.

.

كـوبــرى قـصـــر النـيــــل  

Posted by: فاتيما in








كــان
يـامــا كـــان
سجـــل يا زمـــان
وإسمع منى الحـــدوتة




حـــدوتة نيـل أصـــيل
  فوق منه حطوا  
 قـــال إيــه شــوية حجر وحديد 




  
بقــوا يـــوم ورا يــوم 
و ســنة ورا ســنة
 رمــز و دليــل ع المخـلصـين 




 و حتــة حـديـد أيوه صحيح 
بس ليهــا قلــب و روح  وإيد
تضــم
و تســاع م الحبــايب ألـف ألفيـن




و ساعات
مــلايــيــن 




حــراسه بمرور الزمن
 أســود و مصنوعين م البرونز




و المخلوقين
من لحم و دم 




أولهم الراجل اللى خلى كل اسماعيل 
ييجى بعده
يشيل ف اوقات الصفا 
و الهزاز لقب ... أبو السباع






هذا الرجل و هو لسه فتى 
 ف لحظــة حِلم بمصر جنة
و أصــّر لما أمتلك يحقق كل ما ف خياله 




كان عاوزاها تبقى مش أقل من أوروبا
شافها تستاهل حضارة عمرانية
توازى ربع حضارتها الأنسانية 





ادى اوامره يتبنى جسر
عشان يقرب البعيد
و يخلى ما بين الضفتين عمار





ما بين عبور و حركة و تجارة 
و ناس رايحة جاية 




وأسود رابضين
ع أربع أركان




واللى بيلوم على الخديوى أسرافه
ييجى معايا و يحسبها
المبلغ ذاته اللى إنصرف لو اتوزع
على قرن ونص من الزمان
هيجيب همه ولا برضو هيقول ميجبش !!




 مكنش مجرد معبر
من ضفة لآخرى 
الكوبرى 
بنوره شق طريق للحرية




زمان كان ف خيالى 
مجرد حتة أرض و بيقولوا كان فيها
 قصر و بعدين اتهد و راح سكانه 
و اتمركزت فيه العساكر ف القشلاق



 
و كان عندى برضو
مجرد أثر 
و بييجى ف أفلامنا القديمة




هوه كان المطرح اللى فاتن حمامة
لطعت فيه عبدالحليم 
و قعد يا عينى يستناها
لحد ما جاله ضربة شمس




نفس المكان اللى إتسمى
كوبرى العشاق
عشان الحبيبة عليه ... بتتلاقى






هوه كمان اللى بيفسح فيه
ابو العيال ... العيال وأمهم
و تتعلق فيه العروسة وسط الزفة 
ف دراع عريسها بين الحبايب 
ويركب السايح حنطور و يتفسح




هوه اللى ف قلب الليل
جاله الحزين يبكى براحته 
قبل ما ضوء النهار يطلع
 ويفضح دمعته 
 


وياما عليه وقفوا
 اللى يطيروا طيارات 
وبالونات



و يرموا السنارات
و ياما سهروا شلة صحاب  
يضحكوا
ويطلعوا لسانهم للنكد




فكر العشرات ف الموت عليه
و فكر الملايين
 ف نعمة الحياة لما بصوا لنيله
 و جماله و حسوا ببهجة الدنيا 




و ف وسط المشاكل
مبقاش حد يقدر يقف عليه 
زى الاول يستمتع بنسمة الهوا
أو يتفائل بدنيته




على جزء منه قتلنى الحزن 
 لما عمرو
معرفش يتجوز منى 
و قرر ينهى حياته ف لحظة يأس 




قتلنى الحزن أكتر وأكتر
... لما الشهور عدت  
و قام الشعب بثورته 
 و قولت ف عقل بالى يومها
 ياااااااه يا عمرو 
لو كنت بس ... أستنيت شوية 
مش كان زمانك معاهم ؟




لكن ... النصيب





النصيب هوه 
اللى خلى الالاف تثــور 
و تنتفض ع الظـلم 
و ع الهـدف تتجمع






وتيجى من كل الشوارع 
وتتلم ف صفوف 
عشان تعدى للأمان 




 وقتها و لا زال ... الأمان  
كان يعنى
 التحرير  ...  و الميدان




ف أول الجسر كانت المعركة 
بين الغربان السود 
و بين أسراب اليمام




و ف نص المسافة 
  على صوت الآدان سجدوا لربهم 
و حي بعدها كل نفـر
 ع الجهاد 




و .... انطلقت
 رصاصات الغدر 
 



و طار أطهار الوطن بجناحات ع السما
و الباقى كمّل ... بقلبه الرقيق
 و داس ع كل غـراب
 سادد سكته 




الكوبرى فجأة بأسوده الأربعة
 بزئيرها اللى رج الأرض
بالولاد والبنات 
إتلضموا سوا
و عملوا جسر من البشر




عدى عليه من بعدهم 
كل الجايين وراهم
عشان يحصلوا المنتظرينهم 
هنــاك ... 




هناك يعنى الميدان
بس قبل ما يسيبوا المكان 
إتلفتوا وراهم لثوانى عشان يلاقوا الأسود
 اللى طول عمرها ساكتة
لما شافت الدم .. 
لأول مرة نطقت و اتكلمت




و ... اتبسمت




 و نزلت من عيونها 
دموع الفخر 
و كل أسد منهم أحنى جبينه 




 أحنوا الجباه تحية للأبطال 
اللى راح منهم و اللى جاي




اللى شالوا الأرواح
 هدايا
على جناحات اليمام




واللى لسه
شايلين ع الكفوف 
الغالى كله




و اللى وقفوا كما الأسود 
ف شارع ... محمد محمود




اللى ضى عيونهم انطفى 
بس نوّر 
بداله الف نور ف القلوب





حراسك و أسودك و جسرك
 يا قصر النيل 
 على رأى الهتاف النبيل 
ياما شافوا كتيييير 






ولو عدى اليوم بسنة 
هتيجى القلوب
و جواها ميت سوسنة 


 
و هيهلوا الكبار و الصغار 
ماسكين اليفط و الأعلام 



 
و بالهتاف الحناجر تشتد 
وعلى مدد الشوف المسيرة تمتد 
و تنعاد ثورتنا
كلاكيت ... تانى مرة 


 
و تهل من تانى البشاير ..  بعد عام 
و تيجى الألاف من كل الشوارع  
تقف ف نفس المطرح و المكان 
اللى طار فيه اليمام
و .... تصلى 




صلاة 
من غير غربان و لاخوف 
صلاة شكر و إعتراف بالفضل 
فضل ربنا و فضل كل شهيد 




الشهيد اللى الكل حالف 
ما يسيب حقه
و لو قامت ثورة من جديد 





وانا بمشى مع الماشيين أتمنيت 
أكون خطيت بقدمى
 ف نفس البقعة
اللى عدى عليها شهيدنا المبتسم 
قبل ما يروح لربه ف زفة تحفها ملائكة 





افتكرت مينا و ثورتنا الحلوة الجميلة 
عشان .... هوه معايا


 
هف على قلبى الشيخ عماد بالسماحة
اللى مالية كل سنتى ف وشه 
و قولت لازم الكوبرى دا يكون ف يوم 
اتبارك بخطاويهم ... 




الكوبرى اللى عليه 
مات .... ناس 




و إتودعوا ف جنازات مهيبة ... ناس 






و وقفوا صامتين ع الخالدين  ...  ناس




و احتفل ببصيص العدل ... ناس






و صلى بالآلآف  
على الشهيد الغائب ... ناس


 
و يتحرك الركب  
و الثورة تنولد من جديد
و أيوه بنهتف 
مش هنبطل
يسقط يسقط حك....




و إذا .... بالسباع الأربعــة 
بعلو الصوت


من مطارحها الأقيها معانا



تشق الصمت
و ..... تهتف
 



---------------------------------
----------------------------------------------



التدوينة إهداء
 لكل شهداء الثورة 
الذين لا نعرفهم 
و لا نعرف حكاياتهم 
و لا حتى نعرف
مثواهم الاخير

----------------------------
-----------------------------------------
الصور م النت
هنــا ... 
و ... هنــا

--------------------------------------------

This entry was posted on الاثنين, يناير 30, 2012 and is filed under . You can leave a response and follow any responses to this entry through the .

17 كــــلام بيطــبطـــب عـــلى قــــلبى و روحــــى

أنا أسفة يا جماعة
عشان مش بلحق أرد خالص

النهاردة ف المعرض
عشان نبارك لشيرين سامى
ونور الدين ...

سلااااااام
ويا رب البوست يبقى كويس
انا نشرته على عجل
بس مش عجل الإنتاج
D:

انا عيطت على كل حاجة حلوة ومؤلمة

البوست جميل اوي وكأنه اخدني في رحلة لكل حتة وقف فيها واحد من الثوار

حلو البوست وحلو قلبك

:)

السلام عليكم ورحمه الله وبركاته

أد ايه المكان ده عظيم
يسقط يسقط حكم العسكر

دايما ممبدعه ومميزه فى أسلوبك
دومتـ بكـل الـود والحـب ..
معـ خالص تحياتى وتقديرى ..

صور مترتبة كويس وبطريقة حلوة اوي وكلام جميل جدا
ويسقط يسقط حكم العسكر
تسلمي علي البوست الجامد ده
تحياتي
محمد عامر

رحم الله شهدائنا و اسكنهم فسيح جناته و صبر قلب اهلهم و يعوض تعبهم خير يا رب
انا اصلا من عشاق كوبري قصر النيل و لكن بوستك خلاني اعشقه اكتر و اكتر مشيت معاكي واحدة واحدة في تسلسل البوست
الحمد لله اني مصرية و فخورة اوي ببلدي و في كل لحظة باصاب فيها بالاحباط و اقول خلاص كل حاجة باظت الاقي حاجة تملاني بالامل تاني
البوست بتاعك خلاني اتملي ع الاخر بالامل :)

تحياتي لقلبك الابيض :)

رووووووعه بجد
ده لو التاريخ يبقى بالشكل ده نحبه ونحفظه كمان هههههه

تسلمى فاتيما على المجهود الرائع

وباركيلى لشرين كنت هناك امبارح وكان نفسى اشوفها او اشوف مصطفى سيف الدين بس اعمل ايه بقى مش قريبه من المنكان عشان انزل تانى

بس هعيش مع كتبهم :))

تحياتى

اولا مفيش داعي للاسف علشان انا زيك مش عارف ارد على التعليقات عندي بس هاحاول ارد
اما عن البوست فأسود قصر النيل دول مش مجرد تماثيل دول شهود عيان على تاريخ اتكتب و اترسم تحت اقدامهم شهود على دم تم سفكه وقلوب و ارواح تم تحريرها
شهود عيان على شعب اتهمناه بالسلبية و اثبتوا انهم اقوى من كل الاتهامات
شهود عيان على التصميم و الاصرار ان يكون لنا كرامة
الاسود دي مكنتش بترعى العشاق بس من عيون العوازل ومكنتش بتطبطب على عمرو و تحاول تقنعه ان مينتحرش و ان يومه جاي مكنتش بتواسي المتسول وبياع الدرة و البطاطامكنتش بتحمي من المواطن البسيط من افترا ظابط عايز يتسلى شوية بتهزيئه ان الحياة هتتظبط مكنتش بتعمل كده بس
لا كانت بتقولك يا مصري بصلنا احنا شفنا ده كله وبنشوفه دايما بس واقفين شامخين كل ده معرفش يجرحنا معرفش يخلينا نطاطي خليك زينا صامد

ايه البوست ده !!

كنتى بتفكرى فى ايه وانتى بتكتبيه ؟

حلو بجد بغباااااااااااااء


لازم اكبر عدد يشوفه

انا هحط اللينك بتاعه عندى لو مش تضايقى !

دوما ما كان الكوبرى رمزا للعبور

قديما عبروا خوفهم من المسافات البعية وتوحدت الضفتين
وحاليا
عبر الناس عليه خوفهم وتوحد الشعب لنهضة مصر

توقفت كثيرا أمام تلك الصورة
http://2.bp.blogspot.com/-1gi_FuaPetM/TyZ5xu7xzII/AAAAAAAAL3M/TYkhaxjK-_o/s1600/kk1_IslamelAzzazi.jpeg

وفيها الزعيم يشير للأمة ويقود الجموع بعد سنوات طوال ويشير هم أن تقدموا من أجل بلادكم
وتذكرت ما قلناه عن التماثيل سابقا

أما تلك
http://4.bp.blogspot.com/-znvodrF3f08/TyaJrlRR2OI/AAAAAAAAL58/-c-oXtAzwz8/s1600/436x328_17736_143874.jpg

فقد تحجرت لها الدموع فى عينى
فلها بداخلى الكثير من الذكريات

بكره جاى

ياسلام يابطوط على جمال تعبيراتك التلقائية المتسلسلة ..وفعلاً الكوبري ده أول شاهد على تاريخ مصر وكل من مشي عليه وأول مرة اعرف ان التاريخ كتب لكي انتي شخصياً قصة تتعلق بيكي على هذا الكوبري "ودي لوحدها عايزالها قعدة "والجميل قوي الغنوة الخلفية..اقولك ايه تسلم ايدك يابنت الإيه ..

يخربيت كدة ده فيلم تسجيلي وبجد فكرته واخراجه تحفة....ليكي حق يعملو ليكي طابع....بس في صورة بتقول ان اللي عمل الكوبري مش اسماعيل وان فؤاد هو اللي عمله.....هو اسماعيل عمل وسط البلد اكيد بس الكوبري متهيألي لا...هو كان مالوش في نظام الحبيبة ونظام الكباري...الراجل كان واهب حياته لخرم باب الحمام ومكحل عينة بجمال المظ.انا مرة سمعت ان كان له رسوم مرور ع الجمال والحمير...بس ايه اشكال الناس كانو فلحوكشات صرف كدة ....ايه ده ؟ ده إحنا كنا مسخرة بجد......احسنتي يا معلمة:::

ف أول الجسر كانت المعركة
بين الغربان السود
و بين أسراب اليمام

الله علكيي أنشودة في حب مصر و ترابها
بيصعب عليا الإحساس ده وسط المسرحية الهزلية اللي بنعشها!!
بيصعب عليا صوتنا اللي بيغني للحرية و الكرامة و الحقوق و الإنسانية اللي ضايع وسط أصوات قبيحة و مزعجة لا تعرف يعني إيه حرية و ديمقراطية و احترام الآخر !!
لازم نفضل نغني و نتكلم و نعافر و نكتب عشان مانموتش !!

فاتيما
روح القلب الملائكية

طبعا انا كنت مش هاعلق لان رائى قولته ليكى لايف

لكن حبيت اقول نصف كلمة
ده مش بوست ده كتاب تاريخى و رومانسى

سلام يا ام جو

روعة بجد

تسلمي

ويسقط يسقط حكم العسكر

جريمة جديدة ليهم انهاردة فى بورسعيد

حسابهم عمال بيتقل

حسبنا الله ونعم الوكيل

جميلة يا فاتيما بجد انتى فالتدوينة دى عاملة زى البساط الثورى عاملة تنقلينا من ذكرى لذكرى وبتوصليهم كلهم ببعض الاهم الا نشوه تلك الذكريات بأيدينا
أسماء الجريدلى

إرسال تعليق