.

.

خــلـى بـالـك مـن ذبـذبـاتـك  

Posted by: فاتيما in ,









طب هحكى القصة الاول 
وبعدين أقول 



عم بطوط ف .....




إيه ؟




نعمممم !!





أيوه هحكى عن شخصيات الكارتون 
و بطوط و ولاد اخوه  وكدا ...
اعملوا كبار عليا بقى 
و مبتقروش مجلة ميكى 
واعمل انا كمان انى مصدقاكو وكدا
 هه 





المهم 
هكمل و متخرجونيش م المووود 





عم بطوط 
كل سنة ف شم النسيم 
بيخبى البيض الشكولاتة ف جنينة البيت
عشان سوسو ولولو وتوتو لما يصحوا بدرى 
يدوروا عليه ويجمعوه
وكأنها لعبة تدوير ع الكنز و بتاع





ف هذه الاثناء و أبو البطابيط  بيخبى البيض 
كان فيه مركبة فضائية معدية فووووق
وفيها رائد فضاء ومراته جايين من كوكب غريب
ومعاهم "بيض" لمخلوقات اسمها الفليفل
وعاوزين يوصلوهم لكوكب الفليفل ..
ماشى ؟






لأ مش ماشى 
عشان الست مرات الراجل 
كانت بتنضف المركبة م التراب 
وجوزها متنرفز جدااا وبيكح وبيصلح ف جهاز 
قوم بالغلط زقته .. فزق .. هوه ... الجهاز 
طلع منه أشعة 
نقلت البيض بتاع الفليفل لمكان آخر
ودته فيييييين ؟؟؟؟



 
أصمالله عليكوووو 
جنينة بطوط تمام كدا مضبوط

 
ويصحى العيال الصبح 
يجروا ع الحديكة 
ويلموا البيض كله بما فيه بيض الفليفل
 وهما مش واخدين بالهم ويدخلوه الصالون


بعد شوية البيض فقس 
وطلع منه تلات مخلوقات لطاف كدا 
و قعدوا يلعبوا مع سوسو ولولو وتوتو 
اللى بصوا ف كتاب الكشافة على معلومات 
عن مخلوقات زرقا كدا ملقوش 
ومركزوش قوى 






ف داخلة عم بطوط وشافهم بيلعبوا 
واستغرب شكلهم قوى 
بس لاقهم ظراف وبيلعبوا مع العيال 
فهوه كمان ... سكت 







لحد ما فليفل فيهم وقّع فازة ع الارض 
انكسرت واتدشدشت 
ساعتها بطوط اتنرفز و راح شاخط فيهم 




قوم التلاتة ردوا عليها بأنهم تضخموا
وبقى شكلهم مرعبببببب



فبطوط أتخض و اتفزع
راحوا هما مرعوبين وكاشين ف جلدهم 
وجريوا ف كل حتة



سوسو ولولو وتوتو فهموا علطول 
وبكل ذكاء ان المخلوقات دى بتقلد 
اللى قصادها عشان بتلتقط منه الذبذبات
و محدش يسألنى يعنى ايه ذبذبات 
عشان يوسف 
لما سألنى اول مرة السؤال دا 
وعرفتش أرد 
و تنّحت وسهّمت حتى كدت أبكى



المهم  العيال قالوا لعمهم بطل خوف
واهدى ... فهما هيسكتوا 
وفعلا .. اول ما هدى وابتسم رجعوا لطاف 





بعد شوية قعدوا يلعبوا تانى ويتشاقوا
ويكسروله ف العفش و الصينى
راح بطوط معيط 
قاموا معيطين بقى و منهنهين زيه !!



وشوية كمان ومقدرش بطوط يتحمل الضغط 
انتوا عارفينه مهروش فراح شاخط فيهم 
نطوا م الشباك و هربوا على برا 



وطبعاااااااا 
لكم ان تتخيلوا باقى أحدث القصة 
من مطاردة بطوط و العيال للمخلوقات دى 
وهيا بتنتقل من مكان لمكان 
وتسبب ذعر وخراب وقلق بين سكان مدينة البط
وتبوظ حفل الاحتفال بعيد المدينة 
اللى بطوط كان قائد الاستعراض بتاعه 





لحد ما سوسو ولولو وتوتو 
فكروا ف حل سريع 
و لموا عيال المدينة و قعدوا يلعبوا 
فالمخلوقات لعبت زيهم 
و انبسطت و بطلت هجوم ع الناس 




وتنتهى القصة بستر ربنا 
و نزول رائد الفضاء ومراته فجأة
عشان ياخدوا مخلوقات الفليفل الزرقاء 
عشان يوصلوهم لكوكبهم
و بطوط موقفه النيلة قصاد المحافظ 
و سكان المدينة يتعدل ويتصلح ف آخر ثانية
و تخلص الحدوتة على كدا 



إيه بقى يا ست اللى انتى بتقوليه دا
  ان شاء الله ؟
وانا سمعااااااااك يلى ف تالتة تالت 
و عارفاك و شيفاك و هجيبك
هاتولى الواد اللى بيجرى هناك دا  



هتقولولى يعنى جايبنا يا شهرزاد 
على ملا وشنا عشان تحكى
 لحد الديك ما يكاكى و خلاص حضرتك 
ولاّ فيه هدف م القصة دى ؟؟؟!!



 أقولكم لأ فيه طبعا  ... !!



ببساطة ان فيه حاجات كتييير 
الواحد بيمر بيها ف حياته 
بتكون شبه كدا 
شبه المخلوقات دى يعنى
يعنى فيه مشاكل ومواقف وناس 
لما تقابلهم وتتعامل معاهم 
لازم تعمل حسابك وتضبط ذبذباتك كويس 
عشان متلاقيهموش إذ تضخموا فجأة كدا 
وهاجموك و آذوك او داسوا عليك من غير قصد 
لمجرد انك هبيت ف وشهم .. 
وانفعلت فوق انفعالهم بدل ما تروّق 



انا شخصيا مريت بمواقف كتير كدا 
و مشاكل لما بدأت بدل ما أستوعبها وتصغر
 كبرتها بدون قصد لأنى مكنتش متخيلة
 اللى هيحصل من وراها
و لقيتها فجأتن قد تضخمت 
 و توحشت .. وكادت تبلعنى 




مش بس المشاكل و الناس كمان 
ومش بتكلم ع الناس المؤذية 
اللى لازم توقفلهم اساسى
ومتوطيش راسك ليفتكروك جبان .. لأ 






انا بتكلم ع الناس اللى بتحبهم 
ومفروض مهمين ف حياتك و وجودهم ضرورى
ولازم لما يحصل بينك وبينهم أى أزمة 
متردش عليها بشكل أسوأ .. فتكبرها 
وتخليها تتأزم 
و مينفعش بعد كدا تنصلح 




فيه حاجات كتير لو فكرنا فيها 
هنلاقى اننا اتعاملنا معاها بالذبذبات الغلط
ف الوقت الغلط و بالشكل الغلط 
فكانت النتيجة مش زى ما نتمنى 




حاجات ف الدراسة 
و الشغل و الأصدقاء و الاهل 
و الحب و الجواز و العيال و الناس 
اللى حوالينا أى كانوا مين 



فجأة تلاقى خناقات وخلافات
 ابتدت من مفيش بين راجل ومراته
بين اتنين اخوات 
بين أصدقاء 
او زمايل شغل 
بين أم وبنتها او أب وابنه 
بين اتنين ماشيين ف الشارع
ولا يعرفوش بعض حتى 
ونقعد كبشر نلخبط كل حاجة 
و نبهدل الدنيا ... و بعدين بنرجع نندم
على انفعالنا و ما تبعه  من خساير
و اللى كان ممكن نتلافاها 
بحبة هدووووء




والحل ؟
بسيطة قوى 
و انتا مروّح تشترى كيس تايجر 
و تكبر و تسيطر 



و تسيطر على ذبذباتك 
تعيش حياتك 
مبسوط و راضى ع الأقل عن نفسك 
إنك كظمت غيظك و اتحكمت ف غضبك
وحوشته للى يستاهل الغضب 
زى مورسى والعسكر والفلول وكدهون :)



وكفاية كدا 
عشان قلبت على حصة تنمية بشرية 
ومليش ف النوظام دا 
أنا آخرررى مجلة ميكى كمصدر للحصول 
على طرق ناجعة للتعامل ف الحياة
ومحدش يستغربها يعنى 
دول بيقولوا احلى قوالة والله 
بس للى يفهم معنات الكلام يتلوه ..




و إفتكر مخلوقات الفليفل الزرقاء كل
 ما تواجه موقف ولو بسيط قد كدهون 
وتعمل حسابك انك ايه ؟؟
أيوه ... تتحلى بضبط النفس 
و تستهدى بالله كدا 
و تفوّت ... 
عشان من ناحية الدنيا 
فهى ف حد ذاتها مش مستاهلة
بس ...  فيها اللى يستاهل انك تحافظ عليه 





و رمضان كريم 
و كل سنة و انتوا طيبين
و .. كل واحد يخلى باله من ذبذباته 



-----------------------------------------

 
ستحقق كل احلامك إذا كنت فقط 
تملك الشجاعة ... لمطاردتهـا 
" والت ديزنى "




--------------------------------
-----------------------------------

This entry was posted on الأحد, يوليو 29, 2012 and is filed under , . You can leave a response and follow any responses to this entry through the .

13 كــــلام بيطــبطـــب عـــلى قــــلبى و روحــــى

البوست دا عشانك يا حبيب ماما ... عشان بجد
انتا وحشتنى قوى

حاضر نحاول نسيطر على ذبذباتى
بس وقت الغلط هنطرطش زلط واللى خايف على نفسه يبعد :)

فاتيما أولاً كل سنة و إنتِ طيبة و بألف خير رمضان كريم عليكِ و على كل حبايبك

ثانياً بقى البوست تُحفه و أنا إستفدت منه شخصياً..ساعات أو كتير فعلاً ذبذباتنا بتطلع بشكل غلط في الوقت الغلط..
على فكرة الذبذبات هي حركة الصوت أو أي موجات كهروماغناطيسية بتنقل إحساس معين حسب القصة...و ممكن تستخدم طبعاً في تشبيهات أدبية..

إحنا عايزين من البوستات دي كتير بيني و بينك أنا كمان عاشقه لمجلة ميكي..قصص بطوط بالذات...و حلوة الفلسفة اللي وراها.

كل سنة و يوسفك بألف خير و سعادة
و تجتمعي بيه قريب بإذن الله

معاكي في موضوع ضبط النفس ده
بس مش على طول عشان الواحد ما ينفجرش كمان :)
فيه وقت لازم الواحد يعبر عن زعله و غضبه

كده أحسن ما الواحد يفضل كاتم في نفسه لحد ما جهاز ضبط النفس يخرب خالص

كل عام وانت بألف خير يا ماما
ولو ان ماما دي كبيرة عليكي فانا هعتبرك اختي الكبيرة
انا حبيتك من اول مدخلت هنا ومن كلامهم الجميل عنك
ربنا يباركلك في يوسف وتشوفيه رجل صالح ان شاء الله
بحبك في الله
بارك الله فيكي
البوست جميل ومفيد

ومسا البنفسج علي عيونك يا احلي فاتيما
طب والله احلي بوست قريته ف رمضان ههههه
ده انا بموت ف بطوط وسوسو وتوتو ولولو وميكي وزيزي وميني بصي انا عيلة م الاخر ولغاية دلوقت بحب اشتري ميكي وماجد واميرات وكل مجلات الاطفال كمان
ولعلمك القصص دي فيها دايما حاجات مفيدة اوووي
ومش عارفة اقولك اية عن موضوع الذبذبات ده
خليها بينا احسن
رمضانك كريم انت والاسرة ويوسف
بوسات وحضونات كتيييييييييييييييرة

صعب نسيطر على نفسنا علطول
أصل لو الواحد فوت مرة أو اتنين لنفس الشخص مش حيفوت علطول
صعب الواحد يخلي خده مداس لأي حد مهما كان بيحبه

تخيلى أول مرة أقرأها حالا على روقان

الخوف جوانا هو اكبر أعدائنا
ولازم كل مشاكلنا نقابلها بهدوء

لازم التناغم اللى كنا بنتكلم عنه زمان
فى التصرفات
والتواصل البسيط بين الناس بدون تعقيدات كتير

ساعتها هيبقى كل حاجة تقبلها أبسط ومعالجتها أبسط وأبسط

تحياتى وغتاتى

أنا عجبني أوي الموضوع ده
جداااااااااا يعني :)

كل سنة وانتي طيبة ورمضان كريم عليكي وعلي يوسف بإذن الله

طول عمري بحب ميكي جيب وحكايات بطوط وبلوتو وعصابة القناع الأسود ، حقيقي جوه كل واحد فينا طفل ):
وكل واحد يخلي باله من الفولت بتاعه خصوصاً في رمضان والحر الواحد لازم يتحكم شويتين في أعصابه .
كل سنة وإنتي طيبة ورمضان كريم علي كل إللي بتحبيهم ):

إيه بئا!!!!!!!!!!

كل ماتحكي حدوته أحس إني عاوز أنام بشكل مبالغ فيه

بئول إيه: إحكي من بعد الفجر لحد المغرب وده مطلب شعبي على فكره إتقاء لشري

رمضان كريم :))
http://kouskoza7.blogspot.com/2012/08/blog-post.html

أولاً

استمتعت جداً بقصة بطوط

:-)

ثانياً

موضوع الذبذبات ده أنا جربته قبل كده، وفيه ناس مهما ظبطنا ذبذباتنا عشانهم .. برضه مش بينفع :-) ربنا ما يوريكي :-)

إرسال تعليق