.

.

بــروح أمــهــاتــهـن جـــمــيـعــااااااااا  

Posted by: فاتيما in





سؤال ...
هوه فيه أى فايدة من اى كلام ؟!!!
غالبا لأ
الفايدة الوحيدة قد تبدو الآن من وجهة نظرى
هى انى هخرج الغضب المكتوم جوايا
بقاله مدة وسادد نفسى عن أى كتابة
وكفى ...  


الغضب ممزوج بقرف و بوادر يأس
مغموس بالمرار الطافح علينا من كل اتجاه
ولأنى نويت ان لا اكن هذه السخصية
ولن أكون إن شاء الله
فهكتب اللى ف نفسى 
ويا ريت محدش ياخدها على صدره
وينقمص ....  



موقفى من مقاطعة انتخابات
مجلس فوزية دا كل يوم بيزيد ثقة ويقين 
لأن أى حاجة تحت اشراف العسكر 
لن تأتى بخير و غالبا ستزيد الفرقة 
والأنقسام كما فعل الاستفتاء ...  
ومع احترامى للى بيقولوا نشارك 
و نغير ف الخريطة و أبصر ايه ...
برضو كل هذا .. على نقاء نيته
سيظل بلا جدوى حقيقية 
و تمطيط لفترة بقاء العسكر
واضفاء الشرعية عليهم ... مش اكتر
وكان ممكن جداااا نخرج بمكاسب فعلية
لو كنا قاطعنا جميعا الانتخابات 

 
وكان ممكن كمان نفرض وزارة انقاذ حقيقة
بدل وزارة الأشبال تحت 80 سنة دى
اللى بيتفرض علينا واحنا قاعدين ... 
اذ ثبت بالدليل القاطع و قصاد عينكم 
ان اللى بيجيب تغيير ولو جزئى
 هو الصمود ف الميادين و تقديم التضحيات 
مش القعدة ف التكييفات 
ولحس البيادات والتربيطات
والكراسى ف البرلمانات


مهزلة الانتخابات و أى افتكاسة غيرها
وستأتى بعدها
ما هى الا محاولة لأطالة عمر الرابضين 
على كراسى الحكم  
انما معلش .... خلينا نتسلى 
و نراقب بأكياس اللب والفيشار
  اللى واكلين ناسهم دول 
وهما بيقعدوا ع الكراسى الملطخة 
بدماء الشهداء و مرمطة الوطن لزمن أطول
وبروح امهاتهن جميعااااااا
فليستمروا ف الهراء 
وادينا قاعدين عليكم ... بنتفرج 


و الأخوة الأعزاء 
اللى فرحانين ان الميدان بينفض 
وعمالين يقولوا كفاية اعتصامات 
و يلا نلعب سياسة وننطلق 
أحب أقولهم 
الميدان هيفضل موجود رغما عنكم
لأن اللى فيه لا هم ناس بيقبضوا 
ولا نازلين عشان شهرة ومناصب 
و يمكن ضميرهم بيوجعهم عشان اصحابهم 
ماتوا وانصابوا .. وهما رجعوا سالمين 
وبيستنوا المرة الجاية عشان ينزلوا تانى 
ياخدوا بتار اصحابهم و تار رفقاء الميدان


ومهياش هيبرة عابرة و لا هرمونات شباب 
ولا ادمان ثورى زى ما بيتقال
و هما عالم غاويين مرمطة 
و نوم ع الأرصفة و الأسفلت
ولا بيستمتعوا بالخناقات مع المارين عليهم
و فيهم اللى يسوى 
و اللى ميسواش و ياما أكترهم


اهل الميدان اللى نزلوا
ولسه هينزلوا تانى 
طالما عندهم مبدأ وقضية وهدف 
ولأنه لسه لم يتحقق بعد 
فهم على خط النار و ف حالة الاستنفار 
منتظرين العك اللى بيتعك دا يخلص 
والدنيا تضرب تقلب وتحتاج تنعدل تانى 
و ينطلب يندفع فيها كالعادة  ... دم 
ويروحوا هما يضحوا كالعادة  ... بالدم 
بينما البهوات امثالكم يقعدوا ف البيوت
او ع القهاوى وف المواصلات 
يقطعوا ف فروة الولاد والبنات  
و الواصلين منكو يطلعوا ع الشاشات
والفضائيات ينعقوا و ينّظروا 
فلما تحدث انتصارات جديدة لصالح الثورة
و اللى هيا صالح البلد ..
تبتدوا انتوا تلموا حصاد الخطوة دى
و ترجعوا تانى ... تاخدوا الاوامر
من سيدكم الأعلى ف المجلس الأعلى
وتخرجوا تطيبوا ف خاطر العسكر
وتقبلوا بأقل القليل
وتقولوا للعيال بتوع التحرير 
كفاية ...


و صحيح كل مرة بتنكسر الجرة 
بس يسعدنى أبلغكم ...
 رغم دعارتكم السياسية هذه 
التى لا تنتهى ..
فبرضو ف المقابل ...
 عيال التحرير دول هما الروح الصافية 
بالعزم لا ينتهى
هما نهر عشق البهية الجارى 
بلا توقف 
و لا عمرهم هيبطلوا
ولاهيخلصوا و لا هيزهقوا 
عشان حب الأوطان مش موضة 
وبتبطل
ولا الأخلاص سلعة ف السوق
 وبتخلص 
فروح امهاتكن جميعا ....
فلتستمروا ف الهراء
وادينا قاعدين عليكم ... بنتفرج 
  

الأخوة الأعزاء التانيين 
اللى عمالين يتنططوا علينا 
بنجاح التيارات المتأسلمة ف المرحلة الأولى 
من إنتخابات مجلس (ضد) الشعب دا 
يسمحولى
ولا ميسمحوش يعنى 
الفرحة دى والتنغيص ع الراسبين 
.. انتوا مصدقينه بجد ؟!؟


طب لو مصدقينه ...
مش مكسوفين من نفسكم 


أكيد مش مكسوفين 
لأن اللى بينكسف لازم يكون بيحس


واللى بيحس دا 
لن يتفاخر ببلاهة كدا ... نهارا جهارا
بإنه انتهازى متسلق بايع كرامته
سايباها متداسة تحت بيادة العسكر   
و لن يباهى بإن
بيتاجر بفقر بعض الناس و جهلهم 
ويتشدق بغرور بإن التيارات المتأسلمة دى 
نجاحها مرده وصولها لرجل الشارع  
بينما التيارات المدنية والعلمانية 
كانتا ف غياهب الجب او متعالية او مغيبة
او كمان يقولون مشغولة بخلافاتها الجانبية 
فيما بينها أو بخناقة شبابها
 مع ضباط الداخلية الويحشين 
على مين آخر نفر دفع حق المشاريب ...!!!


إهيييه !!!
أكن الناس اللى نزلت ع الأرض 
تواجه الفساد والتجبر بصدور عارية 
وتاخدلها كام رصاصة على كام خرطوشة 
على عين تنفقع او روح تطلع دول ناس 
معرفتش ازاى توصل لرجل الشارع 
وانشغلوا عن واجبهم ... شوف ازااااااى ؟!!!!


لأ ... كمان والمفروض كانوا يوافقوا
 مؤقتا .. مؤقتا التى لن تنتهى مع العسكر دى 
ويرضوا بالذل الحاصل من عسكر داخلية وجيش 
و يأجلوا النعرة والإحساس بالعار
و يطنشوا منظر الشهدا ف الزبالة
و ينزلوا بأكياس السكر والبطاطين ع الناخبين
ومشاكلنا مع السلطات نبقى نحلها
 بعدين على رواقة ف البلكونة ساعة العصارى عشان مش وقت مواجهات ..
الوطشن بيضيييييع ... يا بديع 



طب انا مبدئياً 
موافقة وباصمة ان فيه قوى سياسية 
زبالة و عرر و بهايم و بيمدوا ايدهم يقبضوا 
او ينضربوا بالكتير عصايتن من الحاكم ...
عشان كام كرسى زى احزاب ..
الوفد والتجمع وغيرهم بدون ذكر أسماء 
انما الناس اللى متقبضش بقى
وبتدفع دم وعين وسجن ومرمطة دولم 
هما كمان نوصفهم بالخيابة 
على أساس ايه يعنى  ؟!!!


مش هقول والله عيب ...
عشان تااااانى 
اللى نقوله عيب دا
 لازم يكون عارف معنى العيب 
و اللى شايف ان رشوة المواطن
فى المناسبات والاعياد وف مصاريف المدارس ومساعدته ف العلاج و بعض الخدمات 
ثم يأخذ تمن ذلك صوت انتخابى 
وبيعتبر دا كله .. مش عيب
وإسمها شطارة 
و قرب من رجل الشارع 
طب دا المفروض والنبى اقوله ايه ؟!!!




أقوله ان رجل الشارع دا
 مش أجُرى عندنا لامؤاخذة و بحطة ايدنا
نحطه ينحط نبطه ينبط !
ولا المفروض يكون دا النمط السايد بعد ثورة
واللى عاوزين تربوا عليه المواطن 
 كان زمان بينتخب اللى بيديله فلوس 
أويشغله ابنه او يقضيله مصلحة
ويطلع حد معرفة م القسم قبل ما يتعجن
لأ دلوقتى زاد عليهم .. حدوتة البركة 
وهنجيب الناس الكومل بتوع ربنا


بتاع ربنا اللى  بجد
و اللى عاوز يخدم الناس لرضا لله ولوجهه 
انا احط جزمته على راسى من فوق 
لما يكون مخلص مش عنده غرض 
ربنا امرنا بالتكافل و الخير
 ومساعدة المحتاج
لكن امرنا منقولش و منخدش تمن لذلك
امرنا نعمله و لا ننتظر المقابل ...
لكن لما نعمله و ناخد قصاده "قدام" تأييد 
ف شكل صوت و مقاعد ف البرلمان 
يبقى لامؤاخذة بقى 
متجبش سيرة ربنا تانى 
وتقولى قال الله وقال اللرسول 


انتا انتهازى واطى 
أوطى من أوطى واطى
لإنك ملعبتش سياسة بحق 
و لا بناء على فكر و منهج
و لا بناء حتى على مهارة الشخصية
انتا لعبتها بإسم الدين 
وبتقبض تمن كل حاجة عملتها قبل سابق


حتى التضحيات السابقة بتلم تمنها دلوقتى 
ويكفى تتكلم عشر دقايق مع أى حد 
اخوان فيقولك 
أصل احنا إتحبسنا ..
أصل احنا اتبهدلنا ..
أصل احنا إضطوهدنا ... أصل احنا احنا 
و المتاجرة بالعاهات التى لا تنتهى 
وبتجيب نتيجة فعالة 
مع هذا الشعب الطيب الغلبان ...


وكأن مطلوب مننا ندفع تمن شىء
لم نرتكبه بإيدينا ضدهم 
بينما اللى أذوهم بالفعل
وسكتوا على جرايمهم  حتى
ما زالوا طلقاء بعيدين عن أى أذى حقيقى
ومتشطروش عليهم
جايين يتشطروا ع التيارات المنافسة !! 
امتى هتفهموا ان مصلحة البلد
 مع المنافسين دول 
مش مع القاعدين على أنفاسها ؟!!


الاخوة المتأسلفين بقى
لا فائدة من الكلام معاهم اصلاً 
و عموما مبروك عليكم الفوز
 وانا مبقتش خايفة منكو بالمرة
لأن كل كلمة بتخرج من اشكال
زى الشحات و بديع و غيرهم
بتأكدلى ان نهايتكم قربت انتوا روخرين
وان الأقنعة هتنزاح عن وشوكم قصاد الناس
زى ما اقنعة غيركم سقطت...




واللى شايف استغلالكم لحاجة البسطاء
و مهاويس التدين الشكلى 
تعتبر نجاح حقيقى و وصول لرجل الشارع 
لأنه قائم على أساس ارتكازكم للدين
وانكم ناس بتوع ربنا فعلا ....
فبروح أمهاتكن جميعااااااا




الاخوة الأعزاء التالتين
اللى بياخدوا من النتايج الاولية للإنتخابات
ذريعة عشان يتغذوا على  
 مخاوفنا الرهيبة من حكم الاسلامجية
و هلعنا من امكانية الإحتكام لشرع الله
 والكلام الكبير المجعلص 
اللى مفروض يخضنا ويخرعنا دا


ما دمتم مصّرين تتحدثوا بإسم الله
لمجرد انكم درستوا عند شيخ معرفش ايه 
او ف معهد معرفش مين 
او لبستوا نقاب شكله ايه
 او ربيتوا دقون وقولتوا الله والرسول ..
و ما زلتم تشككون ف عقائد الآخرين 
وكأن معاكم المازوة اللى بتقيسوا 
على اساسها مين مطابق للمقاس 
ومين عقيدته بعافية ومين تمام
فما زلت برضو بقولكم 
انتوا مين ؟
انتوا مييين ؟


مصر اللى عاوزين تعلموها الادب دى
عشان قليلة الدين والاخلاق 
هيا اللى هتديكوا درس لن تنسوه 
لما ترميكم ف المزابل بعد ما تكشف
فشلكم و ضيق عقولكم 
واختباءكم وراء الدين عشان تنفخوا 
ف روحكم و تعملوا انكم العالمين العارفين 
وتنصبوا من انفسكم اوصياء 


بكرة الشعب يكشف حجمكم الحقيقى 
وبكرة انتوا كمان تكتشفوا 
اننا شعب وسطى متدين صحيح 
لكن بشر يخطىء ويصيب زى باقى خلق الله
ونساءنا مثلاً .. مش كوارث لازم تتغطى
بأسود ف أسود و ميبنش منها الا عينيها
 ويا ريت متبنش كمان ..
احنا شعب لا يقبل الخنقة والتشدد
و لا هيستحمل كتير
العيشة السودة اللى شبه ايامكم 
وكلامكم الاسود و نفسيتكم الأسود دى 
وبيتمرد من دلوقتى ....
وما دمتم انبطحتم امام السلطة 
وبعتم الدم والكرامة .. 
فبروح امهاتكن جميعاااااااا


الأخوة الاعزاء الرابعين 
لقد تجاهلت تعليقاتكم قدر امكانى 
بس بصراحة اكتر من كدا ... مينفعش
اذا كنت شخص تافه عاوز يخضنى 
فحصلنا الرعب ياسى لافندى 
وهنزل التحرير وغيره برضو 
وهكتب اللى يعجبنى
 اما اذا كنت بتتكلم جد بجد  
فيسعدنى أقولك ان 
يوسف ... ف حفظ الله اولا  
ثم ف كنف من لا يرحم
 و لا بيخلى رحمة ربنا تنزل .. ثانيا
فالتهديد بأذاه وخافى عليه والنظام دا
لو قابل للتحقيق فسيكلفكم أن تعبروا
على اجسادهم (هم ) بداية  ...





وانا بصراحة لا انصحكم ...
لأنهم مبيحبوش أى حد عموما
 وحش ولا كويس حتى 
ييجى جنب ممتلكاتهم
 فلو عايزين تجربوا براحتكم
وانا مبخفش عشان اتعلمت خلاص
ان اللى من نصيبك هيصيبك 
و ربنا الحافظ


بس عاوزة أشكركم من قلبى 
لأنكم و بلا قصد خلتونى
لأول مرة من تلات سنين أكتشف
و  أعرف و احس ان بعاد ابنى عن حضنى
 ممكن يبقاله معنى
و يبقاله كمان تمن .. يستحق


الاخوة الأعزاء (بجد والله ) 
و المغردين على تويتر 
اللى شايفين نشر صور خالد 
ابن علاء سيف  ومنال و الإحتفاء بيه 
والاهتمام بولادة خالد عموما نوع من المبالغة 
يسمحولى يعنى ان كلامهم دا 
بيخلى منظرهم وحش قوى 
خصوصا و ان فيهم ناس عارفين كويس 
ومتأكدين .. ان علاء لو كان برا السجن 
كان زمانه كتفه بكتفهم 
ف شارع محمد محمود
وان محبة البشرية دول كلهم ليه 
له اسبابه المنطقية والمقبولة 
علاء كاريزمته مبررة 
سببها افعاله و مواقفه و تويتاته
علاء لو لم يكن سليل عيلة مناضلة
لكان حاز بفعله  جدعنته على احترام الجميع 
وانا معرفوش معرفة شخصية 
بس انا مشيت جنبه ف مسيرات ياما 
ومشيت عشانه ف مسيرات ياما 
ومستعدة انزل الف مرة لحد ما يخرج
علاء بالفعل يستحق كل ما يلقاه
 من مساندة واهتمام واحترام


والمساندة هنا متبادلة على فكرة 
لأنه هو كشخص عنده قوة نفسية
وصلابة وعزيمة بيسندنا بيها كلنا 
و يمكن دا اللى بيفرقه عن غيره شوية
انه لا بيتشدق بأفضاله 
ولا بيدخل شمال ف حد أى كان رأيه مخالف
و مبقاش بيشتم حد حاليا 
 (عشان الناس الرقيقة اللى كانت بتتخض م الشتايم )
غير العسكر ... :)




و بينزل عشان أى حد ميعرفوش 
المهم يرسى المبدأ 
وهوه الحرية و الكرامة لكل مواطن
 فيكى يا مصر
وأظن حبسته دلوقتى دى 
دليل واضح على من هو ... وما اختياراته ؟
علاء مجرد نموذج لمواطن مدنى 
يدخل سجون العسكر بلا سند قانونى 
مجرد مثال لألاف غيره 
مثال ... مش تمثال 



فبلاش والنبى النفسنة دى 
عشان المنظر بقى وحش قوى 
وكأننا بنخبط ف بعض معرفش ليه ؟!!!
التويتر مليان ناس بتحبه ومعارف واصدقاء
طبيعى ان يتم تهنئته من القاصى والدانى 
واذا كان ام الواد واهله موافقين صورته تتنشر
انتوا زعلانين لييييه ؟!!!
و شكلكم يبدو كما لو كنتوا
مش عارفين تبقوا زيه 
و تجمعوا حواليكو الناس كدا ... ليه ؟
ليه كل ما هنلاقى حد عِدل 
نكسره .. ليه ؟!!!



ارجوكم رجاء شخصى
من واحدة بتحترمكم وبتقدر مشاركتكم 
ف هذه الثورة بإخلاص 
وتتمنى إلا تٌخدش صورتكم  ...
أرجوكم ...  متخبطوش ف الحلل 
وتتهموا من يناصر علاء وأشباهه 
 بإنهم عيال بيجروا ورا تامر حسنى و حماقى 
لأن هذه الثورة اثبتت ان من يعتنقونها
ناس مختلفة عن النمط السائد 
ف المخيلة التقليدية 



ثوار هذه الأيام لا يؤلهون احدا
والا كانت الثورة دى ركبها زعيم
أو قائد من اول شهر شهرين ...
لا احنا مخنا فسافيسى
فهنخلى علاء زعيم 
لكن ممكن جدا يكون رمز و أيقونة ...
و هو يستحق
بأفعاله وصموده  




فبالله عليكم وبروح أمى أنااااااااااااااااا
متحطوناش ف سلة واحدة 
مع مهاويس لعيبة الكرة و الفنانين 
عشان اسباب مش مفهومة ... !!!



واخيرا الناس اللى زعلانة منى 
لأى أسباب كانت 
انا يا جماعة بجد 
مش عارفة ارجع زى ما كنت
مش عارفة استسيغ طعم أى حاجة 
كنت بعملها قبل كدا 
مش عارفة اكلم أى حد كنت اعرفه 
و يسألنى مالك أو ايه اخبارك وعادى كدا  
اللى مهتم بحالى .. يستنى عليا 
لحد ما اروق وابقى عادى أو مبقاش 


اما اللى مهتم بحاله هوه 
 (وعنده ألف حق ) 
او معندوش استعداد يستنى 
يكبر دماغه منى .. و والله احسنله 
لأن حساباتى دلوقتى فرقت كتير عن زمان 
بقى فيه حاجات اهم .. من المهم
وحاجات متستناش .. وحاجات تستنى 
اولوياتى اتغيرت
وحياتى كلها اتغيرت
و مش حزينة على كدا ... بالعكس
انا حاسة انى بقيت ايجابية اكتر
قربت اكتر من اللى بتمناه لنفسى 
ولو دا مش ملموس لمجتمعى الصغير
بس يمكن يكون فارق مع الصورة الكاملة
او فارق معايا وبينى وبين نفسى 
اللى مش عاجبه فاتيما الجديدة 
انا اسفة عشانه .. 
بس مش أسفة عشانى بالمرة 


وفيه كلمة بيقولها صديق عزيز 
احب اكررها هنا 
ان الثورة لسه مغيرتش البلد 
بس غيرتنا أحنا و غيرت فينا حاجات
واللى الثورة ما غيرتوش من جوه 
يبقى الثورة لم تصله ... بعد
  

واخيرا و ليس أخر كلام ف القصة دى 
اللى بيتعامل مع ميدان التحرير 
وكأن كل ما فيه ملائكة ابرار 
دا مش حقيقى بالمرة 
التحرير جزء من مصر كلها 
بس جزء متركز فيه مجموع من البشر
 بهدف واحد
لكن رغم هذا الهدف النبيل 
لا يمنع ان يكون فيهم  ضعاف النفوس
أو يندس بينهم مخبرين 
و كلاب للداخلية وللعسكر 




ميمنعش يكون فيهم ناس
صحيح جدعة و بتقف تسف ف الغاز
بس ع المستوى الشخصى يكونوا اندال
ميمنعش يكون فيهم حد لسانه طويل
وبيصحى ع الصبح كدا قبل بق النسكافيه
 يشتم ف خلق الله و بلا مناسبة 
ميمنعش يكون فيهم المتعصبين لأرائهم 
ميمنعش يكون فيهم ناس بتزهق بسرعة
او بتحب تنشر الغسيل الوسخ
عشان يحسوا انهم نضاف


  
بس ميمنعش كمان
 يكون فيهم العكس
وان كان الاغلبية .. ممن عرفت وشاهدت 
من هذا العكس
لأننا ناس عاديين ف نهاية الامر 
من لحم ودم
 محناش ملايكة صرف ولا شياطين صرف  
اللى عاوز يحكم ع التحرير 
 ينزل الميدان 
و بشكل مستمر و يحكم بعينه وقلبه 
ميعتمدش على كلام بيسمعه 
من اعلام ولا زمايل  ف شغل
 ولا صحفى كبير .. ف جرنال حتى 



اما عباسية و عباسىّ الهوى
و اللى مش فارق معاه بالمرة
ان تنجر بنت من شعرها
و يضرب الجرحى العزل بالشوم
وتلقى المستشفى الميدانى بقنابل غاز
و تترمى جثة المواطن  المصرى ف الزبالة
و عادى كدا ....




لو يعنى مصّر يكون من هولاء فاقدى البصيرة
اللى بيشوفوا الدم والسحل 
و التفريط ف الكرامة
وبعدين يقولوا ... عاوزين كمااااااان 
فيسمحلى أقوله 
وأقولهم
بروح امهاتكن جميعااااااااااااااااااااا
جاتكو القرف مليتوا البـــلد 


على هامش الإنتخابات 
الحاج ساويرس كما قيل ف تويتر 
ربنا مسلط عليه دماغه
و شمتانة ف البدوى شماتة لا توصف
و حزينة على ما آل اليه الكاتب الكبير
فهمى هويدى من حال 
بس سقوط الأقنعة
 أمر جيد مهما حمل من احزان 




احمد خالد توفيق بيدهشنى
انه ما زال مصّدق 
ف سياسة الواحدة واحدة و طولة البال 
رغم عدم جدواها مع الأوباش اللى حاكمينا !!
بينما استفاق والحمدلله سريعا من غفوته 
العزيز اسامة غريب
و شاف العسكر على حقيقتهم
بعدما كان يظن فيهم الخير ...
كنت هزعل عليه قوى بصراحة لو كان 
فضل على رأيه بعد اللى حصل
ف كل الشهور اللى فاتت

انا طبشعا مقاطعة الأنتخابات كلياً
امى بتعتبر السياسة عموما ... عار 
اخويا الصغير
نزل ينتخب جميلة اسماعيل
والكتلة المصرية 
ومنزلش الأعادة طبعا
عشان ميضطرش يدى صوت 
لواحد من  حزب طفى النور
او من حزب الحرية و الندالة 
اما اخويا الكبير فمحافظة الجيزة
وبيشاور عقله يكبر الجى 
بعد ما سمع بحكاية صعوبة تنفيذ الغرامة دى 
يعنى احنا طلعنا بيت مصرى أصيل اهون
 يعكس حال البلد بكل أطيافها


المدير بتاعى بيسألنى 
ليه محدش راضى يجيب سيرة
وزير الداخلية الجديد .. و مأجلينها لأخر لحظة؟
فرديت عليه بإن عناصر الداخلية عموما 
لامؤاخذة مبتكشفش على رجالة ...
ثم انهم اتعلموا من الدرس بقى 
وبيصيعوا ع الشعب
قبل أن يصيع الشعب عليهم
فمش هيقولوا اسامى عشان الثوار 
الرخمة ميلحقوش يفتشوا ف تاريخ الوزير
الازرق ويطلعوا الدفاتر تنقرى ..
زى م عملوا مع بتاع القوى العاملة وغيره .. فيضطروا يغيروه  تحت الضغط الشعبى



هما هيلبسونا ف الحيطة 
وهنشوفه وهوه بيحلف اليمين 
والذى بمقتضااااااااه 
هيفرجلنا عن قنابل الغاز الجديدة 
ويخرجها م البراميل ويحطونا مكانها ... :)



و ف نهاية المشهد 
انا وحشنى نجم الجماهير
ابو القذاذيف ... مدمر
مفتقدة الجدع بقفشاته 
و هبتدى ازعل م اللى طخه عيارين
وخلصنا منيه ... 
 طب بذمتكو مش لو كان عايش  
كان زمانه تحفنا ف تلك الأيام المغشلقة 
بكام جملة تعبيرية لوذعية من بتوعه 
بدل الكهين بتاع دكر البط واعواد الجرجير
و بدل الغتيت ابن الكئيبة
 اللى نايم ع ضهره ف المركز العالمى
 و لا انا غلطانة ؟!!! ؟



على جنب
صاحب مقولة ان :
 الحزن هو الشىء الوحيد 
الذى يولد كبيراً ... ثم بمرور الوقت يصغر 
 غالبا واحـــد عمره ما حِزن 
حزن حقيقى 

ســـــلام

-----------------------------------
 ------------------------------------------------


الحرية شجرة الخلد 
وسقياها قطرات من الدم المسفوك 
والإسارة شجرة الزقوم 
و سقياها أنهار من الدم الأبيض 
عبدالرحمن الكواكبى 
الإسارة : العبودية 
الدم الابيض : الدموع 

-----------------------------------------------------
 الصور منقولة 
من تويتر 
و من مواقع الصحف الالكترونية 
و مرسلة من بعض الاحباب
---------------------------------------------
  

This entry was posted on الأربعاء, ديسمبر 07, 2011 and is filed under . You can leave a response and follow any responses to this entry through the .

11 كــــلام بيطــبطـــب عـــلى قــــلبى و روحــــى

انتي بجد فاتحة التعليقات؟ محتاجة تعليقاتنا فعلا؟ انا حاسس انك بتفضفضي بس فضفضة قاسية شوية مش عايزة راي حد فينا في اللي بتقوليه بقدر مانتي محتاجة ايد تطبطب عليكي وتقولك بكرة هيكون احسن وبلاش النظرة دي من شوية على تويتر الدكتورة ستيتة كانت بتقول يا رب خليها تتعدل ولا تميل بالكلية رديت ان شاء الله هتتعدل ولو ما تعدلتش معاناميدان التحرير ورقة رابحة ضاغطة قالتلي لا تعول على ميدان التحرير لأنهم هيبقوا المنتخبين بشرعية وانت في الميدان بلا شرعية وقتها هيبقى الشعب كله معاهم .
اللي عايز اقوله بعد الانتخابات الاستراتيجية بتاعت المتظاهرين لازم تتغير الانتخابات معترف بيها الشعب والناس قررت تنزل خلاص بقت شرعية يبقى قدامك حاجة من اتنين اما ان تقاطعها ووقتها مقاطعتك مش هيبقالها اهمية علشان في بدل صوتك عشرة مليون صوت هيصوتوا او انك تشارك فيها لآخر نفس تحاول تشوف مشيت ازاي والنزاهة كان شكلها ازاي وليه الطرف ده كسب وليه الطرف ده خسر . لكن نقف نقول فلان ده غلطان وفلان ده غلطان وده بيلعب على الاحبال وده انتهازي وده حزب كنبة وده مش عارف ايه بالرغم ان كلهم كده صح بس احنا فين من الكادر؟
بكرة لما الاخوان تاخد تلتين المجلس تبقى اغلبية كاسحة وقتها هيرجع فتحي سرور في صورة حد جديد ويقول موافقة بدون النظر للاعضاء وقتها هيبقى ايه الوضع؟
انا معاكي على فكرة باهمية الاعتصام في التحرير مدى الدهر بس الانتخابات مكنتش ضد الاعتصام حتى لو انها محسومة ومنتهية ومعروفة نتيجتها لازم برضه نشارك اولا لانها قائمة نسبية صوتك اللي بتصوتيه لطرف بيقلل الطرف التاني ثانيا علشان بكرة متحسيش بالندم وانتي شايفة البلد بترجع لما قبل ثورة يناير بسبب ممكن يكون صوت واحد وممكن يكون هو صوتك انا مش بقول كلام عاطفي او رومانسي وصدقيني في دايرتي بالذات اللي كلها فلول و اسلاميين واحزاب تانية ضعيفة معرفهمش هاخرج ومش هابطل صوتي هاصوت لاي حزب انا متأكد من فشله علشان ايماني ابرأ الى الله بعدين واقول يا رب انا عملت اللي عليا رشحت اكتر حد شايف انه كويس او احسن الوحشين ده علشان مصر محتاجة مننا ده
التحرير لازم يفضل عمران بالشباب النقي لازم الشباب ده يكون متحد المطالب التحرير هو آخر امل لمصر بس برضه المشاركة كانت مهمة في الانتخابات وعلى فكرة في ناس كتير عملت زي حضرتك سواء قاطعت او راحت وابطلت صوتها ولو ده كله صوت اصوات صحيحة كانت النسبة هتقل اكيد
مش عايزك تزعلي من تعليقي الطويل او تملي منه انا بس متضايق علشان شايف حضرتك متضايقة ومتعكننة

فاتيما
روح قلب الملائكة

انا مش عارف اقول ايه
بجد قولتى كل اللى نفسى

تصدقى اكثر حاجة مضيقانى هى المهرولين
و مقليش ليا انهم هيتكشفوا لا مش بيتكشفوا
احنا شعب ذاكرته ضعيفة
حاليا كلهم هرولوا و ركبوا دقن بس لسة لابسين اللبس الكاكى

اسمعى اخر نكتة
بكار و بكار ده المتحدث باسم حزب النور و المية
فى حضور خبير من اكبر خبراء السياحة و بيقول السياحة بدخل 22 مليار دولار يقولوا تعالى اقعد معايا و انا اخليها تجيب 30 مليار دولار
بقى خبير سياحى بيفهم احسن من الخبراء بروح امه
عن طريق الفنادق الاسلامية اللى بتكسب ماشاء الله و السياحة العلاجية اكننا عندنا التقدم الصحى و مش قادر يفهم ان الفنادق الاسلامية دى نوع بجانب الانواع الاخرى يعنى مش ممكن اخلى كل مطاعم الاكل تبيع كباب
ده انا كنت عايز احكى عن الشباب اللى زى الورد اللى عند مجلس الوزراء


سيبك منهم يا ام جو
و ارجع و اقول

لسة الطيور بتفن
و النحليات بتطن
و الطفل ضحكه يرن
مع ان مش كل البشر فرحانين

سلام يا ام جو

البوست دا بالنسبه لي
جلسه مع الطبيب النفسي

وحشتيني كتير :]
وبحبك في كل احوالك
بوسات

حمدالله علي السلامه يسعدني المتابعه و يارب اقدر اوصل كل حاجه بتعجبني هنا بالصوت و بالاحساس زي ما بتوصليلنا دايما ال يستاهل مليون شابوه علي رأي ميرا شعبان

ليه أهل الميدان يمثلوا للكثيرين مشكله؟

لأنهم أطهار

صادقين

لا هدف لهم سوى الأصلاح

ولاثمن يريدونه الاثواب الله

قارني كدا هتفهمي

الأرزقيه والمتأسلمين و الكدابين وبتوع الحركات الأرعه بيشوفوا أن أهل الميدان هم الصواب وان طال الوقت أو قصر ستضئ مصر بأفكارهم كما بدأت خيوط النور تلوح بدمائهم


وأن مكانهم الطبيعي في الهيئه العامه للصرف الصحي

فاتيما :
كتبتى البوست ده كما لم تكتبين من قبل ,شابوه ليكى بجد
بالرغم من انى استشفيت حزنك وراء قلمك من قبل ماتقولى انك حزينه بس بوست جامد جدا وقد ايه حيادى وقد ايه انتى شايفه الحقيقه مجرده جدا وموضوعيه بحييكى مش عشان كلامك عجبنى لكن بحييكى عشان انتى بتتكلمى من قلبك بجد بعد اذنك هاخد منه حاجات عجبتنى وهاحط تحتيه اسمك عشان يقترن بيكى

لا حول ولا قوة الا بالله
ليس لها من دون الله كاشفة
أسف
الحمد لله

أنا بلدي مصر عروسة حورية مالجنة
قالوا لي بكره زفافها ماقدرتش استنى
مليون خسيس من عهد رمسيس طامعانين
فاتت سنين وموّالها لسه بيتغنّى
وعجبي
________________
KING TOOOT

مش محتاج تعليق

القلوب نزفت نزف :((

أنا منتظر نتيجة الإنتخابات و البرلمان حيمارس صلاحيات كاملة و لا حيخنع و يخضع
لو البرلمان المنتخب بحرية خنع و خضع يبقى حتتجدد موجة ثورة أقوى من كل ما مضى

بسم الله الرحمن الرحيم
انا شاب ممن ثاروا فى الثورة 25 يناير و اسقطوا الظلم لكنى وجدت ان الثورة تحولت من عمل بناء و اداء سليم الى عمل اجرامى و هدام - كل الى حصل من ثورة على المجلس العسكرى و المشير وكل ما قيل من اتهامات لة كان ظلم كبير لهؤلاء الناس الذين وقفوا معانا يدا واحدة و ساندونا كاخواة و لم يقفوا ضدنا رغم ان الأوامر العسكرية كانت واجبة التنفيذ بدحر المتظاهرين
، و اقول شهادة الحق انهم رغم الثورة عليهم لم يحاربوا الا الخارجين عن القواعد السلمية فى التظاهر و ليس كل المصابين بسبب ذلك بل حدثت حوادث -
لذلك انا بريء تماما من كل من ثار على المجلس العسكرى بل انا احيهم كل التحية و كل التقدير
و ايضا بعد فوز التيار الأسلامى فى الأنتخبات نتيجة جهودكم المضنية فى محاربة المجلس العسكرى - حتى بعد ذلك انا ضد محاربة التيار الأسلامى لأن احترام قواعد الديمقراطية هى التى كنا نسعى لها و هى التى ستسمح لمن سياتى فى المستقبل ان كان يستحق كرسي الرئاسة ان يجلس علية الى اجل و لذا فان اعتراضنا يعنى عدم احترام قواعد الديمقراطية و بالمثل لن يحترم ذلك احد و ستؤدى الفوضى الى حرب و النتيجة خطاء كبير و ضحيا فلذا انا ضدة الثورة مالم يغلق الطريق للديمقراطة و صندوق الأقتراع و اثق ان اشراف القضاء على الأنتخابات ضمان كافى لعدم تزويرها .

إرسال تعليق