حتى لو احبطنا او متنا و نفسنا اتقطع
فى يافطة ساليناز مسكتها و قراها كل اللى فى المترو
تصدقى ساليناز جمعت عربة المترو حولها و سالوا و فهموا بعضهم ايد و بعضهم سكت لكن تخيلى يافطة ساليناز تعمل كل الحراك ده
الامل موجود و بقولك كده رغم انى محبط
لكن تخيلى مجرد يافطة تعمل ايه
حضرى يافطة اخرى لساليناز و ان كان املى اننى نسلم ليوسف و زياد و ساليناز مصر و لا نسلمهم شعلة ثورة مصر
سلام يا ام يوسف

والله العظيم وحشاني بجد

وكنت
امممممممم
طمنيني عليكي بس

ما تقلقيش

مصر بكره هتبقى احلى ان شاء الله

فاتيما الجميلة
كنت منية نفسي اشوفك امبارح الجمعة
بس الشعب علي مالميتهم وصلنا التحرير بعد اربعة
وكمان تعب من اللي معايا
تخيلي معاكي رحلة
صينية (ست صينية)والمانية والماني ومصريين
:))))
حسسوني اني في رحلة للقناطر الخيرية
ماحستش اني في التحرير
:))))
واهي غلطة ومش هتعود
وانا اللي جبت ده كله لنفسي
ادي اخرت المشي مع اجانب يااختي
بس هتتعوض ان شاء الله
واشوفك قريب
والبوست رائع وجميل

ربنا يستر من اللي جاي
بس المجلس العسكري ليه حق يحذر اي حد انه يجي ناحية الاماكن الاحيوية
مهو حضرتك الناس المخربين بيندسوا وسط بتوع الثورة
ومش بنعرف زيد من هبيد
عامة لازم يبان ليها حل
وعن قريب

تحفة

بس عايز اعرف موضوع حازم صلاح ابو اسماعين ده

قلتها زمان وهاقولها تاني اللي يستنى السمنة من بطن النملة اكيد مجنون
والمجلس العسكري اسوء نملة في مصر والوزارة الاكتر فسادا في عهد مبارك هي بس بتستفيد من الخط الاحمر المحطوط حواليها ومحدش يقدر يقربلها
الجيش خط احمر
طيب ما يخلوهم خطين حمر يمكن وقتها اشجعهم :)
يوم 24 يناير قبل الثورة بيوم كتبت تعليق في احد المدونات وقلت ظروفنا اصعب من تونس لأن تونس جيشها وطني وقف مع شعبه لكن جيشنا جيش مبارك هيقف ضد شعبه
يوم 10 فبراير قبل التنحي بيوم قلت خايف ان الجيش يمل نفس عملة 52 ويركب هو الموجة وينسب الثورة لنفسه ونبقى تحت رحمة حكم عسكري تاني
الناس وقتها قالولي اني متحامل علي المجلس العسكري وان جيشنا جيش وطني
لكن فكرتي عنهم متغيرتش ومحسيتش بالامل فيهم لحظة واحدة
وكتبت الجملة دي من زمان اوي (انا كأني شايف حسني مبارك دلوقت بيطلع لسانه لينا ويقول مش هو ده الجيش اللي كنتوا مستنينه يعمل اللي عايزينو دوقوا بقي)
وما زلت مؤمن بيها
تصدقي لو قلتلك مكنتش ناوي ادخل اي بوست سياسي او اتكلم في السياسة بسبب الاحباط اللي عندي من كل حاجة سياسية
من منظر التحرير يوم لجمعة والعدد القليل جدا من شوية احزاب باعت البلد ووافقت المجلس العسكري على قوانينه
انا محبط جداوعلشان كده مكنتش عايز اعلق علشان محبطكمش معايا بس لما لقيت الكلام عن المجلس العسكري مقدرتش اقاوم اصلهم حبايبي من ايام الجيزة
نفسي اشوف الامل اللي انتو شايفينه
يمكن بكرة يكون احسن يمكن الشعب يصحى ويعرف ان ثورته بتتسرق جزء جزء لحد ما يلاقي فرعون جديد على الكرسي ونفكر نخرج تاني ونطلع عليه
مش عايز اطول عليكم ومش عايز احباطي يتنقلكم ربنا يفوق الشعب
تحياتي

نوران الشاملى
-------------

ميرسى يا خووووووخة
نورتى روح قلب ماما بالتعليق
ومبسوطة ان الصورة عجبتك
ومبسوطة بطمطومة اللى بحبها منك
ومبسوطة انك بتعلقى أصلا اساساااااا
احنا زارنا النبى يا حبيبتى

بوسس لشريف كتير لو سمحتى
وحضونات ليكى

Ramy
----

مش كدا والنبى يا رامى
العالم دى الذوق مش نافع معاها
لازم يخلونا نتهور ونتعور ...

انا مبسوطة بمكالماتك
وبتعليقك الصبح قبل ما انزل عشان تطمن عليا وتحلفنى بالغاليين عليا ..
انى اخد بالى من نفسى

ربنا ما يحرمنى من حنيتك يا ر ر

:)

نوران الشاملى
--------------

ههههههههههه
حلوة أين طمطتومتى دى
طيب
خلوها لما ينقبض عليا بقى
وتعملولى صفحة ع الفيس والمدونات
يبقى شعار فللى قوى ...
انا موافقة عليه اهو من دلوقتى
:))))

ابراهيم رزق
------------

ازيك يا ابو العيال
ومتفقة معاك ف كل حرف كتبته
لسه فيه امل
ولو خدوه مننا
يبقى بياخدوا البلد كلها من قلوبنا
ودا عمره ما هيحصل
غير بطلوع الروح بقى ...


انا كل خطوة بتحركها
بفكر ف يوسف وف عيال الناس اللى بحبها
والعيال التانية اللى معرفهاش
بفكر ف كل حد يستاهل بلدنا تبقى احسن
ودلوقتى فرصة دهبية يبقالنا دور
ونتحرك
نستسلم بقى ونيأس
؟؟؟
لأ طبعا

دحنا منستاهلش العيشة
ولا الجنسية
ولا الهوا اللى بنتنفسه فيها


حاضر هعمل يافطة لسالينازة المرة الجاية ..
اما نشوف هتبقى بتبعتر كرامة مين المرة دى ...

سلامى لأم العيال ولزياد
وليك قبلهم

sony2000
--------


انتى كمان يا سنسن
ويا ماما انا كويسة
مش قولنا هنفضل نقول احنا كويسين
لحد ما نبقى كويسين
:)

اطمنى
والمهم انتى تكونى بخير يا حبيبتى

غير معرف
--------
انا مش قلقانة حضرتك
دنا مشكلتى انى مطمنة لدرجة بتستفز اللى حواليا كلهم ...
:)))

مصر ان شاء الله هتبقى بخير
واكتر م الخير بشوية

بس الوقت والتكلفة

الحكاية عاوزة صبر
و تمن

شمس النهار
---------

ايه دا يا شموسة
انتى اللى كنت جايبة شون بين معاكى الميدان ؟!!!

طب مش هتقولى عشان اجى أتعرف ع الراجل واقوله كام بوء حلوين عن مصر الثورة وشبابها الحر و رجالتهاالجدعان وبناتها الحلوين ..وستاتها القمرات
ولا حاجة
(وش بيبربش وراسم البراءة )

معلش المرة الجاية
يكون الواد زيزو ازهرى موجود
ان شاء الله

دمت بكل الحب يا شموستى

beautiful mind
-------------


يا أستاذنا
المجلس بيحذر ليه ومين ؟!!!

التحذيرات دى مش لينا احنا
دى المفروض لقلة ما
او مخربين
او غيره
طب انا لو مكانهم محذرش ولا حاجة واخلى اللى عاوز يقرب يقرب عشان اعكشه واخلص البلد من شره ..
دا لو كان هناك مخربين فعلا والمجلس خايف ع البلد منهم ...

انما نظام انا عارف ان فيه حرامية وبرضو فاتحلهم الشباك بس بحذر اهو اللى هينط منه ...
دا اسميه ايه ؟!!!

ثم ان البيانات لهجتها وصياغتها بتخلى منظرنا وحش قوى
وكأنها بتقول للعالم برا
ان البلد سايبة
والمجلس كل مرة خايف على المنشأت
ومبيعملش حاجة غير الخوف والتامين ..

طب معلش
هوه مش المفروض المنشأت دى تبقى متأمنة طول الوقت ..
ولا وقت المظاهرات بس ؟!!!

ثن ان الثوار ف التحرير وبس
المعلن عنه ان التحرير هوه مكان المليونية ..

ليه الإصرار ان البيان يكون موجه ليهم وهما موضحين جداااا اهدافهم من الخروج وكل مطالبهم من قبلها بمدة ..


لما بعد 9 شهور يبقوا لسه
محلك سر و مش عارفين
مش سامعين
ومش منتبهين
ومش متفهمين
ومش مستجيبين
...هيحصل امتى ؟!!!

الحل ف ايد الشعب يا عزيزى
والأيام ان شاء الله جاية
وهنشوف

عمرو فكرى
---------


موشكرين يا عمرو

موضوع الحاج حازم دا بقى
حكاية
بص
الموضوع بدا من الساعة تسعة ونص الصبح تقريبا
لما شوية شباب لابسين تشيرتات عليها اسم الحاج حازم وحملته الإستنخابية ...
جم برابطة المعلم ونصبوا منصة محترمة بسماعات روشة واختاروا مكان قريب من المنصة الرئيسية اللى هيا منصة شعبية ف الأساس مش تبع حد بعينه من احزاب او غيره ...

جم ونصبوا المنصة
واشتغلوا بأغانى دينية و هتافات شوية لحد صلاة الجمعة وبعدين هديوا
قولنا خير

اصلا مكنش فيه جمهور كتير من السلفيين حاضر بالنهار كان اغلبه ناس الميدان بمختلف اطيافهم ....
مكنتش جمعة سلفية والحمدلله لله


كان فيه اشاعات بإن فيه اعتصام الليلة دى والكل هيشارك فيه
بما فيهم جماعة الحاج حازم
محدش كان عارف هترسى على ايه
لأن العدد لما بيبقى قليل ..
بيسبب مخاوف من المبيت
و كدا ...

المهم
فضلنا كدا
لحد ما الحاج حازم بقى جه بليل ع الساعة تمانية تقريباً ...
و من اول ما ظهر من بعيد لحد ما وصل المنصة والأتباع بتوعه بيزفوه ف دخلته ولا كأنه شيخ الطريقة ...

المهم الراجل طلع
وقولت بس
هنسمع حاجة عدلة بقى

مفيش
قعد يتكلم ييجى نص ساعة
ومفيش كلام محدد تعرف تمسكه
بيهاجم المجلس العسكرى ويقوله كفاية عليك كدا
وبعدين يقول هنديله مهلة ...
يقول هنعتصم هنا ف التحرير
وبعدين يقول هنعتصم كل ساعة
وحاولت استفهم انا ايه حكاية كل ساعة دى معرفتش الحقيقة
بس عرفت بعد ما روحت ..
انه كل ساعة دى تقريباااا معناها انه هيشوف كدا .. حسب التساهيل
يعنى مش حسب المبدأ ولا حاجة
وانه اعلن ان مفيش نية للأعتصام
ف الميدان ...
و اومال يعنى الأفلام اللى اتقالت ع المنصة دى ايه ؟!!!

انا تحفظى عليه مش عشان انا مفقوعة م الاخوة بتع الإسلام السياسى دول خالص ولا حاجة والله
ابدا ...

انا اللى غايظنى
انه لما طلع اتكلم ...
بقيت مستغربة ان شخص زيه يبقى مرشح لجمهورية مصر العربية بجلالة قدرها ..
وان فيه ناس مبهورة بيه ومبسوطة لدرجة انها بتشجع ترشيحه
بينما هوه شخص عادى ممكن يبقى امام جامع او وزير اوقاف بكتيره ...
لكن اكتر من كدا المنصب يبقى كبير عليه ويستلزم صفات اخرى ..
مش موجودة فيه بالمرة
هوه راجل يبدو طيب
بس مفيش كاريزما خالص
وبيقول كلام حماسى
بس مفيش فكر وشخصية قوية
هوه بالغختصار راجل بركة
ولا داعى للحديث عن رأيه ف البنوك وغيرها ..لما يمسك البلد ...عشان معكش بقى واغلط ..

الملخص يا عزيزى
انه وقف ع المنصة
كى يتمخض الجبل فولد فأرا ...
و بعدين مش هلوم عليه لوحده
كل الأحزاب فين ؟
ولا القوى السياسية ...؟
الغالبية لم تحضر
او كان حضورها خافت

وانا لا أعول عليهم عموما
عشان دى ثورة الشعب كله
وهما جزء منها صحيح
بس جزء مش مؤثر غير قصاد الفضائيات وبس ..
انما ع الأرض
ايدك منه والأرض


ولهذا ولا يفرقوا
معايا
بس ادينا بنتفرج

المرشحين للرياسة روخرين برضو
حاجة تقرف الكلب
ولا واحد عليه الطلى
حتى البرادعى .. بيضيع الفرص
كلهم خايفين ..
متفهمش ليه
مرعوشين
متعرفش ليه
كلهم بلا استثناء ...
اقل من المرحلة اللى احنا فيها
ومصر عاوزة راجل كدا
راجل بجد

وادينا ف انتظارها
وحتى يأتى
احنا صامدين
و متربسين ع المبدأ
و متعبناش و متعبناش
ثورة كاملة يا اما بلاش



سلملى على الجميلة ريرى
على فكرة
هيا ليها خطروفة ف البوست
اللى فات
بإسمها.. بس انتا مخدتش بالك تقريبا
اول ما شفت الصورة ..
افتكرتها علطول
يارب تعجبها
:)

مانا رديت يا فاتيما بس انتى اللى ماخدتيش بالك :D

عجبنى مصطلح (الإسلام السياسى)

مصطفى سيف الدين
---------------

ازيك يا مصطفى

والله اختك فاتيما معاك ف الطلعة دى برضو
ومن اول ما استلم المجلس بقول كدا
بناء على معطيات
والاهم بناء على أراء ناس محترمة كلامهم عندى مقدس لأن ليهم خبرة ونظرة ف المشهد العام ...
وهما قالوا من اول يوم ..
المجلس جزء م اللى فات
وجاى عشان يخربها ..مش يحافظ عليها

ويمكن لأنى عرفت الحكاية دى من بدرى
فخلاص تلاقينى كدا مركزة بإستمرار
ومعنديش وقت للإحباط
ولا بتفاجىء
لأن النتايج دايما مبنية على معطيات
والمعطيات ثابتة
فلما يحصل اى حاجة ضد الثورة م المجلس
لا أتعجب اطلاقااااا

اللى بيخلينى اكتب بقى
هوه الطرف التانى م المعادلة
الناس
الشعب
المصريين
هما دول اللى عندى دايما امل فيهم
يتغيروا لما يعرفوا حقايق
يتحركوا لما يكتشفوا الخديعة
و دا اللى ممكن يحبطنى للحظات لما اشوف ردود افعال البعض ..
بس برجع تانى اتوازن علطول ..
عشان الحكاية اكبر مننا احنا كبشر وبس
والواحد بيشوف علامات وامارات
ومدد من ربنا ..
يخليه يحس بالتفاؤل ...
مهما غمقت السما وغيمت


ممكن انقلك انا تفاؤلى يا مصطفى
وتسيبك من احباطك دا
عشان الجولة دى قد تبدو خسرانة
انما لسه الحرب مخلصتش ...

لما تخلص نبقى نقعد جنب بعض نحبط للسنة الجاية ..
انما دلوقتى
كن متفائل يا عزيزى
وخلي ثقتك بالله ...
وببعض الطيبين المخلصين ف البلد دى
اللى لو عددهم قليل ..
لكن فيهم البركة
ورب فئة قليلة ....
ولا إيييييه ؟

:))))

نورت المطرح كله

عمرو فكرى
---------

ماشى يا عمرو
:)

ومصطلح الأسلام السياسى دا تقريباً افضل لفظ عن الأسلاميون او التيار الإسلامى ..
لأنهم كدا فعلا
يغمسون السياسة فى طبق اإسلام
وعاوزين يضحكوا علينا
ويأكلوهالنا

فنتصور انها بطعم الدين
وهيا بطعم العلقم

او حتى ف احسن الفروض
بطعم السياسة بلوعها وانتهازيتها و ميكافيليتها وعوارها وعيوبها ..
الخ الخ ..

فيه حزب يتشدق بالفقراء ويغازلهم
وفيه حزب يفخم ف وضع الاغنياء
وهكذا ...
على كل لون ....
ممكن تتخيل
انا بقى مبيفقعش مرارتى غير اللى ياخدوا الدين مطية لتمرير افكارهم ومكاسبهم ...
انتوا عاوزين سلطة
قولوا كدا وخلاص
متجبيوش سيرة الله ورسوله
وانكم عاوزين تعملوا امبراطورية لعزة ونصرة الغسلام والأفلام دى ..
عشان دا مش هدفكم ..
والا مكنتوش توطوا راسكم كدا
وتفضحونا معاكم واحنا اصلاااا مش معاكم ...

ايه دا
انا هرغى تانى واصدعك ليه

موشكرين يا عم ع الزيارة الحلوة دى
ومتنساش تسلم لى على نصك المسكر ..
:)

لا مفيش صداع ولا حاجة
بل بالعكس انا بستفيد بكلامك اصلا

تقريبا كل ما اتكلم ع الاسلاميين بحكى اللى حصل معاكى ف جمعة 27 يوليو

عمرو فكرى
---------

يا خرااااشى
وبقينا عبرة ...
:)

تعرف ان تعليقك دا يا عمرو فرحنى
او بمعنى ادق طمنى ..

طمنى ان اللى حصل يومها
وانكتب ..
عمل فرق
عندى وعند غيرى

انا كنت راجعة محبطة وخايفة
وبتقاسم الهموم معاكم
قلت وكشت وتقريبا تلاشت
وبنفتكرها دلوقتى كدلائل على سلوك
لازم نحذر منه ونفتكره كل مرة
نمر من نفس السكة
او نلاقى حد كدا فيها ...

انه هيستغل المشهد لصالحه
ولو زودت معاه
هيتبع مبدأ الإقصاء

اما الإسلاميون حقا
فمش دى سكتهم ولا طريقتهم ابدا


نورتنى يا عمورة النهاردة
ورفعت نعنوياتى با فتى

:)

مستعد ان قبل جميع الاختلافات فى كل التفاصيل اذا كانت الاجابة عن الرضا بحكم الاسلام واكرر الاسلام وان اختلف من اول درجة اذا كانت الاجابة بالرفض

========

كيف حالك؟

اجمل شىء ان نعرف اخبار المليونيات من شهود العيان

عرّافة ماشية تطوي أرض الله سفر
قالت لي خُط الرمل ووشوش الدكر
حكيت لها عن ثورتي إستغربت
وقالت لي مين الأغلى ؟ الناس ولاّ الحجر
وعجبي
KING TOOOT

الطائر الحزين
-------------

ازيك يا أيهاب

التعليق بتاعك دا والله اعلم كدا شكلك فيه بتهددنى .. صح ؟
(وش رافع حاجب شمال ومتوجس وبيقلب عليك البلوجر )

طيب يا عم خلاص
أرد ولا مردش ولا إيه ؟!!

لأ بقول .. أرد واغتت
(وش متخابث ع الآخر )

يا أخى وطائرى الحزين الطيب
يا غالى
انا مش معترضة على أن نحتكم للدين بتاعنا ف امور حياتنا ..
وعلى حد عملى مصر تحتكم للشريعة الأسلامية كمصدر للتشريع ..صح ؟
مش غلطتى قوى ان القوانين والمحاكم بتستهبل بقى ومبتطبقوش
تصلح الجانب التطبيقى ف القصة
لكن القوانين موجودة


انما تقولى حكم اسلامى
ل
لأن معناه ايه ؟
كلمة مطاطة ملهاش حدود
ثم ان معلش
هوه احنا لوحدنا ف البلد
يوم الجمعة لما الاخ صلاح ابو اسماعيل طلع ع المنصة انصاره هتفوا ..
اسلامية اسلامية
الواد مانمينو كان واقف جنبى
لقتنى بسرعة بتريقأ واقوله
طب امشى انتا يا مينا دلوقتى ..
ولما كرروا الهتاف بإنفعال وحماسة
قولتله اخفى من وشهم الساعة دى بقى !!
انا خفت ع الواد الصراحة
(وش بيضحك بمرارة ..)

مصر اسلامية والله
و منذ قرون
العيب ف التطبيقات مش اكتر

انما هكررلك تانى الجملة العبقرية دى اللى قريتها ف مقالات كتييييير ...
انا مش خايفة م الدين
انا خايفة من اللى هيطبقه ...


ولذا
ايه المشكلة اننا نعمل زى باقى العالم المتحضر ونمشيها مدنية مدنية ...
هوه مش ربنا ف كتابه العزيز نصحنا نسأل أهل الذكر ..
والجملة دى تسرى على كل موضوع ف الدنيا دى ..
علم وحساب ورياضة و حتى ف لعب الاطفال
اسأل الناس المتخصصة ..
لو ربنا عاوزنا كلنا علماء دين
هل كان يعجز ؟
مكنش خلق الكون بكل وسعه وعلومه

قوم انا بعد دا كله اسيب الشقة واقعد ف اوضة واحدة ؟!!!


العالم كله ماشى فى إطار سياسات محددة للحكم ...
نظك معروفة ومش هنخترعها
مشيت عليها دول و بلاد ونجحت
اشمعنى انا ؟
بالعكس بقى
انا عندى اوبشن زيادة
مش عندهم
عندى سماحة الدين واخلاقياته
اللى هتكون زيادة على الوضع العادى

بس

ثم ان الواحد عاوز فلوس على نزول المليونيات دى بقى
حق اليفط طيب
ولا حب الوطن دا هيفضل واقف علينا بخسارة كدا ولا طايلين ابيض ولا اسود ؟!!!

(وش مبتسم قوىىىىىى )


تعرف يا ايهاب
احكيلك على موقف
وابقى فكرونى يا عيال اكتب بوست عن الموضوع دا
واسميه اهل الميدان ...
عن النماذج اللى بقابلها كل مرة ..
وبترفعلى معنوياتى ولو فيا أيه ...

يوم الجمعة اللى فاتت
انا واقفة بتكلم مع راجل كبير ف السن شفته قبل كدا مرتين تلاتة
وكل مرة ييجى ف جمعة ما يعلم بيها الا ربنا ..فيها تخويف للناس وكدا
واول ما يشوفنى يقولى الكلمتين دول
يا بنتى مصر فيها بنات ارجل من الف راجل ..وفيه رجالة بشنبات قاعدين دلوقتى ف بيوتهم وانتم نازلين بيفط زى دى ومش هاممكم ...
احاول افهمه ان دا عادى وانى مبعملش حاجة واول ما تنضرب رصاصة ف الهوا هعيط وكدا .....
فجأة لقيت ولد قصادى واقف ماسك يافطة
سنه ميكملش 12 سنة مثلا
وباين قوى انه على قد حاله ..
من لبسه وشكله
ونظرة ف عينه كدا انا حسيتها ...
وكأنه بيدور على طبطبة من حد
اليافطة كانت عن العدالة الاجتماعية
وغالبا شكله مبيعرفش يقرا بس فرحان بيها ...
واحدة من اهل الميدان كانت واقفة جنبى قعدت ترغى معاه شوية ...
وفهمنا انه من اولاد الشوارع ...
بس فرحان بالثورة وعاوز يعمل أى حاجة

طبعا مش عاوزة اقولك
عشان دا تقريبا بيحصل كل جمعة ..
قصاد عينى
الولاد دى ..وسطنا طول الوقت
وتلاقى الناس بتستعين بيهم ..
نوع كدا من التعاون والإحتضان ..
اوقات الاقى حد فيهم واقف يبصلى
انا مركزة ف مكانى ومبحبش اسيبه
عينه تبقى مع عينى
وكأنه بيقولى عاوزة حاجة ؟
انده ..
واديله فلوس يجيبلى مية
او حاجة ساقعة اشربها ..ونخمس سوا هوه وحظه بقى
ف مسيرة المعلمين واحد من الولاد ..جابلى عصير قصب جدعنة عشان مقفش ف طابور طويل فعزمته على واحد جدعنة انا كمان عشان مشربش لوحدى ...

المهم
الولد بتاع الجمعة اللى فاتت
راح ورجع اخر النهار
لقيته بيعدى قصادى تانى
وماسك كوباية عصير بيعزمنى عليها
طبعا انا شكرته ..
كان بيعزم بجد ..بقلب
ونظرة عينه نظرة ملهاش وصف
وانا مبقتش عارفة ارد ازاى ...

غير ان ذنبه ف رقبتنا
العيال دى اصلا مسئوليتنا كلنا
ومسئولية البلد
ولو الواحد هينزل بس
عشان ياخد بحسهم ويحسسهم بالأدمية والونس والإحترام ويفضل يدور على حقهم وحقنا كلنا ..
المفروض ميبطلش ...
وعشان كدا عندى دايما امل
والف سبب للنزول ...
غير احوال البلد السياسية وبس ...

انما دا لا يمنننننننننننع
انى عاوزة اطلع بسبوبة م الثورة دى
واتصرفووووووا


كل الود ليك يا غالى

KINGTOOOT
--------

يا رباعياتك يا وليد
احنا فيه ايه ؟!!!

حد راشش حاجة ف الجو ولاّ إيه
امسك الخشب
غزالة الشعر رايقة قوى
و عاملالنا دماغ بهججة على رأى سوتيتة الغالية ...

حلوة الرباعيات قوى
لما احطها بقى ف آخر البوست
عشان وكأنها من قلبه ...

منحرمشى منك يا رب

يا ام يوسف كل كلامك جميل وعال العال

مين قال ان الدولة لما تكون اسلامية ده شىء يخوف غير المسلمين مين قال كدة بس؟

انت خايفة من التطبيق علشان مفيش ثقة فى الاسلاميين تمام لا احد يستطيع ان يجزم ان فلان هذا سيكون مثالى 100-100 سواء كان هذا الشخص اسلامى او غير اسلامى

لكن دورنا احنا اننا نلتف على شىء نراه صوابا معذرة الى ربنا

نعم نحكتم للتشريع الاسلامى لكن المشكلة فى التطبيق كما قلتِ - فعندما نرى بصيص نور من احد يريد التطبيق بالفعل بمنهج واضح و رؤية واضحة و برنامج واضح فاهلا به
- عاوزين نعمل ائتلاف مدونى الثورة هههه وتبقى الزعيمة علشان تطلعى بالسبوبة -

معلش فى حاجة كمان كنت عاوز اقولها بع اذنك طبعا

(العالم كله ماشى فى إطار سياسات محددة للحكم ...
نظك معروفة ومش هنخترعها
مشيت عليها دول و بلاد ونجحت)

وَإِنْ تُطِعْ أَكْثَرَ مَنْ فِي الأَرْضِ يُضِلُّوكَ عَنْ سَبِيلِ اللَّهِ إِنْ يَتَّبِعُونَ إِلا الظَّنَّ وَإِنْ هُمْ إِلا يَخْرُصُونَ

انا مش رجعى ولا ضد التقدم والاخذ باسبابة لكن كل هذا يخرج تحت عباءة حكم الله
====== هضرب لك مثال يمكن يقرب وجهة نظرى

قاضى فى دائرة

يحكم بسقوط الحضانة عن ام لانها تعمل راقصة

ونفس القاضى فى دائة اخرى يحكم لها بحقها فى اخذ اجرها لمنصوص عليه فى عقد عملها

هذا اصل المشكلة القانون يدين ويعفو تبعا لهواه

فيه قوانين طبعا وكتابات وتوصيات واوامر لكن كلها تكون مرجعيتها لكتاب الله وسنة رسولة واى اختلاف بينهما لازم يكون عندنا يقين ان هذا القانون قاصر ويحتاج لتعديل

بعد السلام والتحية
بخصوص المنشاءات والمبانى وحمياتها فى المقام الاول قبل اى شىء حتى الجانب البشرى
فى هذا الرابط سوف ترى الجانب الاخر من الحقيقة ..

https://www.facebook.com/notes/%D9%83%D9%84%D9%85%D8%AA%D9%8A/%D9%81%D9%8A%D8%B3%D8%A8%D9%88%D9%83-%D9%8A%D9%86%D8%B4%D8%B1-%D8%B5%D9%88%D8%B1%D8%A9-%D8%B3%D9%85%D9%8A/217939128269173

ربما الان الحلقة المفقودة التى تنسب فيها اعمال التخريب للمنشاءات والبلطجة للثوار وتحتسب عليهم امام الرأى العام والشارع قد تنكشف مع الوقت .. ومع كثرة هذة التسجيلات للجرائم وتوثيقها بالصور وبالفيديو ان امكن ذلك فى كل الفاعليات والمسيرات .. وقتها سوف نستطع ان نقنع المواطن او الشخص العادى ان الثورة والثوار ليست هى التى تخرب فعلينا بالحشد الفكرى للعقول اولا قبل الحشد لمليونات

تحياتى دائما لفكرك العظيم والراقى

السلام عليكم
ازيك فاتيما
عارفة مش عارف اضحك ولا اضحك
فى كل الحالات لازم اضحك واضحكوا معايا كمان
اصل الرحلة طويلة ومحتاج شوية ضحك عشان تهون
يالا ادينا معاهم للاخر اللى يعيش هيعرف النتيجة
لك الله يا بلادى
دومتى بخير

الطائر الحزين
------------

صباح الخير يا إيهاب

احنا هنخلى التعليق بعد كدا بفلوس
وساعتها هلم منك مبلغ وقدره
:)

بص يا عم
كلامك على عينى وراسى
بس معلش
انا لا اتهمك انك رجعى ولا ضد التقدم
بس يعنى ايه ...

لكن كل هذا يخرج تحت عباءة حكم الله

وتقول انك مبتخدش بالأسباب ؟!!

يعنى ايه الكلام دا يا ايهاب ؟

هوه لما العالم المتحضر يسبقنا فى وضع اطار لنظام الحكم ويطبقوه ويثبت جدواه و ينجح ..
وآجى انا أخد من تجربتهم
يبقى دا خروج عن عباءة حكم الله !!

فين الخروج هنا ؟
اذا كنت باخد بالأسباب فعلا
وبستفيد بتجارب الآخرين الناجحة
واللى اظهرت بما لا يدع مجال للشك وهرجعك ميتين سنة لورا وافكرك برفاعة الطهطاوى اللى قال ان الغرب فيه مسلمين بلا إسلام واحنا عندنا اسلام بلا مسلمين ..


النظم اللى بتكلم عليها بتطبق المبادىء والحدود العامة ف الحريات والاخلاق و القصاص والتى لا تتعارض مع الأسلام ومبادئه اطلاقا وبالعكس ..
بتؤكده ف احيان كتير ...

حتى الديموقراطية اللى ساعات تفرز عالم مستبدة ..
او طاغية
برضو الديموقراطية هيا اللى بتمشيهم
وهيا اللى بتحاسبهم ...

فاكر الاخ كلينتون لما اتبعترت كرامته
وجاك شيراك
وبيرلسكونى اللى كل شوية يجرجروه ع المحاكم ...

الصحافة كقوة وسلطة رابعة
و قوة القانون اللى بتمشى ع الكبير قبل الصغير ومن اول كسر اشارة المرور لحد جرائم الحرب ...

انا ليه ابتدى من اول وجديد واقعد الف وادور وانا عندى ثوابت
وبالعكس
بضيف ليها الدين والأعراف والتقاليد بتاعتى ...
وانتا عارف اننا كمصريين وكعرب وكمسلمين وكشرق لينا خصوصيتنا اللى بتميزنا ....

ليه فيه حالة ذعر رهيبة كدا من ان نتشوه او حد يمسخنا ؟!!!

ليه فيه حالة هلع على اسلامنا ان يضيع وهويتنا تطمس ؟!!

معرفش ليه يا ايهاب دايما احس ف النوع دا من النقاشات ان الطرف التانى (مع كل الإحترام ليك يا غالى انتا عارف انتا ايه عند اختك وبتكلم عموما) ...بحس انه حاسس بخوف بلا مبرر ...
وملوش منطق

انا قوية
قوية بإسلامى
ومش خايفة على هويتى
بالعكس
انا عاوزة ازودلها هويتى المسيحية كمان وعليهم هما الجوز ...
مصريتى

و زود بقى التراث العربى اللى شيلاه على كتافى ...

وضيف ليهم بعض من الأنسانية

وشوف المزيج دا ممكن يعمل ايه فى أى مواطن مصرى ...

يديله قوة وثقة وملوين ركيزة يتنسند عليها ...

ليه احصر نفسى فى جانب واحد بس
الدين ...

الدين ف قلبى
وبينى وبين ربنا

انا موافقة ان مسيحى يحكمنى
لو راجل كويس ويصلح لرئاسة البلد
مستعدة يحكمنى ملحد كمان ...
لأنه لما ييجى يحكمنى ف دلوة مدنية ..
هيحكمنى بمنطق الموظف اللى شغال عندنا لمدة معينة وبعدها هيمشى ويتحاسب لو غلط ف حاجة ....

انما اللى هيحكمنى فى دولة بنظام حكم اسلامى ...
هيفرض عليا شروطه وقواعده
ومفيش داعى نفتح فيها بقى
لأنها تقريبا كلها هتندرج تحت بند الحريات العامة
يعنى هيفرض عليا حجاب معين
وتعامل مع بشر معينين
واماكن معينة
ووظايف معينة
الخ الخ ...

ومتقوليش لأ مش هيحصل
اذا كان حاصل من دلوقتى يا عزيزى
اومال لما يمسكوا سلطة ...
هيعملوا ايه ؟!!!


تعرف يا ايهاب انا مشكلتى معاك ايه ؟!!!

انك متدين بجد
انتا انسان محترم
وفاهم دينك كما انا اتمنى لحد بعرفه
انتا راجل معتدل
ممكن ميعجبكش حجابى ومكياجى مثلاً
وكتاباتى احيانا
لكن انتا بتحترم حريتى
و رغم تحفاظتك بتحترمنى كاخت
وتنصحنى وتحافظ عليا ...

انا نفسى لو كل الأخوة الإسلاميونبيفكروا زيك
ويطبقوا تفكيرهم دا ف الواقع ..
ساعتها يا عم اقولك انا موافقة

لكن
ودنك منين يا جحا
منخليها وسطية معتدلة
زى ما طول عمرها ماشية كدا
الدين ف القلوب والكنايس والجوامع والتصرفات الشخصية
اما السياسة والحكم و الأقتصاد وغيره ...من جوانب اخرى ف الدولة
فللجميع و بلا هوية دينية

العيب ف الناس
مش النظام
ولو غيرنا الفاسدين
الدنيا هتمشى شبه صح

عشان مفيش دنيا صح ..تامة
والا نبقى ف الجنة بقى
:)

انا طولت ورغيت معلش
بس انتا مصر تنكشنى

وحلوة حكاية ائتلاف مدونى الثورة دى
طيب
ادونى فرصة ازورلى كام صورة ليا ف الميدان ...
واقول انى كنت مع الثورة من اول يوم بس كنت باعتة مدونين شباب يحضروا المظاهرات ...
وكدا ...


:))

حواديت
-------

صباح الخير يا أسامة

لأ معلش
الناس قبل المنشأت
وقت المفاضلة بينهم ...


والذين يحكمون البلاد لازم يدركوا
ان لما مبارك قعد عقود يفضل المادة (فلوس ومنشأت وثروات) على بنى شعبه ..
دفع التمن غالى

انتا ليه بتدافع عن بيتك يا اسامة لما يتعرض للنهب ...

عشان شوية الحيطان
والحاجات اللى لو ولعت حريقة تجيبها كوم رماد ؟!!!
ولا بتدافع عن ذكرياتك و حرمتك وممتلكاتك الشخصية اللى انتا عملتها كبنى آدم ...


انا من مجاذيب التحرير
لكن التحرير مش ارض وسما واسعة فوقه بترفرف فيها الأعلام والهتافات ...

التحرير هوه الناس اللى فيه
اهله اللى اهم من أى حاجة تانية


قصة سمينة دى انا مش فاهمها
ومش عارفة الحقيقة فين
الأخت ريم ماجد امبارح جابت سخص بيقول ان صاحب الصورة دا مش سمينة البلطجى ..وحتى يظهر سمينة على وش البسيطة ويعترف ...
ولا هنعرف فين الحقيقة

انا اللى يهمنى دلوقتى
المنشأت دى تبقى محمية طول الوقت
من المخربين ..اللى بجد
ومتبقاش حجة ونوع من المن علينا
بينما هو واجبهم

مش عاوزين يقوموا بواجبهم
يسيبوهالنا يا جدع ...
واحنا نقوم بالليلة
ولا هنذل حد ولا حاجة
ماهى حاجتنا برضك ودافعين فيها

:)

نورتنى

مدونة رحلة حياة
--------------

مالك بس يا ابا معاذ ؟

ليه روح الغحباط دى

لأ
بقولكم ايه
انا مش طالبة معايا انحباطات خالص بقولكم اهو ....

اييييه ؟

لسه الثورة مخلصتش
ولا جابت ورا
لما تبقى تفطس وتموت
(بعد الشر)
هيبقى عندنا متسع من العمر نحزن ...

انما دلوقتى
لا وقت لليأس

روق كدا
انتا موضوع الغنتحار اللى بقاله كام بوست دا أثر على معنوياتك ولا إيه ؟!!!

:)

المشير في الفيوم امبارح قال احنا صابرين صابرين صابريييين .....

وانا بقوله .... بدل ما تشيل في نفسك .... طلقنا ينوبك ثواب :(

متعبناش متعبناش
الحرية مش ببلاش


مش في حد عنده استعداد ولو للحظة ان حريته تكون في ايد حد غيره

فاتيما
روح القلب الملائكية

انا ياما يا فاتيما قلتلك تكتبى عن الوجوه الكثيرة الجميلة فى التحرير
انا مش اول ما جيت سألتك على عم محمد الرجل الاسمر البسيط اللى شايل لوحة و غاب الجمعة اللى فاتت
تعرفى يا فاتيما انا كنت عايز أسالك عن الولد اللى كان بيعزم عليكى بالتمر بكل حب و صدق بس نسيت
تعرفى كمان ان اثناء الثورة كان فيه بطولات لاطفال الشوارع على العموم مش موضوعنا دلوقتى

تسمحى اخش و احشر نفسى فى حوار
الجمعة اللى فاتت كنا بنتكلم فى الموضوع ده
للأسف احنا بنحط يفط و شعارات و بس
حد طلع و قال يعنى النظام السياسى الاسلامى
حد كلمنا عن الاقتصاد الاسلامى يعنى ايه
هو كل حاجة يحطه فيها الاسلامى صك الحماية
الاسلام اكبر من ان نضعه و فوقه عنوان
لو قالوا ده اقتصاد اسلامى و طبقوه و فشل
يبفى اللى فشل الاقتصاد و لا الاسلامى و لا الاقتصاد الاسلامى
الاسلام دين يعلو بقيمة الفرد و الجماعة فلو صلح الفرد صلحت الجماعة
معادلة سهلة و حلوة بعيد ان اى تشنجات و كلكعة
مش عايز اطول عليكى
سلام يا ام جو

يا تدونا المنشئات ... يا هنوريكوا الوش التالت :D

ان شاء الله بكرة احلى بكتير كمان

مين كان يصدق ان انهاردة يبقى كدة ويبقى فى يوم لينا صوت وراى ومسموع كمان

مشينا خطوات كتير ايجابيه وناجحة وعلشان كدة فيه امل فى اللى جاى

بس كل حاجة فى وقتها

وزى ما قلتى بالنا طويل والفرحة مش ببلاش

علشان حتى نحس طعمها

تحياتى ليكى :)))

فتاه من الصعيد
--------------

مين اللى صابرين فينا يا مروة
معلش
خليه يتسلى
:)

كل سنة وانتى طيبة يا حبيبتى

كــــيارا
---------

ايوه كدا يا كوكى
احب انا الناس المتفائلة
والصامدة
وبمناسبة الصمود
كيف حالك يا بنوتات يا عسولات ؟

يا رب تكونى ف احسن حال

بوسات وحضونات ومصاصات وكدا ...
:)

ابراهيم رزق
-----------

ان شاء الله هكتب يا ابراهيم
انا عاوزة أسجل كل الذكريات دى
بس ف بوست مميز ويكون فارق
عندى ع الأقل

بس شايفة ان أوانها مجاش
...

لما الثورة تنتصر ان شاء الله
يمكن أعرف اكتبه زى ما حساه جوايا


اما بخصوص النقاش ...
فنتا عارف رأيى
و معاك ف كل كلامك

احنا عاوزين ندى العيش لخبازه
مش اكتر


سلامى لسالينازة القمر
وزياد ومامته
واشوفك دايما على ألف خير

catroz
------

اهلا يا روزا
اسمك غريب
بس جميل ولازم يبقاله دلع ..
خليها روزا بقى
ماشى ؟

الوش التالت ؟!!
فكرة برضو
بس متهيألى الشعب المصرى عنده اكتر من كدا ومستنى الفرصة

المهم
انها منشأتنا
ميقعدوش يذلونا بقى ف بيان رايح وبيان جاى

نورتى روح قلب ماما يا فندم
...

زهرة
----

اهلا بيكى يا زهرة


وبحب الناس الثايرة
المتفائلين علطول
اما العالم المتشائمة
أنا لأه
مليش ف دول
خااااااااالص

:)

نورتى روح قلب ماما

إرسال تعليق