.

.

۩ .... أحــــلى شـــيـلــة .... ۩  

Posted by: فاتيما in











يا مسا التماسى 
مسا التمااااااااااسى
ازييييكم يا أهل الخير 
الذى تم بفضل الله و كرمه 
ثم أياديكم البيضاء 
ومش بس خير واحد و لا خيرين 
دول 16 ألف خير بحالهم
:)




الصورة من عند داليا العقاد 


يعنى 16 ألف جنيه
اتلموا النهاردة يا بشر  
و هيروحوا لعيال أبو الريش المنسية
على رأى رحاب صالح


  
قايمة الحضور 

وحى الخاطر - محمد فاروق - sony2000 ميرا
أحمد ديمو - محمود بهجت - أبو حميد 
شيرين سامى - الأزهرى - كريم شاب فقرى 
محمد عبدالعاطى - احمد سكر - داليا العقاد 
محمود الدوح - رامى - مصطفى ريان 
هنودة - و قريبتها رباب - كيكى عووو
منونا - دعاء مواجهات - وخطيبها 
 reem - سامح عزت
أحمد سلامة - استاذ شريف - شفقة واحسان
رشا حفيدة عرابى منار بيطريةومش بإيدى
ابراهيم رزق و ساليناز  

ضياء بيتوفل مايند - ايمان
داليا وش الخير و صديقة لـيها
و طبعا ... خالد همس الاحباب




من الفيس

 مروة و صديقة ليها 
ريهام - نيهال - منى عفيفى
  


ف السريع بقى 
عشان مصدعكوش
ويادوب
 هوه بوست 58796040 كلمة و بس 
:)
اليوم و الحمدلله مر بسلام و نجاح 
وربنا كرم ولاد ابو الريش 
سواء بمن حضروا واتبرعوا 
أو اللى بعتوا حوالات الأيام السابقات
كتر خيركم جميعا
و كل سنة وانتوا سباقين 
ف الخير والمشاركة من قريب أو بعيد 
سواء بالفلوس أو الدعوة للحدث 
او الدعاء الطيب 




المبلغ حلو .. الحمدلله 
وأزيد م السنة اللى فاتت 
وهيتجاب بيهم اكتر من حاجة 

مضخة تحاليل بـ 9000 جنيه 
علاج ضوئى بـ 3000 جنيه 
مستلزمات طبية للجراحة العامة بـ 3000 جنيه
وتم دفع علاج لحالة مستعجلة بـ 500 جنيه 
و المبلغ المتبقى 
إتوزع على الفراشين الغلابة 




استاذ خالد عونى كان ف انتظارنا 
كعادته كل سنة
و استقبلنا بكل الود 



نيهال من الفيس شخصية جميلة
تعرف أغلبنا و متابعة مدوناتنا
وأول مرة تتشجع وتحضر لقاء 
و وصتنى أبلغ البت خيخة 
انها بسببها بقت تروح تتبرع بالدم 
كل اربع شهور
و بتقولك يا خوخة 
جزاكِ الله خيراً عنى
ومش بس نيهال اللى سألت عنك 
كذا حد لما شافنى قال : خيخة فين ؟
محمد عبدالعاطى ومنونا وناس كتييير
سألوا عنك يا ست :)



البت كيكى عووو خست 
وبقت قمورة عن الاول وكدهون 



داليا العقاد كانت ممثل الصحافة 
النهاردة ف اللقاء 
شخصية ودودة ولطيفة 
وكانت كاتبة هنا عن ابو الريش 



فرحت قوووووى انى شوفت 
منــونااااااااااااااا
وكان نفسى تقعدى يا بنتى 



الواد محمود الدوح لسه 
أبو ضحكة جنان على رأى خيخة
وكريم شاب فقرى فرحت لما شوفته  
ومصطفى ريان لسه أمير و طيب
و أطيب كمان 



سامح عزت حضر ومشى قبل الفطار 
عشان سايب المودام والبنوتة 
والسنة الجاية مش هندخله ابو الريش
ولا يقعد معانا من غيرهم :)



وشرحو محمد فاروق قلب مصرى 
اللى مشى سريعا عشان يلحق يفطر
مع اسرته و نورتنا يا محمد 



دعاء مواجهات جت مع خطيبها 
شخصية طيبة ومهذب جدا 
ربنا يتمم بخير يا دودى 
والسنة الجاية تيجى الفطار 
وانتى لابسة الدبلة ف الشمال :)



الناس الحلوة اللى كلمونا ف الموبايلات
يطمنوا على سير العملية التبرعية
موشكرينلكم جدا جدا 
ونخص بالذكر البت العاشقة
الرومانسية الحلوة الشقية 
وحنين القلب من اسكندرية الماريا



خالد همس الاحباب قعد يبستف فينا
ويسمعنا م المنقى خيار عشان
اخترنا الاوبرا ومروحناش مطعم الحاج ابو العز
و قال مين اللى جبنا هنا
 فلبسناها علطول ف الواد أزهرى




و ... صراحة يعنى 
الأكل ف مطعم الاوبرا كان شنيعا
ومش فاهمة بقى كل سنة كدا 
لازم يطلعلنا حاجة 
مرة الخدمة سيئة ومرة القعدة حر
ومرة الأكل ميبقاش اللى هوه 
ويستهيألى كدا ان العيب فينا احنا 
  أو ... اما اللى مبيجيش الفطار 
بينشنا عين معتبرة وبنتحسد نتحقد 
وليه بس دحنا اخواتكم ؟!!!



هنودة غربة
نورت المطرح هيا و رباب 
و ناس كتير انبسطت بوجودها 
وانا أولهم طبعا :)




وحى الخاطر
نازلة اجازة م الكويت 
بس هيا مصرية جدعة وبنت بلد 
و يا دوب جت شوية ومشيت طوالى 
انتى نورتيناااااا يا فندم 



ايمان من طرف ضياء بنوتة لطيفة
وانسجمت مع الحضور بعد فترة وجيزة
ومتخضتش مع اننا كنا ف استراحة الدكاترة
خمسين بوء بيتكلموا ف وقت واحد
ومعلش ضربت عواف ع القلم بتاعك :)



استاذ شيرين الكردى 
الشهير بشريف الشياكة كلها
نازل اجازة و لحظنا الحلو والحمدلله
مفوتش فطار أبو الريش 



 
اما اللى فوتته لدواعى السفر
لكن معانا علطول فهى آبى هانم بتنجانى
و الناس باعتلك السلام يا بيبى 
أذكر منهم حاليا محمد عبدالعاطى 
والسنة الجاية تكونى معانا 



داليا من اول ما جت قعدوها 
والفلوس اتلمت ف حجرها 
وقعدت هيا وخالد و كام نفر يعدوها
ويقسموها ويرتبوها 



ريم يا نضرى اول ما دخلت 
ومن قبل ما تسلم على أى حد تم خطفها 
من على باب استراحة الدكاترة 
وتثبيتها و قولنالها طلعى اللى ف شنطتك
و فين الفلوس ... ؟!!!
اكمنهم عارفين انها أهل كرم يعنى 
فقالوا يقّلبوها اول ما شافوها داخلة 
و البنية ملحقتش تاخد نفسها  :)





ابراهيم رزق جه بعد الفطار 
ومعاه سالينازة القمرررررر 
ودخلنا ف نقاش حوالين مورسى النحس
و اللى حاصل ف البلد عموما 
وبعدين قعدنا نفتكر احداث ال18 يوم 
والنوستالجيا اشتغلت ...  ع الآخر




 لو نسيت أى اسامى يا جماعة  
محدش يزعل والنبى 



فيه ناس جت ومشيت سريعا 
عشان ميقدروش يحضروا الفطار
بس ميقدروش برضو يتأخروا 
عن الخير والمشاركة 
نورتونا والله يا جماعة الشوية اللى جيتوهم



و مبقتش استطعم أى لقاء 
من غير رشا حفيدة عرابى 
وفرحت زى العيال لما شفت منار 
وقولتلها عاوزة كل السنة تبقى رمضان 
عشان اعرف اشوفك 



أه و محدش يشرب ولا ياكل 
ف كافتيريا الأوبرا الا الكان والعصير المقفول
انما لا شاى ولا قهوة ولا أى أكل 
عشان هتكرهوا نفسكو 



احمد سلامة نسمة وهدوء الدنيا 
وأول ما شفته سألته عن احمد البوهى
واحمد مهنى ...التلات أحمدات الغاليين 
ربنا يطمنا عليكم دايما يا شباب 



شيرين كانت جايبة كيك للولاد
و رغم مشيانها بدرى 
الا ان آخر بوست ليها تحديدا 
عن الأعلانات بتاعت رمضان كان 
مثار حديثنا واشادة الكثيرين .. هنا 



احمد الصباغ بعت تحياته 
و وكمان محمد متولى رحلة حياة
و تشكروا يا فندم :)
 

رحاب صالح كان نفسى تيجى 
بس معلش تتعوض مرات جاية 
وتعالى اسكندرية يا بنفسج بيبهج :)






 

رامى خد تريقة السنين على انه بيتعب 
قوى ف الصيام يا حراااام 
ومينفعش كدا :)



وسونى برضو مسلمتش 
من مشاكسات أزهرى و أبو حميد 
والــ 12 قرش بتوع الدكور اللى وقع




احمد سكر دايما حاضر ف الخير 
و ميرا شعبان الجميلة
وضياء وداليا وخالد همس الاحباب
و أبو حميد و محمود بهجت
و الواد أزهرى و رامى
و بقيت لا أتصور لقاء تدوينى ف الخير 
من غيركم يا عيااااااال 



افتقدتك يا مينا ... جدااااااااااااا
ونور الدين مجاش لا هوه ولا وليد الدوغرى
وعينضربوا هما الجوز الا اذا انتا 
إتوسطتلهم وقولت سامحوهم عشام خاطرى
فنسامحهم علطول 
و رمضان الجاى تكون معانا يا غالى 



و قد قيل واوشاعات كدا
ان وليد الزهيرى العزيز جاى 
كان نفسى اشوفك يا أبا مهند 
كمان جت سيرة م. احمد القاضى بكل الخير
و تلاقيك شرقت يا عم مراكبى :)



ولو قولت الأسامى اللى كان نفسى 
تيجى مش هيكفينى مدونة تانية 
جنب المدونة دى 
بس ساجى صديقة داليا 
ورودى بنوتة مصرية و مروة زهرة الجنة
وعسقلانى و عمرو و ناس تانية بتدى لليوم
نكهة و طعم و ذكريات حلوة 
افتقدتكم يا جماعة والله 



 
يا عمرو يا يسرى يا فضفضة 
مجتش ليه .. ؟؟






ولولا ان ماما zizi ف العمرة 
كنت اتمنيت انها تكون معانا 
بس هيا ف أغلى المطارح
وربنا يرجعها بألف مليون سلامة




واللقاء الجاى ان شاء الله هيكون 

أسكندرانى شحط محط 
و أختلفت الأراء حوالين المعاد 
ناس مسافرة فقولنا نخليه يوم 1 سبتمبر
وناس تانية قالت خلوه بعد القبض 
يعنى السبت اللى بعده 8 سبتمبر 
فشوفوا كدا و نستطلع الأراء
والاغلبية هيا اللى تحدد .. ماشى ؟



ابراهيم رزق نقل توصية 
من نوران سراج الدين عن احتياج
معهد الاورام للمساعدة و اللى مجاش 
النهاردة ممكن يوجه التبرعات لهناك لو عاوز
او مرة نعملهم زيارة ونحاول نساهم بأى حاجة
ان شاء الله 



واخيرا شكرا لكل اللى جه
واللى مقدرش ييجى و شارك 
بالتبرع أو الدعاء أو التصييت لليوم 
مننحرمشى منكم
وعقبال كل سنة



صحيح زى ما بيقولوا الرزق بينادى صاحبه 
و النهاردة و انا ببص على ظرف الفلوس
وهوه ف إيد داليا عمال يكبر 
كل ما تتحط فيه زيادة 
الاقينى بقيت فرحانة جدا بكل اللى جم
و تكبدوا المشقة
وأحس فعلا إنه .... 
اجمل حاجة انك تشتغل مواصلاتى 
تشيل الخير من مكان و تنقله لمكان تانى
عشان تديه لصاحب نصيبه وتبقى متحمس
ومش تعبان ولا متضايق
عشان دى أحلى شيلة بجد 



واخيرا 
و عشان يجب أن يرد الفضل إلى أهله
 ... يا داليا يا وش الخير 
ويا خالد يا شهامة و جدعنة الدنيا
ربنا يحفظكم 



و كل سنة و ربنا يبارك 
ونشيل الشيلة ودايما نوصلها لأصحابها
فـــ .. أبو الريش 
و ...  انشالله تعيش 





ملحوظة
الغنوة ملهاش علاقة بالتدوينة 
بس قولت اعمل شوية تفاريح وكدهون :)

-----------------------------------
--------------------------------------------------

----------------------------------------
-------------------------------------------



---------------------------------------------

بوستات ما قبل اليوم

----------------------------------------- 



This entry was posted on الأحد, أغسطس 12, 2012 and is filed under . You can leave a response and follow any responses to this entry through the .

44 كــــلام بيطــبطـــب عـــلى قــــلبى و روحــــى

زي ما اسمي كان اول اسم يذكر اتمنا كمان انه يكون اول تعليق
مساء الخيرات عليكم جميعا
مساء الزهر والجوري فاتيما العسل
بجد مش عارفه اقول ايه ولا اوصف سعادتي ازاي
لان عملت شيئ كان نفسي اعملوا من زمان
وهو مساعده المرضي ولو بشيئ بسيط زي مادايما يقولوا ولو بجنيه
بجد حاسه ان نفسيتي عاليه فسما
اما أني شوفتك دا بقا كان شيئ غالي علي جدا جدا وانا سعيده جدا واتشرفت جدا بيكي وطبعا كل الناس الحلوين الطيبيين اللي كانوا موجودين ربنا دائماً يجمعكوا في الخير واتمنا من كل قلبي أني اكون معاكم السنين الجايه
اللهم امين يارب العالمين



ملحوظه
انا عملت المغامره الكبرى علشان أجي

للمرة الثانيه رغم أني ولا عشرات المرات تكفي علشان اقول ان دا كان بالنسبه لي اسعد يوم بحياتي
ودي ومحبتي واحترامي
وحي الخاطر

:) متجمعين فى الخير ياأهل الخير

تعيشوا و تعملوا خير علطول
هو ده اللي بيدوم و بينور صحيفة حسنات الواحد يوم القيامة
ربنا يجمعنا على خير ان شاء الله
كل سنة و انتم طيبين و منورين الدنيا :)

الحمد لله اليوم كان رائع وعدى بسلام والخير وصل لاهله وكفاية اننا نحس باننا بنعمل عمل خير الكل بيشارك فيه بكل حب واخلاص ودى اسمى رسالة فى عمل الخير الحب والاخلاص لوجه الله وحده
كل سنة وانتم جميعا بخير ومتجمعين دايما فى الخير

انا كمان كنت مبسوطة اوى :)
اصلها اول مرة وبصراحة كنت مخضوضة فى الاول بس ماشاء الله ناس كتير حاولت تدخلنى فى الموود
شكرا"مستر"ضياء وهند ورباب وكريم اتبسطت انى اتعرفت عليكم ويارب تكون معرفة خير

وبالنسبة للقلم بئا هو اينعم اتضحك عليا فى 3 اقلام مش واحد بس انا عارفة انها بتدخل تحت بند "إتاوة" الناس الجديدة :D

جزاكم الله خيرا على نواياكم واعمالكم ^^

ميرسى بجد يافاتيما على الكلام العسل دا ويارب منتحرمش منك ابداً طووول عمرنا ياأحلى فاتيما ف الحياة كلهااا ..

انا سمعت ان وليد الزهيرى رجله مكسورة ياعينى .. خلينا نسأل عنو ..

الحمد لله إن رينا قدرنا على فعل الخير وربنا يتقبل منا جمبعا يارب

ربنا يقدركم على فعل الخير
وكل سنة و انتم طيبين يا جماعة.. :)
و ربنا يتقبل يا رب..
جزاكم خير أجمعين .. و إنتي كمان يا فاتيما يا حبيبتي :)

فاتميا مبسوطه بجد إني شوفتك و كان نفسي أوييييي أكمل معاكم اليوم بس ال(ظروف) بقى :))

تتعوض بإذن الله
المهم إني إحساس الواحد بعد ما يكون شارك ولو مشاركه بسيطه في عمل جميل زي ده بيعمل راحه و فرحه حقيقيه.

ربنا يقدركم دائماً و تجمعونا في الخير
و خلي عليه الكيك بعد كده على طووووول :)

كان من أجمل الأيام و أروعها و بحبك يا فاتيما بجد حتى لو مش بعرف أعبر أوي في الواقع يعني :)

سلام لكِ و للجميع

كل سنة وانتي طيبة يا فاتيما
وكل الناس الجدعة اللي بقالي زمن كنت ما شفتهاش
ربنا يباركلكم كلكم
ويسعد ايامكم

ربنا يبارك فى كل واحد فكر يساعد فى الييوم ده و بأى شكل.
نسيت البنات الصغيرين اللى شبطوا فيك ;-)

انا مبسوطة اوووى .. يارب دايما نتجمع الخير :)

http://kouskoza7.blogspot.com/2012/08/blog-post_12.html

والله يا فاتيما انا رجلي في الجبس زي ما دعاء مواجهات قالت
وممنوع ادوس على الارض لمدة عشر أيام
وده اللي منعني إني اكون معكم السنة دي :(
حتي كان يوم ابو الريش مصادف حفل توقيع كتابي إنما كل ده اتلغى
الحمدلله على كل حال قدرالله وما شاء فعل

هتقوليلييييييييييي
اعملهم ايه انا
دا انا غلبااااااااان ملييش دعوا بموضوع ال12 قرش دا

قليلي اعمل اييييييييه

16 ألف ده بجد ولا حقيقى ؟! :))
اللهم لك الحمد حتى ترضى

كان نفسى جدا جدا نلحقكم ف المستشفى ونشوف الناس اللى جت ومشيت ع طول
(كيكى ومنونة)
وكنت عايزة اشوف تخيلاتى للظرف هتبقى فى محلها ولا لاء
طلعت انها فاقت تخيلاتى اشاسا الحمد لله وربنا يزيد ويبارك دايما يارب وملحقوقة بقى
ابو الريش هيعيش ؛)

اعتراف رمضانى "1"
هاقولك تانى
رمضان ابتدى عندى امبارح
اصلا كنت مستنية رمضان يجى عشان ابو الريش وعشان اشوفك انتى وداليتى
عارفة كده اما تلاقيكى بتحبى نفسك عشان ناس بتحبيها بتحبك
اهو انا كده بقى
فاهمة حاجة ؟! طبعا لاء ، ولا انا مش مهم :D
المهم انى بادعى ربنا ليل ونهار يديم علينا النعمة دى
وباشكر ابلة رشا وبابوس ايديها شعر وذقن عشان اصلا كانت السبب فى انى اعرفكم اصلا

اعتراف رمضانى "2"
نفسى جدا اكون من قاطنى القاهرة مش حبا ف القاهرة لا سمح الله
بس عشان يبقى عندى فرصة متاحة اكتر انى ابقى معاكم ع طول من غير ضيق ف السفر ولا الوقت ولا الترتيبات الامنية والخطط المسبقة اللى بنعملها انا وابلة رشا عشان اعرف اجاى

وانى ابطل ابقى زى الاتب فى ظهرها كل شوية تستنانى وتتأخر ويفوتها حاجات بسببى وكده

اما المطعم واكله
فحسبى الله ونعم الوكيل فيك يا فخرى
ولا بلاش نحسبن هنحسن الظن ونقول ان نيته كانت خير وتغيير للمكان ورمضان كريم وكده

اما اللى عوضنا عن اكل المطعم
القعدة اللى زى الفل اللى كنا قاعدينها
مبقتش عارفة ازاى عارفين نتكلم ف كل حاجة وندخل من حاجة نخش ف حاجات استمتاع بالحوار وطريقته وهزاره وضحكه ومعلوماته
وكله كوم بقى والحبة الاخرانين دول كوم تانى
كنت حاسة انى فى آلة للزمن ياخواتى
من اول المخلوع وانتو بترجعوا لورا لحد محمد على وما يسبقه كمان
وانا طبعا كل علاقتى بمحمد على صورة على كتاب الدراسات اللى كنت بكرهها بسبب مدرس غتيت بوظ علاقتى بالتاريخ والجعرافيا الى الان
بس صدقا كنت سعيدة بالقعدة جدا
حاجة كده متلاقيهاش عند حد
حــصــرى ؛)

سالى بقى بعد ما سيبناكم وركبنا سوا ف المترو
علمتنى ازاى اعمل فانوس بالورق
وقالتلى انها بتعرف تعمل مركبة
وهتعمل لى واحدة
انا بقولك اهو عشان تبقى على ذلك من الشاهدين :))

مش عارفة ليه التعليق بقى مشروع بوست مش تعليق :D :D

بس انا بحبك
وبادعى ربنا يحبك اووووى :*

وحى الخاطر
---------

انتى فيكى حاجة لله يا ستى
كنتى أول تعليق اهو
والبلوجر جبر بخاطرك فورا
:)


عارفة احساسك وكلامك وصلنى
ومشاعرك كمان عشان دا تقريبا
كان نفس احساسى واغلب احساس كل حد
بيروح لقاء تدوينى لأول مرة
ويشوف الناس اللى ياما كتب لهم
أو قرى اساميهم وكلامهم
واتمنى يشارك معاهم
وربنا كرمه ... وحصل



شكلك اصلا كان حلو جدااااا
وانتى داخلة متحمسة وبتسألى على ناس بعينها زى خيخة
وبتقولى ازاى جيتى
والفرحة كانت باينة ف عينك
و من اول عشر ثوانى عرفت انك
من تلك الشخصيات المرحة الحلوة من جوا
اللى متعرفش تكون غير مصدر بهجة للى حواليها ...

بجد
انا مبسوطة انى شوفتك والله
وربنا يسهل وتقدرى تيجى اسكندرية لو فيه نصيب
ونشوفك تانى وتالت وعلطول
وعقبال كل رمضان
وكل سنة
وانتى تنورينا و تزودينا
وتشاركى معانا من قلب قلبك كدا


كل سنة
وانتى معانا


۩ ... رمضان كريم ... ۩


عاشقة الرومانسية
----------------

وانتى معانا يا دودو
انتى كنتى معانا طول اليوم
و عقبال ما تحضرى وتمضى ف الكشف
:)


كل سنة وانتى طيبة يا قطتى

و


۩ ... رمضان كريم ... ۩

مهندس مصرى
----------


تعيش يا محمد
و بوست داليا كله صح والله
انا حاسة اننا اللى اتعمل لنا الخير
مش احنا اللى روحنا عملنا حاجة ..

بجد ربنا بيجبر بخاطر الواحد
ويحسسه انه لما بينفع غيره
هوه قبله بينتفع معنويا وانسانيا


السنة الجاية تبقى معانا
ان شاء الله


:)


۩ ... رمضان كريم ... ۩

همس الاحباب
---------



وانتا طيب يا خالد
والسنة الجاية الفطار عليك والنبى
عشان الحوسة اللى كنا فيها دى
وكنا عاوزين نحب على ايد المطعم
ونقوله
احنا آسفين يا حاج أبو العز
:)


الأيام دى من غيرك متنفعش
وربنا يخليك لينا


۩ ... رمضان كريم ... ۩

موكا مهمة
---------



ازيييييك يا ايمان
او موكا بقى حلو الأسم دا
وطبعا مهمة ومهمة جداااا

انتى نورتينا
وكترتينا
وحليتى القعدة
وانبسطت بالكلام معاكى جدا
وانبسطت انك انسجمتى
ودمنا مكنش تقيل على قلبك
ونحن نشكر ضياء جميل القلب والعقل
على انه خلانا نشوفك
:)


انتى خلاص بقالك مكان محجوز
وكل لقاء لازم تيجى
وكل سنة وانتى طيبة
وكل سنة وانا أخد أتاوة
:))



۩ ... رمضان كريم ... ۩

دعاء مواجهات
------------

ميرسى على ايه يا دودى
انتوا ما شاء الله
الله اكبر
وربنا يحفظكم م العين
كان شكلكم حلو قوى
ويفتح النفس ع الدنيا


يا عيال انا بفرح لما الاقى اتنين بيحبوا بعض
وربنا بيجمع بينهم
بفرح بفرحتهم
وببتسم لما اشوف اتنين ماشيين ف الشارع
وعيونهم بتلمع بنظرة حب ..
ببتسملهم وبفرحلهم سلف
فما بالك لما يكون حد اعرفه وبحبه
واتمناله الخير عموما
واتمناله فرحة القلب خصوصا

ربنا يا حبيبتى يتمم لكم بألف خير
ويا رب يحرسكم من كل شر وحسد


وكل سنة وانتوا معانا
وتيجوا بعيالكم بقى السنين الجاية
:)



۩ ... رمضان كريم ... ۩

محمد فاروق (قلب مصرى)
--------------------


الحمدلله يا محمد
ربنا رب قلوب
وجبر بخاطرنا


وكل سنة وانتا معانا
ان شاء الله
وسباق ف الخير


۩ ... رمضان كريم ... ۩

شيماء على
---------


كل سنة وانتى بألف خير يا مشمش
وربنا يا حبيبتى يرجعك بألف سلامة
وتيجى معانا الأيام دى
وتكونى جزء منها حضورا
زى منتى جزء منها من ع البعد
وبدعواتك الحلوة



۩ ... رمضان كريم ... ۩

يا مشمش

شيرين سامى
---------

بصى يا شوشو انا حوار الكيك دا
لو كنت اعرفه كنت فيها لأخفيها
بس انا افتكرتله للعيال بس
مكنتش أعرف ان ممكن نسطو عليه احنا كمان
:)

المرة الجاية بقى
وهتكونى معانا بإذن الله
وتقعدى لحد آخر اليوم
والظروف تتحسن وتبقى زى الفل
ولا تعرفى .. !!



انا كمان يا شوشو
بحبك وربنا عارف اللى ف القلوب
وصحيح كتير مبنعرفش نتكلم ونعبر
بس انا كفاية عليا أسلم عليكى
او ابص ف وشك وانتى جاية علينا
او اخدك ف حضنى ف المرواح
عشان اعرف غلاوتى عندك
فمتقلقيش من التعبير والكلام
انا عارفة يا حبيبتى
وربنا يديم المحبة دى
ويكبرها
يا رب
:)


۩ ... رمضان كريم ... ۩

أحمد سلامة
--------

وانتا طيب يا دكتور
والله اول ما لقيتك داخل م الباب
فرحت قووووووى
حسيت كأنى رجعت بالزمن 4 سنين ورا
اول ما دخلت التدوين
انتا من اجمل الناس اللى حضنوا حزنى وقتها وكانوا ولسه ليهم غلاوة ف قلبى


عقبال كل سنة وانتا معانا
يا اجمد فنجان قهوة ع النت

:)


۩ ... رمضان كريم ... ۩

Mahmoud Bahgat
--------------

ههههههه
الا البنات دول ...
يا خرابى
كفاءة من صغرهم والله
اومال لما يكبروا شوية
هيعملوا ف الناس ايه ؟؟

الله يكون ف عون اللى هيتجوزوهم
مش هيخلصوا من الزن دا ابداااا
:)
والله كانوا لطاف
وملحقوش يشتمونا برضو
رمضان كريم
:))


انا زى ما كتبت فوق كدا
مبقتش اتخيل أى لقاء ف الخير
من غير اسماء بعينها يا محمود
وانتا بقيت منهم
وربنا يديم الود
ويجمعنا ع الخير دايما

واعمل حسابك بقى على سفرية اسكندرية
ان شاء الله

و


۩ ... رمضان كريم ... ۩



قوس قزح
-------


يا رب دايما مبسوطة
ومصدرلنا البهجة دى يا داليا
يا وش الخير


روحت وقريت .. وعلقت كمان


كل سنة وانتى طيبة يا حبيبتى

و

۩ ... رمضان كريم ... ۩

بيكى ومعاكى

:-*

عارفة ... مش عارف ليه !!!
-------------------------

ألف مليون سلامة عليك يا وليد


محدش قال قصادى الخبر دا
معلشى
تتعوض ف لقاءات تانية
انتا كنت معانا ومن قبل اليوم
وسيرتك الطيبة دايما ف لساننا وقلبنا


معلش
خلى بالك من نفسك بس
ويا رب تبقى دايما بخير
وكل رمضان وانتا طيب يا غالى

-----------------

http://1.bp.blogspot.com/_bAdhqUFWt64/SwRwCvzoAVI/AAAAAAAAECU/EgUH-QDA47w/s400/roses_pink_vase_couch.jpg

------------------


۩ ... رمضان كريم ... ۩



آه


يا ولييييييييييييد

نسيت اقولك تسلم على مهند
جداااااااااااااااااا

sony2000
--------


متعمليش حاجة يا سنسن
اخواتنا برضك ولازم نستحملهم
معلش

:)))



كل سنة وانتى طيوبة يا حبيبتى
ومعانا دايما



۩ ... رمضان كريم ... ۩

احمد عبدالحميد
------------


آه شفت ازاااااى ؟!!!!



:)


۩ ... رمضان كريم ... ۩

بيطرية ومش بإيدى
----------------


كدا
:)
طيب
انا كمان بقى


اعتراف رمضانى رقم 1

فطار رمضان من غيرك
مينفعشى ...
و انتى م الناس اللى لما ببص ف وشهم
واشوفهم
احس ان ربنا بيحبنى وبيجبر بخاطرى
عشان جم وخلونى أشوفهم
لأنهم بيوحشونى



اعتراف رمضانى رقم 2

فاهمة اللى كتبتيه
عشان الجنة من غير ناس نحبهم
ويبادلونا المحبة ... ما تنداس
ولا يبقالها أى طعم ولا معنى
واحنا الحمدلله
ربنا مجمعنا ع الخير دايما
و دا مخلى الدنيا حلوة وصافية
وخالية م المصلحة واآ شىء يفسد الود



اعتراف رمضانى رقم 3

احنا كلنا بنشكر أبلة رشا
مش انتى بس
بنشكر ربنا عليها
وبنشكرها على انها عرفتنا بيكى
وبتعرف تستخدم نفوذها
وتخليكى تيجى
:)



اعتراف رمضانى رقم 4

القاهرة صحيح مزعجة
بس دا لا يمنع انى افكر جديا
ف اننا نجوزك فيها
عشان تفضلى معانا فيها
وتحضرى كل حاجة جاية
:)


اعتراف رمضانى رقم 5

بحب المثل المصرى الرائع
بتاع ساعة الحظ متتعوضش دا جدا
لأن فعلا الواحد بيدور ع الفرحة
بيلاقيها بالعافية
فأول ما تيجى لازم يكلبش فيها
والايام اللى بنتجمع فيها
بتكون كدا
مليانة خير وضحك وبهجة
حتى اللى غير متوقع فيها زى الاكل
بناخده بتريقة وبيبقى فاكهة الكلام
ومثار سخرية وذكرى سعيدة
:)



اعتراف رمضانى اخير

انا
بحبك
جداااااا

------------------------

http://beautifullyhip.files.wordpress.com/2011/02/i-love-you.png

------------------------

و


۩ ... رمضان كريم ... ۩

السلام عليكم ورحمه الله وبركاته
ام بعد
اعتذر عن عدم حضورى
كان نفسى اجى بس طلعلى مشوار منعنى من الحضور
شكرا على سؤالك
تحياتى



معرفش ليه الرد رسمى كدا
او انك زعلان من حاجة
يا رب تكون بخير


احنا افتقدناك يا عمرو
واعمل حسابك على سفرية اسكندرية
ومعلش
تتعوض السنة الجاية
:)


كل سنة وانتا طيب

۩ ... رمضان كريم ... ۩

رثاء مصر وحماتها...
يا فتاة ضللتى الطريق... الى اين تذهبين؟
يا فتاة خُلِقًت من الامجاد... اي طريق تسلكين؟
يا فتاة احلام الملايين... الي اين تُقَادين؟
وحيدة فى تلك الحياة ...منذ مئات السنين
الآن كما كنتى فى الشدة... لمن غير ربك تلجئين!
لا أذرف الدموع حزنا بل ...خوفا من جوارح قادمين
سالبين منك عرضك...و لسنا إلا مشاهدين
لو كان بيدى سلاح ...لرفعته بوجه كل الخائنين
لو أقدر ان أرفع صوتى... للأمم الصامتين المستسلمين
لأسمعتهم صراخي وصراخ... فتاة تحلم بالمنجدين
بمن يخلصها من العذاب ...ولأمجاد الماضي الحنين
يا فتاة تسير فى الطرقات... تبحث عن مسلمين
لا عن لحية إن تتحدث... تتحدث بألسن شياطين
يا أيتها الفتاة الكاتمة... الدموع والله لتبكين
فلتصرخي فلتبكي ...حماة وطنك المخلصين
لم تطمحين أن يعود... عهد صلاح الدين؟
فلا الزمان الآن كما... كان فى ذاك الحين
ولا الخلق الآن كما كان ...خلق شعب يدعى المصريين.

* http://gameformee-insideamind.blogspot.com/ *


...هنا ترقد أفكار فى عقل عشق النور لكنه لم يحصل عليه فعرضها عله يجد سلماً يخرجه من بئر التفكير العقيم...

شكرا يا فاتيما أنا مقدرش على كل الكلام الحلو دا، وبجد اتبسطت جدا لما شفتكم كلكم ويارب يكون اليوم دا في ميزان حسناتنا جميعا ونفتكره في جنات النعم ان شاء الله على سرر متقابلين
مع حبي داليا العقاد

gameformee
----------


شكرا ع الزيارة
و نورتى

:)



۩ ... رمضان كريم ... ۩

dalia
-----


ميرسى يا داليا
انتى نورتينا
وكنتى أضافة لليوم
نتمنى وجودها علطول
وف كل اللقاءات الجاية ان شاء الله

كل سنة وانتى طيبة


۩ ... رمضان كريم ... ۩

الازهرى
------


لا يا شيخ
متقولشى .. ؟!!!


۩ ... رمضان كريم ... ۩

يا سلام الحمدلله
والله انتي يا فاتيما اللي وشك خير
ودعوتي استجابت وربنا وبلوجر حققولي أمنيتي
ههههه
فاتيما الخير
انا فعلا كنت فرحانه جدا والحمدلله انه بان عليا
انا بجد اتشرفت بيكي
ومش عارفه اقول ايه علي الكلام الجميل اللي انتي قولتيه عليا وعيونك الحلوين يا قلبي
تسلمي يارب وربنا يحفظلك يوسف
ويديم عليكي حب الخير ودائما تاخدينا معاكي
ودي وتقديري ومحبتي واحترامي

فاتيما
والله غصب عني
ومن غير قلق انا كنت عاملة عملية صغنتوتة كدة
بسبب النزيف الانفي المتكرر بسب التهابات وحساسية الجيوب الانفية والدكتور قالي لازم راحة وابعدي عن الحر خااااااااالص
والمشكلة اني حتي بعد ماعملت ده بثلاث ايام رجع النزيف تاني وكان بشع وانا تعبت اكتر بس دلوقت احسن
بس مضطرة اعمل عملية " كي " تانية
وربنا يستر بقي
بس ان شاء الله هحاول بكل طاقة اني اكون معاكم ف اسكندرية
وهتابع ان شاء الله عشان اعرف التفاصيل اول بأول
انا لو كنت اعرف ان دعاء عمرو دعاء ماجهات معاكم كنت كلمتكم
انت وحشاني اووي وعايزة احكي معاكي كتيييييييير
بوسات وحضونات لغاية ما نتقابل

ايه ده !!

أنا اسمي مكتوب ؟

آه شرقت طبعاً بس ما كنت أعرف ليه .. دلوفت عرفت

:-)

الله يبارك فيكم دايماً ويسعدكم زي ما بتسعدوا الناس كده

إرسال تعليق