.

.

يا أبو الريــش انشــالله تعــــيش  

Posted by: فاتيما in








 الصورة من عند وش الخير :داليا قوس قزح

مساء الورد
الإنذار التالت والأخـــــير
أبو الريش مستنيكم بكرة
والتفاصيل كلها عند قوس قزح
واللى لسه مخترش وجبته
يروح حالا يقول ... هنا   
أشوفكم على ألف خير
يا صحبة الخير

-----------------------
-----------------------------------

طب أنا الأول هبقى حيلوة 
و هقول صباح الخير 
و ازيكو 
وبعدين اتحمق على مهلى



  

ثباح الخير يا حلويييين 
وازيكم كدا .. 
و يا رب دايما كويسين 



حلو كدا عدانى العيب 

طيب 
 




حد يفهمنى بقى انتوا ايه نظامكو
 عشان شكلى عضرب أى حد ع الصبح
وأفطر عليه 
وانا بتلكك على فنجان قهوة 
أو مج نسكافيه و هشيلكوا ذنبى 
 و اقول للملايكة ساعتها ان انتوا السبب ... !!






ايه يا عيال 
بقى اروح عند وش الخير والهنا
 داليـــا  .. دوس هنا 
واقول هلاقى 70 او 90 تعليق ولاّ حاجة 
والناس اكوام اكوام جاية وبتنقى ف الوجبة 
 والمستشفى مش هيبقى فيها مكان لرجِل .. عشان هنملاها  
قوم الاقى العدد اللى قال جاى .. قليل 
و مفيش أى حماسة و لا رفع نعنويات 
ولا اى منظر ... ينفع كدا يعنى ؟!!!







طب مفّلسين و معكوش فلوس 
 زى 99% من الشعب المصرى و ماشى ..
 عادى ... كلنا هذا المواطن 
و بلاش التبرع المادى 
انما أفيش حد يقول انا جاى
أكل معاكو عيش وملح و مكرونة و فراخ بانيه 
و أتونس بيكو ف يوم مفترج زى دا .. ؟!!






لأ 


أنا منقمصة 
 
ومخمصاكو


إنقماص السنيييين
 و زعلتونى جداااااا


و أشيل ف نفسى 
وإنقهر ؟!!! 










لأ 
طبعاااااا



 و بصوا بقى 
فاااااااضل 4 ايام على ابو الريش 
وهكتب اسامى اللى هييجى 
و أشيلها للزمن وأدينى بحذركو بقى 
و قد أعذر من أنذر 
و خافوا على نفسكو 
و تعالواااااااااا و الطيب أحسن






و بس مش هقول حاجة تانى 
و على رأى يوسف ابنى .. إلّا نشوف


ويقصد بيها .. اما نشوف يعنى :) 







 
أشوفكم على ألف خير 
------------------------------------------
---------------------------------------------------


البوست 
---------------------------------------------



 اولا
كل رمضان 
وانتوا طيبين وبخير




ثانيا
كل رمضان 
واحنا متجمعين ع الخير




ثالثا
كل رمضان 
وابو الريش لسه معانابيشوف خير








مش هرغى كتير ... عشان انتوا عارفين
واللى مش عارف 
أقوله








كل سنة وتحديدا ف نهايات رمضان
 بنروح نزور
مستشفى ابو الريش للأطفال
ونعيد ع الولاد الجمال اللى هناك
واللى محتاجين طبطبة ف أحوج وقت
الا و هوه وقت المرض






مستشفى ابو الريش بتعانى
من مشاكل ادارية و مالية بيروقراطية مزمنة
وبتعانى من ان بتوع الاعلانات مش فاكرينها
ومركزين مع مستشفيات تانية بعينها
بينما اطفال ابو الريش ف أمس الحاجة للتبرعات
وهذا المستشفى حيوى 
وبيعالج سنويا اعداد رهيبة من أطفال مصر
 ومحتاج فعلا لكل مساعدة ممكنة 








وكل سنة برضو 
برعاية داليا قوس قزح وش الخير
وخالد همس الاحباب الجدعنة والشهامة
وآبى هانم بتنجانى 
وباقى الصحبة الجميلة 
كلنا .. بنتشجع ببعض و بنروح هناك
و نحاول نشارك بأى منظر
سواء بالفلوس او نلم تمن ونشترى اجهزة
أو حتى نجيب ادوية ناقصة و مطلوبة بشدة
أو كتب او هدوم أو لعب أو فوانيس 
علب بسكوت وعصير وحلويات .. أى حاجة 







يعنى اللى ربنا بيقدرنا عليه .. والحمدلله
وعاوزين السنة دى منقطعش بقى 
 العادة الطيبة 
لذا
 وبإختصااااار
معادنا ان شاء الله
السبت الجاى  11 اغسطس 2012
الساعة 4 قصاد ابو الريش اليابانى
اللى ف شارع القصر العينى
وقرب مستشفى القصر العينى الفرنساوى
والحاااااااضر يعلممممم الغاييييييب 








المطلوب 
وعشان محدش يتعب ولا يشيل
وكما فهمنا الاحتياجات متمركزة ف الفلوس
لأن الظروف المادية زفت 
وطبعا مفيش تبرعات عشان مفيش اعلانات
ووزارة الصحة
انتوا عارفين ايدكو منها و تحت الأرض 
خصوصا بعد مجى مرسى اتوقعلها انحدار اكتر








قصره و المهم عشان مصدعكوش 
اللى يخرج من ذمكتم يا عيال هاتوه
و فرصة اننا لسه قابضين
شيلوا نصيب ابو الريش على جنب
واعتبروه من الزكاة بتاعت السنة دى  








واللى مقبضش أو لسه طالب أو مش بيشتغل
يستلف من ابوه وامه او اخته 
او من خطيبها او جوزها ... مش مشكلة :)
المهم تيجوا ومعاكوا اللى فيه النصيب
ومحدش يستقل بأى مبلغ ولو صغير 
الصغير جنب الصغير فى النهاية بيتجمعوا
ويبقوا حاجة كبيرة
وانا هجيب شوال بقى عشان ألم الغنيمة
و بعدين نستفها اكوام اكوام ف الفسحة :)










اللى امكانياته ماديا متسمحش 
وعاوز يبقى معانا ف اليوم دا
ييجى برضو .. واهلا وسهلا ومرحبا
وأهو يونسنا وياخد بحسنا 
المناسبة والمجى مش بالفلوس
و مش أتاوة هيا 








بس اللى جاى يغتت او يتسلى 
ذنبه على جنبه ويجراله اللى هيجراله بقى 
وانى لأحذرن من اولها 
و متنكدوش علينا ف يوم مفترج زى كدا 
الله يكرمكو يعنى 










خطة اليوم كالأتى
أبو الريش الساعة أربعة
وبعد الخروج م المستشفى واداء المهمة
هنفطر سوا زى كل سنة 
وحتى الآن جارى الأتفاق على مطرح 
وغالبا هيكون كافتيريا دار الأوبرا المصرية
عشان بعد الفطار نفضل قاعدين ف الجونينة
ومنروحش ف أى حتة تانية زى كل مرة
 و نضيع وقت ف التحرك والمواصلات 
واذا تم تغيير المكان او الاستقرار عليه
بشكل نهائى هقولكم بتحديثات أول بأول
وعند داليا قوس قزح (هنا) كل الإستفسارات
 لو حبيتوا تسألوا وتتطمنوا على أى تفاصيل 








ان شاء الله يكون يوم ناجح ومثمر
وممتع لكل اللى جاى بنفسه وهيشارك 
او مش جاى و مشارك معانا من ع البعد 
زى آبى هانم أم جوز العصافير م الكويت 
وزى مينا الغالى .. منامينو ف السعودية
و هفتقدك بشدة يا فتى
و وليد الزهيرى و مهندس مصرى 
وكل طيورنا المهاجرة اللى المسافرة برا
 بس ساكنة قلبنا من جوا








وطبعاااااااا يا ... خالد همس الأحباب 
اليوم دا مينفعش من غيرك 
واتمنى و يا ريت بقى
كل واحد ييجى من سكااااااات أحسنله 
ومفيش داعى أشردله على بلوجر و تويتر 
احنا ف رومضان و متضيعوش صيييييامى 
هه






خلاص كدا اتفقنا
السبت 11 اغسطس الساعة أربعة
قصاد أبو الريش
أشوفكم يومها على ألف خير وسعادة يا رب 
كل سنة واحنا متجمعين ع الخير
والصحبة الطيبة 






وكل سنة
و يا ابو الريش انشالله يعيش 


----------------------------------------
--------------------------------------------
بوستات صديقة 
----------------
----------------------------------------- 

This entry was posted on الجمعة, أغسطس 10, 2012 and is filed under . You can leave a response and follow any responses to this entry through the .

42 كــــلام بيطــبطـــب عـــلى قــــلبى و روحــــى

السلام عليكم

كل سنة وحضرتك طيبة

ربنا يجمعكو دايما في الخير يارب

كان نفسي أحضر معاكو
بس عندي درس مش هيخلص قبل 1:30 :(
تتعوض إن شاء الله السنة الجاية :)

أنا جيييييييييي
بإذن الله و هعلن عندي قريب جداً

كل سنة و رمضانك أجمل
:)

أنا إن شاء الله جاى علشان................ أغتت وأتسلى... هاع هاع هاع هاع هاع

اه يا فاتيما
بتوجعيلي قلبي
مش عارفة اذا كنت هقدر والا لاء
بس سيبيني اتحايل علي احمد اخويا شوية
يمكن يوافق يخليني اجي ويجي معايا
بجد عايزة اووي اني اجي بس بجد تعبانة ومشغولة وشوية لخبطة كدة انتي عارفاهم
بس لو اتحايلت وقدرت اجي اكيد هاجي بدري وامشي بدري بدري
عشان الموصلات
ادعي معايا انهم ف البيت يوافقوا

طب نفسى أفهم ليه ما أتذكر

إنه ممكن يستلف من خطيبته أو مراته

يا عينى على الرجالة المغلوبين

فاتيما
روح القلب الملائكية

ربنا دايما يجمعكم على الخير يارب
دايما مجمعة الاحباب

تحياتى

انا كنت هنالك وقابلت نائب المدير وقال ان ممكن نتبرع بس مش فلوس وخلاص ممكن نجمع لنشتري جهاز او حاجه محتاجنها عمري ما جربت اروح معاكم بس ربنا يقدرني واشارك معاكم السنه دي

كل سنة وانت طيبة يافاتيما
الواد مينا برغم كل بلاويه الا إنه فارق معايا فحت نحت وواحشنى موت ابن اللذين
وبدعيله من كل قلبى يلاقى الأيد الحنينة هناك

كل سنةوانت طيبة

إن شاء الله على ما ييجى اليوم دا أكون بقيت بخير وأحضر

كل سنة وإنتى طيبة يا فاتيما :)

فقري

صباح الغاردينيا روح قلبي
ربنا يوفقكم يارب
والله تمنيت اكون معاكم
ربنا يجزاكم كل خير"
؛؛
؛
لروحك عبق الغاردينيا
كانت هنا
Reemaas

كل سنة و انتم طيبين و ربنا يقدركم على فعل الخير

كل سنة باجى أكتب تعليق إنى نفسى أكون حاضرة معاكم اليوم دا ..
لما ربنا يريد هحضره فى سنة من السنين إن شاء الله

ربنا يجعله فى ميزان حسناتكوا جميعا يارب ..

وكل سنة وإنتى بخير يا فاتيما :)

يافاتيما ياحبيبتى

ديما يارب سباقين للخير

انا معاكوا ان شاء الله ..

وع فكرة مش شرط الناس تكتب انها جاية ممكن يكونوا جايين بدون م يقولو وفية ناس بتيجى حسب الظروف فى وقتها ..

صحيح انتوا عملتوا ايفنت ع الفيس ولا لأ؟؟

ايوه يا طمطم عايزين الهمة و التشجيع

بس فى سرك فى ولاد قالوا على الفيسبوك انهم جايين .. والعدد هناك اكتر .. بس يارب يصدقوا

اليوم ده مش بشيل همه ..الخير بيجى و بيزيد .. ربنا يكرم يارب

انا ديييي ان شاء الله

أخييييييرا بنا كرمني باني فسنة من السنين حاقدر أكون معاكوا فالعمل الجميل ده ويبنولني شرفه وثوابه إن شاء الله .. بقالي أربع سنين بتابع تجمعاتكم دي وأتمنى اني أقدر أكون فمصر فوقت منهم وأخيرا أهو ... وأخيرا كمان حاشوفك يا فاتيما بتوحسيني قوي ي ي ي

هنودة

Nour Sherif Mohammad
--------------------

ازيك يا نور
ومعلشى احنا اللى هنعوضكو ان شاء الله
واول سفرية لينا هتكون اسكندرية
ونشوفكو على الف خير هناك
:)

وكأنك معانا برضو

كل سنة وانتا طيب
والسنة الجاية بأذن الله
تبقى حاضر اكيد
عشان مش هيبقى فيه دروس بقى
:)

شيرين سامى
----------

تعيشى وتييييييجى يا شوشو
ومستنياكى يا قارورة عطر المدونات
ودايما معانا ف الخير يا حبيبتى

:)

أبو حميد
--------

ههههههههههه

يا هندزززة انتا تغتت وتتسلى براحتك
وعلى قلبنا زى العسل
احنا نطول .. ؟!!!

كل سنة وانتا طيب
و كل احبابك بخير
ومعانا دايما ف الخير

:)

re7ab.sale7
-----------

ان شاء الله تقدرى تيجى يا رحوبة
سيبيها على ربنا
وان شاء الله ينفع
:)

ربنا يهديك يا اخو رحااااب
ويحنن قلبك عليها وعلينا
وعلى عيال ابو الريش
يا رب

الازهرى
------


نعم يا خويا ؟

انتوا هتتجوزنا وكمان تقّلبونا
واحنا نقّلب مين يعنى
ولا انتوا بتشتغلوا عشان مين يعنى
مش فاهمة .. ؟!!!


مش عشان المناسبات اللى زى دى

دنتوا رجالة غرييييبة

آل مش عايزين تتقلبوا آل
هزلت بقى


:)

ابراهيم رزق
-----------

وانتا طيب يا ابو العيال
ولما بفكر ايه اللى جد ف الدنيا
وممكن يخلى رمضان مختلف السنة دى شويةلقيت كذا حاجة
بس اول حاجة جت ف بالى
هيا ... سولى

تخيل
:)

Dalia ELakkad
-------------


حضرتك تشرفى واهلا وسهلا
وان شاء الله يكون يوم ناجح
ومثمر ونعمل حاجة تنفع الولاد هناك

ان شاء الله

:)

نور الدين
---------


وانتا أطيب يا نور
وغياب مينا قاطع فينا كلنا بصراحة
وحاجات كتير ملهاش طعم من غير وجوده

بس معلش
هوه معانا برضو
و بهذوها المناسبة بقى
انتا جاى يا حاج بنفرين
وبالنويابة عن مينا وكدهون ..
و مفيش اعتذرات .. هه


:)

كل رمضان وانتا منورنا زى كل سنة

شاب فقرى
--------

وانتا طيب يا كريم
وان شاء تكون بخير وتقدر تيجى
انتا بتحضر كل سنة يا بنى
متقطعش العادة دى بقى وتعالى
اجبر بخاطرنا يا جدع

:)

ريمـــاس
--------

انتى معانا يا نسايم الجاردينيا
وكفاية كلماتك الطيبة
ودعواتك
وامنياتك الجميلة .. العطرة زيك

والسنة الجاية تكونى معانا يا حبيبتى

:)

مهندس مصرى
----------

وانتا طيب يا محمد
ومعرفش ليه حساك زعلان قوى الأيام دى
ومش ف المود ...

مالك ؟


ربنا يصلحلك كل احوالك يا رب
والسنة الجاية تبقى معانا
ان شاء الله

Sarha..
-------


:)
ولا تعرفى يا سارة
اللقا نصيب
ويمكن النصيب يكتبها المرة دى
:))

كل سنة وانتى طيبة يا حبيبتى
والف مبروك ع النجاح

:))

دعاء مواجهات
------------


عملوا ايفينت يا دودو
ومعلش طب يعنى قولوا يا عيال
عشان يطشمئن قلبى

انتوا عارفين مليش ف الفيس بوء دا
وكدهون


وانتى جاية بقى
يوم سبت اهو مش جيمعة

:)

قوس قزح
-------

مساء الورد يا وش الخير
وبعدين طاه مش تقولولى طيب
بدل ما أطلع زرابينى ع العيال
وهما ما شاء الله اهو متحمسن
وبيقولوا جايين ...

طب احنا اسفين يا بشر


:)


ربنا يوسع رزق الولاد يا رب
ويبارك ف كل جنيه جايلهم


وعلى تويتر هفكرهم كل يوم
وأى تحديثات قوليلى
ولو فيه حاجة مطلوبة
ينفع اجيبها وانا جاية
وعاوزنى آجى من امتى .. وكدا ؟

ماشى

sony2000
--------

انتى ى ى ى جميلة
وشطورة .. يا قمررررررر
وتعيشى وتيجى يا حبيبتى

:)

Hannoda
-------

بتهرررررررجى يا قمراية
الف حمدلله ع السلامة
وهنشوفك بجد ... ؟

كدا اليوم عمال يحلو
:)

طب ابقى قوليلى قاعدة لحد امتى
عشان بنرتب لسفرية لاسكندرية
بعد العيد كدا بحبة بسيطة
فممكن نظبط المعاد وتكونى موجودة

ماشى ؟

بوسات وحضونات لحد يوم السبت
وحضرى نفسك عشان
هتتفعصى ى ى

:)

الناس الحلوة اللى تعليقاتها
موش للنشر يا فاتيما :)
---------------------------


فرحانة عشان اللى قال جاى
ومنتظراه أكيد
هينورنا ويكترنا



واللى وحشاهم
هما كمان واحشنى
ويا ريت تحاولوا تيجوا


:)

ان شاء الله جاية ياحبيبتى ومعايا ضيف
جديد ;)

ومعاكم ع الفطار ان شاء الله

حددتوا مكان الفطار النهائى ولا لسة ؟؟

فاتيما فاتيما فاتميا
ازيك ازيك ازيك
ان شاء الله هجي علشان اشوفكو واتونس بيكو حكم احنا بقالي كتييييرررررررررررر قوي ماشوفتكوش
وان شاء الله يبقي يوم حلو ومثمر زي كل سنه .. حسب ماعرف وليد جه اجازة وان شاء الله يكون معانا حكم هو واحشني قوي
زي مانتو كلكو واحشني موت
الي لقاء قريب قوي يا صديقتي الغاليه

وحشتينى يا فاتيما اوى

من هنا لحد عندك والله العظيم

وجايلى منك رسالة ف تويتر ومنه لله مش

عايز يدخلنى ارد عليكى

المهم انا جاى :) باذن واحد احد

ومعايا كمان خالتو :)

بس مش عارفة هافطر معاكوا ولا تؤ

المهم انى هاشوفك واسلم عليكى

واخد حضن السنة ♥ اللى بيقضينى للسنة اللى بعدها

كل سنة وانتى وطن القلوب الخضراْ يا رروح قلب منونتك قمورتك

بحبك انا ♥

مهندس مصرى
----------

منشرتش التعليق بتاعك يا محمد
معرفش حسيت انه فيه فضفضة امتر ما للنشر وكدا
:)

ربنا يروقلك بالك ويصلحلك الحال
وترجعلنا بألف سلامة
واول ما تقول عاوز اشوفكم
هنرتبلك معاد مخصوص على شرف مجييك
بعد ما تخلص مشوايرك وتبقى فاضى
بعد نزولك الاجازة ان شاء الله

:)

خالص ودى
يا أجدع مهندس مصرى
ف مصر والسعودية والدنيا كلها

دعاء مواجهات
------------

انتى تنورى يا دودى
انتى وكل اللى ييجى من طرفك يا حبيبتى
والفطار بشكل نهائى ف الاوبرا
وتفاصيل الوجبات عند داليا
اللينك فوق .. ف البوست
روحى اختارى الأكل بقى
عشان داليا تحجزه العدد التقريبى

أشوفك على ألف خير
:)

mostafa rayan
-------------


انتا كمان يا صفصف
وحشت اختك فاتيما موووت
ويا رب دايما متجمعين ف الخير
وانتا اول الحاضرين

اشوفك بكرة على ألف خير
يا الطيابة ذاتها

мαησηα
-------


وانتى طيوبة واطيب يا منونتى
وكل سنة وانتى بألف خير يا حبيبتى

مستنياكى يا قلب الملايكة
واهلا بخالتك
وربنا يسهل ويعجبها قعدتنا
:)
وكل رمضان وانتى معانا
يا حبيبتى


والحضونات متحوشة
وملفوفة بالسلوفان
ومتربطة بفيونكة فضى ...
وجاهزة ع التسليم

:)

بوسات وحضونات كتيرة خالص
شوفي من غيو زعل حصل ظروف كدة هبقي احكيلك عليها
بس الفلوس ان شاء الله انا اتفقت مع اس بس لسة الفلوس موصلتنيش بس لما الفلوس تكون معايا اي مبلغ كان هعرفك عشان اعرف ابعتهالك ازاي
اوك
وهبقي احكي لك اللي حصل بعدين
بحبك اووي
وسلامي لكل اللي هيحضروا

ما شاء الله

ربنا يقدرك دايماً وما يقطع ليكم عادة جميلة زي دي

إرسال تعليق