.

.

خـــطــــــاريــــف .... 16  

Posted by: فاتيما in







This entry was posted on الثلاثاء, فبراير 14, 2012 and is filed under . You can leave a response and follow any responses to this entry through the .

46 كــــلام بيطــبطـــب عـــلى قــــلبى و روحــــى

الله يرحمك يا عامر,,

كانت وحشاني اوي الخطاريف

كل خطاريف وانتي طيبة

بتاخدني في حتة حلوة
حتة على الاقل أحلى من حتت تانية كتير

وبحس اني بتمشى معاكيبين كل خطروفة والتانية

وانا اصلا بحب اتمشى معاكي
:)

الخطاريف المرة دي اولها فرحني جدا عشان ديجا :) ربنا يخليكي لينا يا رب.. وبعدين الباقي ابكاني بجد
وبعدين تعالي هنا: سندوتش الانسة شكشوكة دا سيمبا؟ عمر اول ما شافه جابلي الموبايل وقالي كلمي طنط تيما تجيب سيمبا.. انا اقنعته ان سيمبا راح لمامته عشان صغير ولما يكبر هييجي تاني.. تصدقي وحشني؟ كان قط حنين بشكل غريب
على فكرة انتي جيتي في حلمي اول امبارح جيبالي علبة كبييييييييييييييرة فيها قط وقطة عشان اختار واحد لعمر.. قمت انا بهبلي اخترت القط واديته لبيكا.. مش كنت اخد القطة بقى ولا الموضوع هيمشي بالعكس؟
ديري بالك ع حالك يا طنط تيما يا جميلة

حلوة خطاريفك كوكتيل احاسيس و مشاعر
حزن رومانسية وطنية خوف ترقب أمل حلم اصرار
الله ينور يا فاتيما

رائعه كالعاده
تحياتى على التوليفه دى

انا كمان كنت بحب سمارتيز زى ماجد اخوكى

----


"و ... يا من اخترتم
هذه الأشكال إشربوها بالمرار
الممزوج بالدم زى ما شربتونا معاكم"

وحشاني بجد بجد

يلا تعالي قولي كل سنه وانتي طيبه لمدونتي
وكلاام كتير مبنا

بس هحكهولك
فمكانا

:(

متابع لخطاريفك جدا
وبتعجبني
لكني تعبت من الكلام
انا جاي اسلم عليكي واطمن علي يوسف وبس

يااااااااااااااه
ايوة بقى :)))
خطاريف <3

بس اسمحيلى الوم عليكى بصفتى مدمنة خطاريف أن تخفى جرعة السياسة شوية.

أنا عارفة أنها بتفرض نفسها ، بس برضوا ياريت الخطاريف تبقى مشاعر خالصة.

فظيييييعة صورة العصفورة :))
وبتاعت حلزقوم دى فطستنى من الضحك ..
وطبعا وجود فيروز فى البوست بلسم مشاعر أينما حلت ..

تحياتى :)

فيــه قلـــوب
زى الرقاب عـاوزة حشها
زى الازاز ف الشــتا
باردة و كئيبة
كل ما تشوفها
تبقى عاوز ف الأرض تدشها

هنرمى ع الصبح

**************************

الإنتظـــــار تميمة عــــذاب
كــــل المحــبين

لا تعليق

**************************

و عشان منفضـــلش
ندفـــن ف أطــهـر ما فــينـا



هانت
إنه ألم الولادة
وصرخة الوليد

**************************

قاعــــدين ليــــه
مـــا تغـــوروا .... تروحــــوا ؟!!!

باقى من الشهرين حبة
وهنفرح كلنا من تانى

**************************

أكـــبر القتـــلة قــــاتـل الأمـــل

أكبرهم من سمح لحلمه أن يموت

**************************

أفضــل وســيلة لتحــقيق أحــلامــك
هــي أن تســتيقـظ

حلم وحيد
متى يتحقق ؟؟؟؟؟؟؟؟؟؟؟؟

**************************

و لسه ... الحــــرية بتتـــولـــد ؟!!!

دا ميلاد أمة ودولة
ميلاد مصر

**************************

كـــل ما احــــزن
بــروح أزودهــــا خــــرم

من كثرة الثقوب تلاشت

**************************

يمكـن نتقـابل بعـدين
بعــد الدنيـــا بعــد النـــاس
بعـــد مـا يخــلـــص كــل زمـــان

يااااااااااااااااااااااااااااااااااااااااااااااارب

**************************

لا يحــدث للأنســـان ما يستحــقه

بل ما هو مكتوب له

**************************

قبـل مــا تبطــلوا حـــزن
اتعــــلمـــوا ازاى تفــرحــــوا

حيسقط حكم العسكر و حتنتصر الثورة
إستمروا في الكفاح
و لو ما سلموهاش قبل 30 / 6 يبقى مش حنخليهم يتهنوا بيها يوم واحد لحد 30 / 6
هتاف يسقط يسقط حكم العسكر حيطاردهم في كل مكان
و في الآخر هما ماشيين ماشيين مشيعين باللعنات

أما الإخوان فلحد دلوقت كل اللي أقدر أقوله عن أداؤهم في البرلمان هو حسبي الله و نعم الوكيل

و الصور مع تعليقاتك حلوة حقيقي كالعادة :)

وحشتينى
تصدقى بالنا سنتين ونص مشوفناش بعض

متشوفولنا بقى يوم يلمنا احنا سوتيتات المنطقة احسن الواحد بقى مفتقد موزز التدوين (:

الخطاريف حلوة كالعادة الا ما يشوفها من حزن دفين فى قلب كل واحد

بوسات من اولادك يوسف وعمر
واختك الكبيرة فوزية (دوبه)

هبة

والله أنا إتكيفت وعملت دماغ أكتر من لما بشرب نيسكافيه ):):
ربنا يكرمك ويسعدك زي ما بتسعدينا .
علي فكرة إنتي حد بتجتهدي عشان تطلعي الخطاريف أو أي حاجة تانية بالصورة المبهرة دي ، : يعني إنتقاء الصور والأخبار والكلام إللي معناه في بطن الشاعر ، مش حد بيحط إللي عاوز يقوله وخلاص .
تسلم إيدك ، كل حبي وتحياتي لكي سيدتي؛

مش عارفة اقوللك ايه مع خطاريفك ضحكت حتى البكاء و بكيت من كتر الالم و عشقت حتى الثمالة و رسمت ابتسامة على وشي رغم الالم
ايه ده هو انا بقيت اقول شعر بسببك ولا ايه :)
وحشتني خطاريفك اوي و لمستني و المتني شالتني و حطتني ووديتني و جابتني :)
رائعة كعادتك حبيبتي و الصور تحففااااااااااة
تحياتي لقلبك الابيض و متتأخريش علينا بخطاريفك دي و النبي

قبل اى كلام انتى بجد وحشانى اوى اوى
عندى غيه كده ادخل كل يوم على مدونه بصلها شويه وبتظهر جوايا ضحكه بس بعيده اووى وبقفل تانى لكنى حسيت بانى عوزا اكتبلك دلوقت ومالقتشى غير انك وحشتينى اووى

بصراحة يافاتيما انا تهت فى الزحمة دى ومش عارف ارجع وارجع ليه هوه انا هلاقى مكان احسن من مكان مملكتك ياروح قلب ماما
ما شاء الله عليكى ولم تتركى شئ لنا نتحدث عنه
بعدك لاحاجه لاى حاجه
انها ليست خطاريف بل قطاطيف محشية لوز وجوز لمن يحسن التذوق
تهانينا لهذا الحصر والجهد الجبار

حلوة الخطرفة دي :)
تجيبك يمين و تجيبك شمال
و تقلب كيانك و تخليك تفكر
تخطفك من مكان لكان

من فيروز للثورة لوليد طاهر للأحزان و الشهداء و الدماء و المشير و ترجعك تاني في الأخر لجواك لصحابك و حبايبك و المكتوب
و كأننا جوه دوامه كبيرة بتلف بينا جوانا و برانا !!

فاتيما انا مش عارفة بعت التعليق بتاعي والا لأ وعشان كده بابعت تاني اقولك خطاريفك رائعة وكلها في الصميم بس فيه صورة ابكتني كثيراً لقسوتها .. هل الأمر وصل لهذه الدرجة ؟حسبنا الله ونعم الوكيل ..ياريتك ياست الكل تلاقي صورة اقل وطأة من تلك .. وبعدين انا عاملة بوست جديد ياريتك تشوفيه وتقوليلي رأيك ..تحياتي

وجعانى يا تيما وجعانى بمصر وبيكى وبيا


على قد ما بحب خطاريفك وعلى قد ملهى طويله على قد مابتوجعنى

مبروك على ديجا :)
ربنا يصلح الاحوال

فتيما روح القلب الملائكية

اعلق على ايه و لا ايه و لا ايه
اعلق على ايه و لا ايه و ايه

على راى الاغنية

تصفيق حاد
سوكسيه عالى

تحياتى يا ام يوسف

http://www.youtube.com/watch?v=qXMHI5KJ9Jc
حبيبتك بعتالك دى

Um Ommar
--------

ويدخله جناته
ويعلى مقامه فيها
ان شاء الله

Baskouta
--------


و انتى طيبة يا بسكى
ومسيرنا نتمشى تانى سوا
و نخطرفمع بعض برضو
خطاريف مماثلة
...

:)
انتى حبيبتى يا بسكوتة قلبى

بوبو
----

ازيييييك يا أرق مخلوقات الله

انا عاوزة اقولك
انى فرحانة بديجا أكتر منك
آه
انا حاسة انها هتبقى بنتى أنا
ومكتوبة على اسمى
انا اصلى عمتها وخالتها ...
و بس هيا تيجى وانا هريها توك وفيونكات وعرايس ... يا لهووووى

بخصوص القطقوطة
دى مش سيمبا للأسف
سيمبا وديناه المحل بتاع القطط

دى شكشوكة اخته ...
قولت لماجد يصورهالى وهيا ف رغيف العيش عشان هيا اصلا تتاكل أكل ...
دورت على خس وطماطم احطهم معاها ..
ملقتش ...
فجبت ورقة شجر وحطيته معاها
هيا كبرت شوية عن الصورة دى ...

بصى
لما تكبر وتتجوز وتخلف
محجوزلك واحدة من عيالها اكيد
تكونى قومتى بالسلامة
و بيكا كبر حبة كمان
و الوضع يسمح بسيمبا جديد

هوه كان حنين عشان انا اخترتلكم ارق واحد فيهم ...
:)

الحلم بييجى بالعكس
اخترتى الولد
يعنى ان شاء الله
ديجاااااااااااا جاية ف السكة
الحاجات دى بتيجى بالعكس

خلى بالك انتى من نفسك
وربنا يطمنا عليكى
يا مفرحاااانى دايما
انتى ووليد الغالى

مصطفى سيف الدين
---------------

ميرسى يا مصطفى
ربنا يخليكوا ليا يا رافعين معنوياتى


لسه كنت بقرى ف كتابك
عجبتنىىىى جدا بتاعة الشاى والسكر
وجعتنى صحيح
بس عجبتنى قوى قوى


الله ينور عليك انتا يا فندم

:)

فافى
----


ميرسى يا فافى

يا رب دايما مبسوطة

:)

عمرو فكرى
----------

ازيك يا عمورة

مهو انتا قد ماجد تقريبا
ونفس الجيل ...


اما اللى شّربونا المرار
فربنا يورينا فيهم أسببببوع
مش يوم واحد

سلملى على ريرى
ولما خيخة تروق
عاوزين نعمل
اللى اتفقنا عليه
ماشى ؟

sony2000
---------

وانتى كمان يا سنسن

كل سنة ومدونتك بألف خير يا حبيبتى
ومسيرنا نتلم ونتكلم
و شوفيلك حل
ف مواعيد شغلك دى يا بنتى
مينفعش كدا !!!

Mano
----


ازيك يا مانو

انتا وحشتنا يا جدع
وقافل تعليقاتك ومبعرفش اقولك حتى ازيك

يا رب تكون خير
بس اللى بتكتبه عندك
وف التعليق دا
بيقول انك مش تمام

ربنا يصلح الاحوال

خلى بالك من نفسك
بكرة تروق والله
شوية صبر بس
وهانت

KING TOOOT
----------


الله عليك انتا يا غااااالى
:)))

Candy
-----

ازيك يا أحلى حلويات ف التدوين
معلش يا حبيبتى
الحاصل الأيام دى بيجبرنى اقول ...

واوعدك الخطاريف الجاية
هتكون غالب عليها اللى بتحبيه
واعتبريها من دلوقتى مهداة ليكى انتى تحديدا ...ماشى ؟


صورة العصفورة دى كمان عجبتنى قوى
كأنه بنى آد وبيلطش حاجة
وحد كشفه
:)


سبحان الله
سلامى لبابا العزيز

انا زعلت لما مجتيش ف حفلة توقيع مصطفى بس فهمت انك اضطريتى تسافرى ..

انتى انسانة جميلة قوى يا كادنى
وطفلة صغننة
وكليات الهندسة بقت محشوة بالحلويات والسكر والطعامات ...
ودا كويس و مبشر
:)

بوسات وحضونات يا حبيبتى

الازهرى
------

كالعادة
اخترت الحاجات اللى شبهك
وبتلمسك


طب انا لو نقيتلك صورة
هنقيلك صورة البطاطساية ...
اصل عقبال ما نقعد نقنعك
وناكل ف دماغك
ونعملك غسيل مخ
ونقنعك
وأخيييييرا
ندبسك ف عروسة
ونروحلها
اول ما نوصلها ....
هنلاقيها اتفرمت كدا
:)

مهندس مصرى
----------

ان شاء الله يا محمد
هيسقطوا سقوط مروع

ربنا حارس الثورة دى
وكل ما يحصل حاجة ..
تنكشف او تفطس وناخد فرصة تانية
احنا زى ما كنت بحكى مع الواد ازهرى وبقوله
ثورة مصر ملهاش شبه
احنا كتالوجنا فريد من نوعه
نظام تانى كدا
مش ماشى زى الثورات المعتادة

الزمن اتغير
واحنا كمان مختلفين

ودى بيشجعنا اننا نتحرك كل مرة
ونعيده تانى
مهما كان الناحية التانية
متمادين ف الشراسة والتغول
برضو هنقاوم
وهيسقط بأذن الله حكم العسكر

فيما يتعلق بأداء الاخوان وف البرلمان ...
فنتا طول عمرك حقانى يا محمد
واختك فاتيما بتحترم فيك صدقك دا وعدم تحيزك الا للى تشوفه حق وفيه مصلحة البلد ...
احنا بنديهم فرصة تاريخية ..
سواء اللى انتخبهم او اللى منتخبش
بس هما لا يزالون ...
أقل من اللحظة التاريخية دى


منحرمش منك ولا من تعليقاتك يا غالى

Doba
----

ازيك يا دوبى
انتى كمان والله العظيم وحشتينى
بس الظروف بقى

المسيرات والتحرير واكلين الوقت
والكتابة والشغل كمان ...

لمة السوتيتات دى عاوزة خوخة
وان شاء الله لما تروق
ندبرها سوا بليل ونتفق ..

بوسيلى يسوفة وعمورى
ويحيى الغالى
وماما اكييييييييد
وشاهى والنبى ى ى ى
ويا رب ميحرمنى منك ولا من سؤال
وتكونى دايما بخير يا حبيبتى

:-* عشانك
و :-* عشان يوسف
و :-* عشان عمر القمر

ديدى
----


ميرسى يا ديدى
كلك ذوق يا عزيزتى

انا بحاول أربط بين الكلام وبعضه
والصور وبعضها

الاحداث بتستفزنى
والصور كمان

يا رب تكونى دايما مبسوطة
بأى حاجة تقريها هنا

ونورتى المطرح كله يا حبيبتى

أفكار مبعثرة
--------------



ازيك يا فوكيرتى
عاملة ايه يا حبيبتى ؟

قولى اللى ف قلبك
يطلع شعر لوحده يا فندم

منحرمشى منك
ولا من كلامك الحلو
وقلبك الاحلى ى ى ى ى

بنت قلبى
--------


انتى كمان يا بنت قلبى
وحشتينى قوووووووووى يا بنتى

بس بقول طالما مفيش اخبار
يبقى كله تمام
و مبسوطة انى لسه على بالك
وف قلبك كدا
ربنا يخليكى ليا
ويروقلك الاحوال يا حبيبتى
:)

بوسات وحضونات لحد عندكو

faroukfahmy58
-------------

يا لهوى يا أستاذ فاروق على جمالك ؟؟

طب جملة
بعدك لا حاجة لأى حاجة ...دى
أرد عليها ازاى
دنتا بتكتب كلام يدوخ
وانا ست قلبى ضعيييف ومستحملشى
الكلام الحلو دا بقى بقى ...

انا كدا هسيب محمد فوزى
و هاجى أطلب ايدك
واتقدم بشكل رسمى لهبة وكارولين
يا اما حضرتك تبطل تعاكسنى
بالكلام الحلو دا احسن كدا مينفعشىىىىىىىىىىىى

:)

Carol
-----

طب الحمدلله
انها عجبتك يا كارول
عقبال كل مرة تيجى فيها
تمشى مبسوطة كدا
:)

نورتينى ى ى

zizi
----

ازى حضرتك يا ماما ؟

وصل التعليق اهو
و هروح أكيد اشوف البوست الجديد

معرفش انهى صورة وجعتك كدا

بس هيا صور بتمثل الواقع
وهيا اللى بسببها الثورة مستمرة
والولاد مبتروحش وتسكت ...

كل الحب لحضرتك
:)

richardCatheart
---------------

ازيك يا قطاقيطو

هيا بتوجعك عشان قلبك فيه الخير
وبتحبى البلد
وبتحبى من قلب قلبك
زى حالاتى

ربنا يصلح الاحوال
دا دعاء الجميع والله

بوسيلى العيال واحضنيلى روحك
و قولى للحاج ريتشارد فاتيما بتقولك
انها بتدعيلك قبل ما تدعى لقلب القطة
ان ربنا يخليكو لبعض دفا وسكن ...
دايما يا رب

ابراهيم رزق
-----------


مقولتلك يا ابو العيال
مش مهم التعليق

المهم انها عجبتكم
دا كفاية

تحياتى انا اكتر
:)

عاشقة الرومانسية
----------------

ميرسى يا قطتى

انا بحب الغنوة دى عموما
وبحب انغام خصوصا

وعارفة انك بتحبيها زى حالاتى
ويمكن أكتر
:)

يالهوى !!

مهداه لىّ !!!!!!!!!!!!!!!!

دا كتير كتير كتييييييييييييييير
أنا كدة كدة بستمتع بيهم وبستناهم بجد .. وبقعد اقراهم كذا مرة ول مرة اخد بالى من صورة أو قول جميل ..

انتى اللى حلوة يافاتيما علشان كدة شايفة الناس كلها حلوة <3

إرسال تعليق