.

.

الحــاج صـاحــب البيــت  

Posted by: فاتيما in










أزيكم ؟
الدنيا ملخبطة 
وابو قرش جه على أبو قرشين
والشامى بيتلم ع المغربى 
و الحبايب بتغدر ببعض 
و عدو الامس صبح صديق اليوم 
و كله بيلف حوالين نفسه 
و محدش فاهم حاجة ... صح ؟





أيوه صحيح محدش قادر يستوعب
لأن مفيش معلومات اكيدة 
بس كل واحد بيستنتج على قد فهمه
وكل واحد بيختار بناء على ذلك 
ولذا لما سألونى هتنزلى يوم 24 يا بنتى 
قولتلهم لأ طبعا .. وانزل ليه .. و ازاى ؟








يعنى المفروض هذا اليوم لإسقاط حكم الاخوان 
أو ع الأقل الحد من تغولهم ف السلطة 
كما قيل على النت 



طيب حلو جدا 

 

هوه حد يكره يغورهم ف داهية ؟!
أنا اول نفر هييحى المشروع ويؤيده
لأن قيادات الاخوان تحديدا 
وتيار الإسلام السياسى عموما 
عاوزين الحرق و لا يقلوا انتهازية عن غيرهم 
بس الفرق ان انتهازيتهم بأسم الدين 
وقال الله والرسول 
قوم لما تقولى انزلى مشيهم 
طب منا هوافق اكيد و لكنننننن ....





 
المفروض الواحد يتعلم م التاريخ 
ودروس الماضى ولا ايه  .. ؟
يعنى ف 25 يناير 2011
الناس الحلوة نزلت شايلة روحها على كفها 
وحاربت الطغاة لآخر نفس 
و منهم اللى استشهد
واللى انصاب واللى مرجعش بيته 
واللى رجع يكمل ثورته 
واللى تعب و تملكه اليأس بعد مدة
لما لقى العسكر مسكوا البلد 
و الأخوان والسلفيين ركبوا ع الثورة 
و نزلوا يلموا الغنايم و يحطوها ف كرشهم 
 مش دا اللى حصل بالمللى ؟؟









طيب عاوزينا النوبة دى لما ننزل بقى 
نكرر نفس الخطأ و لاّ الوضع هيختلف  .. ؟؟





يعنى انزل يوم 24 اعرض روحى للموت
او الأعتقال او الأصابة .. الخ 
عشان مين المرة دى اللى يمسكها ؟
يعنى مش هسألكم فيه خطة محددة 
واحد اتنين تلاتة و خطوات يعنى 
عشان هنقول ان الثورات الشعبية 
بتبقى غير مرتبة و حسب الواقع ع الأرض 
مااااااااااشى





 
  
يعنى مين اللى بعد ما نغور الأخوان 
هيمسك البلد ؟
النخبة الزبالة دى اللى اجبن من ضلها ؟
ولا العسكر من تانى ؟
ولا شفيق هيرجع بحزبه المنشود 
و لا البرادعى و حزب الدستور 
ولا الباقى م الثوار النضاف
 اللى محدش يعرف عنهم حاجة ...
ولا ثوار الفضائيات و الناشطين المعروفين 
واللى جابونا ورا .. و لا السلفيين 
و لا مين  ...  و لا مين  ...  ؟!!!




السؤال دا مشروع 
و لا مش من حقى أسأله قبل ما انزل 
وغيرى ينزل  .... ؟


 
طب سؤال كمان 
ولإنى من اشد المؤيدين للمقولة دى 
ان ... الإخوان أوسخ م العسكر 
و قاعدين ومش هيمشوا خلاص 
طيب حد يفهمنى
احنا معرفناس نمشى العسكر 
بقالنا سنة و نص ... رغم نزيف الدم 
و غسيلهم الوسخ اللى خلص كل الحبال 
 و هما من هما بجبروتهم و عتادهم
هنمشى الأقوى منهم ازاى ...  ؟؟؟







 دا سؤال برىء والله
و ف محله 
هننزل نعمل نفس الخطوة القديمة 
بالأليات القديمة برضو 
ولا هنغير الأسلوب عشان ننجح المرة دى ؟






حد يفهمنى هنهزمهم ازى 
بعد ما اخترقونا وعرفوا كل نقاط ضعفنا 
وعندهم اللى بيساعدهم بالكتل البشرية 
و التنظيم و العقل و السلاح  والخونة كمان 
ولا شيل طنطاوى وعنان كان عفوى كدهون
و محض مصادفة ....  ؟؟




هنهزم دا كله ازاى 
واحنا ما شاء الله وبأذنك يا رب
لا خطة ولا استعدادت ولا قيادات 
ولا عتاد ولا تنظيم و لا توحد و لا انكار ذات 
ولا فيه حد يلوح ف الافق عليه القيمة 
يقول أى حاجة تنفعنا غير الشتيمة 
والتهزىء والولولة سواء ضد دول ولاّ دول 

 

موضوع بكرى وابو حامد وعكاشة بقى
مجرد جزء ف الموضوع ومش الأساس
عشان الناس اللى بتتكلم ع المبدأ 
لأنى لا أصنف اللى نازلين يوم 34 اغسطس 
ان كلهم فلول و عبيد العسكر 
لأ 
مش حقيقى 
فيهم جزء كاره الثورة 
وجزء مع العسكر 
وجزء كاره الاخوان جدا 
وجزء حابب الثورة و شايف النزول الحل 
.. فيه اكتر من وجه للى نازلين 
بس هرجع واقول اقف ليه وسط ناس 
اغلبهم لا يتفق معايا ف مبادئى 
ايه يجبرنى أنزل أحارب جنبهم ...  ؟




طب مش مشكلة ومعلش 
ما احنا ف وطن واحد 
ولازم نتعلم نتعايش .. حاضر موافقة 
بس وقت المعارك المصيرية اللى زى كدا 
هوه مش المفروض اختار الواقف جنبى 
عشان اللى زى بكرى وابو حامد 
وكل انصار العسكر وقت ما هيخلصوا معركتهم 
واللى هساعدهم عشان ينتصروا فيها 
مش هيرجعوا يدوروا عليا انا 
عشان يدبحونى ويخلصوا منى 
ولا اكون ببالغ وبيتهيألى 
و هما اتغيروا و بقوا كويسين و مع الثورة .. ؟







نفس الكلام دا ينطبق بحذافيره ع الاخوان 
والتيار المتأسلم عموما 
اللى كانوا لما ينزلوا المليونيات معانا 
بعد محايلة البعض منا و التمنع المرىء منهم 
كان بيبقى يوم زفت وقطران على دماغنا
لأنهم بينزلوا لمصلحتهم وغالبااااااا
كان بيتعارض مع اهداف الثورة 
وكانوا مسلمينا تسليم اهالى 
للعسكر .. و بيسيبونا نتقتل ونتسحل
ويتقبض علينا ولا يرف لهم جفن
المهم يوصلوا للكراسى ف البرلمان والرياسة 
فبرضو 
ايه اللى ينزلنى مع دول .. ولا دول ؟؟؟


 


الذى لا دين له غير البراجماتية 
ميخصنيش ولا احب اكون معاه 
ودا اللى خلى مثلا حمدى قنديل
او أى حد زى .. د. علاء الاسوانى
 يسقط من نظرى لما هلل للأخوان 
و غيرهم وغيرهم عشرات نخبة وناس عادية




 الناس اللى فرحانة عموما 
بقرارت مرسى الاخيرة 
مع احترامى الكامل ليهم 
انا مندهشة شوية من رد فعلهم 
وكأن مرسى بقى بطل مغوار و مع الثورة 
وكيف يتأتى ذلك يا جماعة 
واللى عاش العمر مع مصلحة جماعته فقط 
ازاى فجأة يبقى مع مصلحة الشعب والوطن ؟






و قوام نسينا الأستبن جه ازاى 
وبأنهى طريقة 
وهوه وجماعته خذلونا كام مرة 
ودم كام شهيد ف رقابيهم .. ؟!!!







مش لله وللوطن 
وكل الحكاية ان المرة دى 
حرب تكسير العضام بين الإخوان والعسكر 
نتيجتها جت على هوى الشعب 
وتوافقت مع رغباته ف اسقاط العسكر 
واللى مسقطوش بالمناسبة 
ولسه بدرى .. هما دخلوا ورا الستارة بس



قوم يعنى لما مصلحة الجماعة 
تضبط مع مصلحة البلد 
يبقى كدا مرسى جدع .. ؟!!






طب استنوا باقى القرارات 
وشوفوا هيعمل ايه و بيعمل ايه 
هوه و قيادات الاخوان .. وبعدين احكموا 
ولا تأخذكم السكرة ونشوة الخلاص 
من العسكر .. لأن اللى جم برضو 
من نفس العجينة 
واحمد زى الحاج احمد ومفرقتش 






هتقولوا سودتيها لا عاجبك الاخوان 
ولا عاوزانا ننزل نسقطهم 
يعنى خلاص قفلت زى الدومينو 
هقولكم لأ كل ما ف الحكاية
انى مش عاوزانا نكرر الخطأ 
وننزل نتظاهر ونعتصم ونتربس دماغنا 
وناس تموت و ف الآخر نمشى الاخوان 
وننضف الميدان ونروح ونسيبها مقشرة لغيرنا
زى قبل سابق 









الحل ان يكون عندنا بديل 
 موثوق فيه او نتوسم فيه الثقة
يبقى حاضر ف الجد و جاهز يمسك الدفة 
 شخصيا معنديش ثقة ف اى حد
 بما فيهم حمدين صباحى اللى تحمستله
لكن ... والحمدلله لم انتخبه 
ولم ولن انتخب احدا ف ظل النظام الزبالة 
و ... الغلط اللى عايشينه دا 
لأن هنبقى بنغير وشوش وبس 
والسياسات هيا هيا تسكين ومخدر للشعب
والمشاكل هتفضل و هتتراكم 







الحل كالعادة  ...  ف الناس 
الشعب دا هوه اللى هيحركنى من مكانى
ويخلينى انزل معاه اغامر بروحى 
واخاطر و انا مش عارفة حتى 
بعد ساعة هيحصلى ايه 
الناس اللى شوفتها ايام المليونيات
 والمسيرات والوقفات ولسه بشوفهم حواليا 
قرفانين و ساكتين بس هييجى يومهم 
وينفجروا ... 
الشعب دا هوه اللى يستاهل اثق فيه 
وابقى واثقة انه مش هيطمع ف كرسى
وهيبقى عاوز حقه وبس 
العيش و الحرية والعدالة الاجتماعية 
والكرامة الانسانية... و بس 






واللى هيّروح بعدها و انا كمان 
لأنى لا ناشطة و لا ناوية اشتغل ف السياسة 
انا عاوزة اكون مواطنة عادية 
بتعمل حاجة وقت الجد .. 
وتمشى تشوف شغلها وحياتها 






هينزل الناس يوم 24 هنزل معاهم 
مش هينزلوا و هينزل القوى المدنية 
اقعد ف بيتى احسن 
معنديش أى استعداد اركب اتوبيس 
يسوقه بكرى أو غيره من فلول العسكر 
لمجرد انهم هيروحوا ف السكة 
اللى انا عاوزاها 
مضمنش بصراحة ف نص المسافة 
او اخرها هيلبسوا بينا ف انهى حيطة 
وينطوا هما م الشبابيك 
كيف أئتمنهم على حياتى 
و البلد كلها أرخص عندهم من التراب
و الواطى يفضل واطى .. ميعلاش  ؟








فاكرين الراجل بتاع جاءنا البيان التالى 
لما قعد يشتم ف صاحب العمارة 
اللى له قرايب مهمييييين 
وبعد هنيدى ما ظرفّه و اتفق معاه 
راح مسجل تانى و قال 
الحاج صاحب البيت ... فاكرينه ؟
أهو دا بالضبط اللى البعض عاوزينا نعمله
لما نقول مش نازلين 
ننزل مع ناس كانت شمتانة فينا 
و بتتفرج علينا هما والاخوان 
واحنا بنندبح سنة و نص م العسكر 
والمفروض آل دلوقتى آل ننزل معاهم 
ف ميدان واحد  عشان ننصر واحد ع التانى
و نضحك للكاميرات و نقول ..
الحاج صاحب البيت 




ايه يا جماعة .. براحة علينا شوية !!!










كلمة اخيرة واقفة ف زروى 
الناس اللى مش عاجبها ام البلد دى 
وقرفانة من اهلها و بتوصمهم بالغباء
والتخلف والهطل .. الخ الخ 
اللى مش عاجبه اهله و مستعر منهم 
 يفارقهم يا جماعة و يسيبهالنا خربانة 
ويسكن ف بلد تانية 
احنا واخدينها على عيبها و مبسوطين
ومستعدين نتحمل تانى و تالت و عاشر 






و انتوا لو حتى انبيا و ربنا مصطفيكم 
برضو هتنزلوا وسط ناس مش مؤمنة بيكم
وهتحتاجوا وقت وجهد عشان تنشروا الرسالة
 و تعملوا تغيير حقيقى 
مش قادرين تصبروا ... والحمل تقيل 
خلاص .. فككم منا وشوفوا مصلحتكم 
وأرض الله واسعة 
وسيبونا احنا الشغب الغلبان
بقرفه وعبله وتخلفه 
اهلنا و احنا منهم و اولى بيهم 
نصلح من حالنا و حالهم 



 

مفيش تغيير بيحصل بين يوم وليلة 
سنن الله ف خلقه 
والثورات تحدث لكن اثارها بتاخد وقت 
والا نُبيد كل الجيل اللى تلوث
 بفعل مبارك و اللى قبله و اللى قبله 
و نستورد شعب جديد نوفى بكرتوتنه 
ونرمى الموجود كله على آخره ف الزبالة
مثلا  ...  ؟!!!








حاجة كمان 
الاخوة الأفاضل اللى عايشين برا 
و عمالين يشتموا برضو ف الشعب 
و ف اللى مش عاجبهم 
أغلبنا مجرب الغربة و عارف ان المغتربين 
دمهم بيتحرق ع البلد اوجع م اللى جواها 
و محدش يقدر يزايد على حبكم لبلدكم 
اطلاقا  .. لكن الحب اللى بالقسوة دى
يجيب رد فعل كويس  .... ؟؟
يعنى لو عندك طالب بتعلمه 
او ابن بتربيه او صديق و بتساعده 
هل لما كل يوم تشتمه وتوبخه وتهينه 
تتوقع انه هيسمع كلامك و يستجيب 
حتى لو انتا صح و عاوز مصلحته ؟!!!









ومحدش يقولى يا بخت من بكانى 
 كلنا عارفين كويس و مجربين 
محدش بيتعلم بالإهانة و التقريع 
و النتيجة بتكون عكسية 
و بلاش نضحك على بعض





ملحوظة اخرى 
التويتر مليان أمنجية و مخبرين للصبح 
و لجان ف كل الاطراف و الاتجاهات 
و مع ذلك فيه ناس بتتعامل معاهم عادى 
و لا كأن فيه حاجة 
طب انتوا بتدوا للناس دى سعر وقيمة 
لما بتقربوهم منكو و بتخلوا الناس الواثقة فيكو 
يثقوا كمان فيهم 
فياريت كل واحد يخلى باله من نفسه







النخبة بقى اللى عمالة 
تتساقط واحد ورا التانى 
ومش كفاية علينا نكبتنا ف السياسين 
كمان الأدمغة والأفكار .. 
طلعت كبيرة و أصحابها اقزام
انا حزينة لأنى كنت بقرالهم ف يوم واحترمهم 
واتفاجئت ف احلك اللحظات 
انهم مش بالدماغ الرهيبة اللى كنت متخيلاها 
بس عذرهم الوحيد زى ما ابويا قاللى زمان 
انهم ف قلب المشهد 
وقريبين من مصادرهم و غصب عنهم بيتلوثوا 
وبيفقدوا البوصلة بعد فترة
وعشان كدا الكاتب والصحفى أفضله
يبقى علاقته بالمصادر حيادية أو زفت أحسن 





وناس كتير وقعت وتهاوت وكنا بنقدرهم
وبنحبهم .. اقرب مثال حاليا نوراة نجم 
اللى كانت يوم 11 فبراير 2011
نص بنات مصر بلا مبالغة كانوا 
يتمنوا يكونوا هيا 
ودلوقتى ... سبحان الذى يغير ولا يتغير 
 حالها لا يسر عدو و لا حبيب






ونهاية الكلام ...
 الصبر و التأنى والثبات 
قبل ما تنزل ... احسبها
واذا حساباتك مقنعة ليك .. خلاص 
واذا لأ .. اصبر لما تيجى اللحظة المناسبة 
والصحبة كمان المناسبة 
واثبتوا مكانكم ف كل حال نصر الله قريب 



هيا بس بتنضف و على مراحل 
ربنا بيهلك الظالمين بالظالمين 
و بيفرجنا على آياته 
و بيكشفلنا المنافقين و لو بدقون 
ويكشفلنا الإنتهازيين و لو قالوا يا ثورة 
و خايفين على مصر اللى بتضيع 
و شوية شوية هيهتفوا ضد الأخوان 
ويقولوا عاوزين يركبوا على ثورتنا 
زى ما الإخوان دلوقتى بيقولوا ان دى ثورتنا 
و الأتنين بيغنوا علينا 
و المفروض نصدقهم هما الجوز عادى 
و هما بيقولوا بكل براءة ...  
الحاج صاحب البيت 


----------------------------
----------------------------------------
و معلش البوست طويل :)
 -------------------------------------------------

This entry was posted on الثلاثاء, أغسطس 14, 2012 and is filed under . You can leave a response and follow any responses to this entry through the .

11 كــــلام بيطــبطـــب عـــلى قــــلبى و روحــــى

فاتيما
روح القلب الملائكية

الفاتحة لمينا دانيال
وعماد عفت
و زياد بكير
و محمد محسن
و علاء
و غيرهم
اما نحن
فسنجلس نشاهد
و الشعب اللى جابهم
هو اللى هيمشى ابوهم
و كله بالصناديق
انتهى وقت الوقفات
يجب النزول للناس و الجلوس معهم على الارض
نفس الارض اللى جلسنا عليها فى التحرير
و طظ فى النخبة كلهم
كل واحد له مصالح تحركه فيهم


تحياتى

أزيك يا مامت يوسف

عندى كلام كتيير عاوز اكتبه

بس معنديش طاقة اكتب و لا اقول

انا اللي عايز افهمه ليه الفرحة الطاغية في الشارع من قرارات مرسي مع ان معناها
أن قلادة النيل بقت زيها زي غطا الأزوزة و منصب المستشار معناه منصب شرفي
و تخيلي بقى رئيس من غير مستشارين يبقى ديكتاتوري درجة اولى و هيغرق بينا او هيبقى مستشارينه الحقيقيين ورا الستارة و بيحركوه
انا ضد النزول يوم 24 اغسطس و ضد اسقاط مرسي دلوقت باي شكل من الاشكال لازم نحترم شرعية الصندوق حتى لو الانتخابات مش عاجبانا و بعدين ده لسه حتى معداش المية يوم اللي طلبهم لما يعدوا بقى نفتح الدفاتر و نتحاسب و نشوف مين اشترى ربع اسطنبولي و مدفعش تمنه و نلم بقى الحساب المكتوب في النوتة
الفصيل اللي هينزل دلوقت هيحرق نفسه و هيفقد اي امل في اي شعبية بعدين علشان اللي هينزل دلوقت محترمش رأي الشعب او مش الشعب محترمش الانتخابات اللي شارك فيها بتاع 50% من الاصوات صحيح مرسي مجبش غير 5.7 مليون صوت بس , لكن الانتخابات دايما كده
على فكرة احنا لينا تار عند مرسي علشان اللي قتل عماد عفت و مينا دانيال هو كرمه واداله قلادة النيل و خلا شركاته وزراء و ماسكين هيئة التصنيع و قناة السويس
دم الشيخ عماد عفت و مينا دانيال في رقبة مرسي لكن برضه الحل مش بمظاهرة 24 /8 لازم ياخد فرصته

بجد مش عارفة اقولك إيه !!

i can't agree more !

روعة :)

مختلف معاكي بشكل كبير و شايف إن مرسي له حسناته و له سيئاته و لسه بدري نحكم عليه
اللي حينزل يوم 24 مع الفلول يبقى حأشك في مستوى ذكاؤه علطول
اللي عايز يلجم الإخوان يشتغل من دلوقت علشان انتخابات مجلس الشعب الجاية و يراقب عملية وضع الدستور و الإستفتاء عليه و يوعي الناس و يركز مع إنتخابات المحليات القريبة

انهاء حكم العسكر خطوة عملاقة و لازم نراقب الرئيس بعينين صقر علشان ما يتحولش حكم العسكر لمجرد حكم الإخوان

لغاية دلوقت أنا متفق مع علاء الأسواني في موقفه من مرسي
نقول للمحسن أحسنت و للمسيئ أسأت و مرسي مش كبير على النقد بس ما ينفعش نسقط رئيس منتخب في انتخابات نزيهة غير بإنتخابات الرئاسة القادمة لكن من حق أي حد يعارضه و يتظاهر ضده سلمياً بدون تخريب و حرق مقرات و غيره من سيناريوهات أبو حامد و بكري و عكاشة

صباح الورد والجوري فاتيما

انا كنت عايزه أقولك أني بجد
بجد
بجد

خايفه اوووي علي مصر

وربي يسلم

ودي
وتقديري
واحترامي

كل سنة وحضرتك طيبة ... عيد سعيد عليكي وعلي الاسرة الكريمة .

انا سخصيااااااااااا
مش نازله تاني بتاااااااااتااااا
البته

كل سنة وانتي طيبة :)

كل سنة و انت طيبة يا فاتيما

يا مامت يوسف الغالية

و عيد فطر سعيد عليكى و على كل اللى بتحبيهم

(:

معلش :-(

الموضوع مش سهل وخياخد سنين لحد ما يوضح ويتعدل الحال، اذا اتعدل يعني

أصل الحكاية ماشية في سكة خطة عالمية أكبر بكتير من المشهد اللي احنا شتيفينه جوه ده، ربنا يسترها

إرسال تعليق