.

.

هــيــاتـــم رئـيــس جـــمــهــوريـــة  

Posted by: فاتيما in







إيه ؟؟!!!


نعم ؟؟؟!!!!
محدش يبصلى كدا و مبهرجش 
أيون اؤيد ترشيح هياتم رئيساً للجمهورية
حد عنده إعتراض ؟؟!!


مالها ؟



طب اقروا الاول الأسباب دى 
وبعدين تعالوا نتكلم تانى ونشوف 
هل تستحق ان الواحد يديها صوته و لا لأ ....









قريتوا ؟
إيه دا و لسه مقتنعتوش ؟!!!
طب 
خليكوا معايا 


 


اولاااااا 
هياتم ايه مشكلتها ؟
انها رقاصة و بترقص ؟!!!
عادى ما البلد من ساعة التنحى 
واللى ماسكينها بيرقصونا و لا اجدع قرادتى 
والسياسة علم أصلا لو دورنا ف جوهره
هنلاقيه هوه و الرقص واحد ... !!!




ثانيا بقى دى ست مكافحة 
و وارها تاريخ مشرف حد يقدر ينكر ؟!!!
ولما سمعت أول مرة بحملة ترشيحها
قولت صاحب الفوكيرة دى واد مجبتوش ولادة
آه صحيح ....


طب 
ليه لأ ؟




هياتم وكما تعلمون يا إخوانى
لو دعبسنا ف سى فى ها
 هنلاقيها عصامية 
بدأت من تحت الصفر
ف الأفراح والموالد والملاهى 
اتمرمطت اتمرمطت يعنى 
ونقدر بكل ثقة نشير إلى
 انها ومنذ سبعينات القرن المنصرم
وهى جزء من الحركة النسائية فى مصر 
دا عشان 
بس محدش يزايد عليها 
ويقول انها ظهرتلنا فجأة من العدم
و فين تاريخها النوضالى قبل الثورة ؟؟؟




إضف إلى ذلك ثقافتها المتنوعة 
وإحتكاكها بالجماهير على مختلف فئاتها
ودرجاتها و مستوياتها 
بأختصار متعودة على مقابلة الناس 
و مبتتخرعش 
ولا بتتهززززز 
لأ دى تهز بلد
ولا حدش هيعرف يبوظلها جولة انتخابية 
زى ما بيحصل الأيام دى
 لبعض المرشحين الخيخة 





و دا هيقودنا 
بالتالى الى جزئية تانية
وهى أنها شقيت طول عمرها
فمحدش هيقدر 
يشكك ف ذمتها المالية 
ويقولها مين أين لكى هذا 
ما كله على عينك يا مواطن
الست بقالها 40 سنة كفاح
يعنى لو معاها ملايين ملايين 
وحطاهم اكوام اكوام ف الفسحة 
لا الكسب غير المشروع و لا النايب العام
ولا الجهاز المركزى للمحاسبات
 كلهم ف نفس واحد كدا ...
يستجروا يهوبوا يمتها








الست هياتم فى قول واحد لا جدال فيه
طول عمرها رقاصة 
أه رقاصة 
و صحيح اللى بترقص مبتغطيش دقنها 
ومشوها دقنها 
بس هى لم تصنف من الفلول
ولاكنتش جزء من النظام السابق 
ولا خدمت المخلوع فى أى موقع 
مبتستخباش ورا شعارات حنجورية 
ولا بتتاجر بأسم الدين وتقول هوديكو الجنة 
 مبعتش لحم الغلابة و سرقت قوتهم 
مبتستخدمش القانون عشان ترهب خصومها
ولا دخلت تنام  ف ليلة
وسابت القناصة تصطاد ف المتظاهرين 
زى العصافير ولا فقعت عيونهم 
و لاحدفت عليهم قنابل غاز  
ف محمود محمود
و قالت معنديش خرطوش وقنابل 
و هيا عندها جوا 




علاقتها بالخارج واضحة ومحددة 
و اللى هيسألها 
هيلاقيها متعرفش اسرائيل فين ع الخريطة
علاقتها كمان بالامريكان أبيض يا ورد
مخرجتش تهلل و تقول كرامتشة البلد 
وطلعت بعد كدا عاشقهم ف الضلمة
 وبيبعتولها بوسات و تشكرات عبر المحيطات





البنية م الآخر
 على عكس باقى المرشحين
واضحة وصريحة 
وملهاش غير وش واحد
اللى طول عمرنا شايفنها بيه 
يعنى لا نظام تفاهمات 
و لا موائمات 
و لا مفاوضات 
ولا صفقات ولا دياولو
كلمتها واحدة و بميت ألف راجل 





وبما اننا ف مجال عملها 
فلو بصيتوا لأسباب اختيارها
هتلاقوا ان الشعب المصرى 
مخترهاش هى بالذات من فراغ
يعنى مثلا 
مثلا 



 



ليه مخترش 
 الاخت فيفى عبده ..
هتلاقى السبب عشان هيا قادرة ومفترية
و احنا اتهرينا ضرب 



و ليه مخترش 
سهير زكى و لا حتى نجوى فؤاد 
هتلاقى السبب عشان عاوزين جيل 
عمرو موسى ومنصور حسن يعتزل بقى
ويروح يتشمس ف النادى مش ف قصر الرياسة


و ليه مخترش دينا
هتلاقى السبب عشان مش بس 
مرتضى منصور ... لأ 
 دا البلد كلها هيبقى معاها سى دى ليها
فميصحش كدا خالص يعنى



 
هياتم هى الاختيار الامثل 
عشان شبهنا
ست مصرية حتى النخاع
شفناها و هى مسلوعة ومحدودة الدخل 
و شفناها ف أيام العز بعد ما ربنا فتح عليها
ومفيش حاجة فرقت
فضلت معانا بنفس الشخصية 
ومتغيرتش
ويوم ما تتغير ولا تسوق علينا العوج 
نقولها ستووووووووب 
لو كنتوا نسيتوا اللى جرى 
هاتوا روتانا سينما و جوجل واليوتيوب ينقرى 







هذا بالإضافة إلى خبرتها المتفردة 
و بهدلتها ف الأفراح و الليالى 
واللى هتخليها 
هتعرف تتعامل مع فصيلين هامين 
من المجتمع المصرى مطلعين عيننا ...
الا و هما 
البلطجية و بتوع الداخلية 
فنقدر نتاكد بعد نجاحها ف الانتخابات 
وقعادها على كرسى الرياسة 
انها و بعون الله 
هتقدر تقضى ع الأنفلات الامنى 
ف غمضة عين 
 والذى بدوره هيؤدى
 الى عودة الأكتصاد بقوة
وخصوصا فى قيتاع السياحة 
اللى هتنعنش بسببها
و مش بعيد ابدا الاخوة العرب 
يسيبوا لبنان و تركيا 
ويرجعوا يلبدوا ف حضننا من تانى 




هيا كمان لو تلاحظوا
مبتتكلمش عن نفسها كتير 
أربع عقود مضت ولا شوفنالها لقاء او مقابلة 
بتحكى فيهم عن إنجازاتها زى شفيق
و لا بتكلمنا من طرطوفة مناخيرها
 زى عمرو موسى 
دا حتى الحملة الانتخابية اللى شغالة دى
هيا متعرفش عنها حاجة 
يعنى قمة التواضع يا جماعة 
و سايبة أعمالها تتحدث عنها .. 
احنا زهقنا من حزب المتألطين و المغرورين 
و بتوع الفشخرةالكدابة

وكفاااية بقى خلاص ورمنا





هياتم رمز الانوثة المصرية
جيل السمنة البلدى المصرى الأصلى 
 لا تقولى عمليات و لا سليكون
كله طبيعى × طبيعى 
و رغم كل هذا الكم الوفير من الكيلو جرامات 
 .... كانت بترقص بخفة و رشاقة
متلقيهاش عند بنات العشرين

 
واثقة ف امكانياتها من غير ما تتباهى 
ولهذا صعب تلاقى ستات مصر 
شايلين منها أو منفسنين
او غيرانين على أجوزاتهم منها  





هياتم نموذج حقيقى 
للصحة والمتانة
 و عشان محدش يقول 
ان الحاج صلاح ابو اسماعيل
 الوحيد من المرشحين اللى يملى العين 
 ويبقاله شمخة كدا قصاد باقى رؤساء العالم
لأ 
فيه أهو عندنا ناس كتير 



وأيوه .. 
مش عاوزين ريس مسلوع
عاوزينه مربرب وشبعان عشان ميروحش 
على ترابيزات الخليج يتفجع و يريّل و يفضحنا 






عاوزين هياتم كمان 
عشان نسلطن الأنفوخى شوية 
حتى شوفوا الشعار الحونين بتاع حملتها

يا خرااااشى 
أيوه
 احنا كرهنا الصوت الواطى 
والمطاطى 
والنكد نهارى ليلاتى 
عاوزين شوية فرفشة و انبساط 
الشعب دا أستوى
و هياتم خير من يدلعنا ... 
طب بذمتكم 
دلعها هيا 
ولا دلع الريس عمر سليمان ؟






مش معنى كدا ان البلد لا سمح الله
هتسيب من ايدها
اطلاااااااقا ....
الدلع والحزم منكن جدا يبقوا
وجهان لعملة واحدة 
يعنى وقت الأنبساط ننبسط
و وقت الجد الشبشب هيتقلع 
و شوف بقى لما هياتم تفرش الملاية
لبتوع الداخلية 
والحربية 
و الفلول 
وكل الطامعين برا وجوا
و بتوع الثورة المضادة الكل كليلة
و تنجح فى ردعهم
وف نفس الوقت 
تاخد الشعب الغلبان دا ف حضنها
وتعوضه 
عن الأيام السودا اللى فاتت





غير بقى
 حكاية تكدير السلم العام دى 
اللى هتختفى تماماً من قاموسنا 
هيا هتنهيها و تورينا الهنا كله 
ومش بعيد على حسها الرقص  الشرقى
يبقى مقرر ف المدارس زى 
ما بيدرسوه للعيال ف الهند



و الرجالة لما تشوفها ف نشرات الاخبار 
 ع الصبح تنشرح و تقبل ع الحياة 
و تروح أشغالها وهى مبسوطة وتنتج 
و ساعتها العجلة تدور و تجرى 
و نيجى نجرى وراها ... منلحقهاش






هتقولى 
هوه ينفع الريس بتاعنا يبقى ست ؟؟؟
هقولك آه وماله ؟
يعنى احنا كنا أقل من المانيا 
وبعدين شوفنا ايه م الخناشير والدقون 
غير الزعيق والشخط والنطر والنرفزة 
وكلام ف الميادين و فعل مفيش





نثور مرة بقى 
من نفِْسنا على الموروثات
و نجرب الحريم ومريستهم 
يمكن نلاقى تغيير حقيقى
وعلى رأى خالتى نوسة 
خدنا ايه م الرجالة غير حلاقة الدقن ؟






عاوزين ريسة عشان قضية المرأة
عشان قاسم امين يا كبدى 
اللى ياما حسه اتنبح 
و صلاح جاهين اللى قال البنات البنات
حد يقولى يا كابتشن لطيف ..
ما عندك بثينة كامل مرشحة نفسها
ست دى ولا مش ست؟
أقوله طبعا .. 
بس الست بثينة عصفورياة 
و يا نضرى متتحملش معترك الرياسة 
وتيجى ايه الغلبانة دى ف هياتم
 ندخرها ونخليها للجولة الجاية 
احنا دلوقتى ندخل بالمرشحة الاتقل وزنا 
و المثل بيقول .. اللى تكسب به العب به
 صح و لا أنا غلطانة ؟!!!








دا ناهيك عن إن مرشحتنا إسكندرانية
 و بنت بلد أصيلة 
لو حد داسلها على طرف
 مش هتنقمص زى البرادعى و تقول أى 
و باى باى و مش لاعبة وكدا 
لااااااااااا 
دى متغذية يا بابا و متأسسة
فبالتالى ولا ألف مجلس عسكرى يهتها 
ولا حدش مثلاً هيعرف 
يثبتها ع الدائرى
ويضربها على نافوخها
وياخد العربية زى ما عملوا ف أبو الفتوح 






بالنسبة بقى لمرجعيتها 
فهى تقف ف المنتصف تماما 
لا ع اليسار خالص و لا اليمين خالص
حتى شوفوها و هى بترقص 
هتلاقوا خطوتها ميزاااان تقيسوها بالمسطرة
لا تميل كدا ولا كدا الا بحساب وحرفنة
وفن مش عك و مراهقة سياسية 
زى اللى بنشوفها الأيام دى





وبنظرة سريعة 
و متفحصة لأعمالها
هتلاقوا ان الست دى 
ومن زمااااان كان ليها رؤية 
و بتختار شغلها حتى ركزوا ف اسامى 
الأفلام والمسرحيات
هتلاقوا كلها رموز ودلالات وإسقاطات 




 

المتسول 
تقصد المواطن المصرى فى البلاد العربية
الصبر فى الملاحات 
الملاحات تقريبا وسعت و بقت (مصر) كلها 
عفوا يا هانم 
هوه فيه هانم غيرها  ... ؟؟؟
عفوا أيها القانون 
 رسالة لقضائنا الشامخ بعد سفر المتهمين الامريكان
وقيدت ضد مجهول 
كل قضايا قتل المتظاهرين امام الإقسام
قفص الحريم 
وفيه عاوزين يحبسوا سميرة ابراهيم و ست البنات وغيرهن
الوحش داخل إنسان
حمدى بدين 
هات وخد 
الأخوان المسلمين 
فتوات السلخانة 
 أمن الدولة والداخلية
عصفور له أنياب 
 حزب النور  
سلم لى على سوسو 
مجلس الشعب
العسكرى الأخضر 
الشرطة العسكرية
على بيه مظهر وال 40 حرامى 
نزلاء طرة و من فى حكمهم
غريب فى بيتى 
المجلس العسكرى
القفل 
.......... حطوا بقى الاسم اللى يعجبكوا
 :)






قاعدة هياتم العريضة هتعزز تواجدها أكيد 
فى المشهد السياسى 
حزب النور مش هيسدوا معاها
ولو بكار بس فتح بقه
 أقل حاجة عندها تقعد عليه تفطسه
و الاخوان و الحرية والعدالة
 بتوع اللى يتجوز امى
 اقوله يا بابا مش بس يا عمى 
لما يلاقوها مكتسحة
 والشعب حاببها هيضطروا يتحالفوا معاها
من باب الموائمة



اما التيار الليبرالى 
 فهتتنوع ردود أفعاله .. ما بين
الوفد والناصرى اللى هيحسبوا الحسبة الأول
 وبعدين ف آخر الليلة هيعلنوا انهم معاها
أما اليسار بأطيافه المتعددة 
فأصلا أصلا هيعيطوا م الفرحة 
وهياخدوها بالحضن عشان أخيرا هيلاقوا 
حد يعرفوا يكلموه من غير ضرب 





و اما عن ... الفلول فهيسكتوا ف الغالب 
عشان هياتم هتفكرهم بالذى مضى
و اما الدول العربية فهتعضد من ترشيحها 
نظرا لشعبيتها الجارفة ف الخليج 
  منذ أيام الفيديو و ذكرياتهم ف شارع الهرم



اما المجلس العسكرى  بقى ى ى
فيعملها ألف حساب 
مهو مش معقول الجنرالات هيقبلوا
 بإنهم يتنفضوا زى السجادة
و كل شوية ياخدولهم واحدة أحييييه 
اسكندرانى معتبرة
و كرامتهم تبتعتر على آخر الزمن






يتبقى المجتمع الدولى 
ودا أظنه لن يستطيع 
أن يقف أمام  إرادة الشعب و اختياره 
و بالعكس 
وجود مرشحتنا ف سدة الحكم
 هيوازن الكفة مع التيار المتأسلم 
المسيطر شكلاً ع الجانب التشريعى 
و العسكر من بدرى ف حضنهم 
و بياخدوا منهم المصروف 
فكله تمام 
و البلد اصلاً أساساً يعنى كلها ف جيبهم 
فمجراش حاجة لما هيا تكسب 
واهو يستخدموها كفزاعة لأى حد تانى 
ف المنطقة هيخرج عن طوعهم
ويقولوه هااااااااه 
هتسمع الكلام وتلم التعابين
 و لا نسّيب عليك شعبك يمشيك
 ونجيب بدالك هياتم ؟؟؟!!!


 



 وأخيرااااااااااااااا
 وبناء على كل ما سبق
اقر أنا فاتيما بنت ام فاتيما
 بإنى كمواطنة مصرية مخلصة لمصر والثورة 
إن الفنانة هياتم 
هيا خير من يمثلنا
 فى هذه المرحلة العصيبة من تاريخ البلاد 


إذ إنها هتفّوقنا وتروقنّا 
بعد أن عمت سحابات الغم
هيا اللى هتغور العساكير ع الثوكنات
و هيا اللى توقف كل حى عند حده 
وهى اللى هتمشى عجلة الإنتاج 
والبلد كلها واياك نسمع نفس




و يعنى
لو يعنى يعنى
فرضنا يعنى
إنها ف النهاية يعنى 
خابت  يعنى
و معرفتش تنفذ المطلوب منها 
فمش هتفرق كتير
عن أى واحد من المرشحين الموجودين
حالياً قيد أنملة



و أهو نبقى نفوتلها المدة الرئاسية بتاعتها 
ونستحملها 
زى ما استحملنا اللى قبليها 
واللى قبليه واللى قبليه



 

و اشمعنى 
فوتنا للعسكر ميت ألف فارغة
و هنيجى ع المسكينة دى و نفترى ؟؟
ولا هوه الثورة قامت الحق 
ولاّ عشان الظلم يفضل 
ونمشيها برضو زى زمان خيار و فاقوس ؟؟؟






و صحيح 
انا مقاطعة الأنتخابات الرئاسية
زى ما قاطعت السخامة اللى قبلها البرلمانية
بس برضك ضميرى بيمنعنى
 أتخلى عن هياتم
 و لازم أصوتلها 
و ...
 هصوتلها أن شاء الله 


 
 بس ف البلكونة





فأتكلوا على الله إنتوا و محدش يستنانى
إدوها أصواتكم ...و اؤكد لكم 
انكم مش هتندموا 
و اهى البلد هتصحصح
 يلا عاوزين نغرق ف الدلع 
و نشوف حالنا
 و اللى ورانا 
ولا تقولولى الثورة مستمرة و لا فطست
و كتابة الدستور و المدستورشى 
وتقعدوا بقى ميعجبكوش العجب و تقرفونا
إنتخبوا هياتم 
وسيبوها تشوف شغلها 
و كفاية كدااااااااااااا خربتوا البلد 

و ......الله الموفق




-------------------------------------
----------------------------------------------

الله جرى ايه يا عبدالحميد بيه 
ما احنا الأتنين زى بعض 
احنا الاتنين بنرقص 
بس انا الناس عشان تشوفنى
 بتدفع فلوس 
وانتا الناس لما بتشوفك 
بتقفل التلفزيون 
سونيا سليم - الراقصة والسياسى 

-----------------------------------
لا تنسوا 
التبرع بالدم عند 
البت الخيخة .. هنا 
------------------------------------------


This entry was posted on الثلاثاء, مارس 13, 2012 and is filed under . You can leave a response and follow any responses to this entry through the .

23 كــــلام بيطــبطـــب عـــلى قــــلبى و روحــــى

تصدقى كلام منطقى :))

بس بالنسبة للبرنامج الانتخابى ؟؟

البرنامج كامل مش بتاع السهرة بس :)

ودي بقى حتخطب ولا ترقصلنا في عيد العمال....وبعدين هو عمو عمر سليمان ح يسيبها تنجح ...ياستي الحكاية باينة من يوم لقاء سليمان والاخوان هو ح يبقى ريس وهما يبقو حكومة .....وكل المرشحيين دووول منظرة ..نظام مرق تفرق... قبل قفل الترشيح بيوم حيطلع عمورة الامورة ويقش .....ياريت وربنا ترشح نفسها وحياة ربنا ح انتخبها فورا...ده كفاية نظيمتها تفتح النفس

انتي نسيتي اهم فيلم
فيلم (القط أصله أسد)
اه فعلا القط اللي دلوقت هو الشعب كان اصله اسد في خمسة و عشرين يناير
الاسد اللي كان بيثور في التحرير دلوقت بقى قط اهم حاجة بالنسباله الانبوبة

طبعا من حق هياتم ترشح نفسها على الاقل هي شغلتها رقاصة و بترقص يعني بتمارس مهنتها بكل (شفافية) لكن غيرها مش رقاصة بس بترقص
نعم للشفافية نعم للدلع نعم للمهلبية و سمعني يا مهلبية يا

تحياتي

طب بزمتك هياتم ولا الراجل ده
http://www.youtube.com/watch?v=2EcdgONNWLw&feature=related
ده احنا داخلين على ايام زى الفل

السلام عليكم
اشكرك على ابتسامة الصباح
انا عندى رأى تانى
ما ترشحى نفسك يا فاتيما وصدقينى هتلاقى كتير ينتخبوك
يالا توكلنا على الله
صباحك مشرق كقلبك الصافى
سلامى ليوسف

فاتيما
روح القلب الملائكية

هههههههههههههههههههه
تصدقى اقتنعت مع انى اول ما اعلن ترشيحها اتضايق و قلت هو مكتوب علينا الحرس القديم مالها روبى مثلا حاجة شباب كده و هتنشر ثقافة العجل بين الشباب
بس انتى متفائلة قوى قوى قوى يا فاتيما
انت قدامك ناس مش سهلة خالص اول الحملة ما بدات
الاخوان دفعوا بغادة تاتو عبد الرازق
و السلفيين بالست لوسى
انت فاكرة العملية سايبة
اما المجلس العسكرى فمازال يختار مرشحا بين مجموعة كبيرة من الراقصات
و هم شفيق و العو و منصور و موسى
سلام يا ام جو و رقصنى يا جدع

ازيك يا طمطومة

انا مقريتش البوست كله
لكن مجرد ماعرفت انه عن هياتم وعن حملتها الانتخابية قعدت اضحك


انا عن نفسي هانتخب واحدة ست
بس الست اللى عايزة انتخبها مرشحتش نفسها للانتخابات


ومش هاقدر اقول هى مين
علشان انا لو اعلنت عن هويتها
اعتقد ان هيقام عليا الحد


نيهاهاهاهاهاهاهاهاهاع



المهم يا طمطومة
انا جاية اشكرك على انك اعلنتى عن التبرع بالدم


ودى حاجة مش جديدة عليكى
دايما مشاركة معانا
ودايما ايجابية

شكرا يا طمطومة
واشوفك على الف خير يارب

سلام يا حبيبتى

اختك خيخة

كلام مقنع بشكل اقتنعت بصراحه بس هى الرقصه الانتخابيه هتكون امتى عشان الواحد يلحق يروح الكباريه السياسى يتفرج وهل بدله الرقص هتكون فيما لايخالف شرع الله بردوا حتى لاتثير غضب نواب مجلس الهلس

هههههههههههههههههههههههههههههههههههههههههههههههههههههههههههههههههههههه
ايوا بقا انا عاوزة اتدلع يا ناس
و تلاقي بقا التشريفة بتاعتها بمزيكة حسب الله و الحصان و مراجيح المولد بدل عساكر التشريفة بتاعت زمان بتعات المنحوس المخلوع
و تعمل كوبونات للملاهي اليلية بدل كوبونات الانبوبة و ياسلام كمان بقا اما تطلعلنا في بيان و ترقعلنا زغرودة بدل (ايها الاخوة الموطنوووووون)
ايوا بقا انا عاوزة اتدلع يا حزمبل انا عاوزة اتدلع
ههههههههههههههههههههه
والله انتي زي السكر
تحياتي :)

http://www.yazgulu.com/Guller/123.php
صباح الورد

Candy
-----

ازيك يا حتة الحلويات بتاعتنا ؟!
:)

وآه مش كدا والنبى
دا بس غيض من فيض
والواحد لو إسترسل ف الكلامهيقول اسباب منطقية اكثر بس الرقابة هنا لا تسمح
انما ملخصها كدا
ان الرجالة هينبسطوا ببيها
والستات مش هتقلق منها
والبلد كلها هتنبسط يا زينب ...

صباح الفل

Tarkieb
--------

لأ خطب ايه يا تركيب
احنا زهقنا كلام و رغى
مبقالنا ميت سنة بنسمع ف خطب
خدنا ايه يعنى ؟!!!!


مطنش عمر سليمان يمسكها ابدا
انما عمرو موسى .. شكله اللى هيقش

اما نشوف
ف كل الاحوال
لازم العسكر يرضى
وامريكا من قبله تحدد
والجيش ينفذ
والبرلمان يبصم
والداخلية تقمع
والإعلام يطرمخ ويغلوش
وكل ثورة واحنا طيبين بقى

وآخر حاجة ...
ايه نظيمتها اللى تفتح النفس دى بقى عشان موش فاهمة ؟؟؟

مصطفى سيف الدين
---------------


ازيك يا مصطفى ى ى

لعلمك انا بعز الفيلم دا جدا
ع المستوى السخصى
مكتوب حلو
و بيفكرنى بناس كتير اعرفها
رجالة وستات ...
عندها الشيزوفرنيا دى ف الحياة
ومبيجوش الا بالعين الحمرا ...
وساعتها يظهروا على حقيقتهم
واللى تحسبه موسى يطلع فرعون
والعكس

:)


عموما
الشفافية دى تقريباااااااا
الصفة المتفردة ف هياتم
دونا عن باقى المشرشحين ...
الست واضحة وجلية ومبتقولش حاجة
هيا مش قدها ...
و على عينك يا تاجر

نورتنا يا ابو الصفاصيف

عاشقة الرومانسية
----------------


صباح الورد يا قطتى

من ناحية الأيام اللى زى الفل
فدا متوقع ويلا خلى الشعب يهيص

وبالنوسبة للمساخر الحاصلة
فدى مش غلطة المرشحين
ولا غلطة الحرية ولا السياسة
دى غلطة اللى قاعد يرتب ف المشهد من بدرى عشان يبقى بالمنظر الهزلى الوقيع دا ومحطش قواعد م الاول تنظم الحكاية
والعيب برضو
ع اللى قابل يبقى جزء من المسخرة
ويمشى بحسابات العسكر
ويرقص على انغامهم هما ...
مش يفرض شروطه وقواعده ...

ميرسى ع الورد
يا روايح الورد البلدى الأحمر
اللى يجنن
:)

مدونة رحلة حياة
---------------

صباح الفل والأبتهاج ع الصبح والضهر والمساء والسهرة يا محمد ...

ومبسوكة انك ابتسمت كدا
:)

بس تعالى هنا عشان هتنضرب

قصدك ايه بإنى أرشح نفسى ؟!!!
لهو هياتم بعد اللى قولته دا ولسه مقتنعتش بيها ؟!!!!

هزعل كدا


وبعدين ارشح نفسى ازاى ؟!!!!
انا صحتى على قدى
ومعنديش مواهب هياتم بالمرة
فى أى حاجة
لا ف الرقص
ولا ف الصحة والمتانة
ولا ف الخبرة الحياتية والمرمطة
ولا ف مجابهة البلطجية والداخلية
ولا القدرة على شرشحة المجالس جميعها
(عسكر - شعب - استشارى - ورزاء)

ورحم الله امرىء بقى ...
ولا إيه ؟

ك9

سلامى لمعاذ الغالى ومامته

ابراهيم رزق
-----------

ازيك يا ابو سولى
:)

لأ روبى ايه المعصعصة دى
لو نفخوا فيها تطير
احنا عازين حد راكز كدا وخبرة
حد ميتهتش ولا يتخضش ولا يفرق معاه دبورة ولا بيريه احمر ...

الدهن ف العتاقى برضك
وبعدين التاريخ النضالى يفرق
تيجى ايه روبى ف السيرة الذاتية لهياتم
فرق السما م العما يا راجل ..!!

وبعدين غادة عبرازق كبة ودمها يلطش
وكلها سليكون
ولوسى مبتعرفش ترقص اصلا وبرضو كلها سليكون وزى ما تكون مضروبة بوكس ووشها متورم ...
هياتم طبيعى و بسيطة و بنت بلد و دمها خفيف وبتعرف ترقص بجد ...


اما عن راقصات المجلس بقى
فلا واحد فيهم ينفع
دول بتوع باليه يا بنى
و يتفرجوا بس ..ميرقصوش
:)

صباح الورد
وأشوفك بكرة على ألف خير

بت خيخة وأى كلام
--------------

هههههههههه
طب ما تقولى يا بت
واياك حد يستجرى يقربلك
وانا على قيد الحياة .. عنهرج ؟!!!

طب ابقى قوليلى بكرة بينى وبينك ماشى ؟


وعيب لما تقولى شكرا
ايه الجو الرسمى دا ؟!!
هوه اصلا ينفع تعملى اليوم دا
من غير ما ألقح انا جتتى غتاتة
دنا بستناه يا خوختى
عشان اسباب كتيييييير
كفاية بتخلينا نعمل خير
وكفاية بتلمينا على بعض
وكفاية الاحساس العام بالفخر
وقريت التعليق دا وغالبا كان لشمس النهار عند ابراهيم رزق ...
ان التبرع بالدم والبؤجة بقوا من أهم الأيام عند المدونين
والبركة فيكى وف خالد وداليا ..
فأنا اللى المفروض وغيرى نشكرك يا خوختى


هقول زيك بقى

يلا سلااااام
اختك فاتيما
:)))

الموجى
-----

ازيك يا عمرو

طب بذمتك يا شيخ
اللى بيحصل ف جلسات مجلس الشعب دا
رقص ولا مش رقص ؟؟؟؟!!!


:)
انتا جاى بكرة طبعننننن
صح ؟

يبقى اشوفك على ألف خير ان شاء الله

افكار مبعثرة
------------


الله
شوفتى يا فوكيرة بقى
اهو الست من قبل ما تمسك البلد واحنا عمالين تتفتق أذهاننا بمقترحات فللى اهو
وكلها انشبراح
تخيلى بقى لما تتمريس علينا بجد
ويالروقاااااااااان اللى هنشوفه

ولو انا زى السكر
فنتى زى الفوندام دا

http://www.instructables.com/files/deriv/F3S/4JBD/FL612JVG/F3S4JBDFL612JVG.MEDIUM.jpg

:)

وما خفى كان اعظم
===
سنحتاج عفريت لكل مواطن اقصد رئيس لكل مواطن

طالما القاعده عريضه يبئا خلاص

مش هنتخبها برضو

عقلي بيقول لي خليني صح مهما كان علشان اما ربنا يسألني يكون عندي رد مبرر وامل ان يكون صحيح

http://www.youtube.com/watch?v=FUPqma73c5A&feature=endscreen&NR=1

كل سنه وانتى اطيب ام عرفتها فى عمرى كله
بحبك ياام يوسف

إرسال تعليق