.

.

ربنــا ياخـــده كمــان وكــمان  

Posted by: فاتيما in









صباح الخير والسعادة 
ع الناس الطيبة ... بزيادة 
التدوينة دى موجهة لأسخاص بعينهم 
عمالين يحرقوا ف دمى 
كل ما تيجى مناسبة لذلك 
وانى أذ بى أرجوهم رجاء حار 
يرحمونى ويرحموا روحهم
 عشان احنا هرمنا ف البلد دى والله العظيم 






آل ايه ياخويا 
كل ما موبارك يعطس 
ويرد الفلول و العسكر 
يرحمكم الله يا ابوسريع 
مش انا اللى عطست يا ريس 
تطلع اخبار واشاعات انه ف النهايات 
وعيان قوى و ربنا خلاص هيفتكره ويخلّصنا 
نلاقى ناس كومل واخلاق و ذوق 
و طيبين قوى يا خال 
يطلعوا علينا بفاصل من التوبيخ .. كالتالى 







 حرام عليكو 
متفرحوش ف الراجل
فين الاخلاق 
هوه مفيش رحمة 
عاوزين ايه تانى منه 
الثورة مش انتكامية 
لا شماتة ف الموت
الموت له جلال و حرمة 
دا بقى ف ذمة الله دلوقتى 
وناقص يكملوا و يقولولنا 
إعتبره ابوك يا أخى ...!!!!!











طب قبل ما أجيب علبة الكبريت 
وأولع ف اول عوووود 
تسمحولى الحق أقول اللى ف نفسى 
و بعدين سيبونى ... اتحرق 
وانسونى ومتبقوش تقولوا الله يرحمها 
و انا مسامحة 
اشرح وجهة نظرى ؟












الناس اللى زعلانة على مبارك دى 
بتتكلم بجد ولا بيهرجوا ؟
يعنى اذا كنتم قاعدين ف مدرجات 
الدرجة الاولى 
و كنتم من الفلول أو حزب الكنبة 
فماشى هنعديها 
ودى هتبقى طريقتكم لأنكم 
مش شايفين المخلوع غلطان اصلاااا
انما لو كنتم من الثوار بقى 
وتتحسبوا ع الثورة واللى فيها 
فممكن تفهمونى ايه حكايتكم بالضبط  ؟!!





يعنى التعاطف الرهيب 
دا جاى منين 
و بتشتروه من انهى حتة  ؟






 امبارح ف خضم سيل الأخبار 
عن المجحوم ونقله وغيبوبته وقرفه 
بقلب ف القنوات لقيت سى براهين عيسى 
بيتكلم و يهرى وينكت ف روحه 
و عمال يدينا ف دروس اخلاق ويأنبنا
وكان ناقص يمسكلنا العصايا 
ويمدنا على رجلينا عشان احنا 
شيكلنا هنطلع شعب وحش 
وقليل الرباية و ضميره زفت 
واخص عليه 
لما يشمت ف الراجل كدا 
و ليه اننا كدا واقفينله ع الواحدة 
ف كل تفاصيل مرضه وعلاجه وحبسه ... الخ 





لأ وكماااااااان بيفكرنا بالقذافى 
واللى جرى ف ليبيا و انهيارها 
و بيخوفنا من نفس مصيرها
واننا مش بعيد نتحول إلى آكلى لحوم البشر 
 لو فضلنا نتكلم عن القصاص وكدا 
مش فاهمة ازاى انا .... ؟





طب القذافى و بغض النظر عن طريقة موته
وبشاعتها و همجيتها التى لا أرتضيتها 
بس سؤال بسيط
هوه اللى قتلوا القذافى دول من شعبه 
ولا ناس (زى ماهو جاب) جايين من برا  ؟؟




مش هوه دا الشعب الليبى حضرتك 
 اللى قعد ابو سيف يبيع فيه و يشترى 
اكتر من 40 سنة ويسوقه كما الغنم ؟








مش دا الشعب اللى حكمه بالعنف
والجنونات التى لا تنقطع ؟




مش دا شعبه اللى حرمه
 من التقدم والمدنية رغم كل ثروات ليبيا ؟


مستغربين ليه ان معمر يموت موتة كدا ؟
مش هوه برضو اللى جابلهم 
مرتزقة افارقة عشان يهتكوا اعراضهم 
ويقتلوهم ف الشوارع ويرتكبوا كل الأنتهاكات 
مندهشين لما كل هذا بحذافيره 
يتردله وقت سقوطه ف ايد ضحاياه ؟




ليه ؟
مش الجزاء من جنس العمل 
ولا دى مجرد اكليشيهات بتتقال ؟؟؟




كل واحد بيموت الموتة اللى تشبهله
وشعب ... القذافى صنيعته 
 همجيتهم بتعكس افعاله فيهم 42 سنة
هذا العنف برعايته وبفضله
وكل اللى حصل
 انه داق عمايل ايديه .. مش  اكتر 








قوم ييجى سى براهين
يخوفنا ويكششنا ف جلدنا ويحذرنا 
اننا نبقى لييبين الهوى 
و نفكر بس اننا ننتشقم من ريسنا 
ونجرح انسانيتنا ونتحول لوحوش 
وكفاية عليه اللى بيجراله
وعيب علينا 
و مش ناقص يقول غير
اعتبره ابوك يا اخى ....  ؟!!

هاه .. !!؟




لأ .. وباقى القنوات بقى 
اللى بتعزف على نفس النغمة النيلة دى
ولسه هيتحفونا تاااانى 
كل ما هتقرب لحظة الموت بجد 









دا حتى محامى اهالى الشهدا 
حب يطلع ينقط ف الفرح ورزع بوقين حمضانين 
عن ان مبارك لازم يتعامل معاملة حسنة 
ودا مريض و نحن لا نقبل و ربنا يشفيه 
ونناشد الاجهزة تعالجه كويس 
ومش هنشمت فيه ابدااا
و كان فاضل يقول ... 
اعتبره ابوك يا اخى ... !!! 




لأ 
  أبوكو انتوا بقى واخوكو كمان
يخربيت كدا 
ايه كم النفاق الرهيب دا ؟
انتوا بتطبلوا للرئيس القادم من دلوقتى 
ولا إيه .... ؟!!!
حتى بعد الثورة مش قدرين تنِضِفوا 
وتطلعوا العبد اللى جواكم ؟








هوه المسألة ليه مش واضحة  انه
أبيض ... أو ... أسود 
مبارك قاتل ولا راجل كويس ؟
راجل كويس يبقى ربنا يشفيه 
و ظلمناه و الله يرحمه ... لما يموت 




لكن راجل قاااااتل 
يبقى الله ياخده 
ويرجعه ... وياخده ألف مرة 
ولما يموت هيبقى كلب وراح
وحتى الكلاب هيبقالها حرمة عنه 
لأنها يوم ما تتمعظم يعنى .. 
هتقتلها نفر اتنين  تلاتة بكتيره
مش الالاف البشر زى حالاته .. !!!!





فين وجه الشماتة اللى بتحكوا عنه 
وفين انتقاص الفضيلة 
وفين قلة الاصل 
و انعدام الأنسانية ف الموضوع ؟









أى رحمة المفروض تأخذنى بقاتل 
وهاتك للأعراض وسارق لثروات البلد 
و مخرب لقيمها واخلاقها  ؟
و مفسد لكل أوجه البراءة والنقاء فيها
وجلاد .. بكرابيج ضباطه وعساكره 
وكل العبر براحتكو 
رصوها ف قايمة لا تنتهى 
مش كان هو حامى حمى الديار 
و الراعى الرسمى لكل مرتكبى تلك الشرور 
ويتحمل وزرهم جميعا ولا هل انا ببالغ ؟؟؟




الا يتحمل كل عذابات الضحايا جميعا ؟
لأنه حاكم و راعى و مسئول وارتضى ذلك 
وقعد 30 سنة ينتفع منا 
ويشرب من دمنا ولا اجدع مصاص دماء
ولو كنا سبناه يوم واحد زيادة بعد 11 فبراير 
كان استباح المزيد من الدم ..
وتيجوا تقولولنا فين الرحمة ؟!!!





وهوه كانت فين رحمته بشعبه 
اللى افتقر واتذل جوا وبرا مصر ؟
كان فين من الفساد و الظلم 
والموت اللى حاصر البشر بكل الطرق 
ف حوادث عبارات وقطارات وحرايق و .. كله ؟



وكفاية بس الامراض الخطيرة 
 اللى مسبتش كبير ولا صغير
لحد ما بقينا شعب مريض فقير مهان 
وعايش اما ع الأعانات او الرشوة او النهب 
او يموت لأنه معرفش يعمل حاجة من دول


 
مبارك خد فرصته كاملةً .. و زيادة 
وما يحدث له الآن والله أكتر من الواجب 
واكتر من الانسانية ... بشوية
وكل الفيلم الحاصل دلوقتى 
مجرد حلقة من المسلسل التركى اليومى 
"أنا مقعدش ف طرة يا كلاب " 







 
واديه خرج اهو .... و غصبن عننا 
ومقعدش ف طرة برضو 
ودخل الخمس نجوم تانى وهيتروق 
وبكرة يصحى و يتمشى و يبقى زى القرد 
وعادى خاااالص 
اما لو مصحيش ... و غار ف داهية 
يبقى نحمد ربنا ان العالم خلص من طاغية
و محدش يقولى ساعتها عيب بلاش شماتة 
و اعتبره ابوك يا اخى .. !!






 
 ابويا الله يرحمه كان راجل محترم
و متسببش ف موت الآلآف 
ولا ف أذى ملايين 
وخرج من كل حاجة زى الشعرة م العجين !!!





ولو كان عمل واحد على عشرة 
من عمايل مبارك ف الشعب المصرى 
كان زمانى بعت اللى ورايا واللى قدامى 
واستلفت من طوب الارض
عشان اعمل اعلان ف آخر صفحة ف الاهرام 
اكتب فيه انى متبرية من أبوته ليا 
ولا ابويا ولا عايزة اعرفه ...




وقبل ما تفتكروا حقوق مبارك الانسانية 
وتقعدوا تقطمونا 
يا ريت تفتكروا ملايين المواطنين 
اللى عايشين تحت خط الفقر 
ومش لاقيين الكرامة 
و اللقمة و الهدمة و الغطا و الدوا 
و كوباية مية و اربع حيطان وسقف يسترهم 
وساكتين ...








بصوا ف الصور دى 
و افتكروا الاطفال 
اللى ف عمر الزهور ازاى دبلت 
واتبهدلت  واشتغلت وانتُهكت
و بتدور على اكلها ف الزبالة وتتعذب
عشان واحد زى مبارك يغتنى اكتر 
و اهله وخدامينه وكلابه يتوحشوا اكتر 







ولا انتوا لامؤاخذة مش م البلد دى 
ومبتمشوش ف شوارعها
 وتعرفوا ناسها عايشين  ازاى 
وقلبكم لا يحّرك ساكنا على احوالهم ؟؟؟!!!








افتكروا حقوق الشهدا 
اللى قاتليهم احرار طلقاء عادى كدا 
بينما هناك مصابين ثورة لسه بيعانوا 
ومفقودين كُثر محدش عارف عنهم حاجة
من يوم 25 يناير 2011 وحتى الآن








وانا شخصيا يكفينى افتكر الشهيد المبتسم 
اللى مات واندفن من غير ما ابوه وامه 
يبوسوا جبينه ويطلوا ف وشه الطلة الأخيرة
وكفاية عليه اندفن غريب 
ف مقابر غريبة 
و اللى قتلوه متمسكوش 
ومنعرفوش وغالبا خرجوا زى الباقيين .. براءة



الشهيد المبتسم ذنبه ف رقبة مين ؟
الولاد الجمال الورد اللى فتح 
ف جناين مصر ورواها بالدم ذنبهم ف رقبة مين ؟
وخالد سعيد .. ذنبه ف رقبة مين ؟
وكل اللى زي خالد و الشهيد المبتسم 
والورد اللى فتح دول 
واللى منعرفش اساميهم
 ولا شوفنا صورهم عشان محدش لسه 
حكى حكاياتهم 
دول كلهم ذنبهم ف رقبة مين ؟؟؟؟!!!








ذنبهم عندى ف رقبة الحاكم 
عند مبارك 
اللى قاعد بيتعالج على حسابنا 
وعلى شرف دمهم الطاهر 
ف أرقى مستشفيات بفلوسناااا
و فى حماية كلابه من العسكر والنظام القديم 
و كل شوية يتسلبط ويستعبط 
ونلاقى حد بيبلعه الدلع المرىء دا 
وينسى الحق فين و يرجم الضحية 
و يشفق ع القاتل
ويتعاطف مع الباطل 
و يرجع يقولنا .. اعتبره ابوك يا اخى !!







لأ يا اخى انتا حر ف نفسك 
تبلع كل هذا الخداع والظلم والمهانة 
لكن انا محدش يقولى متشمتيش
وحرام عليكى وميصحش و دا راجل كبير 
وحرمة الموت والأفلام دى 





لأن الشماتة بصراحة 
بقت المعقول الوحيد وسط كل هذا الجنون 
و حاليا هى أصبحت حيلة الضعيف 
و بقت هى الشىء الباقى 
الذى أقدر عليه انا و غيرى
لأننا مش قادرين ع اللى كان مفروض يحصل 
وهو عقاب القاتل بحق والقصاص الحق 
مش الدلع والشهيصة والروقان 
اللى مبارك فيهم طول الوقت دول 










واخيرا لو ربنا مدّ ف عمرى 
ولحقت اشوف اليوم دا 
ومبارك غاااااار 
لأن شكله يهموتنا كلنا  واحد واحد
ويفضل قاعد هوه





فمراعاة منى لشعور بتوع اعتبره ابوك دول
خلاص مش هقول لما اسمع انه اتكل
ان مبارك مات ... الله يجحمه 





ولا هقول
 ف جهنم و بئس المصير انشالله 









انا هقول زى عطشيات ف الجوكر 
واسأل : هوه مش مات ؟!!! 
يقولولى : أيوه 
أقولهم : ربنا ياخده كمان وكمان 




و هقول بعد ما يجينى خبره
حسبى الله ونعم الوكيل
 و هقرى الفاتحـــة بس ......... للشهدا
  

---------------------------------------
------------------------------------------------- 
الصور من عند ... Shazouli
ومن مواقع الجرائد الالكترونية 
و تويتر  والنت عموما :)
------------------------------------------------

This entry was posted on الأربعاء, يونيو 20, 2012 and is filed under . You can leave a response and follow any responses to this entry through the .

15 كــــلام بيطــبطـــب عـــلى قــــلبى و روحــــى

ان الله لا يحب الظالمين
وفكرة اذكروا محاسن موتاكم ليس الامر على اطلاقه جائز

=======
فمن عرف عنه الظلم والفساد لم يترك لنا بصيص امل وخير نذكره له بعد الموت

=======
ولسنا ابناءه حتى ندعو له
========

الطائر الحزين
-------------


الله يفتح عليك يا غالى

:)

اللهى ربنا يخدة اخدت عزيز مقتدر


الحاجات اللى بعتيها وصلت يا معلم :)

يا رب يا اوختشى
عشان نخلص من سيرة الست الوالدة بتاعته اللى مبتخلصش دى وكل يومين تلاتة يموت ويصحى .. احنا ورمـِنا والنبى



والحاجات
للقطقوطات
الحلوات
أقل واجب يعنى

بوسات
وحضونات
وفعصات

انا مش هقول غير حسبي الله ونعم الوكيل

مش عارف ليه الناس شاغلة دماغها ما يموت و لا يتحرق هو يعني كان فكر امتى في حياتنا علشان نفكر في موته
المهم بس حاجة واحدة اننا نتأكد انه مش بيستعبط علشان يخرج من مستشفى السجن و ده مش هنتأكد منه غير بحاجة واحدة بس ان نقابة الأطباء ( علشان النقابات الحاجة الوحيدة المنتخبة و معترف بيها ) تبعت فريق من عندها يشوف حالته بالظبط و امكانية رجوعه لمستشفى السجن
غير كده يروح في ستين داهية
اما عن الجنازة العسكرية
يعني هاممنا جنازة عسكرية و مش هاممنا دستور عسكري و حاكم عسكري و لا قضاء عسكري سيبنا كل العسكر ده كله في حياتنا و باصين على الجنازة
انا رايي نبطل تفكير فيه لأن كل ده االهاء عن الأهم اللي هو انفراد العسكر بكل حاجة

امبارح من كتر اللي سمعته رحت علي اليوتيوب وقعدت اشوف الفديوهات اللي سجلتها مع المصابين وخصوصا الطفل الصغير اللي عينه جت فيها طوبه
طفل بيبتدي حياته بعين ضايعه
والطوبة من كلاب مبارك
مش هقول اكتر من كده

فاااااااااكس
خطة يامعنمي خطة
الجنرالات يستعدون لعملية نضيفة وأخر حلاوة
عشان المخلوع يتعالج في بلاد الالمااان
بس

صباحك عنااااب
:)

وحى الخاطر
----------

كلنا .. هنقول
ان شاء الله
بس هوه يغور ويخلصنـــا

D:

مصطفى سيف الدين
---------------



نقابة ايه بس يا مصطفى اللى هيسيبوها تكشف وتقول للناس ...؟
هتبطل نقاء وطيبة واخلاق الصعيد دى امتى وتفكر بطريقة الغجر دول شوية ؟؟

:))


طب اذا افترضنا يا جدع
انهم وافقوا على كدا
تفتكر مش هينقوا ناس مخصوصة
من بتوعهم جوا النقابة ؟
ولو ملقوش ناس يلقنوها الكلام
واتصادموا بناس محترمة
تفتكر مش هيخوفوهم بحكاية اسرار الدولة والمسئولية و خطشورة الموقف والأفلام دى وقليل ان ما مضوهم على اقرار بعدم افشاء الحالة الصحية للمخسوف على امره ... ؟؟

مفيش فايدة طول ما العسكرة حاصلة
زى انتا ما قولت

قصة الموتة دى الهاء وتشتيت الاأنظار عن شىء تانى ومش العلان الدستورى بس وربنا يستر ...

صباح الورد

شمس النهار
---------


ان شاء الله حقهم مش هيروح يا شمس
يقينى بالله وبعدله ..
وبالحق بيقول كدا

الصبر


صباح الفل على عيونك

Haytham Alsayes
---------------

المان ولا باكستان
قصره يا هيثم
الراجل دا عزرائيل قرفان يبص ف وشه


ومن ناحية الخطط
احنا برضو جامدين قوى
ومتسألنيش ازاى
بس الملاحظ ف ال16 شهر اللى فاتوا
ان العسكر مش لوحدهم اللى بيلعبوا
ولا الاخوان
ولا القوى الخارجية ..
وبس

الناس ع الأرض
برضو بيبقالها رأى تانى
وبتتدخل ف أوقات غريبة عجيبة
وتحول دفة السفينة لأتجاه مغاير
عن اللى كانوا عاوزينه
فلا تستهن بالشعب يا صديقى
أو بمعنى ادق
لا تستهن بالطليعة بتاعته والناس الحلوين الصادقين اللى فيه
واللى لما بيتحركوا بجمعوا الناس التانية حواليهم
ويمشوهم وراهم ...
بس هيا المسألة بتحتاج وقت وجهد
لكن النتيجة ان شاء الله ..
خير .. خير .. خير


وحشتنى تعليقاتك يا فتى
:))

صباح الورد
والعناب المسكر

فاتيما
روح قلب الملائكة

مبارك فرعون
و الفراعين لا تموت

هى خطة من مجلس عسكرى القرون
مات بيموت الناس تسكت على نقله من طره
هو فى سؤال
هى الناس اللى فى طرة المساجين يعنى
اللى حالتها زى حالة مبارك
بيعملوا معاها ايه
بيطلع الديب بتاعهم يقول هيموت
كل يوم فى ناس بتموت فى السجون
و محدش بيطلع يقول حرام ومعاملة غير ادمية
والاستاذ ابراهيم قرنى عيسى
ياريت بس يفكر فى ياسمين خزام و يتابعها نصف متابعة مبارك
ياسمين خزام ياسادة
اخت كريم خزام
ابوها كان شاب اجمل من الورد استشهد
ابوه اللى فى الاربعينات مش ثمانينات لم يتحمل رحيل سنده و بسمته فرحل بعده
تقدر تقولى يا عم ابراهيم قرنى ايه حالة و نفسية ياسمين دلوقتى
زهرة 16 سنة بتفتح على جبل من الحزن و بحر من الذكريات الاليمة
سيادتك فكرت فيها او حد من بتوع ابونا مبارك فكر فيها
تفتكر دى لو سالتها عن مبارك
هتقولك زى ابونا
بس ابوها مات
و ابوها كان اغلى عندها
يعنى فى الف دهية مبارك جنبه

بس خلاص

سلام

سا الخير

انا بعت تعليق وصل و لا لا

ابراهيم رزق
------------

وصل يا ابراهيم
وكلامك يا ريت يفتكروه بتوع اعتبره ابوك يا أخى دول ..

اصلا خلاص قال اكتشفوا ان معندوش جلطات و هو بقى كويس ...
...!!!!!!!!!!!!!!!

هوه المسلسل التركى اللى قولت عليه
كلها حركات عشان يخرج من طرة

وان شاء الله ربنا يمد ف عمره لحد ما الشعب يقتص منه بنفسه على كل اللى ظلمهم وجبنا سيرة بعض منهم دول ..
اللهم آميييين

نورتنى

إرسال تعليق