.

.

أيـن كــوبــونـاتــى يا غـجـــر ؟!!  

Posted by: فاتيما in






يا صباح الفل 
و الخير و الهنا
والحرية و العزة و الكرامة 
والورد اللى فتّح ف جناين مصر 
و فتحّ ف كل شوارعها يا عيااااال 


يا لهوى 
انا عاوزة أركز قدر الممكن 
عشان اعرف أحكى 
و اوصف امبارح 
و عظمة امبارح 
وشياكة امبارح 
وروعة امبارح 
وجمال امبارح ...لأ 
بلاش جمال دا خاااالص 
ملوش محل م الإعراب ف اليوم دا بتاتاااااا




امبارح كان اول عيد للثورة 
و (عيد)هنا كما يقول طرفاء تويتر 
 ... يعنى فعل أمر 
يعنى احنا نازلين و ف نيتنا 
نعيد 25 يناير من تانى 
بشكل مختلف يمكن جايز 
بس محناش نازلين نحتفل ونفرقع البلالين
ونجرى نسنتر روحنا تحت الطيارات 
عشان ناخد كوبون وجايزة 





معرفش الغالبية
كان ايه تفكيرها بالضبط
بس الأستعدادت كانت تجرى 
على قدم وساق ومكتوبة ف كل حتة
وتنبىء بيوم عظيم




وطبعا مشوب بحملات التخويف 
من حريك الكاااااهرة 
و اللى كل ما حد يشوفنى 
من المواطنين الشرفاء ف الشارع او الشغل 
يقولى يا أستاااذة 
سلمية ....سلمية
وكأنى ماسكة ف ايدى ازايز المولوتوف 
وانا خارجة وانا راجعة 




منكرش انى لما عرفت ان الإخوان 
هيستلموا حراسة الميدان أنقبضت 
بس توقعت انهم هيمشوا ع العصر
او المغرب بالكتير كما هو الحال
والميدان يرجع لصحابه الأصليين
فمركزتش قوى 
انما عملت حسابى برضو انزل 
عشرة عشان اكون هناك عشرة ونص 
وافضل واقفة ف مكانى
ف انتظار الاحباب يتوافدون 



و كالعادة برضو ماما حبيبتشى
و تعليماتها و تحذيراتها 
خلى بالك من نفسك 
انتى لابسة تقيل تحت الهدوم  ؟
ابقى ردى ع الموبايل بسرعة
أى حاجة تركبى العجل ف رجلك وتجرى
آخرك عشرة ونص وبعدين انتى عارفة








يافطتى على كتفى 
وايمانى بثورتى
و حماسى ف قلبى
و ع الميدان طوالى 
ومن بوابة المتحف كنت داخلة 
التفتيش كان كويس سريع و محدش غلس
و ف دقيقة كنت بتجه لمكانى المعتاد 
وعنده لقيت منصة منصوبة 
ومعرفش مين دول
 بس كان فيه واحدة ست
عمالة تشتم بألفاظ بس مش اللى هيا
لما ركزت معاها شوية لقيتها لابسة اسود 
وواضح من اسلوب كلامها انها ست بنت بلد 
فقولت اكيد من أهالى الشهدا 
ودى طريقتها ف التعبير عن غضبها
والله يكون ف عونها 
وعون كل اهل شهيد ومصاب ومفقود 
لما احنا محروقين عليهم كدا
اومال هما احساسهم يبقى شكله ايه ؟!!





ازهرى ومينا والعبدة لله 
اتلمينا على بعضينا 
لقينا مسيرة الأزهر طلعت م الفجر اصلا 
و وصلت الميدان ...
فقررنا نمشى ف مسيرة الجيزة 
عند مسجد الأستقامة
ركبنا المترو 
و بعد شوية كنا عند المسجد 





العدد كان كويس 
بس مكنش زى ما توقعت  
لكن فى أدبيات المسيرات 
مش مهم البدايات
 والمهم نهايتها هتبقى ازاى 
و الوشوش والحماسة كانت مبشرة
بإننا مع كل خطوة هنزيد 
ونكتر وصوتنا هيعلى 
وهذا ما حدث 




اتحركنا من قصاد المسجد 
بعد ما الناس صلت صلاة الضهر
اتجهنا لشارع مراد 
ومشينا جنب سور جنينة الحيوانات
وصلنا لتمثال نهضة مصر 
و بعدها حودنا على جامعة القاهرة
عدينا حاسبات ومعلومات و دخلنا الدقى
وبدأ العدد يكبر بشكل رهيب معرفش ازاى 
فجأة على ما وصلنا للتقاطع 
وببص ورايا وقدامى 
اتخضييييت 

 

 
احنا كنا واقفين عند الراجل بتاع السمك 
اللى عند التقاطع 
وشايفين اول راية تقريبا بترفرف 
عند شيراتون الجزيرة هناااااااااك
وكان لسه ورانا ناس ياما 




يا خراااااابى ...
العدد 
والحضور كان راااااائع
ايه الناس الرهيييييبة دى كلها 
و ف مسيرة واحدة 
مينا قالى ان يوم 28 كان العدد زى كدا 
والمنظر كان زى كدا 
وكأن الأيام بتنادى بعضها 




المسيرة ضمت كل الاشكال والاطياف 
وكل المستويات والأعمار 
الوجوه مكنتش بتضحك من فرحة 
بعيد وبالونات وعبط
لأ ..كنا متحمسين ومستبشرين
مبسوطين ببعض 
وبمنظرنا 





الولاد فردت علم مصر 
بطول شارع التحرير
كانوا بيحركوا العلم 
و دايما الحركة دى بتفكرنى بالحمام 
و رفرفة جناحاته 
واحدة م الواقفين بتحتفى بينا
رمت بومبونى (مش بتاع شفيق) ع العلم 
فالشباب حركوا العلم 
و وزعوه على بعض وهما مبتسمين 





الناس ف البيوت كانت بتحيينا م البلكونات 
اسر بحالها كانت واقفة بكل أفرادها 
تهتف معانا وتشاورلنا بعلامة النصر
و واحدة ست اتمنى لو الاقى صورتها 
كانت واقفة بتشاورلنا بإيشاربها 
و قعدت تبكى و تمسح دموعها 
و بكاها أثر ف اللى ماشيين من كتر صدقه






العالم كانت حلوة قوى 
ووشها بيطفح صدق وطيبة 
كل شوية كنت بعلق واقول
احنا شعب طيب و غلبان 
اغلبنا لا عاوز كراسى ولا مناصب 
عاوز يعيش كويس وبس 
ومع ذلك دايما ناخد أقل القليل




عدينا كوبرى الجلاء 
والمسيرة بقت وهم ... خيال 
بعد انضمام مسيرات تانية ليها 
وبقت بتمشى ببطء شديد .. خطوة خطوة 
عدينا الاوبرا ف وقت طويل 
و على مدد الشوف 
كان اسدين قصر النيل منتظرين الحشود 
و بيبتسموا لأول مرة 
من احداث محمد محمود 




كان فيه نقر على الطبول 
ومسيرة جنائزية بنعوش رمزية للشهداء 
وف وسط كوبرى قصر النيل 
كانت وقفة للحداد وتذكر الارواح الطاهرة 
اللى قابلت ربها ف هذا المكان 
وكوبرى قصر النيل المشهور بوقفة الحبيبة
النهاردة كان على وعد 
مع اكبر معاد غرامى ف تاريخه




بعبور قصر النيل .... كان واضح 
ان الميدان مفيهوش مكان لرجل 
و بمكالمات بالعافية مع ناس جوا 
كانت النصيحة 
اننا مندخلش التحرير دلوقتى 
لأن مفيش حتة نقف فيها اصلا 

 

وكان القرار بالقعاد ع البورصة 
لحين روقان الميدان 
وع البورصة شفنا المنظر ف التلفزيونات
وكان مبهرااااااا كما يليق و ينبغى 
و على 8 ونص تسعة قدرنا نرجع 
وندخل التحرير
و نعرف نمشى فيه شوية 
لحد معاد مرواحى ..



عدة ملاحظات بقى 
بس اولهم و أهمهم 
انى فرحاااااااااااانة قوى 




فرحانة بالشعب الغريب العجيب
الجميل دا جوا و برا 
فرحة مش طبيعية ... بتطمنى 
كل ما اجى اكتئب
واقول خلاص 
هيا كدا خلصت و بتجيب ضرفها 
الاقى ان لسه الروح موجودة 
وفيه امل 



هتكلم عن مسيرتى اللى مشيت فيها 
ومعرفش الباقى ايه
بس أتصوره واحد أو مشابه  
كل الشعب ... كان ف المسيرة 
كان ف الشارع 
كان على وشه ملامح غضب وإصرار 
مش ملامح حد عاوز يمسك علم ويهيص 




الناس دى ادتنى أمل 
ان الثورة مستمرة 
ومش أكليشيه 
او شعار و بيتقال


لأ 

الثورة مستمرة 
وكل ما هيفطسوها 
هتخرج م الإنعاش متمسكة بالحياة 
ومصرة تقوم من رقدتها 


المشهد امبارح 
بيقول 


ان المجد بحق للشهداء 
اللى منعرفش غير اساميهم 
وحكايات بيقولوها اهاليهم وأصحابهم 
لكن فجأة بقوا حتة مننا 
وتارهم تارنا 




 
المنظر امبارح بيقول 
ان التيار المتأسلم مهما نفوذه زاد 
له حد يقف عنده و برضو الشعب غالب 


وبالمناسبة الناس دى 
اللى جت الميدان منهم يعنى 
هما معندهموش دم ؟!!
يعنى مشغلين اغانى و روقان 
وكأنه إحتفال و فرح 
وبيقولوا كان فيه عريس وعروسة 
اتجوزوا على منصة الاخوان
ولنا هنا وقفة وسؤال ...





هوه ينفع اروح ازور ناس مات لهم شهيد 
وف  السنوية الاولى 
أقولهم عاوز اعمل فرحى ف الصالة 
و أقف أهيص و عادى كدا .... ؟!!




يعنى احنا فاهمين انها حركات 
و جايلهم الأوامر بتحجيم اليوم
واظهارها وكأنها هيصة واحتفالية 
وكام صورة وكام فضائية تصور عشان 
مولانا الذى ف المجلس يبقى راضى عنهم 
ولا تعليق أبيح بقى عشان مبوظش البوست 



اول مرة معرفش اقعد ف مكانى 
ومبقاش زعلانة خالص
بس اللى ضايقنى ان اهل الميدان 
معرفتش اشوفهم ولا يشوفونى ف اليوم دا 





الشبكة بتاعت الموبايل كانت زفتتتتت
ومعرفتش اوصل لناس حلوة كتير 
زى حفيدة عرابى 
بس معلش يا فيدو
عزائى اننا كنا ف نفس المكان






ع البورصة دارت نقاشات كتييير 
عن البرادعى و انسحابه 
و التيار الأسلامى وتوغله
والبرلمان بشخوصه و قفشات جلساته
و نوادره و فكاهياته اللى فاضلها 
طرطور جحا ابو شراشيب 


و كلام عن ام كل المجالس بقى 
سواء كان مجلس عسكر 
ولا مجلس وزرا 
ولا مجلس شعب 
ولا مجلس اشتشارى حضرتك
واللى ما فيهم حد عدل يبل الريق 
وكلهم متجمعين على وكستنا و بس





العيال الثوار ادرينالينهم على 
حتى و احنا ع القهوة قاعدين بنريح
لقينا مجموعة وقفت تهتف
ف قلب البورصة





اللى بيتكلم عن عجلة الإنتاج 
و الثورة اللى وقفت حال البلد 
احب اقولهم ان وسط البلد وحدها امبارح 
كانت منتعشة اقتصاديا جداااا
بسبب زوار المطرح
و اكلهم وشربهم ومتطلبات الإعتصام 
و ممكن اصحاب المحلات والقهاوى والمطاعم 
يقعدوا على أثر ذلك اسبوع اسبوعين قدام 
فمحدش يفلقنا بحكاية وقف الحال 
دى تانى الله يكرمكم بقى 








صحبتى كانت كالعادة طيبة 
مينا وأزهرى وابراهيم رزق وساليناز
و اسلام و ملاك أصدقاء مينا
والواد المجدع وليييييد الدوغرى
ووليد كنج توت و رفاقه الطيبين 
اللى بشوفهم دايما ف ايام الخير دى 


و ناس شفناهم فى احلى صدفة 
زى سامح عزت خواطر خاطر ومراته وبنته 
وأكيد كان فيه ناس كتيييير 
حاضرة معانا على انبل حتة أرض ف مصر



ملحوظة على جنب 
عند كلية حاسبات ومعلومات 
جالى رسالة من ارق مخلوقات الله
هبة bobo
فرحتنى و خلتنى كنت هتنطنط 
بمحتوى ما كُتب فيها 
وخلت لليوم معنى وطعم اجمل 
:)




احد القساوسة كان ماشى جنبنا 
على كوبرى قصر النيل 
وهوه شايل صورة الشيخ عماد عفت 
خطف قلوبنا كلنا بمنظره





 أقنعة الشهداء كانت مبهرة
كانت الناس احيانا تلبسها بالعكس 
فتكتشف وانتا ماشى بمدى رهبة الموقف 
و كأن الشهدا ماشيين معانا 
و بيبصولنا  ...








مشهد مبنى الحزب الوطنى 
ع الكورنيش وهو محروق
منظره من بعيد كدا ما زال يحمل دلالة 
و يؤكدها و من سخريات الثورة والقدر 
ان الخراب والدمار يحمل ف مضمونه 
الجمال والحق
مع ان المفروض العكس !!





الواد أزهرى مش ناوى يلم التعابين 
و كل ما اقول الثورة غيرته 
يطلع برضو اللى ف القلب ف القلب 
و عدائه لجمعية المرأة المتوحشة 
واعضائها كامن بعمق عميك و مترستق
مما انضرنى اهتف ضده  اكتر من مرة
قول 
إتكلم 
ازهرى لازم يتسلم 
ولمين وفين .. معرفش 
بس هوه كدا إتصرفوا





رامى رغم انطحانه ف الشغل 
أصر يخرج منه ويجيلنا 
فخلى لليوم خاتمة أجمل 
بسكوتة إبتدته بصباحها الناعم 
و ازهرى آخر وش شفته 
قبل ما اطلع لماما 
واخد الطريحة المعتااااااادة 
 :)






صديقة لمينا و بلدياته اسمها امانى
شفتها مرة واحدة وحيدة 
وكانت انسانة لطيفة جدا 
لقيت مينا بيوصلى سلامها 
وبيقولى انها وصته عليا 
يخلى باله منى كويس واحنا ماشيين 
او ف التحرير ..
بجد 
انا معرفتش ارد 
بس يا جماعة امانة عليكم 
لما ف مرة آجى هنا واقول انى مضايقة 
ابقوا اضربونى تلاتين قلم 
وقولولى افتكرى ان فيه ناس حلوة قوى 
بتسأل عليكى وتوصى عليكى 
وانتى متعرفيش و لا تتخيلى 
 بس عموما الواد منامينو أصلااا
كل اصدقائه طيبين زيه بشكل رهيب 
والطيور على اشكالها كما يقال








ف التحرير بليل كان فيه تحذيرات
من التحرش 
كنت بضحك ف سرى  
لأنى بتعتبر التحرير فى هذه الأيام 
وكأنه اتوبيس كبييييير شويتين 
فهل يعقل الا يستغله ببشاعة
المرضى النفسيين ؟



وبموناسبة التحبرش بقى 
لقد تم معاكستى من حصان اسود 
جارر حنطور على مدخل كوبرى قصر النيل
واحنا منتظرين الموكب يمشى 
الحصان كان عاتشفى جدااا وحونين
ومتهيألى جبناله خضة
اكمن البشر حواليه كانوا كتير 
و كلمة ف سركو 
بموت ف الحصنة السودا وكنت هضعف
و قعدت اطبطب عليه واكلمه
و لو كنت فضلت خمس دقايق كمان 
كان هيطلب ايدى







انا كنت ناوية و موصية العيال 
يختارولى حتة اقف فيها تحت الطيارة 
عشان القفلى كوبون 
والواد وليد الدوغرى بيجهز للجواز 
وكان عاوز بوتجاز 4 شعلة او تلاجة 
بس احنا انضحك علينا و للمررررررة الألف
من المجلس العسكرى
................ إيه ................
فين الكوبونات يا غجر  ؟
فين الهدايا والأكروبات ؟
و فين المياه الملونة اللى هيرشوها علينا 
و كيف ازاى يعنى ينفضوا للمتظاهرين كدا !




طب دا اسميه ايه ؟!!!!
دا اسمه اهدار للأعلان الدستورى 
و اسمه التفاف على اهداف الثورة
وطرمخة على مطالب الشعب المصرى
أين كوبوناتى ؟!!!




 
احنا بعد المسيرة قعدنا على قهوة 
نفول قهوة وشاى و سندوتشات 
ورغم المشى الكتير الواحد 
مكنش حاسس بأى تعب 
انما اول ما قعدنا .. اختكو فيصت
الله يكون ف عون الناس اللى باتت 
ولسه هتبات كمان .. بجد 




انا روحت خلصاااااااااانة 
و قاوحت وقعدت اتابع الفضائيات 
واعمل يافطة استعد بيها 
لمرواح التحرير بعد الشغل 
وكل يوم كدا يا غجررررررررررر
لحد ما نشوف آخرها 




وهنا السؤال الاهم  بقى
اللى طرح نفسه امبارح 
وعلطول بينسئل 


وبعديييييييييييييين؟؟


كلنا امبارح كنا بنبص لبعض 
ونسأل
وبعدين ؟





العدد الرهيب اللى نزل دا 
وهذا المشهد كيف سيتم الاستفادة منه 
عشان نحرك الموقف ؟




وبعدين ؟



انا شخصياً معنديش اجابة واضحة 
وللأسف هذه مشكلة الثورة بتاعتنا 
مفيش قيادة واضحة 
و تملى بشوف الثورة دى بمن فيها 
زى دايرة  كبيرة
فيه ناس عند الأطراف .. دورهم بسيط 
وفيه ناس ف المنتصف .. بقوى مختلفة 
وفيه ناس ف المركز بتاعها 
هما دول الذين يعّول عليهم 
ف أى خطوة جاية 





منيش قريبة من المركز و اللى فيه 
لكنى زى باقى سكان الدايرة 
مسخرة بما املكه لقرارهم لو اقتنعت بيه 
ومستعدة للتحرك ف أى وقت 
و متحمسة 
وايمانى بالثورة لا يفتر
وبتمنى المرة دى نستفيد مما فات 
و يبقى تحركنا زى هتافنا 




المرة دى بجــد 
مش هنسيبها لحــد 




آخر ما سمعته قبل مغادرة الميدان 
ان فيه اعتصام .. قابل للزيادة
ومعرفش العدد كافى ولا كويس 
بس اتصور ان الآليات المرة دى لازم تتطور
والا يبقى بنهدر الفرصة للمرة الألف 






مكاسب 25 يناير 2012 
اهمها فى رأيى



ان الثورة ف القلوب ما زالت متقدة 
ومنتظرة بس التوقيت تانى اللى يجمعنا 
واللى قاله ازهرى قبل المرواح 
انه يكفيه ان الحاضرين نسفوا 
فكرة انها .... احتفالية 
وان كل حاجة زى الفل ومية مية 
والمجلس حبيبنا و ربنا يخليه للشعب 







مكسب كمان أتصوره بقى واضح 
برلمان الغجر دهون هينفضح فضيحة 
السمكة ف طاسة القلية قريباااااا
والناس امبارح عرفته حجمه الحقيقى
وفهمته انها الأصل والأساس
ولو نفخت فيه هتطيره 
ولو شرعى و ناجح ميت ألف مرة 






حاجة كمان لفتت نظرى 
ويمكن لإنى ام :)
كم الاطفال اللى كان موجود 
شجاعة الأباء والامهات ف مجايبهم
ثم اداء الاطفال نفسهم 
وحماسهم 
الثورة بتكبر ف الولاد دى كل يوم 
الكرامة والعزة والمعانى الحلوة 
اللى عمرنا واحنا بنكبر ما دوقنا طعمها 
كانت امبارح بادية على الوجوه
حتى الولاد اللى بيتوصفوا ظلماً و عبثا 
بإنهم أطفال الشوارع
كانوا ملمومين على بعض 
وواقفين بيهتفوا زينا وبيقلدونا





البلد دى أجمل بلد ف الدنيا 
وناسها والله 
اطيب ناس 
و كل ما أشوف حد  أسأله 
مسيرتك جت منين و كانت زى بتاعتنا 
و لا لأ ... مسيرتى أطول واحدة 
و تعرف مسيرتكو 
تبقى اطول من مسيرتنا 
زى ما مسيرتنا بقت أطول من مسيرتكو ... 
وتقولها عشر مرات ... ومتغلطشى ؟!!!





 اغرب ما ف الحدوتة
ان فجأة مفيش بلطجية 
وفجأة الداخلية مشفناش ظلها
وفجأة العسكر تلاشوا ف الهواء 
وفجأة رغم الزحام الرهيب 
الدنيا كانت رايقة وبلا حوادث تذكر 
رغم ان المنطقة بتاعت التحرير
وما حولها كانت مبدورة بشر 




حقيقتتتتن
انا مزبهللللللللة جدا 





انما هنقول ايه سبحان الله 
العدد اللى كنا بنتذل بيه ايام المخلوع
هوه دلوقتى قمة 
الامان والطمأنينة و الإنضباط !!


وكل مرة خضونا بقى 
عشان 
مننزلشى كدا 


معرفش
بكرة ايه 
و لا آخرتها كمان
بس اللى أعرفه اننا توحدنا على هدف 
ومطلب و فاضلنا القرار 




توحدنا على القصاص 
والعدل 
والكرامة
و عندنا المكان .. 
كل ميدان تحرير ف مصر 
و كل اللى فاضلنا 
أننا نتفق سوا ع المعاد و الطريقة 
و للأسف لحد دلوقتى ...
 مش مركزين





وإلى أن نركز 
هننزل الميدان 
و نعلى صوتنا بالهتاف 
و قول اتكلم السلطة لازم تتسلم 




و أجمل هتاف بقوله 
ولحد دلوقتى
ساكنى قلبى و بيرجه رج 



جوا كنيسة و جوا الازهر
يسقط 
يسـقـط 
حـكم العسكـر 


وآه صحيح 
أين كوبوناتى يا غجر  ؟!!!





--------------------------------------
الصورة منقولة من الجرايد الألكترونية 
الشروق - الدستور - البديل
ومواقع النت المختلفة  
--------------------------------------------------

This entry was posted on الخميس, يناير 26, 2012 and is filed under . You can leave a response and follow any responses to this entry through the .

17 كــــلام بيطــبطـــب عـــلى قــــلبى و روحــــى

يوم جميل قوي يا فاتيما
بس ضايقني قوي اللي كاتباه خيخة
كانت بتدور عليكي و ملقتكيش
خصوصاً إن الموضوع ده اتكرر كذا مرة إمبارح مع مصريات و أجانب

بس الحشود الثورية دي تفرح و تؤكد إن الثورة مستمرة و ستنتصر بإذن الله
و مش عارف متحاملة على البرلمان ليه مع إن الجلسة اللي ناقش فيها حقوق الشهداء كانت جميلة و مبشرة بكل خير و تؤكد إن مجلس الشعب مع الثورة مش ضدها يا فاتيما
هو ممكن يكون أبطأ من المعدل اللي الثوار عايزينه بس معانا مش ضدنا
تفائلي خير
و ثورتنا ستنتصر بإذن الله

هو ايه موضوع الكوبونات اللي الناس بتتكلم فيه ده اصلاً؟
المهم واضح كدة أن كل مسيرات محافظة الجيزة اتلمت على كوبري قصر النيل في وقت واحد لأني برضه كنت موجودة في و حاضرة اللي بتوصفيه...بس كنت في مسيرة مصطفى محمود و خدنا لفة و مشوار أطول شوية من اللي بتوصفيه.
و نفس السؤال سألته لنفسي برضه...و بعدين؟
ملحوظة سخيفة : الإخوان بالذات الشباب لابسين كابات أخضر غامق.
وفي إسكندرية قالوا أنهم لبسوا أصفر !!! ده من إيه ده إن شاء الله

ظاختي فاتيما ..
الفرحة كانت في البوست أكبر من إننا نعلق عليها أو نلغيها .. تحياتي لك .. ونسأل الله تعالى لكم الاستقرار والرفاهية والخير ...

بفرح بيكي في كل مرة بتوصفي احساسك من قلب قلب الثورة
ربنا يحفظك انتي وكل اللي شايل في قلبه حب البلد دي

ولو على الكوبونات
احلى كوبون هو كوبون مكتوب عليه
مبروك
كسبت ثورة مستمرة
:)

شوفي يا ستي

أنا زي حالاتك متفائل جدا ومنشكح أيما أنشكاح


لكن بصيت عند الشباب نكدوا عليا

مش أوي الصراحه

أصل اللي في دماغي في دماغي


بالمناسبه

قلمين تلاته حبر ولا جاف؟

فاتيما
روح قلب الملائكة

لو مش هتحلم معايا
مضطر احلم لوحدى
لكن فى الحلم حتى
عمرى ما هاحلم لنفسى
لو كنت راح افتش عن منصب و لا جاه
و اصاحب الحذر
ده انا ابق ماستحقش حلاوة الحياة
و ضحكة البشر
يا صاحبى يا صديقى
يا اللى طريقك طريقى
ده انا يوم ما اعيش لنفسى
ده يوم موتى الحقيقى

تصدقى يا فاتيما و الله العظيم انا سرحت و انا قاعد امبارح فى البورصة مع الاغنية دى لما كنته بتتكلموا عن دور الناس اللى بيسموهم الاغلبية الصامتة و مش حاسين بيكم سيطرت عليا الاغنية دى
فعلا امس كان يوم تاريخى يوم الرد على كل السفسطة
تصدقى الواحد مقدرش يقعد ساكت ساعة مظاهرة البورصة و قمت انا و ملاك نهتف فيها
فعلا الصحبة كانت حلوة قوى و ختمت بصحبة رامى لحد البيت
اما الناس اللى مبتكسفش على نفسها اللى كانوا مشغلين داليدا و بيحتفلوا بالافراح بينما الميدان ملىء بامهات الشهداء اقولهم
اللى اختشوا ماتوا
و هاقولك الكلمة اللى قلتها ليكى امس
انا لو كنت انتخبت النوعية دى
كنت انتحرت اسفل منصاتهم

الورد شم الندى و لبس قناع الملايكة
و تانى الطريق ابتدى ع الارض الشايكة
وقف راكب الموجة اللى مؤامرته حايكة
وقع غصبا عنه قناع و وش الملايكة
عجبى ؟؟؟؟
سلام يا ام جو و سلام كبير من ساليناز

بتخلينى اغيييييير اوى يا فاتيما كل

ما باجى هنا واشوف كلامك

واشوف فرحتك انا نفسى اروح اوى يوم

واحد حتى لكن للاسف المبدأمرفووض

باتاتا ف البيت :(((

الله يفرحك فرحة كبيرة قد كل العدد

اللى كان موجود واكتر

فرحتينى وادتينى امل اوى اوى ان ان

شاء الله بكرة هيبقى احلى

عارفة ليه علشان فيه قلوب حلوة

شايلاه بتوصلهولنا

ربنا يحميكى ويحمى كل الناس اللى ف

الميدان .

وسلميلى كتيييييير على كل حبايب

قلبك اللى بتشوفيهم كل يوم اما بتروحى

صحيح مش موجودة معاكوا بجسمى لكن

موجودة بقلبى ودعواتى ليكوا

وبصى بصة ف ايميلك ولو سمحتى

ماتتردديش ف الطلب اللى طلبته منك

بالله عليكى امنتك انا الامانة دى اوك

واخيرا بقه بحبك قد مابحب مصر

ويسقط يسقط حكم العسكر

اللي اتعلمناه في سنة فاتت هو لو كان الكل مجتمع وعلى قلب راجل واحد كل الرعاع و البلطجية و المتسلقين والعسكر بيتواروا يخافوا مننا
و كل ما نتفرق و كل حد يبقى مع نفسه نتبهدل و كلهم يطلعوا من جحورهم
اعتقد ان امبارح اكبر تعبير عن الاغلبية الصامتة و مطالبها
اكبر دليل ان الثورة مش بتاعت لا اخوان و لا نور و لا حتى 6 ابريل ولا حد الثورة بتاعت الشعب و اللي هيقرب منها الشعب مش هيسيبه
اتمنى يكون كل الطامعين بقى فاقوا ان كراسي برلمانهم الشعب هو اللي ساندها و لم اتغروا هيوقعهم على كفوف وشوشهم زي ما وقع اللي قبلهم
التوافق توحيد المطالب و مصلحة البلد لازم كلنا نحطها قدام عنينا علشان نعرف نجيب حقوقنا و نبني بلدنا على نضافة
اكيد امبارح كان يوم عظيم على كل الاصعدة معدن الشعب الحقيقي ظهر
من فرحتي بالناس دي كلها لقتني بقول هي الناس دي كلها عايشة في القاهرة ازاي؟ لازم يغيروا العاصمة علشان يخفوا ضغط البشر دي كلها:)
امنياتي كتير اوي واغلبها مستحيلة بس باتمنى و احلم , احلم 11 فبراير الجاي يكون للاحتفال بعد تحقيق كل مطالبنامن محاكمات و تسليم السلطة لسلطة مدنيةوالعسكر يرجعوا ثكناتهم , حلم مستحيل مش كده؟بس قلنا نحلم و نبص لقدام ومنقلقش ورانا شعب بيحمينا
ربنا يرحم الشهداء اللي لولاهم مكنش هنوصل لمنظر امبارح العظيم
تحياتي ليكي

لما بقرا كلامك يا طمطم بحس اني كنت معاكم في الميدان.. بس انا فعلا معاكم بقلبي، واللي مانعني الشديد القوي زي ما بيقولوا.. ربنا يقويكم ويجعل لكم نصيب من دعوات كل اللي قاعدين في البيوت وظروفهم مش سامحة انهم ينولوا شرف المشاركة ، لكن قلوبهم معاكم.. او مندوب من البيت نازل يشارك ويكفي عن باقي الافراد
ملحوظة على جنب برضه: فرحتك حسستني بالفرحة اكتر.. ربنا يخليكي ويباركلي فيكي.. بحبك

الحمد لله انك بخير
وعقبال ما نحتفل بجد يوم ما ناخد حق الشهداء وحقنا

بحبك ياقلب البحر
وياشمس التحرير :)

تعرفى
على الرغم منى إنى صاحب أكبر سيناريو يبان عليه إنه سوداوى بس برضه واثق بإذن الله من نجاحه ومتفااائل ببكرة
كل خطواتنا ثابتة
ومش بنرجع
مكاسبنا كتير
وأحلامنا أكبر
وإيماننا إن ربنا هينصرنا أكبر وأكبر

بكره جاى

صباح جميييل ع الكل
-----------------

هبقى أرد على تعليق تعليق
لما أرجع ان شاء الله

دلوقتى ع التحرير والمسيرات ..
إعتدااااال مارش


ربنا يخليكم ليا
فبالتالى هيخليكم لمصر
عشان اللى ملوش خير ف فاتيماااااااا
ملوش خير ف إييييييييه ..
أيون شاطرين

:))

صباح الفل

أروح ألبس بقى

سلااااام

انتي طالعة في أنهي مسيرة؟و حتبقي فين في التحرير؟

ال صحيح يا طماطم نفسك يبقى ايه فى الكوبون يتحقق؟ :)
كل سنه وانتى طيبه يا فتاه مدونتك كانت وحشانى قلت ادخل اغلس بس

للاسف انا بعيد عن القاهرة ومقدرش اكون فى التحرير باستمرار
واليوم ده فعلا على اد ما كنت خايفه منه على اد ما حمدت ربنا على انه عدى بشكل رائع وجميل

الحقيقه كلامك جميل اوى وخلانى احس انى كنت معاكو

ربنا يباركلك فاتيما وشكرا بجد على البوست الرائع

متفائله جدا وان شاء الله تكون السنادى خييييييير

بس نصبر شوية وكله هيتحقق مع اصرارنا

منتظرين الاخبارك منك بقى :)


تحياتى

انا كنت فى نفس المسيررررررررررررة دى بس انضممت اليها من الدقى من عند بتاع السمك برضو ... كنت انا وبابا و ماما
العدد كان رهيييييييييييييييييييييب وماكنش متوقع فرحت جدا انى قدرت انزل واشارك مع الناس بجد ... عديت ع هارديز كدا وبصيت من بعيد قلت يمكن الاقيكى ومش لاقيتك للاسف :(

انتى كويسه؟
طمنينا عليكى

إرسال تعليق