.

.

عشــام تحــّـرموا تعـــملــوا ثـــورات تانى  

Posted by: فاتيما in



مرة واحد رزل قوى 
قاعد مع صاحب ليه ف السينما 
فحب يتسلى شوية وقاله:
شايف الراجل المحترم اللى قاعد 
هناااااااااااك دا ف أول صف ؟؟
صاحبه قاله : 
ايوه ..ماله ؟
قاله :
تراهننى على خمسين جنيه 
انى اروح اسكعه قلم على قفاه
وميفتحش بوقه ..!!
الصاحب طبعا مصدقش وقال:
 ماشى لو جدع كدا .. ورينى



الرزل وقف و راح للراجل ف اول صف 
و قام مديله القفا التمااااااام 
الغلبان المضروب انذعر والتفت له
عشان يردله الضربة
راح الرزل قايله بخبث :
 أنا أسففففف جداااا
افتكرت حضرتك حسن صاحبى 
وقعد يعتذرله 
فالراجل المضروب سكت وسامحه
رجع الرزل لصاحبه 
وقاله :
اييييدك ع الخمسين جنيه




بعد خمس دقايق 
الرزل قال لصاحبه :
 طب ايه رأيك نتراهن على 100 جنيه
 انى ممكن اضرب الراجل دا تاااانى
 وميفتحش بوقه ؟
فالصاحب قال :
لأ .. استحالة
المرة دى هيقتلك لو عملتها  ..
قاله :
 طب حضر فلوسك يا معلم 
وانا رايحله اهو ...




و فعلا وصل الرزل لأول صف 
وراح مطرقع الكف التاااااانى على قفا الغلبان 
المضروب اتهلع تانى وراح لاففله وقايم 
ولسه هيرفع ايده ...
 :الرزل راح كاشش لورا وقال  
انا أسففففففففففففف بجد 
والله افتكرتك حسن تانى 
 اصللك شبهه جداااااا متتصورش ازاى
سامحنى معلش انا غلطااااااان جدااااااا 
 : الراجل لمّ الدور و قاله خلاص
 غور وامشى ومتعملهاش تانى ...






:ورجع الرزل لصاحبه منتشيا قائلا 
اييييييدك ع المية ...
بعد عشر دقايق قال لصاحبه :
تراهننى على 500 جنيه
انى ممكن اضربه قفا تانى ؟؟
الصاحب قاله :
مستحييييل بقى المرة دى 
دا هيقتلك 
ولا يمكن انا مستعد أدفع ألف
 بس لو شاطر تعملها 




الرزل مشى كام خطوة وراح للراجل 
اللى قاعد ف أول صف وراح ضاربه قفا تالت 
ولما قام المضروب عشان يعترض 
ويمد ايده بجد النوبة دى 
الرزل قاله بهدوءءءءءء : 
بقولك اييييييييييه ... بص
انتا سكتت مرتين و عديتها 
فوّت بقى المرة دى 
و .... مجتش على قفا كمان !!!! 






وقد كان 
الشعب مازال مصمم ياخد بالقفا
من الرزل 
ويعديله الليلة معرفش ازاى 






قفا الاستفتاء 
ثم قفا انتخابات مجلس الشعب 
ثم قفا الرياسة .. 






قولنا الانتخابات دى هتتم 
تحت حكم العسكر 
فمـــاذا انتـــم فاعلـــــــون ؟




يعنى انا كان نفسى حد يقنعنى 
 اللى راح ينتخب جاب الثقة دى منين ؟
وكأن تاااااااانى
الحداية هتحدف علينا الكتاكيت 


طب اهى حدّفت كتاكيتها الفطسانة اهى
و تحقق اسوأ كوابيسنا جميعاااااا
شفيق يا رااااجل 
وصل للإعادة ويا مرشح الاخوان
ومن الإستبن للبلوفر .. ياقلبى لاتحزن






وأيوه
 محدش يحزن 
وكله .. يثبت مكانه و لا ينقهر 
النتيجة منطقية 
مهو العسكر مش هيعملك انتخابات 
وكل ما تقرب مواعيدها
يبقى عمال يهلل 
ويشجع عليها ف كل حتة
وسايب مرشحين للثورة يشتغلوا 
وياخدوا فرصتهم اعلاميا وع الأرض 
و مخلى البلد ف حالة أمان تام
و يوم الانتخاب سير العملية الانتشخابية
يمر زى الفل و يمشى زى السكينة ف الحلاوة
والفرز على عينك يا تاجر عشان محدش
يتشكك او يعترض او يقول بم
 ايه ؟!!!






 دنا من قبل ما اوصل للآخر
عارفة و مستنية المشهد اللى ف الفيلم
اللى هعرف فيه من القاتل ..
و كنت منتظرة اعرف تحديداااااااااااا
فين المقلب 
يعنى ف نهين حتة بالضبط 
اللى هييجى الرزل و هيدينى القفا المتين 
ف نهووون مرحلة يعنى ...
وادينا عرفنا اهو ..
و يا الاستبن .. يا البلوفر 
وان كان عاجبكو 
احنا هنربيكوا 
يلى مكنش عاجبكو مبارك
اهو جالكم المتردية والنطيحة
وما أكله السبع اهو اتسمموا بقى 
وعشام تحرموا تعملوا ثورات تانى  






طيب 
يشنقونا ونسكتلهم ؟!!!
و يحضرنى سؤال الجميل الحزين 
 عمنا .. صلاح جاهين 
ايه العمل ف الوقت دا يا صديق ؟






ما زلت عند رأيى 
مقاطعووووووون





اللى رشح شفيق و مرسى 
طبيعى هيكمل
لكن اللى رشح أى حد غيره ...
المفروض دلوقتى ...  ميروحشى 
انصار الاتنين اصلا
ميكملوش الـ  12 مليون 
ولو الأصوات دى نفسها هيا اللى راحت
ف الاعادة الكسبان مش هيكمل
 السبعة مليون مؤيد بكتيره ...
وهذا بيت القصيد 
رئيس مصر القادم اللى عاوزين
يشربوهولنا بالسم الهارى 
اكرملنا انه طالما جاى بالغصب كدا 
انه ييجى بنسبة
 لا تتعدى ال10% من شعبه





ونقعد احنا نعايره بقى 
ونبعتر ف كرامة الست والدته من دلوقتى 
ونقوله ف الراحة والجاية 
يا ريس ال10% بكتيره 
يا للى تلتربع شعبك ميعرفكشى 
ولا استعبرك ونزل يقولك نعم ولا حتى لأ
يا ناجح بأقل من خمسين ف المية
يا فاشل يا فاشل يا فاشل
يا عرة الروساء .. الخ الخ الخ 






افقدوه الشرعية
قبل ان يأتى
وخلوه عبرة قصاد العالم






 الأقبال عموما
 ف اول جولة كان يادوب النص
ولما ينزل للربع ف الاعادة 
تبقى مصلحة 
زى ما نجاح شفيق ووصوله للحكم 
 برضو ... مصلحة 






أينعم
مصلحة للثورة عشان تتم وتخلص
بدل ما هى ماشية على سطر كدا
وبتسيب سطرين






وأتمنى يكون الأخوة بتوع الثورة
هتنجح بصندوق الانتخاب 
وانه فعل ثورى برضك 
يكونوا شوية ... غيروا رأيهم 
وفهموا ان العسكر حتة السكر
 مش هيسيبوهالنا بالساهل
ولو سابوها ف يوم هيجيبوا واحد
يحكموا من وراه .. 
ولو منفعشى 
هيخلوها ضلمة 






قاطع لو سمحت
وخلى شرعية الرئيس القادم هزيلة 
مسخره من قبل ما ييجى 
وخلى لقب رئيس مصر دا نكد حقيقى 
زفت وقطران على دماغه 







اللى عاوز يؤيد مرسى كيدا ف شفيق
يسمحلى اقوله انه بيكرر نفس الغلطة
ويختار الطريق الاطول
عشان يخلص اهداف ثورته 
 واحنا استوينا طرق ملتوية 
 و تعبنا م التوهان 
وليه طيب والطريق المستقيم قصادنا
؟؟؟!!!؟







مرسى مجرد عروسة ماريونت
ف ايد جماعته 
و قيادات الاخوان كلها ارتضت من البداية
انها تكون شباشب ف رجلين العسكر والنظام
واختاروا رضا بتوع البيادة 
بدل ما يختاروا اهلهم وناسهم 
 ولا اظن ان فيه حاجة هتتغير دلوقتى
الانتهازية والطمع متأصل ف العالم دى
الواطى بيفضل واطى .. و مبيعلاش






اللى عاوز يراهن عليهم .. هوه حر
بس يبقى بيعيد نفس الغلطة 
وابشره للأسف من دلوقتى 
بسوء المآل وسدة النفس اللى هتجيله
بعدييين لما يخذلوه عاااشر
ويبيعوا دمه للعسكر 






بخصوص الشعب المصرى بقى
والفجأة اللى عملهالنا ف الانتخابات 
و الكلام اللى من عينة سيبوهم يشربوا
و دول شعب ابن ستين ف تمانين 
و ... ميستاهلش
والثورة راحت .. والقصص الحمضانة دى 
ايه ؟




دول اهلك 
 ولا مستوردينهم م الصين ؟


 حضرتك الشعب المصرى 
عمره ما هب كله كدا نوبة واحدة 
و صحى م النوم فقال احنا قومنا بدرى 
طب يلا يا ولاد 
لما نعمل ثورة النهاردة .. !!






فيه طليعة دايما وراس حربة 
ف كل مرة بتبدأ ... الاوووووووول  
ويتلم الشعب حواليها .. بعديييييييين 
ولكم ف ثورة يناير أسوة حسنة  
الناس مضمتش ع الثوار الا ف النهايات
واهالينا مبتنضمش لينا 
الا بعد ما الدنيا تغمق ع الآخر .. 
  فإيه بقى ؟؟


ايه اللى اتغير ؟






نفسكوا انقطع وتعبتوا ولا ايه ؟
اللى عاوز ييجى ف الآخر مع الشعب
 اهلا وسهلا 
واللى عارف واجبه ومطرحه ف أول صف 
هيكمل و مش هنسمع منه غالبا 
 عبارات الاحباط دى 
عشان موقفنا دلوقتى اقوى ..






ايوه 
احنا دلوقتى اقوى 
وقيس جبروت النظام يوم 24 يناير 
بدلوقتى .. قيس قوتك وقدرتك 
وجاوب على نفسك 






اما بخصوص 
بعض الناس .. و صدمتهم
اللى كان ورا حمدين وابو الفتوح 
مخسرش .. قد ما الأتنين المرشحين 
دول هما اللى خسروا
 هذا الدرس يعلمنا قد ايه الجيل دا 
 مبيعرفش لسه رغم كل الخبرة والعمر
انه يقرى الواقع كويس
ودايما حساباته بتيجى ف غير وقتها 
وضد المصلحة ...
اذا كانوا هما و لا البرادعى 
ولا أى فصيل و قوة سياسية حاليا ع الأرض
كله يا أما بيلعب على مصلحته ..
أو متشبث بعند برأيه 
أو بينضحك عليه
او بُيستغل .. 
أو ف أحسن الاحوال
 بياخدله جنب .... احتراما لتاريخه و نفسه






المترنحين كُثر و بشكل غريب 
الأسوانى حقا صدمنى 
لما قال على تويتر لازم نصطف 
وراء الاخوان ...كدا و ببساطة 
بعد كل ما فعلوه يا دكتور  ..!!!
نقف وراهم دون ضمانات واتفاق مسبق
انهم مش هيغدروا بينا تانى 
وكأنه وكأننننننننا غاويين ناخد قفا تالت
من الاخوان و نسكت ..!!!
وكأن العسكر لو مش عاوز مرسى يكسب
هيكسب .. لمجرد إصطفافنا .. !!!






وكأن المفروض نعاود كل هولاء 
وهذا أثر فأس كل واحد منهم معّلم 
علينا وعندنا شهداء ومصابين بسببهم






نوراة نجم بتبهرنى الصراحة 
اول يوم انتخاب 
كانت فرحانة بأن صوتها لخالد على
تانى يوم لما المؤشرات جت بتقدم شفيق
دارات تشجع مؤيدى حمدين او ابو الفتوح 
حد فيهم يصب اصواته ف صالح التانى 
وعلى آخر اليوم كانت بتقول معلش 
محدش يزعل مهو اصلا اصلا 
الريس القادم طرطور وجاى بلا صلاحيات
 وكنا هنعمل بيه ايه ؟



الله !!!!






يعنى صوتك يا نوارة كان لخالد على 
و بتدفعى غيرك لعكسه فجأة كدا .. ازاى ؟
واذا كنتى اصلا كنتى عارفة 
انه مش هيكسب مهما حصل 
وضيعتى صوتك بتشجعى غيرك ازاى
 على حاجة انتى شخصيا مش مقتنعة بيها 
  و .. معملتيهاش ؟؟
ثم ان سيناريو شفيق دا مش المفروض 
يكون متوقع و معمول حسابه 
ولا لعبة الانتخابات اصلا مش مقامرة 
ووارد فيها كل شىء حسب نظرية الاحتمالات 
وكان لازم نعمل ترتيبنا ؟؟




واخيرااااا .. 
الريس القادم بلا صلاحيات 
وهيبقى طرطور 
يعنى انتخبتى مرشحك على هذا الأساس ؟
وشجعتى الآخرين على انتخاب مرشحيهم
وانتى عارفة انهم هينتخبوا طراطير ؟
 ايه .. هيا لعبة ؟؟







واخيرا 
الناس الحلوة اللى بتلوم ع المقاطعين
وبتقول انهم السبب ف ترجيح 
كفة الفلول والاخوان عن التيار الثورى
ولو كانوا نزلوا كانوا هيفرقوا معانا ..الخ الخ 





نعممممم بقى حضشرتكو ..




انتوا هتجيبوها فينا احنا ولا ايه ؟
يعنى سبتوا الحشد 
والتنظيم القوى للأخوان
ومساندة السلفيين ... ليهم 
وسيبتوا خناقات حملة حمدين وابو الفتوح 
وسيبتوا نفوذ العسكر عموما
ومساندتهم لشفيق خصوصا 
وسيبتوا توجيه بعض المشايخ 
والقساوسة والأعلام 
و سبتوا الجهل والغلب اللى فيه المواطن 
وهتفوقوا علينا احنا ؟!!!






طب دا حوالى نص عدد الناخبين
اللى ليهم حق الانتخاب مرحش 
 اسألوهم كدا ... ليه قاطعوا 




والمصريين ف الخارج بالملايين 
اسألهم برضو .. ليه قاطعوا 




مهو لو كان نص الملايين دى
ما بين فقير وجاهل وغلبان
و ملوش ف السياسة 
طيب بقى ...  النص الباقى ايه ؟!!




.. المقاطعة موقف 
و هذا الموقف له اسبابه 
ولما نلاقى عدد كبير يتفق عليه 
دون توجيه دعوة قوية او تحريض 
يبقى لازم تحترموا اختيارهم  واختيارنا
 ومتتحججوش بينا 



و حقيقتنننن انا كلى فخر
لانى لم اشارك ف هذه المهزلة
و لا اديت شرعية لقاتل زى شفيق 
يتبجح بيها ويقعد يتهبب يقرفنا بقى ف كل حتة
و يقول .. لو مبقتش ريس فيكفى
 انى وصلت للأعادة 
و انا شعبى اخترنى و انا شعبى يحبنى 
و يسير على نهج القذافى 
الله يرحمه كدا 
وف الراحة والجاية بالنتيجة دى 
هيطلع دين بابانا 
وبكرة تشوفوا




ارجوكم بقى محدش يكرر الغلطة  
والمرة دى ضميركو يكون مستريح
لما تقاطع خااااالص
ولاّ هوه على رأى البنية الجميلة .. دى 
ليس حبا ف البتوع 
ولكن كرها ف البتوع التانيين ..!!!   
ليه تدى لمتآمر عشان متديش قاتل 
لا دا ولا دا يلزمونا من اصله  
ويغور اللبن من وش البهيمة العِكرْ






و بعد ما نتقاعس عن المشاركة
ونقاطع 
هتسألنى حضرتك .. طب ايه الحل 
هوه الثورة كدا هتنجح ؟؟






أقولك .. مبدئيا يكفيك 
انك هترجع تانى للمسار الصح 
اللى بتقدر تملك فيه قرارك واختيارك 
ومتسمحش فيه لحد يمشى عليك قوانينه
المعيبة الغلط الفاجرة اللى هتلبسك ف الحيط




احنا ف الأول ننشف كدا
و نمسك نفسينا 
لأنى بجد انا منصدمة من حالة الهلع
 اللى البشر فيها من اول المؤشرات
 ما قالت شفيق ... هيعيد 




ايه يا جماعة ؟
يعنى وقفتوا ضد المدرعات والرصاص والغاز
 والسحل و والضرب والإضهاد 
و واجهتوا البلطجية اما المحترفين
 و اما بلطجية الداخلية و الشرطة العسكرية  
و لسه واقفين اهو صامدين قصاد تدخل امريكا
واسرائيل و فلوس انظمة الخليج 
و كوووووووووول دا يحصل 
وجايينلى تتخرعوا من شفيق يا راااااااجل  ؟!!




ايه 


اييييييه ؟!!!




 دا حتى عيب علينا 
دا هوه من جملة اعدائنا المفروض
قصاده نستررررررجل مش شوية  
المفروض جداااااا ... و بجد
انا مش فاهملكم الصراحة ؟




شفيق 
وأى فلول مصلحة للثورة 
عشان تزحزحها تانى من مطرحها
خطوة لقدام 
ومحدش يقولى احنا رجعنا خطوات لورا




لأ ..
 انتا الوحيد اللى بإيدك 
تسمح لحد يزقك ورا تانى 
انتا الوحيد اللى مالك زمام دماغك
انتا الوحيد اللى مش طمعان ف سلطة
انتا الوحيد اللى مستعد تموت ببلاش 
انتا الوحيد اللى ثابت ع المبدأ
 وانتا الوحيد اللى مش هتسيب الرزل 
يسكعك قلم تالت ... وتسكت
لا عسكر ولا اخوان ولا أى حد 
و بقولك ايييييه من فضلك .. فكر تانى
واثبت
 مكاااااانك



------------------------
--------------------------------------------
احنا اللى روّحنا بدرى 
مش أكتر ....
الاستغاثة الاخيرة .. نوارة نجم
علمتنى الانتخابات .. مصطفى سيف
ليس حبا ف البتوع .. حكايات فريدة
يوم إنتخاب الشهيد ..انسانة
عن الحالة الشفيقية ..الأغلبية الصامتة


----------------------------
----------------------------------------

This entry was posted on السبت, مايو 26, 2012 and is filed under . You can leave a response and follow any responses to this entry through the .

2 كــــلام بيطــبطـــب عـــلى قــــلبى و روحــــى

على فكرة انا كنت في القاهرة امبارح و كنت عايز اشوفك بس معلش بقى مرة تانية
المهم انا لو ممكن اختلف معاكي في الراي و اتفق معاكي في المضمون احنا اخدنا على القفا ماشي بس عملنا الصح
صحينا الشعب قلناله شوف احنا طلعنا و عملوا همه التزوير الناس دلوقت بقى عندها وعي خطوة الانتخابات دي كانت مهمة جدا
و باتفق معاكي في ضرورة المقاطعة في الاعادة و اختلف معاكي في السبب
اسبابي في المقاطعة : 1- عدم المشاركة في فتنة طائفية ووقيعة بين المسلمين و المسيحيين هتحصل علشان المشروع الاسلامي مجانين الجماعة الاسلامية و حزب النور مع الاخوان مستعدين يعملوا اي حاجة حتى لو اعادوا اللي عملوه في الاستفتاء
2- تصويتي في الاعادة بعد تصويتي في الجولة الاولى هو اعتراف مني بصحة نتيجة الجولة الاولى و انه ماشابهاش التزوير علشان كده هاقاطع
3- مش هاصوت لناس كفرتني قبل الانتخابات و دلوقت يقولولي ثورة
اختلف معاكي في حاجة أخيرة انا متوقع اقبال اكبر في الاعادة وانه مش هيبقى ال 10% و الكلام ده علشان الاستقطاب الطائفي اللي هيحصل و علشان ناس من الشعب مؤمنة بالثورة هتخاف ان شفيق يرجع ايام مبارك تاني

عُدنا بعد غياب 20 بوست وشُكراً لفتح التعليقات :-)

بغض النظر عن كل ما حدث حتى وصلت الإنتخابات الرئاسية إلى هذه النتيجة، ودون أن نلوم على هؤلاء أو هؤلاء وخصوصاً أنها السنة الديمقراطية الأولى (كي جي وان ديمقراطية) فالخيار الآن بين كلا المُرشحين المتبقيين له بُعدٌ آخر

إنه الخيار بين الدولة المدنية والدولة الدينية ليس أكثر، فلكلٍ منهما عيب صارخ قد يمنعك من التصويت لأي منهما وهو ما دفعك للمُقاطعة، لكن بعيداً عن أسبابك - وهي وجيهة ومفهومة - فالخيار هُنا لابد أن ننظر له من الجانب الآخر الذي ذكرته أنا هُنا

إرسال تعليق