.

.

حـضـــن يـضــمــنــى  

Posted by: فاتيما in










هوه أنا صحيح 
مش فاكرة اول رسالة بعتهالك 
لا تاريخها ولاكنت كاتبة فيها ايه 
بس الأكيد انى فاكرة اول مرة 
انتا كتبتلى فيها 
و كمان محتفظة بالرسالة دى
لحد النهاردة على موبايلى





وفاكرة انك كنت فيها
 لمتنى لأنى فكرت أبعد عنك
و أهرب ... واحنا لسه بنبتدى الحكاية
 فاكرة كمان لما وصلتنى .. رسالتك 
 قلبى كان هيقف م الفرح
اتفاجئت بيها و بيك وبإصرارك عليا 
زى ما اتفاجئت بعد كدا 
بكل حاجة حصلت بينا جميلة كانت
 و لاّ مؤلمة 





عمرى ما فكرت ف شكلى
 و برستيجى و انا ببعتلك ف أى وقت 
مهمنيش كان الصبح و لاّ الفجر
 الضهر و لاّ الليل 
و لو انتا وسط الناس و لاّ لوحدك
رايق و لا مش طايقنى 
هترد و لاّ هتسبنى اكلم نفسى !!





قولتلك كتييير 
و ف ميت ألف رسالة .. كلمة بحبك

و وحشتنى و ناديتك يا حبيبى 
و كل مرة كنت بقولها 
كانت غير اللى قبلها 
و غير اللى جاية بعدها







معرفش ليه كنت بعمل كدا ؟!
بس جنانى معاك كان منتهى العقل 
و منتهى المتعة و البهجة
كنت حاسة انى عايشة معاك الدنيا بجد 
مش بتفرج عليها زى العادة






كنت فرحانة انى لقيت

 انسان اشاركه كل حاجة بحسها
كنت معاك على راحتى
 و حاسة ان مفيش غيرك
ممكن اكون معاه و كأنى مع نفسى
من غير ما انكسف و أتضايق و أخاف 






كنت لما الاقى ف نِفسى أى كلام
ببعته و مترددش 
و لو متعاد ومتكرر و قولته كتير 

ولو بشتكى منك ليك 
وأعاتبك وانتا ظالمنى 
مكنتش بحسب رد فعلك 
و لا استناك ترد
كنت بس مجرد عاوزة اقولك 
اللى متشالك ف قلبى ومش مهم بعدين 





كنت ببقى عاوزاك تشاركنى
 كل لحظة مميزة و لاّ حتى مش مهمة 
بتعدى عليا





كل رسالة بيننا .. ليها ذكرى عندى


دى بعتهالى قبل الثورة بيومين
واحنا بنبعد لأول مرة 


ودى بعتهالى ... يوم 25 يناير 
وانتا بتسألنى .. اللى بيحصل دا بجد ؟!؟



ودى اللى كتبتهالك من قلب الميدان
 ف أول يوم اروحه


ودى كتبتهالك مع أول هتاف ضد المشير

رّج السما ف التحرير
 و عيطتلك سلف م الفرحة






ودى يوم العباسية
 وانتا بتقولى خلى عينك ف وسط راسك 


و دى انكتبت
 ف احداث محمد محمود


و دى لما رجعت من جنازة الشيخ عماد
وقولتلى متزعليش





ودى  بعد مرة م المرات
 اللى افترقنا فيها
كنت بتقولى انى وحشتك ... قوى  


و دى بقى المرة الوحيدة 
اللى افتكرت فيها لوحدك .. تعيد عليا 
و كانت بالمناسبة مولد النبى :)






و دى اول مرة كتبتلى فيها بحبك 
ودى آخر مرة .. كتبتها





دى ف مرة م المرات
 اللى شوفتك فيها
و كنت بطلب منك تطمنى إنك روّحت



ودى لما حصل خسوف القمر 
دى ف آخر يوم ف رمضان اللى فات 


ودى لما رجعت م التحرير مخضوضة
  عشان كنت هنضرب 
وكنا متخاصمين قبلها 
و رديت انتا عليا بحنان ف لحظة ما بعتلك 
بـ ... مالك يا حبيبتى؟
 و لا كأننا زعلنا





ودى و انا بقولك 
للمرة الالف حقك عليا



ودى و انتا بترد للمرة الألف ان عمرك
 ما زعلت منى ابدا


و ... رسايل كتييير غيرهم و غيرهم
واقربهم لقلبى اللى كنت فيها بتتخلى
 عن قسوتك المصطنعة و المتعمدة

و تقولى بحنية و طيبة الدنيا 
سامحينى و أسف و متزعليش منى
لأنك لحظتها كنت بتبقى فيها نفسك 
مكشوف قصادى 
ومش عامل حاجز بينا ولا ساتر







رسايلك و انتا بتصبّح عليا 
او بترد علي صباحاتى 
و تبعتلى بوسة طايرة ف الهوا
والكام مرة اللى قولت فيهم بحبك

برسايل اكييييد هتحذفها الرقابة 
بس شرع الهوى و العشق بيها يسمح 
 :)








رسايل الفجر 
لما كنت بتوحشنى قووووى 


أو لما ساعات أصحيك للشغل 
او عشان تلحق تتسحر و تشربلك بق مية



كل كلمة كتبتهالى بصدق 
و سكنت قلبى و مخرجتش منه ابدا  





زمان اول ما عرفنا بعض 
انا فعلا كنت بستغرب منك  
لما كنت بلاقيك مش عاوز تمسح رسايلى
وتقول انك عاوز تحتفظ بكل حاجة 
كنت برد 
بـ ... امسحهم يا حبيبى 
و انا لسه تانى هبعتلك غيرهم
 و قدهم و اكتر منهم أضعاف .. أضعاف 
ف الأيام الجاية 
لأن حبى مش هيخلص
 وبالعكس هيزيد 







مكنتش اعرف 
اللى انتا عارفه و شايفه
و ان هييجى الوقت و ينقطع بينا الكلام
و لو كنت عرفت و شفت زيك ساعتها 
كنت احتفظت بكل رسايلك 
و لو مكتوبة
ومكنتش مسحت منها اللى اضطريت 
أمسحه غصب عنى عشان الاقى 
مطرح لرسايل جديدة






للأسف ... مكنتش اعرف
انه مش هيبقى فيه 
لا ... رسايل جاية 
ولا ... ايام جاية 






بس عارف ؟
انتا كل كلمة قولتهالى

وبعتهالى لسه متسجلة ف بالى و قلبى
وكأنها مبعوتالى حالا دلوقت 








و اللى خلاص مبقاش موجود 
لسه بفتكره دايما و ف كل وقت
و بفتكر معاه قد ايه كانت لهفتى عليك
 و فرحتى بيك و قد ايه كانت حكايتنا حلوة
واللى عشته معاك كان أجمل ايام مرت عليا






ولحسن الحظ
 انه ..  لسه عندى منك 
شوية رسايل ع الموبايل و متمسحتش

و كل ما افكر لثوانى ازعل منك 
او قلبى يوجعنى لما بفتقدك 
ومقدرش اكلمك زى الأول 
برجع افتح صندوق رسايلى و اقراهم 
و احس انك لسه هنا 
لسه بتحضنى بكلامك اللى عارفة 
و متاكدة انه كان طالع م القلب 
مكنش زيف أو فيه شبهة كدب 






جايز ... 
مبقاش ينفع ابعتلك و تبعتلى
و جايز .. بقى
او هيبقى فيه واحدة تانية 
هيكونلها وحدها الحق ف رسايلك دى 
و جايز .. لما ترجع تفتكرنى متعرفش تلاقينى 
و جايز .. فجأة الاقى منك رسالة جديدة 
و جايز كل حاجة بينا .. تحصل







و الأكيد انى كنت محتاجة أقول لنفسى
 و أقولك 
عن ازاى ان مجرد حاجة واحدة بس
حلوة منك لما كانت بتجينى 
كانت بتعمل إيه ؟!
و ازاى كانت الصبح لما توصلنى 
بتحلى كل يومى
 و ف قلب الليل بتدفى قلبى  





رسايلك بأختصاااااار 
 كانت
حضن وبيضمنى








و اللى مش جايز و ... الاكيد 
ان كل يوم ف الصبح والمسا 
هيوصلك منى سلام مستخبى
جايز مش بتستناه ولا هتشوفه 
 بس هيوصلك
و اللى هيجيبهولك لحد عندك 
 ملاك قلبه حنّين
و مش أقل حنية من قلبك 





ولإنه طيب .. 
و بيصِعِب عليه قلبى 
فنا واثقة انه هيتطوع بالمهمة دايما
ويؤديها بلا كلل ولا ملل

وكل مرة هتلاقيه رايحالك يخبط بشويش
 على بابك وشايلاك حبى على جناح 
ودعواتى ع الجناح التانى
و معاهم كلمة منى 
تتلخص فى أربع حروف 
مبيخلصوش مهما حصل ابدا


....  ب .... ح .... ب .... ك  ....



 --------------------
------------------------------


 

خــطـــــاريــف ...... 20  

Posted by: فاتيما in


   


قلــبى 
بيزغزغ روحه بروحه
ع ل ش ا ن
يمســح منه التكشــيرة
سعاد حسنى 


 
حــبك يشبهك
متفرد .. عنيف .. مجنون
قاسى و حنون
باهت و مطفى 
و نوره ... يعمى العيون 
حبك كل الحاجات 
عكس بعض .. و متشابهات
 بإختصـــار يا حبيبى
حبك ... زيــك



وما الحب إلا جنون 
وليام شكسبير



كعصفورة فى كف طفل يزّمها 
تذوق حياض الموت و الطفل يلعب 
فلا الطفل ذو عقل يرق لها 
ولا الطير ذو ريش يطير فيذهب
قيس بن الملوح 



كان عاوزنى
 أبقى قاسى عليه 
ف حبى ... معرفتش أقسى !!
لؤى




لأ بجـد انتا ازاى كدا
دنا مش عارفة حتى 
أكـره قسوتك ... !!!!



من يهن يسهل الهوان عليه 
ما لجرح بميّت ايلام
ابو الطيب المتنبى



بعض الأقفاص التى تحتجزنا
قضبانها لا تُـرى



مش عاوزة تأنيب اعمل ايه ؟!!!
معرفتش احبك غير كدا



قالوا (اما بعد) 
و سموها فصل الخطاب 
وأنا أقول (اما قبل) 
و أسميها وصل الماضى 
مصطفى صادق الرافعى 



روحى 
و روحك حبايب 
من قبل دا العالم والله 




- خليك نبى و انشر دعوتك 
- مقدرش أكون نبى  ...
- و مين قالك انى اقدر اكون إله ؟؟!!
ماستر سين - الخيط الرفيع 




و يا نخل لو تنحنى 
تبقى انتا مش نخلى 
ولا تبقى انتا الذى عاشقه و من داخلى
عمر نجم 



علطول شيفاك كبير 
 

 ارجوك 
متصّغرش روحك



الحب 
عمره ما جرح 
و لا عمر بستانه طرح 
غير الهنا .... و غير الفرح 
مرسى جميل عزيز




الفراق بيقتلنى ..
ميفرقش عندى عن الانتحار 
لأنه مبيديش لحد الفرصة .. انه يندم 
و يصلح غلطته أو حتى يعتذر عنها .....!!



لو فينا جرح ..
 كفيلة بيه السنين 
عبدالفتاح الجرينى 





محدش قبلك خد منى حاجة
 غصب عنى او بالرضا و ندمت عليها
و مرجعتليش تانى بلى احسن منها
انتا ليه مطلعتش زيهم ... ؟!!!
 


 قولتلك يا عبيطة
خلى بالك من عقلك .!!!!



خلينى 
يمكن تحتاجلى 
و ف خوف الأيام تلجألى 
صابر الرباعى
 وكأنك تعطيهم اشارة : 
أنا احب ... إذن انا موجود 
نسرين طرابلسى - كاتبة وشاعرة سورية




نفسى تحضننى قوى 
 حاسة انى قربت اتجنن بجد




لا شىء يفسد الحياة كالتوقعات 
ليتنى أكف عن التوقع 
لا شىء يفسد الواقع كالخيالات 
ليتنى لا اكف عن التخيل 
لبنى احمد نور 



 جزاء الحب هو الحب 
فريديرش شيلر - شاعر واديب المانى




 و اعرف لوحدك شكل حياتنا 
اللى انا عايزاها 
نانسى عجرم




غلطتى
 انى استنيت منك 
اللى .... متقدرش عليه 



 كان قلبى حاسس 
انها آخر مرة   برغم ... ان 




كل شىء كان عادى 
و المقابلة كانت عادية 
عدى الوقت 
و اكتشفت 
ان كل اللى فات هيبقى 
لحظة تاريخية 
وليد طاهر




تحت المطر تحت المطر
ساعت الوداع وقت السفر 
قلبى انقبض حس بخطر
شافك بتبعد داب ..إنفطر
ولا حد شافه لما دموعه نزلت
ماهو كان بيبكى ..تحت المطر !!


غريبة 
و مش غريبة 
دنيا و فيها العجايب 
بتريح اللى ظلموا و بتتعب الحبايب



 لما بفتكر 
اللى انتا شوفته 
و بفتكر جنب منه وجعى
من روحى و منك ... بنكسف 



قبل أن تشجع على البدايات 
كان يجب أن تفهم 
انك لا تستطيع أن ترسم النهايات 
بهاء طاهر - نقطة النور 



محدش بيبقى ماشى ف سكته
و قاصد يتكعبل بالحب
ثم إنه ... 




الحب ليس سواه ف الغايات .. درب 
نجيب سرور - لزوم مايلزم





  لكن بقول معرفش انا 
كان ماشى ليه ؟
آمال ماهر





على فكرة انا مش ندمانة 
عشان الحب اجمل حاجة ف الدنيا 
وانا حبيتك بجد 
واستمتعت بكل لحظة حب فيها
انا كنت حاسة انى طايرة وفرحانة .. 
وانتا كنت كل حاجة ف حياتى
ياسمين - السلم والتعبان




 ابتعدى عن رجل 
لا يملك ثفاقة الإعتذار
حتى لا تفقدى يوما احترامك لنفسك
وانت تغفرين له إهانات وأخطاء فى حقك 
لا يرى لزوم للإعتذار عنها 
سيزداد تكرارا لها وإحتقاراً لك.
احلام مستغانمى 




سامحينى
 انا عارف انى بعاملك ببشاعة
 آخر رسالة ع الموبايل


كرمالك صرت بخبى 
خبى الحب ال ساكن قلبى 
اعمل حالى ولا على بالى 
مهتمى ومش مهتمى
 كرمالك - اليسا




 بتكرهينى ؟؟




 والله انتا عبيط 
و ما فاهم حاجة 




الحب غفران دائم 
بيتر اوستينوف - كاتب وممثل انجليزى



 
انتا أصلك عايش الدنيا بالمتشقلب
المفروض انك تسكن قلوب
 اللى حواليك 
اللى بيحبوك و القريبين منك
مش الأغراب و المجهولين و البعاد عنك !!




ساجن قلبه ف عتمة خوفه 
قافل روحه بميت مفتاح
 

الزهد نعمة الله العظمى 
وابتلائه الأعظم 
مصطفى ابراهيم





الحب مفتاح 
و بـه تُفتح كل ابواب السعادة
اويفر وندل هولمز - كاتب وشاعرامريكى 



 انتا حبيبى 
و سامحنى 
لأنى معرفتش 
أعمل اللى كان لازم يتعمل




 لأ يا ربى 
ف يوم ما تندم 
حب ... و إفرح 
بس أوعى تانى تجرح 
نجاة



 جنة من غير حبك ... ما تنداس 
مثل عامى ... (بتصرف)



يا رب 
وسع رزقه
و حبب فيه خلقك
و احفظه من كــل شـــر


انا ازاى اتبخرت ف الهوا كدا 
لدرجة انى ابقى قصادك
 ومش شايفنى ؟!!

 
فى حياة الانسان لحظات 
يدعى فيها إلى موقف 
فإن اجاب نجا 
وأن لم يجب ضاع نهائيا
أحمد بهجت - مذكرات صائم 



 منك يا رب طلبته
وبين ايديك يا رب سيباه





طالبة لو .. تكرمنى فيه 
و تحفظه 
حتى من نفسه




مكتوبــة بأسمك أرضى البـور
و لا زرع و خضرة و لا ميـّة و نـور
و عاوزها سايبها كارهها حاببها
أرضى دى ملكِكْ حقَك ورِثـكْ
و بس ناقصهـا ... يافطة و ســور



 
 و .... بس


.....................

:)



------------------------------------
-------------------------------------------
الخطاريف دى
اهداء للى عارف نفسه
و اللى للأسف ... ملحقش يعرفنى

-----------------------------------------
-----------------------------------------------