.

.

حـتة منّى  

Posted by: فاتيما in








قبل المغرب بدقايق بيرن التليفون 
وترفع ماما السماعة تسكت ثوانى 
و بعدين تصرخ :




لا اله الا الله 
يا حبيبى يا بنى 
انا لله وانا اليه راجعون 
امتى دا حصل
يارب دنا لسه مكلمة ماما وبابا الصبحية
وقالوا انه كويس و طلعلوه م المستشفى 
يا ضنايا يا حبيبى ...
 و بابا وماما عاملين ايه و حالتهم ايه ؟!!
طيب استنى انا هقولهم معاك 
ادينا ساعة هنلبس و جاييلنك حالاااا
البقاء لله يا بنى






نظرات الذهول اللى بنتبادلها
و مع اننا عارفين تآخر الحالة 
و تدهورها و متوقعين  
بس متعشمين ف ربنا خير 
يعنى لو يخلى لسه ف العمر بقية
يمكن ...  






المكالمة دى 
اللى للمرة التالتة بنسمعها
ف أقل من تلات شهور 
وملك الموت النشيط جدا 
و بيقوم بالمهمة الموكلة ف محيط عيلتنا
واللهم لا إعتراض على قضاك و قدرك يا رب  








اول مرة كان ابن خالتى الكبيرة 
والمرة التانية كان خالى 
اما المرة دى ... سامح
ابن خالتى التانية 
وتانى اكبر حفيد ولد فى عيلة امى 






أمى و خالتى هما اقرب اختين لبعض
اتجوزوا ف وقت واحد تقريبا 
وسابوا بنها و عاشوا ف القاهرة  
و ربونا احنا ولادهم سوا 
 كنا قريبين من بعض ف السن
بنلبس من بعض و نلعب مع بعض
وكنا بنعمل كل حاجة ويا بعض 
الخروجات
والفسح
والمصيف سوا 
القعاد مع ستو ف اجازة الصيف
الزيارات العائلية ف الأعياد و رمضان
و الأفراح و المياتم و كل المناسبات
حتى وقت الخناقات و الزعل كنا برضو سوا








سامح ابن خالتى 
كان أكبرنا سناً
وكان ذكى .. وشقى 
وحزين بدون سبب واضح
كان نور عيون جدتى و روح قلبها
ودلوعتها و متربى ف حجرها
و محدش يستجرى يدوسله على طرف 






ولهذا لما حب زميلته ف اعدادى هندسة
وقرر يتقدملها وهوه لسه طالب 
عشان ابن عمها ميخطفهاش منه
ملقاش غير جدتى ... عشان تساعده
ولأنها كانت ملاك الرحمة ف عيلتنا
وبتشجع قصص الحب قوى
فهيا الوحيدة اللى مشيتله ف الجوازة
وراحت خطبتهاله بعد اقناع الأب والام
اللى استغربوا يخطبوا لابنهم ف اولى جامعة !!
بس هيا فضلت تزق ف الحكاية تكة تكة 
وتساعد وتسند لحد ما سامح كتب كتابه 
على سحر قبل ما يخلصوا البكالوريوس 
و قصة الحب دى نجت
من كل محاولات إفشالها 






انا لسه فاكرة يا سامح .. كل حاجة
كل الذكريات و التفاصيل 
الاتفاقات كلها و ساعة قراية الفاتحة
و ليلة الخطوبة 
و كتاب الكتاب .. و الفرح 
و اول حمل و أول بيبى و السبوع بتاعه  








تعرف يا سامح انك 
كنت وقتها أصغر واحد يتجوز ف عيلتنا
وكنت برضو أصغر أب 
وتعرف اننا كنا فرحانين بيك قوى 
ونفسنا نبقى زيك يعنى لما نحب 
نتجوز اللى بنحبه و قصتنا تكِمل ؟








وكعادة كل الشباب ف سنك 
مصر ضاقت عليك بفرصة شايف نفسك 
تستحقها وبعد كام شغلانة ف كام شركة
   ومتعجبكش قدمت ع الهجرة لكندا 
و سافرت مع عيلتك اللى كبرت من زوجة وابن 
لزوجة وولدين .. وبعدين تلاتة 










و صحيح يا سامح كنت بتلعن الفساد 
ولما كنت بتنزل اجازات كنت بتتحسر
على حال البلد و اللى وصلتله
ورغم انك طفشت هربا من كل دا
عشان عاوز ولادك يتعلموا ويعيشوا احسن 
الا انك لما الثورة قامت ...
انتا كنت هنا 
وكأنك معانا تمام ف ميدان التحرير






كنت فرحان 
و كنت عاوز الثورة تنجح
كنت بتكره العسكر و عاوزهم يمشوا
وكنت بتقنع 
كل اللى مش عاجبه ان الثورة صح
و هيا اللى هتنضف البلد
وترجعها قوية عشان هيا عدل و حق 
كنت شايفها بقلبك و انتا بعيد 
بينما ناس هنا ساكنين ف قلب قلبها
و معمية أبصارهم 






كنت بتبعت مع باباك تسألنى عن حاجات
 وتسأله على لينك مدونتى
عشان تعرف منها أول باول اللى حاصل
كنت موافق على طول الخط
ع اللى الثوار عاوزينه
و كان رافض على طول الخط على كل
اللى الفلول عاوزينه
كنت بحس بيك
 من آخر بلاد الدنيا فخور بيا 
كنت بتشجعنى يا سامح من غير ما تدرى






كنت عاوز تنتخب ف مجلس الشعب
بس ملقتش حد يملى دماغك 
وف انتخابات الرياسة انتخبت حمدين 
ومراتك انتخبت ابو الفتوح
وف الإعادة .. امتنعت عن التصويت
لأنك شفت اللى فيها








و كنت بتحتقر ابو اسماعيل لأنك عرفت
من اقارب ومعارف ف كندا موثوق فيهم
ان ام حازم امريكية و انه كداب قرارى 
كنت بتقول معانا ان العسكر مع مبارك 
و لازم هيتحاسبوا
كنت مع الثورة من قلبك .. بجد 







و رغم حياتك اللى استقرت ف كندا
ورغم تعليم الولاد والشغل 
اللى كان صعب تسيبه وترجع  
لكن مصر بعد الثورة خلتك تفكر لأول مرة
بعد عشرين سنة غربة 
 انك ممكن ف يوم ترجع انتا والعيال
 وتقعدوا هنا
عمو قالى كذا مرة
انك بعد الثورة كنت بتفكر فعلا 










سامح يا ابن خالتى 
يا اخويا الكبير 
انا فتحت عينى عليك لقيتك اخويا
زى اخويا الكبير هانى ... تمام 
و كنت بحب أبص ف وشك
كنت بحب وسامتك 
و ذكاءك
و نباهتك جدا 












وفاكر لما كنت بتجنن لما بشوفك
وانتا بتلعب بالمكعب دا 
اللى مش قادرة أفتكر ابدا اسمه
واستغرب على شطارتك 
وقدرتك المذهلة ف انك تحله بسرعة 
فاكر لما كنت تديهولى وتقولى لخبطيه
و بعدين تخلينى امسكلك الساعة 
و نحسب هتعمله ف كام ثانية ؟








طب فاكر لما كنت بحب ادعبس
 ف شرايط الكاسيت بتاعتك و تزعقلى 
طب انا بقى فاكرة ان اول واحد اسمع عنده 
مزيكا الرحبانية و احبهم هو انتا 








وكنت بحب قوووووى
 كل ما تيجى تزورنا
و تقولى هاتلى ورقة وخيط
وتعاكس ف القطط بتاعتنا 
وتكرمش الورقة و تربطها بخيط 
وتجننهم بالجرى وراها 






و فاكر لما عملتنى انا اخويا
 نضايق الجيران الرخمين اللى قصادنا 
ونعكس ضى الشمس ف المراية ف وشهم ؟
و اكياس المية اللى بندلقها ع الماشيين ؟
و فاكر طيارات الورق ف اسكندرية 
والسهر مع ستو لحد ادآن الفجر نرغى
ونحكى ومنخلصش كلام ؟؟






طب انا فاكرة
انك كنت اول واحد
يشيلنى و يرفعنى لفوووق 
عشان اقطفلكم التوت من الشجرة 
اللى كانت مزروعة ف بيت جدتى القديم 
و فاكرة كمان انك كنت اول واحد يحاول
يعملنى اركب العجل
و رغم طولة بالك .. عمرى ما اتعلمته !








كنت بحب فيك خفة دمك
كنت اكتر واحد بتضحّك ستو
وتضحكنا كلنا احنا العيال 
لحد ما عينينا تدمّع








كنت بحب كمان  حبك لحبيبتك
اللى بقت خطيبتك وبعدين مراتك وام أولادك
ومكنتش فاهمة ازاى هيا بتحبك قوى كدا
وبشكل جنونى لحد ما كبرت 
وحبيت
وعرفت ازاى بيحصل كدا ...






بس وقتها كنت فرحانة مجرد الفرحة
بإن قصة حبكم نجحت
وكنت بتمنى لو كل قلبين زيكم 
مينكسروش قصاد الظروف 
وحكايتهم تكمل 








انا هدعيلها كل وقت 
ربنا يصبر قلبها 








انتا اتعذبت كتير قوى يا بنى  
وخصوصا أخر كام سنة  
السرطان بدأ بجزء بسيط ف المعدة 
وكل ما الدكاترة يستأصلوا جزء مصاب
يتنقل لمكان تانى..لحد ممبقاش فيه مكان
والا تضرر واتشال نص المعدة و الأمعاء
ومبقتش حتى بتقدر لا تاكل .. ولا تشرب
وتخرج من عملية تدخل ف التانية 







انتا كنت وديعة غالية و ربنا استردها
بعد عذاب صحيح مع المرض
 لكن كمان بعد حياة مليانة حاجات كتير حلوة
سبت وراك زوجة وتلات اولاد
بس سايبهم و هما بيحبوك وبيدعولك يا سامح 
سايبهم و هما حاجة تشّرفك
 شايلين اسمك و هيخلوا سيرتك ف الدنيا 
وحسك فيها و حقك ان تفخر بيهم






سيبهم يا حبيب اختك
و انتا مطمن عليهم 
لأنك عملت اللى عليك 
ربيتهم و حبيتهم ودا مكنش قليل  
ومش كل أب بيقدر عليه
و ثق ان ربنا هيحفظهملك  
لأنهم ف يد الذى لا يغفل و لا ينام 
و هوه السند من قبل و من بعد 








انتا كان ممكن تبقى شخص عادى
جه الدنيا و راح من غير أثر
و لا يفرقش مع حد ... لكن انتا فرقت 
انت كنت أبن
واخ
 وزوج
واب
وابن خالة
 وابن عم
وصديق
وزميل
مهندس ناجح 
و معرفة لناس كتييييييير قوى 
هتفتقده و تترحم عليه و تفتكرله الخير
و هتدعيله على قد الخير اللى شافوه منه
ولسه هيشوفوه ف ولاده








تعرف يا سامح ؟
و انا بعزّى طنط و عمو 
افتكرت اهالى الشهداء ف ثانية 
وافتكرت كل حد مات مظلوم ف البلد دى 
انتا اندفنت ف بلد غريب لأنك معرفتش تعيش
 ف وطنك زى ما كان المفروض يحصل
ونظام مبارك طفشك زى ما طفش ملايين






 انا زى ما دعيتلك
دعيت على المخلوع و اعوانه
 ربنا يورينا فيه اياته
ودعيت ربنا يصبر كل اللى بيحبوك
و دعيت كمان الدعا اللى دايما ماما تقوله
يا رب ما تكتب عليا اشوف اليوم 
اللى حد من عيالى يموت فيه قبلى 






يا ترى لحقوا يقولولك 
ان عمر سليمان مات ؟
متهيألى كنت هتفرح شوية  
وان كانوا قالولى انك زعلان بس متفائل خير
طب انتا حد قالك ان محمد ابن خالتك 
الله يرحمه برضو انتخب حمدين 
و قال زيك ... انا متفائل !!
ربنا يسمع منكم
ويصبر قلوب كل مكلوم 
و ياخد حق كل مظلوم يا رب 








انا مش عارفة
 اقولك ايه يا سامح




اقولك انى لما كنت بكتب حاجات
كنت بحس بفرحة خفية
انك ممكن تكون شايفنى من بعييد
وبتقراها و زعلانة قوى دلوقتى
لأن دا مش هيحصل ... ؟







ولا أقولك سيبك مننا ومن قرف الدنيا
والحمدلله انك ف دار الحق 
اللى مفيهاش ألم و لا هم و لا حزن ..؟




ولا أقولك تسلم على بابا
و على ستو و خالى وابن خالتى 
و كل امواتنا ؟






ولا أقولك انى فرحانة انك رايح لستو
و عزائى انها هتفرح بيك
و بصحبتك ليها اخيرا بعد طول الفراق ؟؟








و لا أقولك متشلش هم الولاد
لأنهم ف عيون جدهم وجدتهم 
وعمهم ومتخفش ابدا من حاجة ...  ؟؟








ولا أقولك ان اختك الصغيرة
  تعبت م النهايات 
و بقت بتكرهها اكتر ما الثورة والثوار
وانا وانتا ما بنكره العسكر 
بس الفراق حق .. و الموت كمان حق 
و اليوم دا لازم كدا كدا هنشوفه ... ؟ 







عارف ؟
انا هقولك جملة حد زمان قالهالى 
مش فاكرة مين




" ان كل واحد نعرفه بيموت وبيمشى 
بياخد معاه حتة مننا 
و مبترجعش تانى 
ولا احنا بنرجع نفس الشخص تانى "  






و انا حتة منى 
و من نفسى و من طفولتى 
و شبابى و ذكرياتى و كل حياتى ..
 مشيت معاك خلاص و راحت و مش راجعة








ربنا يا اخى الاكبر
 و يا ابن خالتى الغالى يوسع قبرك 
و ينورهولك ب "رحمته" و صالح اعمالك و الدعاء
و يسكنك و هو القادر الكريم فسيح جناته 
اللهم آمين 






 مع السلامة يا سامح
مع السلامة ... يا حتة منّى






-----------------------------------------------------
(( يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي )) 



------------------------------------------

This entry was posted on الأحد, يوليو 22, 2012 and is filed under . You can leave a response and follow any responses to this entry through the .

17 كــــلام بيطــبطـــب عـــلى قــــلبى و روحــــى

احنا كويسين
وبخير


حبيت
بس أفضفض معاكم
واكتب كلمتين لسامح
ولو انه مش هيقراهم ...


ربنا توفاه تانى يوم رمضان
والدفن ف كندا .. مش هنا خالص
عشان محدش بس يتعب نفسه
ولا يتصل ولا يبعت ميل ولا أى حاجة
ولا حتى تعليق

يكفينى تكرمونى وتكرموه
وتدعوله ف صلواتكم
او وقت الفطار
ويبقى كتر خيركم


:)

البقاء لله
ربنا يتغمده برحمته و يسكنه جنته و يكفيه انه من عتقاء الشهر الكريم

شدي حيلك يا فاتيما و ربنا يرزقكم الصبر

البقاء لله

ربنا يتقبله في عباده الصالحين

ويدخله فسيح جناته
ويصبر قلبكم جميعا

الله يرحمه يا أم يوسف
اللهم ارحمه و وسع مدخله و نقه من الذنوب و الخطايا كما ينقى الثوب الأبيض من الدنس و إغسله منها بالماء و الثلج و البرد و باعد بينه و بين خطاياه كما باعدت بين المشرق و المغرب
اللهم وسع له في قبره مد بصره و اجعله روضة من رياض الجنة
اللهم إغفر له و ارحمه و أدخله الجنة بسلام

البقاء لله يافاتيما
ربنا يرحمه ويعفو عنه ويحسن إليه ويدخله فسيح جناته ..ربنا يصبركم ياحبيبتى

" ان كل واحد نعرفه بيموت وبيمشى
بياخد معاه حتة مننا
و مبترجعش تانى
ولا احنا بنرجع نفس الشخص تانى "
---------------
رهيب الكلام ده ياحبيبتى
انا بحسها مع كل واحد كان موجود فى الدنيا وانا موجودة حتى لو شخصية عامة ومفيش أى ذكريات بينى وبينه
اللى بيمشى بياخد حتة منى معاه
أمر الله وربنا يجعلنا دايما من الصابرين

انا لله وانا اليه راجعون
البقية فى حياتك ويجعل مثواه الجنه

يااااااااااااة يا فاتيما
مش عارفة اقوك حاجة
بس من غير ما تقولي دعواتي مش هتنقطع ابدا لا دلوقت ولا بعد رمضان ان شاء الله
الله يرحمه ويدخله فسيح جناته ويتغمده برحمته ويغفر له ذنوبه

انا لله وانا اليه راجعون
ربنا يرحمه و يدخله فسيح جناته و يصبر قلبكم يارب

صباح الخير ..


لكل الى دعا و كتب تعليق
أو دعا ولم يترك تعليقا ..


شكرا
ومنحرمش منكم

صباح الغاردينيا ياروح قلبي
كنت جايه أقولك كل سنة وانتي طيبة بمناسبة رمضان بس دلوقتي بجد عايزة اقولك تعالي في حضني او خديني في حضنك لاني بجد مش شايفة قدامي من دموعي حسيت فيكي وحسيت بكل كلمة قلتيها بذكرياتك وسامح والحب والفراق مش هقدر اقولك غير انه ربنا بيحبه والسرطان لما بيهاجم انسان مش بيسيبه ورغم كدا بنبقى متفائلين وبنص لربنا وبس "
؛؛
؛
ربنا يرحمه ويسكنه فسيح جناته
لروحك عبق الغاردينيا
كانت هنا
reemaas

الله يرحمه برحمته الواسعه ويجعل مثواه الجنه...عظم الله اجركم والبقاء لله

البقاء لله وحده
ربنا يرحمه ويسكنه فسيح جناته ويوسع له مدخله
خالص التعازى يا ام يوسف

ربنا يرحمه يارب. ويحسن إليه. ويجعل مرضه كفارة له عن أي ذنب

ربنا يرحمه يارب. ويحسن إليه. ويجعل مرضه كفارة له عن أي ذنب

لا حول ولا قوة إلا بالله
انا لله وانا اليه راجعون

الله يرحمه يا فاتيما
الله يرحمه ويصبركم يا حبيبتي
ويصبر ولاده ومراته وباباه وماماته

مش ده اللي كلمتيني عنه قبل كده وقلتي اني بفكرك بيه؟

:-(

البقاء لله

إنا لله وإنا إليه راجعون

إرسال تعليق