.

.

بجـــد ... مـن أنتــــم ؟؟؟؟!!!؟؟؟  

Posted by: فاتيما in











بقالى 4 سنين تقريبا 
متفاعلة مع عالم المدونات 
بس متفرجة فقط لسنة وشوية 
و مشاركة حديثا جدا ف دنيا ... تويتر
و الأشخاص المشتركين بين العالمين 
أو حتى الجداد عليا ... عندى تقريبا سواء
كلهم بقراله بعقلى
 وقلبى .. قبل عقلى 
عمرى ما حكمت على حد و صنفته
و قررت بعد التصنيفة دى انى 
ارفضه وارفض فكره ... وامسحه
حتى لما نختلف سوا ف أى موضوع 
اسمعه ويسمعنى .. وأرجع اقراله تانى 
و عادى ..مفيش مشكلة 
عشان كدا قايمة المدونات 
وقايمة الفلولينج عندى 
فيها كل الاطياف والتوجهات 
عشان بإختصار الناس دى عندى 
هيا مصر 






هما اهل بلدى .. بكل ما فيهم 
من اختلافات وتناقضات وقابلاها زى ما هيا 
مش لازم احبهم كلهم و بنفس القدر 
امجرد ان مزاجى الخاص بيتحمس لبعضهم 
لكن .. مزاجى العام بيستوعبهم كلهم 
ولازم يحترمهم وان قالوا كتيييير كلام فارغ




هذه المقدمة ضرورية 
عشان أشرح ليه كتبت البوست دا 



الاحداث الجارية ف العباسية 
فتحت جرح بنلملم فيه بقالنا شهور 
من بداية الإستفتاء ف مارس 2011 
وحتى اليوم
لما انقسمنا ف الميادين 
وكل واحد شاف مصلحته وتوجهه 
ومشى وراه بكل قوة 
ساعتها اتحولت البلد لمعسكرين 
و الثورة لفصيلين 
والطرف التالت بيسخن ما بينهم ويستفيد 
الطرف التالت 
اللى هوه صراحاااااااة
العسكر ونظام مبارك و من ورائهم 
وبيحركهم لمصالحه
وخد عندك .. بقى ومتقفش 
امريكا 
اسرائيل
 الخليج
و أى كلب معدى وله مصلحة يخربها 
ويجيب عميل يقعد على تلها 
ويستفيد منه ومننا



قوم احنا بدل ما نتلم .. 
نبسطهم و نتفرق 
وكل واحد يصر على مبادئه ومواقفه 
انا شخصيا انضميت لمعسكرى 
و دافعت عنه 
وعن مبادئى و فضلت كدا
وقررت الا اتزحزح خطوة .. لأى سبب 
والوقفة ف مكانى ارحم ..
من المضى ف خطوة غلط قدام 
دى قناعتى



لكنى ..
لم أنسى واتناسى ان فيه غيرى
عايشين ف هذا البلد 
تصرفاتهم ومعتقداتهم مش عجبانى 
و اللى هما بدون ذكر 
اسماء الاخوان والسلفيين 
ومش هما بس .. الاحزاب العرر 
زى وفد البدوى وناصرى عاشور وتجمع السعيد 
وغيرهم من احزاب وائتلافات وحركات جديدة
طلعت وطفحت علينا فجأة بعد الثورة 
و كلها .. ف الغالب مناظر مش قصة





كلهم متواجدين ع الساحة 
بأشكال و اوزان مختلفة 
شئت ام أبيت .. موجودين 
حتى لو وديت وشى الناحية التانية
موجودين 
حتى لو رفضت توجهاتهم ... موجودين 
بيساهموا ف سير السفينة





غلط او صح .. 
مش هيا دى المعضلة 
و لو الثورة اخدت القيادة منهم ... احيان
وفلت منها الزمام احيان زى الايام دى
و حتى لو الدفة معاها 
وهيا اللى بتحرك السفينة 
هيفضلوا على متنها الناس دول .. موجودين 



اللى عاوز يرميهم ف البحر لأنهم حمل زايد 
او خايف ف يوم يقلبوا عليه 
بصراحة  .. انا مستغرباه جدا
لأن هوه ممكن ف يوم يبقى مطرحهم 
بس اللى فارقه عنهم ..
 انه شايف نفسه 
أشطر واجدر الناس بقيادة السفينة دى
فليه يدى نفسه حق .. ويحرمهم منه ؟!!



طيب 
انا موافقة 
و اول واحدة تقف ورا الثوار والثورة 
وتقولهم القيادة ليكم وانتم الأحق 
لمصلحة الوطن ف نظرى .. 
مش لأنهم احق عميانى كدا وخلاص
بس لما يقرروا يرموا باقى الطاقم بقى 
 لأنه خيبان او مش عاجبهم .. 
او حلال فيه الدبح وسمك القرش ياكله 
المفروض اساعدهم او أصقفلهم واحييهم 
ولا اسميهم ايه ؟!!!





اسميهم قراصنة .. 
اسميهم وحوش آدمية 
 لا تقل بشاعة عن سابقها 
ولما نشيل طاغية عشان نحط طاغية 
نبقى عملنا ايه ؟
ولما اللى غار 
ليه عذره عشان واطى وعميل
انتوا .. عذركم ايه لهذه الفاشية ؟!!!




لأ بجد 
من انتم فعلا ..  ؟


امبارح على تويتر 
وبعد تواتر اخبار عن مقتل 10 ع الأقل 
ف احداث العباسية الدامية .... 
ابتدت حفلة السلخ على مجزر تويتر 
وتويتات راحة جاية مليئة بالتخوين 
والتحقير والتهوين والتشكيك
وناس تسأل .. ننزل ؟
 لأ متنزلوش .. دول ميستاهلوش
و وصلنا لدرجة ان اللى انقتلوا دول 
اغبياء .. هبل ويستاهلوا .. خليهم يتفلقوا




وكانت الطامة الكبرى 
 واللى جبت معاها آخرى لما قريت 
تويتة بتقول
ان مفيش أى شىء مقدس ... حتى الدم !!!!




واذا بى اكتشف 
وانا بقالى ف الثورة دى اكتر من سنة 
و بقالى ف هذه الدنيا 39 سنة 
اننا وصلنا لهذه الدرجة من اللانسانية 
بعد ثورة هى نعمة من ربنا 
ولا نقدرها 
وبدل ما تعلى بينا ..
بنوطّى بيها و بنفسنا 
وبشوية الرحمة الى جوانا 
وبتميزنا عن الحيوان 
واللى حتى الحيوان مبيوصلهش بعد الشبع 
والإنتهاء من الصيد والقنص 





فجأة 
نسينا العسكر و غدره 
والأمن ونظام مبارك وتربصه 
ونسينا كوادر الاخوان وتلاعبهم وانتهازيتهم 
ونسينا انطاع السلفيين و جرابيعهم
المتمثل ف افكار وتصرفات حازم وغيره
ونسينا ارجوازت السياسة ف كل الاحزاب 
والأفكار والتوجهات ولعبهم ف دماغ الناس
طول السنة اللى فاتت 
وجينا ع الغلابة والناس العادية الغير مسيسة
و اللى بينزلوا  الشوارع و الميادين بحماسة
ومصدقين حلمهم فتستأسد عليهم ..... ؟!!!






مصر اللى اتلموا عليها الضباع 
وقرر كل واحد يلحقله حتة ... 
عسكر ولا فلول
 ولا سياسين ولا تيارات متأسلمة 
ولاّ ولاّ ولا ّ .... كل دول 
اللى عارفين 
ومرتبين حالهم شىء 
و حطينا معاهم ...
الناس العادية الحالمة
سوا ف زكيبة واحدة 


دا اسميه ايه 
غير منتهى الظلم  ؟؟





انا مع الثورة 
بس مش مع الاشخاص 
و حتى الآن مجاش حد 
واقنعنى امشى وراه مغمضة 
ولن ياتى ف غالب الامر
والبرادعى احترمته و كنت متحمسه له 
لكن بعد سنة وزيادة بعتبره بطىء جدا 
و متأخر عنا والثورة محتاجة حد تانى غيره 
 حد يلحقها ويمشى على خطاها 
مش يجرجرها وراه





لكن غيرى فكره مختلف 
وتصرفه بالتالى ..مختلف 
كونه اختار شىء مش لازم اوافقه عليه 
لكن ... الحرية تجبرنى انى لازم أقبله 
لأنى اعلم جيدا ... انه مش عدوى 
و انه مش مغرض 
وانه نازل
 عشان نفس الهدف بس الطريقة مختلفة 





انا أعلم عدوى جيدا 




ولما الاخوة السلفيين نزلوا عشان حازم 
انا معجبنيش 
ومنزلتش ولا جمعة معاهم
لأنى ضد فكرهم هما وأى حد 
عاوز مكسبه الخاص دون الالتفات 
لمكسب الوطن كله ...
بس على فكرة 



انا كمان عملت كدا 
لمدة سنة بحالها من مارس اللى فات 
وانا بنزل الميدان و ف غير الميدان 
عشان مش عاجبنى سير الامور 



احنا دلوقتى غيرنا الكراسى والضفاف
وكل واحد قعد مكان التانى 
مش اكتر




احنا دلوقتى اللى بقينا كنبة .. 
ومش عاجبنا
وهما اللى بقوا بينزلوا يندبحوا 
ويقفوا ضد العسكر
عشان مصلحتهم ..آه 
بس شايفين دا ف صالح البلد 
احنا كمان كل مرة بننزل .. بنقول كدا 
كنا بندافع عن نزولنا ونقول لمصلحة البلد 
لأن دى قناعتنا



كل واحد عاجبه عقله 
لما ربنا وزع العقول 
 و طبعا عارفين باقى المثل 





تاااااااااااااانى 
انا عدوى واضح ومحدد 
اسيبه واضرب ف غيره ليه ؟!!!




اشمت كمان 
ف غيره ليه ؟





اللى مش عاجبه اعتصام السلفيين
من حقه ميروحش ولا يناصرهم 
بس لما ينضربوا ويندبحوا ...
 كون انسان 
واتضامن معاهم حتى 
وانتى قاعد ف بيتك
محدش طلب منك تنزل و تموت معاهم 
بس ع الاقل ..
 متحقرش من قيمتهم 
وقيمة تضحيتهم 




الشهيد مبيموتش بلاش 
الكلمة دى انكتبت كتيييير امبارح 
واستعجبتها .. وكأن اللى كاتبها 
دخل ف علم الله 
وعرف ان اللى مات ف العباسية
 خلاص متصنف اهبل 
ومات عشان قضية خسرانة 
وكأنه كمان 
شق قلب المقتول 
و عرف نيته كانت ايه ؟!!





اتقوا الله 
وارحموا نفسكم شوية 
متخلوش اعتقادكم ف انكم الحق 
وثقكتم ف عقولكم تخليكم تقتلوا انسانيتكم 
و حبة الرحمة 
اللى فاضلة جوا كل واحد فينا 
الدم اللى بيسيل .. له تمن 
وليس ضروريا انه يندفع مقابله حاليا 
والمعاد والآوان ف علم الله وحده 





ومعلش 
جملة انا مش هنزل أضحى ببلاش 
او اموت عشان شغب غبى .. الخ 
هوه حضرتك داخل ف صفقة وهات وخد
آه صحيح لما تكون تجارتك مع الله .. 
لكن مع الوطن والشعب  ... 



نعممممم ؟!!



التضحية 
كلمة معناها البذل 
دون التفكير ف رد 
واذا فاكر انك لازم تاخد صك الاول 
برد هذا الدين تبقى محتاج تفكر تانى
الشهيد لا يطلب مقابل 
ومكافأته عند ربه
اما احنا العايشين بعده ف الدنيا 
فمطلوب مننا نقتصله و نعاقب من قتله 
عشان العدل يقوم ويحل محل الظلم ...
اما لمقابل  .. ؟!!
فلا مقابل و هوه الروح فيه تمن ليها ؟؟





لو فكرتك 
عن التضحية انك تقبض 
وتختار وتنقى وتخليها ابيض واسود 
اسمحلى انتا عاوز بلد تفضيل 
واهل تفصيل


مفيش اوطان .. تفصيل 





محدش بيختار اهله 
ولا يقدر يتنصل منهم كمان 
ولو سابهم وتخلى عن مسئوليته تجاهم 
يبقى ميستاهلش يبقاله عزوة 
و وطن من اصله 
الاوطان دى مش شروة طماطم ..
تاخد الجامدة 
و تسيب المفعصة
 محدش بينقى بلده و لا اهله وناسه



مصر
كل التناقضات فيها 
اهلها فيهم المخلص وفيهم الخاين 
فيهم المضحى و فيهم الواطى 
فيهم الكريم وفيهم اللئيم 
فيهم اللى بيدى علطول وفيهم اللى بياخد 
فيهم الفاهم وفيهم اللى مخه على قده 
وفيهم اللى ممكن ييجى منه
 وفيهم الميئوس منه ...
والتغيير قادم وان أخد وقت وعمر 



عندك استعداد تقبل كل هذا ...
 اهلا بيك ع الأرض ...
معندكش استعداد و عاوز تنقى .. 
شوفلك بلد تانية بقى 
وخد جنسيتها 
عشان تتغنى بأهلها وبجمالهم وشياكتهم .. 
وسيبك من مصر 
المقرفة اللى عاوزة الحرق دى 
ومفيش فايدة فيها ولا رجا 



و زى ما هيا
 متستاهلش واحد زيك 
انتا كمان على فكرة متستاهلهاش 
ومتستهلش اهلك دول 
و اللى ملكش فيهم .. خير
 ولا هيبقالك ف اى حد على فكرة 
ما دمت بتفكر بالشكل دا







انا مستعجبة الصراحة 
 لأن فجأة 
وكأنك معزول وعايش ف جزيرة لوحدك 
و كأنك مش م البلد دى
عاوز مواطن واعى جدا 
شيك و مركز  و متفهم لطبيعة الثورة
و دقائق المرحلة ومش متشوش خالص 
وفاهم من غير ما حد يشرحله
او يفهمه !!!!



من انتا بجد ؟



طب انتا دورك ايه ؟
انتا بتعمل ايه ؟
انتا عاوز مقابل من غير تعب  ؟
عاوز البلد بكل عيوبها تنصلح فجأة ؟
عاوز غيرك يفهم اللى فهمته بسهولة ؟
عاوز وطن من الاذكياء عشان بتحتقر الغباء ؟
عاوز تعتبر الدم اللى سال دا 
مش مقدس
لمجرد ان صاحبه مختلف معاك 
ومفهمش اللى انتا لقطته من سنة ؟!!



دحنا وصلنا لأن اللى مش عاجبه
رأى التانى
بيبلكه عشان مش عاوز يشوف رأى يخالفه
ازاى تبقى ديكتاتور و تنادى للحرية
وازاى عاوز تفرض رأيك و افكارك 
يا اما تقصى الآخر من قدامك 
وازاى عاوز تصلح ف البلد 
وانتا واقف مطرحك
متحركتش خطوة واحدة ناحية الحل ؟!!



بالنسبة كمان بقى ... للأخوة النشطاء 
والهجوم عليهم 



شرحو 



اللى بيتقال عليهم نفس اللى اتقال
ع معتصمى العباسية
 ومن ف حكمهم 
يا جماعة معلش ...
هوه الناشط دا ايه ..... آله ؟!
ليه بُتفترض ان اللى بينزل  ف أى عركة
بينزل ورا الناشطين دول 
و مغمى عينه و مسلملهم دماغه
مين و ليه متصور ان حجمهم رهيب كدا ؟!!
ليه فاكري ان بإشارة من صباعهم 
الكل ينزل .. او الكل يقعد 
امتى هتفهم والكل يفهم 
ان محدش بقى بينزل أى ميدان او مكان 
الا مقتنع و شايف ان اللى بيعمله صح ؟!!



وامتى هتفهم و دى حقيقة 
ان كل مرة الواحد بينزل بيبقى حاطط 
احتمال 99% انه مش راجع تانى 
وموافق 
موااااااااافق 
مواااااااااااااااااااااااااااااافق  

والله العظيم موافق وراضى ومقتنع 
ومش مشيل ذنبه لحد 





الشهيد مش اهبل ولا بريالة 
بطلوا تسفهوا من غيركم 
لمجرد اختلافهم ف العقيدة والتوجه
بطلوا تحقروا من قيمة ما قدموه من تضحية 
لمجرد انها مجتش على هواكم ...





اللى ماتوا ف العباسية 
اختاروا نهايتهم 
ودفعوا غالى من عمرهم وحياتهم
الغالى دا ... مترخصوش انتا بكلام
من نوعية يستاهلوا .. 





ولو يستاهلوا فعلا 
فهم حصلوا على وعد الله ليهم 
وعملوا ما اقتنعوا بيه 
ودفعوا افدح تمن 
انتا دفعت ايه ؟
هولاء و كل من مات قبلهم 
واللى جاى بعدهم 
بيفتحولك سكة وطريق 
عشان تعدى انتا و تكمل اللى عملوه
وتاخد حقهم وتحقق حلمهم 
و تعيش العيشة اللى ملحقوش 
يعيشوها ويشوفوها ...



اختشى على دمك 
انتا و هيا و هو ... وكلنا
واحترموا غيركم 
و لو مكنش زيكم 
ما دام مش عدوكم وقاصد يأذيكم






 احترموا الموت 
و احترموا الشهادة 
و احترموا الدم
واحترموا الاختلاف 
واحترموا اللى بيتضامن مع الاختلاف 
 البلد دى بلدنا كلنا 
وهنفضل فصائل و شيع سياسية 
وهيفضل فيه صراع دائم على مين يحكم
واذا كنت من الفصيل
 الذى لا يملك الحكم
فتذكر انك ولحد وقت قريب كنت
 مالك زمام الثورة و هم كانوا المتفرجين ...
ارجع املك زمامك تانى ..
 و دا هوه الحل



انا ضد التيار المتأسلم بضفتيه 
اخوان وسلف وبقالى سنة بقول دا
وضد التيارات السياسية الحالية بأختلافها
وضد مجلس الشعب والشورى 
وكل مؤسسات انتجت تحت حكم العسكر ...
بما فيهم الرياسة وكل مرشحيها 
ضد أى شىء بيطّول السكة على ثورتى 
ويقلل من عزيمتها و بيضعفها 



بس لأنى عارفة 
انها مش بلدى لوحدى 
وناسها دول مش تفصيل وعلى مزاجى 
فنا مضطرة اتقبل كل الإختلاف
واخترت اسلم حل عندى حاليا 
ويرضى ضميرى وهوه ... انى اقاطع 
قاطعت مجلس الشعب وانتخاباته 
وهقاطع الرياسة 
وهقاطع أى شىء تحت مظلة العسكر
واشباه العسكر من عرايس ماريونت 





انما احقر من تضحيات الآخرين 
أو أفرض رأيى على غيرى ... ؟!!
استحالة هيحصل والا اقبل ينعمل فيا كدا 
وحتى يجمعنا هدف ...  هثبت مكانى



لكن تسّفه منهم 
لأنك مش عارف تغلبهم 
و تفرح ف دمهم لأنك مش عارف
 تكسبهم ف صفك 
وتحرض غيرك ميتضامنش معاهم
لأ ... بجد انتوا ناس عجيبة 
وغريبة .. وانا حقيقى مش فهمالكم 
ولا عارفالكم ..
صدقا حقا فعلا ... من أنتم ؟!!!





الاحياء يملكون فرصة التصحيح 
اغتنموها ولا تبددوها
اعرف عدوك الحقيقى 
و وجه اليه سهامك المسمومة 
فلا مستفيد سوى العسكر واللى وراهم 
الخريطة فعلا بتتغير واللى انتخب الاخوان
اكتشفهم سريعا وعرف انه خد مقلب 
ادوا فرصة للناس .. تتعلم م الغلط
وكله شوية بشوية بينكشف .. الصبر
وبلاش تعالى واستعلاء 
متغلطوش غلطة الآخرين 




ومن عالم الاحياء .. أقول 
المجـــد 
للشــــــهــداء
و عن الباقى من إنسانيتكم  
أسأل ... حقيقى 
و بجــد بجـــد .. مـن أنتــــــــم ؟؟؟!!


------------------------------------ 
-----------------------------------------------




This entry was posted on الخميس, مايو 03, 2012 and is filed under . You can leave a response and follow any responses to this entry through the .

23 كــــلام بيطــبطـــب عـــلى قــــلبى و روحــــى

شوفي يا ستي

بتقولي ( لم يأتي من يقنعني امشي وراه وأنا مغمضه)

حلو جدا

نجيب من الاخر

ومش هيجي

ليه؟

لانك واحنا معاكي مش هينفع نغمض تاني

واللي يغمض يستحمل اللي هيجراله

فعلاً ناس مقززة
حاجة تقرف
دا لا شماتة في الموت أبداً فما بالنا بالشهادة
حسبنا الله و نعم الوكيل

فاتيما
روح القلب الملائكية

صلى على النبى
اتعودت ان اتحاوزر مع جميع الاصناف
مادام لا يكفرتى كالبعض
يوم المذبحة قضيت اليوم كله معهم
و كتبت بوست عنوانه يوم مع المختلفين المخلصين
دول ناس مصرية بتحلم زينا حتى تمسكهم بحازم كان جزء من حلم هما مقتنعين به وشايفينه حلم جميل لمصر
هذا هم ما يشاهدونه
لاحظت تغير قليلا فى اسلوب التفكير مخلصين لمصر لاقصى حد حتى حبهم لابو اسماعيل هوجزء من حبهم لمصر
مختلف معهم نعم مختلف
ضد فكرهم نعم ضد فكرهم
ضد مغيبتهم نعم ضدها
لكن لن ينصلح حال البلد الا بالحوار
اتحاور مع الجميع
و لعل الدرس الذى تعلمته فى العباسية من سيدة بسيطة اسمها ام على
السيدة التى ظهرت مع ريم ماجد فى برنامجها
السيدة ضد فكر الاخوان والسلفيين
ومع ذلك تضامنت معهم فى العباسية من اجل حقهم فى الاعتصام
مش عايز اطول عليكى
لكن اللى عايز اقوله ان السياسة و الديمقراطية ليست موجودة فى الكتب لكى نتعلمها
السياسة و الديمقراطية ممارسة
لن نتعلمها ابدا ما لم نمارسها حتى لو اخذنا الدكتوراه فيها

سلام يا ام جو

انا تهت منك يا طمطومة
ومعلش التوهان ده من عندى انا علشان انا مستعجلة ولازم انزل


بصي يا طمطومة
انا مع كل الناس والاطياف وليا اصحاب من تيارات مختلفة من اول الكافر لحد المؤمن
اللى سلفي واللى من انصار ابو الفتوح واللى ناصري واللى وفدى واللي ابن كلب
كلهم اصحابي وعادى وقشطة وبيس يا مان
وانت حر مالم تضر وما لم تحكر على حقي الشخصي فى اني اعلن عن رايى وتحترمه حتى لو مش موافق عليه


لكن اللي يغيظنى ويطلع ميتينى
ان الاقى واحد ايام محمد محمود وايام المليونيات وايام الاعتصامات علطول بيتهم الناس انهم بيخربوا البلد ويشكك فى وطنيتهم ويتهمهم بانهم ممولين من الخارج وخونة و و و
ونظام وهى ايه اللى وداها التحرير وايه اللى ملبسها العباية على اللحم

والجيشس كان حبيبه

وكان يستنكر الناس اللى راحوا محمد محمود ويقول وايه اللى موديهم عند وزارة الداخلية
وهو منزلش ولا فى الثورة ولا فى كل حاجة تانية

ونزل بس لما حازم خرج من السباق
ودلوقتى بيقول انا بطالب بان العسكر يمشي
يا خى احا
وكنت فين مع اللى ماتوا فى محمد محمود
مادول كمان كانوا بيطالبوا ان العسكر يمشى

اشمعنى دلوقتى كلامك انتى اللى حلو

والناس اللي قبل منك كلامهم وحش وكخة وخونة وعايزين يخربوا البلد

ليه شايف انك لما نزلت بقى الوضع مختلف ويستحق النزول

وقبل كدة كنت مستنكر على الناس النزول


ما انا كمان ممكن اقولك وايه اللى موديك عند وزارة الدفاع

وايه اللى منزلك الاعتصام وبتجيب فلوس منين تصرف بيهم على نفسك وانت سايب الشغل
ما انا كمان اقدر اتهمك بالخيانة وانك ممول من الخارج



انا مع الناس اللى نازلة علشان خاطر قضيةوطن بغض النظر عن اتجاهاتها ايه

لكن اللى نازل علشان خاطر حد بعينه

ده مالهوش عندى غير وصف واحد

خول

اه خول
خول وابن كلب ومعرص كمان

بس خلاص

البوست طويل وعندى كلام وتعليق على كل كلمه فيه بس الوقت مش ساعفنى

الا ان مجمله بشكل يتعدى ال 90% واكتر متفق معاه تماما
بل بشكرك عليه من كل قلبى
وشكرى المره دى اهدي لكى ولكل من هم على رؤيتك امزجه بعطر الدم ( الذكى ) عطر الشهداء

اخيراً هقولك شئ مهم
عندك حق
الشهداء دول نازلين عايزين يموتوا وما عندهمشى مشكله فى ده ولا مستنين يحملوا حد التمن

اللى انا شفته بيقول كده

واقولك كمان : اه يا فاطمه

ما بيموتشى الا اللى هزم الموت ، ووافق انه يبقى شهيد .... انا شفت ده بنفسى بشكل قد لا يكون سنح لكثيرين لرؤيته

الحمد لله على العافيه

شكراً لكى

بغض النظر ان انا معترض على اعتصام العباسية و على اي اعتصام قدام اي وزارة سيادية و لي اسبابي الكتيرة اللي هي مش مجالها دلوقت بس الاعتصام السلمي حق مكفول للجميع سواء اعتصامات فئوية او طائفية او مذهبية او مصلحة عامة
من حق كل واحد يحس بالظلم يعبر عنه بحرية علشان كده كانت ثورتنا و علشان كده نجحت
للاسف يا فاتيما اللي بتقولي عنهم دول هم اول ناس كفروا بالثورة و مبادئها و للاسف بيرتدوا زي الثورجية و هم اصلا ديكتاتوريين
للاسف يا فاتيما احنا بنرجع لورا كتير جدا و مش بنخطي لقدام عارفة ليه؟
علشان التعصب
التعصب الاعمى اللي يخليك تكره الطرف التاني لدرجة تتمنى موته و انك تفضل تحقر من شأنه و دمه
التعصب لفكرة معينة بحيث تخليك مش قادر تسمع غيرك و لا قادر حتى تشوفه
و التعصب ده للاسف مش في طائفة واحدة ده في كل الطوائف و الفئات
الثورة جمعتنا و الاستفتاء فرقنا و الانتخابات شتتنا و المجلس العسكري خلانا ندبح بعض
و حسبي الله و نعم الوكيل

كان فى تعليق كتبته فى مناقشة كانت فى نفس توقيت نشر البوست امبارح
وهو


التوحيد يبدأ من إداك الآخر وحدودك معه
لا ان نسقط عليه قواعدنا ومن يخالفها فليس منا
الثورة هى التوحد مع قمة الإختلاف
ولنا فى أجدادنا أسوة
فلو نظر من البر ومن الفاجر ومن المحسن ومن المسئ ومن ومن ومن ومن
ما عبروا القناة ولا صمدوا فى وجد العدوان
ولا أخذوا حقوقهم وقفوا فى وجه الظلم
التخوين فعل قبل أن يكون لفظ
الثورة فعل شعب ليس طائفة
ولا يوجد شعب يمكن أن يكون بأكمله عينة واحدة
أو تنطبق عليه قواعد واحدة ومن يختزل الشعوب فهو ليس مدركا لها ولأبعادها


***********
الناس اللى فاكرة إن الثورة بتتحقق مباشر بودن تضحيات وفترات توتر
وفترات فرقة
وفترات اخختلاف
وفترات
وفترات

أيام فرح وأيام أمل وأيام ألم وأيم سكون وأيام وأيام وأيام

الثوة خرق للأعرااف والعهود والمواثيق الجامدة للمجتمع
فى ناس بتقبللها بسهولة وتتعامل مع الوضع الجديد بسلاسة وتتفاعل معاه

الثوة زى ما قلت قبل كده كتير

شط بحر
والناس موج
فى ناس بتوصل فى أول موجة
واناس فى الموجة التانية
وناس فى الموجة الألف

لا اللى فى الأول وطنى زيادة ولا اللى فى الآخر خاين
بس هى كده
ربنا خلقنا متساويين الحقوق
مختلفين فى التصرفات
وكل واحد وله حساباته وعقليته
ولازم كلنا نحترم ونتعامل ونحب الإختلاف ده

لإنه سمة من سمات الشعوب المتحضرة
وإحنا شعب متحضر مما جار عليه الزمن وظهرت ثقافات غريبة عننا

المشكلة إن أكتر ناس واقفة بتشجب وبتستنكر هم اللى فاكرين نفسهم مثقفين
بينما الناس البيسطة بتتحرك بتلقائية جدا ناحية الصح وبينزلوا يحموا اخواتهم ويدافعوا ويموتوا علشانهم

حتى لو مختلفين معاهم
وما حدش يقولى الشعب مغيب ومش فاهم وعبيط ومش معانا

عايز حد يقول الناس اللى نزلت بمئات الألوف قدام عينينا
ووقفت قدام الشرطة لحد ما ماتت
واتعورت
وصمدت لحد ما هزمت الشرطة ججت منين ؟؟؟؟؟
اللى هيقول مثقفين نازليين يطالبوا بحقول هأقول كداب
اللى هيقول الشعب زهف ونازل يعبر عن رأية واتخنق من الكبت برضه كداب

وأكبر دليل على كده ومن قلب الميدان إننا كنا هناك
وتانى يوم وبعد الضرب يوم 29 كان الميدان شبه فاضى
لو الناس نازلة علشان مطالب كانت فضلت فى الشارع

وفضلوا فى البيوت لحد ما معركة الجمل جت
ونزلوا لما سمعوا الناس بتنضرب من تانى

حد يقولى دا معناه إيه ؟؟؟؟؟؟؟؟

الناس اللى قبل صلاة الجمعة كانت بتشتمنا وتقول يا خاربين البلد اقعدوا

أولل ما لقونا بننضرب نزلوا يدافعوا عننا وماتوا وهم بيدافعوا عننا
تفتكروا ليه ؟؟؟؟؟؟

إيه قمة التحضر غير إنك تموت علشان تدى لغيرك مساحة للرأى يعبر فيها وإت مختلف معاه يا معشر المثقفين


انتبهوا معشر المثقفين واتعلموا لغة الشعوب علشان تكونوا مع بعض
الثورة فعل شعوب يقودها المتعلمين
وليست فعل متعلمين يستحقوا الشعوب ويستحقروا بعض ويستحقروا أعدائهم

مصرى جدا
--------

صح يا هانى
الناس بمرور الوقت بتنضج
واللى متعلموش بصيرته
تعمله الأيام .. والدم

مهندس مصرى
----------
للأسف يا محمد
الثورات بتموت القلوب احيانا
بدل ما تصحيها ..
:(

ربنا يرحمهم
ويجازيهم على قدر ما جاهدوا اليه

ابراهيم رزق
-----------

عليه الصلاوة والسلام

مش عارفة اعلق على تعليقك بإيه يا ابراهيم
انتا قولت كل حاجة

نختلف .. آه نختلف
ولكن ...
وحط تحت لكن دى الف خط
لا حد يفرض عليا اختيارى
ولا انا اشمت ف خسايره

تحياتى لكل من عندك

بت خيخة واى كلام
---------------


معلش ع التوهان يا خوخة
انا عارفة ان البوست طويل
وحاولت احذف منه حاجات معرفتش

هوه كان فضفضة .. مش اكتر

انا متفقة معاكى ف كل ما قولتيه
هم انطاع وقت ما كان الحق باين وطالبن نصرتهم لينا
وهم جبناء وقت فتح الصدور للوقف قصاد رصاص العسكر والزود عن الكرامة
وهم متعصبين ورأيهم الصح ولا شىء غيره والا نبقى كفرة ومنعرفش ربنا ..
وهما فيهم كل العبررررررررررر
والآفات والندالات ..الخ الخ الخ

لكن

اللى بيموت فيهم
لا يستحق سوى احترامى
و قصاد ما بذله (اى كان هيبذله عشان مين وليه)لازم اقف احتراما ..

احنا ف محمد محمود كنا زيهم دلوقتى قصاد وزارة الدفاع

احنا دلوقتى مكانهم وبنقول راحوا ليه
ويرجعوا بيتهم
وكفاية
وخربوا الدنيا ..

احنا مكانهم دلوقتى على فكرة

بس اانا مش هبقى زيهم
مش هحقر منهم ولا من شأنهم
طلباتهم مش موافقة عليها
لكن احترم حريتهم
اختياراتهم غلط وحازم نطع
لكنى لن املى عليهم ما يغتقدونه

كل المطلوب منى
اكون قد المبادىء اللى بأروج لها
الحرية ..
لازم احترم دا ولو خالفونى ف الرأى والتصرفات ...
ولو عشان كلب ولا يسوى
الاضراب عن العمل حق
اؤيده ولو اللى علملوه على حق او باطل ولا أرضى ان يروح حد يفض اعتصامهم بالقوة ويقتل حد ...

لازم دى تبقى القاعدة
ولا نحيد عنها

عشان اللى نقبله عليهم النهاردة
هيحصل فينا بكرة

وكونه حصل زمان
وهما سكتوا ..دا اختياراهم
وعارهم هما

انا عاوزة افضل انسانة
وراسى مرفوعة


على فكرة
انا عندى قناعة
انه بعد الدنيا ما تهدى ونيجى ننزل تانى لأى سبب قادم ...
هما هيحسبوها برضو ويتخلوا عندنا ..
وارد جدااااااااا

ومع ذلك
لا يعننينى ذلك ولا تفرق معايا

المبدأ هو الفارق
وعشان كدا شايفنى كسبانة


تضامنى عشان اللى تشوفيه صح يا خوخة
مش عشان الأشخاص


بس

:)

ويكا
----

العفو
انتا عارف اكيد انى مختلفة معاك بنسبة اكبر من ال 90% دى ف كل حاجة تقرييا برضو ...

بس انا قولت ما يمليه عليا ضميرى
الموت مفيهوش فصال

وربنا يكتبهالنا جميعا

مصطفى سيف الدين
----------------

انتا قولت مربط الفرس يا مصطفى

مش مجالها دلوقت

والتعصب الأعمى دا مش هنسيبه يطالنا كلنا ..
ويسوّد علينا عيشتنا


نهاية الظالم قربت ان شاء الله

مصطفى سيف الدين
----------------

انتا قولت مربط الفرس يا مصطفى

مش مجالها دلوقت

والتعصب الأعمى دا مش هنسيبه يطالنا كلنا ..
ويسوّد علينا عيشتنا


نهاية الظالم قربت ان شاء الله

الازهرى
-------

ايه يا زيزو دا ؟ّ!!

التعليق كله حلو وكل ما اقول هاخد فقرة احطها ..الاقى اللى بعدها أحلى ..

انتا تحط الكلام دا ف بوست
او ف الفيس ...كاملا دا
لأنه بجد صح وتمام ..

من اورع الاشياء ف هذه الثورة
غير انها كاشفة .. وملهمة

انها بتعلمنا
بتضنفنا من جوا
وتخلينا احسن
ازعم ذلك


وبخصوص التعليق اللى مش للنشر
الحاجة ..ثم الحاجة ..ثم الحاجة
ثم ابيك

واذا كنت ومالك لأبيك ..؟!!
يبقى تضرب نفسك وفلوسك ف 3 اضعاف بقى وتدفع وانتا سااااااااكت
ماشى ؟

وش مطلع لسانه

:))

أختي فاتيما ..
برغم أنني أخالفك لرأي ..
وبرغم أني لست من مصر ..
لكنني لا أستطيع إلا أن أقف لك احتراماً لحبك لمصر ..
وتقديراً لمشاعرك الطيبة ..
دمت بألف خير ..
محمد الذهبي .. سوريا - دمشق

اااااااااااااااااااااااااااه ياناس نسينا الانسانيه هيا فين انسانيتنا لو عندنا االاحساس دا اكيد مش هنقول دول ايه ولا دول مين ولا نزلوا ليه مش عارف ليه المره دى عندى غير كل مره يعنى فى مجس الوزراء ومحمد محمود وماسبيرو اتعودنا الناس تخون وتقول دول بلطجيه دول مش عارف ايه المره دى اللى بيقول كدا بتبقى قاسيه عليا اوى وعلى قلبى انا اتوجعت بجد من كل واحد قال الكلام دا المره دى ومش هسالهم من انتم انا مش عايز اعرفهم ومقولتك مفيش اوطان تفصيل ياما قولناها واننا ندافع عن خروج الفكره حتى لو كنا ضدها وان اللى نزل الشارع دا وضحى بنفسه ومش ضامن رجوعه دا اكيد احنا اللى مش زيه مش هو اللى مش زينا احنا اللى مش زيه مش هو اللى مش زينا
المره دى قاسيه عليا بجد ومش عارف ليه وكلامك كله جه على الجرح زى ما بيقولوا
المجد للشهداء المجد للدم اللى مطرطش فى الشوارع

ويارب تكونى بخير :)

ظلالى البيضاء
-------------

الف شكر ليك يا محمد
ووشنا ف الأرض منكو يا اهالينا ف سوريا
ويا أقرب شعب عرفته شبهنا وكأنه حتة مننا ...

ربنا يفك الكرب عندكم وعندنا
ان شاء الله

MaNoO
------

احنا اللى مش زيه مش هو اللى مش زينا

الجملة دى تلخص البوست كله يا مانو
احسنت والله ينور عليك

هوه دا اللى عاوزة اقوله
محدش يقيم حد
ويحوله لمتهم طالما مكنش ماشى على منهجه وهواه لأنى لو قبلت دا ابقى معرضة لنفس القولبة دى قدام ..وانا اصلا عانيت منها زمان
مش عاوزة اكون كدا
وهوه مخطط لتفتيتنا جميعا ويعمل بنجاح للأسف ...

ارجع واقول وراك
المجد للشهداء
هما بس الى الحق عندهم كان واضح
والعار لمن يقلل من شأنهم

وربنا يلحقنا بيهم

انا كويسة

الحمدلله بخير

ربنا يطمنا عليكم كلكم
انا اسفة انى مقصرة مع الكل .. بس معلش

نفس النسبه تقريبا اذا ما استثنينا هذا البوست

الا ان هذا لم يمنعنى على الحق حق

ويكا
----

منا عارفة
القلوب عند بعضيها
D:

إرسال تعليق