.

.

طــــابـع بـوســـتة  

Posted by: فاتيما in






قــول بصراحــة  
إنتا شـايفها
طــابـع نــادر
 غالى و مش ناوى
  يـوم تفـّرط فيـه  
و لاّ شايفها 
طــابع برضــو
بس بيلزق
كل ما بتتف عليه ؟!



This entry was posted on الثلاثاء, يناير 17, 2012 and is filed under . You can leave a response and follow any responses to this entry through the .

42 كــــلام بيطــبطـــب عـــلى قــــلبى و روحــــى

معلش عشان التشبيه مقرف شوية

بس خبطنى الوصف
على تويتر
من أحد الرجال الشرفاء
وهوه بيتكلم مع لفيف من الغجر
عن بنت كانت بتحبه
والمفترض وبين قوسين إنه كان
"بيحبها"
ووصفها هذا الوصف المهذب جدا


بس كدا

:)

هههههههههههههههههه
مش قادره امسك نفسى ..اللى كاتبه بجد ولد لانه تشبيه فى محله ومهذب جداا
وخصوصا انها مش فارقه معاه فيقول كل اللى فى نفسه بقى
تحياتى يا عسل

مليم!!!!!!!!!

بس؟؟؟؟؟؟؟؟؟؟؟؟؟

الطابع دا أقله بتاع بشلن بحاله

وبمناسبة القرف بقرف بئا

طب ماهي البوسه أساسا ما هي الا تبادل تفافه بين المحبين


يعععععععععععععععع

حاجه مؤرفه جدا


وفي تعليق متصل منفصل

رجبتي ....دا بفرض ما كنتش في ذات نفسية المدرعه أو ما أتظبطتش برصاصه حلوه كدا

أه
هو التشبيه خبطك؟
طب متخليهوش يخبطك تاني
علشان اللي قاله بس راجل اهبل بن هابلة فقاله علانية
لكن بيتقال في الأمثال كتير
وزي ما قلت لك اهبل ابن هابلة ده من ناحية
ومن ناحية تانية فعلا المرض النفسي متمكن من الناس في بلادنا العربية
رجالة متستغناش ويتمنعن وهن العايزون
وبنات تافهة .. تتمن اللي ملوش تمن

ده التعليق العام اللي ملوش دعوة خالص بطابع البوستة

طابع البوستة غالي عندي لدرجة تمنعني من التعليق على الكلام الموضوع بجواره

خدي بوسة وحضن افتراضي وطبطبة مع انك مفترية
ايوة انا من الناس اللي عارفة وموقنة انك مش غلبانة ومسكينة خالص
بل فاتيما جرحتها الأيام فطعمتها بطعم المانجة
خارجها حلو وطري زي الزبدة
وجواها بذرة جامدة كبيرة تديك روسية تدخلك الأستوبليات

فاتيما
روح القلب الملائكية

انا مع الدكتورة ستيتة
دى تشبهات مريضة من اشخاص مريضين
مثل السيجارة بعد ما تبوسها تدوس عليها و غيرها كثير جدا من الامثال العنصرية على المراة و الرجل ايضا لو عايزة بوست كامل اكتبه ليكى
مسألتيش احنا شايفينه ايه
شايفين ملاك بيرفرف كل اللى يتعامل معاه يسلم له بأنه ملاك فى زمن كثرت به الشياطين
شايفين زجاجة عطر معتقة تفرح باجمل الروائح كلما اقتربت منها فى زمن كثرت فيه الروائح العفنة
شايفين لوحة اصيلة تبعث السعادة فى كل من يشاهدها فى زمن كثرت فيه الاشياء الفالصو
شايفين الجمال الحقيقى فى زمن كثرت فيه الاشياء القبيحة
سيبك انتتى انتى عاملة ايه يا ام جو

هو ليه انا شايف الموضوع بنظرة تانية اول ما قرأته بصرف النظر عن التشبية انه رساله موجهه

زى اللى بيدور على قطعة ارابيسك فى خشب مودرن

المرة دي لازم الكومنت يكون اون بابليك و علي الهوا
انا مع د. ستيتة الراجل اصلا اللي يقول كده يبقي نطع و مش نافع ابدا الكلام ده يتحط علي الطابع اللي جنبه علشان الطابع ده غاااااااااااااااااالي اووووووووووي
و مساءك هنا يا رب

هبة فاروق
---------

بتضحكى يا هبة ؟!!!
ماشى ماشى ....
عندك حق

بس انا اول مرة قريت التشبيه دا
انصدمت بجد
اصل كنت فاكرة الواد دا مجدع
و لسانه طويل حبتين ..عادى
بس تبقى دى طريقته ف الكلام دعن واحدة المفروض كانت حبيبته يعنى
مش واحدة أى كلام ... !!!

وحكاية مش فارقة معاه دى روخروا
بتوجعنى قوى

كل حد المفروض يفرق مع حد
ولو مفضلش معاه

واحترامى لغيرى
جزء منه فيه احترامى لنفسى
العيال دى مالها
اخلاقياتها معكوسة ومشقلبة كدا ؟!!!


عموما
ربنا واضح انه بيوقعه
ف اللى شبهه
وبيوجعه


تحياتى انا اكتر يا حبيبتى

مصرى جدا
--------

ازيك يا هانى

ايوه حضرتك مليم بس
دنا جايباه من طابع بريد
عليه صورة الملك فؤاد والنبى
وكنت هشيله واحط صورتى
وبعدين قولت لأ عيب
اعملى طابع جديد احسن ..
هوه انا قليلة ؟!!!


مش هعلق على موضوع البوسة دا
غير بإنى اطلب منك تتخيل نظرة مزبهلة على وشى و عيون بتعاتبك وبتقولك ..
دا كلام ينكتب برضو ...!!!
:)

اما التعليق المتصل المنفصل
فبعد الشر عليك يا جدع
وعموما اللى لسه فيه النفس يبقى يلحق التانى
:)))

استفزتينى انى ارد ودا صعب

بصى
كل حاجه ليها وجهان وانت فاهمه دا اكتر منى

اللى عايز يشوفه نادر بل شديد الندرة هو حر

واللى بتتتتتتتتتتتت امه لامؤخزة عايز يشوفه كل مايتف يلزق بردو هو حر

العيب عمرة مكان فى الطابع العيب فى عقل اللى معه الطابع مش معنى اننا بنحط ناس فى امكان مش بتاعتهم اننا غلط لاننا توسمنا فيهم رجاحه العقل وصدق النيه

مش عايزه اقولك وحشانى بهبل وجنون وعبط لانك فعلا معايا وبتابع من بعيد كويس

عايزه اطمنك الدنيا كتير بقت بيييييييس
خلى بالك منك اوى دعواتى ليكى مش بتقف شلال منهمر

كامل حضوناتى وفعوصاتى
اوووووووووووووووووووووووووووووووووووووووووووووووووووووى

ستيتة حسب الله الحمش
-----------------


يا بهوتينى احنا زارنا النبى
ستوتة قلبى عندنا
يا مرحبا يا مرحبا
انا هكتب على كدا كل ساعة بوست
:)

ايوه اتخبطت يا ستوتى
الرجالة جرالها ايه ؟!!
فين الشياكة والأخلاق ؟
فين الجنتلة ؟
فين حتى الكياسة ومحاولة الحفاظ على شكله قصاد اللى بيقراله ... ؟؟!!!

عموما تويتر فرجنى على مهازل
ومرة الواد الجميل فاروق عادل
قال عليه فيما معناه انه وراه تجميعة من الأمراض النفسية ف البشر عمرها ما شافها قبل كدا ف حتة واحدة ...
وهذه حقيقة
فكرة الكتابة بسرعة والرد بسرعة
والخطأ اللى بينتج عن عدم التفكير قبل ما يرزع الكلمة ...
و الخلاف اللى بقى
اكتر من الإتفاق ..

لولا انه وكالة انباء واقعية بتعرفنى الحاصل اول بأول دون رقابة ...
كنت بطلت اتابعه خالص

انما ادانى فكرة بوست اهو
وكتبتها


حلو تشبيه المانجة دى قوى
يا خراااااشى عليكو
لما بتدلعونى
ربنا ما يحرمنى منك
يا ست السوتيتات كلهن والله

وبعدهااااااالك يابطه ؟؟؟


بعيدا عن البوست بقى
انا ميته من الضحك على تعليق بابا هانى هههههههههههههههههههه فظيييييييييييع

ابراهيم رزق
-----------


ازيك يا ابو سالى
ايه دا كله
مالكو يا عيال
عمالين تدونى ف كورس رفع معنويات كدا زى ما اكون المقصودة بالتشبيه دا ...!!

مش أنا مش أنا
:)

بس احقاقاً للحق
اول ما قريت التشبيه والمحادثة الناتجة عنه فكرت علطول ...
يا ترى لو انا طابع بوستة
الإنسان اللى بيحبنى هيشوفنى ازاى ؟!!!

وأى راجل عموما
بيشوف حبيبته ازاى
او الإنسانة اللى معاه ازاى أى كان تصنيفها ...

لما تعب نفسه كدا وشبهها بطابع ...
ليه ميكونش بمعناه الحلو
الشيك
القيم والغالى ....

حبيت احط الإتنين جنب بعض
واشوف ...

انا كويسة وبخير يا ابراهيم
والف حمد وشكر

الطائر الحزين
------------

لأ يا ايهاب
وحياة يوسف ما فيه أى رسايل
متوجهة لحد ....

بص عشان ابقى صادقة
ممكن اكون بوجهه لنفسى
او بتكلم عن نفسى ...
يعنى بفكر انا لو طابع بوستة
هتشاف ازاى من اللى بيحبنى

هيبقى عاوز يقتنينى
ولا هبقى ف نظره مجرد طابع بيلزق
وبس ..

مفيش حاجة والنبى
ولا اقصدشى
استفزنى التشبيه
فرديت عليه من الجهة المقابلة

:)

سيبك من المرضى المهوسين بجنون السلطة و عقدة النقص
معتقدش ان اي انسان سوي يفكر بالطريقة دي
ومعتقدش ان في امرأة سوية تقبل على نفسها الوضع ده
اوكيه الحب جميل و حلو و زي الفل بس حب بلا كرامة هو عبودية
زمان وصفت الحب اللي زي ده في خاطرة قلت فيها ان الحب بيبدا بأنه يكون نور بعدها يتحول لنار و في النهاية بتدخل مرحلة النير
بيبدا نور بالاحساس الجميل بعدين يتحول نار من كثرة الاشواق والادمان اما نير العبودية ده التطور الطبيعي لحب بلا كرامة
الحب عند البعض مجرد خيوط تتحكم في القلب كأنه دمية و الخيوط متبادلة بين الاتنين بس علاقة عدد الخيوط اللي ماسكها بايدك تتناسب عكسيا مع مدى حبك علشان كده المعشوق بيتحكم في العاشق وبيبدأ بقى يفرد سيطرته عليه بمنتهى السادية
فاتيما (اهوه من غير استاذة) المكتوب في البوست هو الحديث عن الحب السادي فهل يمكن ان يقبل عاقلا علاقة سادية في الحب؟
بالتأكيد هي طابع نادر بالرغم من هشاشتها و من صعوبة الاحتفاظ بها على حالتها الاصلية حتى لا تلوثها الطروف الخارجية فهو بالتأكيد يفعل المستحيل حتى لا يصل اليها من يعيق نقائها
تحياتي ليكي

ياااااااااااااااااااااع
تشبيه غبى جدا ومقرف ومستفز فى ذات الوقت
على فكره الرجاله هى اللى زى طابع البوسته كل ما بنتف عليه بيلزق مش الستات
الستات تاخد حنان تدى حنان ومش بتعرف تزود فى التقل لكن الرجاله دايما يفتكروا نفسهم حاجه بعد مالست تندلق عليهم

بس غريبة قوي
الصورة اللي علي ورقة البوستة فيها شبه منك يافاتيما
ايه الصدفة الغريبة دي :)))

Mona Abo - Elso3od
------------------

طب انا فرحانة جدااااا
انه المرة دى اون بابليك
عشان يبقى عندى توقيعك ف صفحة تعليقاتى
مرة كدا من نفسى
:)

وبخصوص كلام سوتيتة
دى ست الستات كلهن ومقدرش اقول ربع كلمة بعدها ..
انا فقط ازبهليت وانفعلت فكتبت البوست

بخصوص الصورة
اصلى تخيلت نفسى على طابع بوستة
وقولت يا ترى هيبقى شكلى ايه ؟
وتخيلت كمان الإحساسين
احساس انى ابقى طابع غالى
او طابع .. بيلزق
:)

مساء الهنا والرضا والجمال والحلاوة والسعادة والطعامة والشكولاتة والورد وكل حاجة حلوة على عيونك يا مونى

:-)))
بوسيلى على وسلمى
واحضنيلى روحك

richardCatheart
----------------


يا خراااااشى
قطاقيطو عندنا
لأ بتهرجوا يا بنات

لأ دنا اكتب بوست كدا
كل يوم بجد

والنبى على قلبك ما تزعلى
ولا تشيلى ف نفسك
انتى فعلا قولتى اللى نط ف ذهنى فجأة
بعد ما قريت التويتاية دى ...

زاوية الرؤية
الواحد ممكن يشوف الحاجة
بشكل صارخ جداااااا كدا ازاى ؟
يعنى اطابع البوستة الغلبان دا اللى محدش بيركز معاه قوى
ممكن فجأة يبقى نادر وغالى و محدش يلاقيه ابداااا ولو لقاه يبقى كنز يورثه لولاده وكدا ...
بينما ممكن عند حد تانى مجرد حتة ورقة ملهاش لازمة ولا قيمة ...
بس الوصف هنا كان فيه احتقار شديد مش بس للمرأة ...
لكن للأنسان عموما
وللحب الشديد كمان
والأكثر ايلاما بقى فوق كل دا
ووجعنى انا شخصياً
البجاحة ف اظهار الإحتقار دا
واظهاره علانية كدا ولا كأنه بيهين مشاعر واحدة المفروض بتدور عليه ولسه بتحبه وعنده امل فيه ...
على رأى الست فيروز


عارفة ظ
ساعات يبقى للحاجة كذا وجه
كله يشوفه من ناحية

المرة دى التشبيه دا
مكنلوش عندى غير الوجهين دول
و.... فقطططططط


عارفة انك بتدعيلى
وعارفة انك أحسن شوية عن الاول
بس مش قوى برضو زى ما بنتمنى
وعارفة كل اللى عاوزة تقوليه
من غير قوالة وحياة عيونك الحلوة
اللى جايبالنا الكلام دى ...
:))))

بوسات وحضونات وفعصات
ومحبات من هنا لآخر بحركو يا قلب القطة

عاشقة الرومانسية
-----------------

وبعدهالى بس يا عروسة بحورى ؟!!
والنبى ما عملت حاجة يا دودو
دا التدوينة هيا اللى حبكت

وطبعا كلام هانى عجبك
من يشهد للعريس
:)

مصطفى سيف الدين
---------------


ازيك يا مصطفى
(اهو من غير أستاذ)
:)

بص بقى
لما قريت التويتاية دى
قفز ف ذهنى المعنى بشقيه
الغالى والرخيص

بس قفز ف ذهنى كمان فكرة انه
يا ترى هيا بتدور عليه ليه إلا اذا كانت لسه بتحبه وعندها أمل ان الحكاية تستمر ...
بينما هوه ف نفس اللحظة خلاص طلعها برا حساباته وزهق وقرف وكماااان بيقول عليها تشبيه زى كدا ...

اتوجعت عشانها
بس فكرت انى ممكن اكون بحكم عليه
من المكتوب فقط
وممكن جدا تكون هيا وصلته للنقطة دى بتصرف ما او فعل ما بشع ...

بس رجعت تانى فكرت
مهما عملت يعنى
هوه اخلاق البنى آدم بتظهر امتى
او بمعنى أصح
امتى تعرف معدنه الحقيقى
وصلابته الا وقت الأزمة والقرف
ساعتها رد فعله وتحضره
هوه اللى هيبين اخلاقه الحقيقية ايه
وبالتالى
انا حكمت عليه
انه مش راجل
وانه عيل
وان الراجل بيكون راجل فعلا
لما يتعلم ازاى يتعامل مع الست
وكل ما كان حنون ومراعى ومتربى
كل ما يبقى راجل ..بجد

تحياتى ليك يا غالى

bombona
-------

ازيك يا بونون

لأ والنبى ما تاخدى البوست على أعصابك
وتنفعلى كدا ..
:)

لا الست طابع بوستة بيتلزق
ولا الراجل كمان يا حبيبتى

مفيش بنى آدم بيحب
وبيخلص ف حبه
يستاهل يتوصف كدا

ولو مبيحبش خالص حتى
محدش يستاهل يتهان كدا
ويتقال عليه الوصف دا لأنه لسه بيتمسك بحبيبه ومش عارف او قادر يسيبه ..

موضوع الدلقة دا راخر
من وجهة نظرى حاجة مرضية بحتة
ولما اقرى مقالة بتنصح الست انها متندلقش وتوفر مشاعرها وتديها بإنتظام ..الخ الخ
بقول ايه العبط دا ؟!!

ممكن يكون صح تطبيقيا على فكرة
(انا مجربتش الصراحة)
بس حب ايه اللى يبقى بالقلم والمسطرة والحسابات و هات وخد وقد بعض والأفلام دى ؟!!!

فطرة الراجل والست انهم اتخلقوا لبعض ونس ...
يكملوا نقص بعض
وبيقى بينهم المودة والرحمة

ازاى الرحمة تبقى بالتنقيط ؟
وازاى المودة تبقى بالميزان ؟
وازاى الواحد يتعامل ف بيته وسكنه بحساب و بغربة ... !!!

نورتينى يا حبيبتى
وروقى انا بدون مش بعكنن عليكو

البوست دا استفزازى ليه كدا ؟!!!

Manamino
--------

اهلا يا سعادة البيه
صورة ايه اللى فيها شبه منى
ولا أعرفها البتة

الصورة دى جت منين
و مين دى صحيح .. ؟!!!!

:)))

طبعا بغض النظر عن الكلام عشان ده اكيد موجه لحد واحنا اكيد كومبارس ومش فاهمين حاجة زي اخر موضعيين ليكي ونظام الكلام ليكي ياجارة ......أحلى حاجة في الموضوع ده انا شفناك ...دي أنت حليوة بقي يامعلمى هههههه...بس انت جاوبتي على سؤالك يعني عاملة طابعك بمليم يعني حاجة غالية طبعا ونظام انتيكات وتحف ...

الطابع دا بيفكرنى بافليم القديم
بتاع شويكار لما خرجت تجيب ورقة بوسته ورجعت بعد 25 سنة ويا ريتها جابته معاها

بخصوص التفاح أنا كرهت معاه أحمد بهجت اللى مضيعنا ومضيع قفشاتنا معاه
زى أستاذنا الشيخ على جمعة برضه
فضلت أرازى فى خلق الله بالحديث الصحيح
إنهن نافصات عقل ودين
وبعد سنين طويلة لقيت اللى بتتصل وفرحانة مووووووووت
وحسيت إنها لقيت كنز القراصنة

فى إيه يا بنتى
واتضح إن المفتى الله يكرمه طلع فى برنامج وشرح الحديث وإنه تكريم للمرأة وليس إقلالا من شأنها وطبعا ما صدقت
ومن يومها مش عارف اقولها لهم تانى

منهم لله مشايخنا
مبهدلنا فى كل حته

Tarkieb
-------

ازيك يا فنان ؟

اولا
للمرة العاشرة
و حياة يوسف ابنى ...
الكلام مش موجه لحد بالمرة
دا ف المطلق والله
واقرى التعليقات
عشان تفهم قصدى


ثانيا
أيوه سعادتك
ما هو طابع داخل ع الأربعين
لازم يبقى تحفة و انتيكة
:)


ثالثاُ
الصورة دى
ليها غلاوة كبيرة عندى
اتصورتها
عشان خاطر عيون الراجل الوحيد
تقريبااللى خلانى ...
أحس ف يوم إنى طابع
غالى و نادر
محدش مفروض يلاقيه
ويفرط فيه ...

:)

رابعا بقى

مين دا اللى حليوةيا معلمى !!!
انتا آخر مرة
روحت كشفت نظر ...
كان امتى ؟!!!

الازهرى
------

ايه دا ؟!!!
الممفتى اللى شرحه ؟

طب ايه رأيك انى كنت عارفة التفسير بتاعها من اولى جامعة
يعنى سنة 90 يا باشا
مفتى ايه اللى انتا جاى تقول عليه

يا بنى لموا التعابين بقى
وخدولكم ساتر

اصلا اصلا انتا جاى تلعب ف منطقة مش بتاعتك خااااالص
اللى يتحجج بربنا ويجب احاديث او آيات ويفسرها انها بتفرق بين الراجل والست ...يبقى خسران بالثلث

ربنا بيساوى بين كل عباده
مبيفضلش حد عن حد
خلقنا سواسية
محدش افضل من حد
غير بالتقوى
وسبحانه هيحاسبنا على أعمالنا
مش على اللون او العرق او الجنس
ومينفعش ابدا يميز الراجل عن الست
او الست عن الراجل
ربنا اسمه العدل
بس خلاص كدا .. خلصت



وبكرة نقعد جنب الحيييييطة
ونسمع الزييييييطة

:)))

أنا عن نفسي، شايفاه أجمل طابع بوستة "الصورة" :)

سلامي لروحك

انا فهمت اللى بين السطور واللى وضحه ردك على التعليقات بعد كده
وعلشان كده قلت لك وبعدهالك يابطه

تعرفى ان فعلا اجمل ما فى البوست ده هو طابع البوسته ؟؟ :)
وتركيب عنده حق ابقى امسحى انتى مرايات بيتكو كويس

اه نسيت اقولك ان الطابع اللى فى البوست ده غاااااااااااااااااالى جدا ده كنز يابنتى

فاتيما
اهي اهي هيييييييييه
ازيك ياست الكل
ومع احترامي يعني
ايه اللي ناقلاه دة
وبعدين تويتر دة عالم خزعلبي بعيد عن الواقع واللي يعول عليه في استطلاع يروح في ستين داهية :)
بس سيبك انتي
الطابع حلو كدهو
:))
منورة والله يامامت يوسف

:)


تحياااااتي

الحقيقة ... انني انتابني شعور غريب حينما قرأت البوست ... فبعيدا عن هذا الطابع والتعليق عليه بكل ما فيه من انحطاط خلقي ودلالة علي عدم اتزان نفسي .... الا انني تذكرت قصة ( البوسطجي ) وانا اقرأ البوست .... فان كنت تذكري تفاصيلها ... بطلها سقط اخلاقيا وعمد الي الاطلاع علي اسرار الناس بحجة كابة الصعيد والملل الذي يعانيه ... ايضا البطلة راحت ضحية لسقطة منها كلفتها حياتها في النهاية ... تستر صديق البطل عليه في النهاية .... ولعل اتذكر جملة بالقصة ... ان كل الخطابات المغلقة متشابهة ... يتشابهان في ذلك المجهول القابع فيها ...ولكن حينما تفض المظاريف ... لا نجد قصة تشابه اخري ... او قلب يماثل قلب اخر .

فمن وجهة النظر العامة ... اري ان بطل هذا البوست ... رجل غير مهذب وهذا اقل ما يمكن ان يوصف به .... اما اذا ما تعمقنا في التفاصيل .... فمن يعلم ... من المخطئ في حق من ... فيبدو انه ايضا ... ليست كل الطوابع متشابهه .


اخيرا .... ارجو الا اكون ضيفا ثقيلا علي سكان المدونة ... واشكر لك سعة صدرك :)

تحياتي

هو طبعا عشان أقول شهاده عنكوعن صوره الطابع فهتكون شهاده
وواخده عشرين غزره
لاني اخوكي الصغير
بس ميمنعش ان
الصوره جاده جدا
وبخصوص التف والنف
فأنا دائما ما يخالجني سؤال هام
الا وهو
ليه اي مصري لما بيشوف واحد بيتف ف الشارع بيكون رد فعله التلقائي انه يتف ؟؟؟هل التف عدوه؟؟؟
أشوفك ف الميدان الجمعه ان شاء الله

لبنى أحمد نور
-----------

صباح الجمال والرقة يا لبنى


انتى تشوفى كل حاجة جميلة
عشان انتى أصلا جميلة يا لبنى
ومفردة بين الكائنات يا بنتى
:)

سلامى انا اكتر
والبوسات والحضونات كمان

عاشقة الرومانسية
----------------

:))))

منا عارفة انك فهمتى
وانا مجرمة وشقاوة
:))

وبطلوا معاكسات انتى وتركيب
لأجيبلكو بوليس المدونات
هه

انتى حبيبتى يا قطتى
صباح زى الفل عليكى
وعلى خطيبك يا بت ...
وقوليله فاتيما بتسلم عليك
وبتقولك
انك عندك انتا كمان طابع
غالى ونادر ومتلاقيهوش ف الزمن دا
ببساطة ...
حافظ عليه وشيله جوا قلبك
...

بس كدا

Haytham Alsayes
---------------

والنبى يا هيثومة اتخضيت واتخرعت
والله التويتر مليان ناس حلوة ومتحرمة كتيييير خصوصا المشتركين بينى وبينك ..

بس يؤسوفنى أقول
ان فيهم ناس شيزوفرنيا خاااالص
ودا عادى
كلنا هذا الشخص ال 2×1
والوسيط الألكترونى بيطلع اللى مبيطلعش ف الحياة اليومية ماشى

بس لما يبقى فوق دا بقى
ان الواحد فيهم تلاقيه متصور
انه كل ما يبقى وقح وسافل و لسانه طويل وبيقبح ...
يبقى كدا جدع وشخصية و كدا

دى اللى مش قادرة استوعبها

يعنى الاخ اللى بحكى عنه دا
استخدم اللغة عشان يوصف معنى
طب ما كان يستخدم اللغة بشكل اجمل
لمعنى أشيك
ليه ياخدها وياخد نفسه وينحدر
دا اولا ..لغويا
ثانيا ع المستوى الإنسانى بقى
ليه الدونية دى ف وصف علاقة بتنتهى ؟
وبيتباهى بكده علانية

جايز بنت الحلال دى متقراش التويتاية ويبقى ربنا رحمها ... أتمنى والله

بس حتى لو مقرتهاش
شىء مؤلم ان حد يتكلم عن حد كدا
و بتفاخر كمان

حكاية الشتيمة والألفاظ الخارجة دى
بقت صعبة قوى يا هيثم
عارف
بقيت حاسة انها عاملة زى سيل وبيجرف ف اللى قصاده
وولاد كتير وبنات كمان ...
كنت بشوفهم نموذج جميل
بقيت شايفهم السيل دلوقتى بيجرفهم
ويرجعهم لورا ...
معرفش الثورة واحباطها السبب
ولاّ هما كدا م الاول ؟!!!

زعلانة لأكتر من سبب
بس التويتر زى كل حاجة ف الدنيا
فيه كل حاجة


سيبك انتا
انا منسوطة بالتعليق دا
انتا عارف انك حبيبى يا واد
واحتك فاتيما تفتقد لتعليقاتك

وكفاية ست الكل دى لوحدها
يا لهوى
دى مكتوبة بإسمك
وبفرح زى العيال لما اقراها
لأنى بحس بمحبتك فيها قوى

:)

صباح الفل على عيونك

اندروميدا
--------


صباح الخير يا إندرو

ايه ضيف تقيل والحركات دى ؟!!!

المدونة مدونتك يا عم
واهلا بيك


بخصوص تعليقك
طبعا شوفت الفيلم
وعاوزة اقولك انى اول مرة اتفرجت عليه ف حياتى .. جالى اكتئاب يومين تلاتة ومقدرتش اخرج نهايته من ذهنى من كتر ما توحدت مع ابطاله كلهم ...
شكرى سرحان صعب عليا بنفس قدر ما صعب عليا الشاب والبنت ف الفيلم ..


انا فكرت بطريقتك دى لما قريت التعليق
وقولت يمكن البنت ام طابع بيلزق تكون غلطانة وتستاهل ...

بس رجعت ف ثوانى وقولت .. لأ

مفيش حد يستاهل التشبيه دا ابدا

ثم ان الإنسان اخترع اللغة
عشان يعبر بيها عن اللى جواه
طبعا بيخادع بيها ...
بس حتى وهوه بيخدع بيكون قاصد يوصل معنى ما ف باله

كلما هذب الإنسان روحه
كلما تهذبت لغته


و المفروض حتى لو حد أساء اليك
انك متردش الإساءة بمثلها


انا ظنى انه شخص أنانى
مبيفكرش غير ف نفسه
ورغباته
ومتعته الشخصية
وعشان كدا لا يعنيه مشاعرها
ولا حتى اللى كان بينهم .. وإن إنتهى


متفقة معاك جداااا
اننا مختلفين ولا حالة مثل اخرى

و انتا منور المطرح دايما

:)

هى وظروفها
----------

صباح الخير يا ابن عمتى
:)

ايه حكاية الغرز دى
احنا فينا من ضرب ... ؟؟


بخصوص السؤال الفلسفى بتاعك
تصور انى لسه كنت بتكلم مع المدير بتاعى امبارح عن الحكاية دى
وبقوله انى بستغرب سلوكيات الناس
وساعات لما اشوف حد بيعمل كدا ف وضح النهار وعادى ببقى على عينى أطلعله كلنيكساية واقوله ارجووووك بلاش قرف وتلوث و الكلام دا ...
لأنى على حسب ما أتذكر
ولحد عشر سنين فاتوا مكنتش الظاهرة دى منتشرة كدا الا ف اماكن بعينها وطبقات بعينها ...
دلوقتى واحد يبقى راكب العربية ..وعادى

بعيدا ع قلب البطن ع الصبح بقى
ان شاء الله اشوفك يوم الجمعة
وربنا يزيد ويبارك ف العدد


صباح الورد عليك
و صبحلى على خطيبتك يا واد
:)

بحار عروسه البحور  

اكبر هواه جمع الطوابع يعلمون ان قيمه الطابع ليس فى قيمته الماديه ولكن ندرته
حددى ندرتك .. تعرفى قيمتك

صباح الورد يا بحار عروسة البحور
وقطتى الحلوة


معاك يا محمد ف كل كلمة
وعشان كدا
خليت الطابع بتاعى
... بمليم

:)


انا فرحانة بتعليقك قوى
ويا ريت متقطعشى الزيارات الحلوة دى

ربنا عالم محبة دودو عندى
و اللى ف قلبى عشانها
وبدعيلكم ربنا يسعدكم
ويهدى سركم
و خلصوووونا
عاوزة أحضر فرحكو
واشوفها بالطرحة يا عم

:)

انا عن نفسى يا فاتيما شايف
عصفور كناريا جميل .. صبح على ومال
همس لقلبى العليل .. بكلمتين مرسال
الصورة ليه حزينه .والبسمة مش ع البال
مليم ده والا عنيه غلوشت وغيرت الاحوال
مين فينا يا فاتيما شافك ولا قلبه غنى موال
دمتى لنا بالحب والود والحنان فى كل زمان ومكان

الأخت نهى، أعود للتعليق على تعليقك و تحديداً نقطة عدم إلتزام الشركة بموضوع المحرم و رأيي في ذلك, و للأمر عدة أوجه منها بالتأكيد أنني لست بمتخصص في الشريعة و لا أعرف حقيقةً تفاصيل موضوع المحرم. يعني هل يجوز شرعاً أن تعيش إمراءة في بلد ليس لها محرم فيه.. و سؤال أخر هو هل يمكن إعتبار وجود نساء أخريات مسلمات في نفس البلد أو نفس الجامعة مخارم أم لا!. بالنسبة لرأيي الشخصي، فأعتقد أنه من حق الشركة أن لا تلتزم بدفع تكاليف المحرم بالنسبة لمن يريد أن يلتحق بالبرنامج و من يكون وجود المحرم لها مهم من الناحية الشرعية فعليها أن توفر ذلك لنفسها. في ذات الوقت أفكر في كيف يمكن لفتاة خريجة ثانوي أن توفر لها محرم إلا لو كانت متزوجة. فحتى لو كان لديها أخ مثلاً مستعد للذهاب معها فنحن نتكلم عن فترة لا تقل عن الأربع سنوات، ما الذي سيفعله أخوها الموجود معها في الخارج خلال هذه الفترة الطويلة!!. و بالتأكيد سيكون من الأصعب أن يصاحب الأب إبنته المبتعثه للخارج لأن لديه بقية العائلة و عمله!. بأمانة أرى أن هناك خلط من قبلك بين التمسك بالهوية الإسلامية و الوطنية و موضوع الإبتعاث و المحرم. لأنني أعتقد أن الفتاة التي ستلتزم بالهوية الوطنية و الإسلامية في الخارج في حال وجود محرم معها “فقط” هى شخص غير أمين و غير مؤمن في حقيقة الأمر بهذه الهوية التي أشرت إليها. في نفس الوقت أدرك تماماً أن الحياة في الخارج تختلف كلياً عن الحياة لدينا و هذا أمر يتعرض من خلاله الكثير من المبتعثين (و خصوصاً خريجي الثانوية) لتأثيرات قوية جداً تؤثر عليهم و على تفكيرهم و تصرفاتهم و من هنا أعتقد أن المسؤولية الأولى هى مناطة بوالد المبتعث فمن يعرف أن إبنه أو بنته لا يمكن لهم أن يواجهوا ضروف الحياة في الخارج فيجب أن يتحملوا المسؤولية و يوجهوا أبنائهم نحو إتجاه بديل و من يجد في أبنائه القدرة على مواجهة هذه الظروف فله أن يأخذ بأيديهم نحو هذا الطريق و عليه أن يتحمل المسؤولية و لا يلقى بأي مشاكل مستقبلية على الأخرين.

إرسال تعليق