.

.

المتحــرشــون .. يمــرحـــون  

Posted by: فاتيما in





 

على بلاطة كدا وم الاول 
.. أرجو واتمنى ان التدوينة دى 
متزعلش حد خصوصا الأخوة الحريمات
الستات والبنات ألطف الكائنات 
بنى جنسى اللى أنتمى ليهم 
ومنطقى أن دمى ينحرق عشانهم 
واخد صفهم ف الملمات ...
ولكن 




يتحرق دمى بجد وبحق وحقيقى
ولا اعمل نفسى كدا وكدا 
و اتعاطف و انا اصلا مش مقتنعة ؟!!
و لما قالوا هنعمل يوم للكتابة 
عن حكاية التحرش بنساء مصر ف التحرير
بعد اللى حصل ف المسيرة وما قبلها 
 لقتنى هكتب كلام ممكن يتاخد علينا 
مش لينا .. ومفيهوش أى تأييد كما هو مطلوب 
وترددت 


بصوا


اولا 
التعاطف المفروض يكون موجود طول الوقت 
ف كل المواقف 
ولا يختص بجنس او نوع أو سن
لأن الرجالة كمان بيتم التحرش بيهم 
بس مش جنسيا 
اكتر منه فكريا وانسانيا 
وبيطلعوه بعدين ف صورة عنف ع اللى حواليهم 





والأصعب والأسخم والأضل .. هما
الاطفال 
والتحرش بيهم ف الشوارع والبيوت 
وهم الاولى لو حبينا نركز فعلا 
لأن المتحِرش عادة
 بيكون قد تم التحَرش به مسبقا وهوه طفل 
 يعنى اسقاط برضو وتلبس بالمعتدى 
وتشبه بالجلاد بعد ان كان ضحية






ثانيا 
دا مش وقته خالص
والبلد كلها بتولع و على المحك
ونيجى احنا نتكلم ف موضوع 
مش هقول فرعى .. و لا حتى جانبى 
هقول بس انه مش الأساس دلوقتى 
واحنا ف إيه و لاّ ف إيه يا اخواننا ؟؟!!!





ثالثا 
بقى ودا الاهم 
و نجيبها م الاول خااااااالص ونحكى 
هوه كان سبب الهوليلة دى ايه 
علشان على حد علمى التحرش ف التحرير
من يوم 11 فبراير وانتا طالع يعنى 
مش لسه اول امبارح 



بس يحكى ان 
البنات والسيدات
 ما أن ينزلن لميادين التحرير
ف المليونيات والاحداث الكبيرة 
حتى يتعرضن للتحرش البدنى 
واللفظى والفكرى ....الخ الخ 
طيب ممكن سؤال  ؟


نوعية البنات اللى بينزلوا للتحرير دول 
بيبقى شكلهن ايه ؟
يعنى نون النسوة اللى بينزلن دول 
صنف واحد شكل واحد نظام واحد 
 ولا انماط عدة و مختلفين ؟










مظنش طبعا كلهم واحد
بس يعنى ممكن نصنفهن ع الأقل لنوعين 
نوع مشتغل بالسياسة 
ونوع غير مشتغل .. 





مواطنة عادية يعنى 
وملهاش ف المسيرات والمظاهرات 
والعمل السياسى المنظم التابع لجهة ما 
أو حتى بالتدريس والكتابة والتوعية ... وهكذا 
ست او بنت زى حالاتنا كدا 
 لا ناشطة ولا دياولو
و بتنزل تضامنا مع قضية الثورة وفقط 
ومش بتنزل كل مرة .. وكل وقت







وفيه بقى الست او البنت 
الناشطة او المدونة 
او الحقوقية او المنضمة لجماعة او تنظيم 
..الخ الخ الخ 
و دى بتنزل غالبا 
ودايما  .... مش بس تضامنا 
لأ ... دى بتعتبر الثورة شغلها الشاغل 
وكل حياتها تقريبا .. 
وبتعتبر وجودها ضرورى ع الأقل حتى 
 لحد ما الثورة تنتصر وتكمل




طيب 
انا مش هتكلم عن النوع الاول 
لأنهن عابرات ف المواقف والنزولات
بيروحوا وبييجوا 
وبيتعرضوا عادة للتحرش 
برا الميدان وف حياتهن العادية 
فمش هيتكلموا بالتالى ... ويعملوا دوشة 


النوع التانى بقى 
وهن ما اوجه لهن كلامى 
واستنكارى وتعجبى الشديد 


ايه يا بنات وستات الثورة 
و التحرير الميدان 
.. مالكو ؟!!


يعنى عايزين تفهمونى انكم بتتخضوا 
وتتخرعوا و نفسيتكو تتدمر 
من حادث تحرش عدى عليكو ؟!!!
ازاى ؟


يعنى واحدة تفهمنى كدا 
ازاى بنت متمرمطة ما بين 
المظاهرات والمسيرات 
ومتمرنة ع الجرى من الامن 
و المخبرين وقت العركة  والضرب
و دايما فيه احتمالية كبيرة للقبض عليها 
و بتتعرض للإهانات من المعارضين 
وبتوع النظام السابق والحالى 
و عايشة يوميا ف مشاكسات مع خلق الله 
للدفاع عن ثورتنا ف الشغل والجامعة والمواصلات
واحيانا لما حد من جيرانها يشوفها
شايلة يافطة ممكن يسمعها م المنقى خيار ؟!!!
وتكمل وتتحمل وعادى 
فإيه 
يعنى ايه ؟


يعنى ايه بنت او ست بتنزل مسيرة 
او مظاهرة او مليونية و هيا عارفة كويس 
انها ممكن مترجعش بيتها
وتاخدلها رصاصة ولا تروح ع المستشفى 
أو انها حتى 
ينقبض عليها او تحتجز مؤقتا 
 ببساطة كدا 
 ممكن جدا تتعرض لحادثة أخطر م التحرش ؟



معلش انتوا يعنى 
محسسنى ليه 
 ان حريم الثورة دول فافى كدا 
وبسكوتيات وقطط شيرازى منعمة 
و ينشخط فيهم يتخرعوا ؟!!!



اساسا وخصوصا بعد حادثة ست البنات 
وكل بنت وست فيكى يا ثورة 
عاملة حسابها انها لو نزلت مظاهرة او مسيرة 
وارد جدااااا تتعرض للى تعرضتله فتاة العباية 
صح ولاّ انا غلطانة ؟!!!!
عشان اللى بتنزل بقى 
و مش عاملة حسابها على كدا 
المفروض اقول عليها ايه 
غير كلمة انتى بتهرجى يا بنتى
 !!! 

 


آه عملنا مسيرة حرائر مصر 
والعالم كله اتفرج 
بس هل دا من وجهة نظركو اعتبرتوه 
هيوقف انتهاك العسكر للبنات فعلا ؟!!!



اللى هيقول أيوه 
ميكملش التدوينة بقى 
لأنه شخص حالم وبيضحك على روحه 
لأن العسكر لو عاوزين
 ينتهكوا حرمات الشعب دا ألف مرة تانية 
 مفيش حاجة هتوقفهم 
و هما بس بيغيروا الأسلوب والطريقة ..
مش اكتر 



طيب 
عاوزة بنت من بنات التحرير تفهمنى 
ازاى تبقى مستعدة 
لأنك لما تنزلى ف أى مرة وكل مرة 
انك ممكن يجرى وراكى مثلا 
عشر عساكر شرطة عسكرية 
وممكن تنضربى بشوم وسلاح 
وتتقلع هدومك لحد ما لحمك يبان 
وتتصورى على الملأ 
وتنجّرى لمجلس الشعب 
وتتهددى بأن هيتعمل عليكى حفلة 
و تنضربى لما يبانلك صاحب .. ويطلعوكى
وهتخرجى وتطلعى ف التلفزيون بعدها 
وتلاقى شوية كلاب وأنجاس بيقولوا عليكى
 انك انتى اللى غلطانة 
وايه اللى وداكى هناك .. الخ من سفالات
 وف الآخرررررررررررر
تيجى تقوليلى .... انا خايفة 
وبيتحرشوا بيا 
وألحقونى واقتنع انا .... ؟!!

ازاااااااااى ؟

البنات والستات اللى بشوفهم 
ف كل مسيرة او مظاهرة .. أجمد من كدا 
وأنشف من كدا 
وأرجل من كدا ألف مرة 


وفيهن بنات بتقف قصاد المدرعات 
وبتوع الداخلية والبلطجية والشرطة العسكرية 
و أى كلب معدى وتحدف طوب و تشم الغاز 
و توقفله هوه واللى يتشددله كمااااان 
فإيه ؟؟!!!
اسمحولى الحملة الموجودة دى مسيئة 
وغير مجدية بالمرة 





ناهيك عن ان المتحرشين ف مصر حاليا 
برضو ممكن يبقوا تقريبا صنفين




متحرش بطبعه .. العادى يعنى 
و 
متحرش بالصدفة .. مأجور يعنى 




متحرشو التحرير والزحام عموما
ف العادة مرضى بطبعهم 
وطبيعى جداااااا لما يلاقوا مكان زحمة 
مليان بنات زى المليونيات .. 
ان الميدان يبقى جنته وملاذه



أما متحرشى المظاهرات والمسيرات 
خصوصا الأيام الاخيرة 
فهم مأجورين 
مزقوقين علينا عشان يدوا انطباع سىء
عن التحرير واللى فيه 
وتطفيشا للبنات عشان متنزلش 
وتنكيدا ع الشباب عشان يحسسوهم بالعجر 
و صرفا لنظر الشعب المتابع عموما 
عن الثورة نفسها والتركيز ف فرعيات تانية 




معلش تانى ....
لما اسمع بعض الناشطات بتقول 
ان التحرش ف التحرير ممنهج ومقصود 
طب يا ستى ؟
يعنى احنا دلوقتى عرفنا انه مقصود 
يبقى التعامل معاه يكون مختلف 
عن التعامل العادى ف الاحوال العادية 
ولاّ انا غلطانة ف كلامى ؟!!



يعنى المتحرش العادى
 حله سهل ومعروف 
لو قرب منك وانتى لوحدك ... تعلى صوتك 
وتهزأى مامته وباباه وعيلته كلها 
وتلمى عليه البشرية
وأصلا مش هيديكى فرصة 
لأنه هيهرب زى الكلب 
وطبعهم الجبن عموما


دا الحل الوقتى السريع 
انما الحل الدائم .. دا مش وقته








طب ماذا ف حالة ما اذا كان مأجورا
زى حكايتنا دى نعمل ايييييه ؟
ببساطة الحل 
لازم يكون مختلف عن العادى 



يعنى 
الأيام الزحمة اللى زى دى 
مش فيه حاجة اسمها تويتر و نت ؟
 ببساطة 
قبل أى واحدة ما تدخل الميدان 
مش تسأل وتعرف الاحوال عاملة ازاى ؟


 عرفت ان الميدان زحمة .. مثلا 
هل تصّر انها تدخله برضو ف عز زحمته ؟




طيب مضطرة ولازم تدخل حالااااا
يبقى متدخلش لوحدها ابدا 
يبقى معاها حد .. راجل او اصدقاء 



كانت جاية لوحدها و معهاش حد 
مينفعش تكلم واحد من الشباب ييجى ياخدها ؟


مفيش حد مستنيها خالص 
مينفعش تطلب من ناس محترمين 
تتوسم فيهم الاخلاق والذوق
 انها تمشى جنبهم او معاهم
 لحد ما توصل للحتة اللى هيا عاوزاها ؟!!!



دى كلها حلول على فكرة 
انا شخصيا مجرباها وبقالى اكتر من سنة 
ويوم 25 يناير اللى فات 
بعد وصول المسيرة بتاعتنا لكوبرى قصر النيل
استعلمنا من اصدقاء لينا ف الميدان 
وعرفنا ان دخوله شبه مستحيل بسبب التزاحم
وقررنا نقعد برا التحرير لحد ما يروق شوية 
وقد كان ..




ولما رجعنا ع الميدان بليل كان معايا 
خمس رجالة ... من اصدقائنا المدونين 
كانوا ماشيين ورايا و قدامى للحماية 
بس كمان دا
 ممنعش انى اتعرض لتحرش
بس انا متكلمتش ...


ليه ؟


اولا ... 
عشان الموقف دا منطقى جدا 
هيا دى اخلاقيات الزحام المعتادة
والمرضى النفسيين بيتكاثروا ف الظروف دى



ثانيا 
لو كنت زعقت ... او رفعت صوتى 
كان ايه اللى هيحصل ؟
ببساطة الشباب اللى معايا
 كانوا هيمسكوا الولد دا يقطعوه
وتبقى خناقة وبهدلة وممرمطة 
وحد فيهم يتعور 
والميدان يتحول لحلبة صراع 
وبدل ما يبقى ميدان الثورة 
يبقى ميدان روكسى ... ولا جامعة الدول
وهو  المطلوب اثباته 
ودا اللى رفضته
وعديت الموقف ببساطة






حد هيقولى انتى معندكيش دم مثلا 
او باردة 
او وحشة محدش بيبصلك 
أو مثلا مثلا  واخدة على كدا 
هقوله

لأ 
حضرتك
انتا 
اللى فافى 
ومتدلع 

وشكلك عمرك ما ركبت 
اتوبيسات مصر المحروسة 
ولا اتزنقت ف ميكروباصات 
ولا تعاملت مع نوعيات زبالة 
ولا تعرضت لحالة تحرش ف حياتك 
وقادر تميز ان التصرفات المريضة دى 
عرض لمرض اكبر 
 وهوه انحلال الوطن 
مش انحلال الاخلاق والضماير وبس 





المسيرة اللى حصلت 
كنوع من الإعتراض ع التحرش ببنات التحرير 
اسمحولى 
مع احترامى الشديد لكل من شارك فيها 
واللى انتهت بتحرش اكبر ..




معلش 
كنتم غير موقفين بالمرة 
من وجهة نظرى المتواضعة 
يعنى لما سمعت عن الأستعداد للمسيرة دى 
مقدرتش اطلاقا اربط بينها خالص 
 وبين مسيرة حرائر مصر 
اللى كانت صرخة مدوية 
ف وجه المعتدى الحقيقى على حرمات 
وبنات وشرف مصر 



ومقدرتش اتعاطف 
وانزل كالعادى أشارك 
زى ما كنت بشارك دايما 
ف أى مسيرة ومظاهرة
ليه ؟
ببساطة لأن الفكرة مستفزة 
لاطراف عدة



مستفزة 
لأن دا مش وقته خالص 

مستفزة
 لأن المتحرش اللى بجد مش هنيفع معه
 يفط و وقفات ف الشوارع تقوله شيل ايدك 


مستفزة 
لأن فيه ناس بتموت ف المعتقلات 
والسجون وعندهم هموم اولى بنا 
ان نلتفت اليها هيا الاول ونركن ف همنا شوية 


مستفزة 
لأن المتحرش المأجور 
لن يتوقف بمسيرة ضده وانما هيرد عليها 
عشان يحلل القرشين اللى واخدهم 
وهذا ما حدث بالفعل !!!



ومعلش ... نقطة كمان 
انا اتفرجت على تغطية الاعلام للحدث 
وشفت جزء من وقفة البنات ف محمد محمود 
واستغربت شوية ان اغلبهن مش محجبات 
و اللى يعرفونى 
يعرفوا انى محجبة 
بس حجاب عادى جدا 
وبتمكيج وبحط برفان
ومنيش متدينة ولا ملتزمة جدا
ومنيش بأفكار مغرقة ف التطرف 
وبينى وبين التيار المتأسلم ف التدوين 
ما صنع الحداد والنجار والسباك كمان ....






ولذا فنية التعصب مش موجودة 
و السؤال هنا يطرح نفسه
هما البنات المحجبات 
يعنى الى هما سواد بنات مصر الأعظم 
منزلوش بكثرة ليه ف الوقفة دى
زى ما كل حريم مصر بكافة اطيافهم نزلوا 
بعد حكاية ست البنات 
او ع الأقل الكاميرات 
مجبتش عدد اكبر منهم ليه ؟!!!





البنات اللى وقفوا دول مفكروش 
انهم كدا بيدوا انطباع ان الحكاية هتتفهم 
انها قضية فردية 
و لا تنسحب على الباقيات 
يعنى وكأن البنت المحجبة مبيحصلهاش كدا 
مع ان التحرش دلوقتى وصل لحد المختمرات والمنقبات ... اقروها كويس 
المنقبااااااااااااااااااااااااات 
بيتم التحرش بهن كمان ... آه والله 
فأزيكم بقى ى ى ؟!!!







هل المسيرة حلت المشكلة ؟
هل الشعارات هتغير المعتدى وتهزه من جوا ؟
هل هتفرق بجد ؟
هل هتخلى نفسية البنات احسن ؟
هل هتنهى الإنتهاكات والعنف ضد المرأة ؟
هل هتخلى المجتمع يواجه ضعفه 
وهوه اصلا مش راضى يعترف بخنوعه
 للنظام والعسكر و الجوع ولقمة العيش وبس ؟؟


مظنش 

والقضية لم تعالج بعد 
واللى حصل مجرد مكعب تلج اتحط ع الجرح 
مسكن و ملطف مش اكتر





الحل المؤقت 
توفير الحماية للنوع دا م المسيرات 
مع الوضع ف الاعتبار انها ممكن دايما 
تقلب بغم ... !!!




اما العلاج الحقيقى فمحتاج وقت 
ومحتاج كمان تغيير جذرى وحاسم 
واللى ف ايدهم الحلول
وتنفيذها مش عايزين 
لأن جزء من المشكلة اصلاااااا 
التحرش طول عمره موجود 
عندنا و ف كل دول العالم متقدمة ومتخلفة 
بس نسبته اللى بتتفاوت 
وانتشاره عندنا بالكيفية دى له اسبابه 
واهمهما فيما أظن 
ان المناخ العام عندنا بيشجعه 
يعنى الأمن من مصلحته خلق حالة الفوضى 
والذعر بين المجتمع 


ومش حكاية الثورة والتحرير وبس 
دا من زمان 
وافتكروا حوادث التحرش ف العيد
 وفتاة العتبة وغيرها ....





كل دا ممنهج فعلا ومقصود 
لزعزعة امن البنى آدم المصرى 
ودفعه للمشى جوا الحيط مش حتى جنبه 



المتحرش لو لقى رد فعل من البنت 
هيجرى زى الجبان 
بس لو لقى امن و شرطة ف المكان 
مش هيهوب أصلااا ناحية أى بنت 
لو لقى عقاب لحد قبله اتحرش بواحدة 
هيفكر الف مرة قبل ما يعملها 


لكن 
احنا بنتكلم ف ايه ؟




طول ما فيه حد مستفيد من انتهاكك 
وراكب ومدلدل رجليه تفتكر ايه هيتغير ؟!!
 طول ما ست البنات حقها ضايع 
وسميرة ابراهيم من قبلها 
وطول ما حق الشهدا والمصابين 
وكل متضرر عانى من نظام مبارك الفاسد
لسه ...  بيعانى


وطول ما القتلة برا القفص احرار 
و  الشفيق هيبقى ريس 
و الاخوان همهم مصلحتهم وبس 
وطول ما الكل خيف على اكل عيشه
و طول ما بينداس علينا ونسكت 
هيفضل الحق ضايع
وهيفضل المتحرشون ... بنا ... يمرحـــون 




انا اسفة اذا كان البوست طويل 
وفيه كلام بيضايق 
بس انا منكن يا بنات مصر 
وبقول اللى شيفاه 
عشان منضحكش الناس علينا 
حملات التحرش والتوعية دى 
ولا هتجيب أى نتيجة ملموسة 
وبالعكس هتخلينا نسمع تريقة و تهكمات
 من اللى يسوى واللى ميسواش 
من بعض البشر المندرجين ويصنفوا 
تحت بند المتحرشين برضو .. بس لفظياً
و قارفينا ليل نهار بألفاظهم اللى زى وشهم




طالما السبب 
ف المشكلة موجود
هيفضل التحرش موجود 

 
المتحرش المزقوق هيبطل تحرش 
لما اللى زقه علينا يتلم 
ويتعاقب وتنكسر شوكته




اما المتحرش الطبيعى 
فهيبطل تحرش لما يلاقى يشتغل 
ويتجوز اللى بيحبها و يكون اسرة وحياة 
ويلاقى علاج و مواصلات ويلاقى كدا 
بإختصاااااار    
 عيش ... حرية .... كرامة انسانية





نوفرله حياة محترمة 
و لو محترمش نفسه نجيبه و نحاسبه 
ونقوله تعالى بقى 
.. القانون يعاقبك
وساعتها البنات تمسك يفط ولافتات 
وتنزل تقول قطع ايدك يلى بتتحرش بيا 
وتبقى مسيرات زى الفل والورد والياسمين





لكن قبل ما دا يحصل 
المأساة مستمرة 
وقبل ما نحزن 
اننا وصلنا لهذا المنحدر
وبناتنا بيتحرشوا بيهم 
افتكروا ان دا الطبيعى 
والمنطقى ولازم هيحصل 
وهيفضل يحصل طول ما الدنيا مبتتغيرش 
ونفس الوشوش كاتمة ع الأنفاس 
وقاصدة تربكنا 
وتخلينا ماشيين كاشين 
وخايفين




وما دامت الاشكال الضالة بتلف و ترجعلنا تانى 
بعد ما كنا افتكرناهم غاروا ومشيوا 
فمتزعلوش يا بنات 
لأنكن بتستباحوا من البعض


ولأنه بيحصل كدا 
واجمدوا واستجدعوا اكتر واكتر 
السكة لسه طويلة 



ثم منتظرين ايه و البلد ذات نفسها
 "مصر" بقالهم سنين ... بيتحرشوا بيها ؟!!!




--------------------------------------
--------------------------------------------- 

This entry was posted on الأربعاء, يونيو 13, 2012 and is filed under . You can leave a response and follow any responses to this entry through the .

12 كــــلام بيطــبطـــب عـــلى قــــلبى و روحــــى

كلامك منطقي اوى يا فاتيما بجد و يوجع القلب اوى كمان

مش قادرة اقول غير ربنا ياخدهم كلهم اخذ عزيز مقتدر هما و كل اللى عايز يضيع حق البلد و حق بناتها و شبابها

تحياتي ليكي

فاتيما
روح القلب الملائكية

طبعا معاكى حق و مش وقته
لكن اعتبريها واحد بيضرب و بيقول اه
بيقول اه لكل الظلم اللى واقع على تاء التانيث
لظلم تمثل اخيرا فى نائب و بنت
البنت اتحبست 15 يوم و النائب قاعد معزز مكرم
مجتمع يعانى من ازدواجية
حتى لومفيش حل اعتبريها
كلمة اه من طول المرض
و اعتبريها اى مع كل ضربة موجعة

سرم يا ام جو

يا صباح النور والأمل

الحمد لله
أنا من النوع الأول
العادى يعنى مش المجور يعنى
أنا متحرش صاحب مبدأ

الفكرة الكارثية اللى كلنا عايشبنها حاليا هى غياب الهدف العام مع وجود حاجات غريبة بتظهر نظرا للفراغ داخل الجميع

المثقفين كان عندهم حلم بدون آليات
وللأسف وثقوا فى عقليات قديمة لنفيذ حلمهم
وخانوهم
وطلعوا نص كم هم كمان

وعلشان كده كل الناس بتخبط فى أى حاجة

ومفيش مطالب لأى حاجة

بالعكس حالة التوهان بتزيد

ودى على فكرة حاجة تفرحنى
الوهان والحيرة بداية مرحلة الغضب
ومفيش رجوع
لإن كلنا مكملين

بكرة جاى

كلامك منطقي وخصوصا نقطة تغيير وجهة النظر من ان الناس نازله عشان تطالب بحقها لناس نازله عشان تتحرش بالبنات
ومتهيالي حلولك منطقيه وياريت بنات مصر اللي بنخاف عليهم ويهمنا سلامتهم بدام نازلين مظاهره يحاولوا يتجمعوا مع بعض بحيث ما يكونش في رجاله في النص او يكونوا مع رجالتهم اللي ان شاء الله يقدروا يحموهم
وربنا يحمي بنات مصر وكل اهل مصر

EMA EMA
-------


شكرا يا ايما

وربنا يستجيب لدعائك يا عزيزتى
ما أحوجنا لذلك .. فعلا

ابراهيم رزق
-----------


ازيك يا ابو العيال
وكلامك على عينى وراسى
بس ظلم المرأة ف مصر انعكاس لظلم الرجل مش منفصل عنه ...

نشيل الظلم عن الوطن الاول
وبعدين لو استمر الظلم للمرأة
نبقى نتحرك وننزل ونعمل مسيرات ومظاهرات واضرابات كمان وهبقى اول واحدة تنزل :))


انما قبل كدا
مش نافع ولا مؤثر ولا فارق
وبالعكس ..هيضرنا اكتر


تحياتى لسالى وسولى وزياد
ومامتهم الغالية

و .. هبعتلك المطلوب
حاضــــر

الازهرى
------



ايه الكلام الكبير دا يا زيزو
الله ينور

انا قريته تانى واحدة واحدة عشان افهمه واستوعب ...
وفهمت
:))

قوطعت النخبة ع العسكر ع الفلول ع الاخوان ع المنتفعين الكل كليلة


وبكــــرة جـــــــاى

واحنا ف انتظاره اهو

eng_semsem
----------
دى الحلول المنطقية يا اسامة
لحين ما الوضع يستقر
والدنيا تتغير
والنزول ف العادة
بيبقى جماعى على فكرة
يعنى انا اول ما بوصل الميدان
حتى ف الايام العادية مش الزحمة
ليا مكان محدد بقعد فيه والناس عارفنى ولو مفيش حد بكلم حد
م المدونين الغاليين
اذا مكنش متفقين من قبلها
وانا قايلة هنا ف المدونة ..
فبالتالى مببقاش لوحدى ويبقى فيه فرصة لأى حاجة زى دى

وربنا هوه الحافظ لمصر كلها
يا رب

نورت المطرح والله
:)

الأخ العزيز اللى مش عاوز تعليقه يتنشر
------------------------------------

حضرتك كتبت نقاط كتير عاوزالها كل نقطة بوست بحاله ارد عليها
:)

احاول اختصر بقى

1) شكرا ليك الف شكر
على اهتمامك ونصيحتك ليا
وربنا يهدينى ويهدى الجميع

2) الشكل مش هوه المقياس
لهذا النوع من المضايقات وبالعكس
انا تم التحرش بيا مرة ف صيدلية
من دكتور (بدقن) وكنت لا حاطة مكياج ولا برفان ولا حاجة ...
احيانا المتحرش بيختار ضحيته متكونش مملفتة للإنتباه عشان لو صرخت لو فضحته متبقاش مصدر شبهة وحد يصدقها .. بتحصل .. صدقنى بتحصل كتير وبسمعها من صديقات


3) التدين سلوك ولي مظاهر
والضعف الانسانى لراجل قصاد واحدة ست احيانا يبقى اقوى من خوفه من ربنا
واحنا ف الشرق للأسف عندنا الدسن شكلى صلاة وصوم وحديث باللغة العربية لكن وقت مواجهة الشهوات بيحصل شىء تانى ..وبيرجع المتدين أضعف احيانا من الشخص العادى وبس بيكابر
ولك ف قصة البلكيمى بتاع عهملية التجميل وونيس بتاع حاثة العربية أسوة .. ان التدين شكل وبس


4) مع احترامى الشديد وارجو الا يفهم كلامى خطأ لو تكرمتم ..
الحكم بمرجعية اسلامية لن ينهى هذه الآفات والأمراض النفسية ..
هيغطيها بس .. مش أكتر
والسعودية خير دليل على ذلك
ولو لحضرتك اصدقاء عاشوا هناك سنوات طوال هيحكوا لحضرتك كيف ينتشر الإنحلال والفواحش ...بس الفرق انها لا تُكشف زى باقى الدول العربية الآخرى

الحكم بالشكل دا ليست حل ابدا ..
سيادة القانون واتباعه هى الأكثر تناسبا مع طبيعة البشر
وعشان كدا ف العالم كله الدول المحترمة بتتقدم لأن فيها سيادة قانون واحترام حريات و رئيس الوزراء بيعتذر لمواطنة علنا لأنه اهانها ويخشى من العقاب والمحاسبة ...

احنا المفروض كمسلمين نملك اوبشن اضافى
بونس او اضافة تميزنا عن غيرنا
ولا نستخدمها طبعا لأننا اصلا مطلعناش اول سلمة فطبيعى منطلعاش التانية اول خطوة هو احترام القانون
وتانى خطوة احترام شرع الله
وساعتها نبقى رجعنا لعهد عمر
وبقينا دولة اسلامية فاضلة
:)

احنا عاوزين اول درجة بس
ويا ريت نوصلها


وتحياتى الخالصة ليك
وشكرا على اهتمامك وودك

صباح الغاردينيا روح ماما
اولاً من زمان كنت عاوزة اوصل هنا بس ماكنتش عارفة أي مدونة ثانيا في مرة دخلت وماشفتش بوكس التعليقات ثالثاً أنا سعيدة اوووي اني هنا النهردة رغم انه مش وقته خالص وانتي متعصبة كدا :)
اممم انا طبعاً عارفة انك بتنزلي التحرير ودا كان كلام استاذ ابراهيم ليا وعرفتك كتير من خلال كلامه وربنا عالم حبيتك من قلبي اممم برضو حتقولي ماتخلصي ياريماس هو دا وقته
:(

مش حقول غير ربنا يحفظ مصر وآمنها وآمانها ويستر على بناتها وبجد كلامك رائع "
؛؛
؛
لروحك عبق الغاردينيا
كانت هنا
reemaas

فهمتى ؟؟؟؟؟؟؟؟

فى اتنين يهود هيموتوا النهاردة

مصلحة بكرة لو الموضوع اتطور تبدأى تفكرى

وشوية وتببقى ناشطة سياسية
وممكن الموضوع يكبر وتبقى محلل

والناهية بقى تبقى خبير استراتيجى

ياااااااااااه
ولقاءات بقى
وتريقة من خلق الله
وآساحبى


دى إنتى مستقبلك لوز

اختيارك لبورتيرهات يارا مع المزيكا " انغام " عبقرى ..اعتقد ان انتى اول واحده اقرالها الرأى الموضوعى المنطقى دا بعد الهرى الكتير " الهجومى العنيف " اللى كان على تويتر . ومتفق معاكى تمام فى سوء اختيار معاد الوقفه
Hossam

إرسال تعليق