.

.

يا بتـاع النعنــااااااااع  

Posted by: فاتيما in







 حقيقتن و يحز ف نفسى 
بس حتمن طبعن و لازم اقولها يا اخواننا 
عشان احنا عاوزين حد كدا ابن حلال
 بيفهم ف العلاقات الدولية يتقدم بطلب
 رسمى للقلل المتحدة يطالب فيه
 دولة الهند الشقيقة بالتخلى عن صفتها
 كــ ... أم العجايب 
ويقولها تتنازلنا ف شهر عقارى فرع افريقيا
ومصاريف المحاماة والتسجيل علينا 
وتسيبلنا هذا اللقب 
عشان مصر فعلا أولى بيه و بجدااااارة 
عم جلال عامر مع كل اللى شافه
 من أهوال الحرب مقدرش يستحمل 
و مات غماً لما شاف بس مجرد عينة بسيطة 
من المواطنين الشورفاء وهيا جاية 
تضرب ثوار ف مظاهرة سلمية 
 احمد عز بيقول انه اتاخد ظلومة
 ف حدوتة الثورة دى واتحسب يا ضنايا 
ع النظام "غلط" بس هوه اساسا صاغ سليم  وجمال بلع كام حباية منومة 
لما عرف انه هيتفصل عن اخوه 
ف زنزانة فردية 
الحاج ابو عيلاء عمل زى ابنه 
اشمعنى يعنى
 وهدد بالإنتيشحار لو نقلوه مشتشفى طرة وسوزان بيخوتونا بمذكراتها وطفاستها
 وجشعها و بإن الريس ف الآخر طلع 
يا حبة عينى حتة زوج مطحون معرفش يوقف 
قصاد طموحاتها 
 ابو احد الشهدا بعد شرب المرار سنة بحالها 
بيتم تحويله للمحاكمة 
بينما القناص اللى قتل ابنه حر و طليق
 سباق المريسة لعلع و الرئيس التوافقى 
على حد تعبير احد ظرفاء تويتر هو 
الريس اللى هيوافق عليه العسكر والاخوان 
 حمدين صباحى سهران ليلاتى 
بيعد النجوم من البلكونة الناصرية 
 و الدوك أبو الفتوح سِِخن على  الأخر
و بيدى احد منافسيه ف التمانيات
  سيادة الفريق بتفشخر عينى عينك 
انه خد أذن آبيه المشير 
قبل ما ينزل يا فريق ف الساحة 
اما العوا فإتشطف من الجالية المصرية ف لندن والحاج ابو سماعين بيقول اوباما عينه منه 
و قاعدله مستنى يشوفه هيكسب ولا لأ 
 عمرو موسى كل ما حد يفكره 
بمواقفه المخزية اللى تعّر اثناء حكم مبارك 
يشخط فيه و يزغرله 
و يقوله البلد بتنهااااار وكلمنى عن بكرة
 عمر سليمان بيشاور عقله حالياً 
بعد ما خلص على نص شباب الثورة 
هل يا ترى دلوقتى هو الوقت المناسب 
اللى يرجع فيه يخلص ع النص التانى  ... 
و لاّ احسنله يترييييث ؟!!!
البسطويسى إذ فجأتن صحى م النوم 
 و زف الينا البشرى بإنه استقال
 و قال فرافيرووووو انا جااااااااااى م البلد العربى
و نبيل العربى يصرح بإنه وكتاب الله ما حصل
 انه فكر فيها  من اصله
و هيموت يعرف مين اللى زقه ؟!
و كمساندة أخوية لنبيل هذا ما أكده البرادعى
 اللى شباب مصر شايل منه و معبى 
شوية عشان ساب السباق الرئاسى 
وشويتين عشان بوسة انجلينا جولى
 مرات الواد براد بيت 
والذى يخشى من ردة فعله العنيفة تجاهنا 
بأن تصل لحد قطع البوس عن مصر 
و ان تقترن بالمرة بتلويح بلاده 
بوقف حنفية الدولارات عننا 
و بكدا يبقوا قطعوا الفلوس والدبابات  
وكمان البوس 
و حسبى الله ونعم الوكيل فيك يا فخرى
 مرتضى منصور اللى معرفش يكسب ف دايرته
 عاوز يكمل ف سباق الرياسة
 وتوفيق عكاشة اخوه التؤام ف السقوط
 بيهدد ف برنامجه رجال الأعمال ببلاويهم المستخبية كلها اللى عنده 
لو متبرعوش لقناته 
انما لو دفعوا نبقى بيس يا معلم 
والملفات ترجع الدرج وربنا حليم ستار 
طلعت زكريا بيتحفنا بأرائه السوياسية كالعادة
و إنه ضد المعونة 
 و على طريقة من دقنه وإفتله 
و بعد مباركة العسكر الحاج حسان 
بيلم تبرعات لله و بيمد اياديه البيضاء 
ف جيوب الغلابة يلم القرشينات الفاضلين
عشان يديها برضو للغلابة
 و عشان منذلش روحنا لماما امريكا
و عشان نبقى حلوين 
و عشان العسكر و جنزر بس هما اللى يقبضوا
 و عشان ف الاخر نهلل و نقوله 
الله عليك يا حبيب والديك يا وطنى 
يا مخلصنا من عار المعونات الأمريكية 
و ... العربية لأ
والسؤال بقى .. هوه الشعب المصرى 
البائس الغلبان دا مش هيبطل 
يدفع يدفع يدفع 
ويتاخد منه بالشمال و يتسرق باليمين 
يعنى امتى كده هوه اللى هيقبض بس 
 وميدفعش ؟!!!
شيخ الازهر دخل ع الخط بقوة 
وبارك المبادرة الحسانية عشان الباشوات
 ف الأعالى يرضوا عنه
وابو العزايم بتاع الصوفية عامل الطيب بطل
 و بيهاجمه عشان آل أيه آل بيساند الثورة
 ف سوريا و بكدا هيسمح لإسرائيل الويحشة
 ان تتخطى الحدود وتستبيح الدول العربية
 قصده سوريا اللى نظامها عمره ما ضرب
 علي الاسرائيلين رصاصة و سبحان الله 
على جمعة بعد ما هاجم العصيان المدنى
 بضرواااة و طلع قال البوقين التمام 
بيتجددله سنة كمااااان 
والبابا شنودة أو بمعنى ادق الرجل التانى بعده 
والكنيسة عموما عملت ودن من طين 
وودن من عجين 
فى موضوع العامرية وطرد الأقباط من بيوتهم  ومؤسساتنا الدينية والرسمية عموما 
بعد الثورة ما زالت بتفكرنى بأحمد آدم 
وهوه بيقول بكل شجاعة
 آه يا مستوقد مفيهوش رااااااجل
المزغود على عبدالله طالح لسه فيه الرمق 
و بعد ما انطرد  محروقا باعت ابنه
 يحرق ف دم الشعب اليمنى
و يرأس حزب يخّرم بيه على قصر الرياسة
 والمنجوس بشار بيوزع كمامات 
و شكله عاوز يخلص الثوار بالكيماوى
ومجلس شعبنا الموقر سايب الجنود
 والسفن والأسطول والحملة الفرنسية
 وقاعد بيمضى ف اطباق و يدن ف الجلسات 
والكتاتنى بيفكرنى بناظر مدرستى زمان 
وهوه قاعد بيقرر ف العليمى 
وبيقوله هاااااه هتعتذر 
ولا نجيب السيخ المحمى
 ونحطه ف صرصور ودنك ؟!!!
لأ و شوف يا مؤمن ... شوف يا مؤمن 
آل يأتى علينا زمان و مصطفى بكرى 
مصطفاااااااااا بكرررررى
 يوقف ف البرلمان
ويدينا دروس ف العمالة واضمحلال الاخلاق
 و بكار يخرج على اهل مصر مطمئنهم
 انه مبصش للبنات الوظاويظ 
ف فرح حمزاوى وبسمة
 ولحى التيار المتأسلم تدخل الداخلية رسمى
 بعد ما وقفت مليشياتها على ابواب البرلمان 
وبيلوحوا بالمرة بحكومة اخوانية 
 و انشالله ما عن حد حوش .. هيه
وهيكل بيتهلل لحواره وكأنه جاب التايهة
 مع ان الكلام متأخر عشر شهور ع الأقل
و الغلبانة دينا عبدالرحمن 
اللى يا نضرى كل ما تروح قناة .. بيمشوها 
 و هالة سرحان ف قناة الوليد بن طلال
 بتشغل الناس بدهب منجم السكرى 
وتولول ع الشركات والأراضى المنهوبة بخيراتها
 ومحدش قالها تسأل اللى مشغلها الاول 
هوه ليه بإصرار حاطط ايده على ارض توشكى وصمم ميخرجش منها 
ووفق اوضاعه بكافة الأشكال والطرق ؟!!
لميس الحديدى نازلة تقطيع ف الثوار
 ومصرة تلبسهم تهمة البلطجة
 و جوزها عمرو أديب ف مداخلة 
مع  ابن الفريق عنان طلب يسلمله على بابا 
ويقوله عمورة بيبلغك ان الحالة
 بقت موز موز موز و نزلّنا الجيش الشوارع
و اخوه الكبير عماد الدين اديب 
ببرنامج جديد عاد لينتقم منا ... بهدوءءءءءءء  
فى ديكور أستوديو لونه أسود زى لون ضميره 
 ونحن إذ بدورنا بنسأل بقى
 العائلة المدنسة دى هل بت ما هتسيب الشاشات ومصر كلها اصلا 
و هتغور من وشنا امتى ؟!!!
 الملط بيتقدم فيه بلاغات بقاله سنة 
ومحدش بيتحرك 
و البلاغات بتترمى ف غياهب الجب
 زى اخواتها البلاغات التانيين المتقدمين
 ف شفيق وسليمان وغيرهم من الديناصورات 
ولا حياة لمن تبّلغ 
والنائب العام دهون اتقاله "ارحـــــــــــــل" 
اكتر ما اتقالت لمبارك والعسكر سوا مجتمعين 
و مع ذلك ممشيشى تفتكروا لييييه ؟!!
والكل بعد الظلم رقات رقات
 لسه بيقول للمتداس عليهم
 .. سلمية سلمية إحياة ابوكو ...
و اما بعد ....
فأنجب ولاد مصر 
عم نجيب محفوظ أنجز و اوجز ولخصها 
لما قال : آفــــة حارتنــــا النسيان
ولحد ما الناس تفتكر اللى جرى
 فأنا يا اعزائى 
وبنى وطنى لم أكن انتوى 
كتابة هذوها البوست
 لكنننننننننننن 
بجد قراية الجرايد والاخبار
 و الاحوال لازم تندرج 
تحت بند الممارسات القمعية الممنهجة  
التى بتتم ف أعتى السجون والمعتقلات
وكما ينصح مديرى الغالى 
ويقول..  ما بين 20 فبراير الماضى 
و 20 فبراير الحالى يا بنتى لا تحزنى
 بس الاخبار ف بلادى 
بقت عذاب وحرقة دم و فقع مرارة 
و انا قولونى استغاث 
وقالولى بطلى قهوة 
و اديها نعناع عشان المغص 
و بما ان الفقعات لا تنتهى 
و بما ان المغص لا ينتهى
 و بما ان معندناش نعناع 
وبما ان الراجل بتاع النعناع مبيعديش 
غالبا ابداً مطلقا تحت بيتنا 
فنا هقف ف بلكونتنا ف الدور الحادى عشر
زى المجانين ف نعيم وانده 
و لما محدش يرد عليا هديها غنا 
و أقوووووول
يا بتاع النعناع يا منعنع
يا بتاع النعناع يا واد انتا 
يا واد انتا
واد يا انتااااااا
يا وااااااا........... آخ يانى
.............
------------------------
---------------------------------------------
 


بمناسبة 
الهند بقى 
الصورة من عند 




-----------------------------------------


-------------------------------------------



المعونة المصرية  .. مصطفى سيف الدين
تجربة سرقة أدت  ... حبات اللولى (جارة القمر)
هل انتم متدينون حقا .. علاء الأسوانى
عزيزى الشيخ حسان .. محمد عبدالرحمن
تحت القبة شو .. على بريشة
النزق القاتل ... اسامة غريب 
محاكم تفتيش اسلامية .. وائل قنديل 
ملك البورنو ... وائل عبدالفتاح 
يا انتقالى يا انتقائى .. علاء الغطريفى 
يستحق القتل ... نجلاء بدير 
طب احترمهم ازاى .. محمد فتحى 
اللى يعوزه البيت يحرم ... باسل رمسيس 
العز بن عبدالسلام وقطر و .... اكرام يوسف
جون ماكين بعد لقاء طنطاوى يتوجه لإسرائيل
سامحينا يا سوريا ... وائل السمرى
عايز لحيتى .. محمد ابراهيم الدسوقى
بردت يا بكرى ... محمد فتحى 
المستقبل المحتمل .. أحمد الصاوى 
إبتسم انت فى رومانيا .. وائل قنديل 
بهجة البرلمان العصبى .. عمر طاهر 
وطنى المخترع ... نجلاء بدير 
النداء الأخير للبرادعى .. وائل قنديل
الأسد يستعد بالكيماوى فى حمص 
الاستفادة من العلمانية .. محمد شومان
-------------------------------------------------- 

This entry was posted on الاثنين, فبراير 20, 2012 and is filed under . You can leave a response and follow any responses to this entry through the .

33 كــــلام بيطــبطـــب عـــلى قــــلبى و روحــــى

خلى بتاع النعناع يبعة ويكسب احسن وافضل لية

بجد يا فاتيما الواحد هيفرقع من اللى بيشوفة وبيسمعة

ربنا يصلح الحال

هنعمل اية ما بايدينا غير الدعاء بالصلاح وبالضياع علىولاد التيت

مع خالص تحياتى

فاتيما روح القلب الملائكية

مازال العرض المسرح مستمر
و لكنه كوميديا سوداء

قالوا التصويت الالكترونى بالبرطمان سيعمل و لكن عدنا الى موافقون اغلبية و الانتقال لجدول الاعمال
نائب قال رايه خارج البرلمان لكن نقول ايه اتلموا الدقون على بعض و ال بركيات و تلكيرفات جت له و كلهم مصممين يقول انا عيل و غلط و ابوس الجدم و ابدى الندم على غلطتى فى حق الغنم
و كله كوم و الرئيس التوافق كوم دايما يجملوا الكلمات
الرئيس التوافقى هو رئيس تربيطى فالعسكر و الاخوان و السلفيين لم يتعودوا على الديمقراطية التى اتت بهم و انما تعودوا على التربيطات و المصالح المكتسبة

هعلق على ايه و لا ايه يا ام جو
سلام بقى كفاية كده

انا بعد البوست ده وتقليب المواجع والجرح اللي لسه واجع اقول فينك يانعناع
والناس كلها اللي في البوست اقولها
حسبي الله ونعم الوكيل

آفة حارتنا النسيان

نسينا الكثير فى خضم الأحداث
وأكثر ما نسيناه

أن نقف للحظة لكى نعرف ما الذى نريده من غدنا

:((((

تجميعة موجعة :(

فجأة بعد ما الأمل صحى حلصت انكاسة كدة زى رسم القلب خط نااااااااااااازل وبينزل وبينزل وبينزل

بس فى حاجة جوايا بتقولى أن الفرج هايجى هايجى ، وزى أول مرة لما ماكنش متوقع حتى من اللى بيقوموا بيه .. هكذا

مصر رغم الجهل والتخلف فيها ناس طيبة وعبقرية وناس بيحبوها بإخلاص ..

والحب مابيضعش أبدا حتى لو حبة قد حبة القمحاية :)

سلامة مرارتك ... تعالى المنيا وأعملك كل يوم نعناع من النعناع البلدى الطازة اللى ريحته تجيب أخر الدنيا <3

ياااااااااااااااه

نوعناع!!!!!!!!

يا بنتي ده أنا اللي اسمي أنا باخد سبع تمن تسع أنواع مهدئات علشان بس أبئا عصبي عادي

وانتي تقولي لي نعناع


يلا القصد

عاوزه كام حزمة نوعناع؟

:)
حلوة أغنية النعناع ومحترمة وهادفة
أنا بعد بيان العار للأحزاب مع عنان ماارتحتش الا لما غنيت اوعى تكلمنى بابا جاى ورايا

مش قادرة أناقشك والله ياطمطم
غنى شوية للنعناع بس الثورة مستمرة وهتنتصر ده أكيد
وحشانى :)

كل ده و مازال من يسمون انفسهم الاغلبية الصامتة يقولون (هل من مزيد)
مصر بقت طلب كشري اسبيشيال كله داخل في كله الرز مع العدس مع البصل مع الصلصة مع الدقة مع الليمون مع ملعقة و الهط يا طنطاوي كله سايح على كله عايز كمان كمالة و لا استكفيت؟
استكفى ايه بس هي الناس دي بتستكفى
البوست ده مينفعش يتعلق عليه و مينفعش نتفرج عليه و مينفعش نقولك شكرا يا فاتيما عليه
البوست ده باللي فيه المفروض يتدرس عندنا في المدارس و نسأل هو ده كله كان ليه؟ و نقدر نتعلم منه ايه؟
و ان معرفناش يبقى على الاقل نسأل ربطة النعناع فيها كام عود و العود فيه كام ورقة طيب تشربه مغلي علشان المغص و لا نحطهولك على الشاي و لا انت بتحسب تشرب الشاي بالياسمين شكلك من بتوع الشاي بالياسمين اصل لو مش منهم مينفعش معاك النعناع لو مش منهم يبقى لازم تشرب الشاي مر
و سلميلي ع الثورة لو قابلتيها و قوليلها قدمتي على طلب هجرة لليونان ليه ايه اللي ضايقك منا ؟ لو جاوبتك ابقى قوليلي و لو مجاوبتش ابقى برضه قوليلي كانت بصالنا بقرف و لا بسخرية و لا غمزت بعينيها و ضحكت بدلال و قالت (اصل معندكمش رجالة)
تحياتي

:))))))))))

وانا بقرأ بعد شويه اشتغلت يابتاع النعناع لقيت نفسى بفقع زغروطه تلاقائية مدوووووووووووويه .... تفتكرى دا كبتش سوياسى صح ؟؟؟

رغم كل ما قلتيه وهو حقيقي ويدمي القلب لكني لا اريد ان افقد الامل واستحضر دائما قول العظيم الابنودي مصر عارفة وشايفة وبتصبر لكنها في خطفة زمن تعبر وتسترد الاسم والعناوين

ليه كده حرام عليكى
انا رايى مصر تقفل ضروفها ونروح كلنا
لو جه عمرو سليمان انا اول واحد هجرى
ده حسنى مبارك ارحم
الثورة مستمرة

والله الواحد ما عارف اخرتها ايه
ربنا ان شاء الله يسترها
شكرا على البوست
وتحياتي لكي

بالبوست ده احنا مش عايزين نعناع احنا عايزين توسكافين علي كام حباية منوم من اللي بيسموهم ودع اهلك

بجد بقية حاسة ان مصر بقت سلطة
ايوة طبق سلطة كبيييييييير
والكل تايه ومافيش صوت عقل ولا ضمير كله عايز يهبش اللي يقدر عليه

Tamer Nabil Moussa
-------------------

صباح الخير يا تامر
ازيك؟
:)


بالنوسبة لنصيحة البيع
حاضر ...
نشترى ونشرب

وبالنوسبة لإنصلاح الاحوال
فإن شاء الله هيحصل
بنظرة بانورامية كدا للأخبار قبل الثورة و بعدها ... فيه تشابه
بس فيه فرق كبيييييير
وهوه احنا
الناس
القطاع الثائر من الشعب
واللى مكنش له صوت فاعل ولا وجود اصيل ف الشارع وف المعادلة السياسية ...
دلوقتى بقاله وضعه ومكانته
ومهما يحاولوا يزحزحوا فيها ...
هيفشلوا
ما دام الكل مرابط وصامد وقاعدينلهم على قلبهم ان شاء الله
لحد ما يجيلهم سكتة ...
:)

نورتنى

ابراهيم رزق
-----------

صباح الخير يا ابو سالى

احنا قولنا البرطمان دا فيه طرشى حمضان م الاول ومحدش سمع الكلااااام ...

يلا ادينا احنا اللى بنتسلى بيهم
وزى ما وليد كنج توت الغالى قال
التكتيف بالتكليف
ادينا مسكناهم سلطة
يورونا بقى عمايل ايديهم
عشان بعد كدا لما الفشل يبقى عظيم ونديهم شلوت معتبر ميبقوش يسمعونا ربع كلمة عن الهوايل اللى كانوا عاوزين يسووها ...


صباح الفل
:)

Mohamed Amer
------------


صباح الفل يا محمد
تقليب مواجع ليه بس حقك عليا
والنبى ما أقصد
دنا بس بوريكو ما آل اليه حالى بعد تلات اربع تيام قراية جرايد ومتابعة اخبار ... فعلا حاجة تجن ومصر ام العجايب

بالنوسبة للحسبنة
معاك على طول الخط والله

انتى منورنى علطول يا فتى
:)

الازهرى
------

بص يا زيزو يا صديقى
حكمة عم نجيب محفوظ دى
تنطبق حاليا ع الشعب المصرى بأكمله حتة واحدة كدا ...

لأنهم نسيوا قوام اللى انعمل وبيتعمل
ويبدو انهم عاوزين فورة تانية وقومة من جديد
وان شاء الله يحصل

ما نريده من غدنا
أظننى هتكلم عن روحى وعن ناس كتيييير بتحب البلد دى ...
كلنا تقريبا عارفين احنا عاوزين ايه
مختلفين ع الادوات
خايفين م الادوات
مش عارفين الادوات
أى كان السبب ....
بس كلنا متفقين
يسقط يسقط حكم العسكر
عاوزين حرية وعيش وكرامة وعدل
عاوزين مصر ف مكانتها الصح
وعاوزين كل الغوازى ترحل بقى ...
قرفنا من مناظرهم

صباحك ورد يا منص

Candy
-----


متكشريش كدا يا كوكو
حقك عليا
مقصدتش انكد عليكو ...

بس تجميعة الاخبار والأحوال
فكرتنى بأيام ما قبل الثورة فعلا
وحسيت انى عاوزة اوثقها ف بوست
عشان كمان شوية اقراها وافتكر حالنا
واقول كالعادة ...
سبحان الله
يغير حال الى حال لما الشعب يريد ...

انا متفائلة زيك واكتر
وحباية القمح دى
عندنا منها الالاف وملايين

بالنوسبة لحوار النعناع ف المنيا
انا مواااااااااااافقة من غير الكتاتنى ما يسأل باقى الأعضاء ويبص ف اللايحة

:)

سلامى لبابا الغالى
وبوساتى وحضوناتى ليكى يا حبيبتى

و صباح الحلويات عليكى

مصرى جدا
-------


صباح النوعنااااااع يا هانى
:)


لأ يا عم مليش ف المهدئات
بتاعتكو دى
انا هادية وحلوة وبسمع الكلام اهو
بس المشكلة ف القولون هوه اللى عاوز الضرب ...

ربنا يخليلى عم محمد بتاع البوفيه
بيعملى كوباية معتبرة مركزة
اخدها ع الصبح تروق المسائل

وبالنوسبة لكام حزمة
انتا يوم ما هتعزمنى ..هتعزم على نوعنااااااع
عييييييييب يا جدع
دنا لازم ادبسك ف حاجة مفتخرة
كبدة هدهد يتيم او زعنفة سمكة تايهة او بيضة خنفسة حامل ...
حاجة كدا لا تقدر بثمن ...
الغالى م الغالى سعادتك


نورتنىىىىىىىىى
وصباح الرضا

حفيدة عرابى
---------

بادىء ذى بدء وقبل أى حاجة
انتى كمااااااااااااااااااااااااااان
وحشتينى جدااااا
واتمنى خوخة تروق كدا وتقولنا انا اهو جيت و تقول معاد التبرع القادم أزف عشان نتلم كالعادة ف اليوم الحلو دا ...

وحشنى شوفانك ف التحرير كمان
الثورة لو خلصت ونجحت ...هقول لأ
و لازم تستمر بقى تحديداً عشان الموضوع دا
:)

بخصوص الغنوة
فانتى عارفة يا فدافيدو ان شر البلية ما يضحك وكل ما اسمع اواقرى خبر كدا بيحضرنى اغانى كتير على هذا الوزن والشكل و يقولك اغانى هابطة وبتاع ...
دا الاداء اللسياسى المصرى أهبط من الأغانى دى مليون مرة ...
وبيزعلوا م الناس لما تتريقأ وتقول شتايم وامثال شعبية وكدا

بوسيلى جبين ماما
واحنيلى روحك حتى لقاء وتاخديهم لايف
:))


صباح الورد
يا حبيبة قلب طمطم

مصطفى سيف الدين
----------------

هههههههه

صباح الروقان يا مصطفى

التعليق بتاعك عجبنى قوى
وكمان ضحكنى

وبجد ... حساه تكملة للبوست

بص دا مجرد تجميعة لتلات اربع تيام متابعة اخبار واحوال ...

لو الواحد فاضى زى الاول
كنت عملت كدا ف مدونة الصباحات
بس بطلت اكتب فيها عشان الوقت
وكمان عشان النفس
وكمان عشان حاجة تالتة ...اهم
انا حاسة ان الوضع فعلا اختلف

الاول كنت بعلق واتريقأ
وانا عارفة ان مفيش فايدة قوى
وبخلص شحنة الغضب والغيظ ..

دلوقتى لأ
حاسة ان لسه فيه خير جاى
ولسه مجبناش ضرفها ولا حاجة
ولسه قادرين نعمل حاجة

الواحد بس بينشر غسيلهم اللى موش نضيف دا عشان نفتكر قدام ...
ونفكر غيرنا
آفة حارتنا النسيان زى ما قال عم نجيب ...
بس مش الكل بيصاب بهذه الآفة
ومش الكل والحمدلله بينسى
احنا لسه بنفتكر
وهنفضل فاكرين كل حاجة
لحد ما نوصل للى عاوزينه ولو خد وقت اكتر ومعرنا خلص قبله ...
عندى ثقة ان غيرنا هييجى بعدنا ويكمل ...
خلاص مفيش رجوع

وبحصوص اليونان بقى
لأ معلشى
احنا عندنا رجالة يا مصطفى
شوفتهم ولسه بشوفهم وهشوفهم
والحمدلله فيه ناس نجت من مذابح الأبادة الجماعية اللى كان بيعملها مبارك ونظامه ..
والشوية اللى نجيوا دول هما اللى عملوا الثورة وبيكملوها وبيعلموا غيرهم يبقوا رجالة ...


صباح الورد عليك وعلى كل اهل جنا

richardCatheart
---------------

هههههه
يا خراشى يا قطقوطتى
التدوينة خلتك تزغرطى
طب دنا عاوزة نيشان كدا
او حضن مخصوص ع الحكاية دى
لما نبقى نجيلكوا ابقى اخده فوق الحضن العادى بتاعى ...
:)

انا بحب الغنوة دى ما اول مرة سمعتها
مبهجة كدا وفرايحى
والواحد مش طالبة معاه نكد خااااالص كفاية علينا الخِلق العكرة اللى بنشوفها ونقرى اخبارها دى يوماتى ليلاتى


بوسات وحضوناااااااات يا قطاقيطو يا قمرررررررررررررر

خواطر شابة
----------


صباح الرضا يا خطورتى
عليكى وعلى كل اهل المغرب الطيب

انا أسفة ومتأخرة ف التهنئة
بس حقك علياااااااااااااا

كل سنة وانتى اطيب واطيب واطيب
وبألف خير يا حبيبتى

--------------------
http://www.hodood.com/site/files/gallery/pic/1208157871_a4d.jpg
--------------------

انا متفائلة جداااااااا
رغم ما يبدو اسود دلوقتى
بس دا اسود ما قبل الفجر زى ما بيقولوا والعالم دى اخرها قرب والمهم نفضل صامدين عشان بعد ما يمشوا ميتسرقش حلمنا تانى من أى حد ...

نورتينى يا حبيبتى
وعيد ميلاد سعيد
:)

روعه النسيان
------------

اولا اهلا بيك
ونورت عالم المدونات

ثانياً
لأ منجبش ضرفها ولا حاجة
احنا هنطردهم هما براها
لأنهم ميستهلوش يعيشوا على أرضها
وكفاية اللى نهبوه من خيرها


ثالثاً
لو بعد كل هذا الجهد
وما سيأتى لسه و ...
عمر سليمان خد الرياسة
بإنتخابات نزيهة حقيقة
يبقى خلاص بقى
انتا تحجزلى كرسى ف الطايرة جنبك
:)


الثورة مستمرة ان شاء الله
ويسقـط
يسقـــط
حكم العسكـر



نورت المطرح كله

ريرى كربكه
----------

خير
اخــرتها خير ان شاء الله يا بنتى
خليكى متفائلة
انا بكتب البوست بس من وحى مسخرة اللحظة واللى حاصل فيها مش اكتر
انما دى مجرد مقدمات لكنسة محترمة كمان شوية والتاريخ يعلمنا ذلك ...
نظرة للوراء وانتى تلاقى الفصل بيتكرر تانى بس المرة دى احنا اقوى وشايفين كويس والصورة مش مزغللة ..


صباح الورد
تحياتى انا اكتر
:)

شمس النهار
---------

نأأأأأ يا شموسة ايه دا
احنا نشربهم لمجلس العسكر
ومجلس جنزر
ومجلس الشعب
والمجلس الاشتشارى

احنا نشرب نعناع وشاى وقرفة و قهوة ونضبط دماغنا عشان نفوقلهم بقى


مصر فعلا طبق سلطة كبييير
وتشبيهك ف محله

بس طول عمرها كدا يا شمس
طول عمرها ملهاش شبه ولا زى
وطول عمرها اطياف و الوان
مهياش محايدة و باهتة و كوبى من غيرها
احنا كتالوج لوحدنا
حتى ف الثورة بتاعتنا احنا شكل تانى


بالنوسبة للتعليق اللى موش للنشر
ان شاء الله اول ما الظروف تسمح همسك ف رقبة الواد اوساااامة وانفذ المطلوب ...
انتى كمان وحشتينى والله
قوى
قوى
قوى

:-* على جبينك الطيب بقى
لحد ما اشوفك

انتي جبتي زتونة الموضوع و قطعتي فرطه و مش حأعرف أقول حاجة بعد اللي قلتيه ده غير الله ينور عليكي

بس تصحيح صغير براد بت مش متجوز أنجلينا رغم إنه مخلف منها 3 عيال و متبنيين 3 عيال تانية و عايشين مع بعض في الحرام

مهندس مصرى
-----------

وينور عليك يا محمد

بالنوسبة للأخت انجلينا
معلش ... نمشيها جوزها
يعنى الست دايما موافقها جدعة
و تخلينا نفوتلها الحكاية دى مؤقتا
وبكرة ربنا يهديهم .. ويتجوزوا
و معلش اللى إنكسر يتصلح
و ربنا حليم ستار


و يا سيييدى
اعتبر براد بيت .. جوز توافقى



:)

بفتقد تعليقاتك
وبعتبرها جزء اصيل م مدونة اختك
يا محمد ... بجــــد

ربنا يطمنا عليك
يا اجدع مهندس ف السعودية
ومصر
و الكرة الأرضية بحالها

اعلنت هونولوو وكذلك دوليات صغيرة بالقرب من القطب الجنوبى وبعض جزر المحيط الهادى و دولة بالقرب من مثلث برمودا عن توفر عدد 2 رئيس توافقى على المشترى شراء كراسة الشروط ودفع التأمين الابتدائى

الطائر الحزين
------------

:))

طب موافقين
بس يفضل ف هونولو سعادتك
و يتمريس توافقى هناك بمزاجه
و على أقل من مهله
وبراحته
وملوش دعوة بينا هنا ف مصر خالص
ماشى ؟؟؟

صباح الورد

حقولك كلمة واحدة
البرادعى إبن المحظوظة ده برنس
بس

تيما طماطم
اولا
وحشاني اوي

ثانيا
انا خلااص جبت اخري من السياسه
وهو دا اللي عوزينوا

ثالثا

اتصرفي خلي في لوقاء قريب
عوزا اشوفك

بس الاخبار ف بلادى
بقت عذاب وحرقة دم

صدقتي قولا
الواحد زهق من البلد و جالي اكتئاب من الأحداث
صدقيني أنا مش عارفه أكتب حاجة من اللي بيحصلنا ده
فعلا اللي إحنا فيه ده نظام قمعي بحت !!
ما تخديني جانبك أنادي معاكي على بتاع النعناع :)

إرسال تعليق