.

.

هـــذا موقــفـى .....  

Posted by: فاتيما in







و لإن ما بين المثالى 
و المناسب هناك فــرق
لأن صباحى مرشحى المثالى 
لكن مش هوه ... المرشح المناسب 
اللى ينفع مع النظام الحالى و مع العسكر 
و مع اللى معاهم .. واللى وراهم


و صحيح طيب 
و متوزان و ثابت ع المواقف
و أثق انه مصدق انه هيحقق مطالب الثورة 
و متخيل انه يقـدر يواجــه طغيانهم 
دا إذا سابوه ينجح اصلااااا
لهذا .. أتمناه رئيسا 
 لنقائه .. 
و لإنى زى عمر طاهر مصدقاه فعلا 


...........
........................
لكن
.......................
.................................. 


 ما زلت أراهــا كاملة الاوصاف 
و التى تحمل كل المقومات الممكنة
 للتعامل مع هولاء الغجــر 
اللى مش هيمشوا 
لا بإنتخابات نزيهة 
و لا بشياكة و ذوق كدا  


وما زلت لا أرى أصلح منها
 لهذه المرحلة  
ولا احسن منها لمواجهة 
هولاء الغربان اللى حّطوا علينا
و صحيح 
ليست اختيارى المثالي
لكنها مرشحى المناسب ... جدا
و حتى يمسك الشعب بزمام الامر
و يرحل العسكر فعلا ... و ليس شكلا
لن يذهب صوتى لغيرها 
لـ ....  هياتم 


---------------------------------
---------------------------------------------

This entry was posted on الخميس, مايو 17, 2012 and is filed under . You can leave a response and follow any responses to this entry through the .

29 كــــلام بيطــبطـــب عـــلى قــــلبى و روحــــى

مقاطعة
وما زلت على موقفى

لكن الراجل دا فعلا
أحسن الوحشين
وف عالم موازى
مفيهوش عسكر بارك على انفاس البلد
كنت رحت انتخبته بقلب مطمن
ونفس راضية


لكنى الآن
لن أعطى صوتى لملاك بجناحين
نازل م السما ...
ف انتخابات تتم تحت سلطة الكاكى
ودا السبب الأول
والأخـــير

العسكر لن يبارك انتخابات
ويشجع عليها
وهوه يعلم انه هيتحاسب
لو جابتله واحد مع الثورة
ويقعد يحاسبهم ع اللى فات

الا لو كانت متربتة
تروح لحبيبهم .. واختيارهم
ويسيبوا الشعب يشارك ف مسرحية
ويصدق انها كانت انتخابات عادلة
ونزيهة .. وكله تمام


هذا موقفى

وارجو
كما احترم اختيار كل حد فيكم
تحترموا اختيار المقاطعين امثالى ...

وهاتلى يا بكـــرة
ثــــــورة جـديــدة


:))

مع كامل احترامي
الا انني مع مصر القوية (ابوالفتوح)
تحياتي

فاتيما
روح القلب الملائكية


بجد انا مش هقدر اقاطع لمجرد المحاولة
انا بحب حمدين جدا جدا جدا
و عايزة تعرفى الوجه الحقيقى لحمدين اسالى عليه ساليناز و زياد
رغم اقتناعى باو الفتوح الا انه يبقى شيئا غامضا
على بركة الله ننتخب حمدين صباحى

فى كل حى ولد عترة
سلمى الصباحى
http://youtu.be/aPyons0KNB4

على فكرة ساليناز بترقص على المسرح فى الاغنية دى بس جدعة لو طلعتيها
ههههههههههههههههه

سلام يا ام جو

Mohamed Amer
------------

وانا كمان يا محمد
كامل احترامى ليك برضو

بس حتى لو ابو الفتوح كسب
لن يكون رئيس مصر القوى
الذى نتمناه

الرجل يكون مناسب
ف المكان المناسب
ف الظرف المناسب


وهوه اول اتنين يمكن
هوه وصباحى من وجهة نظرى

لكن
الظرف هوه اللى مش مناسب
والعنصر الناقص مش هيتم المزيج
ويدينا النتيجة المرجوة ...

وربنا يخلف ظنى يا سيدى
حد يكره
مصر بلا طغاة
بأقل خساير ممكنة ؟!!!!

دحنا نبقى ف مولد النبى
كل يوم يا جدع

:)))


نورتنى

ابراهيم رزق
-----------

عارفة يا ابراهيم
هوهو راجل كويس
احسنهم ع الأقل


بس بكب نقائه دا وطيبته
لكن شيفاه طرى شوية
مينفعش مع العسكر
دا راجل بتاع بناء دولة واحلام
و مثاليات وشياكة ...

احنا عاوزين واحد يصحح الاخطاء الأول ويقف ضد الغولة اللى بتطلع ف الروح دى وعاوزة اللى يجهز عليها
والغجهاز مش هييجى بالإنتخابات فى رأيى المتواضع ...

ولهذا لن انتخب
وهحتفظ بصوتى لنفسى

لكن هشارك بشكل تانى
والشكل اللى فوق دا
هطبعه واشيله واعلقه عندى
ف الشغل والشنطة بتاعتى ...
واروح بيه كل حتة ...
طول الايام الجاية
عشان اشجع غيرى الى ناوى يشارك
وبدخل ف نقاشات هنا ف الشغل
مع زملائى
واتنين منهم لما سالونى
وقولتلهم مقاطعة بس اوصيكم بحمدين
انبسطوا جدااا لأن دا كان رأيهم
وكانوا عاوزين حد يأيدهم خصوصا وان اختك رمز الثورة ف المركز بتاعنا وبقوا بيسمعوا كلامى مؤخرا
:))

يعنى انا شغالة ف الحملة بتاعته برضو
بس زى ما تقول كدا
تأييد سلبى .. مش ايجابى


احتفاظى بصوتى
مش لأنى مستخسراه فيه
ولا فى غيره

انا مستخسراه ف العسكر
دى الفكرة
مش اكتر


وطبعا مطلعتش جدعة
ومعرفتش طبعا اشوف سالى
:)


والله يسلمك يا ابو العيال

بعد بحث وتمحيص وتفحيص لكل المرشحين ولاني مش حقاطع الانتخابات خصوصا مع وجود قوي سياسية لو طالت تخرج الرضع المنتمين ليها تنتخب حتعملها


صوتي لحمدين صباحي

أأأأاه يا فاتيما تصدقى بأية


بالله طبعاً

نفس الكلام اللىقلته لعمى انبارح و انا شايفه بيتكلم

و قلت كدة لأبن خالى مؤيد للصباحى تأيد جامد

و انا لو عرفت أدى صوتى بأذن الله هيكون للصباحى

عارفه و لمس قلب كل الحالمين اللى مش عاوزين الواقع المرير اللى احنا فيه

انا يمكن عاوز اقول احساسى بكلامه أنبارح

بس انا عارف هاخد تريقه للصبح من المٌعلقيين

(:

انا مصدقة الراجل ده جدااااااااا... بس لو كل واحد مصدقه وقاطع لانتخابات يبقى مش مصدقينه ... هو محتاج عشان يكسب لكل صوت مصدقه

لـــولا

رئيس جمهورية نفسى
----------------


طيب
نبقى متفقين ع الشخص
بس مختلفين ع الوسيلة
والتوقيت
:)))

عموما
انا مالى يا عم
هوه انا اللى لو شاركت
هيجيبوا ريس بدالى ويقلشونى ؟!!!

:)))

مبسوطة بالنشاط والعودة
لعلها دائمة ان شاء الله

سلامى لكل اللى عندك

Ramy
----

انا كمان يا رامى
هوه عاجبنى وسطهم كلهم من بدرى
بس للأسف ...
الحلو ميكملشى


والظروف الحالية
عاوزة واحد مفترى وصايع
ومستبيييييع ....
ومفيش الا هياتم بصراحة
اللى تربيهم الكلاب دول ...


يلا

الإنتخابات الجاية بقى
وعلينا خير

:)

وما عاش اللى يتريق عليك
ف مدونتى وانا على قيد الحياة
دنا على رأى البت دودو ...
لأشرحنه يا بنى والمطاوى تطلع
انتا بتتكلم ازاى
سلمية سلمية حضرتك ...وكدا


:)

لولا وزهراء
----------


هوه اصدقهم فعلا يا لولا
بس جاى ف اوان غير اوانه
وعامل زى البرادعى كدا مع فارق العمر
والتجربة ...


الجوز دول عاوزين مصر تبقى راييييقة
والارض ممهدة ومستعدة للزرع
ثم الحصاد

انما احنا لسه عاوزن نطلع التعابين منها وننضفها من التلوث والواغش
عشان نعرف نهيأها للزراعة ...


والكلام دا
مش هينفع
التعابين مش هتسيبك تخرجها من جحورها
وتقتل عيالها بشويش كدا
وحنية
وييجوا لحد سكينتك
ويقولوك .. اتفضل
دى الفكرة والهدف من المقاطعة

الانتخابات دى مسرحية
ولن اشارك فيها
طواعية ابدا


لكن اتمنى اللى هيشارك
ميندمش بعدين

:)

لا يعنيني الأشخاص مطلقا

لكن بنسبة 51% حمدين والباقي خالد علي

وأعترض على المقاطعه

الاعتراض هيكون في شكل تاني خالص لو الجيش مرر شفيق

السلام عليكم
ازيك يا ام يوسف اخبارك ايه؟
انا طبعا باحترم رايك جدا و منكرش فكرت فعلا في المقاطعة بس لقيت نفسي لو قاطعت بازود فرص شفشق و موسى
لو كان ايمن نور موجود او البرادعي يمكن مكنتش احتار بس حاليا انا بقارن بين خالد علي و ابو الفتوح مع احترامي لحمدين
فالخلفية الناصرية لديه و تمسكه بها ما يبعدني عنه فالنظام الناصري هو اللي اسس ديكتاتورية تم توارثها رئيس وراء رئيس
انا عايز انتخب واحد مش بينتمي لحزب او كتلة تحت ايده علشان ميبقاش اللي حواليه منتمين له سياسيا بعدين نلاقي ناس هتيفة و طبالين مثلا ابو الفتوح حاليا حتى لو مرجعيته اخوانية فهم تبرءوا منه و تبرأ منهم
فعلا تقدري تقولي بلال فضل طبال بس امتى مكنش بلال فضل كده ده مفيش حاجة مضايقاني غير ان بلال فضل و عبد المنعم الشحات هيصوتوا لابوالفتوح
حتى الاحزاب اللي بتدعمه غير مؤمنة بيه كفكر لكن توافقت عليه للفكر الوسطي
اما خالد علي بصراحة هو الافضل لكن المشكلة في عدد الاصوات اللي ممكن يحصلها و احنا محتاجين نتفق و نتوافق على واحد او اتنين
علشان كده ان شاء الله قررت اصوت لابو الفتوح بس ميمنعش ان ممكن اغير رايي و اصوت لخالد علي

بالرغم انى بكره ميوله الناصريه لكن ساعات بميل ليه
بس بعتب عليكى انك هترشحى هياتم
بقى كده تنتخبى فلول
هياتم فلول رقصت فى عهد نظام مبارك شفولنا كده رقاصه ثوريه

طبعا أنا موقفى من هياتم واضح وملعب قصدى ومعلن .. أنها ست الستات
..
بس وبرغم احترامى لصباحى بس انا عندى من اى توجه ناصرى .. مهو ناصر هو اول عمدة فى عزبة الحرامية وهو اول من هدم الحياة السياسية فى مصر وحمدين مخلص لكن فكره لايناسبنى

شخصيا لازلت أرى فى ابو الفتوح أفضل اختيار .. مع كل تقديرى لموقفك

مصرى جدا
--------

ازيك يا هانى
:)

للأسف يا عزيزى
الاختيارات ف هذه المرة ...
ع الأشخاص


بص

انا بتكلم عن قطاع الثوار والنخبة والطبقة الوسطى والناس اللى انا اعرفهم وهيقروا البوست دا ...
او بيعرفونى وبقابلهم ف حياتى ..

احنا عدينا الفرز الاول تقريبا
بتاع فلول ولا مع الثورة

فخلاص استبعدنا شفيق وموسى واللى زيهم

تبقى الفرز الأتالى ...

ولو بصيتله
هتلاقيه منصب ع الأشخاص
مش الأفكار

يعنى ابو الفتوح مقدرش اقول
انه مش مع الثورة
ومعنديش جزم نهائى انه اخوان ..
وخالد على مع الثورة ... لكن طريقة نزوله الترشيح ف حد ذاتها بتدينى اشارة انه بيفكر غلط .. مش صح

يتبقى حمدين ...
الأقرب لمزاجى العام ...
مع اختلافى معاه ف بعض الأراء ..

لكن لو بصيتلها
هتلاقينا بنختار الشخوص
ومدى ارتياحنا ليهم

الأرتياح هنا
مش معناها نفسياً بس
ولا عاطفيا ...
ولكن
ارتياح ناجم عن ثقة ف ان هذا الشخص لن يخيب ظنك ..
فيما تنتظره منه


والجيش مش هيمرر شفيق
الا اذا كانوا وصلوا لمراحل العته النهائى بجد وربنا بيحبنا :)

اظن شفيق كما قال
احد ظرفاء تويتر ..
شفيق سفنجة
تمتص الهجوم والغضب .. لتمرير موسى
واكسابه قبول عام وارتياح ...


وف كل الاحوال
لن اشارك
لكن قولت موقفى .. ورأيى

:))

صباح الورد

مصطفى سيف الدين
---------------


يا لهوى يا مصطفى .. ايمن نوررررر !!!!
طاه الحمدلله انه مش موجود يا جدع ...
ايمن نور أراجواز
و بيجرى على أى مطرح جوا الكادر
ويكفى بس آخر موقف
لما الحزب بتاعه مؤيد لموسى
و بدل ما يطلع زى الرجالة ويقول انا بقدم استقالتى ..عشان ارفض انبقى محسوب على حزب بيؤيد فلول ...
عادى طلع يقول الجزب اختار .. وانا مالى يامه .. بذمكت دا كلام ؟!!!


البرادعى كان هيحل المشكل
بتاع تجميع الأصوات ...فعلا
بس مكنش هيحل المشكلة الأاهم
وهيا التخلص من قبضة العسكر
اللى مش هتحصل بإنتخابات .. وعملية ديموقراطية لوحدهم ...


على كل حال
اتمنى الا تحبطوا ..
مقاطعتى لانتخابات مجلس الشعب
خلتنى مرتاحة ومش محبطة
ومبسوطة باختيار الإحجام ..عن التصويت
على عكس كثيرين
حتى من صوت للتيارات المدنية

المكشلة مش ف ان مفيش ناس كويسة
المشكلة ف النظام اللى هيدى فرصة للناس دى تشتغل ...


اتمنى ان اظل على قناعتى دى
ومندمش عليها
واعتقد ان شاء الله
انى لن أندم برضو
زى ما مندمتش على ما سبق

:)

بالتوفيق للكل .. ان شاء الله

عمرو يسرى
---------


مالها هياتم بقىىىىىى يا عمرو ؟؟
اغلطوا ف الست الكومل ..

مين قالك انها مش ... ثورية ؟!!!

فعل الرقص ف حد ذاته
ثورة يا بنى
:))))

نور الدين
---------


عارفة يا نور
هياتم دى اختيار الثوار الحكيكييين يا عزيزى .. هما العسكر ينفع معاهم غيرها ؟!!!


اسمحلى اختلف معاك شوية
فيما يخص الناصرية و الناصريين

حمدين تحديدا
واعتقد الغالبية من جيله
وما بعده ..
ناصريتهم شبه خالية من أسوأ عيوب عبدالناصر ...
وهو عيب العسكرية .

عبدالناصر منفعش يتخلص من عيوب مهنته
وبالعكس .. صبغ بيها الحياة السياسية وتقريبا لغاها تماما
وعمل مسخ مشوه يعرف يسيطر بيه ع البلد

الطبيعة القاسية الإقصائية كانت ف دمه لأنه راجل عسكرى ميعرفش حلول وسط ..ولا يعرف سياسة ولا توائمات بالمعنى الطبيعى ..
وطبعا اختار اصحاب الحظوة .. مش الخبرة وحول مصر لثكنة عسكرية كبيرة بقوادها وعساكرها ومخابراتها واعلامها وكله ... كله ..

حمدين وغيره
نجوا من هذه الصفة ..
بحكم النشأة المدنية ...
وبعتبر ميزة ف حمدين انه اتبهدل واتمرمط ف السجون وعارف ..يعنى ايه ظلم .. زيه زى ابو الفتوح وكدا كويس
واظن هما الأغتنين تحديدا دونا عن غيرهم ..مش هيستخدموا هذه الوسيلة ف تأديب خصومهم زى السابقين ابدااا


عيب حمدين كناصرى بقى
هوه عيب كل التيارات الأاخرى
وعيب السياسين عموما
وعيب الرجالة عمومااااااا

الا وهوه .. حب السيطرة


ف داخل كل راجل ..ديكتاتور صغير
تتاح له الفرصة فيكبر ..
او يتحجم .. فيصغر


انما ابو الفتوح اظنه لن يخلوا من هذا العيب برضو
شكله راجل اقصائى برضو بس بشكل غير مباشر ...
وبعدين طلع برج الميزان ..
يعنى نهارنا ازرق
دا اكتر شخص بقى ياخدك براحة وعلى قد عثلك ويعمل اللى هوه عاوزاه ف الىخر
واكتر شخص يقول كلام كبير وييجى ف الواقع ميعرفش يطبقه على نفسه
يعنى انا مش مطمنة قوى


لا ليه ولا لحمدين ولا لأى حد دون دستور نحاسبه بيه ...

بس مطمنة من ربنا
ومن الناس

الناس مش هتسيب حد يبهدلنا
ويدوس علينا تانى

نوظام .. البرادعى يا حبة قلبى كدا
وهوه بيقول ..
مش هننضرب تانى يا منى
:)


وربنا يوفق الجميع يا سيدى
و انتا شد حيلك ف الرواية
عاوزة تعوضنى والنبى عن الإحباطشات التى أعترتنى _شوفت اعترتنى دى مبتطلعش غير للعزيز الغالى_ ف الرواية الاولى الله يكرمك ..ماشى ؟
:))))

لا معلش يا فاتيما ايمن نور له الحق يختار اللي هو عايز يختاره يمكن شايف في موسى اللي مش شايفينه يمكن مش معتبره فلول الله اعلم بيه انا مش مطالب اني اؤيد اختياراته دايما بس بتكلم ليه انا هاختاره مثلاا انا محبتش لما اتحالف مع الاخوان بس برضه حمدين اتحالف مع الاخوان في حاجات بتبقى خاصة بحزبه هو عايزها علشان ينجح حزبه لكن اختياراي لاسباب تانية
انا هاختاره علشان برنامجه بتاع 2005 بصراحة كان برنامجه كويس اوي ثانيا هو من اوائل الناس اللي وقفت في وش النظام و لاقت ظلم و هو اول واحد قدر يجمع الناس حواليه في وش النظام السابق
انا اتفق كتير مع افكار نور الليبرالية الوسطية

مقاطعة ليه بس

كده هنشرب فلول رسمي
:))

ادعي لنا بقا

أعتقد إننا خسرنا البرادعي

وعلشان لازم أختار من المتاح

أخترت حمدين صباحي

مصطفى سيف الدين
--------------

طبعا يا مصطفى
ايمن نور من حقه يختار اللى يعجبه
وانا كمان من حقى احكم عليه من اختياراته
ولو شايف فى عمرو موسى حاجة عدلة
يبقى معلش ...
هما الاتنين انيل من بعض

ايمن نور دايما ملتوى
ومواقفه مايعة
وبيمووووت ويفضل ف الكادر
ويكفينى فقط
يكفينى فقطططططططط...
لما خد عفو من المشير
وجررى راح رشح نفسه للرياسة
وقبل يحصل على المنصب دا بعفو من واحد ايده متغرقة دم ...
دا ابنه انضرب ف احداث مجلس الوزرا وهوه بيدافع عن بنت هناك من بطش الشرطة العسكرية ...
اللى بتاخد اوامراها من المشير واللى تحته ..
فيعنى ايه ؟!!!

مفيش دم خالص ؟
بلا نحررة عشان العيال التانية
والشهدا
بلاش كمان عشان ابنك ؟!!!

ايمن نور عبده مشتاق
وهيموت على أى منصب ...
وبكرة الايام تثبتلك يا مصطفى
اذا مكنتش تاثبتت فعلا ... !!!


بص
انتا دماغك ناشفة
وخلاص فهمتك
الصعايدة فيما يبدو
مبيحبوش يغيروا رأيهم .. م الآخر
فبراحتك يا عم
مش هنزعل من بعض
بس اقبل رأيى زى ما بقبل رأيك
والأيام هتورينا مين اللى كان شايف م الزاوية الأدق وبلا رتوش

:)

انتخابات سعيدة

شمس النهار
---------


مهو
عشان كدا يا شمس

انتخابات تحت حكم العسكر
وبأطراف جاية بمباركة العسكر
والنضيف فيهم موافق على قواعد العسكر

طب ايه بقى ؟!!!

ربنا يسهل
:)

عارفة .. مش عارف ليه !!!
------------------------


لا خسرناه ولا حاجة يا وليد
البرادعى لا يصلح اصلا لهذه المرحلة
اذا كان ف عز الثورة وسخونتها
مقدرش يقف ضد العسكر واللى وراهم
دلوقتى هيقدر ؟!!!


حمدين اختيار موفق ..
لضميرك
و دا ف حد ذاته كفاية

قريت الجملة دى ومعرفش فين
ولمين ..
بس حسيتها صح جداااااا

كل مرشح
مؤيدينه يشبهونه ...

وانتا اخترت حمدين
لأنك شبهه فعلا يا وليد
:))

سلامى لمهند واخته ومامتهم لو سمحت

على فكرة انا دماغي مش ناشفة
و عارف ان ايمن نور له اخطاء كتير و متسلق كمان بس انا بتكلم عن طريقة تفكير و برنامج و مين اللي يقدر يجمع الناس حواليه و ميفرقهمش
انا اسف اني صدعتك طبعا محترم رايك
بس هو على فكرة قام بالتصويت لخالد علي علنيا
كون حزبه قرر غير كده متنسيش ان ده تصويت مكتب الامانة
اما صوته كان لخالد علي
شكرا ليكي

مصطفى سيف الدين
---------------

الاول صباح الخير

وثانيا
لأ
انتا دماغك ناشفة يا مصطفى
والدليل تعليقك دا
واصرارك على انك تبرهن انك صح
و متوقفش الحوار عن نقطة ف المنتصف
وتسيبها لحد كدا ...

ايمن نور متسلق وانتهازى
ولهذا ...
أى موقف هياخده لازم احتقره
حتى لو خده ف مصلحة الثورة ..
لأنى هبقى متاكدة انه خده لمصلحته اولا وتصادف انه مع الثورة ..
مش اكتر

الراجل دا معندوش مبدأ
ويكفى انه رئيس حزب طرطور
معرفش يقنه اعضاء حزبه
بتوجهه الفكرى واختياراته

مفهمش انا يعنى رئيس الحزب
بيرشح واحد ..
واعضائه يرشحوا العكس تماما ؟!!!

دا معناه
انه قاعد على كرسى رياسة الحزب
ع الحركرك ومش عاوز يزعلهم ..
دى مش ليبرالية
دى انتهازية
هوه ميقدرش ياخد موقف محترم
ويواجههم بحقارتهم ...
عشان ميقولوش برا وغور من هنا ..
ويدوروا على رئيس تانى
واكيد بينهم الف نفر مستنى الفرصة عشان ينط ع الكرسى ويقلش نور ..

نور عارف ..
بس كالعادة
الكراسى يا عزيزى
المناصب
الزغللة اللى ف السلطة
وأى مكان تحت الشمس
المهم يظره ف الكارد والصورة ..


صوته اللى لخالد على دا
اجزم بأنه حركة انتهازية جديدة
هو اختار اضعف واحد ف تيار الثورة
لا اختار حمدين ولا ابو الفتوح
عشان ف الاعادة لو حد فيهم وصل
ميضطرش ياخد صفه خصوصا انه بيعتبرهم منافسين ليه هوه شخصيا ...

ولا ابو العز الحريرى طبعاااا
لأنه شرحو .. بس بشكل تانى


يبقى مش فاضل غير انه
يضحك بقى على الشباب الغر
وجمهور الناشطين اللى بيأيدوا خالد على ويديله صوته ...

بذمتك دا تفكير حد محترم ؟

لما ادى صوتى وانا عارف انه هيضيع ف الفراغ كدا والاحدث دلوقتى ساخنة ومتوترة والأصوات والاتجاهات بتفرق ؟؟؟



عموما
بغض النظر عن ايمن نور
من أى حاجة تانية

واضح
انى بتعامل ببساطة شديدة
وبهزر بطريقة قد تبدو انها تلقائية بالنسبالى
و جارحة لغيرى ...

لو كنت اتعاملت بشكل يضايقك
او اعتبرته مش كويس يا مصطفى
انا بعتذرلك

انا فعلا الأيام دى
مزاجى العام مش كويس
ويبدو انى هبتدى اضايق ف الناس
وانتا من العزاز عليا
وكان المفروض اعمل حساب الصعيد
والدم الحامى .. واتكلم بتحفظ

بعتذرلك تانى

وبقول اخد هدنة واسكت شوية
لحد ما الأيام دى تعدى


اشوفك على خير

لا متقوليش كده انا اللي آسف معلش بقى صعيدي و قفل
يغور ايمن نور يعني كان من بقية اهلي
بس انتي من بقية اهلي يا فاتيما و لا ايه؟

على العموم انا مش زعلان و لا انتي اتعاملتي بطريقة مستفزة
بس لو سمحتي ممكن اتحفظ على حاجة؟ ولا بلااش؟
حكاية انه اختار خالد علي علشان اقل واحد و مرضيش يجمع زي الباقيين على الاتنين
شايف انه يتناقض مع المقاطعة اللي انتي اخترتيها
يعني هو خالد علي اللي ارضى ضميره في الاختيار زي المقاطعة هي اللي ارضت ضميرك في الاختيار و انتو الاتنين مختارتوش لا حمدين و لا ابو الفتوح
اعذريني لصراحتي بس هي كده
كمان مينفعش نقول كده و في ناس محترمة كتير ادت اصواتها لخالد علي زي عمرو حمزاوي منقولش انه برضه قاصد يفتت الاصوات
النيات ميعلمهاش غير ربنا
مش هتكلم تاني عن ايمن نور و لا هدافع عنه بس متتضايقيش مني
انتي اختي و ربنا يسعدك و يهنيكي دايما انا اسف ان كنت ضايقتك

مصطفى سيف الدين
---------------


حصل خير يا مصطفى
واختك فاتيما بانية رأيها
فى هذا الشخص من واقع تاريخه الطويل
من اول ما كان لسه صحفى على قده
لحد النهاردة
تراكمات لردود افعاله وتصرفاته
وما اراه واضح
والمستخبى بين السطور
وبحاول اشوفه بعين تانية ..

ولهذا عليه أحكم
ولا اساويه بحد تانى
لأن غيره مختلف عنه ف المواقف
وف التاريخ

حمزواى مش حلو قوى برضو
عشان يبقى مقياس
لكن اتجاه حمزواى له مبرراته
التى اتفهمها .. واستوعبها
واكاد اجزم انها مش انتهازية
وانما لأرساء موقف
وحمزاوى مكنش عاوز يرشج نفسه
وبالتالى .. هوه هنا بيرسى مبدأ
مش اكتر


عموما
حصل خير
وانا بعتذرلك تانى
ومش متضايقة منك والله ابدا
انا متضايقة م الدنيا ...
ومعلش جت فيك
:)

إرسال تعليق