.

.

بعـــــديـن ....  

Posted by: فاتيما in ,








انا مش عارفة ممكن أسمى
 الكلام الجاى دا إيه ؟
هل يبقى فضفضة معاك 
و لا عتاب لنفسى
 ولاّ إعتذار ؟






غالبا هيكون إعتذار وأسف
 لأنى فعلا حاسة إنى أسفة قوى 
و على حاجات كتير




أسفة على كل لحظة عدت عليا
وأنا متشبثة بيك 
أسفة على إصرارى العنيد
على إن فيه لازمة لوجودى لجنبك
أسفة لأنى اتعاملت معاك
زى ما كنت بتمنى مش زى ما كان ينفع
و أسفة لأنى أجبرتك تيجى على نفسك
وتعمل حاجات مكنتش عاوزها ولا حاببها
لكن عشان ترضينى .. عملتها
و كلمات عشانى .. قولتها
و وعود لإرضائى .. وعدتها
وأيام بيننا ... و ضيعتها
وانتا عارف كويس أن مفيش فايدة
بس عشان العشرة 
بترضينى و تضغط على نفسك و تستمر ...






بسأل نفسى بجد
انا ازاى كنت غبية كدا ومفهمتش ؟
ازاى كانت عينى مغمضة 
عن كل حاجة غير انى أحبك وبس
و ازاى مخدتش بالى من بدرى
  انك مبقتش ... عاوزنى ... خلاص ؟






غريبة بجد انه ازاى البنى آدم
 ممكن ينشغل عن حد كدا 
رغم انه مهموم بكل أحواله
و بيحبه أكتر من روحه ؟




ازاى ؟




ازاى ميشوفوش 
وهوه أصلاً مبيبصش غير عليه ؟




وازاى انا أعمل فيك يا حبيبى كدا ؟




ازاى أضيع وقت كتييييير
متعلقة فيك زى تقل حديد بيشدك
و يتقّل خطوتك ؟




و ليه ؟




ليه من أول مرة سألتك
انتا ليه بتعرفنى و بتقربنى منك
مادمت مبتحبنيش ...
و انتا قولت معرفش 
ليه انا مبعدتش ؟!!






ليه مسبتكش من وقتها ف حالك ؟
ليه عذبتك يا بن الحلال بيا شهور وأيام ؟
ليه كنت بطلب منك اللى متقدرش عليه ؟
ليه خلتنى أوصل ف علاقتنا
لإنى مش عارفة اكون جنبك زى
أى حد غريب بتعرفه حتى 
و ممكن يكونله أى حق عليك .. عنى  ؟




ليه ؟




انا فعلا زعلانة من نفسى قوى
و بعاتبها قوى
و زعلانة عليها ..قوى






زعلانة من نفسى
 لأنى عملت فيك كدا
عذبتك إنتا أعز الناس على قلبى
بعاتب روحى لأنى ضغطت عليك
وحملتك أكثر مما تتحمل
زعلانة على نفسى لأننا وصلنا للنهاية دى
وكان ممكن تجنبها بشوية عقل 
بس منين ييجى العقل  
جنب كل الحب المتشال ف قلبى ؟!!






انا مش قاسية دلوقتى
ولا بزودها ...
دى احساسى من شهور و دى قناعتى
مينفعش تقول لحصان يطير
او تقول لفراشة تشيل قد وزنها مرتين 
وبعدين ترجع تتستغرب
 .. ازاى الحصان مطرش ؟
و ازاى الفراشة وقعت بالشيلة التقيلة
واتفشفشت كدا ؟!!






لو كنت بعدت عنك من اول مرة
كان زماننا دلوقتى أصحاب
كان زمانها قصة اوشكت تبتدى 
بس محصلش نصيب
كان زمانى مش بحاسبك كل يوم
على حاجات المفروض كنت تعملها او تقولها
ومحصلتش فبقى بخنقك و انتا تحبطنى
كان زمان دلوقتى الوجع أقل 
و كان زمان الفراق أهون






بشهدلك ... انك حذرتنى
و هفضل فاكرة انك قولت كتير
و انا مسمعتش كلامك وخدته بجدية كفاية
كنت فاكرة حبى لوحده يكفى  ..
عشان يقف قصاد أى شىء تانى 
الحب اللى هوه الطاقة
اللى قادرة تحتوى أى شىء
كنت عارفة انك اتوجعت كتير ف حياتك
 و إفتكرت حبى ليك معاك هيفرق
و هيكونله أثر .. لكن محصلش
مش عشان الحب أضعف
 و لاّ عشان وجعك أقوى
لأ
عشان انتا ببساطة
معرفتش تحبنى 






هوه طبعا كان المفروض ألوم قلبك على كدا
لكن الحقيقة انه هيكون ظلم بيّن 
لأنه .. مينفعش
أصل محدش بيحب حد غصب
 و لا لأنه كان كويس معاه
او لأنه حبه قوى اكتر من روحه
فلازم يرد المحبة دى بالمثل ...
منيش من أنصار كدا 
ولا ناوية ف يوم أطلب لمشاعرى تمن 
المشاعر دى جاية من عند ربنا
بيحطها ف قلبين سوا 
او قلب لوحده 
وللأسف منزلتش غير ف قلبى وبس






انا عارفة انك حاولت كتير
ومقدرتش
عشان كدا مش زعلانة منك
زعلانة من نفسى انا 
 وبلومها
لأنى لو كنت فارقتك من زمن
مكناش هنضطر للى حاصل دلوقتى ...






عارف انا مش عاتبة عليك ليه كمان ؟
عشان انتا 
مش أول واحد ف الدنيا دى
يفتكر نفسه بيحبنى و بعدين يتراجع
انتا مش أول واحد يحاول يربط نفسه بيا وميعرفش
انتا مش اول واحد يسيبنى ويمشى
يا حبيبى ..... و يكسر قلبى 




 منتاش اول واحد يبعد
بس انتا اول راجل ف حياتى
 أحس انى جزء منه
 كنت علطول بقولك 
أنك آدم اللى خرجت من ضلعه
و الاقينى بوجودك نقصانى و قد إكتمل
انا تعبت ف حياتى كتير قوى
ومعاك حسيت لأول مرة 
يعنى إيه راحة
وامل ف انى أشوف خير جاى
و ان فيه حاجات كويسة ممكن ف الدنيا
ممكن احس بيها زى باقى الناس
و معانى حلوة كل اللى كنت بعمله قبلك
انى أقرى عنها ف الأشعار
وأسمعها ف الأغانى ..
و معاك كنت بعيشها واشوفها 
وألمسها بإيدى




معاك كان كل حاجة فارقة
وليها طعم


مش بلومك على ضياعها 
لأنه مش ذنبك




مش ذنبك تشيل خطأ اللى اتعمل قبلك
مش ذنبك تعوضنى عن كل اللى خسرته 
مش ذنبك تدفع فاتورة غيرك 
ومش ذنبك تتحمل فوق طاقتك
مش ذنبك ... و لأنك ببساطة
 معرفتش تحبنى






 قبلك كنت قافلة باب قلبى
ومعنديش أى ثقة ف ان فيه سعادة جاية
معاك عشت الأحاسيس دى كتيييير
 ف كل مرة كنت بسمع صوتك
أو يوصلنى منك رسالة
كل يوم شوفتك فيه
وكل كلمة وحرف كتبناه لبعض
كل لحظات جمعتنا حلوة كانت ولا كانت صعبة
انا مدينة ليك بيها
لأنها كانت حاجة صافية .. ومفيهاش خدش
و حقيقة ... و مش كدب 
كانت نادرة ... ومتتعوضش
يزيدها غلاوة انى حساها دلوقتى 
أشبه بهدية
و جاتلى من انسان مش عاوز منى حاجة
وكان كل هدفه بس انه يسعدنى
ويفرح قلبى
حتى لو كانت نهاية الفرحة دى...
كل هذا الوجع






انا منكرش انى تعبانة قوى 
 و مش عارفة أرجع زى زمان
و لا عارفة عمرى الجاى شكله ايه من غيرك
و لا عارفة اعيش أيامى زى ما كنت قبل ما اعرفك
مفتقدة كل اللى بينى وبينك
ومشتاقة للحظات الأمان اللى عمرى
ما حسيت بيها غير ف حضن قلبك 
و لا عارفة استطعم الدنيا اللى بقت 
 ُمرة قوى من غير طعم السكر
اللى كنت بتحلي بيه كل وقتى
و اللى مخلينى حزينة اكتر ...
أنك جيت و مشيت 
من غير ما ألحق أخدك ف حضنى 






انا أسفة كمان من قلبى 
لأنى مكنتش الأنسانة دى 
اللى مكتوبلها تسكن قلبك 
ومتطلعش منه ...
وأسفة كمان لأنى معرفتش أمشى
بدون خساير ف الروح 
عندى .. وعندك 
لكن عذرى انى حاولت 
وعذرى الأكبر انى امراءة 
وجنانى معاك كان جزء من تكوينى ..
مفيش واحدة بتحب و بتكون عاقلة أصلا !!






بحاول أتأقلم على الوحــدة
و أرجع اكون مخلوق غير تام من تانى
مخلوق حزين ومكسور و بيحاول يضحك ..
ساعات بيكون ناقم ع الدنيا
اللى بخلت عليه و بتحرمه من البهجة
اللى عاش العمر يستناها ..
 و اذا بيها بتروح منه للأسف
معلش .. أنا بحاول أتكيف
وأتعود 
وأعيش عادى



بحاول ....






اللى مبحاولش أعمله
انى أفكر أبطل احبك
لأنه مش نافع و لا منطقى
و اللى بيطالبنى بكدا ميعرفنيش كويس
وبقوله .. 
متحاولش حتى انك تنصحنى
لأنه مينفعش




 اللى بيحب مبيخترش
لا اللى جوا ف قلبه و لا الشخص اللى بيحبه
وهستنى يمكن لو ربنا يأذن 
و زى ما حط محبتك ف قلبى ..
 فهوه وحده اللى قادر تانى  .... يشيلها






أوعدك انى مش هحاول أتواجد 
ف حياتك تانى بأى شكل
وهسيبك ف حالك
بس أقبل لو سمحت الاول ... إعتذارى
لأنى تعبتك 
وخليتك تضغط على نفسك
لأكتر من سنة تقريباً عشان متجرحنيش
بكلمة كفاية ...




مش هقدر اوعدك
انى هبطل قلق و انشغال على حالك
لكن هحاول مفرضش نفسى
مهما إتخضيت و قلقت  




مش هقدر كمان اوعدك 
انى أبطل كتابة عنك و ليك
لأنك حتى لو بعيد عنى هتفضل حبيبى 
و نور عينى
و الراجل بتاعى 
و جوزى و أبو بنتى 
اللى اتمنيت ف يوم أجيبها منك
و هيحصل 
بس .... 
 إن شاء الله ف الجنة 






و حكايتى معاك عذابها و لا حاجة 
مقارنة بكل السعادة اللى كانت فيها 
و اللى كل ما افتكر منها أى لمحة 
بدعيلك إن ربنا 
يسعد قلبك






ومش هوعدك انى هبطل ادعيلك 
لأنى مش هبطل
 أفتكرلك كل الحاجات الحلوة






حاجة كمان مش هقدر اوعدك بيها
لأنى للآن ما زلت عند كلمتى
و رغبتى و أمنيتى اللى لسه متحققتش
و رغم كل وجعى لإنى مش عارفة
 بعـــــــدين ...
دا شكله ايه من غيرك



لكـــن 




بعــــــدين 
و يوم ما و اللى اكيد غالباً 
هيكون صدفة






بعـــدين
و لو كان بعــد 20 سنة
وشـــعرك بقى كله أبيـــض 




بعــــدين 
ولو كنت بين كل الناس
ف الشارع




بعـــدين
ولو كانـــوا أولادك حـواليك
 ومــراتك واقـفة جــنبك 




بعـــدين 
ف المرة الجـاية 
اللى هشوفــك فيها
و من غير أى كـلام
انا هجــرى عليـــك
 و هخــــدك ف حضــنى  



-------------------------------------
------------------------------------------

 أنا بتعــلم بعــدك أعيش 
نفســى أتعـــود ع النسـيان 
قــد ما هقــدر هبعــد عنك 
قـــد ما تقـــدر قولى كمان 
يمكـن نتقــــابل ... بعــدين
بعــد الدنيــا ... بعــد النـاس 
بعــد ما يخـلص كــل زمـــان

------------------------------------------
-----------------------------------------------

This entry was posted on السبت, ديسمبر 24, 2011 and is filed under , . You can leave a response and follow any responses to this entry through the .

19 كــــلام بيطــبطـــب عـــلى قــــلبى و روحــــى

فاتيما
انا هاعلق علشان وحشني التعليق في مدونتك و حضرتك كنتي قافلة التعليق الفترة اللي فاتت
بالرغم ان اللي كتبتيه فضفضة مش محتاجة تعليق فضفضة وتفريغ شحنات جواكي علشان ترتاحي الا اني هاعلق
انتي محتاجة حد يطبطب عليكي ساعات مش بنبقى عارفين السعادة فين ساعات الدنيا بتدينا ضهرها كتير وبنكتشف حاجات كتير كانت حوالينا ومش شايفينها بس صدقيني قدر الله لا يأتي الا بالخير
وفي المستقبل اكيد هتكون في حاجة حلوة ليكي تطبطب عليكي وترجع ليكي بسمتك
في الغيب هناك هيكون في حاجة تملأ فراغك وترجع الحياة ليكي
عارفة ليه؟
علشان ربنا اسمه الكريم الرحيم مش ممكن يخلي الحياة كلها انهزامات و ان مع العسر يسرا
اصبري يا فاتيما وثقي في ربنا والخير كله هيتحقق ان شاء الله
وصدقيني بعد عشرين سنة لو قابلتيه صدفة وشعره كله ابيض وماشي مع مراته وولاده مش هتجري عليه ولا تحضنيه هتبتسمي بس وتروحي تحضني مراته وتقوليلها خلي بالك منه عارفة ليه ؟
علشان هتكوني لقيتي سعادتك الحقيقية

:'(

الحب المستحيل.

ولكن يمكن تحويلة لحب ملائكى روحى.

;)

مش هعلق خاااااااااااااااااااااالص دلوقت

لأنى مش عارف اكتب اى حاجة

:"((( روح قلبي فاتيما
أنا نفسي أجري عليكي و أخدك في حضني!

الحب كالأيام ... بداية عام ... ونهاية العام ... تمنياتي لك بعام قادم .. افضل ... واجمل .

تحياتي

ياه يا فاتيما ايه كمية الوجع دى كلها بجد وجعتي قلبي ..ألم رهيب

ربنا يسعدك حبيبة قلبي و يقدرلك الخير حيث كان و يبعد عنك الحزن و الهم يا رب

تحياتي ليكي

فاتيما
روح القلب الملائكية

لنفترق قليلا
لخير هذا الحب يا حبيبى
و خيرنا
لنفترق قليلا
لانى اريك ان تذيد فى محبتى
اريد ان تكهرنى
قليلا بحق ما لدينا
بحق ما لدينا
من ذكر غالية كانت على كلينا
بحق حب رائع
مازال منقوشا على فمينا
مازال محفورا على يدينا
بحق ما كتبته الى من رسائل
بحق ذكرياتنا
و حزننا الجميل و ابتسامنا
بحق احلى قصة للحب فى حياتنا
اسالك الرحيلا
لنفترق احبابا
نزار القبانى

على قدر الحب يكون الالم
و على قدر اندفاعنا فى الحب
يصعب التراجع او التوقف
فالعربة السريعة لا تستطيع ان تقف فجاة
و لكن يمكنها ان تقف بالتدريج الى ان تتوقف نهائيا
من الممكن بعد النزول ان نترنح من السرعة و نقف
ثم نبحث او تاتى لناعربة بسرعة مناسبة
فالعربات السريعة احتمال حدوث حوادثها اسرع

تحياتى يا ام جو

إنتى وحشتينى قوى
تخيلى بقالنا سنتين متقابلناش
نفسى أشوفك جدا وآخدك ف حضن جامد على غفلة والله وحشتينى جدا يا طمطم

بوسة لقلبك الطيب الطاهر

ادعيله
حبيه
تخيليه
اشتاقيله
تخيلى حياتك لمحة لمحة معاه
استمتعى بالحياه على قد متقدرى
المهم يا طمطم رب ضارة نافعة
الوحياة بكل ما فيها ماليانة ورد وفل وناس حلوين
وقلوب طيبة صافية وكمان غاليين

ياريت نتقابل بقى قريب
يوم حريمى بقى ربنا يخليكو
خلونا نفك شوية ونهييييييييييييص

بوسة وحضن لأغلى الغاليين
متابعاكى دايما كالعادة
فى صمت ششششششششششش

تحياتى الغالية
هبة

صباح الخير

مش رح أحكيلك بطلي حبيه
بكون بكزب عليكي إزا في يوم رح أصدق إنه طلع من قلبك

بس اللي بيطلع مني أحكيلك ياه,, إنه إتركي القصه للزمن,, هيه اللي رح تعالجك

واااااااأأأأأأأااكيد ربنا كاتبلك الخير كل الخير

بجوز تكون فتره نقاهه وتعدي على خير
بجوز تكون فعلن النهايه
وبجوز هاي هيه اللي رح تعطي النهايه اللي إنتي بتتمنيها وبتعتبريها نهايه سعيده

الله يختارلك الأفضل
ويشفيلك قلبك وما يضرك ويرحمك برحمته يارب

ياخبر اسود على كم الحب ده
ويخرب بيت ام جلد الذات اللى انتى عملاه فى نفسك
وملعون ابو قلة الحب والتقدير اللى انتى مش عارفة تديه لروحك
يامه ارحمى نفسك وجعتيها ووجعتينى ..
بس صحيح ما يحس بالنار الا اللى ماسكها
ربنا معاكى
عايزة اقول كلام كتير بس مش قادرة يا بطة , قلبى معاكى

اتأثرت بجد حقيقي بكل كلمه قولتيها
لانها من القلب
يمكن الواحد لما بيحب اوي بيخنق اللي بيحبه من غير ما بيحس
يمكن لما بنحب ما نشفش الصح
اعتقد انا لو هذا الشخص وبعد كلامك ده كله حارجع وحارجع وحارجع
لانه مش حايلاقي حد يحبه قد الحب ده كله
اتمني لك السعاده اما في اللقاء اما مع النسيان
تحياتي

حبيبتى فاتيما
احيانا يأخذ القدر منا كل ما نحب ويسرق فرحتنا ويقتل احلامنا
اضحكى يا فاتيما للدنيا عسى ان تضحك لكى ..واستبشرى خيرا لما هو أت
فقد يحمل لكى الغد افراحا وسعاده
ودوسى على الدنيا وامشى عليها
ده شعارى فى مدونتى ..ولا يهمك يا قمر
تحياتى لفاتيما حبيبتى وسلامى ليوسف الجميل

قلبي معاك يا فاتيما ، ومش هقولك غير إن ربنا كبير وأرحم من عبيده ، ربنا يترفق بيكي وهيفرح قلبك أكيد لإنك تستاهلي كل الحب ، ده أنا حبيتك من غير ما أشوفك .
عجبني أوي تعليق " إبراهيم رزق ": وفعلاً علي قدر الحب علي قدر الألم .
أنا بحبك وبدعيلك ربنا يفرج كربك إن شاء الله .

السلام عليكم
فاتيما
ام يوسف
اختى الغالية
كيفك
اتمنى ان تكونى بخير
قوية كما عهدتك
عارفة الدنيا غريبة بشكل فيها حاجات كتير نجرى عليها ونفرح بيها وتوعدينا بيها وبعد ما نتعلق بيها قوى زى ما بيتعلق الغرقان بقشاية بتلاقيها بعدتها عنا وخدتها منا وكتبت علينا الفراق
حلوة قوى فضفضتك
سعدت بوقتى هنا
دومتى بخير

طيب يا ستي

بصرف النظر عن كم المشاعير المذهله والتي تجعل التعليق عليها درب من العبط

أجابتي

اه

الحصان يقدر يطير طبعا فاكره النكته بتاعة جحا أما راح بحماره السوق والهوا كان شديد وهو جنب العطار الشطه طارت وجت في راس الحمار ( ايه؟ يا راس الحمارحتى أسأليه) قوم طااااااار



وبرضه اه

الفراشه تقدر تشيل قد وزنها مرتين

نشترك لها في g e m معتبر كدهون وتتمرن لها بتاع خمسميت ستميت سنه كل يوم تسعه وعشرين ساعه وتشيل بئا

آآآآآآآآآآه يا قاتيما :'((

اقسم بان هذا ثانى تعليق لم يجد طريقه فى احضات معلقيتك
روح قلب ماما وروح قلوبنا جميعا قد ايه اتنى وحشانى موت
فين احنا وفين يوم الجمعة اليتيمة التى تيممت عيتى بعدها فى غيابك عنا
هل لديها من عوده ام سدلت ستائر اللقاء؟؟؟؟؟؟؟؟
طال الانتظار !!!
والدك الفاروق

هو انا مش قادرة امشى من غير ما اسيب تعليق

يمكن
مبافهمش انا فى الامور دى
بالدرجة الكافية اللى تخلينى اعرف اقدملك نصيحة تعملها عشان تهونى بيها على نفسك
بس اقدر اقولك
ان ربنا كبير ورحيم وجميل اوى
لو ليكى نصيب فيه هيقربه منك
وساعتها هيكون غصب عنه وعنك
واقدر اقولك برده
انى هادعيلك ربنا هو اللى يطبطب على قلبك ويسلم قلبك للى يستحقه ويحافظ عليه زى عينيه ويعوضك عن كل الالم ده
آميييين يــــارب
الله معك :)
وهونى ع نفسك انتى جميلة وربنا شايلك الخير فى حتة انتى متعرفيهاش
:)
غير معرفة :)

إرسال تعليق