.

.

أرواح الله ف الأرض  

Posted by: فاتيما in

من قصاد النقابة الحكاية ابتدت 
و فى طلعت حرب 
كان الختام نور و مسك 


 

كالعادة وكمتابعة للاخبار عرفت 
ان فيه مسيرة من نقابة الصحفيين
هتبتدى وتنتهى بمبنى ماسبيرو
عشان تندد بالعهر الإعلامى 
اللى ساهم فى زيادة عدد ضحايا
مظاهرة 9 اكتوبر واللى عددهم 
عدى ال30 ومازال يزيد ويتكّشف

   


حضرت يافطتى والساعة اربعة تمام 
كنت قصاد النقابة 
مكنش فيه غير نفرين تلاتة بس

سمعت حد فيهم بيقول ف موبايله 
عند الاخبار .. طيب 
سألته وعرفت انه صحفى فى جريدة الفجر 
ومشيت وراه وهوه وصديقه لحد اخبار اليوم 
وهناك لقيت حوالى ستة سبعة واقفين 
كدت أحبط وأقول المسيرة هتكون هزيلة 
وبعدين افتكرت اننا كل مرة تقريبا بنبتدى كدا
والعدد بيزيد

فإنضميت ليهم 
طلعت اليافطة وعلقتها وإنتظرنا كلنا 


  


العدد فعلا قعد يزيد واليفط تتوزع 
والهتافات تجلجل 

بالتنديد بأسامة هيكل و الأعلام المغرض 
وهتافات ضد رئيس تحرير الاخبار 
على مانشيت جرناله يوم الاتنين 10 اكتوبر
و عرضه اللى من جانب واحد هوه العسكر 
و هتاف ضد محمد بركات بالمرة 
وكل صحافة مبارك
وجمال و المجلس حاليا

و
ياالعار ياالعار ... ع الأهرام والاخبار 
 




المسيرة بدأت فى التحرك من قصاد الأخبار
متجهة ناحية التليفزيون 
بلا مشاكل او مناوشات الا من المارة 
بكلام معتاد من قبيل خربتوها وعاوزين ايه ؟
وكلاكسات عصبية ونظرات متفاوتة ما بين 
الامتعاض و الإستهجان و القرف .. الخ 



وصلنا ماسبيرو و وقفنا قصاده 
وبدأ الهتاف ضد هيكل تانى 
و ضد رشا مجدى 
وكل الأعلام المضلل المحرض العميل 
وأهم أهم أهم ..الكدابين اهم 
وعد من 1 لعشرة كدب ف كدب ف كل نشرة 
وغيرها من هتافات ....






على ستة وشوية كنا بنحضر روحنا 
للرجوع للتحرير ومنه على ميدان طلعت حرب
عشان فيه وقفة بالشموع 
على أرواح شهداء ماسبيرو ...
وبالفعل أتحركنا
وكنا هناك على سبعة تقريبا



كان فيه عدد مش كتير منتظر 
إنضمينا ليهم و فضل الناس تتوافد

لحد ما ملينا الميدان كله تقريبا 
ورغم كدا كان فيه حرص على سير المرور
ومجموعة وقفت تنظم سير الحكاية ..
رغم عصبية اصحاب العربيات و ضيق خلقهم ... 









المشهد فى التلات اماكن كان رائع 
قصاد الاخبار كان ملتهب 
الصحفيين من أعمار مختلفة 
و مؤسسات متنوعة 
وكلهم متفقين انهم هرموااااا و قرفوا ...
وعاوزين الصحافة والأعلام ينضف 
لأن الدم الطاهر الغالى بيسيل
وقصاد ماسبيرو نفس القصة 
الغضب كان سببه الأساسى استهتار
هولاء الموظفين بداخله على تنفيذ التعليمات
ولو هتؤدى لمقتل الأبرياء بالعشرات 
اما فى طلعت حرب فكان الحزن الجليل
بشموع مضيئة تطلب الغفران من الشهداء
وتودعهم بأن دمهم مش هيروح هدر
والقصاص آت من كل من تسبب فى ذلك











ف كل مرة بتتملكنى مشاعر دهشة 
وحالة كدا معرفش أوصفها فى هذه المواقف
انا بقابل ناس معرفهموش 
بقف جنبهم وامشى معاهم 
وانا عارفة ان ممكن ف أى لحظة 
أى لحظة الدنيا تنقلب
ويبقوا هما أو أنا أقرب حد ليهم 
وممكن اللى ماشية جنبى تكون آخر وش
هشوفه او يبصلى و يودعنى 
و ممكن ينطقلى الشهادة لو ملحقتش اقولها 
و او يشلنى لأقرب مستشفى ..
أو انا أعمل كدا 


و ممكن كمان العكس 
ممكن لو المسيرة مشيت بخير 
يكونوا أفضل صحبة الواحد يعرفها 
الاحاديث المتبادلة بيننا بتكون حميمية 
و كاننا شوفنا بعض ميت مرة قبل كدا 
بنكمل لبعض الجمل احيانا 
بنتريقأ ع التصريحات و نتبادل الاخبار 
والأسرار والتوقعات والدموع والخيبات أحيانا

والتشجيع والامل احيان تانية








قصاد مبنى الأخبار 
إتعرفت على اتنين صحفيين
الصحفية اسمها غادة ..
وبالكلام معاه لدقيقة لقيتها حد جميل 
متحمس وقلبها دافى 
الصحفى زميلها اسمه جورج 
وكان فى احداث ماسبيرو و بيحكلنا

اللى حصل و ف وسط الحكى 
رفع طرف قميصه عشان يورينا أثر الضربة
اللى خدها من عسكرى ف كتفه 
بكعب البندقية لمجرد انه سأله

هوه احنا عملنا ايه ؟






اللى نظموا المسيرة كانوا شايلين علم مصر 
وعليه صليب وهلال 
والهتاف دا لخص المسألة كلها فى انها ...

دى مش فتنة طائفية 
دى مدبحة عسكرية




مينا دانيال كانله نصيب كبيييير امبارح

مينا داينال يا ولد دمك بيحرر بلد 
تضرب احمد تضرب مينا و الطنطاوى بيقتل فينا 
ولدى ولدى طنطاوى قتل ولدى 
يا طنطاوى يا عميل احنا مصر مش اسرائيل





وفى طلعت حرب كان مينا والشهدا 
شموع قايدة 
اتوزعت ع الحاضرين اللى كانوا مجهدين 
وتعبانين من الحاصل
وعندهم يأس وغضب لكن بعد شوية 
العدد زاد والهتاف على و الشموع كترت 
وابتدت الوشوش تبتسم 
وتحس باللى انا حسيته من اول دقيقة
ان لسه فيه فايدة 
والثورة دى كل ما حد يدوسها  ويحبطها

ترجع تقوم تانى و ... تترد فيها الروح 




 الهوا .. اوقات كان بيعاكسنا 
وساعات كمان الهتاف بحماس 
وإنفاسنا .. كانت بتخلى الشمعة 
اللى ف إيدنا .... تنطفى
فكنا بنولعها من بعض او بولاعة حد 
بنات واقفة جنبى كان الحزن مغطى وشها 
نور شمعتها انطف .. فولعتلها من بتاعتى
قولتلها ... متزعليش 
قالتلى اللى حاصل يزعل ويخوفنا على ثورتنا 
قولتلها ... متخافيش 
الثورة دى .. زى الشمعة دى 
ييجى حبة ريح فتنطفى .. 
بس فيه اللى بيقيدها تانى 
طول ماحنا موجودين .. هيا هتفضل موجودة 
قالتلى .. بس اللى بيموتوا زى مينا ؟
قولتلها مينا مرحش ببلاش 
و جمعنا النهاردة وخلانا مصرين نكمل 
وهنفضل نقيد فى الشمع
لحد ما كلنا نخلص 
لما يخلصونا كلنا بقى .. ساعتها تخافى 
لكن تأكدى اننا ف البلد دى 
أكتر من اننا نخلص ...  :)




اليافطة بتاعتى عجبت ناس كتير 
 فوقفت فترة كافية عشان تتصور
هيا بإختصار بتجسد 
مبنى ماسبيرو اللى ماسك رشاش 
وحواليه الشهدا مينا ومايكل وخالد سعيد 
وبنونة وبسيونى وسيد بلال ملايكة 
و بتحلق ف السما و مكتوب فوق 
دم المصرى حصرى ع التلفزيون المصرى 







ولما لقيت العدد هايل والحضور بيزيد 
خدت بعضى وانا مطمنة
ان السهرة هتخلص على خير ان شاء الله
ما دمنا بنكتر و بنحاجى على بعض

و روحت فى غاية الامل 
والسعادة والامتنان لمينا
وكل شهدائك يا بلدى 
 


ملاحظاتى على الكام ساعة دول 
كتييييير قوى 




اولهم ان المسيرة 
من الاخبار لماسبيرو للتحرير لطلعت حرب
مشيت بسلالة و بلا أى مناوشات 
وقصاد التلفزيون مشوفناش عسكرى واحد 
ولا م الداخلية ... و أقصد ملكى طبعا 
انما اللى لابسين مدنى .. 
فحدث ولا حرج 
انما عاوزة أقول ان المسيرة راحت و جت
بمنتهى الهدوء ومفيش عنف 
ليه ؟
عشان كانت متأمنة ؟
لأ ... ابداااا
لا متأمنة ولا نيلة 
غاية ما هناك كانوا بعض الصحفيين 
واقفين على الجنب عشان يمشونا 
عشان منعملش اى ارتباك فى سير الطريق 
و بس على كدا
 

 

يا ترى ليه 
محصلش عنف المرة دى بقى ؟


وفين المواطنين الشرفاء بتوع كل مرة
اللى بيهلوا من بعيد بالسنج والشوم ؟

وليه المجلس مخفش ع التلفزيون
هذه المنشأة الحيوية الهامة 
من ان يحصل عندها اى مشاكل
وهيبة الدلولة تقع والكلام المجعلص دا ؟




ليه لما الاقباط راحوا اتهدت الدنيا ؟



ببساطة الأجابة .. عشان يلعبوا 
على حس الفتنة الطائفية والحرب الاهلية
وتبقى الحجة عشان يقعدوا أكتر 
والأنتخابات يا تبوظ ..
يا تجيب اللى على شوقهم
ولا إيه ؟!!!






الملخص ببساطة من وجهة نظرى الغلبانة 
ان محدش امبارح كان مدى اوامر 
بإفساد المسيرة و بهدلة الدنيا 
و الاوامر كانت بمراقبتها فقط 
ولهذا كان الأخوة المخبرين مترشقين 
فى كل سنتى متر من المسيرة 
و زادوا جدااا فى طلعت حرب و بشكل سافر 
و بقوا مفقوسين وش 

لدرجة تصعب ع الكافر خصوصا .. لما ابتدوا 
ينتشروا بين الواقفين و يفتحوا كلام
و يقولوا اننا لازم نهدى بقى
عشان البلد حالها يمشى بلا بلا بلا 





 المؤلم اننا لما مرينا من موقف 
عبدالمنعم رياض عشان نوصل للميدان 
حولنا الهتافات من اسقاط المشير 
الى عيش حرية عدالة اجتماعية 
عشان مستفزش الأخوة هناك 
واللى كانوا بيبصولنا شذرا 
وعاوزين يا دوب بس يحطونا تحت العجل 
وكأننا بنطالب بحاجات مش ليهم
ولا عشانهم و كأن احوالهم كانت زى الفل 
والثورة اللى جت بوظتها








كان فيه وجوه مألوفة لمذيعات من ماسبيرو
بس ذاكراتى ميح مش فاكرة الأسامى 
و كان فيه صحفيين كتير 
والملفت ان كان قصاد الأخبار 
يحيى قلاش المرشح لنقيب الصحفيين
و شفت خالد البلشى و رشا عزب و غيرهم ... 
وشوش تاني مألوفة زى 
غادة العمروسى وزكى فطين عبدالوهاب 
ومحمد العدل و وجوه أعرفها 
من الميدان ومن القوى السياسية والجبهات
وكله واقف جنب بعضه فى تناغم وهدوء
وعاملين لوحة جميلة بتنور الضلمة 
بنور الشموع و القلوب









شمعتى اللى قيدتها لمينا 
فضلت معايا لحد قرب آخرها 
و طفيتها ... عشان اشيلها للذكرى 
و انا بقوله ف سرى شكرا
شكرا لأنك جمعتنا هنا تانى 
وإديتنا شوية امل محتاجينهم





شكرا ... لأنك نموذج لمصرى 
كان ممكن بعد مبارك ما غار
 يخاف لما لقاها قلبت غم ودم  

لكن انتا قررت تكمل و لو فيها موتك 

بس انتا بموتك عشت
وعلمتنا درس غالى فى حب الوطن

درس تمنه عمرك و شبابك 
وضحكتك الحلوة ونظرتك الصادقة 
واحلامك اللى اذا كانت راحت معك 
فبقت دلوقتى فى قلب
ألف شاب تانى عاوز يبقى زيك
ويكمل السكة و اللى انتا عملته 

وامبارح كان بيهتفلك 
و يهتف لغيرك ويقول 
يا نجيب حقهم .. يا نموت زيهم 




القمر امبارح كان بـــدر
كان واقف من ورا مبنى وسط البلد العتيق
بيبعتلنا نوره و شاهد ع الليلة 
و كأنه بيحتفى معانا 
والوافقين كانوا حاطين الشموع 
فى كوبايات عشان متنطفيش 
واتجمعوا فى الجنينة فى مشهد بديع 




الوجوه غضبها زال ...
و جه مكانه ملمح رضا 
كنا بنبص لبعض ونبتسم قوى 
واحساس عجيب لما المفروض يكون 
مشهد حزين وتلاقى الناس مبتهجة 
و زمان سمعت التحليل دا من جدتى
قالتلى 
يا بنتى اللى تلاقى عزاه حلو 
والناس رغم الحزن والبكا بتتكلم وتحكى

يبقى هوه ف مكان حلو 
واللى تلاقى عزاه الناس مكتومة وكئيبة 
يبقى هوه تعبان و مش تمام 




ليلة مينا و الشهدا كانت حلوة 
وكأنه فرح ..مش عزاء 
ومعرفش دا احساس شخصى فقط 
ولأ حد تانى ممكن يوافقنى فى كدا 






و كلمة أخيرة 
للأخوة فى التويتر والفيس والمدونات 
اللى كل شوية يأنبونا على النزول 
اما استهانة بما نفعله وأثاره السيئة  

واما خوفا علينا من تبعات النزول 



يا جماعة 
اللى خايفين علينا .. 
متخافوش 
النزول فيه نسبة مخاطرة معلومة 
وبالتالى مقارنتها بنسبة القعاد ف البيوت 
و الأستسلام لا تقارن و لا يعتد بيها
احنا لازم نقاوم على كل الأصعدة 
وبكل الأشكال 
بالكتابة والنزول والمواجهة لو لزم الامر






احنا فى حرب دلوقتى زى ما بيقال 
حرب مواقع 
لو كان استجبنا لإحتلال العسكر للتحرير 
لما نزلنا فى 9/9 ... وما بعدها 
و التحرير رجع تانى ميدان للتظاهر

ماسبيرو كذلك .. ما حدث فى 9 اكتوبر 
لن يمنعنا من المرواح تانى هناك 
والإعتراض فى أى مطرح
ولأى سبب للتظاهر 
لن نقبل أن يسلبونا أياه لأى سبب 
ولو بتخويفنا وتهديدنا والتحريض علينا 
و قتل البعض منا كمان 




ويبدو ان دى الخطة الجاية ف الانتخابات 
يا تنزلوا تندبحوا وتموتوا 
يا تقعدوا ف بيوتكوا ومحدش يوجع دماغنا 
وترجع مصر لعداتها القديمة ...
ودا مستحييييل 
مما أراه الآن بيقول .. مستحييييييييل 


ودا هيقودنى للفئة التانية

اللى بتكسر مقاديفنا 
وطول الوقت تقعد تأنب فينا 
وتقولنا نزولكم دا ... بخسارة  وغير مؤثر




يا جماعة الخير
غير مؤثر مع مين معاهم ولاّ معانا ؟
عشان تفرق جدا 
الخروج للشارع واجب والتزام
و اللى بينزل بأستمرار  ... عارف
ان ليه دور ولو بأقل كلام بيتبادله مع غيره
بالتوعية مع اللى مش فاهم 

و بالحوار و رفع المعنويات ولو سنة صغيرة 




التواجد ف الشارع تجديد للروح
وشحن لبطاريات الثورة 
وأغلب اللى أعرفهم و بيقول متنزلوش 
غالبا بيكونوا محبطين و متشائمين 
وأكاد أجزم ان السبب فى هذا الشعور 
عندهم هوه .. 
عدم نزولهم كتير 
وان وسطهم اللى هما قاعدين فيه 
ثابت لا يتغير وملىء بالكنباوية 
أو بلى مع الثورة .. بس قصار النفس
لو بينزلوا ويشوفوا وشوش تانية 
مع الثورة زيهم 
هيكون رأيهم وحماسهم زى ما بيقولوا
اخواتنا اللبنانية .... شكل غير 






طب اللى مش قادر ينزل 
عشان محبوس ف شغله
او ساكن بعيد عن الاحداث 
أو اهله مانعينه
او ظروفه أى كانت متنفعش 
بلاش تحبطونا ... الله يخليكم 






 الأحداث المؤسفة لما بتحصل 
بتعيد هيكلة الصورة من تانى 
أو بمعنى أدق بتصححها للى مش شايف


 اللى بينزل بيوثق الإنتهاكات دى 
ويفضح اللى عملوها
و دا فى حد ذاته كان تجريسة كافية 
النزول لعرض غضب الثوار من أى شىء
وتعرضهم للقهر و البهدلة والموت احيانا 
تجريسة للرابضين على نفس البلد
وتأكيد لأن مبارك لم يرحل بعد 
وان لازم نتحرك بقوة عشان نمشى كلابه
جثث الشهداء دليل دامغ 
أرجوكم متخلوش دمهم غلطتهم هما 
لأنهم نزلوا وتظاهروا  بهدف سلمى 


التظاهر حق والمسيرات
لازم تمشى سلمية وتنتهى سلمية 
والدولة ملزمة تحميها من اولها لآخرها 
دى القاعدة اللى لازم تترسخ ف الذهن
مش العكس 
يعنى مش المفروض كما يحدث الآن 
ان المظاهرة والمسيرة تسبب ذعر للناس
و تبقى هيا الإستثناء و احنا نقبل بكدا
عشان البلد تهدى وتستقر !! 
والسلطة اللى بتحمينا دلوقتى 
يا تظهر و تدوس ناس وتقبض على ناس 
يا متظهرش خالص ولا نشوفلها أثر بالمرة !!
ايه النظام العجيب دا ؟!!!
يعنى غلطتهم و احنا ندفع تمنها !!



أمانة عليكم متسدوش نفسنا 
ولا تحبطونا جنبكم
وسيبونا ناخد شحنة ايجابية من بعض

و نسند بعض 
و نجرس الخونة والعملاء 




و متخافوش علينا كمان من أى حاجة 
لأن ... عمر الشقى بقى 
و كمان .. محدش بيموت ناقص عمر



كلمة كمان 

للناس الذين يعتبرون انهم كمسلمين 
أحسن من المسيحيين .. عند الله وأفضل 
لقد سقطتم من قلبى أيما سقطة 
لأنكم بهذا التمييز 
متفرقوش حاجة عن المجلس 
اللى بيعتبر العسكرى أفضل من المدنى 


و متفرقوش حاجة عن الداخلية
اللى بتعتبر الضابط سيد و المواطن عبد 
واللى يمد ايده على سيده نقطعله ايده 
وهما قطعوا الأيد والرجل وهتكو العرض
و هتكوا الروح وأزهقوها كمان ...


ولا تفرقوش حاجة عن اللى شايف
الراجل أحسن من الست لمجرد انه اقوى
عضليا او ماديا وانها لا تصلح للمناصب
زى القاضى وغيره ...




من يجرؤ فيضع نفسه مكان ربنا 
وينصب من نفسه قاضى ويحكم ع العباد ؟

ويقولنا مين اللى يستاهل 
يبقى رقم واحد ف الدنيا و مين لأ 
ومين هيدخل الجنة ف الآخرة ومين لأ 
لمجرد ان فيه واحد نطق الشهادة وبيصلى 
و يعترف بوجود سيدنا محمد و واحد لأ



 

ونصبتوا أنفسكم اصحاب وحيدين للبلد 
و زعلانين ان المساواة فى حقوق المواطنة
مطلب و مستشعرين خطره 
معرفش ليه واحنا بقالنا 1400 على دا الحال
لا الأقباط انقرضوا ولا احنا خلصنا
ومصر فضلت بخير ... ؟!!!





لما بفتكركم .. 
بجد بحزن من قلبى 
لأنكم تشوهون الأسلام 
وبتخلوه عنصرى بغيض و هو العكس تماما

و أفتكر جملة رددتها امبارح احدى 
وجوه الثورة و ميدان التحرير

و كانت بيننا امبارح ... ماشية بتقول 
محدش يقول مسلم و مسيحى 
كلنا أراوح الله فى الأرض 
كلنا أرواح الله فى الأرض 



يا مينا و يا مايكل و يا سيد بلال 
يا خالد سعيد و يا كريم بنونة
و يا احمد بسيونى 
و يا كل شهداء بلادى 
يا كل أراوح الله فى الأرض 
سلام الله عليكم
و سلام الله عليكى يا مصـــر  



--------------------------------------
------------------------------------------------


 يا عسكرى 
واقف بالفرس على جتتى 
لا انت البطل ولا انت فتوة حتتى
يوم ما هتقول هاخد البلد 
هقولك خدها بس على جتتى 
سامية صلاح جاهين
( على عهدة التويتر )

-------------------------------------


 كفرنى شكرا ... محمد فتحى 
ولا فارقة .. KINGTOOOT
حانت لحطة الحقيقة ..علاء الأسوانى
المتحولون بالعكس ... غادة شريف
الجانى ضحية وبالعكس .. عمرو حسنى 
رحمة الله فى يدى .. خالد البرى 
رغم أنف ..... نجلاء بدير 
 مؤتمر عسكرى مقلق .. حمدى قنديل
والله حَكَمى .... مروى مزيد
حجر الفلاسفة .. سيد حسين
متى ترتوون من دمائنا .. اكرام يوسف
 اسكتوا شوية ... محمد فتحى
لا انسان الا انا .. خالد البرى 
المدرعات التى تحكم مصر .. وائل قنديل
 بوسطجى له اسلوب .. عمر طاهر
علامة الرضا ... نجلاء بدير 
وصيتى ... البلد دى فيها حكومة 
مسئولية ... قطــر النـدى 
الملك الطالح ... يسرى فودة 
---------------------------------
------------------------------

This entry was posted on السبت, أكتوبر 15, 2011 and is filed under . You can leave a response and follow any responses to this entry through the .

69 كــــلام بيطــبطـــب عـــلى قــــلبى و روحــــى

أرواح الله ف الأرض .. وتوثيقاً لما حدث .. موضوعين مُتشابهين تماماً، كأنِّك بتحاولي تفكري نفسك والقراء بكل أسباب وعناصر الثورة، وده تأكيد جميل ومطلوب لتثبيت قناعاتك

بس ياريت الدنيا كانت بتمشي كده بالبساطة دب والمثالية دي، هُناك جوانب أُخرى ومُحددات أُخرى تجعل من تلك المثالية المُفرطة حُلماً لن يتحقَّق كاملاً هكذا

شكراً أنك عيشتينى معاكى الأجواء دى ..
:)

لو كنت من سكان القاهره مش هاتردد ابدا انى اكون معكم
ربنا ينصركم ويحميكم يامصرين
انا فعلا فخوره بيكم
ربنا معاكم يااااارب يافاتيما

أزال المؤلف هذا التعليق.

أزال المؤلف هذا التعليق.

وهنطلع كام مسيره على كام شهيد الايام الجايه :(

فاتيما
روح القلب الملائكية

انا بابتسم بعد ما قرات البوست اهو
انا مش عايز اكتب و لا عايز اعلق عشان منقلش الروح اللى جوايا لحد لكن البوست ده رفع معنوياتى
عارفة يا فاتيما الثورة دى عامله زى اللقاح بتاع الزهر ساعات بتبقى الزهرة وحيدة لكن بيجى شوية هواء صغيرين ينقلوا اللقاح بتاعها او نحلة او فراشة جميلة لمكان تانى عشان تبقى زهرة تانية
مينا كان نسمة الهوا
مينا كان النحلة النشيطة
مينا كان الفراشة الجميلة
مستنية ايه يا فاتيما من التعصب
التعصب لازم يقابلوا تعصب
كان نفسى اكون معاكوا بس انتى عارفة الظروف اللى انا كنت فيها
هاحاول ابتسم
و احخاول اتكلم
و هفتكر التحرير زمان
يكن لما افتكر افتكر اللى كان نايم جنبى مصرى و مكنتش اعرف مسلم و لا مسيحى
عجبنى فيكى نظرة الامل و التفاؤل
يا بختك بيها
سلام يا ام جو

الله يا فاتيما ..ربنا يبعد عنكم الأذى ..وان شاء الله بكرة احلى من النهاردة ودم كل الشهدا مش حايروح هدر ...يارب يجعل فيها من يصلح فيها ويصلح ليها ..الصور حلوة قوي ومعبرة ..واليافطة بتاعتك بتنطق ..تحياتي ودعواتي ..

أزيك يا فاتيما

حمد الله ع السلامة

و أن شاء الله ربنا يقد كده و نكون معاكم فى المرات اللى جايه

و لو مقدرش

هنصلليكم دايماً ربنا ينصركم دايماً

و مش هنتشائم طول ما اللى زيك موجود يا غالية

أول ما قريت اسم البوست

قلت

أأأأأأأأه يا فاتيما

لو كل الناس تفهم كده

اننا لا نملك أنفسنا حتى نملك الأخريين


...............

عارفه لما فى ناس ابتدت تقول يا جماعة بلاش الطريقة دى و خليها صوم و صلاة

اغلب الناس افتكروها ضعف

و اللى يقول لك ايوة كده أرجعوا لخدك الأيمن و خدك الأيسر

لا كدة نافع و لا كده نافع

ربنا هو اللى يتصرف بقى

..................

و برضه قاعد مش هامشى

عارفه يا فاتيما قد ايه اتصالت من انبارح للنهاردة ناس كتير عاوزة تسافر

طب يا ترى قاعد علشان مش لاقى طريقة تسافر

لالالا طبعاً أسباب كتير و منها انى عاوز مصر تبقى مصر بس

يا مراكبى
--------

يعنى يا باشمهندس اول التعليق حلو ومتفائل وآخره يبقى إحباط ؟!!!

كدا مينفعش
أنا مش موافقة
والمثالية المفرطة احيانا حل
زى ما ترش معطر عشان تقضى على الريحة الوحشة ...
صحيح مش هتروح خالص الا لما تشيل سببها
بس ع الأقل هتخليك تصمد شوية
وانتا فى محيطها ...

احنا جربنا التعقل الشديد
وضبط النفس جدا
والإنتظار
وسياسة الخطوة خطوة
اثبتوا انهم مش كفاية
الحكاية عايزة خطوات واسعة
شريعة
حاسمة

و.... حالمة
ليه لأ ؟

نورتنى يا نبع الحكمة الغالى

candy
-----

ولو كان نزولى وكتابتى للبوست هيتسبب فى انى أشوف تعليق زى بتاعك دا يا كاندى

يبقى كفاية عليا جدا

ويشرفنى

عاشقة الرومانسية
----------------

والمصرواية راحوا فين ؟
انا بالنويابة عنك يا قطتى
وعن كل حد بحبه ...

كفاية دعواتك
وكأنك معايا يا حبيبتى

مجداوية
------

يا اخت مجداوية
انا عاوزة اشكرك جدا على تعليقك دا
لأنه وببساطة نموذج صارخ عمن كنت أتحدث عنهم فى التدوينة ...

حضرتك عارفة انى بأكن ليكى احترام كبير
لمقامك وسنك وذوقك و احترامك لنفسك

لكن احترامى ليكى ولمقامك لن يمنعنى أقول ان حضرتك نموذج حى للمسلم المتطرف المتعصب اللى بيبص بإستعلاء لباقى خلق الله لمجرد انه مسلم وهما مش مسلمين ....
بتستخدمى الدين للحكم على غيرك بشكل غريب وغير مبرر الصراحة
حكمتى عليا بإنى عقيدتى ناقصة ومحتاجة أروح أتعلم شوية عشان اكملها وأفهم انا مسلمة ليه ؟!!!

حضرتك متعرفيش خلفيتى الثقافية
ولا اذا كنت درست او قريت ف الدين كفاية
متعرفيش ومسألتيش ولا هتسألى
لأنك خلاص حكمتى ...
وبتنصحى من هذا المنطلق

هذا هو المنطق الاستعلائى اللى بتكلم عنه اللى بيخلى مسلم يرى نفسه اعلم بغيره من المسلمين لمجرد ان عنده مرجعتية مش عند غيره ...
واللى بالمناسبة ..
الكتب يكتبها علماء ف الدين برضو ...
وليبس معنى انى لا أسمع الحوينى او حسان أو غيرهم .. وببصملهم عميانى يبقى خلاص ..
آه نسيت ...
دا اذا كنت بأقرأ أصلاااااا


ثانيا
حضرتك بنفس المنطق الغستعلائى تحدثتى عن المسيحيين وانهم عدوا الخط الاحمر ...

حضرتك مين عشان تقولى كدا ؟

بلاش حضرتك

المسلمين عموما
اشتروا مصر من الاقباط لما جم وبقيت ملكية مسلمة خالصة وبالتالى بقى فيه خطوط حمرا لا يتعداها الأقباط ..وإلا

طب مقتلوش الاقباط ليه وافنوهم من جذورهم زى الأمريكان ما عملوا مع الهنود الحمر وخلصونا ؟!!!
آه
المسلم لا يعتدى الا على من اعتدى عليه فقط
يعنى رحمة منا بالأقباط
سيبنهم يعيشوا وسطنا
بس بشرط
لا يتعدوا الخطوط الحمراااااااااء
وإلااااااااااااااااااااااااااااااا

يا سلااااااام
ايه الاسلام السمح دا ؟
وإيه الاخلاق الهايلة دى ؟
وإيه الانسانية الرهيبة دى ؟

بصراحة
حضرتك بتدى صورة للمسلم مفيش بعد كدا ...

لأ وكمان
بتاخدى مثال لمظاهرة الأقباط ف شارعكم وازاى بيشتموا المسلمات المحجبات
طب ليه حضرتك مجبتيش سيرة المسلمين اللى نزلوا التحرير وماسبيرو يضربوا المسيحيين ويكسرلوهم العربيات لمجرد ان شكلهم مسيحى ؟!!!


مين اللى ابتدى ؟

مين اللى اخلاقه كانت زفت
وحرض عليهم

1400 سنة فى سلام
مشوفناش المناظر دى غير لما شيوخ الوهابية و المتأسلمين دخلوا مصر وخربوها وحرضوا على اقباطها وأستعلوا عليهم من منطق اننا مسلمين وانتوا كفرة ...وبتتجاوزوا الخطوط الحمرا ...


للمرة الألف
انتى مش ربنا يا اخت مجدواية عشان تحكمى على حد ...
وربنا لو شاء لخلقنا كلنا مسلمين
او مسيحيين أو يهود او بلا دين

انتى مين عشان تحكمى على حد ؟

وتحكمى عليا وعلى دينى ناقص ولا تام
وتحكمى على الأقباط يسكتوا ولا ميسكتوش ...

انا أعلم مقامك
واعمل انك استاذة فاضلة
و على راسى من فوق ...


لكن رأيك و ما خلفه
يسقطك من قلبى


لن أثبت ايمانى لأحد
اولهم انتى
او غيرك

انا عاوزة اعيش ف وطن حر
نضيف
مفيهوش تعصب ولا نعرات

عاوزة أمان واحترام
وأبسط قواعد الانسانية هى المساوة بينى وبينى غيرى ...
و اعتبار الاخر زيى

حب لأخيك ما تحبه لنفسك

ليه متقالتش حب لأخيك المسلم ما تحبه لنفسك ؟

ليه متقلش تبسمك فى وجه اخيك المسلم صدقة ؟؟؟

ليه ؟

هتقولى اخيك ضمنا تبقى المسلم فقط

هقولك دا منتهى التخلف والمخ الضيق ...

ارواح الله ف الأرض مقصود بيها المسلم والمسيحى معا ...
كلهم ارواح الله ف الأرض

وكالعادة حضرتك وغيرك ...
سيبتوا حال البلاد والعباد وركزتوا فى نقطة واحدة وهى الدين

مجداوية
------




مجداوية
-------


اللى حصل مجزرة عسكرية
مش تطرف او فتنة طائفية

ولو فيه فتنة
فمن يبدأها غالبا ..المتأسلمين
اللى فاكرين نفسهم فوق الجميع ..للأسف


المسيحى المتطرف عندى
زى المسلم المتطرف
الاتنين ليسوا واجهة الدين
اللى على أساسهم أبنى معتقداتى
ولا على أساسهم أعامل البقية ...
حضرتك بتعملى كدا للأسف
وبتبنى على متطرفى الأقباط حكمك
ومبتبصيش للقشة التى فى عينك


المخططات الخارجية والداخلية
انا عارفها
بس انتى كمان عارفه انها ممكن تكون جاية من السعودية وغيرها من بلاد بتشجع على التخلف وبتستخدم الدين مطية ...
وللأسف لها مريدين بيقبضوا
ولها مريدين بيسمعوا وبينفذوا ..
ولها ضحايا بينساقوا ....


تعليق حضرتك كله تعصب وتطرف
يجعلنى لو مسيحية
أخاف وأقلق واحزن
ولو مسلمة
أنكسف و أشعر بالعار
لأن هناك من يتخذ دينى وسيلة لإثبات انه أفضل من غيره فى الأديان الاخرى وفى الأسلام نفسه ....


انا شاكرة لحضرتك تعليقك
ولحضرتك

و لكل اللى ممكن يكون
بيتعبرنى بنافق الأقباط
عن قصد او عن جهل بدينى ...

يا جماعة
---------
اللى فاكر كدا
ميجيش هنا تانى
ويتعب نفسه بالجدال معايا
لأنى لن أغير رأيى بناء على أرهابه الفكرى و تعليقاته المدججة بالحجج
او أى شىء من هذا القبيل

ماشى ؟

فتاة من الصعيد
--------------


معلش يا فاتى


الحرية هى شجرة الخلد
وسقياها قطرات الدم المسفوح


والإسارة
(يعنى العبودية )
هى شجر الزقوم
وسقياها أنهر من الدم الأبيض


دا عمنا عبدالرحمن الكواكبى
اللى بيقول كدا


معلش

ابراهيم رزق
-----------

ازيك يا ابو العيال

ومبسوطة ان البوست عمل فرق كدا
وان كنت كتبته اولا عشان اوثق تلك الأيام وأرجع افتكرها تانى
لما الأحوال تتبدل

زى ما ساعات ارجع اقرى بوستات يناير وأول فبراير و الاقينى كنت صح ف حاجات كتير

كنت صح فى التفاوءل والأمل
و دلوقتى عندى نفس الاحساس دا
رغم الدم والسواد

بس هيا كدا
كل ما تضيق ..تفرج
وكل ما يسحروا
ينقلب عليهم سحرهم
والمقابل اننا نصمد
ونكمل
نبقى على الأيمان والصبات
وبس


سلملى على سالينازة وزياد قوى
ومامتهم أكيد

واختك عاملة ايه ؟

zizi
----

الله
ايوالنبى يا ست الكل
دعوااااااتك الحلوة دى

انا كل ما أجى خارجة اقول لماما ...
ادعى يا حاجة للناس دى
ادعيلنا كلنا
وادعى للبلد بحالها

هيا مش مع الثورة ولا ضدها
بس بتتابع الاخبار عشانى
او بمعنى ادق
عشان تراقبنى
وكل مرة انزل تسمعنى محاضرة
ف ان لو جرالى حاجة
وان كدا غلط
وان مفيش فايدة
وان معندناش حد ف العيلة ملوح شمال غيرك ...
واقعد اسمعها لحد الآخر
وبعدين اقولها
انا نازلة ....
وادعيلنا يا ماما

فتدعى
ولما أرجع تسألنى عملتوا ايه ؟
واقعد احكيلها بقى

وف الاخر أقولها
ادعى يا ماما
انتى ام
ودعواتك مستجااااابة

ربنا ما يحرمنك منكن يا ست الكل
ولا من دعواتكم الحلوة


نورتى المطرح كله

Ramy
----

ازيك انتا يا ر ر

والله يا بنى انا كل ما أشوف مينا أقوله
من يوم جمعة قندهار
ما تعملوا جمعة اقباط ياجدع وانا اول نفر هاجى معاكو ...

بس انتوا عالم طيبة طول عمركو
و مش بتوع استعراض
ودا اللى قاهرنى بصراحة
ان يوم ما تخرجوا فى مسيرة سلمية
تتشوه وتبان وكأنها متعصبة و ..و ..
حاجة بصراحة تحرق دم أى حد عنده عقل وبيفهم وبيتعامل وبيعيش ف البلد دى


موضوع الخد الايمن والايسر دى
على طول الخط انا شخصيا ضدها يا رامى
الحق حق
ومفيهوش تنازل

انا فاكرة يوم 27 يناير لما الكنيسة قالت للأقباط متنزلوش وصلوا ف بيوتكم ...

عادل البلد دى فيها حكموة كتب بوست من سطرين فى منتهى البلاغة
قال انا هصلى للرب
وهنزل التحرير

دا المفروض
والمفروض الكنيسة يعتدى عليها
تطالب بحقك
القانون بيتجاهلك
تعلى صوتك عشان تسمعه
تعمل زى ما بيعمل أى مصرى عادى
ليه العنصرية والتفرقة دى ؟
ليه ؟
عشان يستفيد اللى قاعد على كرسى الحكم من هذه الفرقة والتطاحن
ويا ريت هنا وهنا يفهموا


و خليك هنا يا رامى
هتروح فين ؟
انا عاوزة مصر تفضل زى ما هيا
زى ما اتربيت فيها
وعرفتها
وحبيتها


انتوا جزء منها
ومنى
جزء بحبه عشان اخترته
متفرضش عليا
ولا خنقنى بتعصبه وجهله
بالعكس
عمرى ما شفت منه غير الخير
وبس



عارف
انا افتكرتك ف طلعت حرب
انتا ومينا و كل اللى اعرفهم ...
جالى حالة هلع لما فكرت لثوانى
انى ممكن ف يوم ألف مليون
بعد الشر ممكن ممكن
امسك شمعة زى دى لحد فيكم ...
الهلع دا متتصورش
حسسنى بمسئولية قد ايه
انى مسكتش ابدا طول ما فيا صوت
ومبطلش أنزل ابدا طول ما فيا نفس
وميأسش ابدا طول ما فى حلم لازم يتحقق


ربنا يحرسكم
و يحرس مصر
آمييييين

أزال المؤلف هذا التعليق.

مجداوية
------


وش مبتسممممم قوى

و استكمالا لما سبق
و بنفس النبرة الإستعلائية
حضرتك بتردى ... ؟


طب افهم من كدا يعنى
ان حضرتك كنتى تعلمين مسبقاً
رأيى و وجهة نظرى و توجهى العام
وتوقعتى ردى كماااان

ومع ذلك
دخلتى وكتبتى وعلقتى
؟

ليه ؟

غالبا ... مش عشان تنصحينى
زى ما قولتى
ولكن
عشان تاخدى الثواب
وتشعرى بالرضا عن نفسك
وفقط ...

مش كدا برضو ؟


طيب

أكيد انا مش هعتذر لحضرتك
عن لهجتى الجارحة
لأن بصراحة
اللى حضرتك كتبتيه دا
لم يكن يقل إيلاما ..
ولا اهانة


انتى وصفتينى بالجهل فى دينى
وبالنفاق للمسيحيين
و اتكلمتى عن شركاء ف الوطن
والإنسانية
وكأنهم عبيد احساناتنا


وكل دا
بمنتهى الادب والذوق
والشياكة
اللى المفروض تلجمنى مثلا ؟!!
وتخلينى مردش من الخجل منك
تحت مسمى ادب الحوار
واللى يصح وميصحش .. ؟


وأوجعك كمان
انى كنت قاسية ؟


اعذرينى
فطريقتك المهذبة دى
لن تشفع عندى
انك اجرمتى ف حقى
وحق غيرى
ولو كنتى مش شايفة كدا ...
انتى حرة
لكن ...


انتى بالضبط
كمن ذبح شخصاً
بس الاول لبس جونتى حرير أبيض ..
مش اكتر


عموما


انتى قصدتى شىء
من البداية ...
من جملة تعليقك غير الظاهر


و لو جاز لى ان أعقب
على ما قلتيه
فلا تندمى على تعليقك هنا
اندمى حقا
عمن لحقت بهم سهام احتقارك
و تهوينك من شأنهم
ولو بنية حسنة



والكلمة نور
وبعض الكلمات قبور
دى جملة عبدالرحمن الشرقاوى
اللى حطتيها فوق صندوق التعليقات بتاعى من زمااااان قوى
عشان اقول بيها
ان فيه حد يكتب كلام
يحرض على القتل
وفيه كلام يحقن دم الأبرياء
واحسب كلامى ولو كان يغضبك
او يغضب غيرك
فهو على الأقل لن يدفع اى احد
للنزول فى الشوارع يوما ما
لقتل الآخرين المختلفين عننا
ف الدين لمجرد انهم تجاوزا الخط الاحمر
ولأننا احسن منهم
وهما ملزمين يا يؤمنوا بما نؤمن به
يا يوطوا راسهمو يمشوا جنب الحيط ..
و باقى الكلام الجميل
الطيب
المتسامح دا ...


و اخيرا
شكرا ليكى برضو
للمرة التانية

وعليكم ...
الســـــــــــــــلام

الأخ غير معرف
-----------

لما تتشجع الاول
وتدخل بإسمك
أبقى أرد عليك ...


انما تبقى مستخبى
ومتخفى ...
وعامل فيها عنتر
و حامى حما الإسلام
و متشنج ع الآخــــر
و عمال تهين ف شخصى الضعيف
و المفروض بعد دا كله
إنى أناقشك
واحترمك
وأعاملك كويس


وكمان بتصادر عليا من اولها
وتقولى ردى بحجج و براهيم
وأبصر ايه
وبلا وكاحة وقلة أدب

يا اخى
اختشى على دمك
أو بالخليجى
إستحى على وييهك


ليك وش ؟

لأ .. غالبا
ملكشى
ولا كنت أظهرته


عموما


ربنا ياخد بيدك

تصفيق حاد
:)
وش متبسم قووووووووووى

بحببببببببببببك ياقلب البحر

أزال المؤلف هذا التعليق.

عاشقة الرومانسية
----------------

بتسقفى على ايه ؟
مفيش حاجة تستدعى
وبطلى شقاوة




انا كمان بحبك
يا عروسة البحور
وقطتى الحلوة

مجداوية
------

لا حول ولا قوة الا بالله


يعنى التدوينة كانت ف الأصل
لتكريم الشهدا
والديث عن احوال البلد
حولتيها حضرتك
لحديث عن الدين وفقط
ثم انحصرت فى النهاية
للحديث عنى ؟

طيب

ممكن أسأل حضرتك تانى ...
انتى مين ؟

انتى مين عشان تحكمى عليا
انى مدعية بعلم دينى
وانا مش كدا ؟!!!

يعنى حضرتك مين عشان تنصبى من نفسك قاضى وتصدرى الحكم ؟

او طبيب وتحكمى انى مريضة زى ما وصفتى ؟!!!

عشان حضرتك درستى فى معهد دينى
او بقيتى حتى شيخ الازهر
دا يمنحك صك وصولجان
و سيف تلمسى بيه كتفى
وتقولى اذهبى انتى مؤمنة
او تطيرى بيه رقبتى
وتكفرينى
او تلوحى بيه من بعيد عشان تفهمينى ان لسه قصادى فرصة ارتجع والم روحى واروح اتعالج ؟!!!!!

انتى مين ؟!!!


انزعى القفاز كما شئتى
مبتخضش أنا

ثن ان الصورة اللى حضرتك استخدمتيها لتأكيد وجهة نظرك صورة هزيلة جداااا
وفيها إهانة لرب العالمين ...


لو يوسف حد افترى عليه بشىء
ليس فيه
هدافع عنه اكيد
لأنه طفل صغير
وليس انسان بالغ وراشد وكبير قادر يحمى نفسه ...

لكن لما يبقى راجل ...
مش هينتظرنى


اما ربنا سبحانه وتعالى
لما حد يفترى عليه
هل تفتكرى انه ضعيف ومنتظرنى انا الغلبانة ...ادافع عنه ؟!!!
دنا عاوزة حماه و نصرته ليا
مش العكس

الله ورسوله (ص) فى غنى عنى انا ومليارات من خلقه من اول الدنيا لحد ما تخلص ...
حضرتك بتتكلمى ف ايه ؟

الدفاع عن الدين
والغيرة على الله ورسوله (ص)
تكون بالآتى
انى أبدأ بنفسى
اكون مسلمة كويسة
محترمة
ملتزمة
مسالمة لا أؤذى احد
اخلى بالى من نفسى
ومن المسئولين منى
أتدبر ف الكون واحواله
واسعى لعمارة الأرض
اعبد ربنا فى كل صورة
واسيب حاجة لغيرى ينتفع بيها



لما أعمل كدا
أبقى بنصر الأسلام
و انصر رب الإسلام
ونبى الإسلام
ابقى نموذج محترم
ويليق ...



ولما اخلص كل اللى فوق دا
ابقى اتحول لداعية
او نبى
او قاضى
او أى حاجة شبه كدا


وانا لسه قصادى كتييييير


حضرتك بقى
خلصتى كل اللى فوق دا ؟!!!
يعنى حضرتك دلوقتى
نموذج مكتمل وتام للمسلمة
التى ينقل عنها الاخريات دينهم ؟!!

مظنش

مش لعيب ف حضرتك
لا سمح الله
انما ومن غير جونتى خالص اهو
انا بتابع حضرتك من ساعة من دخلت التدوين يعنى من اكتر من 3 سنين وأزعم انى بعرف اقرى الناس كويس ...
وفكر حضرتك اللى بتنشريه عبر كتاباتك
فكر متطرف عنصرى ...
وردى على تعليقك كان من منطلق قراية جمعية لكل ما فات ...
رأى حضرتك فى حاجات كتير غير الدين
تصب دايما وغالبا فى خانة واحدة
هى خلط الدين بأى شىء
لدرجة تخلى العيشة والعيشة واللى عايشنها ...لا تطاق لأمثالى
من شدة قسوتها وتحفزها لأى حاجة ..

انا مين عشان احكم على حضرتك ؟
انتى حرة ف رأيك
ولهذا
لم يحدث مرة انى دخلت خبطت ف كلامك وقولتلك انك غلطانة
او عنصرية مثلاً
او تحريضية لا قدر الله
اللهم مرة كنت بدافع عن حد غيرى ..
لأنه لم يكن حاضر وكان يجب ان
أرد غيبته بما أعرفه عنه ...
و رأيه ثبت الآن ع الأقل
انه كان صح ..
وحضرتك كالعادة هتكابرى
وتؤكدى انك انتى اللى صح ...


آه نسيت

حضرتك تملكين ناصية الحق
و كل صكوك الأيمان
و معاكى توكيل الدفاع عن الإسلام ...


وانا
الكبر لى وحدى
والمرض لى وحدى
و الجهل لى وحدى
و الخطأ لى وحدى



و حضرتك بلغتى خلاص
وخدتى الثواب الذى كنتى تنويه
و أبهجتى قلوب اللى انتظروا هذا السجال عشان يحسوا بإنهم نصروا الاسلام
وحقنوا الدماء
و رفعوا البلاء
و خلوا مصر ف السما
واهلها امنين


وسيب لى يا ستى المرض
والجهل
والنفاق
والفساد ف الدنيا ..
وكل ما فى حكمهم


وإعرضى عن الجاهلين امثالى
و إعرضى كمان عن مدوناتهم
وما يكتبونه فيها من لغط ...


شىء اخير بس
عشان أبقى خلصت ذمتى
عاوزة بس أقول ان
طريقة حضرتك ف النصح بالعلن
طريقة فاشلة
وسيئة جدا
وتؤتى بعكس المرجو منها
ومن اكتر من حد مشترك
أتفقوا ان النقاش مع حضرتك
كان دائما يؤدى الى نهاية مؤسفة أدتى الى عزوفهم عن التعليق عندك تماما عشان ميزعلوكيش او يبقوا سخفاء معاكى ..
و انا كنت منهم ..
حتى اليوم

لن أنصحك انا الىخرى ف العلن الىن
وأقولك
انك محتاجة تغيرى أسلوبك
لأنه ليس من حقى ...
انا مين عشان كنت أعمل كدا كل الشهور اللى فاتت ؟!!!
لكن ما دمت حضرتك سمحتى لنفسك
انك تسدينى النصيحة ف العلن
فإنا كمان بردها لحضرتك
وبنصحك ..
تخففى من لهجتك الإستعلائية دى
و تدعى الى ربك بالموعظة الحسنة
وليس التجريح والإيلام و التقليل من شأن الآخرين
ولو كانوا كلاب ف سكك يا ستى

بس


وشكرا ليكى على كل حال

شكرا لك على طرحك للموضوع ..
بالتوفيق لك..ولاهل مصر الطيبين
مع تحياتى
نور

غيييييييييييييري الباسورد بشكل عشواااااااااائي المدونات بتتسررررررق

لا حول ولا قوة الا بالله

وكانى ارى ما اراده المجلس العسكرى تحقق هنا من الفتنة الذى اراد ان يشعلها
==========
لابد ان نفرق بين امرين بين سماحة التعامل مع من يخالفنا فى الدين وبين الحكم عن عقيدته والحكم على عقيدته لا يكون بلساننا ولكن بما بلغنا به الله سبحانه فالكل يعلم ان الكل يرى نفسه على صواب ولا غضاضة فى هذا
ثُمَّ إِلَى رَبِّهِم مَّرْجِعُهُمْ فَيُنَبِّئُهُم بِمَا كَانُواْ يَعْمَلُونَ وحكمنا على ما سيؤؤل عليه الحال كما بلغنا ربنا ورسوله
=========
ولا احد يختلف ان هذا الدم الذى ازهق فى رقبة المجلس العسكرى

لا احد يرجوا ان يمتد الخلاف لهذه الاتهامات الشخصية لابد ان يكون عندنا قناعات ان نختلف فى طرح الافكار ونتقبل بعضنا بالنصح فالدين كله النصيحه
========
ارجو الا يكون هناك اى شىء يفسد العلاقة بيننا كاخوه مهما كان هذا الشىء واهيب بكما ان تمدا ايديكما لبعضكما فلا يوجد فى الدنيا يستحق هذا الشقاق
=========
كل انسان يقرأ تدوينة عند الاخر يراها من وجهة نظره وانا اتصور ان اى شىء فيه لبس او امر يستدعى النصيحة فكلنا هنا لننصح بعضنا ولا يوجد وراء ما نكتبه مجد نريده ولا شهرة تستحوذ علينا لكن كل حسب نيتة اللفهم اصلح نوايانا واجعلنا فى طريق الاصلاح والصلاح
بارك الله فيكما

نور القمر
---------

نورتى يا أنوار
مش نور واحد
واهل فلسطين تاج على راسنا


شكرا ليكم انتوا
اللى عملتونا معنى الكرامة
اللى متجيش بالإنحناء
ولا تأتى الا بالصمود والمقاومة


نورتى روح قلب ماما جدا
وشكرا على شعورك الطيب دا
ومش مستغرب ابدا

كــــيارا
---------

وبعدين ف الغجر دول بقى ى ى ى
انا بغيرها والله كل شوية
على قد ما أقدر

وهسيف نسخة متحدثة ع الجهاز حالا
حاضر

موشكرين يا بنوتات يا عسولات
مننحرمشى

الاخ الغير معرف
-------------

انتا مالك عيلتك كلها ؟!!!!

الطائر الحزين
-----------


صباح الورد يا إيهاب

معلشس انا اسفة اذا كان تعليقاتى ضايقتك
انا عارفة غلاوة الاخت مجداوية عندك
بس معلش ...

الحكاية مش انقياد للفتنة ...
ولا حاجة

المجلس عندى زيه زى امريكا واسرائيل والفلول وأى مغرض
مش هيقدر عليك غير لما انتا تسمحله بمساحة لذلك ....

وما حدث هنا انى كتبت بوست عزاء وتكريم بسيط للشهداء ...
وقولت رأيى فيهم
وعقيدتى كأنسانة ومسلمة
بس


ايه المفترض بعد ذلك
أن اللى يدخل
وعنده كلمة خير يقولها
او ليصمت
صح ؟

دا محصلش

الاخت مجداوية بدل ما تطيب خاطر المكلومين على القتلى ...
كل اللى فاتكرته انهم اتعدوا ع المحجبات ف الشارع وانهم تجاوزوا الخطوط الحمرا وتحدثت بنبرة فوقية وكأنهم عبيد وتجاسروا على اسيادهم ويستحقوا ما لقوه من حفلة الدهس الجماعى ....


تخيل انتا كدا
اللى بيلوم ضحية و مجبش سيرة القاتل بالمرة ولا لام عليه ...

اقوله ايه ؟؟

تخيل كمان واحدة ميت
واحدة راحت عزاه
اول ما دخلت مقلتش البقية ف حياتكو
وقعدت بقى ...تقول
انتوا زعلانين ليه
دا كان بخيل وجلدة
دا كان بيضرب عياله
دنتا شوفته مرة بيبص عليا من شباك الحمام
دا ميستاهلش العياط دا كله
دا هوه اللى غلطان عشان ممتش من بدرى
بتعيطوا على ايه ؟!!!


تفتكر رد فعل اللى ف العزا يبقى ايه ؟

يقولوها متشكرين
على وجهة نظرك ؟
ولا يعملوا
زى انا ما عملت

الاخت مجادوية نسيت
او تناست ان مدونتى يدخلها اخوة مسيحيين ...
وتفتكر لما يتهانوا فى بيتى
المفروض أسكت ؟

بلاش يهانوا
لما يبقوا ف حزن ومصاب جلل كدا
وييجى حد يقول الكلام دا
تفتكر منظرهم يبقى ايه وشعورهم شكله ايه ؟!!

انا ليا جار مسيحى عنده محل جنب الكنيسة اللى ف شارعنا ...
(بالمناسبة بقول عليها دايما الكنيسة بتاعتنا لأنها بتاعتنا فعلا كمصريين )
المهم
الراجل دا من اول ما فتح المحل
وانا بشترى منه وأصبح عليه ف سكة المترو ...
هوه من الناس المقفلة كدا
وميحبش يرغى
وانا مصرة دايما اصبح واعيد عليه ..
لحد ما بقى فيه بينا صلة لطيفة ...
الراجل دا انا كل ما تحصل حادثة
يقفل محله يومين ويرجع
اعزيه ...
لو اقولك عزيته كام مرة ف السنتين اللى فاتوا دول ....
لدرجة انى بقيت انكسف ابص ف وشه
انا لا قتلت ولا ساهمت ف القتل اهو ..
وعارفة ان امن الدولة والنظام وحاليا العسكر هما اللى وراها ..
ومع ذلك كان لازم اشعر ببعض الذنب
لأنى مبعملش حاجة تمنع دا ...

لما حصلت احداث ماسبيرو
مبقتش عارفة اوريله وشى ...
هقوله ايه ؟
اعزيه للمرة الكام ؟
ولحد امتى ؟


احنا مالنا بقينا كدا ظ
الأخت مجداوية فى تعليقها قسوة عجيبة
وكأن اللى ماتوا يستحقوا ما حدث ؟

فين التعاطف مع الضحايا
والدماء التى سالت
وتعالى نقلب الآية كدا
وتخيل لو كانوا ال25 دول سلف ولاّ اخوان ...
هل تتخيل ما كانت ستكتبه ساعتها ؟

هوه البشر دول أصناف ؟

هما صحيح فوق بعضهم درجات ...

بس عند مين الدرجات دى ؟
عندنا ولا عند ربنا ؟


انا بعرف ربنا بقلبى
وبدماغى
وبفطرتى

ليه حد عاوز يدخل فيها ينخربها
ويخربها
ويصبغها بصبغته هوه ؟


اما موضوع .. الإتهامات الشخصية دى
انا لم أبدا بها
انا مقولتش انى جهبذة ف الدين يا اخواننا
ولا أعديت انى عالمة ..
وقعدت أنصح ف الناس
انا قولت اعتقادى الشخصى
اكرر ... (الشخصى)
ليه كلمة شخصى دى عاوزين تمحوها ؟
ليه بعض الناس بمعنى ادق عاوزينا نبقى قطيع ماشى ورا بعضه وكلنا بنقول آمين لشخص او اتجاه ؟!!

الطائر الحزين
--------------


نا عاوزة ابقى نفسى
و بعدين يا اخواننا
انا عاقلة وراشدة وكل شوية اقولكو انى شارفت على الأربعين
شارفت على الأربعين ...
و انا اللى هتحاسب ..
مش انتوا
كل واحد ماله ومالى ؟؟


انا بتغاظ جداااا
من اللى بيعمل وصى عليا
من غير ما اسمحله
او استشيره
او يبقاله مكانة ما
تستحق ان يكون موطن نصيحة
لمجرد انه قارى ف كتب الدين
و درس ف مكان ما ...


ليه يا جماعة بتدونى اكبر من حجمى
وكأنى مؤثرة ف الجموع
وانا بتكلم عن نفسى
ولا أرغب ف زعامة
ولا مشيخة ؟


ولما ارد
يبقى صفاقة
وتطاول ع الدين


مش بتكلم عليك يا ايهاب
الكلام للناس اللى عارفة نفسها
وبتتخفى ف الغير معرف



انا أرى اخى فى الانسانية والوطن
شخص يستحق كل احترامى
و ان كان لا يؤمن بدينى


ايه المشكلة فى كدا ؟



حكاية انه يعاملنى بسلام
وفى حدود المهادنة
ايه الكلام العجيب دا ؟
مش فيه حاجة اسمها قانون
دا مواطن بيتعدى على مواطن
اخليها مسيحى يتعدى على مسلم ليه ؟
عشان هما أقل عددا ؟!!!
وانا الاكثرية ؟
طب ما هما اصحاب الأرض من زمان
وانا اللى جيت عليهم ؟


دا معناه انى بقيت دخيلة ؟
ولا بقيت انا كمان صاحبة أرض

قوم بعد 1400 سنة ييجى حد يزايد عليهم ويقول انهم ليهم خطوط حمرا وخضرا يعدوها او لأ ؟!!!!

ايه كم العنصرية دا ؟

ولما أرد حد يزعل ؟
ليه ؟

الاخت مجادوية مكنش عاجبها العزاء

مكنتش تحضره
ولا تكلف خاطرها

لكن ما دام جت
واتكلمت

متزعلشى

واظنها مزعلتش
لأنى ازعم انى عارفة توجهها
وافكارها


اما نواياها
مدخلتش فيها
غير مضطرة بالتخمين
زى هيا ما تدخلت فى نواياى
وبنت عليها رأيها


كتر خيرك يا إيهاب
على سعيك للصلح

ومعلش عكننت عليك ع الصبح

:)

غير معرف او غير معرفة
-------------------


هوه انا مش قادرة احدد
اذا كنت مؤنث ولا مذكر

بس أى كان


حضرتك أثبت وبالدليل القاطع
انك عارف معلومات عنى
وعن محمد فوزى
لا تقبل الشك

وواضح كمان انك مراقبنا كويس
ومركز معانا قوى


وواضح كمان
انك يا غيران عليه
يا غيران عليا
يا غيران م الحكاية كلها
من باب الاذى لله ف لله كدا


طيب

يؤسفنى اقولك
انك صح
وانى حاسة
و فاهمة
و شايفة
و عارفة
و منيش عبيطة



واخيرا
لو كنت كنت قاصد خير ليا
فشكرا ليك
بس ارجوك
متتعبش نفسك كدا تانى
وتتدخل ف حياتى الشخصية ...

ولو كنت قاصد توجعنى
فيسعدنى اقولك
انك نجحت جـــــدا

بس كدا

أزيك يا فاتيما

صباح الخير

مش عارف اقول ايه صدقينى بس مكنتش حابب ان الموضوع يكبر زى كده

و بعد كده الغير معروف او الغير معروفة زى ماقلتى غيران
يمكن

بس انا بقول دة مريض نفسى من يتدخل فى حياة الأخريين تاشخصية دون ان يكشف من هو

فهو مريض نفسى و يريد العلاج

دة بجد مش انى بحاول اهزقه

مش عارف اقول ايه يا فاتيما بس و لا يهمك


الناس اللى زى كده لا يؤثروا فى الناس الطيبة اللى مبتعملش اى شيىء غلط

و حطه ربنا قدمها فى تصرفتها

ربنا معاكى يا فاتيما

ازيك يا فاتيما...يا رب تكوني بخير
أنا خلاص مبقتش لاقية كلام أقوله و بقيت مكتئبة على طول و مش عارفة حتى أبتسم..الوقفة ف اسكندرية كانت حزينة قوي..البلد دي مش حاسس بيها غير شبابها..بس للأسف..أنا بجد حاسة اننا...هرمناااا!!
خللي بالك من نفسك

Ramy
----


صباح الخير والرضا يا رر

الموضوع مكبرش
هوه كبير أصلاً
وحقك عليا اذا كانت التعليقات جارحة
وانتوا واحنا سوا فينا اللى مكفينا



الأخ الغير معرف او غير معرفة دول بقى
انا معنديش تعليق عليهم
غير ان الفضول داء
و زى انتا ما قولت ... عاوز علاج


تعرف المشكلة الحقيقية ايه يا رامى ؟

ان اللى بيكتبلى الكلام دا
بيتكلم وكأنه عاوز مصلحتى فعلا
ومتصور انه بيلفت نظرى لحاجة
انا مش عارفها مثلاً
بينما هو العالم ببواطن امورى الشخصية
اكتر منى ؟

ايه الحكاية يا جماعة
هوه انا باين عليا انى آخر من يعلم فى كل حاجة ولاّ ايه ؟!!!

ليه البعض واخدنى بإستخفاف كدا
وكأنى فاقدة الاهلية ؟

اكونشى كدا وانا مش واخدة بالى ؟

قولى يا رامى
انتا مش هتكدب عليا وهتبقى عاوزلى الخير انا متأكدة من كدا ...

يمكن انا مش مستوعبة ولاّ حاجة ؟

dahlia...
---------


صباح الامل يا داليا
اثبتى يا بت ولا يهمك
هيا اول مرة يقرفونا ف عيشتنا

ايه ؟
هيشنقونا ونسكتلهم ؟!!

لأ
احنا مكملين

ومعلش الوقفة عندكو كانت حزينة قوى
اكمن البحر ف اول الشتا بيدى جو سينتمنتال حزاينى كدا من باب الشجن
معلش ...

هم يستحقون الحزن
و البلد دى تستحق تنضف

احنا لا هرمنا ولا حاجة
انا لسه يا اومى ف عز شبابى
و محدش يقولى هرمنااااا دى خالث

هما اللى هرموا
وعاوزين ينقلولنا الفيرس
و ان شاء الله هنردهم خائبين
وربنا ف ضهرنا

مش هفكرك بقى
دنتى اللى دايما تسندينى
وتفكرينى ..
بكل دعاء طيب تكتبيه

خلى بالك انتى كمان
من نفسك يا حبيبتى ...
وبوسيلى الولاد وزوجك العزيز
يا ادفى كورنر ف قلبى

الغير معرف
----------

الله

هوه ليه حضرتك مستضعفنى كدا
ومتصور انى مقدرش أرد عليك
وأقّبح ؟!!!


حد فهمك انى معرفش أشتمك
واجيب سيرة الوالد والوالدة
اللى ملهمش ذنب ف اخلاقك دى
... ع الصبح ؟



المشكلة
انك مستخبى ورا المجهول
و مش هشتم الهوا انا ؟!!!



على فكرة
ممكن أهينك جدا
واردلك الصاع صاعين
بس انا عندى اخوات ولاد
وبلاش أفترى ...



وبلاش كمان والنبى النفخة دى
ولا كأنك صلاح الدين الأيوبى
وحامى حما الديار الأسلامية
لأن من اسلوبك الركيك
واناولا أقبل أشغلك
طعمجى او غفير على مراجيح


اتلم بقى
علشان لو فوقتلك
هطلع تراث الطفولة المشردة ف مصر القديمة وحواريهاكلها
على نافوخك ...

وساعتها
مكانتى التدوينية
هتهتز بشدة

وانا ميخلصنيش انها
تهتز
بسبب أمثالك


خلصنا بقى


و مش هرد عليك تانى
مش كل شوية أهزقك
جتكوا القرف مليتوا البلد

صباح الخير يا فاتيما ..
الكومنت اللى هاكتبه دا مش هاكتبه علشان عايزاه يتنشر أو علشان حاجة غير حاجة واحدة ..

أنا ماأعرفش الميل بتاعك ، وتابعت الحوار اللى بينك وبين مجداوية وحسيت أنى عايزة يإما أرد يا إيما أعيط ..
وبما عندى حاجات كتير أعيط عليها من القهرة فقررت أنى أرد.

طبعا كلام المدونة مجداوية مايتردش عليه ، لأنى حاسة أنى مش عايزة أرد عليه ..
فى مليون حد رد على الكلام دا قبل كدة وكلهم اتكفروا ، واللى اتحل دمهم ، وأنا أصلا شهادتى أكيد هاتبقى مجروحة لأنى مسيحية.

بس اللى عايزة أقوله حاجة ..
هى بتقول أن أحنا كمان بنكفرهم وإننا بنقول عليهم كلام وحش فى الكنايس بس دلوقتى الصوت على بعد ما كان بشويش (وعلشان الكنايس مافيهاش مكروفونات برة زى الجوامع غالبا فبنكلم براحتنا)
!

أنا بقى عايزة أقول نقطتين مش عارفة أنتى سمعتيهم قبل كدة ولا لأ ..

الأولى : الكفر !!!
فى دكتور قالنا فى الجامعة مرة المسيحيين كفار أيوة والمفروض مايزعلوش لما نقول كدة !! .. كافر يعنى إيه يعنى مش مؤمن بعقيدتى ؟؟ يعنى أنت كافر بالإسلام ..
وأنا كمان كافر بالمسيحية ..
وكل واحد كافر بكل العقايد ماعدا عقيدته .. يعنى كافر دى مش شتيمة دى وصف حالة.
بصراحة كلامه رغم أنه صادم بس دخل دماغى

وفى مقال مرة قريته زمان فى المصرى اليوم وهاموت وألاقيه تانى بس مش للأسفففففففف مش فاكرة اسمه ولا اسم الكاتب
هو كان حد أزهرى
المقال كان بعد حادثة طائفية او تصريح لحد من الشيوخ .. مش فاكرة
المهم أنه قال لازم نبقى صرحاء
كل واحد مؤمن مؤمن بعقيدته مش مؤمن بعقيدة الآخر .. وإلا كان بقى الآخر
يعنى المسلم مؤمن بالإسلام والمسيحى بالمسيحية واليهودى باليهودية ...
ومش مؤمن بالعقايد التانية وإلا كان ساب عقيته وبقى الحاجة التانية
فبلاش نجامل بعض فى صميم العقائد
لأن دا نفاق ورياء
ازاى امدح حاجة أنا مش مؤمنة بيها ؟؟
بس القبول والحب والمشاركة والمعايشة يبقى على أساس أنى عارفة أنك مش زىّ ومع ذلك أنا قابلاك لأن دينى بيقولى أقبل حتى اللى بيقول كلام غير كلامى ، مش اقعد اظبطط فى كلام اللى قدامى علشان اقنع نفسى (أو استهبل على نفسى بقى) أنه بيقول نفس كلامى ..
ماهو لو بيقول نفس كلامى كان بقى أنا !
الصراحة هى المقالة كان اسلوبها منطقى ومقنع جدا ووافى ، بس أنا مش عارفة اكتب زيها وشكلى بكتب زى مدريس الرياضة اللى بيشرحوا القسمة المطولة بطريقة تخلى كل العيال تدخل أدبى لما تكبر.

ماعلينا المهم تكون الفكرة وصلتك

يعنى لو هى شايفة من القرأن أنى كافرة وبتقول أنى بقول عليها فى دينى أنى كافرة ..
ماشى ، بسأنا دينى بيقولى أن حتى اللى مش زيك لازم تقلبيه وتحبيه علشان ربنا
"إِنَّهُ مُنْعِمٌ عَلَى غَيْرِ الشَّاكِرِينَ وَالأَشْرَارِ"
انجيل لوقاإصحاح 6
"يُشْرِقُ شَمْسَهُ عَلَى الأَشْرَارِ وَالصَّالِحِينَ، وَيُمْطِرُ عَلَى الأَبْرَارِ وَالظَّالِمِينَ"
انجيل متى اصحاح خمسة
وفى أيه كمان بتقول "هكذا أحب الله العالم"
يعنى ربنا بيحب العالم كله وأنا هاكره حد منهم ؟؟
دا حتى عدوى قالى أحبه
واصلى للى بيسىء ليا


أنا ماكنتش عايزة أتكلم عن عقيدتى المسيحيةلكن اتكلم بصيغة انسانية
لأنك أكيد سمعتى الكلام دا قبل كدة
بس واضح أن فى ناس ماتعرفوش

حاجة بقى يمكن أول مرة تسمعيها

وفى مسيحيين كمان بيقروا فى الأنجيل ومش واخدين بالهم منها خااااالص لأن دا بينعكس على سلوكهم مع الأخر ، وبجد بيسفزونى !!
وهى دى ثانيا
(رغم أنها زى أولا بالظبط بس قال يعنى نقطة جديدة علشان حاسة أنها مهمة)

فى قصة فى الكتاب المقدس
اللى غالبا مش بيفتحه المسلمين غبر علشان يثبتوا أنه محرف وأن المسيحيين كفرة.

مش هانقلهالك نصا(رغم أنها صغيرة وأنا رغاية فأحسن انقلهالك) علشان فيها خلفيات يهودية ممكن تكونى مش عارفها.

بعد ما المسيح صعد
وتلاميذه الاتناشر كاناو بيبشروا بالمسيحية كانوا بيبشروا اليهود بس
ومش بيبشروا الأمم
لأنهم فى نظرهم كانوا أنجاس
لأن التلاميذ كانوا يهود قبل ما يبقوا مسيحيين
فكانوا متأثرين بنظرة اليهود لأى حد مش يهودى
(وعلى فكرة المدونة مجداوية شايفة المسيحيين أنجاس برضه وقالت كدة صراحة فى كومنت على مدونتها ، وقالت هما أنجاس طبعا هما واليهود وعلشان كدة مش بيخشوا منطقة الحرم)
وفى يوم القديس بطرس
وا أكبر الرسل سنا وكان متعصب جدا لليهود حتى بعد مابقى مسيحى
شاف رؤيا سمع فيها صوت بيقول
"ما طهره الله لاتدنسه أنت"
بس هو برضه ما اقتنعش
وكان فى واحد اسمه "كرنيليوس" دا اكن قائد فى الجيش الرومانى
وكان فى نظر اليهود دنس مرتين
مرة علشان مش يهودى وبيعبد الشمس
ومرة علشان قائد فى الجيش بيحاربهم وهما شعب الله
دا كان رجل صالح وبيعمل صدقة وخير كتير وبيصلى لربنا اللى مش عارف هو مين !
المهم ربنا ربط بين كيرنليوس دا والقديس بطرس
والقديس بطرس لما دخل بيته (ودى كانت حاجة لو عرفها اليهود ممكن يقتلوه)
قال :
«أَنْتُمْ تَعْلَمُونَ كَيْفَ هُوَ مُحَرَّمٌ عَلَى رَجُل يَهُودِيٍّ أَنْ يَلْتَصِقَ بِأَحَدٍ أَجْنَبِيٍّ أَوْ يَأْتِيَ إِلَيْهِ. وَأَمَّا أَنَا فَقَدْ أَرَانِي اللهُ أَنْ لاَ أَقُولَ عَنْ إِنْسَانٍ مَا إِنَّهُ دَنِسٌ أَوْ نَجِسٌ"
وشاف قد إيه تقواه ، وشغفه أنه يعرف الإله الواحد (إحنا موحدين على فكرة)
قال
"بِالْحَقِّ أَنَا أَجِدُ أَنَّ اللهَ لاَ يَقْبَلُ الْوُجُوهَ. بَلْ فِي كُلِّ أُمَّةٍ، الَّذِي يَتَّقِيهِ وَيَصْنَعُ الْبِرَّ مَقْبُولٌ عِنْدَهُ."
يعنى الراجل دا كان بيعبد الشمس وربنا كان قابل صلاته وصدقته وصيامه ودله على القديس بطرس
(دا حسب كلام الكتاب المقدس ومش طالبة منك أنك توافقى عليه)

بس أنا قلتلك القصة دى ليه ؟؟
لأنى قريتها قريب قبل أحداث مسبيرو وبعد موجة التكفير والشتيمة اللى كانت وقت كنيسة أمبابة
وحسيت أنى بقراها لأول مرة !
لدرجة أنى شكيت فى فهمى ليها وفتحت التفاسير القديمة والجديدة ليقتها كلها بتأكد المعنى ، وبتدين أى حد يقول على انسان أنه كافر أو مش مقبول عند ربنا ، وإلا هايبقى مرفوض من رحمة ربنا.

طب طالما دا رأى ربنا فى الكفار
(دا كان كافر حتى بحكم العقل .. دا بيبعد الشمس)
إحنا ليه نعمل زى القديس بطرس ونقول على الناس نجسين حتى لو بيعلموا إيه !!
هو مش كل البنى أدمين خلقة ربنا فعلا ؟
طب إحنا ليه نسنخسر فيهم الحياة الكريمة وربنا بيدى الخليقة كلها مش بس وسائل إعاشة لكن وسائل متعة وترفيه؟؟

عارفة يا فاتيما
فى صحفى متبعاه على الفيس بوك من زمان قوى من قبل الثورة يمكن ..
بتعجبنى أراءه
عارفة هو مسلم ولا مسيحى علشان اسمه الثنائى شغال على الناحيتين
لقيته بعد أحداث مسبيرو بيكتب بوستات كتير كلها يأس وإحباط
مع أن أكتر حاجة كانت عجبانى فيه أنه متفائل جدا ونشيط جدا
مش بس على مستوى الكلام
لكن كان بيشارك فأى فاعليات ثقافية من زمان
بيقول أنه حزين ومحبط وندمان أنه شارك فى الثورة
علشان رفقاء الثورة اللى كان مستعد من غير تردد يموت علشانهم فى أى موقعة
كلهم بيشتموا فى المسيحيين
وبيكتبوا كومنتات -نشرها كصورة- من نوعيه
-كلاب وراحت
-فى ستين داهية
-إلى جهنم الحمرا
-مش المشكلة أن مايكل مات المشكلة أن فيفيان لسة عايشة
-قرفتونا باعملاء ياخونة غروروا على أمريكا ولا كندا وريحونا من قرفكم
-وحملة المقاطعة للأقباط اللى مابيخلاش كومنت على خبر فى جريدة أو فى صحة عامة من دعوة ليها
تقول نقاطع الأقباط اقتصاديا علشان كل 100 جنيه بيكسبوهم بيحطوا عشرة جنيه منها عشور لبناء الكنايس .. وإحنا مش نقصين دار شرك.

أنا أخدت قرار أنى القترة دى مش هافتح كومنتات على أى صورة أو مقال أو خبر أو فديو ليه علاقة بمسبيرو او اقباط أو البابا شنودة أو أو أو
علشان فى ليلة شفت فيها شوية كومنتات وجعونى جدااااااااااااااااااااا
وكئبونى
وأسفة أنى أقول للحظة كرهونى فى البلد اللى بعشق ترابها ورافضة تماما أنى أهاجر منها
لأنى عارفة أنى زى السمكة زى طلعت من المية هاموت.
فعملت شير لكومنت من اللى ضايقونى
لقيت واحدة صاحبتى مسيحية بردة بعتالى رسالة بتقولى لو سمحتى اسمحى الكومنت اللى أنتى حطاه دا
الحاجات دى بتزود الفتنة وبتشعلل الدنيا أكتر
وأنتى المفروض أعقل من كدة
فمسحته!
وكتمت فى قلبى وسكت
وبقيت بتحاشى أنى أشوف الكومنتات
ومع ذلك هى تطاردنى

....
....
أنا رغاية قوى مش كدة ؟

بس عايزة أوصلك قد إيه الناس اللى بتتعصب بتلغى حتى العقل اللى ربنا ميزها بيه عن باقى المخلوقات ..
اللى بيقول أذا كان ربنا اللى فى إيده الحياة وكل مقومتها وعارف مين كافر ومين مؤمن مش بيمنع الحياة عن الناس مهما كانوا .. هانبقى إحنا أوصياء على عقائدنا ؟

وعايزة أوصلك قد إيه فى ناس مجروحة
ومن أقرب الناس ليها .. وساكتة
على رأى يسرى فودة ، مش عايزين حد يدافع ولا يعزى ولا ولا .. بس مايحطوش ملح على الجرح
الصحفى اللى بقولك عليه دا بيقول أنه مش زعلان من الحادث لأن دى مش أول مرة ناس تموت على إيد الجيش ومانعرفش ناخد حقها من مين ..
ولا علشان هما مسيحيين
لأنه مايعرفش حد فيهم شخصيا بالنسبة له مسيحيين زى مسلمين ، كلهم مصريين
لكن اللى وجع قلبك وأحبطه ويأسه من البلد تعليقات الناس.

شكرا لربنا
على إن فى ناس زيك ترطب على قلبى
وعلى أنى مسيحية مصرية ... صيعيدية منياوية كمان :)
وشكرا أنه مش هايسيب مصر أبدا لناس مش بتحب .. أنا متأكدة من كدة

يالهووووووووووى !!
يادوبك بعتلك الكومنت وببص على الفيس
لقيت صفحة كلنا خالد سعيد منزلة فديو بنفس طريقة الدكتر والمقاله اللى كنت بكلمك عليهم !!!!
أهو ...

https://www.youtube.com/watch?v=nkKe__-8cjU

انا ما قصدت اتدخل بشكل يعصبك

وان كان بدر منى شىء ضايقك فانا متأسف

و الله بحبك قوي..ضحكتيني و أنا مليش نفس:) انتي عسل يا فاتيما.

candy
------

بصى انا مش عارفة دلوقتى
تعليقاتك دى للنشر
ولا غير مسموح بذلك

قوليلى عشان أرد هنا
لو مسموح

او تبعتيلى ايميلك
أرد هناك
ايميلى اهو
modynoty@gmail.com

هستنى ردك

مجداوية
------

مساء الخير


اولا
تعليقات حضرتك
بتاعت حضرتك .. تخليها تشيليها
امر يرجع لحضرتك
وانتى حرة


ثانياً
مراجعة نفسك
برضو أمر يرجع لحضرتك
و انتى حرة



ثالثاً
التدوينة كانت عزاء
بس حضرتك مشوفتيش كدا ؟
طب يعنى انا كدا طلعت غلطانة
لأنى حكمت بدماغى
ورأيى الخاص و معملتش زى حضرتك
المفروض اقعد استنى
ف نتيجة التحقيقات على حاجة
واضحلى وضوح الشمس ؟!!

طيب
انا موتأسفة جدا ..
لأنى مش ماشية بدماغ حضرتك
وكان يفترض سلفاً
اعمل حسابى .. معلش



رابعا
يا فندم
انا راضية نوعا ما بنفسى
و بمدونتى المفتوحة للجميع
و بالمغالطات
و بإختلاط المفاهيم عليا احيانا
و بزوارى المفضلين المنزعجين
ماشى ...


خامسا
انا هتبع نظرية حضرتك
واعتبر تعليقك دا
من باب النصيحة الغير معلنة
واستخدم سياسة الحجب المرة دى
ولن أنشره



سادسا
لا شكر على واجب
حضرتك شرفتى وآنستى


و العفو

الطائر الحزين
-------------


فيه ايه بس إيهاب
ما عشت ولا كنت أستجرى اقول انك زعلتنى ف أى حاجة

احنا لسه هتعرف بعض
انتا اخويا وانا عارفة كويس ان زعلى عندك مش هين ...

وانتا كمان غالى عند اختك
وميخلصنيش ازعلك
ولا ازعل منك


انتا مقولتش حاجة تضايق خالص
بالعكس
انتا حوالت تصلح ذات البين
وكتر خيرك

انا اللى متعصبة خلقة
اصلك مبتشوفش التعليقات التانية اللى شغالة بقالها مدة ...
و بقت بزيادة ..
او انا غالبا اللى بقى خلقى ضيق
ومبقتش أكظم الغيظ زى زمان ...

احتمال لأنهم يبدوا اشخاص قريبين
او بمعنى ادق مراقبينى وبيقروا من بدرى
وبيربطوا حاجات ببعض
او اختك بقت فرجة ولاّ ايه ...
فالملخص انهم بيتسلوا عليا
وانا شويتين الم التعابين
وشوية مقدرش ...


يبدو انى محتاجة هدنة م المدونة
ولازملى افصل زى التلاجة
عشان شكلى هخبط ف الناس كلها
اللى يهمونى واللى ميهمنويش
و دا مش كويس خالص


انا اللى بعتذرلك لو كنت اتعصبت ف ردى عليك ..
وانتا ملكش ذنب
اعذرونى يا اخواننا
اختكم الكبيرة برضو

انا شكلى هقضى الأيام الجاية خطاريف
واهو الخطاريف مفيهاش رد على التعليقات ومش هزعل حد ....

واللى يعلن غضبه ..يعلن
واللى يمتنع يمتنع بقى

انا تعبت



و تانى يا ريت
متزعلش منى
انتا عارف غلاوتك عندى
وكتر خيرك تانى على محاولتك الطيبة
يا طائرى الحزين الطيب

أزيك يا فاتيما

ايه بقى موضوع اجازة دى ها بقى

و بقى كدة أيه فاقدة الأهلية دى كمان

ما احنا قلنا الناس اللى بتددخل فى حياة الأخرييين بدون اى وجه حق و عملين نفسهم اللهو الخفى

دول مرضى نفسييييييييين

ندعيلهم بس ربنا يشفيهم

و منردش عليهم

علشان ميستهلوش

التجاهل التام ليهم مهما قالوا هو حلهم

و لايهمك يا ام يوسف

ربنا معاكى دايماً

متخافيش حقك على
وامسكى تانى فى إيدي
هأشفى جرحك مش هأسيبك
مهما كان عمر القضية

دى كانت كلمات سيد درويش وغناها إيمان البحر من تانى

مصر دى كيان جوانا كلنا
وأدينا بنحارب
وعاذرين الباقيين
مش كل الناس لها نفس الطاقة
ولا لها النفس الطويل للحرب
وهم برضه بيحبوا مصر

بس الليلة كبيرة ومختلفة
وصعب الكل يدركها من البداية وبسهولة
والزمن لسه هيكشف حاجات كتير جدا جدا
وربنا يسترها بكرة
لإنه أصعب من النهاردة وامبارح
وعلى فكرة كل اللى بنعمله حاليا
هو مرحلة الهدم
وتخيلى بقى البناء

الأصعب جاى

الازهرى
-------

متخيلة يا زيزو
وعشان كدا بستغرب ساعات
ان فيه ناس مسربعة قوى وعاوزة تخلص

تخلص من ايه احنا لسه ابتدينا ؟!!!

ثم ان لسه فيه ناس تنحيين
مانعين عنا الاوكسجين
على رأى اليافطة اللى شوفتها ف التحرير

لسه فيه كلاب و خونة ومنتفعين لابدين زى القرادة مش هيطلعوا الا بالدم ..
مش هيسبونا نتهنى
واديهم اهو
كل ما تيجى فرصة ..
ينتهزوها عشان يولعوا ف البلد
ويرجعونا للمربع صفر تانى

السلم والتعبان
اللعبة التى لا تنتهى بسرعة
كل ما نطلع بسلم
يقابلنا تعبان بديله
يزحلقنا على تحت

معلش
فترة وهتعدى
المهم نصمد ونستحمل
وايماننا بالثوابت لا يهتز
مهما شوفتا حاجات تخض
وناس بتسقط
و دم طاهر بيسيل


انا بحب ايمان البحر درويش قوى
بس مسمعتش الغنوة دى
قبل كدا


وبعدين انتا السبب
ف التأخر الثورى اللى احنا فيه دا عشان تبقى عارف ...
منتا لو كنت صفيت نفسيتك من ناحية عضوات الجمعية وشلت السواد اللى جوا دا ..
كان زماننا انتصرنا وقطعنا خط الرجعة ع الفلول ...
انما معلش
مسيرنا نشوف حل للموضوع دا

:)

اشوفك على الف خير قريبا
يا زيزو

dahlia...
---------


ايوه يا حبيبتى كدا اضحكى
وحياتك لتروق وتحلى
والبلد دى هتبقى زى ما نتمنى


الحكاية عاوزة وقت
وجايز انا وانتى منلحقشى قوى
بس عيالنا تفتكرنا بالخير
لما يعيشوا هما ف حصادها

الفرق بين زمان ودلوقتى
ان كل واحد فينا كان لوحده
ف همه الشخصى وبيعمل للى بيحبهم وبس


دلوقتى احنا اتلمينا
وضمينا على بعض
وبالمنطق كدا
اللى نجحنا فيه فرادى ...لحد ما قامت ثورة ...
مش هنعرف نعمل زيه واكتر واحنا ملمومين على بعض بالالاف والملايين ؟!!!


متقلقيش يا حبيبتى
بصى بس لبكرة البعيد
زى ما كنتى دايما تعملى ...
تلاقيها يا مصر هانت
على رأى تميم


صباح الورد عليكى
وانا كمان بحبك
يا أدفى كورنر ف قلبى

candy
-----

صباح الندى يا كاندى

انا مبسوطة انك سمحتيلى أنشر التعليقات
لأن فيها كم من امشاعر الجميلة اللى بتخلينى أطمن على نفسى انا شخصياً وعلى غختياراتى وبتحسسنى انى صح ...


عارفة ؟
انا مش محتاجة حد يعرفنى احب مين ومحبش مين
واتقبل مين ومتقبلش مين
وربنا ميزنا بالعقل وادانا الأرادة للأختيار عشان كدا
وبناء على ذلك هيحاسبنا
وبالتالى
انا بفكر دايما ف ان ربنا بيحاسب على مقدار ما يسببه الشخص من اذى ..
او العكس

لما ببص لعلاقتى بأى انسان
مببصش لحكاية دينه دى خالص
لأنه ممكن جدا يكون مسلم ويأذينى ببشاعة وحصلت كتير
وممكن يكون مسيحى وبرضو يأذينى ...
انا هنا هحكم عليه وعلى معرفتى بيه تستمر بناء على ايه ؟
على انه مسلم ومسيحى
ولاّ لأنه كأنسان قبل انه يضرنى ويدوس عليا ؟!!!


طب اذا كانت عقيدته كلها تسامح ومفيهاش أذى ...
مسلم ولا مسيحى برضو
يبقى الشر دا جاى منين ؟!!

من ربنا ولاّ من العبد ؟

دا السؤال الأهم ...
عشان اللى بين العبد وربه
احنا ملناش دعوة بيه
وكم من المدعين بالتدين والورع
وبيبقوا شياطين
ومحدش يعرف رايحين فين
جنة ولا نار
فيما عدا الأنبياء والمبشرين بالجنة عندنا ... دول اللى أكيد أكيد
انما غير ذلك فى علم الله
منعرفش اسمهم
لكن نعرف سمتهم وصفاتهم
لكن هما مين ؟
محدش متأكد


مهمة التحديد دى بتاعة مين ؟
اكيد مش انا ولا انتى
ولا أى عبد

انا عندى مهمة تانية موكلة بيها
عبادة ربنا وعمارة الارض
دول اللى مفروض اركز فيهم
واجاهد نفسى بعيوبها وضعفها
ولو لقيت وقت لحاجة بعد كدا يبقى خير وبركة ...


الأخت مجداوية تجاهد وتعبد ربها بطريقتها وربنا يوفقها

كل ما ضايقنى
انها تفرض عليا شىء لا اقبله

واللى ضايقنى اكتر
انها اوجعت بما كتبته قلبى
و اعلم انه اوجع كل مسيحى قراه
وكتر خيرها انها شالته من هنا
بس المشكلة ان زيه واكتر
بينكتب فى حتت اكتر من كدا وحد بيقتنع بيه ظنا منه انه بيحامى لدينه ...


عموما كل واحد حر
دا المبدأ الاهم

candy
-----

كنت عاوزة اقولك حاجة تانية


امبارح كنت ف الكاتدرائية
فى وقفة الحداد على شهداء ماسبيرو
كنت محضرة يافطة ورايحة
متصورة ان الوقفة قصاد الكنيسة من برا ..ففوجئت انها جوا مبنى الكنيسة
لما وصلت عند الباب اللى على شارع رمسيس ملقتش حد واقف ...
عادة بيبقى فيه حد
افتكرت انى اية بدرى او متأخر ..
المهم
عدت ست من جنبى فسألتها
الوقفة لسه ولا اتلغت
قالتلى لأ هتبتدى
بس جوا الكنيسة مش هنا
سألتها ينفع احضر
قالتلى طبعا تعالى معايا الباب التانى ندخل منه ...
واحنا ماشيين اتعرفنا على بعض وقعدنا نتكلم وقالتلى خليكى جنبى عشان متبقيش لوحدك انتى ضيفتنا


على الباب فتشوا الشنط عادى
خدوا منى اليافطة لأنها وقفة للصلاة ومفيهاش أى سياسة او هتافات ...
طلعت رقمى القومى وخدوه عندهم
وطلعت الموبايل والفلوس المعدن وبرضو فضل الباب يرررررن
جيت اقلع الخواتم ..لقيناه بيرن !!!
حسيت بتوع الأامن قلقانين قولتلهم يا جماعة لو عاوزين بنت تفتشنى ذاتى معنديش مانع انا متعودة على كدا من التحرير ... عادى

قالولى لأ اتفضلى واحنا متأسفين
قولتلهم اللى كنت بقوله على بوابات التحرير ... نفس الجملة
يا جماعة بتعتذروا على ايه
دا شغلكو ..انتوا كدا بتحمونى انا كمان من أى أذى وكدا اقف وانا مطمنة على نفسى

المهم
من باب الكنيسة لحد الوقوف قصاد مبنى الكاتدرائة من جوا ...
نظرات المحيطين كانت مستغربانى
انا مكنتش عارفة ابتسم وانا جاية اعزى ازاى ...
بس انا كنت مرتاحة نفسياً
وحاسة انى مش خايفة من أى رد فعل
شاب قاعد ف عربية لما شافنى
قالى لو نص المسلمين زيك كدا كان زمان مصر دى حاجة تانية ...
انتى شكرا ليكى انك جيتى


جوا قصاد المبنى الكبير
وقفنا ...
كنت جايبة شمع معايا ووزعته
لحد ما خلص كله
واكتشفت ان معييش شمعة
الست اللى اتعرفت عليها ..ادتنى شمعة كبيرة وطلعت الكبريت وابتدينا ننور لبعض الشموع ...
وابتدت الترانيم والدعوات

candy
-----


الناس اتوزعت رجال على الشمال
والستات والبنات ع اليمين

وقفت وسط ستات من كل الاعمار
بس اكتر حاجة لفتت انتباهى
ان الستات الكبار حاجة ف منتهى الجمال اللى ف الدنيا ...
بجد
اتطبط على كتفى ييجى عشرين مرة منهم
و كنت حريصة ان الشمعة اللى ف ايدى متنطفيش ...وكل ما تنطفى اولعها ...
كل اللى حواليا كانوا بيقيدوا شموعهم منى تانى
واحدة علقتّ ..بضحك كدا
وبتقولى انتى ايه حكايتك ؟
شمعتك قايدة علطول ليه ؟!!
الست الكبيرة اللى جنبى ردت بسرعة
عشان شكلها قلبها أبيض ..
:)


انا كنت فرحانة قوى بوقفتى
وانى لو حتى مجرد وجودى سبب ان الشموع التانية دى متنطفيش ...
يبقى كفاية


كنت زعلانة قوى برضو
بإن مفيش مسلمين غيرى كانوا موجودين
يمكن كان فيه ناس متفرقة بين الجموع
بس انا مشوفتش حد
بشكل يليق او كمان يبنغى

كنت زعلانة كمان
من دموع الامهات حواليا
وانقهرت لما شفت ام شهيد من الشهدا
اسمه صبحى جمال ...
كانت واقفة جنب صورته
شاب زى الورد ...
وهيا بتعيط بحرقة كل ما ترتفع الصلوات والناس تدعى

صورة مينا دانيا واسمه اتردد كتير
ف اشعار اتقالت بين الترانيم


فيه ترنيمة تحففففة سمعتها
دخلت قلبى قوى
بتقول ربنا موجود ....
اللى قالها كمان صوته روعة
مش فاكرة اسمه قوى ...
اسمه اسر ميخائيل او شبه كدا
بس صوته رائع فعلا
ولما غناها لمستنى قوى
كلامها ومعناها ودموع الناس حواليا
خلتها طالعة بصدق



فيه شابة عدت من جنبى
وانتبهت انى مسلمة .. فبصتلى بإستنكار
متكلمتش ولا قالت حاجة
بس نظرة عينها قالت ..
انتى جاية ليه ؟!!!
نزرتها كانت غضبانة وزعلانة ...
بس قصاد نظرتها دى ...كان فيهاكتر من عشرة خماستشر جملة شكرا انك هنا
وطبطبات من الستات اللى كانوا واقفين حواليا طول الوقت ...

candy
-----


تعرفى ؟

انا افتكرت ناس كتير قوى وانا واقفة
افتكرت رامى ومينا وانتى ومارى و يحيى وعادل و طنط ام صفاء و طنط مارى صاحبة ماما و كل جيرانى واصدقائى وزمايلى المسيحيين اللى عرفتهم على مدار عمرى ...

حسيت بوجع ف قلبى
لأنى محاطة بكم من البشر الطيبين
اللى قابلتهم فرادى عل مر عمرى
متجمعين دلوقتى ف ساحة واحدة ...
كل اللى بيعملوه انهم بيصلوا ويدعوا ويبكوا ويطلبوا مساعدة ربنا ...


افتكرت كمان يوسف ابنى
اتمنيت لو انه معايا
كنت زى ما هاخده التحرير كنت هجيبه معايا الكنيسة عشان يعرف ان الناس اللى البعض بيصورهم على انهم ضد دينا ..
مش كدا بالمرة
وانهم ناس طيبة جدا
ودينها بيحضها على التسامح وحب الآخر والدعاء ليه ...

كنت هبقى حريصة اعيشه اللحظات الصادقة دى اللى مفيهاش أى زيف ولا تكلف ولا نفاق ...
عشان يفهم غيره ..ويحبه عن حق مش شعارات
وعشان يحس بلى حسيته وانا خارجة مروحة ...

كنت حاسة انى بحب ربنا قوى
وبحب دينى قوى وبعتز بيه جدا
لأنه مخلينى احب غيرى بلا فزع كدا
و لا خوف من أى حاجة
وبحب كل مسيحى عرفته ف حياتى
ولسه هعرفه ..

موظف الأمن وانا خارجة
وباخد يافطتى وبعتذرله انى معرفش انها وقفة للصلاة فقط وبلا هتافات ولا حاجة
قالى شكرا لمجييك
وتعيشى وتجاملى ...
رديت ان شاء الله اجاملكم ف الافراح وبس ..
مش أى حاجة وحشة تانى

candy
-----


انا بحاول ابص دايما
ف أى حاجة للجوانب الإيجابية
او أبحث كما تقول نجلاء بدير الجميلة فى احدى مقالاتها
ابحث عن نقطة نور فى أى شىء مظلم


المرة دى رغم كل هذه الدماء
انا شايفة نقطة نور
اللى حصل دا استعدى الأخوة الأقباط
على المجلس ...
واظن دا ضرورى لمرحلة قادمة
هنكون كلنا لازم نتحد عشان نقف قصاد عسكرة هذا البلد
واللى ثبت بالدليل اهو
ان لا كرامة لدماء اولاده أى كانت دياناتهم وأى كان تصرفهم سلمى ولا غير سلمى ...
ويبدو انهم مبيتشطروش غبر ع الناس السلمية للأسف ..
او لسبب مقصود ...


سلاسال الشهداء
زاد بضحايا ماسبيرو 25 روح ...
زودا قايمة الشهداء اللى هتطول
لحد ما مصر تبقى حرة
ان شاء الله



اتمنى المرة الجاية
اللى هدخل فيها كنيسة
تكون لحضور فرح او مناسبة حلوة
امبارح كان حلو ..فى معناه
لكن ف وجعه ... وفجيعته لأ

اتمنى المرة الجاية
احضر فرح حد فيكم ..
مناسبة لحد بحبه
او تكريم
او حاجة مفيهاش دم وغدر ...



معرفش ليه حكيت دا كله
بس حسيت انه يخصك يا كاندى
ويخص كل حد .. بعرفه
مسيحى ولاّ مسلم

جايز اكون ف نظر البعض ببالغ
او بنافق
او ف احسن الاحوال حالمة ف توقيت خاطىء

بس انا حسيته واجب لازم يتعمل
و الحمدلله عملته
:)


كل الود ليكى يا حبيبتى

candy
------


كنت هنسى

من الموجع وسمعته
ان لسه فيه مفقودين لم يعودوا لبيوتهم من ليلة الاحد الدامى ...
ولم يقبض عليهم
او بمعنى ادق
لم يعلن القبض عليهم ...

كانوا بيجمعوا ف معلومات
و الكنيسة هتصدر بيان وافى بعد التاكد من كل المعلومات عشان متعملش قلق او بلبلة ...

وكانوا بيناشدوا أى حد عنده
أى معلومات او اشخاص قريبين منه مرجعوش من يومها ...يبلغوا بيهم



كان شىء مؤلم جدا انى اسمع كدا
واشوف بكاء الناس



كان فيه ناس واقفة بلافتات ضد المشير و المجلس ..فى الصفوف الخلفية
لما يافطة فيهم كان فيها شتيمة للمشير ...
بسرعة شالوها من ايد صاحبها
عشان جملة جميلة ... سمعتها
احنا ف بيت الرب
ومفيش هنا شتائم ولا سباب
دى وقفة صلاة
وبس


و الوقفة ابتدت 6
وخلصت تقريبا 8 ...



ربنا يرجع كل اللى غايب لأهله
ويرحم الشهداء
مسلمين ومسيحيين


بس كدا

غير معرف
-------


يعنى مفيش فايدة ؟!!!!

يعنى انتا مصّر تجيب الشتيمة
لوالدك ووالدتك والذين أتصور
انهم شكلهم هيطلعوا ناس غلابة
ميستاهلوش البهدلة بسبب خلفتك السودة ؟!!!!


لم نفسك
وشوفلك حاجة مفيدة اعملها
بدل مرازية خلق الله

انا يا سيدى مارقة
ليبيرالية متعفنة صفيقة
خلاص ؟!!!

فكك منى بقى خلاص
وشوفلك حد تانى اتسلى عليه

الغير معرف الناصح الامين
----------------------


لأ بقى
حضرتك مين ؟

بجد
عشان محدش يعرف الحاجات دى
الا اذا كان قريب
لو مكنش منى يبقى من الأطراف الاخرى


عموما لو كنت قاصد خير
و معرفش ليه مش قادرة استشعر كدا
بس ماشى
هفترض ذلك

مقدرش ارد عليك غير بإنى
وانا بعيد أحسن ... للجميع

التعامل مع الغرباء أسهل احيانا
من التعامل مع المقربين اليك ...

يمكن لأن الغريب لا ينتظر منك معجزات
ولا اداء واجبات
واذا رحلت عنه لأى سبب
او استندلت
او حصل اى حاجة ... ف أى حاجة

لن تؤلمه ويؤلمك كثيراً ...
على عكس القريبين منك
الذين ينتظرون الكثير
وتخذلهم
فتوجعهم أكثر


خلينى بعيد أحسن
ومحدش يستنى منى حاجة مقدرش عليها


انا مش جبل
ولا مخلوق خرافى
ولا كتافى جامدة وتشيل


انا بشر ضعيف
ليا عيوبى القاتلة
فأرجوك متطالبنيش اكون فوق قدرتى

انا رديت على اسئلتك اهو
فظن يحق لى ان اطلب المقابل ....

ممكن بقى لو مقولتش انتا مين
متكتبليش حاجة تانى ؟


وشكرا

غير المعرف مشعل الحرائق
--------------------


قريته
آه

وانتا مالك يا حشرى ؟!!


ولأ ... مش هرد
انتهينا م الموضوع دا خلاص

شكلك كدا عاوز جنازة
وتشبع فيها لطم
و مش هنولهالك
هه

الجرح الأليم

http://www.melody4arab.com/songs/view_songs_2093.htm

عدى الجمايل

الازهرى
------

موشكرين يا زيزو

وهعد الجمايل ياخويا
وهطلعهم على عنيك بعد كدا ....

و مليونية مليونية
لجوازك وخلاص الجمعية

هه

غير معرف
---------

والنبى انتا صعبان عليا


يا بابا متتعبش نفسك
انا ما بزهق
ولا بتعب


و بحضر ف بوست خطاريف 13
13 عفريت يركبوك
ان شاء الله
اول ما اخلصه وانشره
هطوى صفحة هذا البوست
ودا اللى مخلينى سيباه موجود
ومبكتبش غيره
ومش ماشية بمواعيدك انا
ولا غاوية اشعللها
المشعللين عارفين نفسهم
واتلم انتا بس وتعالى على جنب
وشوفلك حتة ناشفة تقعد فيها


شفت
هتركبونا الذنب ع الصبح
وهتخلونا نعيد ادبيات الطفولة المشردة تانى اهو
مفيش فايدة

اللى موش عاوزة تنشر اسمها
-----------------------

ميرسى يا حبيبتى
كلك ذوق

انا اسفة ان صفحة التعليقات المرة دى
عاملة كدا

وانا شوفته ومش زعلانة
هزعل من ايه ؟
دى حرية رأى
وكل واحد براحته


كنت اعلم مسبقا المسالة ماشية ازاى
ومشيت على ايقاعها خطوة خطوة
انا بقالى ف التدوين ردح من الوقت
خلاص اتعلمت بقى ..
:)

خير

ان شاء الله خير


وانا أسفة لأى حد اتأذى من تعليقاتى الحادة ف الرد على أى حد سواء الاخت مجداوية أو الغير معرفين ...


معلش
:)

http://www.youtube.com/watch?v=9PqMznvb2ng&feature=player_embedded

اسمعى دى

حفيدة عرابى
----------

ازيك يا فدافيدوا
انا كويسة وبخير يا حبيبتى
ولما انتى غطستى بعتلك رسالة
بس موبايلك مستقبلهاش وقالى فشل توصيل


معلش حصل خير
والنقاش دا كان ضرورى
عشان الموقف كان يستدعى ذلك
وبلا إبطاء


المهم انك انتى كمان بخير
وكفاية


بوسات وحضونات
يا حبيبة قلب طمطم

عاشقة الرومانسية
----------------

سمعتها وحلوة قوى يا دودو

دايما انتى ذوقك ف الاغانى والأشعار حلو
وبتبعتيلى حاجات اول مرة اسمعها

ميرسى يا قطتى
ومنحرمشى منك ابدا


بوسات وحضونات
بعدد موج البحر اللى انتى عروسته

غير معرف المتربى
------------

شكرا
كلك ذوق
و مروقنى ومصبحنى بالهنا كله


بس انا مش عارفة استوعب بصراحة
لحد دلوقتى ...
ازاى يستقيم الكلام بإستفاضة والدفاع عن الدين
مع الخوض ... ف الأعراض


انما ماشى
معلش
مهو اللى يعيش يا ما يشوف
و طول ما احنا عايشين
لسه هنشوف
من متأسلمى الايام دى
ونتفرج ع العجب ...

نا كل يوم
ازيد اعجاب
بالحاج والحاجة
وطريقة تربيتهم

حقيقى
ربنا يخليك ليهم
يا حيلتهم

إرسال تعليق