.

.

زى النـهـــــاردة  

Posted by: فاتيما in









 عــارف يا يسوفة
بقالى كتيييير من آخر مرة شوفتك
وكمان من آخر مرة سمعت فيها صوتك 
وانا عاوزة أقولك كلام كتير قوى 
جايز تكون لسه صغير يا حبيبى عليه 
او مش هتفهمه قوى 
بس اتمنى ف يوم لو ملحقناش نقوله
انك توصل للمطرح دا و تقراه 
و يمكن تعرف ماما 
كانت تقصد ايه ..
ومتزعلش منى 




متزعلش عشان كنت بعيدة كدا 
ومبدورش عليك
 زى ما كنت بتستنى 
وتتوقع 




عارفة انك محبط و زعلان 
وعارفة كمان انك بتسمع عنى كلام بايخ
يبدو دلوقتى وكأنه حقيقى وصح 
زى .. انى سيبتك وعايشة حياتى 
وانى نسيتك و بقى عندى اهم منك 
وانى أمك ف الاوراق الرسمية 
لكن خلفتك و رميتك ... 




عارفة ان الكلام يمكن شكله صح 
لأنى مبقتش أسأل عنك
ولا اتصل زى الاول 
ومعرفش هتصدقنى ولاّ لأ ..
بس




انا كل يوم أقرر اكلمك .. وأتراجع 
وكل فترة أقرر اروحلك عند باب المدرسة 
عشان أزورك ف مغامرة مش محسوبة
 أو حتى أشوفك من بعيد وبعدين ....
أغير رأيى 






أنا مبطلتش احبك 
ولا إنتا بطلت توحشنى 
ومنيش لامبالية و مكبرة دماغى 
ولا بقى عندى اللى أهم منك 
ولا أنا جبانة و خايفة على نفسى 
ولا أى حاجة من دى خالص 




هتصدقنى
لو قولتلك انى خايفة عليك 
وعلى ناس تانيين قريبين ...
ولما بقول هروح اشوفك او اكلمك 
وأقعد احسب نتايج التصرف دا عليك
و عليهم .... بتراجع 
لأنى بكتشف انى أسكت احسن 
و كدا هيبقى أخف ضررا ...؟






جايز الكلام يكون غامض و غريب 
وجايز كمان
تقول على ماما عبيطة 
وبتفكر غلط خالص  
و انها لو خدت خطوة شجاعة 
الدنيا هتتغير 




بس انا يا حبيبى جربت الدنيا دى 
اللى انتا عايشها دلوقتى بناسها
وعارفاها وعارفهم كويس 
وعارفة الخطوة فيها بتودى لفين 
وبحمد ربنا انك رغم وجودك فيها 
فالتمن اللى بتدفعه
 أقل بكتير من الاذى 
اللى كان ممكن تشوفه
لو كنا بقينا سوا جواها 






 عارفة انك ممكن تكون محتاجلى 
بس انتا محتاج لوجود أب أكتر
بما انه هوه المصدر الوحيد حالياً 
للامان و مش انا 




عارفة انك ممكن تكون بتشتاقلى 
بس انتا محتاج الأستقرار و هدوء الحال 
واللى عمره ما كان هييجى
 مع وجودى ف حياتك 




انتا عارف انى عمرى
ما قولتلك على باباك كلمة وحشة 
ومش لأنه مكنش وحش معايا 
ومع أهلى ومعاك انتا كمان ...
بس 
لأنى مكنتش عاوزاك تشوفه
بشكل وحش و مشوه 
مكنتش عاوزة مثلك الاعلى 
يكون محل عدم احترام منك 




مكنتش عاوزاك تكرهه بسببى 
وعشانى
لأنى بصيت لقدام 
وتوقعت انك ف يوم م الأيام
 لازم هتحتاجه ف حياتك 
ومينفعش تكون باصلله بصة وحشة 
وترفض تتعامل معاه بسبب تصرفاته معايا 




مكنتش عاوزاك تكبر بغل وحقد 
 مستخبى ناحيته ف قلبك .. لأى سبب 
كنت بخمن انك ممكن يوم
جايز ... هتروح تعيش معاه 
ومكنتش عاوزاك تعاشر حد
انتا غضبان منه و عليه 




مكنتش بتمنى ابدا
انك تخرج من حضنى بالسرعة دى 
ومع ذلك .. حصل




و لما حصل 
كنت ف الاول بخاف تنسانى 
كنت بزعل لما مبتتصلش بيا
ف اول اسبوع 
وتكلمنى بإستمرار 
كنت فكراك نستنى خلاص
و كنت ببكى لصديقاتى بالساعات 
واقول انك ... روحت منى 




بس بمرور الوقت 
بقيت بحمد ربنا كل يوم
وادعيلك 
واقول كدا كويس يا رب 




هوه بعيد عنى صحيح 
لكن متكيف مع الوضع الجديد
وبقيت شوية بشوية
 ابقى فخورة على غير المفروض .. بنفسى 
لأنى ربيتك بطريقة تخليك 
تعيش مع ناس هما مصدر أذى  
ومع ذلك تبقى بينهم و وسطهم مرتاح 
مفيش مشاكل ولا خناقات 




وزى ما كنت طفل جميل وطيب
بقيت برضو
 طفل مطيع ومش مشاغب 
مش كارههم ولا حاقد عليهم 
ولا متغاظ لأنهم بعدوك عنى 




شايفهم أهلك
و حابب باباك وبتحترمه 
و دى نعمة من ربنا 
مكنتش وانا بربيك عاملة حسابها 
لكن دلوقتى سبحان الله
 انا وانتا بنتكافىء عليها 
بشكل غير متوقع ولا كان ع البال 






عارف القصة بتاعت سليمان الحكيم 
والأتنين الامهات اللى راحوله بطفل صغير 
وكل واحدة مصرة على انه ابنها 
عارف نهاية الحكاية 
وازاى الأم الحقيقية إتعرفت ... ؟!




من صغرى كنت بسمع الحكاية دى 
و جه اليوم اللى .... عشتها بالمللى 
كنت زمااان بلوم ع الام دى جدا 
اللى تتخلى عن ابنها كدا ... للتانية
وهيا عارفة انها مش أمه خالص




كنت بقول مالها .. دى لازم تستقتل 
و ميهماش
ايه .. فيه ايه .. ليه كدا ؟!!!




كنت لسه ساعتها صغيرة
ومكنتش فاهمة ان الدنيا فيها كتير
واللى يجبرك بمنتهى القسوة انك تتخلى
عن اللى يخصك مؤقتا ... 
عشان مصلحته




بتتخلى عنه .. 
عشان يرجعلك تانى




بترفض تقاتل بشراسة 
عشان وسط نيران الحرب الدايرة
ممكن ببساطة تدمره معاك 
حتة حتة
وانتا مش واخد بالك 




 ممكن جدا ارفع قضية حضانة
 من بكرة الصبح
ممكن اتكلم كل شوية عندك .. 
وأصر الاقيك واعرف اخبارك .. واقرفهم
ممكن اجيلك عند مدرستك واصمم أقابلك
ولو فيه الف محضر معمولى بعدم التعدى




ممكن اعمل حاجات كتير مجنونة 
بس المشكلة مش ف دا ...
المشكلة ... فيما بعده
رد الفعل 
و تمن هذه المخاطرة
واللى مش انا وانتا بس اللى هندفعه
اهلى كمان هيدفعوه معانا
ودول لوحده قصة تانية 
يمكن لما تكبر شوية او ييجى وقت
ابقى احكيهالك على رواقة 
وتعرف هما تعذبوا بسببى قد ايه
وعانوا عشان سلامتك وسلامتى قد ايه
ومبقاش ينفع أدخلهم تانى ف حرب جديدة
لا بقى فيه وقت
 ولا صحة و أعصاب
و لا فلوس و لا حاجة خلاص ....




انتا كمان يا حبيبى
سلامتك النفسية 
 و صحتك واعصابك مهمين عندى
مش عايزاك تنقسم بينى و بينهم
مش عايزاك تستنى حاجة .. ومتحصلش
و لو حصلت هيبقى فيه حرص شديد 
انها تبوظ
عشان المحبة اللى بينك
 و بينك متكبرش
وتفسد اللى بينعمل





مش عارفة ممكن تفهمنى 
ولاّ .. مينفعش
بس مش عاوزاك يا بابا
تدفع تمن رغبة حد ف الإنتقام منى 
انتا دفعت بالفعل كتير قوى 
ومش عاوزاك تعانى اكتر من كدا




انتا دلوقتى عايش ف استقرار
حياتك شبه طبيعية
عندك حياة واصدقاء و بتكبر مع اخواتك
اللى علاقتك بيهم مكنتش 
هتبقى قوية لو كنت قاعد معايا 
بتخرج بحرية و من غير خوف
بتمر بمراحل حياتك الشبه طبيعية 
زى أى حد ف سنك 




حرمانك منى وجع لكن ضرورى
زى الدوا المر
 اللى لازم ينشرب




مبقتش اخاف زى الاول  
ولا أترعب عليك م الفراق 
أشرف خلق الله
أنبيا كانوا او بشر عاديين
كان منهم ... ايتام
او اتحرموا من احضان امهاتهم ف توقيت ما
وطلعوا ناس كويسين قوى
ربنا كان بيحبهم وحماهم
و غمرهم برحمته 
رغم المحن اللى إتعرضوا ليها
وطلعوا منها أقوى وارجل و أحسن
و كسبوا احترام الجميع واحترام أنفسهم




طنطتك دوبا قالتلى مرة زمان ...
انك عملت لنفسك شرنقة 
تستخبى فيها
وتتكيف مع الواقع المحيط بيك
والتوصيف دا اعتبرته خير
لأنك والحمدلله
 قدرت تعيش حياتك الجديدة
بأقل أضرار ممكنة
روحت لناس مش كارههم .. بشهادتهم
و كل اما بفكر 
لو ان الوضع معكوس
كنت هتتعذب ازاى و هيعاملوك بعنف
 و قهر عشان يسيطروا عليك ...
بحمد ربنا واشكر فضله على كل شىء




زى النهاردة من أربع سنين
انتا مشيت 
و خرجت من حضنى
كنت متصورة  انك ممكن ترجع
 بعد ايام او شهور
لكن خيالى مجبش انها ممكن تمتد أطول




ساعات يتهيألى انى هشوفك صدفة
 ف الشارع او المترو ...
بترعب من فكرة
 انى ممكن ... معرفكش
و ان شكلك بمرور الزمن يتغير






بترعب اكتر من فكرة
انى اجى اخدك ف حضنى 
فمتبقاش عاوز دا يحصل




بترعب كمان من كل الكلام الوحش
 اللى ممكن تسمعه عنى
 و يأثر فيك وتصدقه ...




بتعب قوى لما اتخيل انك ممكن
تكون عيان
 او متضايق
او مزنوق ف مشكلة 
ومحدش جنبك و بيساعدك
و انا مش موجودة زى ما المفروض يحصل




بقعد اتخيل ف قدام لما تكبر اكتر 
و ف كل الحاجات اللى فاتتنى 
ولسه هتفوتنى
واقول بكرة يختار كلية من غير ما اعرف
بكرة يتخرج و مبقاش اول واحدة
يكلمها عشان يطمنها ع النتيجة 
بكرة يخطب و يتجوز
و ميخدنيش معاه اشوف العروسة
واتعزم ع الفرح زى الغرب 
او ممكن متعزمش ...




بكرة يخلف و مخدش حفيدى ف حضنى
وأفضل ازيد
واعيد 
وأجرى ورا الخيالات
وبعدين الوم ف الآخر نفسى 
لأنى حرمتك من حقك فيا بنفسى 
و اقول ... لك حق 
انك تبعدنى ... و تكرهنى
وتبقى مش طايقنى 
ولا عاوزنى 
ولا فاكرنى 
ولا .................
و 
 بعدييييييين
 ارجع ف ثوانى و افتكر تانى
انى أمك ...




ربنا اخترنى 
عشان يكرمنى بيك
ومفيش مخلوق ف الدنيا دى
حتى أبوك مهما القانون سانده 
هيبقاله حق فيك ... قدى 




ولا حدش هيحبك 
زى ما بحبك




و معرفش امتى 
ممكن نتقابل تانى
بس يمكن لما يوم تقرى الكلام دا 
تكون بقيت أب 
و حسيت بغلاوة العيال
او تكون كبرت و حبك ليا بقى اكبر م الزعل 
او اكون عندك
زى ما دايما انتا عندى 
روح قلب مامتك
 و مينفعش الروح دى تخرج من صاحبها
الا عشان تروح للى خالقها وبس 







احنا بعاد عن بعض
 جايز 
بس انتا معايا طول الوقت 
وف كل حاجة بعيشها وبشوفها 




بشوفك ف عيون كل طفل بقابله 
واخده ف حضنى 
بلاقيك ف كل الحاجات
 اللى بتحبها
و الذكريات اللى جمعتنا 8 سنين 
لسه لعبك و قصصك وكل حاجاتك موجودة 
 بلمحك ف احترام الناس ليا وتقديرهم
و سؤالهم عليا عليك
ودعاهم ليك 
من غير ما اطلب





لما حد فجأة يبعت يقولى انا
رايح حج أو عمرة ... و هدعى ليوسف
او حد فجأة يدينى صورة خطوبته
ويقولى ...  عقبال يوسف
او حد فجأة يدخل عليا المكتب يصّبح
 ويسألنى ... ازاى يوسف ؟ 




بحس بيك
ف لحظات زى دى 
ربنا بيبعتهالى ويتهيألى وقتها
 بجـــد
 انى بسمع حسك و انتا بتقولى :
أزيك يا ماما
و انتى وحشتينى زى مانا وحشك 






عاوزاك تفتكر دايما
لو مشوفناش بعض تانى
انك اجمل حاجة حصلتلى ف حياتى 
و انى بسببك انفتحلى ابواب
وعرفت ناس
و شفت خير
 ليك فيه نصيب الأسد يا برج الاسد 




و عاوزاك تعرف و لو مسمعتهاش بودنى 
ولا شوفتها بعينى
فنا عارفة و متأكدة جداااا
انك بتحبنى زى ما بحبك
لأنك سكنت جوايا 9 شهور 
وحبك ليا اتخلق معاك يوم ورا يوم 
وخرج للدنيا وقت خروجك




و عاوزاك تتأكد انه الشىء الوحيد 
اللى أنجزته ف عمرى كله 
 انى كنت امك ...



و محدش مهما عمل وسوى 
هيقدر أبدا 
يمحى الواقع دا و يغيره 
و يعرف ياخد منى الفرحة دى
 و يحرمنى منها
 مهما عدى وقت و عمر   




كل سنة وانتى يوسف
 إبنى حبيبى و نور عينى 
و لبعــد الدنيــا
هتفضــل عند مــامــا 
إنتــا
 روح ....  قلـــبهـا 


------------------------------------------ 
 الصورة اتاخدت فى شهر مايو 2006
------------------------------------------

بحبك قد روحى لأ ... أكتر كتير 
نفسى أغمض وافتح الاقيك بقيت كبير 
و الدنيا مفتوحالك 
و تتحقق امالك 
قد ما قلبى دعالك 
لأ ... أكتر من كدا 

-----------------------------------
---------------------------------------------


This entry was posted on الأحد, يناير 22, 2012 and is filed under . You can leave a response and follow any responses to this entry through the .

56 كــــلام بيطــبطـــب عـــلى قــــلبى و روحــــى

بسم الله ماشاء الله قمر ياطمطم
باموت أنا فى العيال اللى بلاقى مامتهم أو باباهم ظاهرين وبيطلوا على الدنيا من عينيهم
شبهك ياطمطومة ...انتى بتبصى صدقينى من عينيه
سبحان الله ..النهاردة من اربع ساعات تقريبا افتكرتك وافتكرت يسوفة ولقتنى لوحدى متأكدة انك هتتكلمى عنه وقريب اوى
بأمانة كنت ناسية التاريخ ده لكن متأكدة انك هتكلميه هنا فى المدونة

كان نفسى من زمان أقولك عايزة اشوفه ياطمطم وماحبتش اطلب الطلب ده واكتفيت بصورة عينيه فى المدونة

ساعة ماشفت عنوان البوست والصورة كان احساسى تانى خالص ....لقتنى باقول لا ارادى ياروح قلب ماما يايسوفة

البوست بقى مينفعش ومقدرش اعلق عليه غير بكلمة يارب
سلام ياحبيبة قلب فيدو

ربنا يخليه ليكي بس كان يستحسن ما تحطيش صورته لاسباب كتيرة

قمر يا يوسف يا روح قلب مامتك
:)
البوست ده خلاني اصدق ان الكلمة ممكن تبقى حضن
وحضن حنين اوي يا مامة يوسف

فاتيما
روح القلب الملائكية

اقسم بالله العظيم لما بقول روح القلب الملائكية اقصد معناها الحقيقى

انتى فاكره لما قلتلك دى كانت فرصة لكى تطلعى عينهم و تخلى يوسف لا يطيق البعد عنك بمجرد زكر له عشر الحقائق و ليست الحقيقة كاملة اللى لو عرفها لن يطيقهم ابدا
ابتسمتى و قلتى لى اولا رلا اريد تشويه صورة الاب فى عينه
ثانيا انا عارفة انهم مش هيهمهم يوسف و هيغصبوا عليه يعيش معاهم غصبا و مش بارادته و فى الحالة دى هيتعذب و هو عايش معاهم لكنه حاليا استطاع التعايش
و لمل قلتلك روحى ليه المدرسة خفتى من رد فعلهم معه
دائما تتصرفين تصرفات الملائكة حتى على حساب نفسك
لكنك هتسمعى منى راى غريب شوية يا فاتيما
اخاف عليكى من استمراء الظلم و التعود عليه
اخاف عليكى من ادمانه و الانغماس فيه
من كثر التعود على الالم يصبح تأثيره قليل و لا يحركنا الا الم اكبر
اتحركى و روحى ليوسف و خديه فى حضنك
متفكريش الا فى اللحظة دى و بعد كده متفكريش
عيشى لحظتك فقط و بأذن الله اللى تخافى منه ميجيش احسن منه
فكرى فى نفسك لحظة و متظلمهاش
لو على يوسف اقسم بالله شاورى انتى بس
و تلاقى اخواتك وليد و ازهرى و مينا و رامى و انا و غيرهم فى لحظة نجيبه ليكى و يبقى حد يقرب منه
قربى يا فاتيما من يوسف و ميهميكش حاجة تانية قبل ما يصبح بينك و بينه جبل من الاكاذيب لو تسلقتيها عشان توصلى ليه هتغوصى فيها و ممكن تغرقى فيها
و لو حاولتى تهدمى الجبل هياخد منك وقت و كل ما تهدمى جزء هيبنوا جزء اكبر منه
حاجة اخيرة احب اقولها ليكى ان يوسف خسر كثيرا بنشأته بعيدا عنك لان اللى يتربى جنب ام زيك مش ممكن حاجة تعوضه
و انا كان نفسى تشوفى فرحة ساليناز لما سمعت اسمك فقط نطت من الفرحة قد ايه
فاتيما على راى الاعلانات
عيشى اللحظة
و طظ فى اى حاجة تانية

سلام يا ام جو غصبا عن عين الطخين

ربنا يطمنك عليه

يا مامت يوسف يا غاليه

عارفة يمكن انا معنديش أولاد بس قادر احس احساسك جداً يا فاتيما

لما انا يدوب خال بيبو و بيوحشنى ما بالك انتى بقى

ربنا يديكى القوة يا فاتيما

و يخلي يوسف دايماً صورتك قدامه

و يجى اليوم اللى يفاجئك فيه

ربنا يخليهولك يا رب

امين

بكره

http://www.z3lanh.com/vb/imgcache/5046.imgcache.jpg

http://a5.sphotos.ak.fbcdn.net/hphotos-ak-ash4/306961_275423402472494_199168673431301_1308390_124930_n.jpg


http://imageshack.us/photo/my-images/543/24896610150208644483583.jpg/sr=1

جاى

شٌفتى بقى

نسيت اقولك

على فكرة بقى هو شبهك خالص (:

يوسفة

(:

فاتيما ...
السلام عليكم ورحمة الله وبركاته ..
للمرة الأولى أزور مدونتك .. رغم أني كنت أنوي ذلك منذ مدة طويلة لكن الوقت لم يساعدني .. وذلك لما رأيتُ من ثناء المدونين عليك ..

أما هذه التدوينة .. فقد أحسستُ بكل كلمةٍ فيها .. وبكى لها قلبي بشدةٍ وإن كنت أتمالك نفسي وأكفكف دمعتي أما زوجتي وأولادي لئلا يسألوني عن سبب هذا البكاء ..

أختي فاتيما ..
عشتُ طوال عمري منذ كنت بعمر سنتين بعيداً عن أمي .. وقد وصفت كلماتك كل ما كنت أشعر به تجاه أمي .. مع فارق بسيط أنني بعد أن كبرت وتزوجتُ ورزقني ربي بأربعة أولاد لا تزال أمي على جفائها مني .. بعكس إحساسك الأمومي العالي ..

حرام عليهم أن يجرموا كل هذا الإجرام بإبعاد الأم عن ابنها والابن عن أمه ..
وأن يتسببوا لها ولأهلها بالكثيييير من المشاكل إذا أرادت أن ترى ابنها .. والله إنه إجرام أشد وأقسى من السرقة وشرب الخمر بل وربما أقسى من القتل كذلك ..

أختي فاتيما ..
أدين لقلمك وإحساسك العالي وشعورك المرهف .. ومر الفراق الذي تتجرعينه يوماً فيوم ولحظة فلحظة ..

وأكبر فيك نظرتك وتفضيلك لمصلحة ابنك على إطفاء نار شوقك له ..

من القلب أسأل الله لك أن تجدي لنفسك طريقاً تتواصلي به مع ابنك دون مشاكل .. أو أسى ..

لا يسعني إلا أن أقدم لك الاحترام والتقدير ..

تحيتي وتقديري واحترامي لك أختي الكريمة ...

كل سنة ويوسف طيب وبخير و كويس
مش عارف الصراحة اعلق على كلامك
هو انتي كان عندك حق في اللي عملتيه؟
و لا انتي اخطأتي لما سبتيه ؟
يا ترى هيقدر و يسامحك
ولا هيحصل العكس
في النهاية ده كان اختيارك او مش اختيارك يمكن حاجة مجبرة عليها تضحية واجبة علشان يوسف يكون افضل
قلب الام دايما موجوع
دايما متداس عليه علشان الابن يكون سعيد
اللي اقدر اقولهولك حاجة واحدة بس
قدر الله لا يأتي الا بالخير

ان شاء الله يوسف هيرجع لحضنك تاني علشان يملاه فرحة
متزعليش ولا تكتئبي مفيش قلب بيحب كل الحب ده و يزعل لان ربنا كبير مش هيخيب املك فيه
وربنا كريم مش هيبخل عليكي

ربنا يطيب قلبك

ويردك يوسف بالسلامه وتلاقيه يوم داخل عليكى وهو عارف انك سبتيه عشان مصلحته

كلامك محسوس اوى ويمكن فى يوم يوسف يقراه ويفهم حجات بتحصل دلوقتى ومش فاهمها


لكن حاولى تشوفيه ده من حقك ومهم بالنسباله كتير ولو على فترات


ربنا يكتبلك الخير يارب

ابكتينى ..

ربنا يريح قلبك
ويطمنك عليه
ويفرحك بيه
ويجمعكم على خير

الشجن القابع بين ثنايا السطور يؤلموني .........
لا ابكي علي مشاكلي مثلما ابكي عندما تكتبين له .......
ربنا يصبرك.
نينا

ازيك ياطماطم عامله ا يه ياحبيبتي بحب اجي اطمن عليكي علي طول ودايما يارب تكوني كويسه وبخير واحب اقول ليوسف ياب ختكككككككككككك ههههههههههه مش بنقر ولابنحسد ماشاء الله اللي يتحب الحب ده راجع راجع ان شاء الله طالت الايام ا و قصرت راجع لحبك اللي هيشده زي المغناطيس بعد اذنك انا سيفت الصورة ع الجهاز عندي وعملتله حاجه ع السريع كده يارب تعجبك واكون جبته صح بوسات قد كده وحضونات كتير والله وحشاني بجد
http://www11.0zz0.com/2012/01/21/21/880061903.gif

بحق ربنا
وربي يعلم صدقي
في حياتي ما تمنيت اني اكون صاحبة سلطة
ولا قريبة من سلطة
إلا 1- من يوم ما عرفتك
ثم انسى
و 2- يوم ما بتكتبي بوست زي ده
ثم أدعو
وأقول يارب "لو أن لي بكم قوة أو آوي إلى ركن شديد"
أقول اجيب لها ابنها وابطش باللي عمل فيها اللي عمري ما سمعته ولا شفته قبليها
وأفضل أحلم إني اشوف جبر خاطرك وفرحة قلبك
والله يافاتيما ده مش احساس ولا خيال اول مرة يجي لي..ده متكرر

اقول لو عرفت بني أدم معفن اهل سلطة من الأشكال الغلط اللي بيقولوا عليهم اللي له ضهر
وقال لي لك طلب واحد "زي جني بتاع علاء الدين..ايوة اضحكي"
اقول له توريني في اللي حرم يوسف من فاتيما وفاتيما من يوسف شهر من اول النهار
وفاتيما تعمل طيبة وتقول حرام وانا والشخص المعفن اللي شبه جني الأزرق منعبرهاش
نفضل نضرب فيهم زي الإنسان الألي الكبير بتاع فيلم أفاتار
رجالة ستات منعتقش
نخليهم عبرة عبر السنين
معرفش مليش دعوة ده احساسي

ويجتمع يوسف معاكي
ومحدش يجرؤ يجي ناحيته

ايوة مجنونة عادي يعني هو انتي كنتي عرفتيني في حالة تانية

ونرجع علشان الناس متوقعة نهاية منطقية لتعليق غير منطقي على وضع غير طبيعي
نقول يارب
لا نمل قولها والأمل

بحبك يا ياسمينة المحيط الإلكتروني
خدي حضن بقى لا ينفع ولا يشفع ودعوة لمن لا يغفل ولا ينام
وده كل ما أملك

متزعليش نفسك

كويس انك كتبتى بوست زى ده لانى كنت عايزة اتكلم معاكى فى الموضوع ده الصراحة من زمان قوى .. بس خفت تضايقى

انا اصلا حبيت مدونتك او عرفتها فعلا من سنتين من خلال الاسم - الاسم شدنى قوى
وفكرة انك تقعدى تكتبى كلام كتير عنه وليه وهو مش بيقراه اصلا

فى بوست انتى كنتى كتبتيه قبل كده زمان من سنة مثلا ولاحاجة - مش بنساه

لما كنتى فى اسكندريه لوحدك معاه وبتمرنيه ان لو حصلك حاجة بعد الشرؤ هو المفروض يعمل ايه - ومثلتى فعلا انك مش بتصحى

وقد ايه اتضايقتى بعدها لما حسيتى انه خايف

انا فعلا مش بنسى البوست ده وروحت حكيته فى شغلى لواحدة صاحبتى ام برده زيك كده

أنتى أم حنينة قوى

اللى تفضل تكتب بالكمية دى عنه وقد ايه احساسها بتانيب ضمير انه مش معاكى وانك دايما حاسة ان السبب

ده اكبر دليل على انك أم حنينة قوى

مامتى كانت دايما حاسة كده - مع انها - ببساطة - مكنش فى زيها ولا فى حنيتها معانا

لما بقرى بوستاتك بلمس ده - انا مش بقولك ده عشان احنا اصحاب على فكرة - انا بقالى سنتين من ساعة ما عرفت مدونتك وانا بحس ده فعلا

وصدقينى لو قولتلك حاسة قد ايه انتى تعبانة وهو بعيد عنك

انا اصلا مستنية يكبر بسرعة ويدون عشان يلاقى مدونتك ويعرف انتى بتحبيه قد ايه

هو اصلا عارف ده

على فكرة لما حد بيحب حد قوى - بيحس بيه والله دايما بيحس بيه حتى لو كان بعيد عنه

صدقينى !

انا مش عايزاكى تزعلى نفسك او قلبك يوجعك - ان شاء الله هتتلموا تانى ويبقى فى حضنك اللى قد الدنيا دى كوووووووووووووووووووووووولها

عشان خاطرى متزلعيش نفسك


وبشر الصابرين

الجملة دى صح قوى

فاكرة لما كلمتك فى التليفون - قولتيلى جملة حسيت قد ايه انتى ...


اول مرة اصلا نكلم بعض :D ورحتى قولتيلى عايزة اشوفك عشان احضنك قوى

فى حاجات كده هبلة جدا بس مبنسهاش عشان معناها بيبقى كبير قوى عندى


انا حاسةانى عايزة اقول كلام كتير قوى - ماصدقت اصلا انك فتحتى الموضوع ده عشان يبقى من حقى انى اتكلم فيه - يكون فى مناسبة يعنى



اول مرة لقيت فيها مدونتك روحت كتبتها فى موقع عمرو - من قبل مااقرى اى بوستات - من العنوان بس

ماما كانت دايما بتقولى روح قلب ماما


يارب تفرحى قريب ويجبر بخاطرك


معلش طولت عليكى

وجعتيني اوي اوي بجد وانا كام مش قادره اتخيل مقدار عذابك في بعده عنك ولا ليه سيبتبه بس دي تضحيه كبيره اوي اوي يعني يارب يكبر ويفهم صح ويعرف قد ايه انتي اتعذيتي عشان هو يتربي صح بجد مش لاقيه كلام اقولهولك لما ولادي بيروحوا المدرسه بقعد استناهم زي الهبله انتي في نار وربنا بس هو الي يقدر يعينك دعواتي يصبرك ويجعل تتضحيتك دي جزائها خير ومتقدره من ابنك ويقر عينيك بيه يارب

ربنا يكتب لك و يكتب له الخير كله و يرضيكم بيه
ربنا أعلم الخير فين

ربنا يفرح قلبك و يريح قلبك و يرده ليكي يا رب
يعلم الله ان ادمعت عيناي لما قريت البوست ده بس اقوللك على حاجة حسيت برحمة ربنا بينا اد ايه ربنا صبر قلبك و نور عقلك و اداكي القدرة انك تشوفي الصالح فين و تعمليه اوقات كتير في الوقت اللي بنتعرض فيه لظلم بتعمينا رغبة في الانتقام حتى لو كانت هتضرنا او تضر ناس بنحبهم سبحان الله ربنا جنبك حاجة زي كده و نور بصيرتك
عارفة اما ربنا قالي اية "ربنا افرغ علينا صبرا والحقنا بالصالحين" انا فهمت كلمت افرغ علينا صبرا و حسيتها اوي فيكي
ربنا يريح قلبك و يطمن بالك و يرد ليكي يوسف عن قريب ان شاء الله
تحياتي لقلبك الابيض :)
انا عندي حق بقا اما دايما بقوللك قلبك الابيض لانه فعلا ابيض اوي اوي
:)

الأول
----

صـبـاح
الخـيـر
عليــكـم
يا اجمل ناس


ثانيا
-----

مش عاوزة حد يتضايق عشانى
ويفتكر انى متضايقة
ومكتئبة
أنا كويسـة الحمدلله
وبألف خير يا عيـــال

:)


ثالثا
-----

ربنا
ما يحرمنى منكم
أبدا

:)

حفيدة عرابى
----------

صباح الفل يا فيدو
ومن غير ما تقولى
م القلب للقلب رسول
وبعدين انتى خالته ...
لازم دا يكون احساسك
ولازم يكون على بالك اوقات
ومتعرفيش ليه تحديداً ...

انا بحب الصورة دى قوى
أتصور بعدها كذا صورة ...
بس دى
ليها ذكريات عندى مختلفة
بحبها جدا بشكل مش عادى ...

منحرمشى من دعواتك ليه
وليا

:)

Tarkieb
-------

متقلقش يا تركيب
الصورة قديمة ...
زمان شكله اتغير كتيييير

ثانياً
المدونة معروفة
و لو فيه حاجة بتتعمل بالفعل

ثالثاُ
انا عارفة الأذى متى يبدأ
ونشر الصورة وكتابة التدوينات
لا تندرج تحت هذا البند

فمتقلقش

:)

Baskouta
--------

هوه من ناحية قمر
قمر
خنفسة بقى وشافت ولادها ع الحيط
عارفة المثل دا ؟
D:

انتى حبيبتى
وبسكوتة قلبى يا بسكى

صباح البسكايت البمبى
الغرقانة كريمة وفروالة

ابراهيم رزق
-----------

صباح الورد يا ابو العيال

منا عارفة يا عم كل اللى كتبته
وقولتلك وسه هقولك

انا مش ناقصة رجالة
ولا أخوات جدعان

وعارفة انكم قدها
وهتقفوا جنبى وتساعدونى

بس المشكلة مش ف الموقف
والوقفة
المشكلة هتبدأ بعد ذلك

رد الفعل يا ابراهيم

انا جربته وعارفة
ومعنديش استعداد حد يتأذى تانى بسببى او عشان خاطرى
غير اننا مش هنخلص صدقنى

كل تصرف
هيترد عليه بشىء أوحش
وننزلق لخساير
وبرضو ف النهاية ...
كل اللى ملوش ذنب ..هيعانى
ويتبهدل بلا جدوى

زمان كان الموضوع مقبول شوية
لكن دلوقتى
يوسف كبر بما يكفى
انه يفهم كل حاجة
ومش هدخله ف السكة دى
وانا معنديش قدرة أصلح ...

مش عارفة اشرح ازاى
بس صدقنى لو ينفع
مكنتش هتردد

ربنا يخليكوا ليا

ولو ع المحبة
كل سنتوفة حب متشالة ليوسف بإسمه
بتزيد وتكبر كل شوية
ومش هتخلص ولا تروح لحد غيره
هتستناه لحد ما يرجع ...
تكبر وتتعاظم وتتضاعف و تزيد
زى الوديعة كدا تمام

:)

بوسلى سالينازة حبيبتى
وسلامى لمامتها وزياد والنونا القادمة

Ramy
----


متقولش كدا يا ر ر !!!

يوسف شبههى

يا خرابى هتوقفولى سوق الواد
ومش هنعرف نجوزه ...

هوه حلو وزى القمر
بس على جنب ..
بفرح قوى لما حد يقولى
انه واخد عينيا
أصل عينى دى الحاجة الوحيدة تقريبا
العدلة ف وشى ...
اكمنى ورثاها من بابا .. بفرح لما احس انى نقلتها ليوسف

:)

عقبال ولادك يا رب
انا عاوزاهم ياخدوا قلبك
وكفى

مافيش تعليق ينفع غير
ربنا معاكي ومعاه

الازهرى
-------

ان شاء الله يا زيزو

بس ملحوسة صغننة

كل الصور بنات

دولا عرايس ليسوفة
ولا اللى ف القلب ف القلب
وانتا طول الوقت
عامل علينا عيسى عدو المرأة
و بكرهكو و مش طايقكوا
و نظام الأفلام دا ...؟!!!

وش مطلع لسانه

D:

ظلالى البيضاء
-----------

اولا
حضرتك منور الدنيا


ثانيا
زيادرتك شرف ليا
والناس الحلوة دايما تدينى
اكتر من حقى والله .. بكتيييير


ثالثاً
مش عارفة اقول لحضرتك ايه
بس ساعات بخاف منى
واقول البعد جفا
زى ما بيقولوا ف المثل
بس لأ
لما اخد يوسف ف حضنى
متاكدة انى هوصله كل حبى ليه
جايز والدة حضرتك طباعها مختلفة
وجايز البعاد عنك خلاها تتعود تخبى مشاعرها عموما ..
لكن حبها ليك اكيد ثابت
هيا بس طبعها كدا

امى مثلاً ست قوية
مقاتلة وشديدة حبتين ...
متعرفش تقول مشاعرها
لكن بتتصرف على هذا النحو
يعنى تهتم بيا وتراعى شئونى وتدافع عنى
بطريقتها و اسلوبها ...
عمرها ما خدتنى ف حضنها غير مترين تلاتة كانت راجعة فيهم م العمرة او انا اللى رجعت من سفر ..
و انا اللى جريت عليها احضنها
مش هيا ...
:)

والعكس بقى
اختك فاتيما بتحب على روحها
وبطبعى بعبر واقول و احاول أبين كدا
وممكن أكون أقل بكتيييير من ماما على فكرة ..
لأن ماما من وجهة نظرى أدت اكتر
وعطائها كان اكبر

انا مش عارفة اعمل ليوسف
ربع اللى ماما عملتها عشانى انا واخواتى ...

الطبع والتصرفات مش كل حاجة
مش بتنفى الحب ابدا
بس بتغير شكله

ربنا يخليهالك
ويخليك ليها
ولولادك

انتا نورتنى
واسمك التدوينى ...حلو قوى

:)

مصطفى سيف الدين
---------------

صباح الخير يا مصطفى

والله كل سؤال انتا كتبته
انا بفكر ف اجابته طول الوقت

اوقات كتييييير
احس ان الاجابة هتكون ضدى

واوقات تانية برضو
بحس ان الاجابة هتكون ف صالحى

وبعدين اوصل للى انتا قولته
ان ربنا اخترلنا الخير
و لازم اصدق دا
وانا مصدقاه والله
وربنا عالم

ربنا يحفظه من كل شر
هوه دا اللى يكفينى دلوقتى
و بس

نورت التدوينة كالعادة

امة الرحمن
----------

اتمنى يا ميما

(دا دلعك .. هاه)

بتمنى لو معرفتش اقوله
واوصله
هوه ييجى يوم ويقراه
ويعرف ويحس اللى فيه

الله اعلم بكرة فيه ايه
بس خير

ان شاء الله
خير


و منحرمشى منك
ومن دعواتك الحلوة دى

candy
-----

معلش يا كاندى
غصب عنى


و ميرسى يا حبيبتى
على كل حرف ف تعليقك

نينا
----

وربنا يصلحلك الحال يا نينا
ويروق بالك

اللهم آمين

mayada
------


ازيك انتى يا قاف ميم
وحشتينىىىىىى
جدا

والصورة حلوة قوى

بصى
اول ما شوفته
ازبهليت شوية ...

عشان يوسف كان عنده سلوبيت جينز كدا وشبه دا ...
كان بيلبسه ف الصيف تحته التيشرت
وف الشتا تحته البلوفر وفوقه جاكت
انا لسه شيالاه عنده مع باقى هدومه ومش عاوزة اديهم لحد ...لحد ما يرجع
كل حاجة فيهم ليها ذكريات عندى
ومش عاوزة اسيبها تفلت منى
لحد ما يرجع و يبقى فيه حاجات جديدة تجمعنا وأتخلى عن القديمة مادياً ...

لما شفت الصورة
اتخضيت شوية
بس حلوة قوى قوى
مش عارفة اشكرك ازاى بجد
بس تسلمى وتسلم مجايبك
ومنحرمشى منك يا حبيبتى ابدااااا

بوسات وحضونات من هنا لآخر الدنيا
:)

ستيتة
-----


:)

دى ابتسامة ف الاول بس
عشان انتى عارفة
ومتأكدة من انى هعمل كدا فعلا
واقول لأ
وانتى مش هتسمعى كلامى
وتكملى مع الجنى المخطط ...
:)

عدة حقائق بقى
1)
ربنا يخليكى ليا

2)
انتى مينفعش تكونى مفترية
وبداخلك هذا الضمير
وهذا القلب
وهذا العقل
ولو عشان خاطر أى حد مهما كان ..
أنا متاكدة

3)
اتعرض علينا
من واحد من اهل السلطة
اللى بتقولى عليهم
ورفضنا ...
لأننا ولإنى تحديدا أعلم
ان مفيش حاجة ببلاش
ولازم هييجى وقت ادفع الفاتورة
والفاتورة هتكون شر
وزى ما بيقولوا ف الحكمة الجميلة
الرد على الشر لا يكون بشر مقابل


4)
سمعت جملة ف فيلم من يومين بتقول
اذا ادرت الإنتقام
فعلك ان تحفر قبرين
واحد لعدوك
وواحد .. لك
وصحيح دا لا ينطبق على ضحايا الثورة ...
بس ينطبق ف الحالات اللى زيى كدا
لو انجريت لهذا المنزلق
مش هعرف أرجع تانى
هحس انى بقيت زيهم وشكلهم
ومش عايزة كدا
عاوزنى افضل زى منا
متسامحة قدر الممكن
مادام يوسف بخير ...يبقى خلاص

5)
ربنا موجود
ومتكلة عليه بعزم بضعفى
ومتأكدة انه كاتبلنا الخير
انا ويوسف وكل حد
حتى الناس السيئة دى
وبيمهلهم يمكن يتعظوا

6)
نفسى يوسف يرجع
من غير بهدلة اكتر من كدا
ومن غير حرب طاحنة جديدة
ومن غير امراض نفسية زيادة
هوه أرق من انه يتحمل التخبطات دى
ما بين يوم هشوف ماما
لأ مش هتشوفها
جابتلى حاجة
لأ مش هتاخدها
هنخرج سوا
لأ منتاش خارج
ويسمع الفاظ بشعة كل شوية
وكلام كتير يدبحه

مش عايزة كدا
وبقول يا رب


7)
عارفة اللى ف قلبك
وان التعليق مش منطقى
لأن الوضع مش منطقى
وعارفن انك متغاظلى ...
وزعلانة ليوسف


8)
ما تملكيه كتير قوى
وغالى قوى عليا


لهذا هلاقينى
مضطرة
أرجع لرقم
(1)

ربنا يخليكى ليا

:)

riri
----


انا كويسة يا ريرى
وبخير
وزى الفل


مش فل قوى
عشان ناقصنى يوسف


بس يعنى
احنا كنا فين وبقينا فين
كويس انك مجتيش ف اول ما عملت المدونة
مكنتيش هتطيقى
تقعدى فيها شهر يا بنتى
انا مش عارفة الناس كانت متحملانى ازاى والله
بجد انا عذبتهم معايا قوى

ربنا يخليكوا ليا يا عيال
:)

ومفيش ام مش حنينة
وبتحب عيالها اكتر من روحها
بس هوه اسلوب وطريقة التعبير
اللى بتفرق

انتى هتبقى ام حنينة قوى يا ريرى
وهتخافى على عيالك خوف مش طبيعى
وعمرو هيقعد يطمن فيكى
اذا مكنش بالفعل بيعمل كدا من دلوقتى وانتى مبتصدقيش ان كل حاجة هتبقى بخير ...
:)

بصى
كل حاجة بيعدى بيها البنى آدم
وتخليه يكشف بيها حاجات ...
تبقى مش محنة
بتبقى منحة
منحة إلهية كدا
ربنا بيختبرنا بيها
وصديقة غالية عليا اسمها توتو
دايما تقولى
يا فاطمة احنا ربنا بيختبرنا
وكويس ان الإختبارات دى جاتلنا ف سن صغير
نعرف نستحمل ونشيل
حد تانى كان دماغه لسعت
او جراله حاجة
وأعتقد انها صح جدااااا

شفت ناس كتير حواليا
ف محن مشابهة
تعب وانهار
وفقد ايمانه بمبادىء كتير
ومبقاش عارف يرجع زى الاول تانى


الحمدلله
ألف مليون مرة

و الحضن موجود ومتحوش لحد ما أشوفك
قريب ان شاء الله يا حبيبتى

:)

صبحيلى بقى
على نصك الحلو
اللى إنتى نصه ... الاحلى

برغم مرور السنين وقسوتهاوبالرغم من معرفة بعض التفاصيل لكن امام كلمات البوست شعرت باننى اول مرة اعرف بالقصة واحتبست الدموع وزادات المرارة بالحلق وشعرت بان الانسان ضعيف بكل ما تحمل الكلمة من معنى ، لكن هناك واحد اقوى من الجميع لا يرضى بظلم عباده يؤخر الحساب والعقاب الى يوم تشخص فيه الابصار.
فكونى واثقة من عدله وانصافه لكى مهما طالت الايام.
وادعو الله عز وجل ان يقر عينكى برؤيته قريبا
ولا تخافى ولا تحزنى فعسى ان تكرهى شيئا ويكون فيه الخير .

nona146
-------

ربنا يحفظلك ولادك من كل شر
ويطمنك عليهم دايما

منتيش هبلة ولا حاجة
انتى ام
ودا الطبيعى

اللى مش عادى
هو العكس
انك متقلقيش وتخافى وتتخضى
وتشيلى الهم مهما كبروا

ميرسى ع الدعوة
ومعلش وجعت قلبك

:)

مهندس مصرى
----------

ميحرمنيش منك يا محمد

وبقول كدا برضو معاك
ربنا أعلم بالخير فين فعلا

:)

أفكار مبعثرة
------------


ازيك يا فوكيرة

انتى كتبتى احساسى
وانا بكتب البوست فعلا


كل سنة كنت ببقى حزينة اكتر
المرة دى حاسة بفرق شوية
معرفش لأن الوقت بيحل كل معضلة
ولاّ إيه ؟

بس حاسة ان ربنا بيسندنى
كل ما يوسف يوحشنى
وازعل
افتكر ان الحاصل دا لمصلحته
فبطل أحزن ...
دايما اردد الآية

وأوحينا إلى أم موسى
أن أرضعيه فإذا خفت عليه
فألقيه في اليم
ولا تخافي ولا تحزني
إنا رادوه إليك
وجاعلوه من المرسلين


زمان كان فيه صبر
بس معاه خوف وحزن

دلوقتى فيه صبر
و مفيش خوف ولا حزن

فيه شجن
ووجع أمهاتى مقدرش أمنعه
ولا اخبيه

وبس


الحمدلله


نورتينى يا فوكيرتى

Mohamed Amer
------------

ميرسى يا محمد
كلك ذوق

:)

همس الاحباب
---------

يا خراااااااااشى يا خالد
انتا حالف ما تعلق الا ف بوست يوسيفيات وبس ولاّ إيه ؟!!!!

حمدلله ع السلامة يا غالى
وحشتنىىىىىى جدا
ووحشتنا كلنا

هنشوفك قريب
ولاّ لسه تقلان علينا ؟!!

مش عاوزة أغلس عليك
بس انتا بجد وحشتنا قوى


انتا قريت الكلام بقلب الاب
وقلب الاخ كمان
عشان كدا انوجعت

انا كويسة
بفضل ربنا
وبيوسف
وبيكم

ربنا ما يحرمنى من طلتك عليا

الحاجه الوحيده اللى خلتنى اقعد على الكمبوتر واكتب ان فيه بوست ليوسف لان البرد مع المذاكره عاملين احلى واجب معايا

ستيته قالت كل اللى فى نفسى بصراحه

بس فيه كلمه بتزن فى دماغى وعايزه اقولهالك
ومش عارفه انا ليه مقتنعه بيها قوى كده
(يوسف هيرجع ) اصل يابنتى ربك اسمه العدل
والله ما هيرضيه كسر خاطرك انتى وابنك
وهيجمعكم باذن الله


بحبك ياقلب البحر وبحب يوسفك جداااااااااااا

الأخ الغير معرف
---------------

أيوه حضرتك
انا ... مستفيدة
و بشحت ع الولد
و عاوزة أعيش ف الدور
و بقبض على كل تعليق
ربع جنيه مخروم

انتا ايه مشكلتك بقى ؟؟!!

والله انتم كمان وحشتونى وعالم التدوين كله وحشنى بجد بس غصب عنى ربنا العالم بكم المشاكل والضغوط الفترة الحالية
ومع ذلك لسه عايش وحاسس ان ربنا كريم وهيعديها على خير واكيد هنشوفكم قريب باذن الله
اما البوست فكان لازم يتعلق عليه لاسباب كتير جدا الواضح ان الواحد لما يكون فى شدة او محنة بيحس قد ايه ان ربنا كريم ورحيم بعباده فعلشان كده فبصبرك وبصبر نفسى ههههههههه
شايفة لسه بضحك برضه
تحياتى

زي النهاردة وقبل النهاردة السنة الجاية تكوني مع يوسف في الصورة في برواز واحد يا أم يوسف

وحشتينى جدا
ومتقلقيش يا تيما
هانت خلاص
كبيرها قوى سنة بالكتير
وهتلاقى شاب زى الفل بيدق بابك دايما وبياخدك من ايدك وينطلق

العصفور الصغنن خلاص بيكبر
وبأيديه هيكسر قبضانهويطير بعيد
صحيح هيحافظ عالوصل
والمودة والعشرة
وهيحتويهم كلهم
ف وقت من الاوقات هتلاقيه بيدق بابك
ويقولك تعالى نحقق اللى فات ونعوض كل اللى بنتمناه

هتفرحى قريب قوى يا فاتيما
ان شاء الله

مش بطفل صغير
لا
بشاب بملامح رجل صغير

أسد يرعى كل من حوله
يحيط الكل بالحب والرعاية
ومامتك هتفرح قوى
ودخوله هيبقى الطبطبة اللى نفسها فيها

هيحنحن عليكم وهياخد من دفئكم
وهيراعى اللى ربوه
واللى كمان بيحبوه
وعلى رغم الخلافات
إلا انك هتلاقى شاب يعرف يمسك العصاية من النص

الفراشة قربت تكبر وتخرج بره الشرنقة

ربنا يقر عيونك بيه
عيونك شبه عيونه قوى يا فاتيما
مليانين حب وذكاء وطيبة

ربنا يخليكم لبعض
وحشتينى قد الدنيا
وهتفضلى روح قلبنا كلنا
يا حبيبة الكل يا غالية

تحياتى العميقة
هبة

أمن يجيب المضطر ويكشف السوء

ان ربك يخلق ما يشاء ويختار

وما تدرى نفس ما اخفى لهم من قرة اعين

=========

ثقتى ان اعمال القلوب بيد اصبعين الرحمن يقلبها كيف يشاء وهو بكرمه ورحمته لن يدير قلبه عنك ابدا

========
ان الله يمهل للظالم حتى اذا اخذه لم يفلته

مسا الخير فاتيما
مش عارفه اقولك ايه ...كتير اتأثرت
بهذا البوست مش عارفه لاني ام يمكن وتخيلت
اني في هذا الموقف ..لكن عايزه اقول لك
شئ انا رأيته بنفسي لمشكله مماثله بالظبط
وارجوا ان تصل اليك سريعا ...الوقت الذي يمر به يوسف هو ما نسميه النقش ع الحجر
بمعني اي تأثير عليه سيصل سريعا ويدخل وجدانه ..انا مش بخوفك قد ما انا عايزه اساعدك وانصحك علي خطوه لابد منها ..المشكله المماثله كانت ابنه يعني بنت مش ولد ولما كبرت ارادت الام ان تراها في المدرسه وكانت الابنه وصلت لمرحله الثانويه وعندما رأتها الابنه
قالت للمديره هذه ليست امي وارجوك لا تخرجيني مره تانيه من الفصل لهذا السبب
فارجوك اذا كنت حريصه الا تري هذا اليوم حاربي و ادخلي المعارك حتي اذا كان هناك لهيب من النار حتي اذا نفذت الاموال ... ليس هناك اسوأ من لحظه الندم عندما نقول يا ريتنا
علي فكره يا فاتيما لك الحريه في نشر هذا التعليق او منعه هذه نصيحه انسانيه ليست اكثر
تحياتي

ربنا يفرحك قريب يارب يارب, وتشوفي يوسف بين احضانك, وهدعيلك ربنا يفرح قلبك بيه, وعلي فكره انا كمان لما ربنا يرزقني بالخلف الصالح لأني كل مااحمل البيبي ينزل هسميه يوسف بردوا, ادعيلي معكي يافاتيما, يارب تشوف يوسف احلي انسان فى الدنيا؟, وعلي فكره الطفل مهما حد فهمه حاجه وتخيلنا انه مصدقه, قلبه دليله لأنه برئ.

كل كتاباتك كوم و كلامك عن يوسف كوم تاني..حاجة كدة بتدخل على القلب تعصره عصر..مفيش بوست عن يوسف الا و أبكاني و حسسني بمدى صبرك و قوة احتمالك و خلاني أشكر ربنا كتير قوي قوي على حاجات أنا فاكراها تعباني وهي من نعم ربنا عليا..فعلا ربنا بيبتلي كل واحد على قد معزته عنده!!لما بتخيل نفسي في موقفك بحس اني مستحيل أعمل أي حاجة من اللي انتي بتعمليها و لا أصبر صبرك و لا أرضى رضاكي و لذلك فأنا أتفق مع أستاذ ابراهيم في حاجتين..
أولهم أنك فعلا روح قلب الملايكة
تاني حاجة انك تحاولي تقربي ليوسف و تخديه في حضنك و لو مرة واحدة..زمن طويل مر يا فاتيما و أينعم الزمن مش بيغير طبع الناس بس ممكن يخليهم أهدى و أكتر حكمة.
انتي أدرى طبعاً و أعتبري كلامي ده حلم بجد بحلمهولك على طول.
خدي بالك من نفسك

بسم الله ماشاء الله زى القمر ولازم يكون زى القمر لانه شبهك وباين واخد روحك الخفيفة
يارييت تجمعنا بؤجة جمعه وتشوفه معاكى اتما انتى ليه لم تصحبيه معاكى لازم خايفة على جماله ليكى حق يا طمطم

اسفه ع الخضه واللهي ماكان قصدي
كمان متعرفيش اني من تدويناتك اعرف سلوبتاته ههههههههه علشان تعرفي اني مكشوف عني الحجاب بس ههههه احمد ابن اخويا عنده نفس السلوبت فانا رسمت سلوبت احمد لاني ربنا عالم يوسف غالي عليه زي بوندع حبيبي بالظبط حتي بوندع بيلبسها صيف وشتا برضه
واسفه تاني علي الخضه وحياة ماما ماكان قصدي (وش خدوده حمرا) :d

بتتخلى عنه ..
عشان يرجعلك تانى
................................

( فرجعناك إلى أمك كي تقر عينها ولا تحزن )
اللهم آمين اللهم رد يوسف الى ام يوسف رداً جميلاً طيباً كما رردت موسى الى ام موسى واصلح لهما الاحوال واسعد قلبيهما

لولا

شقيقة الروح

مش عارفة بجد اكتب اقول ايه
انا بس عايزة امسك ايديكي اوي
وابص جوة قلب قلب عنيكي
واُشهد ربنا اني احبك فيه

دايما على بالي
دايما بدعيلك

ربنا يسعدك حبيبتي
ويرضيكي باللي يرضيه
:*

دول عرايس معروضين على

وبما إنى مش لى فى النظام وقلبى أبيض
وبتجينى كرشة نفس
قلت أمررهم ليسوفه
أهى المصلحة واحدة برضه

ونفع واستنفع
هو يلاقى حتتين حلوين علشانه وأنا أخلص منهن

كل سنه وهو طيب وانت طيبه يا اختي العزيزه وربنا يرده ليكي رد جميلا دون ان ينقطع عن والده ودون ان يمنع عنك
وربنا يكتب ليه الخير في اي مكان يتواجد فيه
احيانا بنكون مجبرين ان احنا نبعد عن اولادنا واحيانا بيكونوا هما مجبرين انهم يبعدوا عننا وعلى فكره انت عندك ميزه حلوه ان يوسف عارف ان ماما موجوده واتعامل معاها واكيد هتفضل في باله طول عمره
تقبلي تحياتي

إرسال تعليق