.

.

بــدلـة و بيــجامــا ... و كســـرولّـة  

Posted by: فاتيما in










ايه ؟؟
كرسى ف الكلوب 





لأ 
التدوينة دى
 مش كرسى ف كلوب الفرح 
المنصوب دلوقتى ف كل مصر 
بس محاولة بسيطة لتفادى الإحباط 
الذى اراه قادما على استحياء يتمخطر 


أيوه احباط 
بس .. مش من الثوار 
و لا من رد فعل الناس العادية 
ولا من حالة الفزع اللى راكبة الكل 
ولا حتى من تصرفات العسكر 
والقوى السياسية و أخص بالذكر الاخوان 
ولا حد من دووووول ابدا



المحبط فعلا ..  وبشدة 
الأسامى الكبيرة 
اللى عليها العين والنية والامل فى ركابها 
والمصريين الحالمين ف كل الميادين 
جوا وبرا قاعدين مستنينهم يشوفوا 
هيعملولهم ايه  
ويحققوا حلمهم ازاى
الحلم اللى اندفع فيه كتيييير قوى
مش سنة ونص بس .. لأ 30 سنة واكتر



وللأسفففففف
الخيبة هتركب جمل وهنرجع مدحورين 



متشائمة 
لأ بالعكس والله 
انا متفائلة بالناس والشعب 
بس من ناحية العالم دى 
سواد حاااااااالك أبصره بعينى ولا شىء غيره





اولا
 سؤال بسيط 


هوه حكم مبارك كان فجأة ؟!!


ولا فجأة ولا نيلة 
وسير القضية كان ينبىء بذلك 


طيب 
الشعب الغلبان اتفاجىء وليه عذره 
قعد يقول لروحه زى مابيقول لروحه 
من ييجى سبعتلاف سنة و زيادة 
اصبر ع الجار السوو
و خليك ورا الكداب لحد باب الدار 




و سكت و اتحمل و صِبر
لحد ما يشوف آخرتها 
ماشى .. شعب طيب
وراضى بقليله ليه مبرراته
 ووبراءته وسذاجته السياسية المقبولة جدا  


النخبة بقى 
ايه نظامهم ؟!!!


يعنى الاخوة المرشحين 
اللى خرجوا ف الجولة الاولى 
اللى كان المفروض
ميدخلوهاش أساسا بس ... معلش
و قعدوا قصاد كاميرات الفضائيات 
بثبات انفعالى ينحسدوا عليه 
يعترفوا بفشلهم و يتأسفوا للناس 
عشان متلمّوش م الاول وخلصّونا 
وسابوها خالصة مخلصة للعسكر و الاخوان 


وبعدين وعدوا يصححوا هذا الخطأ 
ويعملوا مسار تالت 
بدل الزنقة السودة اللى الشعب
 اتحط فيها دى بسببهم
وسبب انانيتهم وقصر نظرهم 


طيب 
كتر خيرهم
وثقافة الأعتذار على عيننا
ايه بقى ؟؟


محدش فيهم كان متوقع الحكم دا ؟
ولا رد الفعل اللى بعد الحكم دا ؟؟
ولا ايه المفروض ينعمل بقى 
استفادةً من الحكم دا .. ؟!!






اومال أى واحد فيهم
لو كان نجح لامؤاخذة كان هيحكمنا ازاى ؟!!!





يعنى سيناريو الاحتمالات 
لأى حدث قد تمر بيه البلاد 
مش المفروض موجود عندهم 
ولا هيا برامجهم مقتصرة فقط
على ازاى نزود الاكل 
ونحسن التعليم و الصحة 
و تقنين وضع التوكتوك
اما الامن والسياسة والتوزانات والتوقعات
مش ف دماغهم من اساسه ؟!!!




المنظر اللى شايفينه ف الميدان 
محدش توقعه بالكثافة دى ازاى ؟!! 
خصوصا انه انتقل
 لكل محافظات الجمهورية تقريبا
بما فيها المحافظات اللى عمرها يا نضرى
ما نزلت مليوينة زى دمياط ..
دا .. حتى المنوفية من قرفها وغيظها
نزلت وخرجت .. فإيه ؟








الزخم دا 
محدش عمله حساب ليه ؟؟


يعنى السادة المرشحون 
مش واخدين بالهم من هذه القوة 
اللى ممكن استخدامها 
ولا هوه برضو
طبق الاصل عيد الثورة اللى فات 
لما نزلنا بالملايين 
وروحنا بعد كدا قفانا يقمر عيش
واللى عاوزه العسكر هوه اللى مشى 







 ويعى اى خطوات وقرارات قوية ف اول يوم 
السبت و بعد صدور الحكم 
مش كانتهتبقى مؤثرة 
و أشد من كلام هيتقال النهاردة التلات ؟!!


هما ليه لسه مش فاهمين
ان كل يوم بيعدى 
السخونة بتبرد 
والجو بيهمد
 والروح بتوهن
والنفِس بتتسد
والثقة بتتزعزع فيهم ؟!!



ليه محدش علمهم الحكمة الخالدة 
اللى كانوا بيكتبوهالنا على ضهر الكراسات
 زمااان واحنا عيال بتاعت 
اطرق الحديد يا بابا و هوه ساخن ... !!!


هما ليه نايمين على روحهم كدا ؟ 
ليه صايصين كدا  
و فاترين كدا
و باردين كدا ... ؟!!!



اومال لو كان حمدين نجح 
و بقى ريس 
كان هيلم البلد ازاى ؟
كان هيوجه الجموع ازاى ؟؟
كان هيسيطر على اى اعمال عنف ضده
من الفلول والعسكر ازاى ؟؟



مش كان هيعتمد ع الناس
ولا كان هيستنى شرعية قانوينة 
و المساعدة م العسكر عشان يمشى البلد ؟؟؟


طب اهى البلد اهى 
من غير عسكر و لا قانون 
ناسها بيقولوله هوه وابو الفتوح 
ومعرفش ليه خالد على .. بس يلا 
احنا معاكم اهو 
وشوفولنا مخرج للبلد ... حالاااااااااا



هاااااه 
ازيكم ؟


ايه اللى حاصل دلوقتى ؟!!

مفيش




وهنا
 مكمن
الاحباااااااااط 




الاخوة المرشحين التلاتة 
وبرضو مع تحفظى الشديد 
على خالد على اللى معرفش ايه لازمته 
بس ماشى...اهلا وسهلا 


المهم 
التلاتة الكبار
زى ما بيحبوا يطلقوا عليهم 
اتجمعوا 
و تم اقتراح مجلس رئاسى مدنى 
وتاااااااانى 
مع تحفظى
 على فكرة المجلس المدنى دى 
اللى متنفعش خلاص 
ولا ليها محل من الأعراب
لأن الاول مكنش فيه مجلس شعب 
ولا مجلس وزرا 
ولا أى مؤسسات تناطح وتختلف ع صلاحيات 




بقول المجلس المدنى ف بداية الثورة 
كان مقبولا 
كان هيستلم و يبتدى يلم صلاحيات 
و يكسب اعتراف العالم بيه 
انما دلوقتى .. وفيه انتخابات رئاسة 
جولتها التانية شغالة.. ايه المنظر دا ؟
متوقعين مين يعترف بشرعيتكم ؟
ثم هتتفقوا ازاى 
وانتوا كام نفر و راس وفكر مختلف؟!!


قصره 
اللى كان ينفع زمان .. يمشى زمان
و  دلوقتى ميجوزشى 
انما ماشى 
نعديها 





اعملوا السخام المجلس المدنى
ويمكن ظننا الويحش يخُلف 








قولنا موافقين 
دخلونا ف قصة تانية 


طب نتعاون مع الاخوان 
اللى مبيحبوش يشاركوا حد 
ونستخدم رعبهم الحالى .. من شفيق
الاخوان استندلوا
وعملوا حركة واطية من بتوعهم
و قالوا محناش لاعبين 
طبعا .. هما ميحبوش الشركا الضعفا 
العسكر والنظام أبقالهم 
خلاص .. غوروا ف داهية  


يبتدى الكلام يتنتور من هنا وهناك 
ندخل حازم ابو سماعين
عشان السلفيين .. ميزعلوش 
طب يا جماعة ... عمرو موسى
 اللى عدى 2 مليون صوت ملهش نِفس
 لأ ميجيش
ليه .. ؟
أصله .. فلول 




اهييه !!
طب ما الاخ سليم العوا مش فِل 
و محسوب ع الثورة
 ولا هيتاخد بذنب الاسلاميين 
طب .. منتوا قولتوا حازم .. اشمعنى




والاخوان قالوا المجلس مش دستورى
وحزب النور وافق بتحفظ 
وحزب التجمع كالعادة داخل يهلفط 
ويقولك مقررناش بس شفيق مش فلول 
و العسكر على جنب بياخدوا القوى السياسية 
ورا المواسير عشان يطبخوا معاهم 
و المجلس الاستشارى العرة 
فجأة ظهر ع السطح
بعد ما كنا افتكرنا جثتهم غرقت ف المالح
 ومش هتقب تانى عشان يلعبوا ف الدستور
ويعملوا حركات تشويش وشبورات  




الزغلولة الكبيرة بقى


البرادعى 

الراجل يا كبدى قال مليش ف الانتخابات
واحترمناه والله وقولنا بيفهم
وبعدين انسحب واتحايلنا عليه
مصر محتاجاك يا رآفت
قام راجع و عمل حزب الدستور 
وادى وش الضيف ..



وبقينا بنسمع عنه من تويتر و تغريداته
 وخليك خفيف .. يبقى دمك لطيف 


و إذ فجأتن كدا 
بعد بدء الانتخابات
 وكام تغريدة حمضانة
ويصدر الحكم .. فنسمع صوت من آخر الحمام 
بيقول .. البرادعى جاااااااااااااى
ومحدش بقى يزعله 
 وتصريحاته بإنه مستعد
 يشارك ف المجلس المدنى ..
بس بشرط .. القوى السياسية تتوافق 


يوه !!!!
طب انتا ايه دخّلك ف القصة دى
والمجلس المدنى دا فيما يبدو
 كدا والله اعلم للمرشحين الرئاسيين و فقط 
الناس اللى قررت تتمرمط 
وتنزل وسط الناسوتتحمل اللوم والتقريع 
وتتبهدل وتتبعتر كرامتها وتشارك 
وتخسر
ف الوقت اللى انتا قولت فيه مش لاعب 



اشمعنى دلوقتى ..
جاى تقاسمهم المكسب 
اذا كان فيه مكسب ف الحكاية يعنى .. ؟؟


ثم انه ..حضرتك تعلم جيدااااا
ان القوى السياسية مش هتتوافق 
الى ما اتفقوا و هما لسه ع البر  
هيتفقوا دلوقتى 
وكل واحد بقى وراه اللى وراه
وعنده اللى عنده 
وف دماغه اللى ف دماغه ؟!!!


وبعدين انا ورمت منك بجد
كل شوية .. لأأأأه 
الكرسى دا مش مريحنى ..
 انا حاوز اقحد هناك 
ولما نروح هناك .. تقول لأأأأأه برضو
هنقعد نلم ف التعابين دى لحد امتى ؟!! 




نظام وضبولى  الشقة
وافرشوها وانا جاى اسكن ع الجاهز
دا مينفعش ... 
هوه احنا علينا الهد
والشيل والوقفة مع الصنايعية 
وقلة القيمة والبهدلة و كع الفلوس 
وحرقان الدم و اللف ع المحلات 
وتطليع العفش وتوضيب كل حاجة 
وف الآخر حضرتك تيجى تقعد ف الصالون 
تشرب الحاجة الساقعة ؟!!!


ليه ان شاء الله 





هنقعد
ندافع عن النخبة 
 ونطبل ليه وهما غلط ؟






و لأ والنبى بقى احنا اتهرينا 
وانه لانفقاعاااا للمرارة بإمتياز






احنا اصلنا لا ناقصين ايد ولا رجل ولا دماغ 
عشان ندور ع اللى يمشيلنا امورنا 






محنا جربنا وجودكم .. لقينه ولا حاجة 
وجربنا عدم وجودكو .. لقيناه ولا حاجة برضو 
فخلاص بقى التناكة دى ملهاش لازمة 



ولو البرادعى حيطة مايلة 
الموجودين حيطة مايلة برضو 
الناس ف الميدان قاعدة نايمة 
دماغها ساح ف الحر 
مهدود حيلها ف المسيرات والهتاف 
ومستنيين حمدين وابو الفتوح واجتماعاتهم 
مع باقى القوى السياسية عشان نخلص 






قوم ييجى حمدين و ابو الفتوح وخالد على 
ويقفوا على المنصة بعد تلات تيام
وف آخر الليل
عشان يتمخض الجبل و يلد فأرااااا




احنا هنكمل ثورتنا 
مفيش جولة تانية الا بقانون عزل 
والمجلس الرئاسى يتم الترتيب له 
و بكرة مليوينة يا عيااااااااال 
بالونات وشماريخ و هيصوا يلااا 




طب
النهاردة التلات اهو 
وحتى الجمعة القادم ...
المسيرات هتنطلق من اكتر من مطرح 
وكل واحد م المرشحين هيقود مظاهرة 
يا فرحتى يا سعدى يا هنايا  
ألطم يقولوا الولية اتجننت ...؟!!!!!




بقى دورك يا حمدين ويا ابو الفتوح 
يتراجع من مرشح قوى
كان هيبقى رئيس 
لواحد عادى نازل وسط الناس 
.. وبس ؟!!!



طب البرادعى وراجل بركة
وبنطلب منه يبنضم للناس 
عشان هوه سياسى ولابس جونتى 
متبهدلش زيكم و لا له خلفية حزبية 
ولا حتى له مؤيدين رسمى
بأصوات تعدت الملايين 
لما نقوله انزل معانا
وكفاية نورك علينا يبقى ماشى 
انما انتوا ؟!!!


انتوا تتراجعوا من موقعكو
خطوات لورا ... لييييه ؟!!!


والناس اللى معتمدة عليكم دى ؟
هتروحوا بيهم لفين ؟!!!



أقولكم انا 
م المنظر الحالى 
المسيرات والمظاهرات والمليوينات 
هتستمر الغضبة
وتمتص التحركات حماس الناس 
لحد ما يتعبوا و الشمس تنقحهم 
والعدد ف كل اعتصام يفضل
 يقل يقل يقل 
لحد ما سيناريو كل مرة .. بتكرر بالمللى 




عدد قليل و اختراقات امنية 
مخبرين ف صورة باعة جائلين 
بلطجية تدخل ع المعتصمين ف لحظة مرتبة 
يحصل عركة وبهدلة 
ناس تنصاب
ودعوات للتدخل والحماية 
الامن يسيب الموقف يسخن لحد 
ما المواطنين الشورفاء تلعلع ع الآخر 
ويتدخل اخيرا
و يفض كل حاجة 
وكل سنة واحنا طيبين 






يكون بقى ع الصعيد الآخر 
مرشحى الجولة التانية ماشيين
ومكملين الاعادة و ف طريقهم عادى 
وهووووووب نلاقى روحنا لابسين البلوفر 
ف الحر دا لحد ما يطبق على مراوحنا 
ونفطس 



ولو انى أشك ف حكاية البلوفر دى
لأن احد الأصدقاء 
تنبأ بأنه مش هيوصل
ولا هيشم الكرسى .. وانا بصدقه دايما 


:)



يعنى وحد متعقل ف بر مصر .. يكره ؟!!





وسؤال سخيف بيلح عليا كل شوية
هما يا ترى جنرالات العسكر 
بيضحكوا علينا و على منظرنا دلوقتى
كل خمس دقايق ولا عشر دقايق
ولا كل نص ساعة ؟!!! 


قصره 




المشهد بيقول 
نخبة سياسية اهيف من أن نحترمها 
كلهم و بلا استثناء 
أقل م اللحظة التاريخية
 وبجبنهم دا 
هيفوتوها علينا كالعادة 


كل واحد فيهم خايف على جاكتته 
لتتكرمش من غضب العسكر
كله عاوز يمسكها برضاهم وموافقتهم 
عشان عارف ان البلد ف ايديهم
ومحدش فيهم للأسف
واثق ف نفسه ولا قادر يقف وقفة راجل 
ويستخدم غضبة الثوار والشعب ف محلها 



كل واحد بيتكلم ع السلمية 
ومش عاوز دم ولا عنف
عشان ميدفعش تمن دا قدام 
وهوه يعلم .. 
او لا يعلم ودى مصيبة اكبر
انه بتتعامل مع عدو لن يتركها له
الا بالدم والعنف 
ومحدش يلفهاله
 ف ورق هدايا لميع ويربطها بفيونكة
ويقوله اتفضل يا باشا 
مبروك عليك البلد 
الا بقى 
اذا كان شارب شاى بالياسمين معاهم 



اللى مزعلنى مش النخبة دى
و لا ضعفها و هشاشتها 
اللى مزعلنى بجد 
الملايين اللى ف الميادين 
واللى لسه حاطين امل عليهم 


انا شخصيا
 شجعت اللى حواليا على حمدين
ف الجولة الاولى مع انى مقاطعووون 
لكن قولت ولسه بقول وهفضل اقول 
انا مش هبصم لأى حد بالعشرة 
فكرة التأييد على بياض .. لأ
مينفعش .. خلاص .. بح 
واللى عاوز يبقى ريس البلد دى برضايا
وياخد صوتى  .. لازم يبقى قد اللحظة 
ودماغه تسبقنى وتسبقنا كلنا  
مش اقعد اقوله 
يا لهوى اعمل كذا 
يا خرابى سيبك من كذا 
يا نصيبتى العيال مستنية قرارك
يا دى النيلة ع المرار الطافح
وما تخلصونا بقى





الكلام دا بسمعه حواليا
و الكل تقريبا بيقوله 
ولما يبقى الناس سابقين النخبة كدا 
يبقى العيب ف الأسامى دى 
اللى واخدة اكتر من حجمها الحقيقى  
ولازم كل حى يوقف عند حده 
وميوديناش البحر ... 






احنا هرمناااااااااااا





هتقولوا احبطتينا ليه كدا يا فاتيما 
وفين الحل ؟!!


هقولكم مش احباط 
دى قراءة للمشهد مش اكتر 
وانا اكتر واحدة اتمنى ربنا يخلف ظنونى
والناس دى تطلع قد المسئولية 
بس للأسف 
القماشة أى كلام ..  
تيجى تديها لترزى بيفهم .. هيقولك 
مينفعش حضرتك خالص افّصلك منها بدلة 
بس ممكن اعملك بيها بيجاما
 تقعد بيها ف البيت و كدا .... ماشى؟


هوه دا اللى احنا فيه 
نخبة أى كلام 
وشعب مستنى يسمع احلى كلام 




مش معقول بعد كل صبرنا 
نقبل المسخرة دى
و بدل ما نلبس البدلة واحنا خارجين
يقلوا قيمتنا و يضحكوا علينا الخلق
فيلبسونا بيجاما زرقا مقلمة
و يبقى اللى فاضلنا كسرولة فوق دماغنا










الحل فينا احنا ومننا 
ومحدش يقولى اقترحى
 واحنا ننفذ واحد اتنين تلاتة 
عيب لما يبقى الميادين فيها رجالة 
وقفت قصاد الرصاص والمدرعات والغاز 
ولسه عاوزة تقف وتموت ... و اجى اقترح انا ؟!!




العالم الحلوة دى لسه موجودة وبخيرها 
واحنا الناس العادية اللى نمشى معاهم
والعالم الحلوة دى مشكلتها بس
انهم لسه حاطين أمل ع الكبار 
ويوم ما يفقدوا فيهم الامل تماما ..
كلنا تانى ... هنتحرك


وياريت الناس دى تفتكر 
ان النخب والكبار دول ف ال18 يوم 
كانت غالبا حلولهم اصلاحية و مسالمة 
مكنش فيها نسبة مخاطرة عالية
ولا مغامرة 
وللأسف أو سنة الحياة 
ان دى سمة هذا الجيل 
حتى الشرفاء منه 






يعنى مقدرش اقول غير
ان حمدين راجل نضيف 
وابو الفتوح شرحو
و على عينا وراسنا الجوز 
اخلاق زى الفل ونقاء .. ماشى 
بس فين روح المخاطرة ؟
فين التحدى واللى يحصل يحصل ؟
فين الوقوف قصاد الغولة وانشالله نطرطش دم ؟
فين الإيمان بالثوار والشباب والرجالة  
اللى مستعدة تموت وتعيش وتموت تانى 
عشان البلد دى تنضف ..
فين ؟


فين القوة والشجاعة
لحد التهور .. اذ ان تعريف الثورة كدا 
مفيش ثورة متعقلة
وواحدة واحدة
وعلى مهلنا للمؤسسات توقع
و اين الشرعية الدستورية
و الهجص اللى مصدعينا بيه دا
بقالهم سنة ونص لحد ما خلونا نكفر 
مفيش ثورة كدا اصلاااااا



المجال لا يتسع للحدث عن شفيق 
بس ملخص مؤتمراته الصحفية 
غير انها تصلح "كأرشيف" هايل
 لموجة كوميدى 
يعملوا بيه حلقات ف رمضان اللى جاى 
الا ان مجملها يتلخص ف انه 
هيبتدى بالإخوان اول طبق ف حفلة الانتقام
ثم يدوّر ع الثوار و أى حد تانى بعد كدا 
له شوق ف أى حاجة ...


مرسى والاخوان من قبل ومن بعد 
انا فرحانة بغبائهم جدااااا وبطمعهم 
اللى عامى عيونهم عن الحفرة الوااااسعة
اللى هيقعوا فيها 
وأى كان اختيارهم ..
مواجهة العسكر او الأتفاق معاهم 
ففى الحالتين هما بيخسروا الجلد والسقط 
و دا مصلحة للثورة ع المدى البعيد 








لكن .. الخطأ هندفع تمنه كلنا 
ويوم ما شفيق يمسك و يحّط ع الاخوان 
لازم هنقف جنبهم و نعترض ونرفض 
زى ما رفضنا ضرب السلفيين ف العباسية 
لأن المبدأ .. مبدأ 



الملخص يا اخوانى
بعد هذا الفاصل المرير من الهزيمة 
اللى عاوز ينزل الميدان .. ينزل 
و من حق كل واحد يحلم
و يستنى بكرة احلى 
بس نصيحة اخوية منى
لا تأملوا خيرا من هولاء ... 
وانتظروا الخير من ربنا ومن أنفسكم 




و لازم نطمن ان احنا الأقوى
و الزمن دا زماننا احنا 
ولازم لعبته تمشى بقواعدنا احنا 
مش قواعد زمان و لا سياسة زمان  

احنا بكرة الحقيقى مش هما 
متحطوش عليهم امل كبير 
عشان دا آخرهم ... والثورة مستمرة
بس من غير تفخيم ذوات واشخاص
و من لا امل على سراب
 و من غير برادعى و لا غيره
و من غير بيجاما
و لا ... كسرولّة
الا على دماغ العسكر و اللى معاهم 
ان شاء الله  




------------------------------
يوماتى بفطر أمل 
وأتعشى بالإحباط 
---------------------------------------------


This entry was posted on الثلاثاء, يونيو 05, 2012 and is filed under . You can leave a response and follow any responses to this entry through the .

3 كــــلام بيطــبطـــب عـــلى قــــلبى و روحــــى

فاتيما الغالية ..ليتهم يسمعون ..ليتهم يفهمون ..والله انا اللي عمري مانزلت التحرير لو لقيت حمدين عايزنا وراه حانزل وان شالله يكون آخر يوم في عمري ..فاتيما انا من الجيل اللي بيحب مصر قوي من الجيل اللي فاهم يعني إيه جانبي الأيسر قلبه الفؤاد وبلادي هي لي قلبي اليمين من الجيل اللي فاهم يعني أيه لما الواحد يسافر ويرجع بيقولوا عاد إلى تراب الوطن لأن تراب الوطن ده قيمته غالية عند اللي يقدرها ..انا مش عايزة الناس تطالب بدم الشهدا لأن أكيد اللي مات شهيد بالفعل ماكانش عايز مقابل لشهادته غير إننا ما نضيعش البلد بعده ساعتها بس حايكون دمه راح هدر مهما دفعوا لأهله خمسين والا مية والا حتى ملايين فاتيما انا حاسة ان كل السنة ونص دي كانت كابوس وخايفة نصحى منه مانلاقيش فجر نلاقي عتمة تاني فاتيما انا من جوايا حزينة قوي وحاسة ان الناس كلها إلا القلة "الشفيقية "حزينة زييلأن الإخوان احنا عارفينهم وواخدين حذرنا منهم لكن شفيق للأسف مش عارفين وراه إيه وربنا يستر ..تحياتي

متفق معاكي اوي يا فاتيما احنا الاقوى و لازم نبلور قوتنا في مصلحة الشعب
احنا اقوى لما بتوحدنا قضية واحدة
بس في حاجات كده ينفع اختلف فيها معاكي اللي نزل مش نزل علشان انتخابات ولا مجلس رئاسي اللي نزل نزل علشان محاكمة مبارك الهزلية و اللي مكنتش اليومين دول مكنش حد هينزل علشان شفشق و لا غيره بالعدد ده
علشان كده متنتظريش النخبة تعمل حاجة في قضية تانية غير محاكمة مبارك اي حاجة غير دي مش متحدين عليها
ان جيتي بقى لحتة مجلس رئاسي مينفعش من غير اخوان صحيح هم مكنوش في الثورة و لا معاها اغلب الوقت صحيح قالوا عليهم بلطجية بس هم اغلبية البرلمان اللي انتخبه الشعب مينفعش ييجي مجلس رئاسي و البرلمان ميعترفش بيه
علشان كده انا باؤيد فكرة مجلس قيادة ثورة نتحد كلنا فيه الثوار بكل اطيافهم و مذاهبهم يطلاع قرار واحد نلتف كلنا عليه
صدقيني لو ده حصل و كل الثوار ايدوه و اتفقوا على مبايعته في الميدان على ان كلام المجلس ده هو مطالبنا كشعب هيبقى له سلطة اكبر من الرئيس اللي هييجي
الانتخابات هتتكمل سواء شئنا ام ابينا سواء ابطلنا او قاطعنا (بالرغم اني مقاطع) بس هتكمل و هتجيب رئيس
دورنا احنا ندعم مجلس ثوري يبقى رقيب على سياسة الرئيس اللي هييجي و يعترض و يعرض مطالبنا في الوقت المناسب و ميسيبهوش يشتغل براحته
دورنا احنا هو الاتحاد اولا و التوافق على افراد المجلس الثوري ثانيا و الرضا انه يمثلنا ثالثا و دعمه رابعا لما يعترض على حاجة يلاقي وراه ملايين في اي قرار ياخده
لو ده حصل صدقيني لا مهم انتخابات و لا رئيس هييجي الا و عارف ان عليه خمستاشر مليون عين هيحسب حساب اي حاجة يعملها
هتقولي كده بتشق صف الشعب و بتقسمها اخوان يحكمو و مجلس يراقبهم و ده هيعمل ضغينة هاقولك اللي شق الصف هو اللي قال في فسطاطين و هو اللي قال الصناديق قالت نعم احنا بس بنعبر عن نفسنا
معرفش ان كان كلامي صح و لا غلط بس ادينا بنفكر

mesh 3arfa ne3ml eh zay ma tekon 2aflt mn kol etgah
!

إرسال تعليق