.

.

حـضـــن يـضــمــنــى  

Posted by: فاتيما in










هوه أنا صحيح 
مش فاكرة اول رسالة بعتهالك 
لا تاريخها ولاكنت كاتبة فيها ايه 
بس الأكيد انى فاكرة اول مرة 
انتا كتبتلى فيها 
و كمان محتفظة بالرسالة دى
لحد النهاردة على موبايلى





وفاكرة انك كنت فيها
 لمتنى لأنى فكرت أبعد عنك
و أهرب ... واحنا لسه بنبتدى الحكاية
 فاكرة كمان لما وصلتنى .. رسالتك 
 قلبى كان هيقف م الفرح
اتفاجئت بيها و بيك وبإصرارك عليا 
زى ما اتفاجئت بعد كدا 
بكل حاجة حصلت بينا جميلة كانت
 و لاّ مؤلمة 





عمرى ما فكرت ف شكلى
 و برستيجى و انا ببعتلك ف أى وقت 
مهمنيش كان الصبح و لاّ الفجر
 الضهر و لاّ الليل 
و لو انتا وسط الناس و لاّ لوحدك
رايق و لا مش طايقنى 
هترد و لاّ هتسبنى اكلم نفسى !!





قولتلك كتييير 
و ف ميت ألف رسالة .. كلمة بحبك

و وحشتنى و ناديتك يا حبيبى 
و كل مرة كنت بقولها 
كانت غير اللى قبلها 
و غير اللى جاية بعدها







معرفش ليه كنت بعمل كدا ؟!
بس جنانى معاك كان منتهى العقل 
و منتهى المتعة و البهجة
كنت حاسة انى عايشة معاك الدنيا بجد 
مش بتفرج عليها زى العادة






كنت فرحانة انى لقيت

 انسان اشاركه كل حاجة بحسها
كنت معاك على راحتى
 و حاسة ان مفيش غيرك
ممكن اكون معاه و كأنى مع نفسى
من غير ما انكسف و أتضايق و أخاف 






كنت لما الاقى ف نِفسى أى كلام
ببعته و مترددش 
و لو متعاد ومتكرر و قولته كتير 

ولو بشتكى منك ليك 
وأعاتبك وانتا ظالمنى 
مكنتش بحسب رد فعلك 
و لا استناك ترد
كنت بس مجرد عاوزة اقولك 
اللى متشالك ف قلبى ومش مهم بعدين 





كنت ببقى عاوزاك تشاركنى
 كل لحظة مميزة و لاّ حتى مش مهمة 
بتعدى عليا





كل رسالة بيننا .. ليها ذكرى عندى


دى بعتهالى قبل الثورة بيومين
واحنا بنبعد لأول مرة 


ودى بعتهالى ... يوم 25 يناير 
وانتا بتسألنى .. اللى بيحصل دا بجد ؟!؟



ودى اللى كتبتهالك من قلب الميدان
 ف أول يوم اروحه


ودى كتبتهالك مع أول هتاف ضد المشير

رّج السما ف التحرير
 و عيطتلك سلف م الفرحة






ودى يوم العباسية
 وانتا بتقولى خلى عينك ف وسط راسك 


و دى انكتبت
 ف احداث محمد محمود


و دى لما رجعت من جنازة الشيخ عماد
وقولتلى متزعليش





ودى  بعد مرة م المرات
 اللى افترقنا فيها
كنت بتقولى انى وحشتك ... قوى  


و دى بقى المرة الوحيدة 
اللى افتكرت فيها لوحدك .. تعيد عليا 
و كانت بالمناسبة مولد النبى :)






و دى اول مرة كتبتلى فيها بحبك 
ودى آخر مرة .. كتبتها





دى ف مرة م المرات
 اللى شوفتك فيها
و كنت بطلب منك تطمنى إنك روّحت



ودى لما حصل خسوف القمر 
دى ف آخر يوم ف رمضان اللى فات 


ودى لما رجعت م التحرير مخضوضة
  عشان كنت هنضرب 
وكنا متخاصمين قبلها 
و رديت انتا عليا بحنان ف لحظة ما بعتلك 
بـ ... مالك يا حبيبتى؟
 و لا كأننا زعلنا





ودى و انا بقولك 
للمرة الالف حقك عليا



ودى و انتا بترد للمرة الألف ان عمرك
 ما زعلت منى ابدا


و ... رسايل كتييير غيرهم و غيرهم
واقربهم لقلبى اللى كنت فيها بتتخلى
 عن قسوتك المصطنعة و المتعمدة

و تقولى بحنية و طيبة الدنيا 
سامحينى و أسف و متزعليش منى
لأنك لحظتها كنت بتبقى فيها نفسك 
مكشوف قصادى 
ومش عامل حاجز بينا ولا ساتر







رسايلك و انتا بتصبّح عليا 
او بترد علي صباحاتى 
و تبعتلى بوسة طايرة ف الهوا
والكام مرة اللى قولت فيهم بحبك

برسايل اكييييد هتحذفها الرقابة 
بس شرع الهوى و العشق بيها يسمح 
 :)








رسايل الفجر 
لما كنت بتوحشنى قووووى 


أو لما ساعات أصحيك للشغل 
او عشان تلحق تتسحر و تشربلك بق مية



كل كلمة كتبتهالى بصدق 
و سكنت قلبى و مخرجتش منه ابدا  





زمان اول ما عرفنا بعض 
انا فعلا كنت بستغرب منك  
لما كنت بلاقيك مش عاوز تمسح رسايلى
وتقول انك عاوز تحتفظ بكل حاجة 
كنت برد 
بـ ... امسحهم يا حبيبى 
و انا لسه تانى هبعتلك غيرهم
 و قدهم و اكتر منهم أضعاف .. أضعاف 
ف الأيام الجاية 
لأن حبى مش هيخلص
 وبالعكس هيزيد 







مكنتش اعرف 
اللى انتا عارفه و شايفه
و ان هييجى الوقت و ينقطع بينا الكلام
و لو كنت عرفت و شفت زيك ساعتها 
كنت احتفظت بكل رسايلك 
و لو مكتوبة
ومكنتش مسحت منها اللى اضطريت 
أمسحه غصب عنى عشان الاقى 
مطرح لرسايل جديدة






للأسف ... مكنتش اعرف
انه مش هيبقى فيه 
لا ... رسايل جاية 
ولا ... ايام جاية 






بس عارف ؟
انتا كل كلمة قولتهالى

وبعتهالى لسه متسجلة ف بالى و قلبى
وكأنها مبعوتالى حالا دلوقت 








و اللى خلاص مبقاش موجود 
لسه بفتكره دايما و ف كل وقت
و بفتكر معاه قد ايه كانت لهفتى عليك
 و فرحتى بيك و قد ايه كانت حكايتنا حلوة
واللى عشته معاك كان أجمل ايام مرت عليا






ولحسن الحظ
 انه ..  لسه عندى منك 
شوية رسايل ع الموبايل و متمسحتش

و كل ما افكر لثوانى ازعل منك 
او قلبى يوجعنى لما بفتقدك 
ومقدرش اكلمك زى الأول 
برجع افتح صندوق رسايلى و اقراهم 
و احس انك لسه هنا 
لسه بتحضنى بكلامك اللى عارفة 
و متاكدة انه كان طالع م القلب 
مكنش زيف أو فيه شبهة كدب 






جايز ... 
مبقاش ينفع ابعتلك و تبعتلى
و جايز .. بقى
او هيبقى فيه واحدة تانية 
هيكونلها وحدها الحق ف رسايلك دى 
و جايز .. لما ترجع تفتكرنى متعرفش تلاقينى 
و جايز .. فجأة الاقى منك رسالة جديدة 
و جايز كل حاجة بينا .. تحصل







و الأكيد انى كنت محتاجة أقول لنفسى
 و أقولك 
عن ازاى ان مجرد حاجة واحدة بس
حلوة منك لما كانت بتجينى 
كانت بتعمل إيه ؟!
و ازاى كانت الصبح لما توصلنى 
بتحلى كل يومى
 و ف قلب الليل بتدفى قلبى  





رسايلك بأختصاااااار 
 كانت
حضن وبيضمنى








و اللى مش جايز و ... الاكيد 
ان كل يوم ف الصبح والمسا 
هيوصلك منى سلام مستخبى
جايز مش بتستناه ولا هتشوفه 
 بس هيوصلك
و اللى هيجيبهولك لحد عندك 
 ملاك قلبه حنّين
و مش أقل حنية من قلبك 





ولإنه طيب .. 
و بيصِعِب عليه قلبى 
فنا واثقة انه هيتطوع بالمهمة دايما
ويؤديها بلا كلل ولا ملل

وكل مرة هتلاقيه رايحالك يخبط بشويش
 على بابك وشايلاك حبى على جناح 
ودعواتى ع الجناح التانى
و معاهم كلمة منى 
تتلخص فى أربع حروف 
مبيخلصوش مهما حصل ابدا


....  ب .... ح .... ب .... ك  ....



 --------------------
------------------------------


 

This entry was posted on الاثنين, أبريل 30, 2012 and is filed under . You can leave a response and follow any responses to this entry through the .

13 كــــلام بيطــبطـــب عـــلى قــــلبى و روحــــى

ممكن لو سمحتم
رجــــــاء حــــار

الناس الحلوة
اللى بتحبنى يا ريت

بتوع .. حرام
وبتوع .. ميصحش ع الملأ
وبتوع .. منظرك وحش
وبتوع .. تعالى وانا أريحك


الكل لو سمحتوا ...
المرة دى
يا ريـت يمتنعــون

ولو عاوزين يعلقوا
يا ريت
ميكتبوش كلام يضايقنى ..
ممــــكـن ؟؟

بوسات وحضونات وووردات بنفسجات بتضحك
يا بنتي ولا يهمك حطي صوابعك ف عين التخين وقوليله " مدونتي وانا حرة فيها " اكتب اللي انا عايزاه فيها
" قلبي وانا حرة فيه " اتعبه اريحه انا حرة
" اما منظرك وحش " فده منظري وانا حرة فيها انت مالك هو يخصك ف حاجة...؟
ميصحش ع الملاء" دي بقي خليها علي جنب عشان محدش يعمل نفسه نبي ويعمل فيها شريف وهو مش هقول جايز لا مؤكد لاني كتير من البشر بينصحوا وهما الاسوء بيعملوه
" اما حرام " فربنا اللي هيحاسبني مش البني ادم اللي زيه زيي " انت مش ربنا عشان تحاسبني ...ومش اي حد يجي يعاتبني .....العتاب م الاصحاب والمقربون ...ومش كلهم كمان ومش بأي طريقة
برغم اني سألت قبل كدة مش هقول عالم ازهري بس شخصية سوية وومتعلمة كويسة ومتدينة ومتوسطة ف كل شيء ....قالي اني مش هتحاسب علي تفكيري ف الشخص ده زي ما هتحاسب علي افعالي معاه
وجايز يكون هو غلطان وجايز اني غلطانة وجايز ده اللي عايزة انا ااعرفه وافهمه
بس ف الاخر محدش يعمل نفسه نبي ويجي يترسم عليا
كل واحد حر ف حياته وما دمتش مضرتكش يبقي مالكش حاجة عندي ويا سيدي متدخلش مدونتي وتقرا اللي فيها ومتتعبش نفسك ف التعليق
.
.
.
.
.
حلو كدة يا فاتيما
انا رديت عنك اهو

مش عارف انا من الناس الحلوة و لا الوحشة ؟
بس انا اصلا مش هاغير الكلام اللي كنت ناوي اكتبه و هاقوله زي ما هو و انتِ حرة بقى :)
جميل ان لسه في صندوق لما بنفتحه نحس اننا لسه عايشين لما نفتحه نلاقي الحاجات الجميلة اللي جوانا اللي مخبينها تحت الحزن يا بختك بصندوق رسايلك و بذكرياتك اللي بيها و منها تحسي بطعم الحياة الحلو
صدقيني يمكن تكون الايام دي صعبة بس عمر ما الحياة بتمشي على نمط واحد اكيد ربنا مخبيلك الخير
و كما يقول بتوع اتصالات ( الدنيا لسه فيها اكتر)
ابتسمي يا فاتيما انتي معاكي كنز اسمه رسايله و جواكي كنز اكبر هو قلبك الكبير انتي مش فقيرة و لا ضعيفة علشان اقولك يا حرام و ميصحش و الكلام ده
ربنا يكتبلك الخير و يفرج الهم و لازم تكتبي علشان تنفسي عن الحزن و الكبت

فاتيما
روح القلبالملائكية


عندما فكرت ان اكتب تجربتى فى الحب
فكرت كثيرا
وما الذى يجدى اعترافتى
و قبلى كتبوا الناس عن الحب كثيرا
صوروه فوق حيطان المغارات
وفى اوعية الفخار و الطين قديما
نقشوه فوق عاج الفيل فى الهند
و فوق الورق البردى فى مصر
و فوق الارز فى الصين
و اهدوه القرابين و اهدوه النذور
عندما قررت انانشر افكارى عن العشق
ترددت كثيرا
فانا لست بقسيس
ولا مارست تعليم التلاميذ
و لا اؤمن ان الورد
مضطرا ان يشرح للناس عبيرا
ما الذى اكتب
انها تجربتى وحدى
ولا تعنينى الا انا وحدى
انها السيف الذى يثقبنى وحدى
فازداد مع الموت حضورا

عندما سافرت فى بحرك
لم اكن انظر فى خارطة البحر
و لم احمل معى زورق مطاط
ولا طوق نجاة
بل تقدمت الى نارك كالبوذى
واخترت المصيرا
لذتى كانت ان اكتب بالطبشورا
عنوانى على الشمس
و ابنى فوقك الجسورا
نزار القبانى

و ابحث عن فيروز اجدها قالت

ليالى الشمال الحزينة ضلى اذكرينى اذكرينى
و بسأل على حبيبى ليالى الشمال الحزينة
اسأل عليا يا حبيبى ليالى الشمال الحزينة
http://youtu.be/Gyx51-w2W3k

و ابحث عن جاهين اجده مسك الختام

انا اللى بالامر المحال اغتوى
شفت القمر نطيت لفوق فى الهوا
طلته مطلتوش ايه انايهمنى و ليه؟
مادام بالنشوة قلبى ارتوى
و عجبى ؟؟؟

سلام يا ام جو

ربنا يفرحك دايما يافاطمة ويسعد قلبك يارب

فرحتينى بالبوست .. اول مرة احس ان فى حاجة مفرحاكى قوى كده

حسيتك فى البوست قوى

ربنا يكرمك وتفرحى دايما

لا أعلم كثيرا عن الموضوع لأدلى بدلوى لكن أحب أقول من واقع الحياة الجميلة أن كل شيئ يكون صعب فى لحظة حدوثه ثم ينقلب إلى ذكرى عندما تمر علينا إما نتذكرها ببسمة أو دمعة و فى كل لا نمسح أبدا هذه الذكريات

مش عارفة اقولك ايه على روعة الاحساس اللي وصلني وكلماتك اللي خطفتني من دنيتي
تدوينة تحفة واحساسها رائع وأثرت فيا اوي تحياتي ليكي

فاتيما الحلوة الهادية المجروحة حباً..اكتبي كل اللي عايزة تكتبيه واللي قلبه صافي زي قلبك أو اللي حس مرة بالحب النقي حا يفهم معنى كلامك واحاسيسك ..وارجوكي ابقي اسمعي اغنية صباح :حب الدنيا وحب الدنيا وسيب الدنيا تحب وان ماقدرتش ابعد عنها وسيبها للي يحب ..انشر يالطفي وذيع لكل الناس وقول لكل الناس احنا حبينا ..

:))) الكتابه و الحب بيحرروا الروح <3

هوه حد طايل " حضن" يضمه ويلمه
ههههههههههه

الله يجمعك باللي بتحبيه بأقرب وقت ويكتبلك الأفضل

الله يفرجها عليكي

قريت كل اللى فاتنى ووقفت قدام البوست ده كتير
وقدام اول تعليق اكتر
جوايا مشاعر كتير متلخبطه مش عارفه اوصفها
بس يمكن انغام تعرف تعبر عنها احسن منى
http://www.youtube.com/watch?v=7ooFlJ3-GG4

ولمااقول قلب دهب اسامة يتريق :)
ده قلب الماظ

إرسال تعليق