.

.

جـمـعــة عــنـد أمـــك  

Posted by: فاتيما in



كلمتين محشورين ف زورى 
فسريعا كدا 
و عشان منرغيش كتييييير 
الاخوة الافاضل اللى عاوزينا 
ننزل يوم الجيمعة الجاية دهين
 عشان البلد متخضعش لحكم العسكر 
و سيشطرته ع الحكم 
وكدهون 
أفتتح القول بإنى أقولكم بكل أدب وذوق 




نعم
نعمممممممممممم 
يا عمرررررررررررررررر




و دا بمناسبة ايه مثلاااااااا
بمناسبة إن دا مثلااااا 
مكنش واضح مثلااااا بقاله شهور
و توا ما صحيوا م النوم

و غسلوا وشهم و سنانهم 
و شربوا القهوة و فّوقوا 
و توا يا عينى ما ركزوا و خدوا بالهم 
و توا ما إفتكروا انهم لوحدهم كفصيل سياسى
مهما كانت قوته ..
ميقدرش يمشى المشوار لوحده
و توا ما اكتشفوا ان التنازلات المطلوبة 
داخلة كدا ف منطقة مش اللى هيا
وتوا ما اكتشفوا إن العسكر كوخة 
ووحشين وشريرين و متلاعبين
 و عاوزين يبلعوا البلد .. ف كرشهم 
ويدسوا ع الخلق ببيادتهم
و توا ما حاجات كتييييير كدا .. إلخ إلخ 
أحب أقوووول  
تانى
 بعد ايه يا عمررررررر ؟؟؟






بعد ما غميتوا نفسنا سنة بحااااااالها 
سنة عدت بحاااااااالها 
على جبنكم 
و تخاذلكم 
و تطنيشكم المتتالى
على المهازل الحاصلة ولاّ كأن البلد دى بلدنا 
والشهدا يبقوا إخواتنا زى ما بيقول الهتاف ؟!!!




و الواحد عاوز يفتكر للاخوان أى منظر 
السنة اللى فاتت دى مش قادر الصراحة
أفتكرلك ايه يا بصلة 
وانتى كل قطمة بدمعة  ؟!!! 





شهر العسل خلص 
و صباحيتكم بمبى
صباحيتكم بمبى مسخسخ 
عشان مليش نفس أضحك أنا وأسخسخ





صباحيتكم حمرا 
بلون الدم الطاهر اللى سال أنهاااار
برصاص الداخلية و الشرطة العسكرية
والبراءات اللى نازلة تّرف وانتوا ساكتين 
على رؤوسكم الطير  ؟







صباحيتكم سودة 
بلون عباية ست البنات 
اللى اتبهدلت واتهانت وإتعرت 
وانتا واقفين تتفرجوا ع اللى تحت العباية 




صباحيتكم ملهاش أى لون محدد
و زى وشكم العكر 
اللى بيتلون كل حبة حسب الطلب 
و حسب أوامر سيدكم و تاج راسكم 
و إيه بقى اللى إتغير عشان نبقى معاكم
واحنا اللى عشناه بسببكم 
زوّد جبال الهم .. هم 
و شهور وايام و احنا بنقول 
اللى ياكل ناسه ملوش تمن عند الشارى
و بكرة تدور عليكم الدوائر 
ولا فيش فايدة و لو كنا بندن ف مالطة
كانوا سمعونا و وعوا .... 






فخلاص براحة و متحزقوش قوى كدا 
ليطق لكم عرق  
و معلش اعذرونا اننا هنستندل معاكوا 
عشان الحواديت دى مش هتخيل علينا 
ويا ريت تجروا تلعبوا بعيد 
تحت بلكونة تانية 
عشان بابا نايم و لو سمع صوتكوا 
هيقوم يطين عيشتكوا 
ومتنقمصوش  وتقولوا بنشمت فيكوا
انتوا علطول بتلعبوا لوحديكم 
اشمعنى المرة دى عاوزين شركا ؟!!




 


ولو سمحتوا يعنى
متجروناش ف المعارك الوهمية دى
الا احنا استوينا قتل واعتقالات واعتصامات 
و اضرابات و ضرب و مظاهرات ومسيرات 
و بهدلة و وقفة ف الشمس 
والله و من الصبح لحد المسا 
لحد ما نشفنا و لا سمعنا منكو كلمة كويسة
وانتوا اللى كنتوا بتروحوا م المغرب
عشان تلحقوا جلة الإنتاج 
و الإستقرار من اوله  







و حقيقة الأمر إن 
حرب بيانات الفروالة التى فيما بينكما
 بتفكرنى بقصة المعونة الإمريكية كدا 
 نفس النخع والتصريحات اللى على ودنه
و .... ف النهاية امريكا والعسكر 
باتوا ف حضن بعضيشهم
و المعونة جت دولار دولار 
والمتهمين الأمريكان سافروا و ع الخد بوسة 
و طلع كله هتش ف هتش
وكلام إبن عم حديت 



فالنظام النوبة إيه ؟!!!
أقولكم أنا ؟
و لا حاجة سعادتك
طبق الأصل العلقة الاولانية 
لا قلم زايد ولا قلم ناقص
فخلاص عاوزينا نتلطّش ليه عاشر
و طالبين نصدقكوا إيه ... احنا زهقنا 
إنتوا مبتزهقوش  ؟؟؟
جددوا هذا الخطاب الأونطجى 
الواضح الفاضح 
 لقد هرمنا 
سايروا العصر 
و غيروا دا التغيير كويس 
فاقسين و عارفين انها حركات قرعة 
و كما يتردد على لسان اللى هارشينكم
إنها ساعة شيطان بين اتنين حبايب
و الاخوان والعسكر ملهمش ف الآخر 
الا بعضيشهم
و يا داخل ما بين البصلة و قشرتها 
 ف النهاية هيتلم تنتون على تنتن 
و أول ما العسكر هيشاورا للأخوان 
هيجروا عليهم زى منى و احمااااااااااد
و على رأى أحد ظرفاء تويتر 
هتروح فين يا قرد و انتا اللى يجيبك موزة ؟؟









فالمرة دى سورى منعطلكوش 
و أى حاجة زيها و بعدها ... برضو سورى 
مليش فيه على رأى شفيق يا رااااجل
 لا الحاصل هيرجع شعبية الإخوان 
و لا هيخلى الصف السياسى بفصايله 
يرجع تانى ويبقى ايد واحدة
إتفضحتوا خلاااااااص 
قصاد الكل بما فيهم الشعب 
والناس الى إنتخبتكو و سودتوا وشهم 
وخليتهم يندموا ندم السنييييييييين 
اكتشفوا ان آخركم الخلع و التظاهر
و سايبين الأهم والمهم 
وماسكين فمناقشة القشور ف كل موضوع 
و يا ريت حتى فالحين ف كدا 
دا حتى الجنزوى اللى مسك على حسكم
و متشال على كتافكم مش مستعبركوا
وحاجة تعّر
 الصراحة  .... انا مكسوفالكم 







خلاص بعد إذنكوا بقى 
هنرش مية قصاد المحل فينيتوا كدا
و زهقنا م الافلام الهندى ...
و يا ريت تنوكسوا ف صمت
و المرات الجاية لما تمسكوا ف خناق بعض  
متتصلوش بينا نيجى نحجز 
و متنسوش تقفلوا شبابيك المطبخ والحمام 
 عشان الجيران بتتصنت عليكوا م المنور
وشيكلكوا بيبقى ويحيش قوى 
و اللى بيقول لازم نتلم 
ومنقفش مع العسكر ضد الإخوان 
هقوله ....  مكنش يتعزززززز
و معلش حضرتك 
عد بالزمن لوقت قريب سنة واحدة بس 
و إفتكر  وبص كويس 
مين اللى دايما مع مين ... ضد مين 
ومين اللى لما ساندته ... باعك لمين 
و مين اللى هيبيعك تانى وعاشر 
هتلاقى الإجابة واحدة دايما 
بسم الله الرحمن الرحيم 
الاجابة 
1- تونس 
2- الجدع جدع و الجبان جبااااااان
والاخوان يا جدع برا الميدااااان 









و اللى هيقولى 
إنزلوا المرة دى بس 
طيب عشان نتوحد و دى مسألة مبدأ 
هقولوا معلش لامؤاخذة
ما بقالنا سنة بنهاتى كان فين المبدأ
لما كنا نقولهم أنزلوا معانا 
و ساندونا
و لا حياة لمن تنادى 
و لا حياء لمن يعقد الصفقات مع القتلة 
عشان مصالحه 








هوه المبدأ دا علينا إحنا بس ؟!!!
ولا هوه نفر لازم يدفع علطول 
و نفر تانى هوه اللى بيقبض علطول 
طيب ... دفع بدفع بقى 
إدفع بمزاجى و للى يستاهل 
أدفع للى نازل شايل كفنه 
و عاوز الثورة تنجح 
مش نازل عشان مخططاته هوه اللى تنجح ... !!!

 

و خلاص كدا  ...
يغوروا الأتنين عسكر و اخوان 
لا دول ولا دول و كله متعّلم عليه 
وكيف أعاودك و أثق فيك وأطمنلك
 و هذا أثر فأسك ؟؟؟
إحنا إتهرينااااااااااااااا مُحن سياسى
و تدليس و غش و كلهم خونة و بايعين البلد 
ف محدش يبتزنا بقى جتكوا القرف كلكوا  







و على جنب 
الاخوة "المحسوبين" ع التيار السلفى 
والفرحانين ف الاخوان 
 وكأنهم درة زمانهم ف الذكاء 
و النموذج المثالى ف الكياسة السياسية 
مليش مزاج أروقهم البوست دا 
بس ليهم معايا مجال آخر و على رواقة
 بس احنا نشمت الاول ف الإخوان 
وبعديييين ... نبقى نتشفى على مهلنا 
ف بتوع ادب نجيب محفوظ دا دعارة 
 و الست تنتخبنا آه .. 
لكن تبقى بنى آدم زينا و له حقوق لأ 
لكم معايا جولة آخرى ان شاء الله









و لبتوع انزلوا معانا أقوووووول 
لأ معلش 
عند امكو الجمعة دى 
 و متعملوش حسابنا احنا مش جايين
وانا سخصيا مش جاية 
عشان نازلة مع ماما نزور 
جنينة الحلوانات .. أبرك
و المناظر هناك أحلى و اصدق كتير
ع الأقل ... الديب ديب 
والتعلب تعلب والضبع ضبع والكلب كلب
و القرد قرد ... 
و إبقوا فكرونى قبل ما أروح 
أشترى انيييين كيلو موز للغلابة اللى هناك 









 و سواء كانت تمثيلية
 و لاّ قرصة ودن 
ولا ساعة شيطان و لا أى منظر 
 ولا تفرق معايا انا منسوووطة
إنهم بينفضحوا شوية بشوية 
الجوز 
عسكر واخوانجية





و اللهم 
إنى مبتهجة 
و مغمورة تشفى 
وكلى انشكاااااح و شمااااااتة 
فيمن باعونا و بياخدوا بالقفا جملة و قطاعى
و ... جمعة سعيدة عليكوا يا إخوانى 
وربنا معاكوا 
و يوفقكووووا 
ويسدد خطااااااااااكم 
والله الموفق 
نيهاااااه نيهاااع هع هع 
 ههههه هااااا ههههى
هى ههههى هىء هىء هىء 





---------------------------------
---------------------------------------
-------------------------------------------

This entry was posted on الأربعاء, مارس 28, 2012 and is filed under . You can leave a response and follow any responses to this entry through the .

29 كــــلام بيطــبطـــب عـــلى قــــلبى و روحــــى

شوفي يا ستي

شايفه؟

بس خلاص


ايه ماهو أصل عيب أقول اللي عاوز أقوله

يسلم فمك
بس خلااااااص :)

إزاي متخانقين مع العسكري وشاهين يصوت للكتاتني؟ كله ضحك ع الدقون....هما مربيين دقنهم من شوية

نو كومنت .... من كتر اعجابي

ههههههههههههههه مش عارفه ليه متخيلاكى فى اخر البوست وانتى بتضحكى بطريقه افلام الكرتون :)
سورى على التشبيه بس ده اللى حسيته من طريقه الضحكات
البوست ككل مكيفنى
بس انهم ياخدوا بالقفا جمله وقطاعى دى مكيفانى اكتر بكتييييييير :)
الحمد لله انى مكنش ليا يد فى الجريمه بتاعه انتخاب الاخوان دى والا كنت زعلت من نفسى قوووووى واتأثرت وانا بصراحه مش ناقصه انا قصيره خلقه

طيب و بعدين؟
لحد امتى هنفضل في التخبط ده منعرفش فين الصح و فين الغلط و مين اللي مع مين ؟

ههههههههههههههه

بجد الصور تفطس من الضحك

لأول مره ما ازعلشى منها
انتى بتجيبى الصور دى منين ؟!!!

ههههههههههههههههههههههههه

فاتيما
روح القلب الملائكية

ههههههههههههههههه
تصدقى انا قررت اعمل زيك عمال اغوص فى ترعة النغم و واقف فى البلكونة اتفرج تصدقى الفرجة حلوة و ممتعة انا مكنتش عارف انهم كانوا بيستمتعوا علينا و هما بيتفرجوا
فاكرة لما قلتلك عيب الاخوان مش بيقروا تاريخ و بالذات تاريخهم
طول عمرهم يعملوا صفقات مع الحاكم و ياخدوا على قفاهم
من ايام حسن البنا و حتى باذن الله البديع بديع
بس متفرحيش قوى هيجى اللى هيطلعلك و يقولك
http://youtu.be/YdMDzNomAFU

بس عادى لانه مؤقت
سلام بقى يا ام جو ارجع اقف فى البلكونة عشان اتفرج
و ادخل اقول لام زياد احنا مالنا ناس قلاة الادب بيشتموا فى بعض
دع الخلق للخالق احنا منجبش فى سيرة الناس
سلام يا ام جو
هههههههههههههههههههههههههههه

بصى يافاتيما
باختصار :
حبيبى الإخوانجى المُلعب وعزيزى السلفى الأمور صاحب أجمل منخور :

ثــُــور إنت .. ياروح طنط
منجلكش فى حاجة حلوة ولا وحشة ولاعايزين نشوف وشك اصلا
وحياة محمدمحمود ومجلس الوزرا وماسبيرو
دول عالم تيت ولاد تربات تات تيت

وعلى رأى واحد صاحبى احنا نسيبهم يدبو فى بعض لحد مايخلصوا على بعض همه التينين
وبعدين المتظاهرين الحقيقين يركبو الثورة
وآهى تبقى بضاعتنا ردت إلينا

فاتيما
لو كانوا قدموا السبت بما لا يخالف شرع الله كانوا لقوا الحد بما لايخالف شرع الله

ياعني ... بعيدا عن الاجواء السياسية المتقلّبة .. وحالة ما بين .. مؤيد .. ومعارض ... ومتفائل ... ومتشائم ... اعتقد انك تبذلين مجهودا قويا جدا ... في هذه البوستات الدسمة ... وهذا امر يستحق التحية والاعجاب :))

اما بشأن المباريات الدائرة في وطننا بين مختلف التيارات ... فالحقيقة ... الامر لا يثير في نفسي الرغبة في التصفيق لجانب علي حساب جانب .... فحينما يتشاجر الابناء ... تطال الشماتة .. العائلة بأكملها .


تحياتي العطرة

غير البوست التحفة الأغنية مناسبة للموضوع بشكل رهيب
و أنا رأيي المتواضع الثوار يسيبوا الإخوان ينزلوا لوحدهم الأول و لو كانت مظاهرة بجد و إعتصمت إعتصام بجد و ما روحتش الساعة 6 ممكن بعدها بكذا يوم الثوار يضموا عليهم بعد ما يتأكدوا من جدية اللي بيحصل و إنه مش تمثيلية

طيب علشان نكون فير بقي وندي لكل واحد حقه
ممكن اعرف بقي الثوار عملوا ايه طول السنة اللي فاتت
عملوا ايه غير انهم دخلوا في مغامرات غير محسوبة وزودوا عدد الشهدا

بلاش بقي كلام عواطف ومشاعر

خلينا نتكلم علي ارض الواقع ما يهم المواطن
او حاجه نكون قدمنها علي للبلد

وبصراحة انا مش متخيل ان الاخوان بعد انتهاء شهر العسل المزعوم عملتها علي نفسها ونزلت تستنجد بالثوار والثوار بيتمنعوا

صدقيني الموضوع مش عدد

العدد في اللمون

الفكرة فكرة مصير ومصلحة بلد بلاش يضيع علشان تصفيات اي حاجه

نفترض الاخوان غلطت
او مشيت بمبدأ خليك ورا الكداب لحد باب الدار
وعلشان الناس تبقي معانا لما تعرف انه كذاب

نفترض انها غلطت هل الصح اننا نعند بشكل صبياني ونسيب البلد

فاتيما
اول مره ادخل مدونتك شعرت بالسعاده لكننى وبعد ما قراء البوست شعرت باليأس مما يدور من حولنا و اتسال الى متى سنظل هكذا اما ان الاوان كى نرى اناس يخافون على هذه البلد ويخافون على من يعيشوا فيها اما ان الاوان ان نعيش فى امان ونرى دستورا يحمينا اما ان الاوان ان نرى مسئولين يقدرون المسئوليه ويخافون الله سبحانه وتعالى
سوف ننتظر وننتظر لعل ياتى هذا اليوم
تحياتى لقلمك الرائع وتحياتى لصاحبة القلم المبدعه
تحياتى ابوداود

مصرى جدا
--------

لأ يا هانى
أى كان اللى هتقوله مش هيبقى عيب ابدا جنب اللى بيعملوه فينا واللى بنشوفه منهم يا فندم

اقرى البوست الجديد
انتا متوجهالك نوداااااااء انسانى
واكبسونا بقى
هه

افكار مبعثرة
------------

وتسلميلى يا فوكيرتى
بس خلااااص أنا كمان
:)))

Tarkieb
-------

آه والنبى يا تراكيبو يا خويا
شفت الوكسة
الحاضرين من الجمعية التكويشية لوضع الدستور كانوا 75 واللى صوت لسخام الكتاتتنى كانوا 71 نفر ...
كاتتهم نيلة كلهممممممممم

:)

Hany Rizk
---------

شكرا لحضرتك
كلك ذوق
ونورت روح قلب ماما

:)

عاشقة الرومانسية
----------------

هذا ما حدث بالفعل يا قطشتى
انا شمتانة فيهم شماتة السنييييين
وبصراحة قعدت أضحك اكتر
لما الجمعة فاتت ولا نزلوش
غالبا ماماتهم خدوهم جنينة الحلوانات برضو ..
اللهى يدخلوها مرة فيشتبهوا ف مناظرهم و يتحجزوا هناك ما يعرفوا يطلعوا تاننى قااااادر يا كرييييم
يا رب

بوسات وحضونات وسفريات وكدا

:-*

مصطفى سيف الدين
----------------

ولا قبلين يا مصطفى
على رأى الله يجحمه مطرح ما هو قاعد

خليهم يتسلوا

وخلينا احنا قاعدين
جنب الحيطة بجد
لحد ما نسمع الزيطة اللى بجد
بس دلوقتى مش معادها .. هانت


اشوفك على خير ان شاء الله

ويكا
-----

ما شاء الله
انتا بتيجى ع السيرة يا باشمهندس

مبسوطة ان الصور عجبتك
وان شاء الله فيه بوست قريباااا
هيبقى فيه صور عن الأخوة المتأسلفين
وبنقى فيها واحدة واحدة ...
وان شاء الله تعجبك برضو
:)

نورتنى

ابراهيم رزق
-----------


دا حقيقى يا أبو سالينازة
هم لا يتعلمون من الاخطاء
ودى وكستهم الأولى والأساسية
ومش قادرة لحد دلوقتى استوعبها
لأن عندهم كوادر مخها مش قليل
ويفترض بالصبغة الإسلامية يكونوا متفتحين
معرفش ليه بيفسروا الدين على انه تبعية وانغلاق ع الذات وعدم المرونة بالمنظر دا ...؟!!!

عموما
ادينا بنتفرج
الواحد الأيام دى
بيسمع اخبارهم ولا كأنه بيقزقز ف اتنين كيلو لب أبيض ... سوبر

تحياتى ليك
وبوسلى سولى وساليناز وزياد
و خالص ودى لأمهم الغالية

نور الدين
---------

الله يفتح عليك يا نور
انتا روقتهم أهو
لافض فوك

و يا ريت رشا ووائل
هيخلصوا على بعض قريب
عشان الجملة اللى بسمعها ف كل حتة دى
بتوجعنى قوى ومبعرفش أرد عليها ...

زمايلى ف الشغل والمدير والناس
بتعاتبنا وبتقول يعنى يا بتوع التحرير تعملوا ثورة عشان ف الآخر يحصدها الاخوان ...
ببقى عاوزة أطبق ف زمارة رقابيهم واقولهم
احنا اللى نزلنا انتخبناهم برضك ؟!!!


يلا .. ليهم روقة
وقربت ان شاء الله
وان شاء الله تحلق دقنك
احتفاءاً بهذوها المناسبة

:)

فافى
---

تعليقك حلو قوى يا فافى
ومركز

الله ينــــور

اندروميدا
---------

أشتم من رائحة تعليقك انك اخوانى الهوى يا معتز ...

طب بغض النظر عن ذلك
انا مبخدش صف حد طول الوقت وابقى معاه لو غلطان ...
والتيارات المدنية والليبرالية ليها حركات وشخصيات تعّر اخرهم ايمن نور اللى عاوز يتعلق ف ميدان التحرير بعد قبوله عفو المشير وهرولته للرياسة ولاكأن فيه دم متلطخ بيه قرار العفو دا ومن العار انه يترشح كريس بناء عليه ...
لو كان عنده كرامة
ولو كان للدم عنده قيمة
مكنش خد الموقف المهرول دا
بس عموما دا أيمن نور ..ومش جديدة
وزيه زى بتوع الحزب الناصرى والوفد و غيرهم ...

كله بيتعلّم عليه زيه زى الإخوان
ولا خير فيمن باع
ولأ مع احترامى ليك ولرأيك ...
تشاجر الابناء يطال كل نفر فيهم
والكويس يتحط ع الراس من فوق ...
دحنا بندور على ابرة ف كوم قش يا جدع
الاقى انا حد عدل وعليه الطلا
وانا اصقفله واقيم الافراح ف المدونة أوالليالى الملاح ...
بس هوه لسه مظهرش ومنتظرينه
وهيظهر ان شاء الله
مصر ولادة ولسه عفية ..

تحياتى ليك

مهندس مصرى
-----------

يا لهوتينى يا محمد
انتا بالذات بفرح زى العيال لما يعجبك بوست بكتبه ....

تعرف ؟

انتا اكتر واحد كتب بدقة ووصف البوست بتاعى
لما كتبت على تويتر انى كاتبه بمرارة ...
انا فعلا كتبته بهذا المنطق
مش قصدى أشمت قد ما قصدى أخرج من قلبى المرار على مجموعة كانت ممكن تكون قوى ضاربة وتوفر علينا الطرق الجانبية اللى مشينا فيها وطولت السكة علينا

بس معلش
ملحوقة

ومنحرمش منك
ولا من طلتك عليا يا غااااالى
ويا اجدع مهندس مصرى ف مصر والسعودية

Fahd
----


اولا اهلا بحضرتك

ثانيا
مين جاب سيرة اننا نسيب البلد ؟

احنا لما كنا بننزل كانت الأكثرية بتقول كفاية نزول وثورة بقى واقعدوا ساكتين عشان عجلة الإنتاج والبلد حالها ينصلح ...
غلبنا نقول إن دا غلط
محدش سمع
وفضلوا يقولوا نشتغل سياسة نشتغل سياسة ونعمل مؤسسات نعمل مؤسسات
طاه
ادينا سيبناهم يلعبوا سياسة
ويعملوا مؤسسات
ازى الحال ؟!!!

رجعوا تانى يقولوا نفس كلامنا لما استشعروا الخطر
قالوا ننزل و العسكر وحش
هاه
هما مكنوش واخدين بالهم م الأول حضرتك ؟!!!
ومش عيب لما ابقى انا اللى سنة اولى سياسة اهرش دا من اول شهر وهما يقعدوا سنة وشوية ؟!!!

طيب عرفوا الى فيها
هاه ..ناويين على إيه ؟!!!

ولا حاجة زى ما حضرتك شوفت
الجمعة عدت ولا كأن فيه أى حاجة

ورجعونا تانى لعنب ديبه
أدى الشاطر مرشح للرياسة
بموافقة العسكر وبمباركتهم طبعااااا
والحركة كلها مسرحية
عشان يدخلوا بيها ع اللى مش موافق على صلاحيات زيادة للأخوان ...

العند الصبيانى مش من عندنا يا فندم
الصبيان فعلا ...
هما التيارات المتأسلمة بأفعالهم
ولو حضرتك النهاردة مش شايف دا
يبقى مفيش فايدة م الكلام


و حضرتك نورتنا

الأحلام
-----

ليه بس كدا ؟!!!!

حضرتك نورتنا وانا مش علطول كدا
فيه تدوينات تانية من غير غم ونكد
و مش كله ضرب ضرب فيه شتيمة برضو
:)

اوعى اليأس يتسرب لقلب حضرتك
الدنيا دلوقتى بتنقلب عشان تنعدل
وبتتهد عشان تتبنى على أساس
وبتتكنس عشان تنضف
بس كل دا لازم يبقى بتمن
وبشوية صمود
احنا صامدين اهو
وبندفع تمن غالى ...
بس ان شاء الله ربنا ينصرنا
مصر بخير والله
دحنا ف نعمة لا تقدر

تحياتى ليك
وشكرا على ذوقك

إرسال تعليق