.

.

البـومــبـــونـايــة لا تــزال ف جـــيـبـى  

Posted by: فاتيما in




قاعدة ف ليلة من ذات الليالى 
لا بيا ولا عليا 
فإذا بي اسمع طراطيش كلام
ان شفيق خلاص 
هيرشح نفسه 



هاه ... شفيق مين  ؟؟
 

النبى صحيح ؟!


الله ؟!!! .. مش هوه دا برضو 
نفس السخص
اللى حلف اليمين متسربعاً
قصــاد الحاج ابو عيلاء 



صاحب الورشة 


عشان يدير الأزمة 




و طلع ع الشاشات
يفكّرنا بإن الريس زى أبونا 
ميصحش و مينفعش نقوله يمشى


 عشان الفراخ الدستورى


و أهــو كلها 6 شهووووور 



و يغــور ........!!


أما بتوع التحرير 
ففى رقبتشى


ونجيبلهم بسكوت وبمبونى 
على حسابنا



و حدثت 
معركة الجمل 



وسيادته فِضل ناااايم 
يييييوم بليييييلة
و الظاهر مرضيوش يصحوه



لحسن يعمل زى شادية
 ف فيلم الزوجة رقم 13 




وبعد الصحيان 
و بعد غسيل الوش و السنان 
و تناول وجبة الفطور 
 وشرب فنجان القهوة 



وبعد قراية الجرايد
و ممارسة بعض الإيروبكس


و بعد الرد ع أسئلة الـ CNN 
عن مين اللى قتل المتظاهرين
بإجابات من نوعية 
هاه .... نهوون .... نهيييين ؟!!!


طلع الفريق علينا 
ف المؤتمر الصوحفى
مؤكــداً إنه 


و عزة جلال الله ما يعرف أى حاجة
عن موضوع الجمال
و ليس لديه أية معلومات 
و إشاء الله هيبقى يشوف الحكاية دى


 و بينما كان سيادته
 واقف قصاد الكاميرات
كان الثوار ف الميدان واقفين  ....  
قصاد الطوب و المولوتوف والرصاص


 و البلد كلها صامدة 
لحد ما مسمار مبارك
 بكماشة شعبه إتخلع 


وبعد الإحتفالات 
و الفرحة 
جاء أوان المحاسبة


و بدأ يتعالى نداء الاهالى و الثوار 
و بعض الشخصيات العامة 
و الإعلاميين اللى عكننوا
علي سيادة الفريق عيشته
مطالبينه بالقصاص من قتلة الشهداء 




وفكّروه بكلمة ...
 ان الثــوار ف رقبتشه 


فرد : أصل أنا نسيت اقولكو
 إن رقبتشى أصلاااا
مقاسها أد كدهون


و لما فكروه بمسئولياته
وانه اظهر ولائه لمبارك 
مش للثورة


 عايرنا بقى بتاريخه  العسكرى
و بطولاته و مطاراته


و لبسلنا 
وش العنجهية


فهددوه بنزول التحرير
وإسقاط البلوفر 



فخاف إذ إن  .. البلد تتعوض
انما البلوفر .. لأ


و قال ف عقل باله 
انتوا شعب نماردة 


و متستاهلونيش



و أحب أقولكم
قبل ما أمشى



فوضت فيكو الأمر
للذى لا يغفل و لا ينام


و حسبى الله ونعم الوكيييييل


 و بعض الموظفين اللبط
ف الطيران المدنى 
بدل ما يجيبوله تورتاية 
و يعملوله حفلة وداع
 رايحين يقدموا فيه بلاغات 








عايزين يشوفوه خلف الاسوار
عشان يتحاسب زى بقية زملاته الوزراء
و يجيبوله ف الزيارة عيش وبومبونى !!!




و النايب العام يفضل يطنش يطنش 
لحد ما طلع القرار إن البلاغات
تروح على القضاء العسكرى




يعنى زيتنا ف دقيقنا 
و أبقى قابلونى لو وصلتوا لحاجة





و روحّ انتا يا سيادة الفريق 
و إخفى عن وش الثورة الساعة دى 
لحد ما الاحوال تهدى 




و بعدين نرجعك ع المسرح تانى



بالشكل المناسب 
ف المنصب المناسب 
ف التوقيت المناسب  








و روح يا زمااان 
و تعالى يا زمااااان 




و ف الخطوة المحسوبة
اللى صّرح انه مبيفكرش ف المريسة
 (لأنه كبير ع الحكاية)   
رجع ..... يقولنا بخ
 أنا جيييييييييت




فهل تفتكروا انه لا قّدر الله 
 شخصية مراوغة
بتخدعنا
مترسنياش على بر
و كل شوية بحال  ؟؟!!




أبداااااا ... حاشا لله 
سيادته مبيلاعبناش
هوه فعلا مكبرش ع الترشح 
بالعكس  
حتى شوفوا الصور
هتلاقوه صغر شويتين 




أصل الثورات
بتجّرى الدم ف العروق
و تخلى اللى كان .. متعكنن عليه يروق





و يبقى اللهم لا حسد 
فشر ابن العشرين و زى المكوك 
من القاهرة لاسكندرية للمنوفية 
عشان يعلن ترشحه تحديداً من هناك


بإعتبار المنوفية 
هى عاصمة الروساء
و مسقط رأس أغلب الزعماء
 و م الآخــر 
هيا منبع كل بلاء



و على بلد المخلوع 
ودينى


وبالمناسبة .. هيا مش المنوفية 
كانت اعتذرت ف ميدان التحرير
عن عمايلها السودة فينا 40 سنة ؟!!




طب 

عمومااااااااااا


سعادته الامريكان بيحبوه 
و هيرفع راسنا قصاد كل الأجانب 
عشان بيعرف يتكلم
انجليش لانجوش كويس 




زائد انه قتل و إتقتل خلاص
فبالتالى مش هيدخلنا تانى ف حروب
مع اسرائيل الشقيقة




و صحيح عمرنا ما شوفناه معارض
أو معترض على اى حاجة 
اللهم الا كانت الحاجة دى
ضد النظام السابق و فقط 
إلا انه احكاكا .... للحق 
اعلان
أنا كنت جزء م النظام
جاب نتيجة 



سيادته بقى 
حاسس بالشعب جدا 


و مسبش حد ولا حتة
ولا مناسبة مرحهاااااش 


 مع العسكـر 
مكانه محفوظ  



حريص على رضا البابا 
و يفترض شعب الكنيسة وراه  


و ف حفلات كريمة المجتمع
بيروح 


للطبقات البسيطة
اللى هتلم أصوات ف الصناديق
بيروح


 ف المساجد و صلاة الجمعة
 مع المسلمين
بيروح 


و لمواساة الأخوة الأقباط 
ف شهداءهم  ...
بيروح


دا حتى هانى شاكر
راحله يعزيه ...


 مبقاش فاضل غير شوية الثوار الغتيتة
اللى مش عاجبهم العجب 
وبيعتبروه زى البرادعى ما قال
إمتداد لمبارك 


مع إنه مش زيه و لا شبهه
 دا حتى زى حالاتنا
جايب ساعته م العتبة
بــ 15 جنيه و ربع


و نص شباب الثورة حاقد عليه
عشان كان نفسهم
 يسوقوا طيارات و معرفوش


والنص التانى متغاظ عشان
كان نفسهم يركبوا البتاعة دى
زى مبارك و يتفسحوا بيها و معرفوش


والكل منفنس عشان كان 
نفسهم يبقى عندهم بلوفــر زى كدا 
و .... معرفوش 


و بما إنه 
لسه ماشى على خطى المخلوع
و بيخبط ف البرادعى 


و بما إنه برضو 
لسه بيقول ع الريس انه كويس
بس ابنه كان هوه اللى محمود المليجى



يبقى الأصـــيل
أصــيل
و متغــــيروش الإيــــام 




والمسألة
مش حملة انتخابية و لا بتاع !!




إحنا خلاص نصفى نفسيتنا 
و ننسى اللى فات و راح  
و نبدأ من جديد 


 الناس اللى ف المطار بتحبه 
و المجلس و العسكر بيحبه
و امريكا واسرائيل بتحبه 
والأجانب والعرب بتحبه
و الناس العليوى بتحبه 
و الغلابة كمان بتحبه



و الفلول بتحبه موووت
و منتظرينه على أحر م الجمر 
عشان يرجعوا يخدموا الوطشن الغالى  


فيا ثــوار مصــر ....  إنبطوا 
إذ إنه لو فاز الفريق ف الرياسة
هناخد الدورى


و هنغرق 
ف تلال من البومبونى 


و هنتحاوط  بجبال البسكويت 


و هيفسحونا بالعبيط  
و إحتمال كبير بدل شحططة الأتوبيسات
يركبونا طيارات بدالها


و بطلوا فقر 
احنا كنا خدنا ايه 
م الثورة غير القتل
 و الدهس و التعذيب و السحل
 و تعرية البنات و ضرب العيال الصغيرة 





و بخصوص هتاف




عيش 
حــــريــة
عدالة اجتماعية 








إحنا هنخليه
بسكوت بومبونى تذاكر مجانية




فو النبى على قلبكو
كفاية كلام عن القصاص
و حق اهالى الشهدا والمصابين 
و بلاش تقل الدم و العكننة كل صبح ومسا



 و ...
Stoooooooooop
كفاية كدا و انا كنت بهزر 






و النبى 
حد يقول لسيادته 
ان الهتاف ف الميادين
 كان و لا زال





و انتا يا سيدى جزء أصيل 
من هذا النظام 




و الجديد اللى حضرتك مسمعتوش 
ان فيه هتاف تانى بنفس القوة بيقول 
يسقط يسقط حكم العسكر 




واللى إنتا يا سيدى العزيز 
برضو 
جزء أصيل منه 



ولهـذا كل حملات التخويف 
بالمتطرفين من ناحية
و تكفير التيار الليبرالى المدنى
  والتناحر مع المتأسلمين من ناحية 



و التلويح بالمشير رئيساً 
من ناحية




و التشويح بإمكانية
 فلتان مبارك و عياله و رجالته
من العقاب من ناحية




و الإرعاب من تفريق الشعب 
لشعبين من ناحية




و الرعب كمان ان البلـــد
تبقى بلدين .... من ناحية  




وبالفقر 
والخراب من ناحية 




وتطليخ سمعة الثوار 
ورميهم بكل التهم والموبقات
من ناحية




و ذل أبدان كل أفراد الشعب
من ناحية 


و ارهابهم بوحشية 
و عنف العسكر 
من كل ناحية 


و زنق الناس ف كورنر 
عمال بيضيق يوم بيوم 



لحد ما ف النهاية تختارك ريس
عشان تخلص من قرف العسكر 
و تشدد المتأسلمين 
و تطاحن السياسين و هيبرة الثوار .... !!!
كل هذه المحاولات 
مش هتخيل علينا 




لو عايز تجيلنا مدنى 
مش هينفع
ولو عايز تجيلنا عسكرى 
برضو مش هينفع



ولو كنست علينا
السيدة و الحسين 


التكية دى اللى تبـــدو 
إن ملهاش صاحب
وارد يلغوص فيها الصهاينة و الامريكان
 و بعض الأنظمة العربية و الغربية
و الفلول و المتأسلمين و الخونة 
والعملاء و الأغبياء
و أى كلب معـــدى 
 

لكن


وسط كـــل دول 
فيه طرف ... 
بس مش تالت 


دا الطرف الأول
ف العقد ... و هوه الشعب 



الشعب اللى أنقذ مصر من براثن مبارك 
و اللى إنتا عاوزه ييجى كدا بسلاسة
يقعدك مطرحه ف كوشة الحكم
 و يجوزك العروسة ف فرح و هوليلة 



تبدأ بفقرة 
رقص أمناء الشرطة بالسيوف



و تبخير المواطنين
بقنابل الغاز


ثم ... التحطيب 


وصولاً إلى فقرة 
نجم سيرك الداخلية 
ف النشان


و بدل البدرة وورق الورد 
يرشوا علينا المية الطاهرة


مع دى جى يرقصنا 
على نغمات المارشات العسكرية


و إنتهاءاً بتقدم الرقاصة
 الموكب 
عشان تزف العروسة ع العريس


و تتحول مصر إلى بومبوناية كبيرة
تدوب 
ف بق العسكر



طب نداء هام 
بعيداً 
عن البومبونى و الفندام 




نرجو من السادة البهوات
أن يعيدوا كل الحسابات



عشان البومبوناية دى 
فيها سم قاتل 
و صحيح ممكن تدوب
و تتقرقش
و تتبلع 



بس ممكن كمان
تقف ف الزور 


و يبدو إن فكرة الثورة 
عند بعض الناس
 موصلتش لسه



بس عقبال ما تيجى بالسلامة
نهتف 
و نسمعهم ......



والثورة باقية 
طول ما الثوار عايشين 
وشايلين يافطة مشروع شهيد




و أخدلى ركن أنا و أبدأ 
وصلة الدعاء على كل فرعون 
بيستخف بقومه ....




و ع البلوفر الأسود
اللى كل ما أقول هيغــور





معرفش ليه بيرجع تــانى ؟!!!




طب
 رجوع برجوع بقى 






الثوار راجعين 
يوم 
خمسة عشرين
 


و 
...................



-----------------------------------
--------------------------------------------
---------------------------------------------
طرد أهالى امبابة لأحمد شفيق بالفيديو
أن تقتل ضميرك .. محمد فتحى 
أول فيديو لطرد شفيق من امبابة
مئات من أهالى امبابة يحتجون على مؤتمر شف
لجنة الدفاع عن الثور بأمبابة تتوعد شفيق بزفة

------------------------------------------

الصور منقولة من تويتر و مواقع النت 
و من عند منونا 
و بعض الجرائد الإلكترونية 
و رسوم الكاريكاتير 
من الصفحات الرسمية
ل ... شريف عرفة
و على فرزات 
و عمر عبداللات
وأخيراً .... من موقع "ثُـــر"


-----------------------------------------------

This entry was posted on الثلاثاء, يناير 03, 2012 and is filed under . You can leave a response and follow any responses to this entry through the .

33 كــــلام بيطــبطـــب عـــلى قــــلبى و روحــــى

فاتيما
روح القلب الملائكية

على قد مكرك يا تعلب فروتك غالية
و على قد طيبتك يا خروف دايماضحية
ترقص مع الاسد و الفيل و الصحبجية
و تدوس على الغلبان طالما هفية

و لو اتزنقت مرة شكلك كده بيموت
ترتاح و تختفى و تعشش فى بطن الحوت
و ترجع لما تتمكن تدينا بالشلوت
تكتم نفسنا عشان ما تسمع صوت

فاكرها غابة يا تعلب هى بقت غابة
فيها الحمل الوديع و فيها الديابة
لكن احذر يوم تتفاجىءبصحيان الغلابة

فاتيما ابقى شيلى ليا نصيبى فى الفندام عشان البسكويت و البونبونى و الشيكولاتة اتوزع فى العباسية و السيدة زينب

تحياتى

مساء الخير صديقتي العزيزة صاحبة حنية الدنيا و طيبتها التي تتجلي فقط بوجودك

حاولت ارد ع البوست اللي فات و فشلت و لاني لست من هواة السياسه احب اكتب انطباعي عن فضفضتك المعهوده بالصراحة و الوضوح
همه كلمتيني من التجارب نتذكر اجمل ما فيها ونتعلم من سقطاتها
فتمتعي عزيزتي باحاسيسك الجميله و لا تنظري لقسوة و مرارة سوف يطويها النسيان

كل سنه و انتي طيبه و ان شاء الله لن يضيع الله جزاء صبرك و نقائك و طيبة سريرتك
سوف تحتضنك السعادة و تخضع لك الافراح


تحياتي

ياه دانتي قلبك اسود اوي يا فاتيما ازاي تتكلمي كده على مؤسس نظرية الاكس والواي ودخول الزد السلك السياسي
بصي مادام مفيش اي اتهام صريح باثباتات ادانة موجه لشخص شفيق فده دليل على عجزنا احنا كثوار في اثبات ان شفيق متورط بالتالي من حقه يرشح نفسه , انا على فكرة مش مع البرادعي في جملة ان ترشح شفيق معناه ان النظام ماسقطش لأن ترشح شفيق معناه اكبر معناه انه مكنش في ثورة في مصر من الاصل
وانا عن نفسي شايف ان ترشحه بداية ثورة انا مع انه يترشح والشعب يسقطهزي ما اسقطوا غالبية الفلول وبعدين الترشح نفسه بيكشف اوراق مكنتش ظاهرة دايما ده لعب الانتخابات ويخلي اللي قصاده يدور وراه و ده كويس علشان نعرف نحاكمه
ثالثا بقى انا شايف ان الاصوات اللي هياخدها البيه هي اصوات اصلا مكنتش هتروح لحد من رموز الثورة وبالتالي ده كويس لأن الاصوات بتتفتت بينهم سواء شفيق وعمرو موسى او الاشاعة بتاعت عمر سليمان وتوفيق عكاشة و كل الاشكال الفلولية دي و ده في المصلحة العامة برضه
بصي للجانب المشرق يا فاتيما وهاتيلي شوية بونبوني

الله يفتح عليكي ياطمطومة ..وكل كلامك من الوزن التقيل اللي مالوش حل ..ربنا يجعل فيها من يصلح فيها ..تسلم ايديكي

يعنى كان لازم نضرب ؟؟؟؟؟؟؟

ما علينا

شفيق مجرد تمويه للعبة أكبر
العسكر مش اغبياء وما دام راميين لنا عضمة كبيرة نجرى وراها لازم ندور على الحتة البعيدة عن النظر اللى عايزين يعدوا منها الديناصور

تفاصيل الصورة فى أحيان كتير بتضيع الشكل والمعنى الكامل ليها

يسقط يسقط حكم العسكر
شفيق مين دا راخر
أصل ناقصين رزيته
بلا قرف
طب والله لما الثورة تنتصر لنحاسبه على كل جريمة إرتكبها من اول نهبه للقوات الجوية لوزارة الطيران المدني لرئاسة الوزراء لجرايم القتل في الجمل و غيرها

و دي بعض أهم الإتهامات إللي إتوجهت لشفيق
http://egyptioneng.blogspot.com/2011/02/25.html
الشعب يريد محاكمة البلوفر

فين بوست التوقعات يابطه ؟!!!
السياسه اخدتك مننا قوى :)

والله انا تعبت يافاتيما
كنت نفسي متبقاش سلمية
ادي النتيجة :(
الله المستعان علي مايصفون بقي

ابراهيم رزق
-----------

صباح الورد يا ابو العيال

ومن عنيا الفندام
انما البومبونى قُطعت سيرته من ساعة ما نطقها البلوفر ...
الثورة دى دشنت اسماء ومصطلحات وخلتها مشبوهة من كتر من شبعت تريقة ..!!

معتقوش حتى البومبونى
ربنا ينتقم م اللى كان السبب
وحدفه علينا بقى


كل الود ليك
وسلامى لسالينازة القمر

أحوال الهوى
----------

صباح الخير والسعادة عليك يا دكتور
وأرجوك بلاش الكلام الكبير دا
انا مش قده
ثم انى عارفة والله من غير ما تقول
ولا تنقى ف الكلمات ...
البوست اللى فات وانا بكتبه عارفة انه هيوجع اللى بيقراه بقلبه
وحضرتك م الناس دى
اللى بتقرى بقلبها وتحس بغيرها
ولو ممرتش بتجربة مماثلة

شكرا ع الطبطبات
وحمدلله ع السلامة
البلوجر نّور
:)

مصطفى سيف الدين
---------------

انا قلبى أسود ؟!!!!
طب انا ولاّ البلوفر اللى اسود ؟!!

:)

انا باصة طبعا للجانب المشرق
بس لو كنا عملنا ثورة عشان ف الآخر كل واحد ياخد بومبوناية ويروح ...
أنا ابلعها تقف ف زورى احسن

بس بينى وبينك كدا
انا وجعتنى شوية بين السطور جملة عجزنا كثوار دى يا استاذ مصطفى ...
عشان يا سيدى الفاضل احنا لسه مجبناش آخرنا يعنى
والثورة لسه مخلصتش
و التعلم من الخطأ وان كان ف الثورات ملكف جدا
بس برضو طالما هيتصحح ف الدور الجاى
يبقى مفيش مانع ...
والدور الجاى بقى
مش هنسيب العالم دى تفلت ان شاء الله
ما دام اللى إختشو ماتوا ...
وهما مش عايزين يختشوا

الناس دى لو منزاحتش من وش الثورة للأبد ...
الشعب هيزيحهم بمعرفته وبضمانات كافية اننا منسمعش حسهم ولا سيرتهم تانى و نترحم منهم ...

ان شاء الله

انا قولت اكتب بوست فرافيشى كدا
بموناسبة المرشحين الحلوين اللى طافحين الهنا كله علينا الايام دى ...

صباح الفل

zizi
----

وينور قلبك كمان وكمان يا ماما

:)

مبسوطة ان البوست عجبك
و دعواتك
انا كل ما انزل التحرير او يحصل اى حاجة أروح أقول لماما أدعى يا ماما للثورة والبلد انتى ساكتة ليه ؟!!!

صباح الورد على عيونك

الازهرى
------

مين دا اللى ينضرب ؟!!!

طب نظرا للمرحلة الدكيكة التى تمر بها ثورتنا المجيدة
انا هأونحى خلافاتنا الطائفية جانبا مش هرد عليك ....

وش مطلع لسانه


وبخصوص التمويه

انا هارشة انها بالونة
بس بالونة جايز متفرقعش ..
يعنى هوه قطعة شطرنج بتتحرك حسب الحاجة اليها و دلوقتى اللى فارق بس التوقيت ....
وما وراء الحركة دى

عموما احنا قاعدينلهم
واما نشوف
احنا ولاّ البلوفر واللى وراه


صباح الشقاوة والإجرام
:))

مهندس مصرى
----------


صباح الخير عليك يا محمد
أيوالنبى اهتف معايا
لحسن دول عندهم مشاكل رهيبة ف السمع
والإدارك ...

بص حتى ف اللينكات تحت هتلاقى مرشح جديد تبع المخابرات ...
وآل بيقولك يا سيدى ان الشعب يميل لإختيار رجل عسكرى لإدارة البلاد ...
دا على اساس انه عمل استفتا بين الشعب وعرف حكاية الميل والمزاج دى ...
كل الحركات دى لتهيئة الرأى العام لإستقبال رئيس عسكرى او ذو خلفية عسكرية او حتى شرابة خرج زى ما فيه اقاويل عن امكانية ترشيح زويل او حتى الغستفادة من خدماته لو فكروا قدام تحت الضغط يعملوا مجلس رئاسى مدنى عشان يسكتوا التحرير ...
هما عمالين يلمعوا ف وية ناس طوع وتحت مداسهم ...
واما نشوف بقى


انا زودت التدوينة بتاعتك ف القايمة بتاعتشى ...
ومنتحرمشى منك ...


صباح الورد عليك

عاشقة الرومانسية
----------------

صباح السكر المعقود يا عروسة البحور

ازيك يا قمرررررررر ؟

غالبا يا دودو
مفيش بوست توقعات السنة دى ...
مليش مزاج .... دا اولا
مفيش وقت .... دا ثانيا
ومفيش داعى ... دا ثالثا

ثم رابعا انا بقيت بتشائم
و يمكن السنة دى لما مكتبوش الأحوال تنصلح ....

:)


بس عموما عشان تبقى عارفة
برج القوس هتلاقيه هنا
http://3arab4day.com/vb/t36876.html

و غالبا كدا بقراية سريعة
السنة دى ان شاء الله
هتكون تتابع للى فاتت ...
تكلمى فيها اللى فات يعنى
خلى بالك من مذاكرتك ومن اللى حواليكى ومن نفسك ومن خطيبك يا بت
دا اول نفر ...
:)))

ربنا يفرحنا بيك
واشوفك بفستان الفرح ان شاء الله
السنة دى
:))

صباح الورد

دا أنتي أخدتي الجرع فومين ونشرته وايه من غير شطف كمان

بس مش دي المشكله

صورتين يهموني جدا

الأولي وهوا وسط المزز ولا مؤاخذا أحب أعرف عنوانهن

التانيه بئا الرقاصه الميري

برضو أحب اعرف عنوانها

وأهو ما يضرش العلم بالشيئ

نستنفع بحاجه في أم الثوره الجملي اللي مش عايزه تخلص ديهين

Haytham Alsayes
--------------

سلامتك م التعب يا صديقى
وانشالله هما نفر نفر

مينفعش تكون سلمية اصلا يا هيثم
الثورة حركة تمرد على الخطأ
والمخطأ لن يتركك تقصيه ويقف يتفرج
لازم هيبادرك بالعنف ويقضى عليك
فيشنقونا ونسكتلهم ؟
ولاّ نرد عليهم ؟!!

استنى لما ارغى معاك شوية
انتا حبيبى واخويا الصغنن
عارف فيه رواية صغننة كدا ليوسف ادريس اسمها العسكرى الاسود ...
اكيد بما انك راجل بتاع تاريخ تسمع عنه وعارفه وعارف حكايته ...
المهم
يوسف ادريس حاول يحط تشريح نفسى كدا لضحية من ضحايا هذا العسكرى الاسود
إسقاط دا على المجرم و ازاى دفع تمن الجريمة بتاعته دى بعدين
القصة بإختصار بتحكى عن دكتور زميل لرواى القصة (افترض انه يوسف ادريس طبعااا) وازاى ان شخصية هذا الطبيب الزميل اتغيرت تماما بعد خروجه من المعتقل و تحول لشخصية مشوهة ...
وازاى انهم سمعوا حواديت عن الكائن الخرافى اللى اسمه العسكرى الأسود دا وحواديته ف تعذيب الناس واهانتهم ومش بس انتهاك العرض ...
وتطور يوسف ادريس ف شرح النظرية ووصل لدرجة انا شخصيا بعتبرها عبقرية من ضمن عبقرياته الصراحة ...

قال ايه بقى ؟

قالك يا سيدى ان البنى آدم لما بينضرب من أى حد ...
دى متعتبرش أهانة
ليه ؟
عشان هوه بعدها بثوانى بينتبه ويتماسك ويرد الضربة للى قصاده
ولما الخناقة او الصراع يخلص
أى كان المنتصر او المهزوم
البنى آدم بيبقى عنده جزء من الرضا عن نفسه
انه قاوم ...
كان حر
وهو دا معنى الحرية الحقيقى
انما اللى ف المعتقل دا واللى عانى من تعذيب العسكرى الاسود مأساته الحقيقة انه تحول لعبد ...
كان بينضرب وميقدرش يرد الضربة لللى بيضربه ...
ولهذا انتفت الحرية
لأنه معرفش ياخد حقه
وان كانت النتيجة ايه ...

الثورة كدا
والثوار كدا
ولهذا كانوا كل ما حد فيهم يقع او ينضرب يرجع تانى يكمل غيره
او يتعالج ويرجع
او يقف ويتبت ف مكانه اى كان اللى بيواجهه ...
لأنه حر
وحاسس انه لو وقف ساكت هيبقى عبد


الثورة كدا
ومتنفعش تكون سلمية
ما دام عدوك بدأ بالعنف
لازم تردله الضربة ولا تكون عبد
وتنكسر زى بطل الرواية ما أنكسر ...


انا كنت عاوزة اكملك باقى الرواية
واللى حصل فيها
بس كدا هرغى كتير

حاول تقراها لما تخلص مذاكرة
هتعجبك ...
يوسف ادريس بجد من أعظم ادباء مصر
و عنده براعة وذكاء ف ربط الاحداث وتحليلها وربطها بالعلم و التجارب ... حاجة كدا تخلينا نتفشخر


يلا كفاية رغى

صباح الفل عليك

مصرى جدا
--------

ههههههه
صباح الفل يا هانى
:)))

انا برضو عجبتنى الرقاصة الكاكى دى قوى
ولما شفت الصورة فطست على روحى م الضحك
ودعيت للى عملها ُيضحك الله سنه ...


وبعدين مش دا اللى حاصل ؟!!
هما مش فعلا
بيقتلوا القتيل
ويرقصوا ف جنازته ؟!!


صباحك هنا ان شاء الله

أنا شكلي بقى وحش اوي بعد كمية البسكوت اللي اقترنت بهاذوها البني بونبون
شكلي كدة لازم اشوفلي اسم جديد
:)

Baskouta
--------

لأ طبعا
متغيريش اسمك ابدا
لأنه لايق عليكى


هوه وامثاله اللى مش لايق عليهم
يعملوا فيها ولاد الناس
اللى بيدورا على مصلحة البلد
وعاوزين يحكموها
وينسونا الدم اللى ملطخ ايدهم
وبيشر منها ...

واذا كان البومبونى انظلم ف الثورة
فلا يمكن نسمح للبسكوت يلقى نفس المصير بتاتااااااااااااااا


انا مبسوطة قوى
قوى قوى قوى
ومش هقول عشان علقتى عندى
بعد غياب ...
عشان القلة المندسة من الغجر بتوع البلوجر اللى عينهم وحشة وبيحسدوا ويقروا ..
هه

:)

صباح البسكوت البمبى
المحشو بكريمة الفراولة

فاتيما
بوست رائع كالعاده
وعجبتنى الرقاصه برضه
هههههههههههههه
ونفسى مره تزورى مدونتى شكلك بخيله
يعنى بعد كل الزيارات دى ولا انتى هنا اخص عليكى :)

الاول بس يا طمطومة قبل ما اكتب التعليق عايزة اقولك ان وانا بدوس على اللينك علشان ابعتلك التعليق عنيا ضربت على اخر سطر ليكي فى التعليقات
ولقيتك كاتبة الجملة دى

"صباح البسكوت البمبي المحشو بكريمة الفراولة"

فريقي جري وقلت اقولك لو لقيتى البسكوت اللى بتتكلمى عنه ده ابقى هاتيلي منه لما نشوف ايه الحكاية دي



ثانيا ازيك .. واحشاني والله يا طمطومة

ثالثا ... انا مش هاعلق على البوست طبعا
لان معنديش تعليق يضيف لكلامك
وفيتى وكفيتى زي ما بيقولوا

رابعا .... انتى بقالك فترة كدة لما بتنشرى صورة بتقولى على مصدرها

فموقفك ده بيحرجنى وبيحسسنى انى لازم اقول انا كمان الصور اللي بحطها مع البوستات بجيبها منين

بس انا بصراحة بجيبها من الاخ جوجل

فمش عارفة اجيب ارار الصور اوى

ولم اكن اهتم ابدا بإنى اذكر مصدر الصور

فهل ده عادى ولا انا كدة شكلى وحش وباين عليا انى بلطش الصور من جوجل من غير ما اقول على المصدر

ولا إيه بالظبط ؟

بصراحة يعنى موقفك من الصور اللى بتحطيها عندك
بيحرجنى مع الصور اللي بحطها عندى

فانا مش عارفة هو انا لازم اقول فعلا انا جايبة الصور منين ولا عادى

انا مش عايزة اكون قليلة الذوق
وعايزة ادى لكل ذى حق حقه

حتى لو صاحب الحق ده الاخ جوجل بذات نفسه

فياريت ترسينى على الليلة
علشان احنا بنتعلم الذوق منك يا طمطومة


بس خلاص
ارجو انى مكونش طولت عليكي

خدي بالك من نفسك ياحبيبتي
واشوفك ان شاء الله يوم 25 فى الميدان
ان مكنش قبلها كمان


سلام

اختك خيخة .. خوخة

صباح الشيكولاته والبسكوت والبمبونى على عيونك يا فاتيما
معلش سرقت منك بونبونايه وحطيتها فى المدونه ..واحلف بالله العظيم واقسم اننى لم اكن اقصد ان يقترن مضمون البموبونى فى مدونتى باى شىء يخص المدعو بشفيق يا راجل
بجد كوميديا سوداء ومهببه ومنيله عليه بقى شفيق بعد ما اتمسح بالبلوقر بتاعه شارع التحرير كله ناوى يرشح نفسه طيب اضحك ولا اشد فى شعورى ولا اقول بلد العجايب
اااااه يابلد .عايزه ولد ..اه يا بلد .ضاع فيها القريب مع الغريب .ضاع فيها .الكريم مع اللئيم ..ضاعت فيها العفه مع الوضاعه
تبقى مصيبه بجد لوحد رشحه ..يبقى عمل ارتشاخ فى نفوخنا
بوست شامل جامع للاخ شفيق ..من قدمه الى راسه ..من بلوفره الى ملبسته
تحياتى لكى ايتها الوطنيه الجميله
اختك الفقيره الى الله هبه

bombona
-------

ازيك يا بومبونا
الرقاصة دى عاملة جو اهو
وسوقها ماشى
انا اول ما شوفت الصورة برضو
شدت انتباهى وعجبتنى فكرتها
وتنفيذها ..
:)

وبعدين مين قالك انى مبزورش مدونتك ؟!!
هوه انا مبعلقش لحد دلوقتى
لكن دا مش معناه انى مبروحش
وبالمناسبة بحب القالب بتاعها جداااا
و حساه رومنسى كدا ومريح للعين

التعليق عاوزة وقت وروقان وتركيز
و ان شاء الله هتلاقينى بعلق ف أقرب فرصة
بس أروق شوية ...
ومتزعليش وكدا

و بما انى مقفصرة
فأخص عليا خالث مالص
ومعنديش مانع بالمرة
:))))

بت خيخة وأى كلام
---------------

أيوووووووون كدا
انا بحب بت خيخة اكترررررررر

اولا
لو لقيت بسكوت كدا
هقولك علطول
او هشتريلك باكو
بس غالبااااااااااا
النوع دا موجود هنا
http://pinkysequins.blogspot.com
وبس



ثانيا
انتى كمان وحشتينى ى ى


ثالثا
مبسوطة ان البوست نال إعجابك
ودى مش شوية


رابعا
فيما يختص بموضوع الصور
متخديهوش بحشاسية كدا
انا بس كل ما ف الامر ان فيه صور متاخدة من التويتر واصحابها بيبقوا اما عاملينها او تعبانين ف التدوير عليها او مصورينها بكاميراتهم الخاصة ..
فبالتالى حسيت ان عليا التزام انى اشير انى مجبتهموش م النت عادى كدا
لأ
دول جايين من مصادر محددة
خصوصا ان رسوم الكاريكتير عليها اسماء الفنانين بس فيه حاجات تانية .. لأ
وفيها مواقع مشهورة
وفيه مواقع لأ
زى موقع ثُر دا هايل ...
ومكنش ينفع بتجميعة الصور اللى خدتها منه مكتبش اسمه ...
فيه حاجات كتير بس مكنش فيه مكان كفاية اكتب المصادر كلها ...

بخصوص الغحراج بقى
انتى مش مضطرة للغحراج خالص
كل ما هنالك ان بوستات الخطاريف او البوست دا مثلا معتمد بشكل اساسى على الصور كعامل موازى للكتابة ويمكن اهم ...
فبالتالى ذكرت بعض المصادر

اما التدوبنات العادية
فصورها بتبقى قليلة و بجيبها من النت والبحث ف جوجل اللى كل الناس تقدر تعمله ومحدش تعبان فيه قوى يعنى ...

بس كدا

طبعا لو عاوزة تشيرى لمصدر أى صورة انتى هنحطيها يبقى هايل ..
ودا اسمه توثيق ف مجال المكتبات
واكيد ف عالم الصحافة كمان عندكو
توثيق الخبر والإشارة لمصدره وكدا
بس احنا ف التدوين مش رسميين قوى قوى
فبراحتك ...

وطولى يا ست انتى بتيجى كل يوم ؟!!!

بوسات وحضونات
يا خوختىىىىىى

هبة فاروق
---------

صباح ومساء الحلويات يا هوبة

يا ستى البوبمونى كله تحت امرك
ع الاقل هتوزعيه بالعدل
مش هتديه لقناصة يوقفوا بيه على أسطح المجمع والفنادق والعمارات يصطادوا بيها الثوار ...


موضوع ترشيح أحمد شفيق دا
لا يصلح التعليق عليه تلخيصاً
الا جملة واحدة ...

اللى إختشوا ....

ونقطة وخلص السطر
بس انا حبيت أرغى وادوشكوا شوية
عموما
ربنا كبير
والثوار جدعان
والأيام بيننا
وبكرة يتحاسب ان شاء الله على دم الولاد اللى هما اطهر ما ف مصر
ولا خير فينا لو مخدناش حقهم تالت ومتلت ان شاء الله


تحياتى ليكى ولكارولينا ولبابا الغالى

اختى العزيزة فاتيما
حابب اعزمك على حفلة توقيع مجموعتى القصصية الأولى (ذكريات للبيع) يوم 14/1/2012 الساعة6م فى استوديو أرابيسك 2 ممر بهلر من شارع قصر النيل وسط البلد - الدور الرابعز
وآسف لو التعليق مالوش علاقة ببلوفر شفيق، إلهى يارب يضيع منه البلوفر ومايعرفش ينزل من البيت :)

فاتيما
روح قلب الملائكة

لازم تجيبى سيرة شفيق
اهو نسى ياخد معاه البونبون و البسكويت امبابة قاموا ضربوه بالشباشب خسارة مكنتش موجود
كان عندى شبشب قديم كان سيتاهلوا

تحياتى يا ام جو

أحلى حاجة فى البوست على فكرة...............................كريمة المجتمع

قلب مصرى (محمد فاروق)
--------------------

الف مليون مبروك يا محمد

ربنا يتملك كل مشاريعك على خير

ان شاء الله احاول آجى
ومفوتش المناسبة الحلوة دى
ما لم يحدث شىء قهرى
هتلاقينى من اول الحاضرين
ان شاء الله

والف مليون مبروك

:)

ابراهيم رزق
-----------


ازيك يا ابو العيال

والله امبابة طول عمرها رجالة
وكل الاحياء الشعبية بصراحة ....


ربنا يخلصنا م البلوفر على خير


تحياتى انا يا فندم
وسالينازة وحشتنى والله قوى
سلملى عليها

أبو حميد
-------

التعليق دا عدى من تحت الروقابة ازاى ؟!!

لأ
كدا مينفعش

لازم ننده الموادم تقراه
وتعقب عليه بما ترضاه

وانا معاها ف اللى هتعمله


وبعدين دول كريمة بودرة
صناعى و أى كلام


عموماااااا
الملحوظة دى
لازم تروح لأم العيال
وبعدين تبقى تقولى التأمين الصحى بتاعك
تبع انهى مستشفى ...
عشان نجيب ورد وبمبونى ونيجى نزورك
ف عنبر الكسور ...

هع هع هع ....
ضحكة شوريرة جداااااا
وحاجب محمودى المليجى بيرتفع ...

:)

إرسال تعليق