.

.

تــوثــيــقــــا لما حـــــدث .....  

Posted by: فاتيما in



----------------------------------------
---------------------------------------
----------------------------------------------


يا صباح الخير 


هل يجوز ف وسط هذا الخراب
انى أقولها ؟




أعتقد ذلك و من حقى 
بصفتى مواطنة فى هذا البلد 
و بتعذب لعذابها من قبل الثورة وبعدها 
عذاب آه 
لكن ... عذاب عن عذاب يفرق



لأنى قبل الثورة كنت مغصوبة 
يتحرق دمى كل يوم بأخبار واحوال 
تخلى الواحد يكره نفسه ويلعن مصر 
بعشق زى الداء 




لكن بعد الثورة إخترت بإرادتى 
أنقهر عشان بلدى 
وأحزن كما ينبغى الحزن
ومحدش يجبرنى تانى على الخضوع  



 البشر اللى ربنا ميزه 
عن باقى مخلوقاته بالإختيار 
ادانا النعمة دى عشان محناش ملايكة
و محناش شياطين كمان 
و كل واحد وشوقه بقى 
يختار يبقى قد المسئولية ولا ميبقاش
يكون مخير ف الحياة ولا ييجى ويروح 
وحد بيمشيهاله وملوش حس ولا خبر
ولإن محدش معصوم م الأخطاء 
 ربنا فاتح باب التوبة 
و فاتح باب الرحمة 
و بيقولنا بعد تجاوز  الأخطاء ...
فكروا و اعقلوا 
ولما الواحد يفكر ويعقل ... يوصل لمنطق
بعده الأشياء مهما اتشقلبت 
بتبقى واضحة 
وثابتة ولا مجال للشك فيها 




ودا اللى بيحصلى  ..
وحصلى اول ما شفت احداث ماسبيرو 
على شاشات الجزيرة وغيرها 
وبقيت اتابع على تويتر و المواقع الاخبارية
التفاصيل لحظة بلحظة 




مكنش عندى ذرة شك واحدة 
ان اللى ف المسيرة دول ناس سلميين 
وان فيه اللى بينهم  ف اللحظة المناسبة
ادى اشارة البدء للمجلس 
يطلق كلاب الشرطة العسكرية ع الناس 
عشان يدوسوهم زى الصراصير 
والتعبير مقتبس من مقالة لاحمد خالد توفيق 
عن وصفه لحادث دهس متظاهرى القصر العينى 
ف اوائل ايام الثورة 




مكنش عندى ذرة شك واحدة 
ان المسالة مقصودة 
وان البلطجية هتأتى من كل حدب وصوب 
عشان تعمل كماشة 
زى ما حصل ف العباسية و غيرها 




ومكنش عندى ذرة شك كمان 
ان التوقيت مقصود 
عشان يعمل حالة الذعر المعتادة 
والاعلام الداعر يهيج 
ويروح الأقباط ف الرجلين كالعادة 
والناس تقعد تطبطب على بعض 
ويتجلى شبح الفتنة و الحرب الاهلية 
و نجرى بسرعة نقول عاوزين انتخابات 
ونقبل بأى مناظر و اى وشوش عكرة
واى دستور و أى رئيس بالمرة 
عشان نعبر اللحظة المقندلة دى
و المهم المجلس يلم مدرعاته وعساكره 
ويرجع الثكنات ... وهيبقى كويس 
بس انتوا كمان خليكوا كويسين 
و اقعدوا ف بيتكوا 
بلاها مظاهرات 
و لا اعتصامات 
و لا ناس مندسة بينكو 
ودعونا نسطوا على حكم البلاد فى صمت
وبلاش دوشة لنقتلكو تانى ....




مش دا اللى حصل بالفعل ؟!!
شغل التوقيع والتحريض وتزييف الواقع
المُحن الإعلامى 
اللى قام بيه التلفزيون الرسمى والجرايد
و بلاعات الطفح السياسى اللى انفجرت 
ف وشونا فى هذه الليلة 
عشان تحرض جزء من الشعب ع الشعب ؟!


و اتابع بمنتهى الحزن على تويتر 
ان مسلمين نازلين يضربوا ف مسيحيين 
لمجرد انهم سمعوا الاعلام بيقول 
جيشكو بينضرب ؟!!





انا مش هتكلم عن المجلس العسكرى 
لأنى اتعلمت من الدنيا 
ان 1 و 2 هيوصولنى ل 10 ممكن 
لكن يوصلونى ل  ب أو جيم
مينفعش
يعنى فكرة ان عسكر مبارك هيسلمونا
لقيادة مدنية منتخبة وطنية و بسلاسة كدا ...!!
معرفش انا حد مصدقها ازاى دى بصراحة  !!




بس اللى متاكدة منه ان
المجلس العسكرى صنيعة مبارك 
ومن اول ثانية استلامه الحكم و من قبلها 
وهو يعمل ضد الثورة
ولصالح نظامه القديم 
مش حفاظ بس على مبارك و الولاء له
وانما حرصا على وجوده و على رضا امريكا 
و اسرائيل من وراها 
و أى حد هيخليه يفلت من العقاب 
والمحاسبة التى تنتظره 
واللى بالمناسبة فاتورتها زادت جدااااااا
و كمان طابور شهدائها بيطوووووول




أول ما تحصل حاجة زى دى 
أسأل روحى دايما اول سؤال 
واهم سؤال 
من المستفيد ؟!!!
الإجابة تعرفنى مين خطط 
وبدأ و أشعل النيران ووقف يتفرج عليها
وهيا بتخرب و تبقى كوم رماد 
وأظن ان اللى من 9 شهور 
كان بيقول المجلس ملوش ف السياسة 
واصلهم مرتبكين و دول مش قاصدين ..الخ الخ 
دلوقتى بعد كل الحوادث اللى مرت 
لازم يراجع نفسه بجد 
ويبطل يضحك على روحه
ويعترف ان هذا المجلس واكل ناسه 
و بيدوسهم اهو بالمدرعات كمان
عشان اللى مش مصدق ... يصدق 





اهو
مفرقش عن مدرعات الداخلية 
و لا عساكره فرقوا عن بتوع الأمن المركزى
ولا سياساته الامنية اختلفت عن امن الدولة
ولا محاسبة جلاديه بتحصل 
زى ما كان حاصل ايام المخلوع 




ومن قهر لقهر 
يا قلبى لا تحزن 




أيوه لا تحزن 
لأن مفيش وقت للحزن 




الثورة لم تنتهى بعد 
واللى تعبان يرّوح 
او ياخد جنب ويلقط نفسه 
بقولها تااااااانى 
احنا المرة دى اللى بنتخار التعب 
والمفروض نتحمله و برضا




زمان كنا بنمشى جوا الحيطة وقابلين 
فضلنا نحط راسنا ف الرمل و نقبل الذل 
متصورين اننا بننجو بروحنا 
ودا مكنش حقيقى 
كل نفر فيكو .. كان بيعانى فى حياته 
ومشاكله التى تبدو شخصية .. ف الحقيقة
مكنتش كدا 
كدا نتاج عصر مبارك بكل ما فيه من عوار 
خدونى مثل و تقريبا كلكم عارفين
حكايتى مع يوسف
كل تفاصيلها من الألف للياء .. 
مكنش سببها 
خيابتى بس او سوء حظى 
او عدم ادارتى للازمة



الحقيقة الكبرى 
ان السبب انى عشت فى ظل نظام 
لا يحترم القانون و بيشجع البلطجة جدااااا
والمحسوبية والرشاوى 
لدرجة خلت ان سهل جدا أتظلم 
وصعب جدا أخد حقى 
وانى اوصل ف النهاية لأنى أتنازل عنه خالص
عشان أقلل الأضرار قدر الممكن



كام واحد فيكم حقه 
اللى كان واضح وضوح الشمس 
ومعرفش ياخده ..
لأن مفيش ضهر و نفوذ يسنده ؟؟؟
وكام واحد فيكم اتبهدل فجأة 
لأنه معرفش يصد أذى جاله من الهوا كدا 
وهوه لا بيه ولا عليه ؟؟؟
كام حد فيكم اضطر يظلم او يتظلم 
عشان يحمى نفسه او حد بيحبه ؟؟؟
وكام واحد فيكم فكر يسيب البلد 
ف اقرب فرصة عشان مينفعش يعيش فيها
ويبنى حياة ويتجوز يقبل يخلف عيال
ليتبهدلوا زيه ؟؟؟؟!






انا اكتشفت من زمان ...
اننا بمشكلاتنا مش امور شخصية 
احنا  انعكاس لعصر مبارك بكل انحلاله 
اللى انسحب على كل المواقع والاماكن
بما فيها 
المؤسسة العسكرية 





ولهذا لما العسكر مسكوها .. 
بقيت مذهولة من كم الطنطنة والترحاب
من بعض الناس
(المحترمة) عشان ابقى محددة 
وهما بيشيدوا برجال المؤسسة دى
و يقولوا فيهم شعر 
وهم يتجاهلون القاعدة المنطقية الاساسية
بتاعت اللى يختاره مبارك .. أكيد 
يبقى مطابق لمواصفاته
ويبقى نجح ف اجتياز اختبارات الولاء 
وبالتالى .. المرء على دين خليله 
ولا إيه ؟!!!
1+1=2 
مش كدا ؟






الناس المحترمة دى على فكرة 
ابتدت تغير رأيها دلوقتى وتكتب وتعتذر
وتقول الشباب كان عندهم حق للمرة التانية 
لما قالوا المجلس  ... يمشى 
زى ما قالوا ف اول مرة ... مبارك يمشى
وأنا اُكبر فيه اعترافهم ولو انه جه متأخر 
بس تأتى متأخرا أفضل ..  من الا تأتى أبدا 




اما العملاء الخونة ... فلسه مفيش فايدة 
اول ما ولعت الاحداث ف ماسبيرو 
خرجوا ف حسابهم على تويتر يهدوا الجو 
ويقولوا الزموا بيتوكم و براحة شوية 
ودا مخطط متمشوش وراه وحفظ الله مصر 
والكلام الاهطل دا ...
و محدش يفتكرنى بلقح بالكلام 
على بلال فضل و لا حاجة ...
لأنى فعلا أقصده ...





الناس المرتبكة بقى لحد دلوقتى دى 
ومش فاهمة ايه اللى بيحصل 
انا عذراهم شوية 
بس عاتبة عليهم ... شويتين 
يا جماعة شوية تفكير وتحليل و قراية 
هتعرفكوا ان لا فيه فتنة طائفية ولا نيلة 
وان الأقباط أغلب م الغلب 
وان فيه حد من القاهرة زق عليهم 
شوية ف اسوان يبسك عليهم 
يقرفوهم ويولعوا الدنيا 
الناس كتر خيرهم كالعادة .. مسالمين 
واخلاق الدنيا فيهم .. قالوا هنعمل مسيرة 
سلمية كالعادة و لو كانت مش سلمية ..
كان زمانها خدت شكل تانى فعليا
ولا كان كل اللى استشهدوا دول .. ماتوا 




الناس نزلت تعبر عن رأيها سلمى
معاهم مسلمين و قوى سياسية وغيرهم
ومشيوا ف اتجاه المسيرة المحدد 
وحافظوا على الهدوء وضبط النفس ...
لغاية ما حد اتدخل وولعها 
لمصلحة الاطراف الاخرى  ف توقيت معلوم




محدش يتفذلك ويقولى ايش عرفك ؟
عشان هقوله علطول اللى منزلش مظاهرات 
ولا مشى ف مسيرات 
ميتفذلكش هوه علينا و يقعد يفتى 
وهوه قاعد ف بيتهم بيتفرج على تلفزيون
عميل مذيعينه يا اما مأجورين يا اما أغبيا 
ووزير اعلامه أصبح يستحق و بلا منازع لقب 
وزير الإعدام المصرى ... مش وزير الأعلام






عاوز تعرف الحقيقة 
قلب بين القنوات كلها 
و تابع ع النت والمواقع واقرى كتير 
إسأل الناس اللى تعرفها وتحترمها 
انا شخصيا ..
مش كل حد اقراله او اتابعه على النت 
وتحديدا تويتر بصدقه
فيه اسماء أثق فيها بكتر متابعتهم
بقالهم عندى مصداقية ..
وفيه ناس لو حلفلتى ع المية تجمد ..
مصدقهموش




فيه ناس مغرضة جدااااااااااااااا
وفيه ناس بوشين 
فيه ناس هبلة ومسيرة 
وفيه ناس صادقة ومخلصة 
فيه ناس خلقها خرم ابرة 
وفيه ناس سكوتها بليغ ومعبر 
فيه ناس ماشية على سطر وسطر 
لأنها متبلبلة ومش فاهمة قوى 
وفيه ناس امشى وراهم وانا مغمضة 
ولو انى تعلمت برضوووو ...
مديش دماغى لحد نهائياً 



ابصمله عميانى ليه ؟
ما دماغى موجودة اهى اشغلها بمعرفتى
ليه استنى حد يملاها بأفكاره هوه بس 
ربنا مدينى النعمة .. واااااااااااسعة 
اضيقها ليه على روحى
واسيب الشقة كلها واقعد ف اوضة واحدة ؟!!!






مشكلة البعض اللى ملاحظاها 
هنا ف المدونات 
وعندى ف الشغل والبيت ..الخ
ان محدش عاوز يا اخواننا يتعب كمان شوية 
محدش عاوز يتحمل نتيجة ما توصل اليه تفكيره
عاوز حد يريحه ويقوله تحليلات جاهزة 
يمكن لأن الكل منهك وتعبان 
بس معلش




محنا نساعد بعض و دا المفروض 
كلنا بندور على حد نروحله .. يوزن الامور 
بس اللى بيوجعنى فعلا .. 
مذهب الأنا ماليزم
ودا اختراع اخويا الكبير 


الأنا ماليزم حزب الناس اللى مالهاش دعوة 
بتوع أنا مالى يا عم .. واياكش تولع 
جحا اللى كل شوية يقول
ما دام بعيد عن بيتى 


عندى زميلة ف الشغل
من انصار الاناماليزم
من اول يوم ثورة و هيا ضدها بشدة وعنف
عشان خايفة على عربيتها تنسرق 
و خايفة تكلم الدكتور ييجى لباباها .. ليعتذر 
خايفة يمسك البلد الأخوان .. فيجبروها تتجحب
خايفة من حاجات كتييييير قوى .. منطقية 
لكن جنب المنطق دا 
لما تيجى تكلمها عن الظلم والبهدلة والحرامية 
تتفاجأ انها مش مهتمة بكل دا 
والمهم البلد ترجع تانى لأيام مبارك 
عشان الاستقرار والامن !!!
استقرار النهب وامن القهر ....
مش مهم قانون الطوارىء يستمر 
المهم ان حياتها ترجع زى ما كانت 
تركن عربيتها تحت بيتها وهيا مش خايفة 
وبس 




هذه الزميلة عندى قدرة ادخل معاها 
ف جدال لا ينتهى 
وغالبا بينتهى بإنتصارى 
واحساسها بالحرج وتضامن الاخرين معايا 
لكن ... مشكلتها و مشكلتنا جميعا
اننا متصورين ان المشاكل لو بعيد عننا 
يبقى خلاص 
عمرها ما هتيجى ف يوم وتقربلنا 
ودا مش حقيقى بالمرة 






وارجع تانى اقولكم خدونى مثال 
لحد ما اتخرجت واتجوزت كنت زى الفل 
الأحوال ماشية وابويا راجل الكل 
يتجنبه من شدته وجبروته
و خلفت يوسف و الدنيا حلوة 
وأذ فجأتن تنقلب الاحوال وزى الدمينو كدا
بابا يمرض ويفقد قدرته على حمايتى 
الوجه القبيح لناس يظهر بوضوح 
و تبدأ المشاكل والازمات 
اقسام وقضايا وعنف وبهدلة 
شقتى تضيع وفلوسى تخلص و حريتى تتهدد
وف النهاية اهرب بإبنى من البطش 
وتضيع اجمل 6 سنين من عمرى
وعمر طفلى ودا ليه ؟
لأن المحاكم فيها فساد لا ينتهى 
والأقسام فيها كم بشاعات لا ينتهى 
والقانون فيه ثغرات انتهاكها ..لا ينتهى 
والمواطن المحترم ملوش مكان 
ولازم يبقى مش محترم عشان ياخد حقه
ويلجأ لبلطجية هوه كمان ...
يا اما يستعوض ربنا وييجى على جنب 
وينجو بنفسه .. دا لو ليه عمر ونصيب




اللى زميلتى ف الشغل متعرفش 
انها لما سكتت زمان زيها زيى 
و زى ملايين الناس ف البلد دى ..
سكتوا ع الظلم 
فضل يقرب يقرب يقرب .. لحد تحت بيتهم 
ومبقاش ينفع يتجاهلوه




واللى محصلوش حاجة لحد دلوقتى
دا محظوظ مش اكتر 
ولو انى اشك ان فيه بنى آدم 
خالى من الهموم فى هذه الدنيا ؟!!!




هيا وغيرها دلوقتى عاوز البلطجى بتاع زمان 
اللى كان بيفرض عليهم اتاوة
ويبهدلهم ف الراحة والجاية 
عشان يحمي الحى 
كالعادة 
ومش مهم كان بيقتل مين و يغتصب مين 
ويسرق قوت مين ..
المهم انها فى امان منه .. وبس 
دا المنطق للأسف 
اللى ناس كتير بتفكر فيه 
وعاوزة البلطجى بتاع نجيب محفوظ 
(البلطجى مش الفتوة ) يرجع عشانه 
ويرجعلهم تانى
ومش قادرين يفهموا 
ان اوان المشى جنب الحيط .. راح 
و احنا دلوقتى ف توقيت مينفعش فيه 
الا انك تختار 
يا تختار تواجه البلطجى وكلابه 
يا تختار تبقى عاوزه يرجع تانى وتستسلم
لأن مفيش حل وسط على فكرة ...
مفيش 
 اختيارك انتا 
ولازم هتدفع التمن 
الناس اللى اتعودت تدفع التمن زمان 
لازم يفهموا ان المرة دى 
الأتاوة تسعيرتها هتعلى .. و هتكون أفدح
اما اللى معندوش استعداد يوطى راسه تانى
ويبتدى زمن جديد 
فلازم يكمل ولا يتملكه أى يأس 
لأن مفيش وقت لكدا 




اللى حصل من يومين دا 
مجرد فصل ف كتاب المقاومة 
ابطاله كانوا مينا ومايكل .. و 23 شهيد 
و اكتر من 300 مصاب ...
هنسيب حقهم ؟
ولا نستقتل لحد ما نخلى مصر 
زى ما بنتمنى
وزى ما هما كانوا بيحلموا ؟




كل واحد فيكم يتخيل مينا اخوه 
او ابن خاله او زميله ف الكلية او الشغل
او جاره او حتى واحد كان ماشى جنبه 
ويسال نفسه
الشاب اللى زى الفل دا 
ضحى بعمره ليه ؟
كان خارج و هوه عارف ان نسبة الخطر 
موجودة وعالية ودا بالمناسبة 
موضوع شبه منتهى 
عند اغلب اللى بينزل مظاهرة 
او اعتصام او مسيرة من زمان ودلوقتى 




مينا نزل ليه ؟
و مات ليه ؟
قناعاته اكيد و اخلاصه 
لكن ... مينا مش نقطة و خلص السطر 
لسه فيه تانى 




اللى مات عشانهم 
والمبدأ اللى نزل يدافع عنه
ومصر اللى حلم بيها و ثار لها 
دول ايه ؟




فينيتو ؟!!
يعنى نسمع الأخبار ونكئتب
ونطفى التلفزيونات
و نقول الله يرحمه  هوه واللى زيه
وندخل ننام 
ولاّ نكمل ؟!!!!!!!




اللى مش عاوز يكمل ... مللاً 
يمشى 


واللى مش قادر يكمل ... تعباً 
يستريح شوية ويرجع


واللى مش مقتنع بالثورة ...  اصلاً
يشوفله بلد تانية
عشان لبلد دى مش قد مقامه
وبلاها مصر المزعجة دى اللى واجعة 
راسه ليل نهار ومخلياه مش عارف 
يرجع زى زمان



وكأن زمان احنا كنا اليابان ف تقدمها 
و امريكا ف نفوذها 
وانجلترا ف ديموقراطيتها 
وفرنسا ف ثقافتها وتنوعها
وتركيا ف شطارتها 
وايران ف عنجهيتها
واسرائيل ف ترسانة اسلحتها 
...الخ الخ الخ 





امبارح بعد الشغل قررت اروح
المستشفى القبطى عشان اتبرع بالدم ...
كان عدد كبير واقف حوالين الباب الرئيسى 
والجانبى ولما حاولت ادخل منعونى 
وقالوا روحى مستشفى العذرا ف الزيتون
ف الطريق من رمسيس للمستشفى 
عربيات محروقة وناس بتصورها 
لم يكن ليس لدى أدنى ذرة شك 
ان اللى حرقها بلطجى وفقط 
شخص عاوز يخرب ويروع 



روحت هناك لقيت التبرع ف الكنيسة
الناس عند المستشفى وف الكنيسة
وشوشهم فيها غضب ممزوج بحزن ...
بس غضب اكتر




لأول مرة استشعر ان الغضب دا 
و انا مش مضطرة اعتبره موجه ضدى
زى ما حصل ف حادث القديسين وغيره ...
ف الحوادث دى كنت بستشعر رد فعلها
سريعا وبحس انى لازم ادافع 
واحسن الصورة لا شعوريا ...
واشرح ان الأمن السبب
بس محدش وقتها كان مستعد يسمع 
والحوار كان بينتهى بشكل جدلى 




المرة دى ...
العدو كان واضح ومشترك 
ف الكنيسة كنت تقريبا الوحيدة المحجبة 
وكان فيها مئات اقباط واقفين وجايين يتبرعوا 
العدد كان زيادة لدرجة ان القسيس 
طلب انهم يملوا الاستمارات 
ويروحوا ولما نحتاج دم هنتصل بيهم 
استلفت قلم من احد الواقفين 
كتبت استمارتى وسلمتلها لحد بيجمعهم 
كنت عاوزة اكلم أى حد واعزيه 
بس الوشوش كانت مستغربانى 
وحسيت انى لو اتكلمت هبقى كأنى بزايد
فقولت امشى من سكات 



وانا خارجة لقيت بنت بتطبطب عليا 
وبتتكلم بصعوبة عشان الدموع خنقاها 
وبتقولى انتى شايفة العدد كتير 
بس شكرا انك هنا
معرفتش ارد غير انى اقولها ..
إن ربنا يصبركم ويصبرنا جميعا
وان شاء الله دمهم مش هيروح هدر





المشهد قصاد المستشفى القبطى 
كان بيقول انهم مش هيخرجوا الجثامين
الا متأخر عشان ميتعملهاش
جنازة شعبية مهيبة 
ولأن الطينة م العجينة  .. وخلاص عرفنا 
المجلس بيفكر بطريقة مبارك وامن دولته 
لقيت ان رجوعى تانى ع المستشفى 
مش نافع وانى مش هلحق اقعد 
لحد القداس والجنازة كلها ....
فروحت 
  

ف السكة كنت بفكر 
ليه بتصرف بشكل تلقائى كل مرة 
بروح فيها ف حتة 
وبسأل نفسى 
 
انا بعمل كدا ليه ؟
هوه انا فارقة مع أى حد ؟

نزولى التحرير فارق مع حد ؟
هيرجع اللى مات ؟
هيغير الأحوال ؟

هيخلق مصر جديدة ؟

ابقى عبيطة لو قولت أيوه ..

لكن ابقى حالمة .. متفائلة .. لو قولتها 
حلم صعب ؟

وماله ؟

من امتى كان حد بيحلم بالسهل  ؟
و قريت مرة حد بيقول 
ان هذا العالم لن يتغير سوى بالحالمين
 و الراضى بقليله مبيتحركش خطوة 
واحنا اتحركنا ...
المفروض ... منقفش 



انا أنزل .. وانتا .. وغيرنا 
ساعتها نعمل فرق ..
ونغّير 
هتاخد وقت 
و ماله ؟
فيه حاجة ف الدنيا ببلاش 
و الوقت مش بس دقايق وثوانى
الوقت استعداد  وخطط واعصاب 
وقوة تحمل وبصيرة و طولة نفس 
طووووووووووولة نفس




فيه ناس بتقول الحل السلمى لا يجدى 
انا موافقة
وناس بتقول نزول التحرير دايما و لازم 
انا موافقة 
ناس بتقول انتقال للمدنية بإنتخابات 
انا موافقة 
وناس بتقول نهدى شوية يا جماعة 
وانا برضو موافقة 



تعالوا نجرب ال ت ت بتاعت زمان 
فاكرين التوالى والتوازى  ف درس العلوم 
ايه رأيكم نمشيها الإتنين ؟
يعنى كل اللى فات دا سوا 
بالتوازى والتوالى معا 
اللى عاوز مواجهة المجلس .. فليتفضل
والى عاوز يمشيها مظاهرات ومسيرات .. يلا
اللى عاوز يهدى شوية .. براحته 
واللى عاوز انتخابات ..يستعد 
 نمشى سوا كُل فى طريقه




ميكسرش مقاديف التانى و لا يخونه 
ونتماسك ضد العدو الاوحد 
العدو دا ضد الثورة أى كان مسماه 
والعباية اللى بتجمعه 
واللى انا شيفاها المجلس العسكرى 
وذلك بإعتباره الحاكم الاوحد رسميا قدامنا
نتكاتف عشان نقف قصاد أى محاولة 
لإعادتنا للوراء 
وضد أى محاولة لتكميم الحرية 
و مصادرة بكرة بتاعنا



انا مش عارفة
 بكرة ايه ؟
بس عندى يقين ان ربنا مع الحق
و ان هذه الثورة حق بيّن
من يوم 24 وحتى اليوم 
و يقينى لم يهتز لثانية واحدة بذلك 
وعندى امل ان ييجى يوم ما 
ومضطرش اكتب الكلام دا تانى وتالت ورابع 
وان كنت لن امل ... ان شاء الله 


كنت عاوزة كمان اقول ...  حاجة تانية 
أن صحيح كلنا فينا اللى مكفينا 
و عندنا مواجعنا 
بس يمكن طيب 
لو نحاول نخلى مواجعنا تصغر  
و تدوب ف قلب وجع الوطن
فنكتشف اننا احسن من غيرنا 
ناس و بلاد وشعوب 
يمكن ساعتها  
لما تحصل حاجة جديدة 
ميجلناش ذعر ورعب وربكة 
و نسأل مين العدو ومين الحبيب ؟


و بمناسبة اننا احسن من غيرنا دى 
و اللى كانوا بيقولوا بصوا لليبيا وسوريا 
و اللى لسه بيقول جيشنا .. واخر عمود 
معلش بقى 
الجيش اللى يدوس على جثثنا 
ويدهسنا زى القطط والكلاب .. مش جيشنا 
دا جيش قائده الأعلى بس 
و دنتوا معملتوهاش مع الأسرائيلين
لما قتلوا منكو ستة ع الحدود
جايين تفوقوا علينا احنا ؟!!!

وجــــيش طنطـــاوى يا جـــــبار 
غلبتــوا معـمـــر و جـــنود بشـــــار

----------------------------------------------
----------------------------------------------
مصر سكنت فى القصيدة 
ومش عايزة تسيبها 
نصيبى ونصيبها 
مصر اللى عمرى ما حسيت انى حاكتبها 
كتبت نفسها فى كتاباتى 
يعنى لما اتكلم مع عن امى واخواتى 
مصر تلبس ايشارب اخضر 
وتقعد معانا فى الشمس 
اتكلم عن خالتى فتحية
مصر تعمل سلطة خضرا بملح خشن وجرجير
أطلب لقمة عيش 
تروح تجيب من المشنة تحت السرير 
اروح بيتنا القديم 
ألاقيها قاعدة على السلم بتقرا مجلة سمير
أنادى على امينة 
الدلتا تبقى دراعاتى 
أطلع على المينا 
الاقى بنات بحرى بالفساتين اللى بتلمع
والمناديل باويا 
بهاء يقولى : دول اخواتى .. والنيل أبويا 
أسافر بعيد 
الاقيها راجل عجوز لابس بييريه
نمش العجايز على ايده 
والفرح والحزن راسمة تجاعيده 
و دموعه فى عينيه
طب إيه ؟
أبدا 
مصر هي الذكريات التى لا تنتهى عددا 
و ما يهمهاش الزمن 
بص لفوق كدا 
سرب الحمام اللى طاير 
و الطيارات الورق 
ايه الفرق اللى بينهم 
الاتنين ليهم صحاب 
بس واحد بيتكلم مع الطيارة 
بخيط الدوبارة 
و التانى بيتكلم مع الحمام بالصفارة 
و الأتنين لامسين السحاب 
شفت بقى 
ساعات مصر بتبقى سما 
و ساعات بتبقى وطن 
و ساعات بتبقى كتاب 
ساعات تلمسها بإيدك 
و ساعات تلمسها بقلبك 
و ساعات تبقى هيا الطيارة والحمام 
اللى ماليين السما بهجة 
ساعات بتبقى فى القصيدة نغم 
و ساعات بتبقى هيا اللهجة 
انت اسمك ايه ؟
أهى ساكنة كمان اسمك 
بص فى المراية 
تلاقيها رسمت جسمك 
روح صلى العصر 
حتلاقى راجل بعباية بيقول لك : انا مصر
و الهوا اللى داخل من الشبابيك 
و اللقمة اللى بتعشيك 
و بتفطرك 
طبعا مش محتاج أفكرك
بالهرم 
والنيل 
و ميدان التحرير 
و ثورة يناير 
أثبت ...
سرب الحمام اللى طاير 
كان تحته شعب 
ملا السما بغناه
راجعين راجعين يا حياه
راجعين بقلب 
و مصر هى الحبيبة اللى بتتحب
و الكل حبيبها 
سكنت جميع القصايد
ومش حتسيبها 
أمين حداد
----------------------------------------- 
--------------------------------------------

لقطة واضحة لدهس المتظاهرين بمدرعة 
الثورة والشعر الأبيض .. عمر طاهر

This entry was posted on الأربعاء, أكتوبر 12, 2011 and is filed under . You can leave a response and follow any responses to this entry through the .

26 كــــلام بيطــبطـــب عـــلى قــــلبى و روحــــى

فاتيما

ممكن تفاصيل

تحياتى

واي تعليق يا فاتيما مش حايوفي الحزن اللي جوة القلوب انا حزينة حزينة حزينة انا باكلم مدرسة اسمها سوزان كنت ناظرتها من 25 سنة لقيتها بتعيط ومش قادرة تقوم من السرير وبتقولي انا مش باعيط عاللي ماتوا انا باعيط على مصر ..وكلنا بنعيط على مصر..احنا رايحين على فين بالضبط ...

يافاتيما .. دى الأستاتيوس بتاعت ففيان اللى أنتى حاطة صورتها ، واللى خطيبها مات بين أيديها وفى حضنها موتة بشششششششعة ..
كتبتهم لسة من شوية بعد ما هو ...
:"((((((((((

http://www.facebook.com/permalink.php?story_fbid=10150355011312766&id=739737765

http://www.facebook.com/permalink.php?story_fbid=10150355011312766&id=739737765

http://www.facebook.com/permalink.php?story_fbid=10150355032782766&id=739737765

للاسف مش مايكل بس اللي مات امبارح...في حاجات كتيرة اووووي ماتت امبارح...الله يرحمه

والله ماحد فاهم حاجه
ولا عارف فيه ايه
انا سمعت الاخبار من التليفزيون ومن حكاوي الناس
وكل واحد بيحكي بطريقته
بجد انا ميت من الرعب
ومش عارف ايه اللي بيجري

الصورة اللي مش بتنيمني من امبارح..اللى مخليانى اعيط فى كل وأى وقت وقدام اى حد فى الشغل زى الولايا المقهورين

الصورة اللي مش قادرة اتخيلها ولا استوعبها

الصورة اللى هتفضل شاهدة على دم مصر اللى بيسيح فى الأرض

أنا مرهق اوى

لسه شايف البوست من شويه

فى تعليق تانى ان شاء الله

بكيتينى يافاتيما

يارب انعم على البلد دى بضحكه امل تطلع من قلبها

ازيك يا فاتيما يا غالية

بأمانة مش عارف اقول ايه بس انا عارف ان المجلس العسكرى سبب كله ده

بس يا فاتيما قليلين اللى زيك يا فاتيما

قليلين زيك و زى الدكتورة ستيتة و أستاذ ابراهيم وأغلب مش كلهم طبعاً المدونين اللى أعرفهم

قليلين اللى ممكن نئتمن على أنفسنا معاهم

قليلين اللى قادرين انهم يفهموا

قليلين

بس برضه هنفضله نحب بعض و نحب مصر

مساء الورد
برغم كل شيء يا فاتيما
احيييك بشدة علي مجهودك
وانا بجد مش قادرة لا افهم ولا استوعب ولا افكر
ف كل اللي حصل وبيحصل يمكن يحصل
مش عارفة اي شيء

لأول مرة احس بالتخبط للدرجادي
النهاردة شفت مؤتمر المجلس العسكري كلامهم كده منمق ومرتب صحيح المؤتمر كان ممنتج بس واضح انه كان هادي
بالنسبة حضرتك لتويتر اللي اتعلمته من يوم كنيسة امبابة وغيرها ان تويتر آخر موقع في الدنيا ممكن آخد منه اخبار و باسميه دايما موقع اللاحقيقة علشان كده انا مصدق الصحفي اللي اسمه صمويل اللي كان في مؤتمر المجلس العسكري النهاردة وهو بيقول ان المسلمين كانوا بيحمونا

حضرتك المجلس بيقول الجنود مكنوش مسلحين بذخيرة حية وكل اللي معاهم معدات مكافحة الشغب وده مفيش حد هيقدر يثبت عكسه غير الطب الشرعي وتقاريره والسؤال احنا هنصدق الطب الشرعي ولا لاء؟
سؤال تاني هل للمجلس العسكري علاقة بالبلطجية دول وهو اللي سمحلهم بالمجزرة دي؟ في رايي انا مالوش علاقة مش علشان المجلس العسكري مجلس نزيه ولا حاجة ولا بيحاول يحمي مصالح الشعب بالعكس انا رايي بينصب علشان الموقع اللي حدثت فيه الاحداث دي قدام التلفزيون المصري وده منشأة هامة جدا الهجوم عليها اصلا او بجوارها سبة للمجلس ووضعية حرجة انه مقدرش يحمي مكان حيوي زي ده
المرة دي يا استاذة فاتيما تختلف عن العباسية والبالون وغيرها و غيرها
المرة دي كان الهجوم ضد الجيش ولو حضرتك شفتي الفيديو بتاع الراجل اللي طلع فوق المدرعة وماسك حجر ضخم ويرميه على العساكر اللي جواها هتقولي مستحيل الجيش يخاطر بسمعته ويظهر بالمظهر الذليل ده وهو المفروض يكون له وضع مهيب على الاقل علشان منطمعش اسرائيل وتحس ان في جيش قوي
بعد اذن حضرتك انا مش مقتنع ان المجلس العسكري هو اللي ورا البلطجية لأنهم اول ناس هيتشكك فيهم وفي قدرتهم على حماية البلد
طيب مين؟
انا قلتها عندي وباقولها تاني نحط البازل ونفكر بهدوء ونرسم الصورة واحدة واحدة انا اتكلمت عن قنا مثلا لاني عايش فيها بس ده ميمنعش ان الفلول في كل الجمهورية واللي هيتضرروا من قانون العزل في كل حتة و اللي عايزين يوصلوا رسالة صغيرة للمجلس ان الصورة دي هتتكرر بشكل ابشع في الانتخابات لو اتطبق عليهم قانون العزل لا حصر لهم
دول اكبر المستفيدين ودول اهم ناس نقدر نشاور عليهم باصابعنا ونقول دول المتهمين الاوائل
ولو اخدتي لبالك حضرتك باب الترشيح اتفتح النهاردة وقانون العزل ماتطبقش وحطي خطين تحت الكلمة دي بيني وبينك انا حاليا باكتب قصة للاسف مش هانزلها في مدونتي لاني مش ناوي انزل قصص تاني فيها المهم خلاصتها ان مفيش ثورة نجحت ولا بعد مائة سنة هتتغير حاجة طالما التعابين في جحورها بتطلع تلدغ وتدخل تاني
الفلول استفادت من مظاهرة كبيرة قدرت تدخل جواها
مجبتش سيرة اللي كان بيسوق المدرعات ومين اللي دهس وازاي لان قناة الحرة بتقول انه كان شخص مدني والمجلس بيقول حطوا نفسكم مكان واحد مذعور شايف اصحابه بينضربه والدم سايل منهم وشايف منهم الشهدا ومعهوش سلاح يحمي نفسه بالتاكيد هيبقى عايز يهرب
انا لا هاحط نفسي مكانه ولا هاصدق قناة الحرة
انا باثق في القضاء وباثق في لجنة تقصي الحقائق ومش هاتكلم تاني في الحكاية دي لحد ما تظهر الحقائق قدام عيني مش عايز اظلم حد
ولحد ما تتضح الحقائق هافضل اجمع في البازل يمكن تظهر صورة
انتي طلبتي اننا نفكر معاكي واهوه بحاول افكر الاهم بقى ان مفيش حد فينا يخون التاني كمتظاهرين كلنا بنحب مصر وكلنا عايزين الخير وكلنا مطالبنا مشروعة الطريقة بقى ازاي وليه دي هوامش انما الاساس واحد

في الآخر احب اقولك انا مش متفق مع بلال فضل لان مطالبنا مش بتتحقق غير بالتظاهر بس لازم يكون تظاهر مدروس من اساتذة محللين ومنظم من خبراء في التظاهرات السلمية ومحمي من لجان شعبية
احنا مش هنستحمل اللي حصل في ماسبيرو والعباسية يتكرر تاني
دمنا عزيز
تحياتي واسف للاطالة

ابراهيم رزق
-----------

صباح الخير يا ابراهيم


تفاصيل التفاصيل أهو



سلامى لسالينازة وزياد
يا ابو العيال

zizi
----

خير يا ست الكل

مصر رايحة ان شاء الله على خير

عبور المحنة له تمن
وتبعات
وادينا بندفعه صابرين
حتى نوفى أجورنا

المهم اثناء ذلك
نثبت ونتماسك


كل سنة وحضرتك طيبة
وبألف خير

ومش تقولى انك ميزان
دول ليهم عندى معزة خاصة
:)

عاشقة الرومانسية
----------------

سلامة قلبك يا قطتى
:)

candy
-----


حطيت اللينك يا كاندى
و ربنا معاها
ومعانا كلنا

Tarkieb
-------

نبرة اليأس دى أنا مستصعباها
يا تركيب
بس متفهماها جدا ...


انا دخلت ف نقاش مع مديرى
عن اللى بيحصل
وقالى حاجة شبه كدا عن مصر
قالى البلد ماتت خلاص
قولتله لأ
البلد ف غيبوبة
وعاوزينها تتعافى
بس حد قاعد على خرطوم التنفس
عشان يكتم الهوا ويموتها فطيس

قالى الكل قاعد ع الخرطوم
المجلس
والثوار
والأحزاب
والتيار الإسلامى
والأقباط
والفلول
والداخلية
و حزب الكنبة
الكل


قولتله موافقة ع التصنيفات
ودور كل نفر فيها
وما له من نصيب

بس فيه ناس مخلصة فيهم
و فيه ناس مغرضة
فيه ناس بتلعب دور محدد
وناس بتستخدم كأداة
فيه ناس عندها سلطات
وناس قليلة الحيلة
فيه ناس سلبية وزى قلتهم
وناس ايجابية بس عددهم مش كفاية


اللى اقدر أؤكده
ان الثوار غالبيتهم مخلصين
ومفيش معاهم سلطة ...


ومينفعش تساويهم بالمجلس
الذى يملك كل المقدرات
ويخظىء اخطاء فادحة تساوى ف نتيجتها ما كان يفعله مبارك ...


ودا الفرق


مصر هتفوق ان شاء الله
وهنشيل اللى قاعد ع الخرطوم دا
ولو سال دم طاهر تانى وعاشر
لأن التمن يستحق

التمن يستحق



تحياتى ليك

beautiful mind
--------------


اقرى لما تفضى ف اللينكات
المصاحبة للبوست
ويمكن تساعد حضرتك ف ايضاح الصورة

الأحداث دى
قطع بازل ...تتحط جنب بعض

فيه حد يجمعها بسرعة
وحد تانى ياخد وقت
وحد تالت ميعرفش خالص
وحد يزهق ويسيبها ..
كدا


حضرتك اقرى وشوف
واحكم
بعد النظرة التانية

تحياتى ليك

Engy Ebrahim
------------

فيفيان يعنى احنا يا انجى
انا وانتى وكل مصرية
ليها حبيب غالى
اتلم شملهم بعد معاناة
وقصة حب رقيقة بريئة طيبة ..

وتدخل الغدر
عشان يطعنها ويحرمهم من بعض


فيفيان احنا
وزى ما قولتى
مصر بكل ما تفاصيلها
المبهجة والمفجعة

ربنا يصبرها
ويثبت قلبها
وناخدلها بتار مايكل
ان شاء الله من اللى غدروا بيه
وبيها

Ramy
----


معنديش رد عليك يا رامى
مش عارفة ممكن أعزيك واعزى نفسى بإيه

بس انا اوقات كتير
بفتكرك انتا ومينا و كل حد دخل قلبى واتربيت معاه وعرفته وحبيته ...
اخترت بمعنى اصح انى احبه
ويحبنى

وكتير بحس بحالة الفزع دى واستشعرها وااتكسف ان فيه ناس بتفكر بالعقليات دى وتعيش على اساسها عادى كدا وتروع الامنين ...

امبارح بتكلم مع احد الزملاء عن المدبحة وبقوله الشهدا منهم واحد اسمه مينا ...

مينا انا معرفوش شخصياً
بس كنت بلمحه ف الميدان كتير
كان بيعدى اوقات قصادى ف جمع متفرقة
شكله مميز عشان شعره
وكان بيبص ف الأرض ويمشى بجد كدا وبسرعة ....
افتكرته لما شفت الصور
وحسيت ان فيه رابط بينى وبينه
زى الرابط اللى بينى وبين محمد محسن الله يرحمه شهيد العباسية اللى برضو معرفوش ...
لكن كان معانا يومها ..
ومات عشانا وعشان مصر


وانا بحكى عن مينا بكل فخر
لقيت زميلى بيبصلى بتوجس ويقولى بطلى تقولى شهيد شهيد دى
الشهيد هوه اللى قال لا اله الا الله
انما المسيحى له عقيدة تانية ..
جبتيها منين شهيد دى ؟


طبعا مش عايزة اقولك
انى ناقشته
بمنتهى الهدوووووء والتعقل ...
بس خليته قصاد القاعدين ...قد النملة قصاد الفيل


قولتله الشهيد ...
شهيد قضية وهدف ومبدأ

دا اولا

ثانياً
انتا ربنا عشان تحدد
هوه مات مؤمن ولا لأ
وهل يستحق الشهادة ولا لأ ؟!!!

ثالثاً
منطقك عنصرى وفيه استعلاء على المسيحين اللى كلامك بيعتبرهم سخرة مش شركاء ف الوطن
لأن تفسيره بيعنى
ان كل شهداء حرب اكتوبر وغيرها من الحروب ...مكنوش شهدا بقى
ولا يتعدوا من الابطال ؟!!!
دول ناس حاربت بالصدفة وماتوا


رابعا
ربنا ادانا الاسلام نعمة
مش ادهاولنا عشان نعتبر نفسنا صنف أحسن وأميز عن باقى البشر
انتا كدا بتسىء لدينك
وبتحقر من شان غيرك
وكان هيبقى ايه حالك دلوقتى
لو كنت اتولدت ف اسرة مسيحية مش مسلمة ؟!!!!


بصراحة

بعد ما كتمته
ومشيت م المكتب

حسيت بحزن
ان الناس بتفكر بالشكل دا
وتملك هذه القسوة والعنجهية والغرور والتخلف والجهل وأملى القايمة لحد اخرها ...
وف النهاية يتباهوا بالإسلام
وهم يشوهونه لأبعد مدى


ربنا معانا كلنا
واللى حصل هيحتاج وقت عشان يتبدل والأمخاخ دى تتغير ...

الوقت
ان شاء الله خير

re7ab.sale7
-----------


مساء وصباح الورد يا رحوبة

معنديش غير نصيحة واحدة لحل الارتباك دا يا ماما ...

اقرى كتير
واسمعى كتير
وان شاء الله توصلى لتحليلك اللى يقنعك

كونى بخير يا حبيبتى دايما

مصطفى سيف الدين
---------------


1)
بالنوسبة للتعليق اللى موش للنشر
مفيش حاجة والله
غالبا المسكلة عندى انا
انا اللى ساعات اكتب بمنطق تهييسى وارد ع الناس بإبتهاج دونما مراعاة لحالتهم المزاجية
و حسيت انى كلمتك بطريقة لا تتناسب مع حالة الزعل اللى انتا كنت فيها
فمعلش
:)
عندى انا ولا يهمك

2)
بوست منى انا حطاه ف اللينكات من اول ما نشرته ...
حضرتك هتلاقيه ف الاوائل كدا

3)
مش هناقشك كتير ف مضمون التعليق لأن تقريبا رودودى على الناس الحلوة اللى قبل حضرتك فيها حاجة شبه اللى عاوزة اقوله ....



4)
رد بس بسيط على ملحوظة المدرعة والجندى اللى إنضرب دا
حضرتك اللقطة دى جت امتى ف شريط الاحداث الواقعية ؟
يعن كانت ف الأول ولا ف النص ولا ف النهاية كرد فعلا هستيرى على المناظر والدم اللى سال ؟
والحالة النفسية المتوترة دى لماذا لا تراعى على الجانبين ؟
مع الوضع ف الإعتبار ان الجندى مؤهل لتحمل الضغوط النفسية والبدنية دى ...اومال هيروح يحارب الأعداء ازاى ؟!!!
ولما ميعرفوش يحموا التلفزيون ويستعدوا بذخائر واسلحة
اومال هما واقفين هناك يعملوا ايه ؟!!!

فيه طرق عديدة يا استاذ مصطفى لتلافى ما حدث ...
بس هما تجنبوها قاصدين
لاهداف محددة

فيه اسلاك شايكة
وفيه قنال غاز للتفريق
وفيه عناصر مدنية تمش مع المسيرة من بدرى لتأمينها و منع المندسين من نقطة الصفر ...
فيه حاجة كمان اسمها استخدام التلفزيون لتقليل الإحتقان
ومناشدة الناس ترجع بيوتها
مش تنزل تدبح مع الجيش
فيه حاجات كتير كان ممكن تنعمل لتقليل الخساير ...
واظهار القوة بشكل سلمى
لكن دا محصلش
لأنهم قاصدين

لما يبقى بعد كل الحوادث السابقة
لسه الخطا بيتكرر
ميبقاش خطا
دا يبقى اما مقصود
واما امكاناتهم كدا

وهما بصراحة ...الإتنين

طيب
سواق غشيم ومتعافى
وهيلبسك ف قطر طول منتا سايبه على كرسى القيادة ..
ومهما تنصحه ميسمعش الكلام ...
تعمل ايه ؟!!!

59
انتا منتظر اللجان والقضاء وغيره
لا انصحك
الدنيا متغيرتش
واللى بيحصل دا امتصاص للغضب
بس بعد ما خربت مالطا

وان شاء الله
الحقيقة لن تطمس
لكن هتطلع على ايد ناس تانية
أنضف واشرف ...ف ظروف احسن

وهرجع افكر حضرتك
ماشى ؟


كل الود ليك
وروق
ربنا كبير
وحافظ الثورة ان شاء الله

هو انتي فهمتي كلامي اني بادافع عن المجلس العسكري وبقول اللي عملوه صح؟ او بابرىء ساحتهم؟
يا لهوي
انا بقول في حقائق مش معروفة ومفيش تأكيد ان في اي حاجة صحيحة
وانا مش بحب اظلم حد او اخد حد بالشبهات مش اكتر
وبنفكر مع بعض مش اكتر
اكيد طبعا المجلس العسكري مقصر من الناحية التأمينية من اسلاك شائكة وكده بس اعتقد انه استعمل قنابل مسيلة للدموع علشان التفريق
بس انا مش مقتنع ابدا وصعب اقتنع انه اللي ورا الحادث
لاني من فترة جيشي اعرف حاجة واحدة الجيش اهم حاجة عنده سمعته لانها هي دي اللي بتلقي الذعر في قلوب اعداؤه تخيلي بعد اللي حصل كمية الفوضى اللي ممكن التطاول على الجيش اللي ممكن تحصل بعد ما شافوا جنوده بينضربوا بالطريقة دي
بالنسبة لسواق الدرعة برضه مابدافعش عنه ومش بأكد جرمه الا لما يحصل تحقيق مين الجهة اللي نثق فيها علشان تحقق بعد ماحنا عايشين في دوامة عدم الثقة في كل اللي حوالينا ومخونين الجميع؟
تفتكري مين اللي يحقق ؟
نجيب محققين دوليين ولا ايه؟ لما حقوق الانسان مش نافعة والنيابة مش نافعة نثق في مين؟
طلبي الوحيد يا نكون ضامنين نجاح المظاهرة وتعدي سلمية ويا ريت منروحش للجيش نجر شكلهم او نروح لمنشأة حيوية ونخلي مظاهرتنا في التحرير و ده اللي قلته يوم العباسية علشان منستدرجش البلطجية لمجزرة جديدة
ونحاول نحمي المظاهرة بلجان شعبية
صعب الطلب ده؟

مصطفى سيف الدين
---------------

لأ يا أستاذنا انا مش بقول انك بتبرىء ساحتهم ولا حاجة

انا برد على كلامك
وبتناقش انا كمان


بس مش قادرة اتبنى وجهة النظر بتاعة ان المجلس بهذه البراءة والنقاء والطهر دا ..

العقيدة اللى حضرتك بتقول عليها دى
انا معاك الف ف المية ف ضرورة وجودها ....

بس المهم بقى
العالم اللى هانك دى
بتطبقها صح ؟

يعنى هل هم على درجة من الكفاءة اللى تخليهم واثقين ف نفسهم وبيحافظوا على هيبتهم و كرامتهم و اسمهم ؟

طب اللى زعلان على سمعة جنوده اللى بينضربوا من مواطنين غير شرفاء(بصفته مصنفنا يعنى ) ...
مش خايف بقى على منظره وهوه جيش بيدوس مواطنيه بالمدرعات ؟!!!!


حالة الهلع اللى عندهم دى دلوقتى فى انكار التهم ...
من انهم ماطلقوش نار ولا داسوا حد
نفسرها بإيه ؟

مبيشفوش الفيديوهات
معندهموش محللين ؟
مبيسمعوش نصايح
محدش ابن حلال مستشار صحفى يقولوهم التصريحات دى استفزازية اكتر منها احتوائية للغضب ؟!!!


انا شخصياً
بنيت تحليلاتى على معطى واحد
انهم صنيعة مبارك
بكل عواره وفساده و خيبته العسكرية كمان ...
بيتصرفوا بغشومية فى كل الخطوات
وبالتالى
مش هما اللى هيعلمونا نمشى ازاى وفين
مبقولش احنا نعلمهم مع اننا الشعب يعنى وأساتذة والثورة تشهد ..

بس ع الأقل متفرضش سلطتك عليا وتحرمنى من حقى الطبيعى ف التظاهر والإعتراض على سياساتك الفاشلة فى ادارة كل شىء
كل شىء يا استاذ مصطفى
وانتا شاهد اهو
9 شهور بحالهم

انا مبقولش تجيب محققين دوليين
مين يستجرى يقول كدا ؟!!!!!
ليه ؟
خلصوا رجال القانون المحترمين من مصر ظ
خلصوا الشخصيات العامة النزيهة ؟
خلصت الجهات الحقوقية والمنظمات؟؟؟

انا بس بطالب بجهة محايدة
محايدة لا منهم ولا من الطرف التانى
انما تبقى الدفاتر دفاترهم والورق ورقهم ؟!!!!
ازاى ؟



حكاية المسيرات وتامينها دى
برضو هرجع اقولك يا استاذ مصطفى
اللى بيحصل دا حق
اكتسبه الناس ولن نتنازل عنه
كل الأفلام دى معمولة عشان نرضج للفزع ومننزلش الشارع تانى لأى سبب
والأسباب كتييييييييييييير
ولسه جاية
ابسطها الغنتخابات وما سيحدث فيها من مهازل بدأت امبارح ....

المجلس عاوز يرجعنا الحظيرة
ويسكتنا
نجح مع قطاع كبير من الشعب
كنباوى او مشجع للثورة من بعيد

فاضل بقى العيال اللبط المزعجين اللى كل شوية ينطولهم ف مظاهرة دول ويقلوا راحتهم ...


بس وحياتك
هم يحرثون ف الماء


والطلب صعب جدا
لأن المندسين دول مش صنيعة المتظاهرين
دول مزقوقين من جهات فلولية
اقبض عليهم ..اللى فوقهم يتلم

انما كل مرة
يروحوا البلاطجة والشبيحة فى امان الله ويستعدوا للموقعة القادمة ...

دا اسميه ايه ؟
تواطؤ ولا ل ؟

طرمخة ولا لا ؟

مبقولش متفقين معاهم ولا حاجة
ماشى

انا هقول عليهم ملايكة

بس لما كل مرة يلاقوا بلطجية
معروفين بالإسم والشكل والعنوان
ويسيبوهم
وميقولش حتى للعيسوى بسك عليهم

اسميه ايه دا ؟

مش تراخى
يورد للهلاك ؟

ولما انزل اعترض انا ع الكلام دا
وامشى ف مسيرة سلمية
وانضرب واتدهس تحت عربية
تقولى نزلتى ليه خليكى ف بيتك يا تيجى بودى جاردات يحرسوكى ؟

اومال هما قاعدين ليه ؟

ولو سكتنا
لحد امتى ظ

الدنيا هتنصلح لوحدها ؟

مكنش عملنا ثورة يا استاذ مصطفى ولا حد مات واتعور واتحبس واتهان ...


تحياتى ليك

وحشانى جدااااا ...مسائك معطر بأحلى الورود وبالأمل فى بكره ...باذن الله ربنا يحفظ لنا بلدنا ..مش حقدر اعلق على لبوست لان مافيش تعليق يتقال على اللى بيحصل فى بلدنا الايام ديه ...لكن فتره وحتعدى والربيع قبل مابيجى تسبقه رياح الخماسين ...باذن الله الربيع المصرى اتى .

يا فاتيما افهمي وجهة نظري مانا بقولك انهم متراخين ومتواطئين في بعض الحاجات منها حكاية القبض على البلطجية وقانون العزل وغيرها بس انا بقول حكاية ماسبيرو دي جات مش على هواهم اتفاجئوا بيها
حكاية الرصاص وضربوا ولا لاء وحكاية المدرعة برضه الاتنين محتاجين جهة تحقيق محايدة زي ما حضرتك قلتي علشان كده بقولك لجنة من حقو الانسان او منظمة حقوقية
اما عن الانتخابات فهتحصل مصيبة مثلا عندنا في قنا بع ما الدايرة وسعت اوي ومحدش مشهور فيها غير اعضاء الحزب الوثني اقدر اقولك كل المرشحين في الفردي في قنا اما كانوا مرشحين السنة اللي فاتت من الحزب الوطني او على مبادىء الحزب الوطني مفيش فايدة الفردي كله بتاعهم
يعني تقدري تقولي تلت المجلس هيبقى فلول
والسبب ايه
المجلس بعد ما اقر قانون العزل الظاهر كش من الفلول بعد حكاية ماسبيرو خصوصا تهديد مؤتمر نجع حمادي وراها ماسبيرو علطول
كأنهم بيوروا المجلس حاجة من التهديد على فكرة اللي حضر المؤتمر ده مش بتوع الصعيد بس ده كان فيه بتاع الفين عضو في الحزب الوطني تخيلي انتي المنظر ده الفين واحد من الفلول في مكان واحد بيتفقوا على حاجة معينة
بعدها بكام يوم ماسبيرو والبلطجية
طبعا الحكومة متخاذلة لو اقالت محافظ اسوان من يومها كانت اتحلت
بالنسبة للتظاهر قلنا حق مشروع بس نلتزم بالتحرير علشان منديش فرصة لحد يندس ده رايي تالت
الصراحة انا حاسس نفسي ممل عمال ارغي هنا :)

إرسال تعليق