.

.

أيا كـــل اكـــياس الجوافـــة .....  

Posted by: فاتيما in






انبى يا رب
تعّوض عليا عوض الصابرين 
أصل يعنى ....
وبعدين 
وبعـــدين 
وبعــــــــدين 
؟؟؟!!!!؟؟!؟!؟



هوه احنا ليه كل شوية 
ييجى حد يستقطعنا كدا ؟
ليه كل شوية ييجى حد يسلطح قفانا 
ويدينا عليه .. بالطول والعرض بالجامد كدا ؟
هوه احنا ليه كل شوية ييجى حد 
يقولنا تعالوا نركبكوا المراجيح
 و نوديكو لماما واحنا نروح معاهم ؟!!؟


 هوه فيه ايه بجد ؟
لا حقيقى عشان افهم
العالم دى واخدنا مقاولة 
و عاملة علينا عزومة 
ومفرجة علينا الامم 
بعزم وافترا ... ليه كدا ؟




نفسى أفهم 
احنا ليه دايما فىّ ف وسطنا ناس 
مصّرين يبقوا اكياس جوافة ؟!!



يعنى الجنزورى بيه اسم الله عليه 
اللى جاى متصور انه الجبالى 
والحرافيش لازمن هيشيلوه ع الاكتاف
عشان هوه المنقذ ... وعارف المصلحة 
بس يدوله فرصة 
مصدق نفسه ازاى ؟



يعنى مصدق اننا هنصدق 
كلامه بإن العسكر مديينه 
تفويض وصلاحيات ؟
على أساس ان الحداية بتحدف كتاكيت ؟






طب إفرض فرضاً انه مصدق 
انها بتحدف كتاكيت 
هل بقى لو حّدفت ... 
هوه فيه نفس و صحة وعمر 
يلقف الكتاكيت دى
قبل ما تقع تنقطم رقبتها 
ولاّ هيأكلوهالنا ميتة وفطسانة 
وأهو معدة المصريين متينة 
و دايما بتهضم الزلط ؟!!!



انا اكيد مستوعبة ان الفرصة دى 
جاتله من السما
عشان يتصدر المشهد تانى 
ويطلع لسانه لكل اللى ذلوه قبل سابق
وكل مؤتمر صحفى يذلهم ... و يذلنا معاهم
 واكيد مستوعبة برضك 
انه مش مصدق روحه  
بس احنا بقى 
ازاى فينا لسه حد مصدق ان فيه الخير ؟



وازاى حد مصدق ان وزارته دى 
ولو تشكيلتها حتى من جن سيدنا سليمان
هتعرف تعمل حاجة ف ظل حكم العسكر ؟
كان غيره أشطر 
دا لو كان ناوى يتشطر 
هوه ولاّ غيره ف الأيام السودة دى 




واللى ناويين يتشطروا برضو 
الاخوة بتوع المجلس الإستشارى المدنى 
واللى بصراحة كلهم تقريبا اسما اسم 
معروفين انهم يا إما ... 
عبده مشتاق ... لأى منصب
يا اما بتوع ... فيها لأخفيها 
يا اما بتوع .. أى حاجة بس مصلحتى 
يا إما بتوع .... بحبك يا ستامونى
يا أبو طاقية خضرا



وبناء على هذه التصنيفات 
فلما يكون الحاج ساويرس
بتاع معاهم معاهم عليهم عليهم 
ف القايمة .. يبقى عادى ومفيش مشكلة
لما يبقى كمال ابو المجد ..عادى
لما يكون معتز عبفتاح ..افيش أى حاجة  برضو
بس لما اعرف ان حسن نافعة 
من ضمن الحضور 
يبقى لازم احزن شوية ... من قلبى 



ليه يا دوك ؟
دنا قولت عليك ثورى حالم 
و لا تقبل الحلول الوسط اللى بتجيبنا ورا
ليه قبلت تنزل لهذا المستوى 
وتقبل تكون واقف كدا
بالمقشة والجاروف 
عشان تكنس ورا العسكر بلاويهم ؟!


بصراحة 
لقد نزل علينا الخبر كالسااااااعكة 
بس مش صاعقة قوى 
لأن هذه الثورة الطيبة كاشفة
و اديها بتعلمنا .... كل يوم 
اننا منمشيش ورا الاشخاص
قد ما نمشى ورا أفكار ...
ذلك أحسن كثيرا  




بس يعنى يا رب 
لما يقعدوا ينقصوا واحد ورا التانى كدا 
الواحد لازم حينئذ .... يتسائل 
يكونوش يا نضرى 
لسعوا من احداث الثورة المتتالية
ولا هما أصلا كدا م الاول  .... 
وإحنا اللى مكناش واخدين بالنا 
ونظرنا مدغشش من كتر الضرب ؟!!!!




وزير الداخلية الجشديت بقى 
شفته مع يسرى فودة ف لقطات 
و فاكرة حواره لما اتذاع من كام شهر 
وفاكرة كويس انى قولت لنفسى ساعتها 
الداخلية بكوادرها .. مفيش فيها فايدة 
والمناظر دى هيا اللى جابتنا ورا 
اهو الراجل مسكها من بابها أهو 
و باين من كلامه ومنهجه 
انه عاوز يطبطب ع العيال المنيكسرة 
الظبابيط الصغننة اللى وجعناهم ف قلبهم 
اللهى ننشك ف معامينا احنا ...
محدش يقول أميييين
ويطيب خاطرهم 





الراجل الواكل من خير العادلى 
ومنتهج سياساته لحد ما طلع معاش 
ومفتحش بوقه بكلمة واحدة 
عشان ربنا ع الخاين .....
اللى مصنش العيش والملح
الوزير الذى كان مسئولا وقت ما
فى فترة خدمته عن مقتل 
بعض من اخواننا اللاجئين السوادنيين ....
الوزير عايز يرجع الامن والامان 




وباين من تصريحاته
 انه عاوز يرجعه على قديمه
يعنى الشعب بشوقه بقى 
مشى زى الألف ... وجنب الحيطة 
نحطه على راسنا من فوووووق 
مشى عوج .... هنوريله الهنا كله
 وطبعا دا مش هيحصل عينى عينك كدا 
لأ ..اومال الشغل القديم راح فين ؟!!!
شغل أمن الدولة الحلو 
بتاع ف الضلمة يضربك 
وف النور ... ولا جينا جنبكو ؟!!!!
وأهى الأيام جاية 
 



وزى ما العيسو ى كان راجل بركة 
مشوفناش منه غير كل خيييييير 
أبشركم بإن الوزير الجشديت 
هيبقى متبارك اكتر وأكتر ....
وكما نهى العيسوى حياته العملية 
للمرة التانية .. بمجزرة محمد محمود 
فربنا يستر و وزير الداخلية الجديد 
مينهيش خدمته للمرة التانية 
بمذبحة على نسق التتار كلما احتلوا بلد 


الناس اللى متفائلة خير 
بمجلس الشيعب الجديد الجاى دا ...
إذ انه مبنى على اختيارات الشعب 
مع إحترامى للجميع 
ولنواياهم الطبية و رغبتهم ف وجود
مسار تانى للثورة جنب مسار الميدان 
والإحتجاج والاعتصام .. الخ 
فتح الجبهات على اكتر من موقع 
بيضيع الجهد و يزيد الوقت والتكلفة 
وجبهة الإنتخابات دى استنزفت  
وامتصت حماس وضغط جامد كان ضروريا
ولسه هتستنزف مننا تانى ... الكثير 
و انا مش ضد الإنتخابات على عمومها 
انا ضد توقيتها ونظامها 
و المشرف عليها 
مش أكتر 






انا ضد ان تفرض علينا الفلول 
ويتساعد التيار المتأسلم يفرض سطوته
هذه انتخابات غير عادلة 
ومع ذلك مش فارق معايا تجيب مين 
قد ما فارق معايا ... القواعد والأصول 
والاهم انى ضد وبشدة
ان الدنيا تمشى عادى كدا 
ونفرح بمجلس وناخبين ونجاحات 
بينما الدم لسه سخن وحقه متاخدش
ولا هيتاخد بهولاء المنتخبين 
اللى كراسيهم اهم عندهم
 من الوقفة ف الميادين والضغط ع العسكر
عشان يتحاسب الكلاب لحد آخر كلب






الكلاب اللى نشنوا على عيون الولاد 
80 عين راحت غير الشهداء
كلهم .. ف رقابنا جميعا 
انا معرفش ازاى اروح اثق فيمن صفوا 
هذه العيون و أنتخب تحت رعايتهم 
وبمباركتهم ...
واختار ناس سكتت عن الحق
وراحت تدور عليه بطريق جانبى هياخد وقت طوييييل بينما الخط المستقيم 
هو أقصر الطرق  ... ؟!!!
 






هذا مجلس عقيم و منزوع الدسم 
وملعوب فيه من قبل ما يبدا 
واعضائه ف الغالب هيبقوا اكياس جوافة 
هما كمان ...
واللى هيفتح بوقه فيهم ويعمل جدع 
ويقول بم هيلاقى من الناحية الأخرى 
اللى يديله فوق دماغه
وهيسكت ..غالبا زى دايما ما بيسكت 
وبيرجع مارشيدير ... 
كما الحال من اول الأستفتاء 
وحتى اليوم من الاخوة المتأسلمون 
والوفد يين وغيرهم ... 




اما المشاغب المضغوط عليه قوى 
ومش عارف يلاقى حتة يدارى فيها 
ويصر ع المواجهة ... فساعتها 
العسكر عنده الف ذريعة لحل المجلس 
وكله بالقانون  واحكام البطلان والمحاضر 
واعترض يا بتاع الشرعية ....
وتعالوا يا خسرانين
اقعوا مع اخواتكم الناجحين
و امسكوا ف خناق بعضشيكم 
و العسكر يصقففففف 
وهنبقى فرجة للعالم .... زى كل مرة



هذا المجلس الذى يباركه العسكر 
وبيمشى ايام انتخاباته 
كمالسكينة ف الحلاوة 
بلا مشاكل كبرى و لا بهدلة 
و الاهم .... بلا بلطجية 
عشان يهمه ان العملية تخلص على خير 
ويبقى فيه كومة بشر قاعدين تحت القبة 
و عشان يبتدى شغل الدستور 
وتبتدى العجلة تدور ...
ويبدأ الإعداد لظهور الرئيس القادم 
اللى بموافقتهم وعلى مزاجهم طبعا 
وللمرة التالتة هيمشوا الراى العام ف اتجاه 
ويضغطوا لصالحه ...لأنه على قد الأيد 
وف النهاية ...
حالو يا حالو المجلس دا يمشى ... 
وكله يرجع محلو
ودى اللعبة 
و المفروض كلنا عميانى
نثق و نشارك فيها معرفش ليه ؟!!!



وعاوزة حد يفهمنى ازاى تيارات بعينها 
تقاتل بشراسة على كراسى البرلمان 
وتدفع الغالى والنفيس و تقبل تتهاجم بضراوة
ان لم تكن تعلم انها قاعدة بعدين 
والمجلس ممكن يستمر ف دورته لحد الآخر
او هكذا تم وعدهم بمرسوم
 ولاّ اعلان دستورى 
و الله اعلم .. !!!




وعاوزة برضو حد يفهمنى 
بتوع المجلس الإستشارى المدنى دول ..
و المصدقين نفسهم منهم تحديدا 
راضيين ليه بهذا الوضع المعيب 
الا اذا كان تم وعدهم بإنهم هيكونوا نواة 
للجمعية التأسيسية ف المستقبل البعيد 
عشان يعرفوا يسيطروا على كتابة الدستور 
و آل يكونوا مفهمينهم 
ان دورهم قد يكون تاريخى
و جليل و وطشنى ف حماية البلد 
الاّ الدستور يُختطشف 
من الأغلبية القادمة ف مجلس الشعب ...
واللى بالمناسبة انا مش طايقهم بس مضطرة اوافق على حكم الاغلبية فى وجودهم 
لكن مش مضطرة طبعا
 اوافق على افكارهم 





بس مش مضطرة كمان اقبل حربنتهم 
لكن مضطرة ادافع عن شرعيتهم 
و عاوزة بهذه الموناسبة العظيمة  
احييى الدماغ السودة
اللى عمالة تخطط لكل هذه المهازل 
التى أدت بيا انا سخصيا
أنى أنضطر دلوقتى 
 (ولوقت مستقطع)
أقف ف خندق الأخوان وادافع عنهم 
رغم احتقارى لانتهازيتهم وتلاعبهم ...
وحسبى الله ونعم الوكيل فيك يا فخرى !!!!









الجنزوى و وزرائه 


المرشحين لمجلس الشعب 


اعضاء المجلس الاستشارى المدنى 


ومن فى حكمهم 



كل هولاء 
الذين قبلوا ان يكونوا أكياس جوافة 
على عربية المجلس العسكرى 
هولاء الذين قبلوا 
أن يقفوا ببكر الكلينكس
عشان يمسحوا بيه ....... خطايا العسكر 
عايزة أعلن عن قرفى الشديد 
 واستيائى المريع منهم



من هولاء الذين يفترض بهم ان يكونوا 
رأس الحكمة والخبرة والقيادة فى اماكنهم
واحزابهم و كبارة ناسهم
المفروض يكونوا أقوى من كدا
لكن الأيام والثورة تثبت دائما العكس 
و ان نظام مبارك بكل من فيه أفسد و 
فسد من كل ناحية ... حتى معارضيه
بس و ماله .. يلا خليها تنضف 
ع الموجة القادمة هيكون مش فاضل 
غير الانقياء المخلصين .. 
وبس 
قولوا آميين المرة دى :)


ويبقى السؤال اللى محتاج اجابة 
اكياس الجوافة اللى كترت دى 
اللى شيكلها هتعمل ازمة
 ولا ازمة الانابيب 
فما هو الحل لو الواحد حب 
يشترى جوافة ؟!!!




هل ... يحطها ف اكياس بلاستيك ؟
ولا يشتريها ف القفص بالجملة أوفر  ؟
ولاّ يشربها عصير عند فرغلى باللبن 
ولاّ يحطها ف كرتونة 
و يمشى بيها كدا ف وضح النهار 
فيبقى الشعب كله ماشى بكراتين 
و نزعل منا الفنان .. محمود عبعزيزززز ؟ 



طب الراجل الكومل 
 و معملش فينا حاجة وحشة 
و طول عمره بيضحكنا 
ولا ضربناش بخرطوش ولا حى 
ولا حتى دهسنا بمدرعات
فتبقى دى آخرتها ... نلطش الكرتونة 
ينفع كدا ؟!!!


آه يانى
دعوة و واقفة ف زورى
ولازم أخرجها ... عشان صحشتى  




أيا كل اكياس الجوافة
 ف هذا البلد 
الهى ينكد عليكم
 نفر نفر كلُ بأساميهم
و كيس كيس بالمستخبي لنا فيهم 
قادر كريم
 يلى سامعين قولوا إنشالله !!!!!

---------------------------------------------

مجالس مجالس
تجيب إللي دارس
في كل المدارس
معاه دكتوراه
يخطط لموتنا
ويسرق في قوتنا
ويعمل بيوتنا
شواطيء عُراه
يسب المواطن
ويعرف بواطن
قصور المعاطن
وحكم الطُغاه
يطبّل لفاجر
ويلزق لتاجر
ويقطع تذاكر
ويهتف وراه
ويبقا له لازمة
في ايتها أزمه
ويبقى له جزمه
ومامته و باباه
يا كيس الجوافة
يا دلدول صحافة
حاتفضل قرافه
و حانفضل حياة
KING TOOOT

---------------------------------------------
الصور من تويتر 
ومن مواقع الجرايد الالكترونية 
ومن النت
-----------------------------------------------
  

This entry was posted on الأحد, ديسمبر 11, 2011 and is filed under . You can leave a response and follow any responses to this entry through the .

24 كــــلام بيطــبطـــب عـــلى قــــلبى و روحــــى

لو الجنزوري معاه صلاحية رئيس جمهورية يبقى يوريني ازاي ممكن يقيل وزير الدفاع
---------
زي ما بيقولو في الامثال الشرطة والجيش ايد واحدة والشعب هو الوجه الذي تصفعه هذه اليد
-----------
المجلس الاستشاري هي حبوب مسكنة للشعب فيما نحن ننتظر عملية جراحية للتطهير
---------------
اما عن الانتخابات بالرغم انه غير عادلة الا انها صارت واقع وشرعية فوجب ان نتأقلم مع النتيجة ونتعايش معهاونحاول انقاذ ما يمكن انقاذه فيها
-------------
وتبقى اكياس الجوافة كسلعة رائجة لكل متسلق
تحياتي

الجنزوري عيط من أولها

على فكره وجهة نظرك في مقاطعة الأنتخابات وجيهه جدا

الحقيقة اعتقد ان الاجابة علي الكثير من التساؤلات التي قرأتها تكمن في المسافة الفاصلة بين عبارتين .... فكما قال هيرودوت وهو ابو المؤرخين ... ان التاريخ دائما ما يعيد نفسه .... قال ماركس ... من قال ان التاريخ يجب ان يعيد نفسه ... والحقيقة بالنظر الي مشروع ماركس واطروحاته ومن تبعه علي ذات النهج اقتناعا بفكرة الثورة المستمرة ... جيفارا ... لينين ... ناصر ... الخ ... فان تلك النظرة الي التاريخ اثبتت فشلها ... وتبقي عبارة هيردوت هي الباقية حتي الان .....وهذا لا يعني الاحباط او التواكل ... ولكن يعني وجوب العودة الي كتاب التاريخ ... وتعلم الدرس والعبر منه ... فلو رجعتي الي التاريخ لفترة ما قبل يوليو 52 قليلا وما بعدها .... لوجدتي تساؤلاتك هينة للغاية امام التحديات والاحلام التي ولدت في ساعتها ..... ووجهة نظري المتواضعة .... ان الابطال ذات الملامح الاستثنائية هي القادرة علي النجاح في اثبات عبارة ماركس .... بانه ليس شرطا ان يعيد التاريخ نفسه ... فلتنظري حولك ..... هل لهذا الشخص من وجود الان ؟ !!


تحياتي واعتذر عن الاطالة

ااااااااازيك يافااتيما
يارب تكوني بخير
رحت ميدان التحري وكلي امل اني اشوفك

بس ياخسارة ماشوفتكيش خالص

شوفي ياست الستات
وزير الداخلية الجديد بلطجي من ايام زماااااااان
وبتاع امن جنائي
جنائي جنائي يعني
يعني جايبين تخصص
وهو ده اللي هيجيب ضرفها
وهيظبطهالهم علي الاخر
:))))

فاتيما
روح القلب الملائكية

ازيك يا ام جو
عاملة ايه
يارب تكونى بخير يا رب

سيبك من كل ده انا وصلت الى حل كويس قوى
بقيت باعمل نفسى غبى و محاولش افهم
عشان يا ماما لو فهمت ممكن اطق او اتشل
و انا على رايك راجل عندى عيال
ربنا يكذب ظنوننا و نكون احنا اللى غلطانيين و الناس دى كلها بيس
اما المجلس الاستشارى فاعتقد ان بعضهم خدع مثل حسن نافعة و الدكتور نو ظنوا انهم يستطيعون التأثير و ادينا قاعدين فى البيت
نتفرج على التلفزيون نشرب جوافة و ناكل عصير جوافة
بس الخوف لو جالنا امساك

ساليناز بتسلم عليكى قوى
سلام يا ام جو

انا جيت اسلم واقولك وحشتيني
قريت كل كلمةكتبتيها وحاسة بكل اللي قلتيه وبأقول ورائك امين وان شاء الله خير فقد صدق من قال
ضاقت فلما استحكمت حلقاتها
فرجت وكنت اظنها لاتفرج
قبلاتي واشواقي عزيزتي

والله يا أم يوسف أنا شايف إن مجلس الشعب المنتخب بحرية سيكون قادراً على مواجهة العسكر و تشكيل الحكومة و البدء بأخذ حق الشهداء خاصة بعد انتخاب رئيس الجمهورية ايضاً
يجب أن ينتزع مجلس الشعب الشرعية من مجلس العسكر بشكل شرعي و قانوني
أما إذا خنع مجلس الشعب فلن يخنع الثوار و لن تهمد الثورة و انا على ثقة شديدة بأن ثورتنا ستنتصر
و اللي يعيش يشوف
و الإختلاف في الرأي لا يفسد للود قضية
اما بالنسبة للمجلس الإستشاري و حكومة الجنزوري فهما زي ما قولتي و وظيفتهم إنهم يمتصوا الصدمات عن المجلس العسكري و يلهي الشعب بيهم

بادىء ذى بدء ...
لازم أعتذر لكل اللى علقوا
ف التدوينات اللى فاتت
وملحقتش أرد

انا مزاجى العام تحت الخط ...
فمعلش
سامحونى

وربنا يعدى الأيام الغامقة دى
ويكرم البلد دى

وبالتالى
يكرمنا معاها
ان شاء الله

مصطفى سيف الدين
---------------

أزيك يا أستاذ مصطفى ؟
يا رب تكون دايما بخير

موافقة على كل تعليقاتك
فيما عدا موضوع الأنتخابات
وان كان الخلاف ...لن يفسد أى ود
لكنى أتمنى أن اللى شارك يطلع صح ف حسن نيته ونيتى السودة دى هيا اللى تطلع غلط وتشاؤمية بزيادة ...
هوه حد يكره ..؟؟!!


وأكياس الجوافة كترت فعلا
هنعمل ايه بس ...
حتى يوم ما يبقى بارقة أمل
تطلع الاكياس ... فاضية
ومجرد أكياس وبس

لك الله يا مصر
وحضرتك منورنى دايما بتعليقاتك
وسؤالك واهتمامك وأسفة لو أنى مقصرة ف حقك وف حقكم جميعا ....

مصرى جدا
--------

الجنزورى عيّط ؟!!

كنت أتمنى لو عيط قبل المنصب
ولاّ قبل الثورة ...
كان يبقى أوقع واكثر تصديقاً
انما دلوقتى ..؟!!!
دول دمعتين اما استدرار لتأييد البسطاء
واما حكم السن و أعراض الشيخوخة بقى
والله أعلم


وجهة النظر فيما يتعلق بالإنتخابات
أتمنى ان تخيب والله
بس أصل الارض أصلاً عوجة مش احنا اللى مش عارفين نرقص ...
وكل الأفلام دى تضييع وقت و تعقيد للمشهد لحد ما يمهدوا الأرض للمغرز الجديد ونطلع من هم نخش ف كارثة وهلم جرا لحد ما يجهدونا ويستنزفونا ويخلصوا البطاريات ...

ربنا يرد كيدهم ... اللهم آمين
وأدينا قاعدينلهم مش ماشيين على اى حال

اخيرا
سلامة ست البنات
وانشالله دايما ف أحسن حال
هيا و أبوها ... والعيلة كلها
:)

اندروميدا
---------


اهلا يا اندرو

انا تهت ف التعليق
وحاولت أستوعب شوية
وتوصلت لحاجة متخلنيش أبص ف كتب التاريخ واللى قبل 52 وغيرها ...

احنا لو خدنا المنهج دا
طب منبص على تونس أقرب وأوقع ..

مين كان البطل الأستثنائى هناك ؟!!!
مين ف اليمن ؟
مين ف ليبيا وسوريا ؟

البطل هو الشعب
البطل الحقيقى هو الثورة
الفكرة
الخروج ع الظلم

الأليات قد تختلف
و فيها اللى يعطل
او يدمر
او حتى يسّرع النجاح

لكن ثورات هذا الزمن مش عاوزة أبطال
قدر ما هى عايزة توحد ع الهدف

دلوقتى الاهداف تفرقت
النخب و بعض القوى تتكالب ع السلطة
والعسكر طامعين ف الحكم
وامريكا واسرائيل راضيين ومبسوطين
والنظام القديم ينتج نفسه بقوة
والثوار منهم اللى نفسه انقطع
ومنهم اللى أنكشف خيابته وقصر نظره
ومنهم الغالبية المخلصة اللى لسه بتحارب ع الأرض وقد أصبحت الآن وحيدة ... والشعب رجع اغلبيته يتفرج من بعيد ويدور ع اللى يشتغله
عشان كدا مرتاح لفكرة البرلمان و الوزارة ...الخ


مصر كبيرة وغالية
ولهذا خلاصها هيكون على قد حجمها
زى ما أعدائها وطغاتها ما كانوا جبارين ....

معلش

كله يهون


لا تعتذر عن أى اطالة
انتا نورت
ومنور أى وقت

شمس النهار
---------

ازيك يا ست الشموسات
يا غالية
معلش مروحتش التحرير الجمعة دى
احنا حد معّزم علينا ان لا نلتكى ف الميدان ولاّ إيييييه ؟؟

هوه الواد زيزو أزهرى مفيش غيره
ناششنا عين وحشة من بتوعشه
طيب
اما أشوفه ...هه


انا مزاجى العام مش اللى هوه
ومبحبش أنزل التحرير وانا كده
خصوصا الفترة الاخيرة
اصل ناس كتير هناك بحبهم
ومحبش يشوفونى وانا مقريفة
ومليش نفس وكدا


دا غير المخبرين الحلوين
مليش مزاج أستحمل قرفهم خالص
اليومين دول ...


ان شاء الله ربنا يروق الاحوال
وأشوفك على ألف خير


وزير الداخلية الجديد دا
ربنا يستر
الطقم اللى بيقوله ف الرد ع الأسئلة
بيفكرنى يمنهج رجالة العادلى ف اللقاءات التليفزيونية لما كانوا بيردوا ع المذيع بمنتهى الشياكة والكلام المنظم والمنطقية ف تقفيل الوقائع والحوادث ...
ويبق الدنيا والعة
وهما كووووول ولا كأنهم عاملين حاجة
شكلنا داخلين على أيام شبه كدا
ربنا يسهل ونقدر نتعامل بشكل مغاير


تحياتى ليكى ولبناتك القمرات
والحفيد

ابراهيم رزق
-----------

ازيك يا ابراهيم
وازاى سالينازة القمر
وحشتنى والله
ومفتقدة قعدتكم قوى ...


انا قولتلك مرارا وتكرارا
انتا صاحب عيال
وصحتتتتتك
وبخصوص الجوافة فنا نفسى قفلت منها
ومش عاوزة أشربها ولا اكلها عشر سنين قدام .. من وشهم

:)
ربنا يصلح الاحوال
ان شاء الله

خواطر شابة
----------

ازيك يا خطورتى
انتى كمان والله وحشتينى قوى
قوى
قوى
قوى
وحشنى نرجع شوية لروقان زمان
ولو كان روقان أى كلام
ووحشنى أفضى دماغى وبالى شوية ..عن كدا

معلش

ربنا يسمع منك
ويحقق دعائك
لينا وليكم يا حبيبتى


وبوساتى وحضوناااااااااتى
يا خطورتى

دا عشانك
http://i696.photobucket.com/albums/vv321/picz0022/welcomeBack/3.jpg

وألف حمدلله ع السلامة
:)

مهندس مصرى
----------

انتا بالذات يا محمد
الاختلاف معاك استحالة اخليه يفسد الود أبداااااا
انتا عارف غلاوتك عندى
والغلاوة دى مش جاية من فراغ
انا نفسى لو كل الأخوة اللى نجحوا م الاخوان والسلفيين يبقوا بدماغك ...
يبقوا بمرونتك وقدرتك على تقبل الآخر
وقدرتك على احترامه
وقدرتك على التفريق بين التدين والتعصب ...
لو هما زيك يا محمد
أثق فيهم ومقلقش
لكن للأسف ...وانتا شايف
بقالنا شهور من بعد الأستفتاء وهما بيلعبوا لوحدهم وملهمش دعوة بالصالح العام ...
الا لو كان صالح يتوافق مع مصالحهم الشخصية وفقط ...
مش محتاجة أديك أمثلة
انتا راجل موضوعى و منحاز للحق
و تويتاتك اللى بتنتقد رعونتهم وتخاذلهم ... تشهد
كيف أثق ف هولاء بعدين ؟

يعنى صاحب مبدأ أتمسكن لحد ما أتمكن دا أثق فيه وف ولائه للشعب ازاى ؟!!

هم يرضخون وينحنون تبعا للرياح
وأظن ان ذلك لن يتغير بدخولهم برلمان او وزارة او أى حاجة يا محمد ...

هم أصابهم نفس العوار اللى اصاب اليسار والتيار الليبرالى والوفد وغيرهم ...
ناس شاخت ف شبابها
ومبارك عرف ازاى يكسر أنيابهم
ويدخلهم الحظيرة ...
دول خلاص بات عندى يقين أن لا امل فيهم
وآن الاوان كما قال عمر طاهر
أن ترحلى يا دولة العواجيز
عواجيز الفكر والحماس ..قبل السن

الثوار لن يخنعوا يا محمد
بس التمن دلوقتى مبقاش دم وبس
بقى دم ووقت وحاجات كتيييير تانية
من شوية شفت رئيس تونس المؤقت قصاد البرلمان بيلقى كلمة
ومبطلتش عياط ....
ربنا معاهم ويكرمهم
وعقبالنا ...

بس زى ما كتبت ف تعليق فوق
مصر جبارة
طغاتها جبابرة ..
وقدرها عظيم
وبالتالى ... لسه المشوار صعب
و ربنا يدينا القوة

لما بتتأخر عليا
بخاف
لأكون زعلتك ولاّ حاجة
او كتبت حاجة بايخة ضايقتك
بس تعليقك دا واللى فات
طمنونى ...
:)

سلامى ليك وللجماعة

كاسبر
----

:)

ياللهول
كاسبر يدافع عن نفسه
ويقول مش أنا ؟!!!

انتا عيان يا بنى ولاّ حاجة
لأ
بجد
أصل دور البرد شغال وبيرفع الحرارة
وساعات الناس بتخطرف ...


لا تقلق يا فتى
انا متأكدة ان مش انتا اللى بتهدد بأبنى وكدا ...
اولا لأنى عارفة اسلوبك ف الكتابة
وثانيا لأنك مبتهددش بالأذى
انتا بتخوض ف الاعراض و تطلع الناس من الملة بس ...

:))

متتخضش كدا
و بعدين كتر خيرك والله


وبعدين
منتا كويس اهو يا بنى
و عندك على رأى
الفنان احمد مكى ف طير انتا :
"بواقى ضمير"
اومال تعليقاتك السمجة دى عموما
لازمتها ايه طيب ؟؟؟

مجالس مجالس
تجيب إللي دارس
في كل المدارس
معاه دكتوراه
يخطط لموتنا
ويسرق في قوتنا
ويعمل بيوتنا
شواطيء عُراه
يسب المواطن
ويعرف بواطن
قصور المعاطن
وحكم الطُغاه
يطبّل لفاجر
ويلزق لتاجر
ويقطع تذاكر
ويهتف وراه
ويبقا له لازمة
في ايتها أزمه
ويبقى له جزمه
ومامته و باباه
يا كيس الجوافة
يا دلدول صحافة
حاتفضل قرافه
و حانفضل حياة
_______________
KING TOOOT

الله عليك يا وليد

حطيتها بعد اذنك ف نهاية التدوينة


وانا بقول
أمسح التدوينة احسن ...


انتا كل مرة بتخلى مننزنى ويحيش كدا ؟!!!

مش معقول يا جدع انتا
بطلوا إبداع
واشعار حلوة طول الوقت كدا ...
عشان العالم اللى امكانياتها ربع تمن اللى زى حالاتى ... تعرف تعيش
وتلاقيلها مطرح جنبيكو تحت السمس

:))

تسلم ايدك ولسانك

الله يا وليد
الله ينور عليك

تفائلي خير يا فاتيما و حياة الميدان اللي اتملأ يومياً بعد صورة الشهيد اللي رموا جثته في الزبالة
و حياة 45 شهيد و 2000 مصاب على الاقل في الميدان و محمد محمود
محدش حيعرف يضحك على الشعب ده و لا حد حيعرف يرجعه القفص تاني و الثورة ستنتصر بإذن الله

فاتيما شكرا على الدبدوب الجميل نردها لك في الافراح ان شاء الله من فضلك ما اسم مهندس مصري على تويتر اريد ان أتابعه
مع ودي

مهندس مصرى
----------

ان شاء الله يا محمد
بعد أذنك التعليق الجاى يخصك
:)

خواطر شابة
----------

انا عنيا ليكى يا خطورة
تعالى مصر
او أجيلك المغرب
وليكى عندى هدية دبدوب بجد بقى
مش إفتراضى زى كدا ...
بس اشوفك يا حبيبتى ..
اللقا نصيب ان شاء الله
صفحة الغالى مهندس مصرى أهى

https://twitter.com/#!/M_Qandeil

صباح الورد عليكى ...
وعليه

إرسال تعليق