.

.

المـكتــــوب ...  

Posted by: فاتيما in ,





أطـّلت فى وجـهى
و أخـفت
 بعض من الحـــزن
بالإبتــسـامة 
قــائـلـة
يا ابنتى 
لا تحـزنـى
بعـض النســاء 
فى هــذه الدنيــا
خُلـقــن .... للهجــران


ربنــا ياخـــده كمــان وكــمان  

Posted by: فاتيما in









صباح الخير والسعادة 
ع الناس الطيبة ... بزيادة 
التدوينة دى موجهة لأسخاص بعينهم 
عمالين يحرقوا ف دمى 
كل ما تيجى مناسبة لذلك 
وانى أذ بى أرجوهم رجاء حار 
يرحمونى ويرحموا روحهم
 عشان احنا هرمنا ف البلد دى والله العظيم 






آل ايه ياخويا 
كل ما موبارك يعطس 
ويرد الفلول و العسكر 
يرحمكم الله يا ابوسريع 
مش انا اللى عطست يا ريس 
تطلع اخبار واشاعات انه ف النهايات 
وعيان قوى و ربنا خلاص هيفتكره ويخلّصنا 
نلاقى ناس كومل واخلاق و ذوق 
و طيبين قوى يا خال 
يطلعوا علينا بفاصل من التوبيخ .. كالتالى 







 حرام عليكو 
متفرحوش ف الراجل
فين الاخلاق 
هوه مفيش رحمة 
عاوزين ايه تانى منه 
الثورة مش انتكامية 
لا شماتة ف الموت
الموت له جلال و حرمة 
دا بقى ف ذمة الله دلوقتى 
وناقص يكملوا و يقولولنا 
إعتبره ابوك يا أخى ...!!!!!











طب قبل ما أجيب علبة الكبريت 
وأولع ف اول عوووود 
تسمحولى الحق أقول اللى ف نفسى 
و بعدين سيبونى ... اتحرق 
وانسونى ومتبقوش تقولوا الله يرحمها 
و انا مسامحة 
اشرح وجهة نظرى ؟












الناس اللى زعلانة على مبارك دى 
بتتكلم بجد ولا بيهرجوا ؟
يعنى اذا كنتم قاعدين ف مدرجات 
الدرجة الاولى 
و كنتم من الفلول أو حزب الكنبة 
فماشى هنعديها 
ودى هتبقى طريقتكم لأنكم 
مش شايفين المخلوع غلطان اصلاااا
انما لو كنتم من الثوار بقى 
وتتحسبوا ع الثورة واللى فيها 
فممكن تفهمونى ايه حكايتكم بالضبط  ؟!!





يعنى التعاطف الرهيب 
دا جاى منين 
و بتشتروه من انهى حتة  ؟






 امبارح ف خضم سيل الأخبار 
عن المجحوم ونقله وغيبوبته وقرفه 
بقلب ف القنوات لقيت سى براهين عيسى 
بيتكلم و يهرى وينكت ف روحه 
و عمال يدينا ف دروس اخلاق ويأنبنا
وكان ناقص يمسكلنا العصايا 
ويمدنا على رجلينا عشان احنا 
شيكلنا هنطلع شعب وحش 
وقليل الرباية و ضميره زفت 
واخص عليه 
لما يشمت ف الراجل كدا 
و ليه اننا كدا واقفينله ع الواحدة 
ف كل تفاصيل مرضه وعلاجه وحبسه ... الخ 





لأ وكماااااااان بيفكرنا بالقذافى 
واللى جرى ف ليبيا و انهيارها 
و بيخوفنا من نفس مصيرها
واننا مش بعيد نتحول إلى آكلى لحوم البشر 
 لو فضلنا نتكلم عن القصاص وكدا 
مش فاهمة ازاى انا .... ؟





طب القذافى و بغض النظر عن طريقة موته
وبشاعتها و همجيتها التى لا أرتضيتها 
بس سؤال بسيط
هوه اللى قتلوا القذافى دول من شعبه 
ولا ناس (زى ماهو جاب) جايين من برا  ؟؟




مش هوه دا الشعب الليبى حضرتك 
 اللى قعد ابو سيف يبيع فيه و يشترى 
اكتر من 40 سنة ويسوقه كما الغنم ؟








مش دا الشعب اللى حكمه بالعنف
والجنونات التى لا تنقطع ؟




مش دا شعبه اللى حرمه
 من التقدم والمدنية رغم كل ثروات ليبيا ؟


مستغربين ليه ان معمر يموت موتة كدا ؟
مش هوه برضو اللى جابلهم 
مرتزقة افارقة عشان يهتكوا اعراضهم 
ويقتلوهم ف الشوارع ويرتكبوا كل الأنتهاكات 
مندهشين لما كل هذا بحذافيره 
يتردله وقت سقوطه ف ايد ضحاياه ؟




ليه ؟
مش الجزاء من جنس العمل 
ولا دى مجرد اكليشيهات بتتقال ؟؟؟




كل واحد بيموت الموتة اللى تشبهله
وشعب ... القذافى صنيعته 
 همجيتهم بتعكس افعاله فيهم 42 سنة
هذا العنف برعايته وبفضله
وكل اللى حصل
 انه داق عمايل ايديه .. مش  اكتر 








قوم ييجى سى براهين
يخوفنا ويكششنا ف جلدنا ويحذرنا 
اننا نبقى لييبين الهوى 
و نفكر بس اننا ننتشقم من ريسنا 
ونجرح انسانيتنا ونتحول لوحوش 
وكفاية عليه اللى بيجراله
وعيب علينا 
و مش ناقص يقول غير
اعتبره ابوك يا اخى ....  ؟!!

هاه .. !!؟




لأ .. وباقى القنوات بقى 
اللى بتعزف على نفس النغمة النيلة دى
ولسه هيتحفونا تاااانى 
كل ما هتقرب لحظة الموت بجد 









دا حتى محامى اهالى الشهدا 
حب يطلع ينقط ف الفرح ورزع بوقين حمضانين 
عن ان مبارك لازم يتعامل معاملة حسنة 
ودا مريض و نحن لا نقبل و ربنا يشفيه 
ونناشد الاجهزة تعالجه كويس 
ومش هنشمت فيه ابدااا
و كان فاضل يقول ... 
اعتبره ابوك يا اخى ... !!! 




لأ 
  أبوكو انتوا بقى واخوكو كمان
يخربيت كدا 
ايه كم النفاق الرهيب دا ؟
انتوا بتطبلوا للرئيس القادم من دلوقتى 
ولا إيه .... ؟!!!
حتى بعد الثورة مش قدرين تنِضِفوا 
وتطلعوا العبد اللى جواكم ؟








هوه المسألة ليه مش واضحة  انه
أبيض ... أو ... أسود 
مبارك قاتل ولا راجل كويس ؟
راجل كويس يبقى ربنا يشفيه 
و ظلمناه و الله يرحمه ... لما يموت 




لكن راجل قاااااتل 
يبقى الله ياخده 
ويرجعه ... وياخده ألف مرة 
ولما يموت هيبقى كلب وراح
وحتى الكلاب هيبقالها حرمة عنه 
لأنها يوم ما تتمعظم يعنى .. 
هتقتلها نفر اتنين  تلاتة بكتيره
مش الالاف البشر زى حالاته .. !!!!





فين وجه الشماتة اللى بتحكوا عنه 
وفين انتقاص الفضيلة 
وفين قلة الاصل 
و انعدام الأنسانية ف الموضوع ؟









أى رحمة المفروض تأخذنى بقاتل 
وهاتك للأعراض وسارق لثروات البلد 
و مخرب لقيمها واخلاقها  ؟
و مفسد لكل أوجه البراءة والنقاء فيها
وجلاد .. بكرابيج ضباطه وعساكره 
وكل العبر براحتكو 
رصوها ف قايمة لا تنتهى 
مش كان هو حامى حمى الديار 
و الراعى الرسمى لكل مرتكبى تلك الشرور 
ويتحمل وزرهم جميعا ولا هل انا ببالغ ؟؟؟




الا يتحمل كل عذابات الضحايا جميعا ؟
لأنه حاكم و راعى و مسئول وارتضى ذلك 
وقعد 30 سنة ينتفع منا 
ويشرب من دمنا ولا اجدع مصاص دماء
ولو كنا سبناه يوم واحد زيادة بعد 11 فبراير 
كان استباح المزيد من الدم ..
وتيجوا تقولولنا فين الرحمة ؟!!!





وهوه كانت فين رحمته بشعبه 
اللى افتقر واتذل جوا وبرا مصر ؟
كان فين من الفساد و الظلم 
والموت اللى حاصر البشر بكل الطرق 
ف حوادث عبارات وقطارات وحرايق و .. كله ؟



وكفاية بس الامراض الخطيرة 
 اللى مسبتش كبير ولا صغير
لحد ما بقينا شعب مريض فقير مهان 
وعايش اما ع الأعانات او الرشوة او النهب 
او يموت لأنه معرفش يعمل حاجة من دول


 
مبارك خد فرصته كاملةً .. و زيادة 
وما يحدث له الآن والله أكتر من الواجب 
واكتر من الانسانية ... بشوية
وكل الفيلم الحاصل دلوقتى 
مجرد حلقة من المسلسل التركى اليومى 
"أنا مقعدش ف طرة يا كلاب " 







 
واديه خرج اهو .... و غصبن عننا 
ومقعدش ف طرة برضو 
ودخل الخمس نجوم تانى وهيتروق 
وبكرة يصحى و يتمشى و يبقى زى القرد 
وعادى خاااالص 
اما لو مصحيش ... و غار ف داهية 
يبقى نحمد ربنا ان العالم خلص من طاغية
و محدش يقولى ساعتها عيب بلاش شماتة 
و اعتبره ابوك يا اخى .. !!






 
 ابويا الله يرحمه كان راجل محترم
و متسببش ف موت الآلآف 
ولا ف أذى ملايين 
وخرج من كل حاجة زى الشعرة م العجين !!!





ولو كان عمل واحد على عشرة 
من عمايل مبارك ف الشعب المصرى 
كان زمانى بعت اللى ورايا واللى قدامى 
واستلفت من طوب الارض
عشان اعمل اعلان ف آخر صفحة ف الاهرام 
اكتب فيه انى متبرية من أبوته ليا 
ولا ابويا ولا عايزة اعرفه ...




وقبل ما تفتكروا حقوق مبارك الانسانية 
وتقعدوا تقطمونا 
يا ريت تفتكروا ملايين المواطنين 
اللى عايشين تحت خط الفقر 
ومش لاقيين الكرامة 
و اللقمة و الهدمة و الغطا و الدوا 
و كوباية مية و اربع حيطان وسقف يسترهم 
وساكتين ...








بصوا ف الصور دى 
و افتكروا الاطفال 
اللى ف عمر الزهور ازاى دبلت 
واتبهدلت  واشتغلت وانتُهكت
و بتدور على اكلها ف الزبالة وتتعذب
عشان واحد زى مبارك يغتنى اكتر 
و اهله وخدامينه وكلابه يتوحشوا اكتر 







ولا انتوا لامؤاخذة مش م البلد دى 
ومبتمشوش ف شوارعها
 وتعرفوا ناسها عايشين  ازاى 
وقلبكم لا يحّرك ساكنا على احوالهم ؟؟؟!!!








افتكروا حقوق الشهدا 
اللى قاتليهم احرار طلقاء عادى كدا 
بينما هناك مصابين ثورة لسه بيعانوا 
ومفقودين كُثر محدش عارف عنهم حاجة
من يوم 25 يناير 2011 وحتى الآن








وانا شخصيا يكفينى افتكر الشهيد المبتسم 
اللى مات واندفن من غير ما ابوه وامه 
يبوسوا جبينه ويطلوا ف وشه الطلة الأخيرة
وكفاية عليه اندفن غريب 
ف مقابر غريبة 
و اللى قتلوه متمسكوش 
ومنعرفوش وغالبا خرجوا زى الباقيين .. براءة



الشهيد المبتسم ذنبه ف رقبة مين ؟
الولاد الجمال الورد اللى فتح 
ف جناين مصر ورواها بالدم ذنبهم ف رقبة مين ؟
وخالد سعيد .. ذنبه ف رقبة مين ؟
وكل اللى زي خالد و الشهيد المبتسم 
والورد اللى فتح دول 
واللى منعرفش اساميهم
 ولا شوفنا صورهم عشان محدش لسه 
حكى حكاياتهم 
دول كلهم ذنبهم ف رقبة مين ؟؟؟؟!!!








ذنبهم عندى ف رقبة الحاكم 
عند مبارك 
اللى قاعد بيتعالج على حسابنا 
وعلى شرف دمهم الطاهر 
ف أرقى مستشفيات بفلوسناااا
و فى حماية كلابه من العسكر والنظام القديم 
و كل شوية يتسلبط ويستعبط 
ونلاقى حد بيبلعه الدلع المرىء دا 
وينسى الحق فين و يرجم الضحية 
و يشفق ع القاتل
ويتعاطف مع الباطل 
و يرجع يقولنا .. اعتبره ابوك يا اخى !!







لأ يا اخى انتا حر ف نفسك 
تبلع كل هذا الخداع والظلم والمهانة 
لكن انا محدش يقولى متشمتيش
وحرام عليكى وميصحش و دا راجل كبير 
وحرمة الموت والأفلام دى 





لأن الشماتة بصراحة 
بقت المعقول الوحيد وسط كل هذا الجنون 
و حاليا هى أصبحت حيلة الضعيف 
و بقت هى الشىء الباقى 
الذى أقدر عليه انا و غيرى
لأننا مش قادرين ع اللى كان مفروض يحصل 
وهو عقاب القاتل بحق والقصاص الحق 
مش الدلع والشهيصة والروقان 
اللى مبارك فيهم طول الوقت دول 










واخيرا لو ربنا مدّ ف عمرى 
ولحقت اشوف اليوم دا 
ومبارك غاااااار 
لأن شكله يهموتنا كلنا  واحد واحد
ويفضل قاعد هوه





فمراعاة منى لشعور بتوع اعتبره ابوك دول
خلاص مش هقول لما اسمع انه اتكل
ان مبارك مات ... الله يجحمه 





ولا هقول
 ف جهنم و بئس المصير انشالله 









انا هقول زى عطشيات ف الجوكر 
واسأل : هوه مش مات ؟!!! 
يقولولى : أيوه 
أقولهم : ربنا ياخده كمان وكمان 




و هقول بعد ما يجينى خبره
حسبى الله ونعم الوكيل
 و هقرى الفاتحـــة بس ......... للشهدا
  

---------------------------------------
------------------------------------------------- 
الصور من عند ... Shazouli
ومن مواقع الجرائد الالكترونية 
و تويتر  والنت عموما :)
------------------------------------------------

المتحــرشــون .. يمــرحـــون  

Posted by: فاتيما in





 

على بلاطة كدا وم الاول 
.. أرجو واتمنى ان التدوينة دى 
متزعلش حد خصوصا الأخوة الحريمات
الستات والبنات ألطف الكائنات 
بنى جنسى اللى أنتمى ليهم 
ومنطقى أن دمى ينحرق عشانهم 
واخد صفهم ف الملمات ...
ولكن 




يتحرق دمى بجد وبحق وحقيقى
ولا اعمل نفسى كدا وكدا 
و اتعاطف و انا اصلا مش مقتنعة ؟!!
و لما قالوا هنعمل يوم للكتابة 
عن حكاية التحرش بنساء مصر ف التحرير
بعد اللى حصل ف المسيرة وما قبلها 
 لقتنى هكتب كلام ممكن يتاخد علينا 
مش لينا .. ومفيهوش أى تأييد كما هو مطلوب 
وترددت 


بصوا


اولا 
التعاطف المفروض يكون موجود طول الوقت 
ف كل المواقف 
ولا يختص بجنس او نوع أو سن
لأن الرجالة كمان بيتم التحرش بيهم 
بس مش جنسيا 
اكتر منه فكريا وانسانيا 
وبيطلعوه بعدين ف صورة عنف ع اللى حواليهم 





والأصعب والأسخم والأضل .. هما
الاطفال 
والتحرش بيهم ف الشوارع والبيوت 
وهم الاولى لو حبينا نركز فعلا 
لأن المتحِرش عادة
 بيكون قد تم التحَرش به مسبقا وهوه طفل 
 يعنى اسقاط برضو وتلبس بالمعتدى 
وتشبه بالجلاد بعد ان كان ضحية






ثانيا 
دا مش وقته خالص
والبلد كلها بتولع و على المحك
ونيجى احنا نتكلم ف موضوع 
مش هقول فرعى .. و لا حتى جانبى 
هقول بس انه مش الأساس دلوقتى 
واحنا ف إيه و لاّ ف إيه يا اخواننا ؟؟!!!





ثالثا 
بقى ودا الاهم 
و نجيبها م الاول خااااااالص ونحكى 
هوه كان سبب الهوليلة دى ايه 
علشان على حد علمى التحرش ف التحرير
من يوم 11 فبراير وانتا طالع يعنى 
مش لسه اول امبارح 



بس يحكى ان 
البنات والسيدات
 ما أن ينزلن لميادين التحرير
ف المليونيات والاحداث الكبيرة 
حتى يتعرضن للتحرش البدنى 
واللفظى والفكرى ....الخ الخ 
طيب ممكن سؤال  ؟


نوعية البنات اللى بينزلوا للتحرير دول 
بيبقى شكلهن ايه ؟
يعنى نون النسوة اللى بينزلن دول 
صنف واحد شكل واحد نظام واحد 
 ولا انماط عدة و مختلفين ؟










مظنش طبعا كلهم واحد
بس يعنى ممكن نصنفهن ع الأقل لنوعين 
نوع مشتغل بالسياسة 
ونوع غير مشتغل .. 





مواطنة عادية يعنى 
وملهاش ف المسيرات والمظاهرات 
والعمل السياسى المنظم التابع لجهة ما 
أو حتى بالتدريس والكتابة والتوعية ... وهكذا 
ست او بنت زى حالاتنا كدا 
 لا ناشطة ولا دياولو
و بتنزل تضامنا مع قضية الثورة وفقط 
ومش بتنزل كل مرة .. وكل وقت







وفيه بقى الست او البنت 
الناشطة او المدونة 
او الحقوقية او المنضمة لجماعة او تنظيم 
..الخ الخ الخ 
و دى بتنزل غالبا 
ودايما  .... مش بس تضامنا 
لأ ... دى بتعتبر الثورة شغلها الشاغل 
وكل حياتها تقريبا .. 
وبتعتبر وجودها ضرورى ع الأقل حتى 
 لحد ما الثورة تنتصر وتكمل




طيب 
انا مش هتكلم عن النوع الاول 
لأنهن عابرات ف المواقف والنزولات
بيروحوا وبييجوا 
وبيتعرضوا عادة للتحرش 
برا الميدان وف حياتهن العادية 
فمش هيتكلموا بالتالى ... ويعملوا دوشة 


النوع التانى بقى 
وهن ما اوجه لهن كلامى 
واستنكارى وتعجبى الشديد 


ايه يا بنات وستات الثورة 
و التحرير الميدان 
.. مالكو ؟!!


يعنى عايزين تفهمونى انكم بتتخضوا 
وتتخرعوا و نفسيتكو تتدمر 
من حادث تحرش عدى عليكو ؟!!!
ازاى ؟


يعنى واحدة تفهمنى كدا 
ازاى بنت متمرمطة ما بين 
المظاهرات والمسيرات 
ومتمرنة ع الجرى من الامن 
و المخبرين وقت العركة  والضرب
و دايما فيه احتمالية كبيرة للقبض عليها 
و بتتعرض للإهانات من المعارضين 
وبتوع النظام السابق والحالى 
و عايشة يوميا ف مشاكسات مع خلق الله 
للدفاع عن ثورتنا ف الشغل والجامعة والمواصلات
واحيانا لما حد من جيرانها يشوفها
شايلة يافطة ممكن يسمعها م المنقى خيار ؟!!!
وتكمل وتتحمل وعادى 
فإيه 
يعنى ايه ؟


يعنى ايه بنت او ست بتنزل مسيرة 
او مظاهرة او مليونية و هيا عارفة كويس 
انها ممكن مترجعش بيتها
وتاخدلها رصاصة ولا تروح ع المستشفى 
أو انها حتى 
ينقبض عليها او تحتجز مؤقتا 
 ببساطة كدا 
 ممكن جدا تتعرض لحادثة أخطر م التحرش ؟



معلش انتوا يعنى 
محسسنى ليه 
 ان حريم الثورة دول فافى كدا 
وبسكوتيات وقطط شيرازى منعمة 
و ينشخط فيهم يتخرعوا ؟!!!



اساسا وخصوصا بعد حادثة ست البنات 
وكل بنت وست فيكى يا ثورة 
عاملة حسابها انها لو نزلت مظاهرة او مسيرة 
وارد جدااااا تتعرض للى تعرضتله فتاة العباية 
صح ولاّ انا غلطانة ؟!!!!
عشان اللى بتنزل بقى 
و مش عاملة حسابها على كدا 
المفروض اقول عليها ايه 
غير كلمة انتى بتهرجى يا بنتى
 !!! 

 


آه عملنا مسيرة حرائر مصر 
والعالم كله اتفرج 
بس هل دا من وجهة نظركو اعتبرتوه 
هيوقف انتهاك العسكر للبنات فعلا ؟!!!



اللى هيقول أيوه 
ميكملش التدوينة بقى 
لأنه شخص حالم وبيضحك على روحه 
لأن العسكر لو عاوزين
 ينتهكوا حرمات الشعب دا ألف مرة تانية 
 مفيش حاجة هتوقفهم 
و هما بس بيغيروا الأسلوب والطريقة ..
مش اكتر 



طيب 
عاوزة بنت من بنات التحرير تفهمنى 
ازاى تبقى مستعدة 
لأنك لما تنزلى ف أى مرة وكل مرة 
انك ممكن يجرى وراكى مثلا 
عشر عساكر شرطة عسكرية 
وممكن تنضربى بشوم وسلاح 
وتتقلع هدومك لحد ما لحمك يبان 
وتتصورى على الملأ 
وتنجّرى لمجلس الشعب 
وتتهددى بأن هيتعمل عليكى حفلة 
و تنضربى لما يبانلك صاحب .. ويطلعوكى
وهتخرجى وتطلعى ف التلفزيون بعدها 
وتلاقى شوية كلاب وأنجاس بيقولوا عليكى
 انك انتى اللى غلطانة 
وايه اللى وداكى هناك .. الخ من سفالات
 وف الآخرررررررررررر
تيجى تقوليلى .... انا خايفة 
وبيتحرشوا بيا 
وألحقونى واقتنع انا .... ؟!!

ازاااااااااى ؟

البنات والستات اللى بشوفهم 
ف كل مسيرة او مظاهرة .. أجمد من كدا 
وأنشف من كدا 
وأرجل من كدا ألف مرة 


وفيهن بنات بتقف قصاد المدرعات 
وبتوع الداخلية والبلطجية والشرطة العسكرية 
و أى كلب معدى وتحدف طوب و تشم الغاز 
و توقفله هوه واللى يتشددله كمااااان 
فإيه ؟؟!!!
اسمحولى الحملة الموجودة دى مسيئة 
وغير مجدية بالمرة 





ناهيك عن ان المتحرشين ف مصر حاليا 
برضو ممكن يبقوا تقريبا صنفين




متحرش بطبعه .. العادى يعنى 
و 
متحرش بالصدفة .. مأجور يعنى 




متحرشو التحرير والزحام عموما
ف العادة مرضى بطبعهم 
وطبيعى جداااااا لما يلاقوا مكان زحمة 
مليان بنات زى المليونيات .. 
ان الميدان يبقى جنته وملاذه



أما متحرشى المظاهرات والمسيرات 
خصوصا الأيام الاخيرة 
فهم مأجورين 
مزقوقين علينا عشان يدوا انطباع سىء
عن التحرير واللى فيه 
وتطفيشا للبنات عشان متنزلش 
وتنكيدا ع الشباب عشان يحسسوهم بالعجر 
و صرفا لنظر الشعب المتابع عموما 
عن الثورة نفسها والتركيز ف فرعيات تانية 




معلش تانى ....
لما اسمع بعض الناشطات بتقول 
ان التحرش ف التحرير ممنهج ومقصود 
طب يا ستى ؟
يعنى احنا دلوقتى عرفنا انه مقصود 
يبقى التعامل معاه يكون مختلف 
عن التعامل العادى ف الاحوال العادية 
ولاّ انا غلطانة ف كلامى ؟!!



يعنى المتحرش العادى
 حله سهل ومعروف 
لو قرب منك وانتى لوحدك ... تعلى صوتك 
وتهزأى مامته وباباه وعيلته كلها 
وتلمى عليه البشرية
وأصلا مش هيديكى فرصة 
لأنه هيهرب زى الكلب 
وطبعهم الجبن عموما


دا الحل الوقتى السريع 
انما الحل الدائم .. دا مش وقته








طب ماذا ف حالة ما اذا كان مأجورا
زى حكايتنا دى نعمل ايييييه ؟
ببساطة الحل 
لازم يكون مختلف عن العادى 



يعنى 
الأيام الزحمة اللى زى دى 
مش فيه حاجة اسمها تويتر و نت ؟
 ببساطة 
قبل أى واحدة ما تدخل الميدان 
مش تسأل وتعرف الاحوال عاملة ازاى ؟


 عرفت ان الميدان زحمة .. مثلا 
هل تصّر انها تدخله برضو ف عز زحمته ؟




طيب مضطرة ولازم تدخل حالااااا
يبقى متدخلش لوحدها ابدا 
يبقى معاها حد .. راجل او اصدقاء 



كانت جاية لوحدها و معهاش حد 
مينفعش تكلم واحد من الشباب ييجى ياخدها ؟


مفيش حد مستنيها خالص 
مينفعش تطلب من ناس محترمين 
تتوسم فيهم الاخلاق والذوق
 انها تمشى جنبهم او معاهم
 لحد ما توصل للحتة اللى هيا عاوزاها ؟!!!



دى كلها حلول على فكرة 
انا شخصيا مجرباها وبقالى اكتر من سنة 
ويوم 25 يناير اللى فات 
بعد وصول المسيرة بتاعتنا لكوبرى قصر النيل
استعلمنا من اصدقاء لينا ف الميدان 
وعرفنا ان دخوله شبه مستحيل بسبب التزاحم
وقررنا نقعد برا التحرير لحد ما يروق شوية 
وقد كان ..




ولما رجعنا ع الميدان بليل كان معايا 
خمس رجالة ... من اصدقائنا المدونين 
كانوا ماشيين ورايا و قدامى للحماية 
بس كمان دا
 ممنعش انى اتعرض لتحرش
بس انا متكلمتش ...


ليه ؟


اولا ... 
عشان الموقف دا منطقى جدا 
هيا دى اخلاقيات الزحام المعتادة
والمرضى النفسيين بيتكاثروا ف الظروف دى



ثانيا 
لو كنت زعقت ... او رفعت صوتى 
كان ايه اللى هيحصل ؟
ببساطة الشباب اللى معايا
 كانوا هيمسكوا الولد دا يقطعوه
وتبقى خناقة وبهدلة وممرمطة 
وحد فيهم يتعور 
والميدان يتحول لحلبة صراع 
وبدل ما يبقى ميدان الثورة 
يبقى ميدان روكسى ... ولا جامعة الدول
وهو  المطلوب اثباته 
ودا اللى رفضته
وعديت الموقف ببساطة






حد هيقولى انتى معندكيش دم مثلا 
او باردة 
او وحشة محدش بيبصلك 
أو مثلا مثلا  واخدة على كدا 
هقوله

لأ 
حضرتك
انتا 
اللى فافى 
ومتدلع 

وشكلك عمرك ما ركبت 
اتوبيسات مصر المحروسة 
ولا اتزنقت ف ميكروباصات 
ولا تعاملت مع نوعيات زبالة 
ولا تعرضت لحالة تحرش ف حياتك 
وقادر تميز ان التصرفات المريضة دى 
عرض لمرض اكبر 
 وهوه انحلال الوطن 
مش انحلال الاخلاق والضماير وبس 





المسيرة اللى حصلت 
كنوع من الإعتراض ع التحرش ببنات التحرير 
اسمحولى 
مع احترامى الشديد لكل من شارك فيها 
واللى انتهت بتحرش اكبر ..




معلش 
كنتم غير موقفين بالمرة 
من وجهة نظرى المتواضعة 
يعنى لما سمعت عن الأستعداد للمسيرة دى 
مقدرتش اطلاقا اربط بينها خالص 
 وبين مسيرة حرائر مصر 
اللى كانت صرخة مدوية 
ف وجه المعتدى الحقيقى على حرمات 
وبنات وشرف مصر 



ومقدرتش اتعاطف 
وانزل كالعادى أشارك 
زى ما كنت بشارك دايما 
ف أى مسيرة ومظاهرة
ليه ؟
ببساطة لأن الفكرة مستفزة 
لاطراف عدة



مستفزة 
لأن دا مش وقته خالص 

مستفزة
 لأن المتحرش اللى بجد مش هنيفع معه
 يفط و وقفات ف الشوارع تقوله شيل ايدك 


مستفزة 
لأن فيه ناس بتموت ف المعتقلات 
والسجون وعندهم هموم اولى بنا 
ان نلتفت اليها هيا الاول ونركن ف همنا شوية 


مستفزة 
لأن المتحرش المأجور 
لن يتوقف بمسيرة ضده وانما هيرد عليها 
عشان يحلل القرشين اللى واخدهم 
وهذا ما حدث بالفعل !!!



ومعلش ... نقطة كمان 
انا اتفرجت على تغطية الاعلام للحدث 
وشفت جزء من وقفة البنات ف محمد محمود 
واستغربت شوية ان اغلبهن مش محجبات 
و اللى يعرفونى 
يعرفوا انى محجبة 
بس حجاب عادى جدا 
وبتمكيج وبحط برفان
ومنيش متدينة ولا ملتزمة جدا
ومنيش بأفكار مغرقة ف التطرف 
وبينى وبين التيار المتأسلم ف التدوين 
ما صنع الحداد والنجار والسباك كمان ....






ولذا فنية التعصب مش موجودة 
و السؤال هنا يطرح نفسه
هما البنات المحجبات 
يعنى الى هما سواد بنات مصر الأعظم 
منزلوش بكثرة ليه ف الوقفة دى
زى ما كل حريم مصر بكافة اطيافهم نزلوا 
بعد حكاية ست البنات 
او ع الأقل الكاميرات 
مجبتش عدد اكبر منهم ليه ؟!!!





البنات اللى وقفوا دول مفكروش 
انهم كدا بيدوا انطباع ان الحكاية هتتفهم 
انها قضية فردية 
و لا تنسحب على الباقيات 
يعنى وكأن البنت المحجبة مبيحصلهاش كدا 
مع ان التحرش دلوقتى وصل لحد المختمرات والمنقبات ... اقروها كويس 
المنقبااااااااااااااااااااااااات 
بيتم التحرش بهن كمان ... آه والله 
فأزيكم بقى ى ى ؟!!!







هل المسيرة حلت المشكلة ؟
هل الشعارات هتغير المعتدى وتهزه من جوا ؟
هل هتفرق بجد ؟
هل هتخلى نفسية البنات احسن ؟
هل هتنهى الإنتهاكات والعنف ضد المرأة ؟
هل هتخلى المجتمع يواجه ضعفه 
وهوه اصلا مش راضى يعترف بخنوعه
 للنظام والعسكر و الجوع ولقمة العيش وبس ؟؟


مظنش 

والقضية لم تعالج بعد 
واللى حصل مجرد مكعب تلج اتحط ع الجرح 
مسكن و ملطف مش اكتر





الحل المؤقت 
توفير الحماية للنوع دا م المسيرات 
مع الوضع ف الاعتبار انها ممكن دايما 
تقلب بغم ... !!!




اما العلاج الحقيقى فمحتاج وقت 
ومحتاج كمان تغيير جذرى وحاسم 
واللى ف ايدهم الحلول
وتنفيذها مش عايزين 
لأن جزء من المشكلة اصلاااااا 
التحرش طول عمره موجود 
عندنا و ف كل دول العالم متقدمة ومتخلفة 
بس نسبته اللى بتتفاوت 
وانتشاره عندنا بالكيفية دى له اسبابه 
واهمهما فيما أظن 
ان المناخ العام عندنا بيشجعه 
يعنى الأمن من مصلحته خلق حالة الفوضى 
والذعر بين المجتمع 


ومش حكاية الثورة والتحرير وبس 
دا من زمان 
وافتكروا حوادث التحرش ف العيد
 وفتاة العتبة وغيرها ....





كل دا ممنهج فعلا ومقصود 
لزعزعة امن البنى آدم المصرى 
ودفعه للمشى جوا الحيط مش حتى جنبه 



المتحرش لو لقى رد فعل من البنت 
هيجرى زى الجبان 
بس لو لقى امن و شرطة ف المكان 
مش هيهوب أصلااا ناحية أى بنت 
لو لقى عقاب لحد قبله اتحرش بواحدة 
هيفكر الف مرة قبل ما يعملها 


لكن 
احنا بنتكلم ف ايه ؟




طول ما فيه حد مستفيد من انتهاكك 
وراكب ومدلدل رجليه تفتكر ايه هيتغير ؟!!
 طول ما ست البنات حقها ضايع 
وسميرة ابراهيم من قبلها 
وطول ما حق الشهدا والمصابين 
وكل متضرر عانى من نظام مبارك الفاسد
لسه ...  بيعانى


وطول ما القتلة برا القفص احرار 
و  الشفيق هيبقى ريس 
و الاخوان همهم مصلحتهم وبس 
وطول ما الكل خيف على اكل عيشه
و طول ما بينداس علينا ونسكت 
هيفضل الحق ضايع
وهيفضل المتحرشون ... بنا ... يمرحـــون 




انا اسفة اذا كان البوست طويل 
وفيه كلام بيضايق 
بس انا منكن يا بنات مصر 
وبقول اللى شيفاه 
عشان منضحكش الناس علينا 
حملات التحرش والتوعية دى 
ولا هتجيب أى نتيجة ملموسة 
وبالعكس هتخلينا نسمع تريقة و تهكمات
 من اللى يسوى واللى ميسواش 
من بعض البشر المندرجين ويصنفوا 
تحت بند المتحرشين برضو .. بس لفظياً
و قارفينا ليل نهار بألفاظهم اللى زى وشهم




طالما السبب 
ف المشكلة موجود
هيفضل التحرش موجود 

 
المتحرش المزقوق هيبطل تحرش 
لما اللى زقه علينا يتلم 
ويتعاقب وتنكسر شوكته




اما المتحرش الطبيعى 
فهيبطل تحرش لما يلاقى يشتغل 
ويتجوز اللى بيحبها و يكون اسرة وحياة 
ويلاقى علاج و مواصلات ويلاقى كدا 
بإختصاااااار    
 عيش ... حرية .... كرامة انسانية





نوفرله حياة محترمة 
و لو محترمش نفسه نجيبه و نحاسبه 
ونقوله تعالى بقى 
.. القانون يعاقبك
وساعتها البنات تمسك يفط ولافتات 
وتنزل تقول قطع ايدك يلى بتتحرش بيا 
وتبقى مسيرات زى الفل والورد والياسمين





لكن قبل ما دا يحصل 
المأساة مستمرة 
وقبل ما نحزن 
اننا وصلنا لهذا المنحدر
وبناتنا بيتحرشوا بيهم 
افتكروا ان دا الطبيعى 
والمنطقى ولازم هيحصل 
وهيفضل يحصل طول ما الدنيا مبتتغيرش 
ونفس الوشوش كاتمة ع الأنفاس 
وقاصدة تربكنا 
وتخلينا ماشيين كاشين 
وخايفين




وما دامت الاشكال الضالة بتلف و ترجعلنا تانى 
بعد ما كنا افتكرناهم غاروا ومشيوا 
فمتزعلوش يا بنات 
لأنكن بتستباحوا من البعض


ولأنه بيحصل كدا 
واجمدوا واستجدعوا اكتر واكتر 
السكة لسه طويلة 



ثم منتظرين ايه و البلد ذات نفسها
 "مصر" بقالهم سنين ... بيتحرشوا بيها ؟!!!




--------------------------------------
---------------------------------------------