.

.

خــــــطـــــــاريــــف ...... 19  

Posted by: فاتيما in






يا ولدى  
أنت تحكم أمك 
و أمك تحكمنى 
و أنا أحكم العالم 
لذا فأنت .... تحكم العالم 
 يوليوس قيصر  


أحنُ إلى خبز أمي
و قهوةِ أمي
و لمسةِ أمي ..

محمود درويش



انا شايفك سنة 
و التانية بتكبر 
و بشوف روحى فيك 



لا يمكننا فى هذه الدنيا
أن نقوم بأعمال عظيمة
بل يمكننا فقط
أن نقوم بأعمال صغيرة بحب عظيم
الام تريزا 




طب سؤال


 و مش عاوز إجابة 


مجرد تعجب 


 مش أكتر ... 




 ليه كل أمهات الشاشة
المعجونين طيبة و غرقونا ف حنيتهم 
إتحرموا ف الحقيقة إنهن يكونوا امهات ؟؟




يمكن عشان 




لا تقاس أعمار الأمهات بالسنين
 و لكن 
بما استودعه الله 
 في قلوبهن من خير العطاء
محمد حسن علوان - روائى سعودى 

و أبو العناكيب اليوسوفة

  إتعلق قلبه بعنكوبة 







طب لو سمحت 
يا سى عنكب أفندى
 تتعلق بعيييييييييييد
عشام طنط خوخة بتخاااااااف 



ليس في العالم وِسَادَةٌ أنعم
 من حضن الأم
وليم شكسبير 




 يا خراااابى على دا حضن





:)

Mamma Mia



إكفى القدر على فُمّها 
تطّلع البت لأمها 
 مثل عامى


 لأ على فكرة
مش ف كل حاجة 



الام النشيطة 
تعلم ابنتها الكسل 
أنيس منصور 


و هذوها حقيقة 
امى كانت و ما زالت بتدلعنى
عشان كدا طلعت خايبة  


انا بجد مش عارفة
 ماما مستحملانى ليه و ازاى ؟!!؟؟

  
 هاه ؟
  الكمتري بيتقال عليها آجاص ؟؟



يعنى أنا لو جيت ف مرة اقولك
بدل الكمترياية دى يا سوسو 
خد آجاصاية 
ميبقاش شكلى بشتمك !!؟؟





كان 
فيه فراشة صغننة 





فرجعناك إلى أمك 
كى تقر عينها ولا تحزن 




يا ترى والدتك ازاى حالها ؟


عاملة ايه .... هيا 

 و كل امهات 
واهالى الشهدا






نقولهم 
بعد اللى بيحصل دا كله
ايه .... ؟



خلاص 
كفاية كده





ونقول ايه لسميرة ابراهيم 
و لــ ... ست البنات 
و كل بناتك يا مصر 
اللى بكرة هيكونوا امهات؟؟


  ان اللى بيحصل 
دا عادى  ... ؟
ولاّّّ أحسن 
كل اللى عنده بنت .. نقوله 



إقتلها و إخلص 



ليْسَ يَرْقَى الأَبْنَاءُ فِي أُمَّةٍ مَا 
لَمْ تَكُنْ قَدْ تَرَقَّتْ الأُمَّهَاتُ
جميل صدقى الزهاوى - شاعر عراقى




 ... إثبت مكانك 
ده عينيك شايفة الدليل 
إبعد عنهم وسيب الحيطة عليهم تميل
ماما ... زمانها ... جاية 


بس .. المشوار .. طّول شوية 


 متزعلش



بحبك قد روحى لأ لأ اكتر كتير
نفسى أغمض و أفتح 
الاقيك بقيت كبير



 و ساعتها 
 خطوتك هتكبر
 و السكة بينا ... هتقصر




يا بعيد عنى ... و قريب
مهما ياخدوك بعيد 




لإنك 
ستظل إعلانا بشريا 
يسير على قدمين ورديتين 
يشهد بقدرة الخالق سبحانه وتعالى 
على تكريم إنسانيتى 
ستظل يداك ترفرفان راية بيضاء 
تبحث فى الفراغ عن حضن حنون 
هالة سرحان - فصبر جميل 
من مجموعة مقالات - وقالت شهرزاد 



 ..............

و هترجع و ساعتها 
محدش هيعرف ياخدك منى




 الامهات هن فقط القادرات

 على التفكير في المستقبل 
لأنهن ينجبنه من خلال أطفالهن
 مكسيم جوركى - أديب وناشط سياسى روسى

  
................


قلب الأم هوَّة عميقة
 ستجد المغفرة دائما في قاعها
أونوريه دي بلزاك



 طب يا ريت


محدش 
يزعلهن يا عيال
 



و .... صباح الخير يا مولاتى
صلاح جاهين




كل لحظة وكل يوم 
وانتى احن أم
أنا بتحبك 
وانتى احلى المامات 
وانتى ست الستات 
ولما بتبقى فى شقاوة البنوتات 
أنا بتحبك فى كل الحالات 
بسكى - 21 مارس 2012



و ف عالم الواقع   
 بجد الحاجة أم فاتيما 
بجدعنة الأم دى و شطارتها 


و يوسف معايا
 كان زى الولد الجميل 
دا ف ذكائه و احتوائه وحنيته 


و لو ف عالم موازى بقى  
 أود دون أن يحز ف نفسى 
و ... إننى كنت أنتوى 


لو إن يبقالى عيلة  
 كبيرة زى عيلة زيزى كدا 
بمشاكلها و ظرفها و جنانها


و كان نفسى أكون 
بهيبة الأم دى ... و قوتها 


بس .. مش عايزة أربى 
 كل العيال دى لوحدى 
و موافقة ماشى أتجوز رشدى أباظة 
 انسانية و انكاذاااا للموقف وكدا 
 لأ ... إستنوا 
مش عاوزة رشدى أباظة
لأنه كان بصباص و عينه زايغة 


أنا عاوزة واحد 
شبه الراجل الطيب دا 



و أكون 
بـ .. كبرياء الأم دى  


و يا ريت لو أفضل عيلة 
و ألعب مع ولادى و أحفادى 

 و أبقى مبهجة زى الام دى 


و اكون بــ .... حنان 
الأم دى 


و بإنكار الذات
 اللى عند الام دى 
بس بلاش .... ضعفها 
  

و مش عاوزة إجوازات بناتى 
يعملولى ألف حساب 
زى الأم دى


و أخيرااااااااااااا
قوطعت الأمومة و الخلفة خاااااااالص  
لو هبقى بعد الشر بعد الشر زى الام دى 


ماجد أخويا
إعلان و تم تعليقه 
ف مدخل عمارتنا و كل الأسانسيرات
و تصرف ... ملخصه  
كيف تتحمل المسئولية 
و تحتفظ بالبساطة والتلقائية 
و تشر براءة و حنية 
و انتا تخطو ... نحو التلاتين



عارفة يامه
أنا حاسس إن الموت
ما خدش منك غير الطرحه
والجلابيه السودة
ما أنا كل ما عدى جنب الاوضة
أسمع صوتك
وأنتى بتضحكى ع الدنيا
وبتدعيلى ... روح ربنا معاك
هاتسافر

و هترجع مجبور الخاطر
و هستناك

 على سلامة 


و بمناسبة عيد الام بقى 
أم المجلس العسكرى 
على أم البرلمان 
على أم الأستشارى
منقول





كل عام و كل ام مصرية بخير 
دعواتكم 
لأن شكلها مش هتتحل غير بدعواتكم
عمر طاهر 

--------------------------------
---------------------------------------------
التدوينة دى إهداء 
لــ .. ريـرى
و لــ ... موناليزا
و لــ ... د.ستيتة
و لــ ... بوبو
و ... لـــ دوبــا

-------------------------------------

This entry was posted on الأربعاء, مارس 21, 2012 and is filed under . You can leave a response and follow any responses to this entry through the .

67 كــــلام بيطــبطـــب عـــلى قــــلبى و روحــــى

كل سنة وكل أمهات التدوين بخير
واللواتى لم أذكر أسمائهن
بس عارفين روحهم


وكل سنة وامهات أمهات التدوين بخير
وهن برضو عارفات نفسهن

وكل سنة وامهات التدوين المحتملات بخير
بوبو وكل واحدة ربنا كرمها
او هيكرمها بالحمل ف الوقت القريب


وكل سنة و بناتيت التدوين المرشحات يبقوا امهات ف المستقبل القريب .. بخير
سمعانى يا دودو ويا كيارا ويا ميرا
ويا سونى و ...
و يا كل البنات المخطوفات
وعلى وش جواز


وكل سنة والبنات
اللى لسه ملبسوش الدبلة
يلبسوها قريب
ويحولوها م اليمين للشمال
برضو قريب ونقولهم مبروك ...


كل سنة و الامهات
بكل الظروف والاحوال ..بخير
ان شاء الله بخير


كل سنة وانتى طيبة يا بسكى
وعقبال ما أشيل عيالك

كل سنة وانتى طيبة يا توتو
ويا عبير يا حبايبى وصديقاتى
اللى بيحبونى معرفش ليه
وبيصبروا عليا
و يبعتولى المحبة من على بعد اميال
وبتوصلنى ... على جناحات الملايكة


كل سنة وانتا طيب يا حبيبى
و معايا و جنبى


كل سنة وانتا طيب يا يوسف
كل سنة وأنا امك
مكتوبة على اسمك انى مامتك
و انتا مكتوب بإسمى
وهتتنادى بيا ف اليوم العظيم


كل سنة
وانتا ابنى
ونور عينى
وروح قلبى يا حبيبى


ماما

مممممممممممممم

طيب نظرا لأن البوست ده عامللى حالة لا أستطيع وصفها
أو بمعنى أدق لا أريد وصفها

فلا تعليق ... مؤقتا

يمكن كمان شوية اقدر اكتب تعليق


كل سنة وانتي طيبة يا طمطومة

اه خوفت اول ما شوفت العنكبوت
وكنت هاسيب كل البوست واجى اقولك ليه كدة يا طمطومة ما انتى عارفة انى بخاف من العناكب
لقيتك فى الكوبليه اللي بعديه علطول عاملة حسابك انى بخاف منهم وبتبعديهم عنى



اساسا انا كنت لسة امبارح كنت هاقولك يا ريت تعيدي نشر بوست
" الهايلة "
اللى كنتى كاتبه عن ماماتك فى عيد الام من سنتين تقريبا

البوست ده كان جميل اوى
دورت عليه دلوقتى فى الارشيف بتاعك مالقتهوش
استغربت انك رفعتيه


انا ماشية
وبرضه مش هو ده التعليق اللى عايزة اكتبه على البوست ده


انا لسة جوايا حالة اللا تعليق

كـــل سنـــة وانتي طيبة يا فاتيما
:)

و كل أما آجي هنا أحس إني عايش ! .. بجد .. كأن الهوا هنا محمّل بأحاسيس


كل سنة وحضرتك طيبة :) .. الدنيا تملي بتبقى أجمل بوجودك

اولا ... بوست رائع جدا ... ولكن ليس بروعة الأمهات .. فاللسان يعجز ان يوصّف تلك الحالة الربانية الخالصة .. ويظل القلب دائما مستودعا لما استعصي علي اللسان قوله .

ثانيا ... تحية الي كل الامهات علي وجه البسيطة في ذلك الموعد الرمزي ... فالام تستحق التحية في كل لحظة وكل يوم .

ثالثا ... كل عام وانتي بخير وبصحة وتفاؤل .. كل عام وانتي من احبابك اقرب بإذن الله .. يا أم يوسف .

واخيرا .... لا يجب ان ننسي صاحب الفضل في احياء تلك المناسبة وهو ... مصطفي امين .. بطبيعة الحال .. نسأل الله له الرحمة والمغفرة .

وعلينا الا ننسي ايضا من فقد الأم او الاب ... فأظن ان هذا اليوم يظل جرحا متجددا لهم في كل عام ... رغم ما فيه من حسن المقصد والنية .

ولكي مني كل الشكر والتحية

كل سنة و انتي طيبة يا أم يوسف
و كل أم طيبة

كل سنة وانتى يوسف بالف خير
عادى يعنى خطاريف رائعة ...مش جديد خالص الكلام ده
عندى تعليقات كتير على الخطاريف بس نازلة حالا ...على ماآجى بقى وقفت وتنحت خالص لما اتكلمتى عن رشدى أباظة
قولتى اللى عايزة أقوله ياطمطم
رشدى دمه خفيف ولذيذ ...بس ماحبش اخويا ولا سى الأستاذ بتاعى ولا جارى ولا زميلى يبقى رشدى أباظة
رشدى حلو قوى وهو جوه الشاشة ...بره بقى ..شكرا يافندم

كل سنةوالحاجة والدة فاتيما بالف خير
يابنتى الأمالمصرية دى حكاية تانية خالص ومينفعش تتوصف ..دى كذا حاجة مع بعض وست ورال فى نفس الوقت
ربنا يبارك فى صحتنها وعمرها وتدلعك ياستى براحتها ربنا يخليها


سؤالك عن أمهات الشاشة العظيمات اللى كانوا مش أمهات بيخلى عنيا تدمع
ليه صحيح ؟ هى الأمومة دى موجودة حتى ولو مفيش ولاد ؟
لوحدها كده موجودة يارب :)

ماما زمانها جاية
بس المشوار طول شوية
متزعلش
------------
دى حقيقة كونية ياطمطم ..ماما لازم تيجى
الكلام ده مسلمات يعنى
ربنا يهون المشوار

وحشتينى ياطماطم

أتمنى من كل قلبي ان كل البنات تخلف أربعه وأربعين عيل ويبئوا كلهن أمهات

أربعه وأربعين

كل سنة و انتي طيبة و كل الامهات بخير
و كل سنة و يوسف طيب و بخير
ربنا يحفظه و يحميه
و ربنا يسعدك و يرزقك الاطمئنان و السكينة
ربنا يجمعكم على خير يا رب
اعتبري الكارت ده هدية عيد الام مني
http://www.iraqna1.com/vb/storeimg/Iraqna1_1322771318_402.jpg
عارف انك مش كبيرة اوي كده و انا مش صغير اوي كده علشان اجيبلك هدية عيد ام
بس الامومة و الحنية اللي جواكي مع كل اللي تعرفيهم تخلي الكل حتى لو كانوا اكبر منك سنا يقولولك كل سنة و انتي طيبة و عيد ام سعيد

كل ثانية وانتي أم بكل الحب اللي في الكلمة دي
الخطاريف دي
أحلى خطاريف

I love you M <3 M

فاتيما
روح الفلب الملائكية

اد ايه البوست جميل لدرجة انى عايز اوريه لامى و اكتفى بيه و فلسع من الهدية
بجد بجد بجد يا فاتيما مفيش اجمل من قلب الام
سبحان الله اى شخص مهما نحبه لو مبادلش الحب بحب و عطاء و معاملة كريمة يتحول الحب الى فتور و كره
الا قلب الام العيال يطلعوا عنيها و برده يحبوهم
يا سبحان الله
تحية من هنا الى ام روح القلب الملائكية
اللى متعرفش الا تحب و بس
اللى متعرفش الا تعطى و بس
اللى دائما تجذب الفراشات حولها كبقعة الضوء فى الظلام الدامس
الى امك العظيمة اللى وهبت لنا اجمل شخصية
كل سنة و هى طيبة


و تحية لاجمل ام ام جو و منساش الدرس اللى اتعلمته منك لما قلتى ليا ان يوسف يبقى سعيد و يعيش حياة طبيعية اهم من وجودى معايا
بجد يا فاتيما ربنا يخليه ليكى
و كل سنة و انتى و يوسف طيبين
و ربنا يخليه ليكى يا رب

أنا ماما كمان

أبدعتي بكلامك, وخصوصي حتت السيما دي

صباحك خير

كل سنة وإنتي طيبة ، وكل الأمهات المكافحات المخلصات الناكرات للذات بخير وصحة وسعادة ):

كل سنة وانتي طيبة و بخير يا ام قلب ابيض زي الورد اللي نفسي اديهولك النهاردة :)
كل سنة ومامتك بخير و سعادة يارب
كل سنة و امي بخير و سعادة و يفرح قلبها و يعينها عليا
كل سنة وكل ام طيبة و بخير يا رب
الام دي بجد رحمة ربنا على الارض
بس صحيح بقا ازاي البوست ده حلو كده خلاني في حالة اذبهلال و خلاني اقول الله انا نفسي ابقا ام بقا و العيال ولادي يكتبولي بوست حلو كده :))))
تحياتي لقلبك الابيض اوي اوي :)

كل سنه وانتي طيبه يا فاتيما
انتي جمعتي الحب كله في البوست ده
الامومه في كلماتك جميله
والغربه هنا ملهاش مكان
والقلب الطيب موجود مافيش كلام
تحيا امهات العالم فتضحيتهم
لا تقدر بمال

ايه الجمال ده يا فتيما بجد تحفففه

كل سنة وانتى طيبه وبخير

ربنا ميحرمنا منهن


دمت بخير ام يوسف

كل سنة وانتي طيبة وبتشاركينا الجمال ده كله في الخطاريف

كل سنة وانتِ بخير وسعيدة ومتهنية ياست الكل ويارب يوسف يكبر ويبقى راجل قاااااد النيا كلها ويسعدك بيه ويسعده بيكِ
كل سنة وانتِ بخير وامل وتفاؤل ويارب الايام اللي جاية اجمل واحلى

لولا

فاتيما

كل لحظه وربنا يحقق احلامك
كل لحظه وانتى شايفه الخير قدامك
كل لحظه والخير جواكى كتيييييييير
كل لحظه وربنا يعوض عليكى باللى يفرح عنياااااااااااااكى

يارب على طول بخير وسعاده

هناك من البشر ما ان تنظر اليهم حتى تشعر بطيبة الدنيا متجمعه فى عيونهم وكنتى انتى من هؤلاء


تحياتى وتقدير وامنياتى القلبيه بالسعاده

زهــــراء

كل سنه وانتى طيبه وكل ام طيبه
دعواتى اليك ان ربنا يقرب البعيد ويجمعك قريب بفلذه كبدك يوسف
ادعى من قلبك كثيييير ولا تيأسى من رحمه الله قد يحدث اللقاء والقرب على اهون سبب
ربنا معاكى حبيبتى
الصور والتعليق شىء خيالى رائع

بوست تحفه
تحياتى

لا تعليق يليق

كل سنه وانتى فى قلبى ويوسفك فى قلبك :)

مش عارفة أوصف لك مشاعى حالاً
شوقى وأنا بقرأ البوست سرحت فى كل صورة فيه جداً
ولقيت نفسى بقول بشجن" كان نفسى أوى يا أمى أهاديكِ السنة دى بأولادى تشوفيهم كده وتفرحى بيهم.. بس غصب عنى لسه ماجاش النصيب"

ولما لقيتك بتهديلى البوست انشكحت كده وطلعت منى ضحكة عفوية ومازالت مرسومة على وجهى ابتسامة عريضة أنتِ سببها :)

رزقكِ الله فرحة وسعادة قريبة

كل سنة وانتى طيبة و ربنا يرجعلك يوسف لحضنك يارب

ربنا يبارك لك فى مامتك يارب و يرزقك من حيث لا تحتسبى

كل سنة وأنتى طيبة يافاتيما <3

;*

عقبال ماتفرحى بيه :))

http://www.youtube.com/watch?v=XItYE5G6GQ8

كل سنة وانتي طيبة = فاتيما
وكل سنة ومامتك ومامتي طيبات ومدلعينا والحيطة القريبة البعيدة اللي ساندانا
وبوست جميل لا يوصف
بجد
كله حنيه

ودعائي لكل أم حية أن يبارك الله لنا في عمرها ويبارك لها في صحتها

ولكل أم سبقتنا أن يرحمها الله رحمة واسعة ويجعل قبرها روضة من رياض الجنة ويبشرها بمقعدها بالجنة

ولكل أرملة أن يبشرها الله حية وميتة بصحبة النبي الكريم

ولكل single mum أن يقويها الله ويعافيها ويرزقها بر أبناءها حتى لا تتذكر أنها رأت بأسا قط

ولكل أم متزوجة أن يرزقها الله سعادة الدارين بصحبة زوجها ومن تحب

وانا وانتي وآمين

http://www.youtube.com/watch?feature=endscreen&NR=1&v=TqdHTshbfGk

ازيك يا فاطمة؟
انا كنت برة البيت طول اليوم
ومدونتك رفضت بكل الطرق تفتح من ع الموبايل
عموما كنت عايز اقولك كل سنة وانتى طيبة ياست ام يوسف

http://www.youtube.com/watch?v=ZsyrlYU2mYs&feature=youtu.be
صنع ايديا وحياه عنيا
يارب يعجبك
رايك يهمنى

اولا وبادىء ذى بدء

عاوزة أعتذر عن التأخر ف الرد
عندى انفلونزا رهيييييييبة
و مسكينة وحالتى عدم ...
معلش

كل سنة وانتوا كلكم طيبين
وبألف خير يا رب

بت خيخة وأى كلام
---------------


ازيك يا خوخة يا مسكرة
وكل سنة وانتى طيبة
واما بعد


اصلا اول ما شوفت البنت ف الصورة
وهيا مرعوبة من العنكوب
قولت دى خيخة بالمللللى
مكنش ينفع محطهاش واحذر يوسف
بس اصل غنوة العنكبوت النونو دى
ليها عندى انا وهوه ذكرى لا تمحى خالص
مكنش ينفع مفتكرهاش وانا بكتب خطاريفى دى


ثانيا بقى
بوست الهايلة بتاع ماما اتشال بأوامر عليا من الحاجة ام فاتيما ...
عشان حست ان فيه خصوصيات تتعلق بيها وميصحش تنكتب وحاجات كدا من البارنوايا اللى انتى عارفها بتاعت الامهات دى
وغُلبت اقولها يا ماما
انا مفضوحة اصلا ع المدونة
والناس عارنى وعارفكى .. ومتخفيش دول ناس كومل واخلاق ..مفيش فايدة
امى بقى اعمل ايه
شيلته بعدها علطول ...

كان بودى اقرى التعليق اللى ف قلبك
او بمعنى ادق الحالة اللى حصلتلك ...
بس عارفة انها حاجة حلوة
ورقيقة
و خيخية مستخيخة زى خوختى حبيبتى
فخلاص مش عاوزة أعرف
كفاية مجييك هنا وبس

بوسات ليكى وحضونات
وبوسس كتير لشريف وحضاضين ..

وكل سنة وانتى طيبة يا ماما خيخة
لأ
مامى
عشان شريف بيقولها كدا
مامى
:)

P A S H A
---------


وانتا طيب يا شريف باشا
وعقبال ما نقولهالك وانتا أب
ان شاء الله
وتتدبس ف الهدية اختيارا و فلوسا و كله

:)

ولد تحت الصفر
------------

وانتا طيب يا عزيزى
ومتتصورش تعليقك دا جميل قد ايه
و زى ما يكون و كأنه بوكيه ورد كبييييير ووصلنى مع المعايدة
:)

اندروميدا
---------

ازيك يا معتز ؟
وكل سنة وانتا بألف خير
وشكرا على رأيك وذوقك وسؤالك عنى
:)

وربنا يعيد المناسبة دى
على كل الناس بالخير
اللى مامته موجودة يلحق يتبارك بوجودها
ويحاول يفرحها ويفرح معاها
واللى والدته فى جنات النعيم
يفتكرها بالخي ويدعيلها
ويفرح بولاده وبكل ام تانية ويفرحها

وعقبال كل البنات لما يبقوا امهات
والرجالة يبقوا ابهات


وكل سنة وانتا طيب يا فندم
وكل من عندك بخير

:)

مهندس مصرى
----------


وانتا طيب يا محمد
وكل اللى عندك بألف خير

ربنا ما يحرمنى من سؤالك عنى
ولا قلبك الطيب دا ابداااااا

حفيدة عرابى
----------

اولا
وقبل كل حاجة وأى حاجة

كل ما ابعتلك رسالة ..متوصلش
موبايلك مخاصمنى ولا إييييه ؟؟!!


ثانياااا
انتى وحشتينى جداااااااا
وكان نفسى اشوفك يوم التبرع
وارجوكى بقى تحاولى تيجى
سفرية اسكندرية لو أمكن
ممكن ؟؟؟
هتبقى الجمعة 6 ابريل القادم
زنى على طنط من دلوقتى بقى


ثالثا
انا عارفة ...
انا وانتى ملناش ف حوال رشدى اباظة دا خالص
يتحب آه يتحب ..
بس هيخلى الواحدة عينها ف وسط راسها بقى وف وضع تنافسى طول الوقت والمشرحة مش ناقصة قتلى ..هه


اما عن الامهات
فمعرفش
يمكن حرمانهن مم الامومة الفعلية طلع كل شحنة الاحساس دى ع اشاشة
يعنى سعاد حسنى ولاّ سناء جميل ولا امينة رزق ... ازاى الواحد لو ميعرفش قصص حياتهن يتخيل انهم مش امهات ف الحقيقة ..وهن بهذا القدر الرهيب من الحنان اللى بيدلدق علينا كدا من غير حساب ؟!!!

سبحان الله فعلا
والامومة احساس ممكن ينوجد
من غير اطفال
مش ساعات كان يبقالنا صديقات تحسى انهن امهات لينا ..
حاجة كدا بالفطرة وسبحان الله

بوسيلى ايد ماما
وكل سنة وهيا طيبة وبألف صحة وخير
وانتى ف حضنها دايما وفرحانة بيكى
ومطمنة عليكى
ووحشتينىىىىىىىىىىىى جدا
يا فدافيدوووووووو

و بوسات وحضونات بتتحدف ف كل أركان البلوجررررررر بقى

مصرى جدا
--------


نعم يا خويااااا
حتى عيدنا بتبصولنا فيه
وايه البوست اللى انتا كاتبه دا حضرتك ؟!!!!
بلاش الحكد دا
منتوا ابهات ومحدش فتح بوقه معاكو
بس متعملكوش عياد عشان النية من جوا مش كويسة وخالصة ...
صفوا نيتكم انتوا بس
وربنا يسهلها

كل سنة وانتا بألف خير
و معانا ووسطنا ...
ومحاط دايما بالمحبة والود
و بأمهات الأربع وأربعين برضو

D:
وش مطلع لسانه

مصطفى سيف الدين
----------------
وانتا طيب وبألف خير يا مصطفى
وعقبال ما نقولها للمودام بتاعتك
بأعتبار ما سيكون ان شاء الله
لما تلاقى بنت الحلال ...
:)
ميرسى ع الكرت الحلو
ومش حكاية كبير وصغير
حكاية القلب فيه ايه
واختك فاتيما تؤمن ان الاعمار بتتقاس بما يحدث فيها و بما يُنجز
وكمان بالفرحة والأمل الباقى ...
ولهذا
اوقات احس ان عندى 80 سنة
وقلبى يساع حاجات وناس كتيييييير
واوقات تانية احس انى بنت 18 ولسه معملتش حاجة اصلا
:)

يكفينى شعورك الجميل دا
وكل سنة وكل من تحبهن بخير يا رب

Baskouta
--------

وانتى أطيب يا بسكوتة قلبى ى ى ى
الرسالة بتاعتك كانت تحفففففففة
وحبيتها جدااا
وقولت لازم أحطها ف البوست
وشكرا انك وافقتى
ربنا يخليكى ليا يا عيونى

وانا .. بتحبك جدا

ابراهيم رزق
------------

دايما تعليقاتك جميلة وطيبة يا ابراهيم
وانا مبعرفش أرد اقول ايه ...؟!!
بس بجد
شكرا من هنا لآخر الدنيا
وربنا ما يحرم اختك فاتيما منك
ولا من كلامك الطيب يا ابو العيال

سلامى بقى لفريق البنات
وامبراطورية س اللى عندك
:)
وامهم اكيييييد قبل منهم
وكل سنة ووالدتك بألف خير
وتطمن عليها دايما وتفرح قلبها بيك
وبالعيال

كل سنة وانتا طيب

Um Ommar
--------
كل سنة وانتى طيبة يا ام عمر
و يا رب دايما عمر
يكون بخير
متربى ف عزك
ومتهنى ف حضنك
ومتغطى بدفاكى

صباحك ومساكى وكل وقت
تكونى بخير يا رب

كل سنة
وانتى طيبة يا حبيبتى

ديدى
----

وانتى طيبة يا ديدى
وعقبااااالك يا حبيبتى

:)

افكار مبعثرة
------------

كل سنة وانتى طيوبة يا فوكيرة
والسنة الجاية ف نفس المعاد
نقولهالك
مين عارف ؟


ومبسوطة عشان البوست عاجبكم
كل سنة والامهات كلهن بخير يا رب

ال:-* دى على جبينك بقى
ماشى ؟

:)

كارولين فاروق
------------

كل سنة وانتى طيبة يا كارولينا
و بالف خير يا ماما انتى كمان
وكل سنة ومامتك بالف خير
وبابا الغاااااااالى
وهبة الطيبة
وكل حبايبك بخير يارب

بوسات
وحضونات
ومزيكات يا حبيبتى

أمة الرحمن
---------


وانتى طيبة يا ميما
وبألف خير
ومبسوطة جدا
ان البوست عجبك كدا يا حبيبتى
وكل سنة
وكل اللى بتحبيهم بخير
يا رب

لبنى أحمد نور
-----------

وانتى طيبة يا لبنى
وعقبال مااقولهالك يا حبيبتى
وانتى ماما
:)

لولا وزهراء
-----------

ميرسى يا لولا
منحرمش منك يا حبيبتى

كل سنة وكل احبابك بخير
:)

لولا وزهراء
----------


وانتى طيوبة اكتر واكتر يا ذات الوجه المشرق والقلب الأكثر إشراقااااااااا

احنا جاينلكم اسكنكرية يوم 6 ابريل
يا ريت تعملى حسابك عشان نشوفك يوميها بقى
ممكن ؟

عاوزة اديكى البوسات والحضونات رسمى
وعلى يد محضر
:)

كل سنة وكل احبابك بخير يا رب

هبة فاروق
---------

وانتى طيبة يا هبة
وبابا وماما وكارولينا بخير

وتقلقيش يا حبيبتى
انا عند ظن عبدى بى فليظن ى ما يشاء
وانا ظنى بربنا اللى أبعد من الخير بمرااااحل ومتأكدة ان كل اللى بيحصل خير
ومتشالنا فيه انا ويوسف كل الصح
بس بستوعبه على مهلى مش أكتر
:)

كل سنة وانتى طيبة يا حبيبتى

عاشقة الرومانسية
----------------

بت يا دودوووووووووووووووو
الغنوة حلوة قوى
انا عاوزة اقولك
انى بعشقها من زمان
والمسلسل كله اصلاااا بيفكرنى بتفولتى المشردة
انا شوفته لما إتعرض إحم إحم ف العصور الوسطى كدا ...لما كنت ف ابتدائى
وكان مكسر الدنيا وقتها
الاغانى بتاعته اصلا حلوة
وبابا كان بيحب وردة
فأشترى الشريط بتاع اغانى المسلسل
وكنا بنسمعها ف السفر وكدا
فليها ذكريات عندى
كل الاغانى تقريبا
كل واحدة كان ليها ذكرى


ومتخيلتش انه بعدين
هعيش تقريبا كل تفاصيل قصة البطلة
وكأنى الأغانى دى مكتوبالى انا ويوسف
:)

الحمدلله

وانا علقت هناك بقى
ابقى شوفى التعليق والرد

كل سنة وانتى عروسة بحورى الحلوة
والسنة الجاية تبقى ماما محتملة
زى المرشح المحتمل بتاع الرياسة كدا
بس تبقى بجد مش منظر
وتبقى بعيد عن العسكر
قطعوا وقوطعت سيرتهم
:)

كل سنة وماما بألف خير يا حبيبتى
وسلامى لمحمد جدا جدا جدا

موناليزا
--------
مون مون

انا مش عارفة التعليق دا للنشر ولاّ لأ
بس انا لقيتك مقولتيش موش للنشر
فنشرته ...
عشان حبيته قوى
زى ما بحب أى تعليق بتسيبيه عندى
ومكنش ينفع اكتب البوست دا
من غير ما تيجى انتى ف بالى قوى
انتى ف بالى دايما

وربنا يا حبيبتى يسعدك
ويعوضك
ويكرمك
ومبسوطة عشان انتى ابتسمتى
دى لوحدها هدية ونعمة ...

بوسات وحضونااااااات كتير قوى

جارة القمر
---------


وانتى طيوبة يا حبات اللولى
ومامتك بألف خير يا حبيبتى


بخصوص التعليق اللى موش للنشر
هوه ينفع
ويجوز شرعا يعنى
انى آجى ف عيد الام
وأضرب حد ؟!!!!


عشام لو حد اباح ذلك
عاوزة أضربك
ممكن ؟!!


هتبطلى امتى الحساسية و رهافة الحس دى يا بنتى
وهما اللى واجعين قلبك كدا ؟!!!

متبطليهمش عموما
عشان مش هتعرفى ...

طيب
بس معايا انا بطليهم
لأنك المفروض تبقى عارفة
ومتأكدة ان عمرى ما هفهمك غلط
حتى لو اتكلمتى غلط او قولتى حاجة عكس اللى عاوزة تقوليه ...
انا فاهماكى يا حبيبتى
وعارفة قصدك ايه
وربنا يصلحلك الاحوال يا رب
وبطلى تقلقى افهم ايه ومفهمش ايه احنا عدينا المرحلة دى من بدرى اصلااا
اختك الكبيرة فاتيما مش لسه هتعرفك يا حبات اللوى
ماشى ؟؟

candy
-----


وانتى طيوبة يا كاندى
وكل حبايبك بخير يا حبيبتى


ستيتة
-----


اللهم آميييين يا ستوتى
ويسمع منك يا رب

كل سنة وانتى حبيبتى
وست السوتيتات
وفكرى والنبىىىىىىى ف موضوع اسكندرية
نغير جوا وروتين ونشوف الناس اللى بنحبهم وبيحبونا ...
انتى مزاجك بييجى على اسكندرية
فكرى عشان خاطرى
نفسنا نشوفك قوى


كل سنة وماما بألف صحة وخير
وانتى اجمل
وأجدع ام شوفتها
وفيكى صبر
وكبرياء
مشوفتهمش ف حد


بوسات وحضونات لمانوسة وعفروتو
وليكى قبلهم
من هنا لحد عندك
محملين بالورد
والياسمين
والبهجة يا حبيبتى

عمرو فكرى
--------


ولا يهمك يا عمرو
خليك براحتك
وكل سنة وانتا طيب وبألف خير
وسلامى لريرى قوى قوى قوى
ولما تروق قولها فاتيما بتقولك
انتى بكرة هتكونى أم من الصنف المتميز
الناد
اللى محدش يعرف يبقاه
وعيال كتير تانية
هتتمنى تستخبى ف حضنك من كتر حنيته
و الدفا اللى هيكون فيه


ربنا يسعدكم يا واد
وأفرح بيكم عن قريب
اللهم آمين
يا رب

كل سنة وانت طيبة على طول .....وكل الامهات بخير يارب ومصر كلها ...أمين يارب.....والواد يوسف جابلك المناديل ولا لسة؟ هههههه حاكم كان ايامنا لا في دباديب ولا ورد....هما المناديل بعلبتهم....

انا قايمة من الدوخة اللي انا فيها اقول كلمتين وامشي.. البوست حنين اوي ودافي ورقيق.. ومش مستغربة خااااااااااااالص لانه اصلا شبهك بكل رقتك وحنيتك.. مش قادرة اوصفلك احساسي وانا بقرا البوست، وازاي عنيا دمعت وازاي ابتسمت في نفس الوقت :) وطبعا انشكحت جدا لما لقيت اسمي مكتوب.. انا اسمي مكتوب عند فاتيما.. دا ايه الهنا دا كله
كل سنة وانتي طيبة يا طمطم يا جميلة.. يا اللي جنب امومتك بحس اني ام على ما تفرج.. مش بس امومتك مع يوسف.. لا.. معانا كلنا احنا الناس اللي بتحبك.. ربنا ميحرمنيش منك ابدا ولا من الفنضام وشرابات ست ديجا ;)
كل سنة وكل ام حقيقية او محتملة او افتراضية حتى بخير.. ويا رب لما العنكبوت اليوسف يرجع لحضنك متنسيش الناس الكتير اللي متعلقة بيكي دي وبتحبك

Tarkieb
-------


وانتا طيب يا تركيب
وكل احبابك بخير وصحة وسلامة

يوسف حاليا عند باباه
ولذا مجبش هدية
بس انا مش منتظرة هدية
لأنه هوه لوحده هديتى م ربنا
والحمدلله

بخصوص المناديل دى
انتا كدا غالبا دفعتى
يعنى كنت زى حالاتى بتوع حقبة السبعينات
واوائل التمانينات دول اللى كانوا بيشتروا علبة المناديل القماش المطرزة بالورد ....
واللى كانت تقريبا الهدية الوحيدة المنطقية واللى سعرها مناسب مع الورد اذا لقيناه يعنى ...
مكنش وقتها منتشر زى دلوقتى

وبهذه المناسبة يحضرنى دايما التساؤل التاريخى ...
ماذا كان العالم ليفعل لو مكنوش إخترغوا الكلينكس وبكر التواليت ؟!!!

:)

كل سنة وانتا طيب يا فندم

بوبو
----


الأول
سلامتك الف سلامة م الدوخة
بس نستحمل عشان خاطر عيون ديجا
و على لو ديجا مرضتيش تيجى ديجا ..
:)


ثانيا
كل سنة وانتى بألف خير
و سعادة وصحة ورضا يا هوبى


ثالثا
انتى أم جميلة يا هبة
رقيقة
أرق خلق الله زى ما بحب اوصفك
وحسيت ان ليكى ف البوست دا نصيب
ليكى فيه حاجات كتير تنطبق عليكى
بصى كل واحدة اهديتها البوست
اخترتها لسبب ما ...
واتمنى تكون عارفه من غير ما أقوله
بس كلهم كانوا ف بالى بشدةةةة
وانا بكتبه وبحضره



رابعا
انتى عارفة غلاوتك عندى
واصلا اصلا كل حاجة متعلقة بيكى
تنضرب ف أتنين علطول
يعنى البت ديجا دى
انا هبقى خالتها وعمتها ف ذات الوقت
و المحبة هتبقى ضعف
عشان هيا بنتك
وبنت وليد
انا فرحانة بيكم قوى
وبحبكم قوى
وربنا يقدرنى أعرف اكون زى ما بتتوقعوا منى وأحسن ...
عشان المحبة دى نعمة ويا رب ما تزول


خامسا بقى
العنكبوت اليوسف لما يرجع
هيلاقى كل نفر فيكم واخدله حتة ف قلبى قاعد فيها ومتربع وحاطط حاجاته وذكرياته و دعواته و محبته الخالصة ...
هيلاقى قلبى مليان حاجات حلوة كتييييييييييييير قوى
تفتكرى هيبصالها ازاى غير انه يحبها ويحبكم زيى ؟!!!

انا عارفة انه هيحبكم
لما يشوفكم بعيون قلبى ...
و مش هيشغلنى
بالعكس
دا هيشاركنى فيكم يا حبيبتى


سادسا
بوسات وحضونات لبيكا
و كل السلامات والتحيات لوليد الغالى
و خلى بالك من نفسك يا ست
وخلى بالك برضو منهم كلهم كلهم ....
وانتى قدها

انتى كتبتى كل حاجة كنت عايزة اكتبها

كلامك حلو قوى يافاطمة

كل سنة وانتى احلى واطيب وأحن أم

ربنا يكرمك وتفرحى بحضن يوسف قريب قوى ان شاء الله

ياااااااااااااااارب

عمالة ارجع اقراه كتير

حلو قوى بجد

أحن الى لمسة أمى

الام النشيطة
تعلم ابنتها الكسل

ما أنا كل ما عدى جنب الاوضة
أسمع صوتك
وأنتى بتضحكى ع الدنيا
وبتدعيلى

ماما كان عندها انكار الذات

فى حاجة مخليانى كل مااقرى البوست عينى تدمع لوحدها - كل مرة

حلو قوى بجد يافاطمة- انتى فنانة فى الكتابة

" كل سنة وهى أمى، وكل سنة وانا بنتها حبيبة قلبها "

انا على فكرة مقفلتش المدونة ولا حاجة والله بس كنت عايزاها تبقى مفتوحة بس للى بيسجلوا طلع انى عملت سيتينج تانية وقفلتها ادام الناس حتى بعد مايسجلوا - اول ما صاحبتى قالتلى من شوية رجعت فتحتها

ذكاء التنين عادى جدا

كل سنة وانتى طيبة يا غالية
كل سنة وانتى مالية الدنيا دفا وحنية

ربنا يبارك فيكى يا طمطم يارب
اولادك بيعيدو عليكو وبيقولولك وحشتنا عيونك

بحبك
هبة

riri
----

انتى الأحلى والأرق يا ريرى
وكل سنة وانتى طيبة يا حبيبتى
وعقبال ما تبقى ماما
والواد عمرو يتدبس ف هدية عيد الأم
لحد العيال ما تكبر
وتشتريها لوحدها
بس برضو هيبقى الممول والراعى الرسمى
:)

هوه مش هيتدبس قوى
انا متاكدة انه هيكون فرحان
وهوه بيقترح الفكرة وبينقى وبيشترى وبيدفع وبيقف يتفرج عليكى وانتى بتاخدى الهدية وبتفتحيها ...
وقلبك بيرفرف


انتى اول حد جه ف بالى
وانا بجمع ف خطاريف التدوينة دى
وكنت خايفة اوجعك ...
بس قولت لأ
المحبة زى ما فيها وجع
فيها كمان طبطبة
والأتنين سوا يوزنوا المسألة
بمرور الوقت
دا اللى نفسى تتأكدى منه وخديها منى حكمة بصفتى حد مجرب الفراق ووجعه ..
الوقت بيحل حاجات كتير
الوقت بيساعد
وبيخليكى شوية بشوية تستوعبى
ليه دا حصل واشمعنى دلوقت

كل سنة وانتى طيبة يا حبيبتى
و السنة الجاية اقولهالك
وانتى ف بيتك بقى
وحامل ف شهرين تلاتة ع أقل تقدير يعنى ..هه

بوسات وحضونات قد كداااااااااا

Doba
----


وانتى طيبة يا دوبى
وعمر ويسوفى يألف خير يا رب
وحشونى ولاد الأيه ووحشتنى مامتهم اكتر

ربنا يفرحك بيهم
وخاويهم ببنوتة بقى
يلا شدى حيلك
:)

سلمى ليحيى
وربنا يبارك فيه
ويخليكم لبعض
وعقبال ما احضر فرح يوسف وعمر
يااااااااارب

بحبك خالص قوى

إرسال تعليق