.

.

ع الإمـــة .. 1 .. 2 .. 3 .. حوووووول  

Posted by: فاتيما in

 






من الوافقين ع الإمة  
بوسط البلد - الكاااااهرة 
إلى الواقفين ع الإمة 
ف بحرى - اسكندرية
واحــ(1)ــد
 اتنيـ(2)ـن 
تلاتـ(3)ـة
 حووووووول 





نداء إلى بحرى 
و ما بعد بحرى 
و بنحبوهم 
و لكل حتة فيكى يا ماريا 
يا صباح الفل 
و الياسمين و النسايم 
المحملة بعبير البحر الابيض المتوسط
الذى إن ذُكر لابد و أن تذُكر
إسكندرية معاه .. ان مكنش قبل منه 


 



و هنا مربط الفرس 
أديلنا مدة مروحناش هناك 
ووحشنا البحر
و وحشتنا اسكندرية واهلها 
قوى .. قوى .. قوى 







ونظراااااااا 
لأن الدنيا آخر فل ومنجهة
والثورة المصرية ف أزهى عصورها 
والحياة بمبى بمبى بمبى 
و إحنا مبسوطين وحلوين
و لا حدش كابس على مراوحنا 
سواء من الفلول 
و لاّ تيار الإسلام السياسى 
ولا حتى بعض التيارات المدنية 
اللى برضو عاوز الحرق








و نظراااااااا
لأن الحالة المعدنيه لأغلبنا ف السما
فكان لزاما على اهل اسكنكرية الكرام 
بحساسيتهم المفرطة 
وشفافيتهم العالية 
ان ينتشلونا من هذا الضيااااااع
ويعزمونا حداهم يوم من باب العطف 
و يعملوا معانا الأنسانية
و فرصة نرّوق و نفوّق 
و نهدى ف نفسيتنا المحطشمة
لحسن قربنا يجيلنا نقطة .. يعقبها شلل
 و الإحتمال كبير منلقيش ابو سماعين 
يشفينا ببركاته فالحل ايه ؟؟؟




نتوكس 
و نطب ساكتين  ؟؟؟!!!




لأ طشبعن 
نروح اسكندرية
لبحرها واهلها يلحقونا 
وربنا يخليهم لينا 
ويخلينا ليهم برضو مفيش مانع




والتفاصيل كلها
عند الراعى الرسمى للحدث 
الست دودو هانم على سن ورمح 
عاشقة الرومانسية و الرومانسية عاشقها 
دوس ... هنا 





برنامج الرحلة كالتالى


طلعوا الكراسات
و ... اكتبوا ورايا 
تجمع .. غدا .. توقيع .. رجوع 
بس بسيطة خالص أهى 






يعنى 
 هنتجمع ف نادى التطبيقين 
ثم نتوجه للغدا
وبعدين مكتبة ديوان 
عشان 
حفلة توقيع الحبايب 
وبعدين نروح ... بيتك بيتك  
 كل الأسئلة اللى هتسألوها 
عن حفل التوقيع إجابتها موجودة .... هنا 







 
نقول المعاد تانى 
عشان اللى ميعرفش 
الجمعة
6 (استغفر الله العظيم ) أبريل 





قايمة الحضور
فيها ناس 
أكدت حضورها 
و فيها ناس لسه بتتدلع عليناااااااا

الأكيد ان شاء الله 
و ..... اوعى 
و وسّع عشان ست الكل 







ماما زيزى 
الغالية هتنورنا بإذن الله 
شيرين سامى 
الجميلة وجوزها جايين
مصطفى سيف 
الأخلاق
داليا قوس قزح وش الخير و الهنا  
و اخيرا آخر العنقود 
و نقاوة عينى أبو البطابيط بطوط حبوب 
دول الاكيدين ... و ف الاوكيه 








اما اللى لسه ... بيتدلعوا علينا 
عشان يعرفوا غلاوتهم  
فلسه محدش منهم تكرم 
و ادانى التمام النوهائى
و هم 
و بدون ذكر اسماء 
عشان الإحراج يعنى .. نور الدين







و فيه اتنين مطلوبين بالإسم تحديدااااااا
وهنعلقلهم بوسترات فشر بوسترات
 ابو سماعين لو تطلب الأمر
وهن
ست السوتيتات ستيتة
وشمس نهار المدونات وقمرها شمس النهار
 إنتوا الجوز بقى يا ريت تبطلوا 
تتقلوا علينا 
وتحاولوا تيجوا اليوم دا وتخلوه يفرق 
عشان وجودكم وسطنا ومعانا .. دايما بيفرق









اما بقى عن فرع اسكندرية
فنا بتمنى اشوفكم كلكم يا عيااااال 
وحتى الآن متاكدة انى هشوف 
دودو حبيبتى و قطتى وخطيبها الغالى
و قطاقيطو قلب القطة  
وياريت الحاج ريتشارد والعيااااال
و الحب الجميل و توتا 
و نور شريف الغالى
و داليا ماى كورنر أدفى كورنر ف قلبى
بتمنى اشوفك يا حنين القلب 
و يا زهراء يا ذات الوجه المشرق 
ونفسى كمان 
أشوف مدام نانو القدر وأنا و الولاد 
    




بت يا انجىىىىى 
 هنقهر لو مشوفتكيش 
و رانيا ليس فقيرا و لماضة
واسماء نبض اسكندرية 
ومش عاوزة انسى حد ويزعل ...
عاوزة اشوفكم يا كل مدونين اسكندرية 
العزاز على قلبى و قلوبنا كلنا








واتمنى طبعاااااا 
ان رامى يعرف يظبط اموره و ييجى 




واتمنى كمان
 فيدو حفيدة عرابى
 تبقى قاعدة ع الكرسى اللى جنبى 




و أما ... خالد  همس الأحباب 
فنا بعترف 
انى مقصرة معاك تقصير السنيييين
و مفتقداك قوى وكل الناس شرحى
فهل .. ينفع تحاول تيجى على نفسك 
وترمى كل الظروف ورا ضهرك 
وتحاول تحضر ... لو سمحت ؟؟؟؟


والأستاذ أسامة ازهرى
 المختفى من الوجود التدوينى 
وفاضله بلاغ ف القسم و نداء انسانى
وموبايله مقفول و مبيردش ع الإيميلات 
إذ نتمى انه يا رب يظهر ويبان 
عليه الامان قبل يوم الجمعة 
وييجى معانا 
بس خلوا بالكوا ... انه غالبااااااا
 هييجى متجبس وعينه ورامة
لأنى هرنه علقة محترمة الاول




 
هانى مصرى جدا بقى ... إيه ؟
لازم نقعد نشحت
ونقولك سفرية ونشوفك لله و لاّ اييييه ؟؟؟






وليد الدوغرى و مصطفى ريان 
و كل الناس الطيبة دى 
... ايه ؟





طاه عموماااااا
انا مش هعقد انده اسم اسم 
انتوا كلكم واحشنى و تعالوا  ... لو تقدروا 


عدة ملاحيظ 
 على هامش اللقاء 




 (1)
نظرااااااا 
لضيق الوقت يا إخواننا 
فإنى أقترح المرة دى نتغدى 
ف أى محل للأكلات السريعة 
زى ماك او كنتاكى او هارديز او كوك دور 
أى حاجة م الحاجات دى
عشان عددنا غالبا .... بيكون كبير 
وهم مهيئين لتلبية الطلبات الكتيرة 
دى ف وقت قياسى مقارنة بالمطاعم العادية
وعشان نلحق حفل التوقيع
ونقعد مع الناس الحلوة هناك 
أطول وقت ممكن







(2)
  يا ريت كمان يا جماعة 
 اللى جاى يقول هنا ف التعليقات
عشان نحدد العدد بدقة قبل يوم الخميس 
عشان قوس قزح الغالية 
عاوزة تسافر ف القطر او السوبر جيت
والقطر لازمله حجز قبلها 
فبقول لو العدد متحددش قبلها 
 نركب السوبر جيت
هيا عموما مبتحبش الميكروباص 
ومش هتنيلها كلمة 
بس لو عددنا وصل لـ 14 ممكن ناخد 
ميكروباص من بابه أريح وأسرع
و فكرى يا دوللى ....
وأهو يبقى عندنا كل الإحتمالات 





(3)
الدعوة عاااااامة لكل الناس 
مش ضرورى تكونوا جيتوا لقاءات قبل كدا 
اللى بيحضر لأول مرة اهلا وسهلا بيه 
بس من غير رخامة 
أتخلونيش أجيبلكوا معايا ف الشنطة
سوكومونس يزغرلكو
عشان رموشى بتوجعنى 
ومفياش حيل أزغر أنا








(4)
آه ... آخر حاجة بقى 
احنا الثورة و الفلول و السياسة 
اطلاقااااا مش قارفينا ف عيشتنا 
ولا معذبينا و مطلعين عينا و..  لا حاجة 
بس ميمنعش أنى سخصيا 
بستسمح مدونى اسكندرية الكرام 
 يستحملونا 
و يعذورنا لو لقونا جاينلهم
 مفيصين و خلصانين ومكتشئبين 
و محبطشين و معيطشين و حالنا كرب و كدا 





 
كل سفرية و انتوا طيبين 
وأشوفكم 
الجمعة الكاااادمة 
على ألف خير 
يا أحلى صحبة وناس وعالم 




كان معاكم 
من وسط البلد و بنحبوه 
و ع الإمة بنستنوه و ... لابيجيش






فاتيما بنت ام فاتيما 
برنامج إحنا جايين - قطاع أخبار بلوجر
 الكاااااااااااهرة 

--------------------------
--------------------------------------
كل صور اسكندرية الحلوة ف البوست
 بعدسة أميرة بهى الدين 
من مدونة .. قصة ولاّمناظر
---------------------------------------------



النمرة دى
مخصصة لليوم 


اكتبوهاااااا ... يمكن تنفعكوا

0121097473

-------------------------------
تأكيدات
محمود بهجت و أبو حميد 
و منامينو  و صديقه إسلام 
و إبراهيم رزق و ساليناز و مروة زهرة الجنة
و Carol و L.G من اسكندرية
هاااااااه
 مين تانى قال جاى  ؟؟؟؟


---------------------------

آه 
بخصوص المواصلات 
لحد دلوقتى داليا قوس قزح مختفية 
و مفيش اوكيه بالحضور 
فبالتالى مفيش ترتيبات لسفر بالقطر 
و لو فضلنا لحد بكرة بليل .. بلا تأكيد منها 
هيكون إنذاك 
 السفر بالميكروباص كالعادة 
و هنتجمع ف ميدان رمسيس 
عند الراجل بتاع العصير
الساعة سـ(7)ـبعة
 و انا باجى بدرى فيا ريت محدش يتأخر عليا
عشان الشوباب الباااااايظ وكدا ...
انتوا عارفيييين 
:)

........................

أى جديد هنقول
و نحدث ف البوست ان شاء الله  

---------------------------------------------
--------------------------------
-------------------------------------


(1)

إعتــــذار 
من الغالية ماما ZIZI 
لأنها مش هتقدر تيجى 
وبتتمنالنا سفرية سعيدة 


(2) 

زوغانات 
من هانى مصرى جدا 
وشمس النهار و مصطفى ريان 
لظروف قهرية
 و منقدرش نتكلم ف هذا 
والمرة الجاية تكونوا معانا يا جماعة 


(3) 

لسه
 منعرفش حاجة عن رامى 
جاى ولاّ هينفضّلنا 
وربنا يسهل ويقدر ييجى 


(4)

تأكيدات من هيثم السايس 
انه جاى 
و تطمنيات من زهرة الجنة 
بإنها واسماء وحفيدة عرابى فيدووو جايين 
ومعاهم صديقة ... هتنوروا اليوم كله 

(5)

حتى تاريخ التحديث
 داليا مبعتتش ولا تعليق 
لعل المانع خير يا دوللى 
و اذا فضلنا كدا لحد المغرب 
يبقى الأتفاق ع السفر بالميكروباص سارى 
والمعاد كما هو معروف سلفا وزى كل مرة
السـ(7)ـاعة  عند بتاع العصير 
ف ميدان رمسيس


(6)

اللى من القاهرة 
و معاه نمر موبايلات حد م الناس 
اللى جاية يتكلم عليه عشان يعرف مطرحنا 
اللى ميعرفش حد و أول مرة ييجى 
اتكلموا على نمرة اللقاء المكتوبة
0121097473
ودودو هتعرف توصل لى
و نبعت نجيب التايه فيكم .... 
و هااااااااااااااااااااام جدا 
إحنا يا جماعة آخرنا 
7,30 
بعدها هنتحرك فمحدش يتأخر لو سمحتوا
عشان نوصل اسكندرية بدرى


 
(7)

أشوفكم على الف خير 
:) 


--------------------------------------
--------------------------------------------- 


This entry was posted on الخميس, أبريل 05, 2012 and is filed under . You can leave a response and follow any responses to this entry through the .

56 كــــلام بيطــبطـــب عـــلى قــــلبى و روحــــى

ان شاء الله يكون يوم جميل
وربنا يسعد أوقاتكم
وسلمولي على اسكندرية
:)

انا طبعا جاي ان شاء الله
يا رب يكون يوم خلو و سعيد و ننبسط كلنا و اتمنى ان الكل ييجي علشان تكمل فرحتنا
تحياتي

هتنوروا اسكندريه يابطتى
اولا موافقه جدا على موضوع المطعم ده اختصارا للوقت معاك ياقمر والفكره حلوه
ثانيا انا باضم صوتى لصوتك وبانادى واناشد من موقعى هذا امام الكيبورد كلا من ستوته وشموسه انهم يحضروا اتمنى بشددده
هاروح اقرا تانى اصل البوست عجبنى قووووووى ولو فيه كلمه وقفت فى زورى هارجع اقولهالك :))
بحبببببك ياقلب البحر

ملحوظه مكلبظه
الجو بالنهار تحفففففه وحلو قوى
بالليل بيبقى سقعه شويه ابقوا اعملوا حسابكم وهاتوا معاكم شال او جواكت

عاااااااااااااا نفسى آجىىىى

بكرة البعد ده مش عارفه اروح فى حته

وبجد بوستاتك مغرية يا فتيما

بس عارفه ان شاء الله هقابلك خلاااااص نويت
انا ان شاء الله كتابى فى المرحله الجاية :)

هشوفكوا يعنى هشوفكواااا مفيش مفررررررر



دمت بخير

هاموووووووووت بغيظى :S

انجوى بقى :)

يا خراشي يا لهوي

هو أنتي ما تعرفيش!!!!!!!

انا أصلي هاجرت خلاص وأستوطنت الغردقه

وقريبا جدا سأعلن استقلالها وأستفرد بيها بئا

Baskouta
--------


ميرسى يا حبيبتى
وكان نفسى تكونى معانا
بس عارفة ان المشوار بعييييد عليكى قوى

و نسلملك على اسكندرية ليه
وانتى اصلا رايحاها يا فندم ؟؟؟

ازاى ؟

مش انتى بسكوتى حبيبتى ؟
مش انتى قاعدة جوا قلبى ؟

خلاص
بناء على ما سبق
تبقى هتروحى
وتسلمى عليها بنفسك

صح ولا انا غلطانة ؟؟؟

:)

مصطفى سيف الدين
---------------

واليوم
بوجودك يكون اجمل يا مصطفى
مبسوطة قوى ...
اننا هنسافر كلنا سوا
صحبة طيبة من أولها اهو
وكلها خير

تيجى بالف سلامة
ان شاء الله


و تحياتى حتى ساعته وتاريخه
:)

عاشقة الرومانسية
----------------


حاضر يا دودو
هنجيب معانا حاجة عشان البرد
وشكرا ع الموافقة ع الأقتراح
أدى اول صوت ... عقبال الباقى

ويا رب ستوتة وشموسة يستجيبوا للنوداء الإنسانى التدوينى الإسكندرانى
و هبقى استنى الكلمة اللى وقفت ف زورك دى اما اشوف ايه حكايتها
:)

سلامى لمحمد لحد ما اشوفه
وأسلم عليه بنفسى

وربنا يخليكوا للغلابة اللى زيى

:)

رؤى عليوة
---------

طاه تعالى يا رؤى ماذا يمنع ؟
انتى مسافرة برا مصر ؟

طيب يا حبيبتى عموما
متزعليش
اللقا نصيب
وان شاء الله نتقابل على الف خير
والف مبروك مقدما ع الكتاب
ودمت انتى بكل الود والخير والسعادة
:)

Candy
-----


على عينى يا كوكو والنبىىىىىىى
وبعد الشر عليكى
لأ متموتيشى احنا بنحبك وعاوزينك
وان شاء الله الظروف تتحسن ونجيلكو

هنجوى حاضر
انتى تؤمرى يا حلويات انتى

و الـ:-* دى على جبينك يا كاندى

مصرى جدا
--------


يا خراشتينى يا لهوتينى

لأ معرفش !!!!!!!

طاه حيث كدا
وحيث ان البلد مقلوبة
احنا نقلب كمان الخريطة ونجيب الغردقة جنب اسكنكرية ومحدش ياخد باله بدل ما تعمل انقلاب وتستقل بيها وكدا
وكله بما لا يخالف شرع الله
ايه رأيك ؟

:)

معلش
تتعوض يا وتد
السفرية الجاية انتا فيها
لأنا هخفيها
هه

كان نفسي اكون معاكم زي المره اللي فاتت وناكل ام علي من عند الشيخ وفيق
بس يلا خيرها في غيرها
ان شاء الله يبقى يوم سعيد عليكم كلكم وامانه عليكي يا فاتيما تغلسي شويه على دودو عشان مش هعرف اغلس عليها

eng_semsem
----------


معلشى يا باشمهندس
المرة الجاية وتكون معاك العروسة
:)

واحنا مظنش هنلحق الشيخ وفيق
فخلاص اطمن
لا ام على
ولا آيس كريم النوبة دى من غيرك


اما دودو بقى
فأنا آخر نفر تطلب منه الطلب دا
الا دودو
دى قطتى و حبيبتى
ووحشانى ونفسى اشوفها
دا هيا السبب رقم واحـ(1)ـد ف وسط كبشة الاسباب اللى هتخلينى
اروح اسكندرية
تقوم تقولى أغلس عليها ؟!!!!

قلبى ميطاوعنيش
واطلب طلب تانى أقدر اعمله

مشيها لا ام على المرة دى ... وبس
:)

نشوفك يا رب على ألف خير
لما ترجع بالسلامة

على فكرة انا هابات في اسكندرية الخميس
يعني هاسبقكم لهناك مش هنسافر سوا ممكن ارجع معاكم واخد القطر من القاهرة او افضل في اسكندرية و استنى القطر

هتبات ف اسكنكرية ؟!!!

يا بختتتتتتتتك
احقد واحسد واتغاظ بقى ولا ايه
طب البياتة دى فيها قصتين ع الأقل
من وحى ليل اسكندرية و بحرها ..ماشى ؟

وترجع تسافر المهم تكون معانا
وصحبة طيبة ان شاء الله

:)

جميل
اسكندرية حتنور زيادة على فكرة فيه محل مؤمن في نفس مكان المكتبة اللي فيها حفل توقيع الكتب لو انتو بتحبوا الاكل في مؤمن بس اعتقد لو العدد كبير لازم تبلغوا المحل لأنه مش كبير قوي .. وفيه فطير ذهب في اسبورتنج على الترام في نص السكة ظريف وفي متناول الجميع وحيعجبكم حلو وحادق ومشاريب

تاني اسكندرية حتنور واتمنى نتعرف بناس عرفناهم كلمات ونتمنى ان نعرفهم كأشخاص ..

L.G
----

ميرسى يا إل
كلك ذوق
واسكندرية منورة بأهلها الحلوين
مؤمن شغال ..
ومتهيألى هما مهيئين لعدد كبير أعتقد ذلك ... بس لو فيه محلات تانية بعد نادى التطبيقين مفيش مشكلة
أنا شخصيا بحب ماكدونالدز
وكنتاكى شغال و يشبع
بس الأفضل عنهم كوك دور
(احنا جربناه ف سفرية مرة ف المنصورة ) و كان كويس ف السرعة وكمان تنوع الوجبات سندوتشات وبيتزا وغيرها ...

عموما
اللى هتشوفوه مناسب لينا
احنا تحت امركم
وكله كويس


ميرسى على ذوقك تانى
واحنا اللى هنتشرف بيكى وبمعرفتك
ونتمنى ميبقاش دمنا تقيل عليكو
ان شاء الله

:)

فاتيما بإذن الله هاجى بس مش عارف ظروف ابو حميد ايه ياريت التفاصيل مكان اللقاء فين فى القاهرة و لا هنتقابل فى اسكندرية عدل؟

L.G
مؤمن اللى هناك دورين و يكفى عددنا و لو مش هيكفى ممكن نروح مطعم المهندسين فى سابا باشا كبير و يسعنا كلنا

Mahmoud Bahgat
--------------

يا خراشى يا محمود ماهذا الخبر الحلو على بليل كدا ...؟

طب يا ريت
انا بعزك قوى يا جدع انتا
وبنبسط لما تبقى ف وسطنا

ابو حميد يا ريت ييجى
هوه كمان
بس هوه الجمعة عنده خط أحمر
ان شاء الله ربنا يقدره وخلاص انا شبطت ف التعليق دا واعتبره كلام نوهائى


بخصوص التفاصيل
فحنا ان شاء الله اهل القاهرة هنتجمع ونسافر سوا بدل ما كل واحد يسافر لوحده ...
لو داليا رافضة الميكروباص نهائى
هنركب القطر او السوبر جيت
وهنتقابل بإذن الله قصاد المحطة بتاعت هذا او ذاك
وغالبا هيكون المعاد 7 مش بعد كدا


بالنوسبة لمؤمن ...
ادى تانى صوت و اتفقنا

وبالنوسبة لمطعم المهندسين مينفعش يا محمود عشان احنا جربنا مرة وخد وقت طويل برضو ...
مش قصدى نغلط ف الهندزة متلقاااا
بس دا نتاج تجربة
انا بقول محل اكلات سريعة احسن وأسرع بما ان عامل الوقت مهم ...


واشوفك على ألف خير يا فندم
الجمعة الكااااادمة

سلامى للمدام والولاد

:)

بعد اذنك يابطتى التعليق ده لأسامه ناصر
بقى عايز فاتيما تغلس عليا؟؟ طب ودينى لاوريك ياريس وابقى شوف مين يتبنى حملتك الانتخابيه والنعمه لتلوص من غيرى
ماااااااااشى
بس انا بعد ما قريت تعليق بطتى عايزه اطلع لك لسانى واغيييييييظك أءأءأء
بالعند فيك انا قطتها ودلعوتها ومش هتغلس عليا دى روحى روحى روحى
يااااااااارب ترجع بالف سلامه واغلس انا عليك لحد ما ارجعك السعوديه ماشى على رجلك

فاتيما يا فاتيماا
وحشتني جداااااااااااااا
ان شاء الله أشوفكم في اسكندرية
بس ادعي ان اسماء تخلص تفكير ونسافر
عشان وحشتني جدا
اشوفك علي خير

أنا كنت ناوى أجى بس مالقيتش إسمى.....عاااااااا
بس لو جيت مراتى والعيال حيشبطوا فى السفرية
رأيكم إيه؟ أجى وأجيبهم؟

زهرة الجنة
---------

انتى كمان يا مرمرة وحشتينىىىىى
ويا ريت بجد لو تقدرى تيجى
ويا أسمااااااااااء
اعتبرينا شغل طيب
وتعالى غطى حفلة التوقيع ..

ان شاء الله ربنا يوفق
وتتدبر وتعرفى تيجى يا حبيبتى
اسكنكرية هتنور
:)

بوسات
وحضونات حتى اراكى بقى

أبو حميد
-------


انا خفت اكتب اسمك يا باشمهنزززوانا عارفة ان الجمعة دا يوم صعب
وبعدين والله الفكرة حلوة
تعالى انتا والعيال وامهم
آخر مرة خرجتوا برا القاهرة كان امتى يعنى ؟؟؟
تعالوا واهو تبقى فسحة
و تغيير جوا قبل معترك الامتحانات
(خدتلى بالك من معترك دى )

فكّر فيها بجد
وان شاء الله تنورونا
وهنشيلهم على راسنا من فوق
و تنبسطوا باليوم كلكم ... معانا


يلا اتكل على الله
وقول انا جاااااااااى

:)

ححاول والله
بس خايف بعد اللى نور الدين حيعملوا فيكم ترفضوا حضورى أى لقاء تانى

هو يعني يعني يعني
وعلي استحياء كداهون
وبما اني بقالي ييجي تلات سنين ماروحتش اسكندرية
وييجي ست سنين متعلقتش هونا
فانا من موقفي هذا
ونظرا للظروف العصيبة التي تمر بها البلاد
فانا لم اكن انتوي
قصدي سوف انتوي
اجي ان شاء الله
وهايكون معايا واحد صاحبي
واحتمال يبقوا اتنين
والله الموفق والبستعان

أبو حميد
-------


ههههه
لأ متخفش يا عم
مش هنقولك متجيش تانى
هنقولك متجبش ابنك تانى بس
:))

هاتهم يغيروا جو
و بس خد بالك تجيبوا معاكو حاجات يتسلوا بيها ف السكة والقعدة يعنى لو عندهم لعب او أى حاجة كدا عشان ميزهقوش ...أعتقد نادى التطبقيين اللى هنقعد فيه فيه مكان يلعبوا
ولو مفيهوش احنا ممكن نطلب من دودو نروح المهندسين ما دمت جاى انتا ومحمود وهتدخلونا ولاّ مينفعشى ؟!!


عموما نسأل دودو
وتجاوبنا بما انها بتقرى التعليقات
نادى التطبيقشيييين فيه مراجيح ومكان للعيال تلعب وتتنطط ولا إيه ؟؟؟

Manamino
--------

يا لهوتييييييينى
منامينو جاى
ومعاه كمان واحد صاحبه
يادى الهنا يادى الهنا
ويعنى ابتديت بموبارك
ووسطنتها بعمر بت هوين سليمان
و ختمتها بالمجلس السمكرى ..
كدا ينفع ؟!!!

طيب
نظرا للظروف العصشيبة
موش هنتكلم معاك
ونكتفى بالقول
اهلا وسهلا بيك انتا وصاحبك
وبالنويابة عن اهل اسكنكرية بقول
اسكنكرية هتنوّر زيادة ...بيكو
عشان هيا منوّرة بأهلها اساسى

اشوفك على الف خير يوميها
انتا و اسلام الأخلاق

:)

والله الموفق والبستعان
اشمعنى احنا يعنى

D:

رقم تليفون التجمع يابطه هيكون متاح يومها 01210979473 بعد اذنك اعملى تحديث بيه واسفه على التأخير

ابو حميد طبعا ينور اسكندريه هو والاسره
بالنسبه لنادى التطبيقيين مش فيه مكان للعب وكده وانا مش معايا عضويه لنادى المهندسين والناس هتتجمع فى التطبيقيين وكده هنلخبطهم
بس ملحوقه لو لقينا وقت وفيه اطفال كتير فى اللقاء هاضيف لهم جزء فى برنامج اليوم واشهيصهم
الاتفال احباب الله واحباب دودو
:))

فاتيما القمر روح قلب الملايكه :)
إيه البوست التحفه ده تصدقي شوقتيني جداً و نفسي أروح هناك من دلوقتي و استناكم:)
بجد مبسوطه أوي إني شوفتك و بشوفك و هشوفك بإذن الله و هديتك غاليه عندي جداً و أسعدتني جداً جداً :)

أشوفك على ألف خير

عاشقة الرومانسية
-----------------

ولا يهمك يا قطتى
واتأخرى زى ما تحبى

انا حدثت البوست
بس عالله الريدر ميعملش معايا دقة نقص كالعادة ويطلعه بقى عند الناس ...

بالنوسبة لولاد ابو حميد الغالى
فان شاء الله ينبسطوا
ويلاقوا حتة يلعبوا فيها ...


وبالنوسبة للسؤال بتاعك
اللى موش للنشر

الاجابة ... لأ ومينفعشى
وهبقى اقولك ليه
بينى وبينك
من غير سياح
عشان كله مفنجل عينه دلوقتى
وعاوز يعرف ايه السؤال
وانا هجاوب اقول ايه
حتى بصى
كلهم مركزّين اهو ..

فنا هغلس
ومش هقولك هنا
بينى وبينك بقى
هه

:)

شيرين سامى
----------

ميرسى يا شوشو
والله الهدية مش مقامك
بس اهى حاجة على ما قُسم
وعقبال الكتاب الجاى يا حبيبتى


وان شاء الله اليوم يعجبك
انتى وزوجك العزيز
وتروحوا مبسوطين
وعقبال ما نجيلك دايما ف الافراح
و ف حفلات التوقيع الملاح

:)

ان شاء الله ياحبيبتي نتقابل يومها
وان شاء الله اقدر اجيب معايا رشا (حفيدة عرابي)

بس عرفيني هتمشوا من القاهرة امتي وهتتجمعوا فين وهتركبوا ايه ؟؟؟؟؟؟؟؟

وهسجل الرقم اللي في البوست عشان لو تهنا :))

أهلا وسهلا بيكم في إسكندرية :)
أحب أشوفكم و أتعرف عليكم أكيد :)
و حارتب نفسي و أكيد حاشوفكم إنشاء الله

زهرة الجنة
---------

طيب هاييييل يا مروة
ويا ريت فعلا تعرفى تجيبى رشا معاكى
لأنها وحشتنى قوووووى


بصى
تفاصيل السفر ف التحديث
بس آخر كلام هيكون بكرة ان شاء الله
و تأكيد التأكيد يعنى والمكان بالضبط وكدا ... ماشى ؟

أشوفك على ألف خير

Carol
-----


اهلا بيكى يا كارول
واحنا هنتشرف بيكى يا حبيبتى
خلى الرقم معاكى بقى عشان تعرفى مكاننا
وتجيلنا عليه
:)

أشوفك على ألف خير

فاتيما
روح القلب الملائكية

انا جااااااااااااااااااااااااااى
بعد مقاوضات صعبة تم اخراج القرار و انا بأذن الله جاى و جارى اقناع زياد و ان كان مبدئيا رافض
هههههههههههههههههههه

فى شخصيات انتى بتحبيهم هتبقى مفاجاة جارى التفاوض و ان كان حتى الان لم يعطوا الراى النهائى
اعتقد ان العدد لو تجاوز عشر افراد ممكن ميكروبص 2112 متين من الباب للباب و يبقى فيه خصوصية اكتر

سلام يا فاتيما يا مجمعة الاحباب
و انا هحاول اكلم رامى
سلام بقى يا ام جو

ابراهيم رزق
-----------

أيون كدا انا ورايا رجالة
اخواتى يا ناس و منهنش عليهم نروح اسكندرية لوحدينا ...
:)

طيب هايل

انا بخمن الشخصيات مين
ويا رب يا رب ييجوا وينوروا
اللقاء أصلا من قبل ما يتم وهوه قرفته حلوة و عمال يحّلو ...
ربنا يخليكوا ليا

يا رب كمان رامى يضبط اموره
و حيث كدا فكرة الميكروباص من بابه ممتازة واحنا جربناها قبل كدا وكانت رحلة ممتعة والواحد كان حاسس انه رجع لأيام الجامعة والمدرسة والحاجات الحلوة بتاعت زمان دى ...

ان شاء الله ربنا يدبرها
ونروح ونرجع بالسلامة

والواد زياد لو مجاش هوه الخسران
مش هيشوف البحر ولا شوارع اسكندرية
و مش هيلعب مع سالى و ولاد ابو حميد وينبسط ..
.وسالى هترجع تغيظه
وتقوله على كل التفاصيل
وينددددددددددددم
قوله بقى ... يمكن يغير رأيه
:)

ان شاء الله تنورنا
زى ما دايما بتنور أى مكان بتروحه معانا يا ابو العيال


سلام مؤقتا حتى الجمعة

كان نفسي اجي بس عندي ظروف مش حلوة
حاقدة عليكم طبعا
بس المره الجاية ان شاء الله هاجي قبل الكل
شكرا علي زوقك وعلي دعوتك وطيبة قلبك

اما ابو الكباتن ازهري انا قلقانة عليه جدا وكان عندي نمرة اخته ومش لقياها
مش ممكن غيبته تقلق فعلا
لو اطمنتي عليه طمنيني

أخر خبر ومأكد ان شاء الله
حجزت في القطر انا ورشا واسماء رمضان وبسمة صحبتنا
وانتظرونا :)
بوسة كبيرة يافاتيما لغاية ما اشوفك باذن الله :)

شمس النهار
---------

:(

زعلانة عشان انتى مش جاية
بس عذرك معاكى و عندك ألف حق
ومقدرش أفتح بوقى بربع حرف ...

ربنا يصلح الأحوال
ويطمنك ويتعدى الظروف على خير
وابقى طمنينا

بالنسبة لأزهرى
انا قالقانة برضو
ويا رتنى كنت عارفة عنوانه
ونروحله العياط مخصوص
اكتشفت انى معرفش اسمه كاملا
كنا نروح ونسأل عن بيتهم حتى
هوه ساعات بيغطس ويسافر على برا
واتمنى يكون الغطسان دا سببه كدا
ويكون بخير
يا رب

وتأكدى انى لو عرفت حاجة
هقولكم علطول
ربنا يطمنا عليه
وعليكى
وعلى كل الناس الحلوة .. يا رب

بوساتى وحضوناتى
يا شموسة نهار المدونات وقمرها

زهرة الجنة
---------


الله ينوووووووور
كدا الكلام
ما يجيبها الا بنوتاتها
وتسافروا بالسلامة
خلو بالكو من بعضيشكم بقى
وهنستناكوا يا حبيبتى

بوسات وحضونات من هنا ليوم الجمعة
وتاخديهم بنفسك

وطلب لو سمحتى لو ممكن
لما تشوفى رشا يوم الجمعة الصبح
اديها حضن وقوليلها دا من فاتيما لحد ما تشوفك كمان ساعات ..
ممكن ؟

موشكرييييين

فاتيما
ازيك يارب تكوني بخير وفي احسن حال
ليكي واحشة جامده جدي واناعارف اني مقصر معاكي بس بقي عايزك تسامحيني بقلبك الطيب الجميل ده
انتي عارفه اني بحب اكون معاكو في الزيارات دي واتونس بيكو لكن للاسف الاسيف مش هقدر اجي المرة دي لان بجد في حاحات كتير كدة مش هينفع تخليني اروح معاكو
ان شاء الله يكون في لقاء قري بجدل قي القاهرة واشوفكو كلكو واسلم عليكم لانه بجد انتو كلكم واحشني وواحشني اني اتونس بيكو

ممممممممم
الظاهر اني اتنسيت من ساعة ما سيبت بلوجر الا لعنة الله علي تويتر والفيس
كدة اسمي مش موجووود
:(((((
زعلان بقي زعل السنين

بس هاجي برضه ان شاء الله :)
عشان اسكندرية وحشاني فحت وردم كمان
وعشان اشوف الناس الحلوة واقضي كام مشوار كدهون :)
اشوفك بخير ياست الكل

mostafa rayan
-------------

ازييييييك انتا يا صفصف
انتا وحشتنا جدا انتا كمان
طب مش هقدر أقول حاجة انا عارفة الجمعة احيان كتير عندك يوم عائلى وفيه صعوبة ومش هلابط كتيييير بقى
بس ان شاء الله لما نتجمع ف القاهرة قريب اوعدنى وعد بجد لا جدال فيه ...
تبقى تيجى عشان نشوفك يا الطيابة ذاتها
ماشى ؟

خلى بالك من نفسك

Haytham Alsayes
---------------

لأ لأ لأ يا هيثومة
ايه التكشيرة دى امسحها فوراااااااا
انا ميهونش عليا يا بنى
معلش سقط سهوا والنبى
أصل كل مرة اقولك تعالى .. مبتجيش
فقولت النوبة دى مكتبش قوم يمكن تيجى
D:

واديها نفعت اهى
هههههه

لأ بجد

انتا هتنورنا
وعشان الزعلولة دى تعدى على خير
هبقى لما أشوفك هصالحك .. ماشى ؟

عمرو يسرى
---------

تنور يا عمرو
واهلا بيك

:)

عاشقة الرومانسية
----------------

ماشى يا دودو
لما توصلى لكبد الحقيقة
ابقى قوليلى


ايه كبد الحقيقة دى ؟!!!

انا واخدة الموضوع جد قوى كدا ليه ؟!!!

:)

قصره
هستنى ردك
وكدا تقريبا خلاص
احنا متفقين على مكان التجمع والمعاد
وان شاء الله ربنا يطمنا ع الجميع

سلاااام حتى تعليق آخر

اولا والله آسف جداااااا على التأخير فى الرد يافاتيما
صدقينى مش دلع والله بس كنت بظبط شوية حاجات الظروف كانت ملخبطاها ومتحسمتش غير انهاردة
الحاجات دى يعرفها الشاب الفلولى العميل الإمبريالى التعسفى مينا جرجس
طبعااااااا إن شاء الله بكرة هكون معاكم
ومش هقول يارتنى كنت معاهم
..
ربنا ميحرمناش منك ومن مساهماتك وافضالك اللى مغرقة الجميع

نور الدين
---------

ولا يهمك يا نور
اللحظات الاخيرة دايما بتشيل خير
بحسها كدا
:)


عموما انا متوقعة ان شاء الله
ان ناس تانية تغير رأيها
او تلحق ترتب حالها
على آخر لحظة ويمكن بكرة الصبح
نلاقيهم اتوفقوا وعرفوا ييجوا


وأصله انا قولت
مش معقول يهون على نور
يبقى حفل توقيع لكتابه البكرى
وميكونش موجود جنبه ف يوم زى كدا
:)


أشوفك بكرة ان شاء الله
على ألف خير
و بالنيابة عن اهلها هقول
اسكندرية هتنور

ذات القلب الأكـثر إشــراقا
--------------------------


انا مش عارفة أرد فين
غير هنا
ومينفعش مكنتش أرد

ولو تعرفى تعليقك دا
عمل فيا إيه .... !!!؟؟؟
انا مكنتش مستينية تقولى مش جاية
وزعلانة انى مش هشوفك
بس اللى قولتيه ف باقى التعليق
خلانى وكأنى شفتك
وحضنتك ... خلاص

انا مش هعرف اقولك
بس اللى كتبتيه جانى ف وقت
محتاجة اعرف فيه انى ممكن اكون كدا
مؤثرة عن حــد
لو مقصدتش
أصلى لما بقصــد
ببوظ الدنيا شكلى ولاّ ايــه

انتى زى التشبيه
و أحــلى
ألف مرة

ربنا يوفقك ف مشوارك
و لو عرفتى تيجى ولو نص ساعة
يا ريت

لو صعب خلاص
كفاية تعليقك دا
أجمد بيه قلبى شوية كتير قدام
:)

بوسات وحضونات
بعدد موج بحركم يا غالية

سالخيييييييييييير عليكوا :)

يارب تكونوا كلكم بخير

يارب تكونى حلوة وبخير يا تيما :)

وحشتينى وكان نفسى اكون موجودة بس انتى عارفة

ربنا يتوب علينا من الاحكام الاسرية العرفية واقدر اجى فى يوم ما

عايزة اقولك بس ان رانيا ليس فقيرا من يحب

كان فرحها اول امبارح :)

فاعتقد انها مش هتقدر تيجى

بقت مودام لسه من يومين واعتقد هتبقى مشغولة فى الزيارات وكده :)

بس يا ستى قلت اما ابلغك الخبر الحلو ده ♥

يارب يكون يوم جميل وتكونواكلكمانبسطوا وانا هاكلمكم على الرقم ان شاء الله :)

إرسال تعليق