.

.

عـــاوزة أبقــى مــامـــا + ♫ ♥ تحديث ف آخر التدوينة ♥ ♪ +تحديث كماااااان  

Posted by: فاتيما in









عاوزة اقول كل سنة وانتا طيب
مرتين 
مرة عشان العيد 
ومرة كمان عشان النهاردة عيد ميلادك
تخيل .. ؟!!



13 سنة عدت يا حبيب ماما
على وجودك ف الدنيا 
و 13 سنة عدت على اسعد يوم ف عمرى
اتمنيته واستنيته من وانا عيلة بفيونكات
وبشيل العروسة و يسألونى عايزة لما تكبرى
تبقى أيه .. فأرد واقول بكل بساطة  
عاوزة أبقى ماما  .. !!!



13 سنة عدت على احتفاظى
بلقب أم اللى ربنا كرمنى بيه
لما نورت انتا حياتى 
وحققتلى امنيتى وحلمى و سعادتى
و وسط كل الفشل اللى شوفته ف حياتى
انتا كنت الحاجة الوحيدة اللى عرفت 
انجح فيها و احس انى فرقت ف حياة حد




13 سنة عدت بحلوها ومرها 
 صحيح ... بس لما بفتكر 
بلاقينى شايفة الحلو أكتر كتير و فايض
ومغطى تقريبا على كل المر اللى شوفناه
انا وانتا سنين طوال 



13 سنة كنت ابنى والراجل بتاعى 
وكنت كمان ملاكى الحارس 
اللى ربنا يمكن نجانى بسببه
من مصايب كتير قوى
و لولاه كنت غلطت غلطات كتير
واستهترت بحاجات كتير 
ومكنتش عملت حساب لأى شىء
لولا بفتكرك و اقول لروحى ... لأ و بلاش 
عشان يوسف لازم ابقى كويسة
و عشان مفقدش احترامه ف يوم 




13 سنة عدت 
وانتا نور عينى اللى بشوف بيها
مهما السما غيمت
و ازقنى زق لما أتعب
عشان أحب الأيام والناس وأتحمل الصعب
وأتفائل ببكرة عشان ممكن جدا تبقى فيه  




13 سنة عدت 
و بوجودك مرحوش ع الفاضى 
   مضعوش منى ابدا و بيتحسبوا بيك 
و بيبقالهم قيمة و معنى و تمن 
يستاهل كل اللى اندفع فيهم 



13 سنة .. بس الا تلات تيام 
هما عمر الصورة دى 
لما رجعت شايلاك م المستشفى 
ودخلت بيك البيت لأول مرة 
كان احساس عجيب ومرعب 
 بس كمان ... كان ممتع و مبهج 



انا لسه فاكرة لحد دلوقتى 
نظرة الممرضات ليا ف دهشة 
وانا شايلاك و محنية من الولادة القيصرية
ومش قادرة حتى انى افرد ضهرى
و بسألهم بمنتهى البراءة والجدية
هوه المفروض استنى قد ايه 
قبل ما اجيب البيبى التانى ؟
ساعتها بصوا لبعض بذهول و بعدين بصولى
و واحدة فيهم سألتنى 
انتى بتتكلمى جد ... ؟
دنتى من يومين كان عندك حمى 
وكنتى هتروحى مننا يا مدام 
و لسه واخدة علقة معتبرة 
وبتفكرى ف الولادة الجاية ... ؟!!!



أيوه كنت بفكر و مستعدة
لما اول مرة حطوك ف حضنى
و انا بين الفوقان والنوم والبنج متوهنى
بس شوفت ملاك صغير 
ومكنتش مصدقة نفسى انك كويس
و سليم وبخير وانك اخيرا وصلت الدنيا
كنت عاوزة اجيبلك أخ او اخت 
كنت بفكر ف نعمة ربنا عليا 
وانا ببص ف وشك 
ومش مصدقة انى بقيت ام 
وانى اخيرا بقى ليا ابن  
و هيندهنى لوحدى من دون كل الناس
 ويقولى ... يا ماما 



ولسه فاكرة لما دخلت بيك بيتنا 
و جدك كان عيان  
بس قالى هاتيه على حجرى
و قعد يتأملك قوى ... و بعدين راح معيط 
انتا كنت اول احفاده 
و اللحظة دى بتلح عليا كتير
لأنها كانت نادرة و مبتتكررش 




وتعرف كمان انى لسه لحد دلوقتى
بطلع الشريطة 
اللى كانوا لفينها حوالين كفك النونو
و اللى كانوا كاتبين عليها اسمى
واتأملها بزهو و فخر
واستغرب على حكمة ربنا 
لإنك اتاخدت منى بإسم باباك
بس الحقيقة ان انتا من  اول ما اتولدت 
و انتا ... مكتوب بإسمى انا  
و كل ما حد يدعيلك .. بيدعيلك بإسمى
ويوم القيامة .. برضو هتتنادى بإسمى 
تصور .. !
  


13 سنة عدت يا حبيبى 
و زمانك بقيت راجل
معرفش شكلك بقى ازاى 
و يمكن صوتك دلوقتى أخشن 
و اكيد طباعك ومزاجك وهواياتك 
اختلفت عن اللى كنت اعرفه
ساعات بترعب انى لو شفتك صدفة
مش هتعرفنى و اعرفك 
وساعات كتير كمان لما حد بيسألنى 
عن مدرستك وانتا ف سنة كام
وأزيك وايه اخبارك
اسكت فجأة .... وأتنّح و معرفش أرد 
واخد وقت وجهد كتير 
على ما اقدر افتكر الإجابة 
مع انى فاكرة و عمرى ما بنساك 
ولا بنسى أى حاجة تخصك 
بس معرفش ليه بيحصلى كدا ؟!!



يمكن عشان وحشتنى قوى 
فوق ما تتصور 
بس عارفة و متعشمة ف ربنا 
ان بعادنا دا فيه الخير 
و انك عندك أحسن 
و بتمنى ربنا يحفظك من كل شر 



و تعرف انى مبقتش احب 
أشوف ولا أتكلم مع أى حد كان يعرفك
ولا بقيت اتحمل أى مطرح 
او شىء يفكرنى بيك مع انى فكراك 
والله فكراك طول الوقت 
بس بقيت ابعد واهرب .. معرفش ليه 
يمكن عشان وحشتنى ..
وحاسة ان الوقت طال قزى قوى 
 ... يمكن ؟



جدتك لما بتلاقينى كدا 
بتقعد تدعى ع اللى ظلمنا 
و انا اقولها بلاش 
يمكن اللى بتدعى عليهم دول 
لو جرالهم حاجة .. يوسف يتأذى 
خليهم كويسين عشان الولد ميتبهدلش
وادعيلهم بس ان ربنا يهديهم 
عشان انتا تبقى معاهم بخير



انا مبقتش زعلانة من حد يا يوسف
مش زعلانة من باباك و لا عمامك 
و لا جدتك و لا من أى حد أذانى 
مبقاش يهمنى غير انك تكون بخير
ويمكن لو كنت معايا دلوقتى 
مكنتش هعرف احميك واصونك
واخليك تتربى صح 
و دايما افتكر سيدنا يوسف 
واقول انى اخترتلك الأسم اللى يليقلك
ومكنش ينفع تكون غيره 
واتمنى من ربنا تكون فاكر حكايته
وفاكر انك هتبقى زيه ان شاء الله
حاجة كبيرة قوى 
وربنا هيكافئك على كل وجع شفته
عشان ربنا مبيظلمش حد 



وبدعى ربنا كل ليلة
قبل النوم انك تفتكرنى
وتفتكر وانتا معايا ازاى و كنت بحبك أد ايه 




13 سنة عدت من عمرى و عمرك سوا
ومعرفش الجاى ايه ؟
يمكن يعدى 13 سنة تانيين قبل ما اشوفك 
و يمكن ربنا يفتكرنى قبلهم 
ويمكن انتا تروح لأبعد من مكانك 
ويمكن بعد ساعة الاقيك بتخبط عليا 
وافتحلك بابى وحضنى ومتبعدش تانى ابدا 



كل شىء جايز 


انا نفسى ترجع 
بس مش عايزاك ترجع زعلان 
وكارهنى او متضايق منى او مضطر 
نفسى ربنا يستجيب لدعايا
و دعا كل الناس الطيبين اللى بيحبوك
من غير ما يشوفوك 
وربنا يردك ليا ... الرد الجميل 
اللى يخلينى احس ان اللى فات 
كله كان ولا حاجة .. قصاد فرحتك وراحتك 



13 سنة عدوا يا حبيبى 
وانا امك اللى بتحبك  
و بتحمد ربنا على وجودك 
و بتشكره لما بتفتكر كل مرة 
انتا بوستها و استخبيت ف حضنها
و كل مرة مسكت ايدها ف شارع 
و كل مرة طبطبت عليها وهيا بتعيط 
و كل مرة ندهتها و قولت
يا مــامـــا



ماما ... أجمل كلمة
سمعتها طول ال13 سنة 
و بتمنى أرجع أسمعها تانى 
العمر اللى جاى واللى فاضل فيه قليل 




عيد ميلاد سعيد يا حبيبى 
وكل سنة
وانتا طيب يا روح قلب ماما 


-----------------------------

--------------------------------------



مكنتش فى وقت انبساطك .. بساطك
مكنتش ف وقت اندفاعك .. دفاعك
و لما عرفت السهاد والسهر
و أول ليلة تناجى القمر
و غامت عليك السما والليالى
سامحنى يا غالى
مكنتش معاك 
فى أول بحبك .. مكنتش معاك 
و أول واحشنى .. مكنتش معاك 
فاتتنى الحاجات المهمة ف حياتك 
ولما دموعك بتحكى اللى فاتك 
بحس انى عاجز أفسر بكاك 
يمكن لأنى .. مكنتش معاك 
هشام الجخ

 ----------------------------------------------




عشان 
تشوفوا بس
آخرة دعواتكم الحلوة 

 

بيان هاااااام




بس الاول 
احكى الحدوتة من اولها 
آل أنا آل من ييجى 4 سنين 
دخلت عالم التدوين 
واتعرفت على ناس حلوة كتير قوى 




كان منهم جوز العصافير
اللى اسمهم 





  
والأتنين كانوا وما زالوا للأبد يا رب
قصة حب رهيبة 
وكله يمسك الخشب يا عيال 
خلتنى أحس ان الدنيا بخير ولسه فيها حب
وممكن يكبر ويكبر لحد ما يبقى 
شجرة ورد و فل و ياسمين و ريحان
وكل ازهار و عطور الدنيا 






وليد وهبة لما عرفتهم كان لسه 
سى عمر بيكا صغنونة خالص
و فاكرة لحد دلوقتى اول مرة قابلت هبة 
وكانت شايلة عمر ف عربيته 
وخدته و حطتيه على حجرى 
و قولت يا عالم بكرة ايه ...  ؟




وتمر الايام 
و وليد وهبة يقربوا منى اكتر
و يكونوا اخواتى و حتة من عيلتى 
و أحرضهم يجيبوا اخ لعمر و يا ريت أخت 
ويقولوا حاضر ... ويطنشوا 





ويعدى الوقت و انا مبزهقشى 
وهما يقولوا حاضر .. ولا يزهقوشى 
وأخيراااااا يتم المراد من رب العباد 
وهبة تفاجئنى و انا ماشية ف مسيرة 
يوم 25 يناير اللى فات 
واحنا ماشيين عند الجامعة كدا 
و الهتاف شغال و بيلعلع ضد العسكر  
و تبعتلى رسالة و تبلغنى ... انها حامل :)




 
و افرح واهلل انا زى العيال 
و أقولهم  ... هتيجى بنت 
انا بحب البنات و مليش دعوة اتصرفوا 
يقولولى حاضر ربنا يسهل 
وننقى ف أسامى و نعمل استطلاع 
ونختار خديجة و أدلعها ديجا 
من قبل ما تيجى وكدهون 
  


وبعدين وليد يبقاله رأى آخر 
وحيث انه المسئول عن نوع المولود 
ومسئول مسئولية كاملة عموما 
عن الحكاية دى من اولها لآخرها 
و يروح عامل فينا حركة مش اللى هيا 
والبيبى ف السونار ميطلعشى بنت 
و يطلع ولد .. 
و يطلع ان مفيش أى ديجا ف أى حاجة 
ف الموضوع خااااالص !!!







نزعل يعنى .. ؟!!
لأ منزعلشى البتة 
ونقوله يا مراحب و اهلا وسهلا 
ويشرف الدنيا و على قلبنا زى العسل 
وهبة الغلباااانة 
وآمرها لله هتقعد مع تلات رجالة 
ف بيت واحد يجننوها و خلاص
و ان الله مع الصابرين 
:)





هذا 
وبعد كل الرغى اللى فات 
نفيدكم علما بإن وليد 
بعتلى رسالة و قال ... 

يا ناس يا عسل سى "على" وصل 

هذا و قد تفضل جلالته
وأعلن عن وصوله ف 21 اغسطس
و وليديقولى خدى بالك م التاريخ كويس
بيفكرك بإيه .. ؟!!
:)))



 
بيفكرنى باغلى الناس يا وليد 
وبيفكرنى كمان ان كل سنة 
ومن هنا و رايح 
هنحتفل بعيد ميلاد الولدين سوا 
بإذن الله
يوسف و على 
الأسدين اللذين كادا 
يبقوا عذرائيين وملحقوشى 
:)



 
ألف مبروك يا أبا عمر 
و  أبا على 
ويتربوا ف عزك و ف حنية امهم 
هبة ...  أرق مخلوقات الله
ربنا يخليكم لبعض ويخليكم للعيال 
ويخلى عمر و على وتشيلوا عيالهم 





وعقبالكوا يا كل واحد بيقرا كلامى 
وعقبال أحبابكم 
لما يرزقهم ربنا بالذرية الصالحة






و ربنا كرمنى بدعواتكم 
ف عيد ميلاد يوسف حبيبى
و خلانى بقيت عمتو و خالتو كمان 
ربنا يخليكم ليا 





واللى عاوز يبارك لأم 
و أبو عمر وعلى 




و يقول اللى ف نفسه بقى 




و ألف 
مليوووووون 
مبرووووووووووووووووك 



 
و أنزل يا بنى بغنوة 
يا على يا على يا عترة يا فُللى 
و عقبال عندكم جميعا   
 و ...  عاوزة اقول انى بحبكم جدا
 و نظام هانى شاكر و كدهون
  :)

--------------------------------------
---------------------------------------------

وانا عاجزة عن الرد على تعليقاتكم .. بجد 

---------------------------------





يا جماااااااااااعة 

أختكم دودو عاشقة الرومانسية 
بتستطلع الأراء عن اللقاء السكندرى
والمعاد المناسب ايه جمعة ولاّ سبت 
يا ريت 
تروحوا تفصلوا ما بين الإختيارات
ويبقى موشكرينلكم جدا 
دوس هنا 

---------------------------------------
---------------------------------------------

This entry was posted on الأربعاء, أغسطس 22, 2012 and is filed under . You can leave a response and follow any responses to this entry through the .

30 كــــلام بيطــبطـــب عـــلى قــــلبى و روحــــى

كل سنة و يوسف ربنا معه

بخير و سعيد و ناجح

كل سنة و انت مامت يوسف

اللى بعزها و و اختنا اللى لما اكون عاوز انكد على حد انكد عاليها (: باخبارى

كل سنة و انت مامت يوسف

اللى يوسف لما يكبر هيفتخر ان ربنا اخترها تكون أمه

كل سنة و انت مامت يوسف

اللى يوسف هيعرف أنك حبتيه اكتر من روحك

كل سنة و انت مامت يوسف

اللى يوسف ربنا حاطط جواه حُبه ليكى منغير ما يحس

كل سنة و انت مامت يوسف

اللى ربنا هيحفظك و يكرمك و يحقق أمنيتك و امنيتنا

و يرده ليكى رد جميل (:

روحى كدة و انت مامت يوسف دايماً ((:





كل سنة وانتي طيبة ... وربنا يحميه يارب من كل سوء .. ويخليكوا لبعض ... ويجمع شملكم علي خير وسعادة ... بإذن الله .

هيرجع كل ماتجيبى سيرته بقولك هيرجع
لانى عندى يقين فى ربنا انه هيراضيكى
ربك قال عن نفسه
وما انا بظلام للعبيد
وانا بصدق ربى قووى
كل سنه ويوسفك طيب وبخير ويكون اجدع راجل فى الدنيا
سلام ياواجعه قلبى :)

كل سنة وانتي ويوسف طيبين وبألف خير وصحة وسعادة إن شاء الله :)
ربنا يفرحك بيه يا فاتيما ويجعله من الذرية الصالحة ويردهولك بألف سلامة وفي أحسن حال إن شاء الله آمين

كل سنة وأنت طيب يا جو وعقبال ميت سنة يا جميل :)

فاتيما روح قلب الملائكة ..
تعجز كلماتي عن التعبير عما في نفسي .
لكنني بكل الصدق والقوة أتمنى أن يصلح الحال ويجمع الله بينك وبين يوسف بخير وفي أقرب وقت ..
وكل عام وأنت بألف خير .. ويوسف بألف خير ..
أسعدكما الله فب الدنيا والآخرة ..
مع التحية الطيبة

فاتيما
روح القلب الملائكية


الدنيا من غير الربيع ميتة
ورقة شجر ضعفانة ومفتتة
لا يا جدع غلطان تأمل و شوف
زهر الشتا طالع فى عز الشتا
عجبى ؟؟؟

فى بوستات الواحد ممكن يعلق عليها
و فى بوستات مش محتاجة تعليق
البوست ده يا فاتيما بدون تعليق
مع ان اللى جوه الواحد كتير
ياااااااااااااااااااااااااارب
يهدى بالك و يريح سرك و يجمعك على كل اللى بتحبيهم
سلام يا ام جو

أنت أم رائعة بمعنى الكلمة :)

ربنا يردهولك رداً جميلاً :)

هيجي

لانك ممته
وربنا هيرجعهولك
هيجي

قلبي حاسس بدا
هيجي

الصمت هو الفعل الوحيد المتاح فى معبد الأمومة المهوب ...

كل سنة وأنتى طيبة وهو طيب :)

ربنا يكرمك و يكرمه
و كل سنة و انتوا الإتنين طيبين
و ربنا يجمعكم على خير يارب

حبيبتي فاتيما..
أنا بقرا كل بوست انتي بتكتبيه..بس بوستات يوسف هي الوحيدة اللي مش بقدر معلقش عليها.لأني ببقى حاسة اني نفسي أصرخ و أعيط و أخدك في حضني و لو كتمت كل ده حنفجر! يمكن لأني حاسة بيكي قوي قوي لأني في يوم عدى أو لسة جاي ممكن أبقى في مكانك مع ثقتي التامة اني مستحيل أملأ مكانك دة و لا أقدر أكون زيك في صبرك و قوتك و حسن ظنك بالله..يمكن كمان لأنها أول بوستات عرفتني بيكي و دخلتك حياتي و صدقيني غيرتي فيها كتييييير قوي حتى لو من بعيد..انتي الوحيدة اللي كلامك كان بيطبطب على روحي أحسن 100 مرة من 100 حضن و 100 كلمة مواساة! الحمد لله الذي لا يحمد على مكروه سواه..دعوتي ليكي دايما اللي مبتنقطعش"اللهم رضًي فاطمة و ارضها كما رضت بقضائك..اللهم رد اليها يوسف كما رددت يوسف لأبيه يعقوب رداً جميلاً..اللهم اجعله لها محباً و عليها مقبلاً مطيعاً غير عاصياً..باراً لا عاقاً و لا خاطئاً" كل سنة و يوسف بألف خير راجل بيكبر كل يوم..و ياخدك هو في حضنه قريب قوي و يعوضك كل اللي فات..يااا رب.

حبيبتي
كل سنة وانتي ويوسف بخير

وهاااااااااانت

كل كام يوم ويوسف يبقا رااااجل قد الدنيا
ويبقا من حقه يجيلك وهتعيشي معاه ومع ذريته اجمل الايام
الدنيا علمتني ان الجاي اجمل
هتعيشي معاه اجمل ايامه
وتنقي معاه عروسته وتربي اولاده
وتخططي معاه المستقبل
وتاخدي جائزة ربنا علي صبرك
وربنا هيرده لحضنك راااااجل قد الدنيا
وتربي اولاده وتعيشي معاهم اجمل ايام

عقبال 100 سنة تكونوا فيها مع بعض و فرحانين ببعض
ربنا يجمعكم سوا عن قريب على خير

كل سنة وإنتى أختى الغالية

كل سنة وإنتى أحلى أم

كل سنة وهى عيد علينا كلنا

كل سنة وهى فرحة تغمرنا

كل سنة وهى أمان لنا

كل سنة ومصر أمنا تضمنا


بكرة جاى
وبإذن الله أحلى

http://pictures.msharkat.com/u/image-42323.jpg

دى ليوسف وبطلى تطمعى فيها زى عادتك

وبإذن الله ييجى يوم وتوصليها له

السلام عليكم
عارفة يا ام يوسف
ساعات كتير قوى بنعجز اننا نلاقى كلام نعبر بيه عن اللى جوانا
انا مش لاقى كلام اعلق بيه
سامحينى دموعى غلبتنى
كل عام انتم بخير
كل عام يوسف بخير
ابقوا دوما بخير

تعرفي يا فاتيما
السعادة بنشوفها في حاجات كتير
كل واحد فينا بيشوف السعادة بشكل مختلف
انا شايفة وحاسة ومتأكدة انك هتشوفي السعادة وهتفرحي اووي
قريب او بعيد
مش مهم
المهم انك تحسي الاحساس ده
مش مهم امتي ولا فين
المهم مع مين
في حاجات كتير مكنتش اعرفها وعرفتها م البوست ده
كدة في كلام كتير مش هقدر اقوله
بس تعرفي انا عايزة اقولك حاجة واحدة بس .....اني من يوم ما عرفتك كنت ومازلت بدعي لك دعاء معين عمري ما اخلفته ابدا ولأول مرة هقول لشخص انا بدعي له بإيه
تعرفي دايما بدعي لك بإية ....؟
" يارب يرجع يوسف لحضنك تاني
ويفرج همك وكربك ....اللهم آمين "
بوسات وحضونات ليكي وليوسف
ووردات بنفسجات واحلي تورته وشموع ليوسف الغلي ولمامة يوسف الغالية علينا كلنا
دي شموع عيد ميلاد يوسف
http://www.google.com.eg/imgres?hl=ar&biw=1024&bih=590&tbm=isch&tbnid=Vp3pDdnAYAAHUM:&imgrefurl=http://forum.hwaml.com/t126626.html&docid=IuJuugRO1MGd1M&imgurl=http://forum.hwaml.com/imgcache2/hwaml.com_1338375987_226.gif&w=300&h=299&ei=XfIzUPLmDIbLtAafg4Ag&zoom=1&iact=hc&vpx=561&vpy=211&dur=2723&hovh=224&hovw=225&tx=95&ty=142&sig=106075521913136178181&page=1&tbnh=105&tbnw=113&start=0&ndsp=19&ved=1t:429,r:7,s:0,i:116
ودي انت ويوسف
http://www.google.com.eg/imgres?hl=ar&biw=1024&bih=590&tbm=isch&tbnid=IV0mYRKSwzbXmM:&imgrefurl=http://forums.mrkzy.com/t47638.html&docid=SFsvvwkG3K2zTM&imgurl=http://forum.z88z.com/pic/z88z_pic_1313440781_630.jpg&w=573&h=300&ei=XfIzUPLmDIbLtAafg4Ag&zoom=1&iact=hc&vpx=4&vpy=82&dur=500&hovh=162&hovw=310&tx=81&ty=100&sig=106075521913136178181&page=1&tbnh=80&tbnw=153&start=0&ndsp=19&ved=1t:429,r:5,s:0,i:109
حاسة انها صعبة بس معرفش لية حسيتها انتي ويوسف

ها أعلق علشان يوسف
لأني واثقة انه قريب جدا بعون ربنا المعبود ها يقرأ تعليقي
كل سنة وانت طيب يا يوسف
انا اعرف مامتك يا يوسف
من حقك تفخر يا يوسف
احسن ام واجمل ست ومؤكد دلوقت وانت بتقرأ اكتشفت بنفسك الست الذكية الصافية اللي خلفتك
قلت لها انا فخور بيكي يا ماما ولا لسه؟
لو مقلتش قول لها حالا
دي تستحق ان تفخر بها جدا

وافكر فيكي يا فاتيما وعيوني تدمع
واقول لو اقدر اجيبه لها
يعني يارب خلقت ناس مفتريين في الشر كتير وانا بتمنى اكون مفترية في دي بس
يارب وفقني للإفترا ده بس ومش ها اطلب بعده افترا تاني
ثم ان ده مش شر
وانا مليش دعوة بكل الهري اللي فاتيما بتكتبه واحسن ليه يكون هناك والكلام ده
فترد علي نفسي بنت اللزينة
(قال لو أن لي بكم قوة أو آوي إلى ركن شديد)
اللهم انت المأوى وأنت ركننا الشديد
يارب مش ها ادعي إلكتروني
انت عارف وعالم وهي دعوة بظهر الغيب
يارب اجابة عاجلة تسعد بها فؤادنا وتثبت بها يقيننا وتفرح قلوبنا
وصلى اللهم على محمد وعلى آله وصحبه وسلم

يارب يوسف

كل سنة وانت ويوسف طيبين و بخير يارب
ربنا يجمعك بيه على خير و يريح بالك يارب
ان شاء الله هيرجعلك و هيبقى ف حضنك و هيحمد ربنا على انك امه اللي قلبها ابيض و بتخاف عليه اكتر من نفسها
ربنا كريم و عالم بالحال و مش بيكتب غير كل الخير
تحياتي لقلبك الابيض :)

فاتيما
إنتِ بجد إستحملتِ كل ده؟
:(
أنا مش عارفه أبطل عياط
تعرفي أنا ماكنتش فاهمه أوي
عارفه بس إن يوسف مش عايش معاكِ حالياً
بس فكراكِ بتشوفيه كل فتره
ده حقك و أقل من حقك بكتير
مش عارفه أقولك إيه
ملعون أبو الظروف اللي تمنع أم عن إبنها
أنا حاسه في المسائل دي ممكن أتحول لغول
بس عارفه برضو إن اللي إيده في الميه مش زي اللي إيده في النار
أنا كمان مش بنسى يوم ولادة إبني بالذات و لسه محتفظه بالسوار البلاستيك اللي عليه إسمي و على مقاس إيده..و بفتكر نفسي أول مره أشوفه و إزاي الكون كله وقف اللحظه دي..
و برغم إني كتير بحس إنه إيدي اللي بتوجعني..بس كمان بحس إنه ضهري اللي بيقومني لما بقرب أقع..

بكره أوي الظلم و الظلمه و سيبي مامتك تدعي عليهم عشان اللي يعمل كده مفيهوش خير و لو ربنا هداه يبقى ساعتها تبطل دعى..

المهم كل سنة و هو بألف خير و ربنا يردهولك و يفرح قلبك بيه عن قريب

مش ضروري تنشري التعليق أنا موودي سيئ و مبعلقش عند حد بس كان لازم أقولك كل سنة و هو في قلبك..
و السنة الجاية معاكِ بإذن الله

كل سنة و يوسف طيب يا ام يوسف
مش هاقولك غير كلمتين و مش هطول
افتحي مصحفك على سورة القصص و اقري الآيات دي كويس
(وَأَوْحَيْنَا إِلَى أُمِّ مُوسَى أَنْ أَرْضِعِيهِ فَإِذَا خِفْتِ عَلَيْهِ فَأَلْقِيهِ فِي الْيَمِّ وَلا تَخَافِي وَلا تَحْزَنِي إِنَّا رَادُّوهُ إِلَيْكِ وَجَاعِلُوهُ مِنَ الْمُرْسَلِينَ
فَالْتَقَطَهُ آلُ فِرْعَوْنَ لِيَكُونَ لَهُمْ عَدُوًّا وَحَزَنًا إِنَّ فِرْعَوْنَ وَهَامَانَ وَجُنُودَهُمَا كَانُوا خَاطِئِينَ
وَقَالَتِ امْرَأَتُ فِرْعَوْنَ قُرَّتُ عَيْنٍ لِّي وَلَكَ لا تَقْتُلُوهُ عَسَى أَن يَنفَعَنَا أَوْ نَتَّخِذَهُ وَلَدًا وَهُمْ لا يَشْعُرُونَ
وَأَصْبَحَ فُؤَادُ أُمِّ مُوسَى فَارِغًا إِن كَادَتْ لَتُبْدِي بِهِ لَوْلا أَن رَّبَطْنَا عَلَى قَلْبِهَا لِتَكُونَ مِنَ الْمُؤْمِنِينَ
وَقَالَتْ لِأُخْتِهِ قُصِّيهِ فَبَصُرَتْ بِهِ عَن جُنُبٍ وَهُمْ لا يَشْعُرُونَ
وَحَرَّمْنَا عَلَيْهِ الْمَرَاضِعَ مِن قَبْلُ فَقَالَتْ هَلْ أَدُلُّكُمْ عَلَى أَهْلِ بَيْتٍ يَكْفُلُونَهُ لَكُمْ وَهُمْ لَهُ نَاصِحُونَ
فَرَدَدْنَاهُ إِلَى أُمِّهِ كَيْ تَقَرَّ عَيْنُهَا وَلا تَحْزَنَ وَلِتَعْلَمَ أَنَّ وَعْدَ اللَّهِ حَقٌّ وَلَكِنَّ أَكْثَرَهُمْ لا يَعْلَمُونَ )
شوفي ربنا و عظمته أوحى للأم ترمي رضيعها في اليم و قالها متخافيش و شوفي قلب الأم اللي اصبح فارغا يعني فارغ عن كل شيء سوى موسى و قلقها عليه مش شايفة غيره و ان كانت لتبدي به , يعني لدرجة انها كانت هتقول اللي عملته لولا أن ربطنا على قلبها فكانت النتيجة ان ربنا رده إلى أمه كي تقر عينها و لا تحزن
ربنا يربط على قلبك يا فاتيما و يرزقك الصبر و صدقيني يوسف هيرجعلك انا واثق انه راجع و أكاد أقسم على ذلك
ربنا مش بيخلف الوعود و زي ما رجع موسى لأمه و يوسف ليعقوب هيرجع يوسف لفاتيما ان شاء الله
كل سنة و هو قرة عينك و بسمة قلبك و روحك الطاهرة
و السنة الجاية ان شاء الله هتكونوا متجمعين تحت سقف واحد
و الف مبروك للاستاذ وليد و الاستاذة هبة و ربنا يحفظ ابنيهما و يقر عيونهما بهما

انا كمان نفسي اكون بابا ونفسي اسمعها
كل سنه ويوسف طيب والف مبروك على قدوم علي يا عمتو وخالتوا
كل سنه وانت طيبه

أحيانا يكون أبلغ تعليق

هو الصمت

ربنا يطمن قلبك عليه ويرده ليكى

دائما متألقة بنقاء قلبك
دمتِ كما انتِ

محمد غالية :)

كل سنه ويوسف طيب زمش هاسألك ايه اللى بعده عنك ولكن هاقولك ربنا مش بيجيب حاجه وحشه وان شاء الله يجمع بينكم فى الخير

يا رب يردلك اياه بفرح و حب
ما في اي كلام تاني ممكن اعبر فيه

كل سنة وهو طيب. ربنا يرده ليكي ردا جميلا :)

الأم :)
http://samamasr.blogspot.com/2012/09/blog-post.html

ماشاء الله 13 سنة :-)

كل سنة ويوسف طيب وان شاء الله نحتفل بيكي يوم رجوعه ليكي ان شاء الله

هايرجعلك يوسف طول مايقينك جواكى مابينطفيش يوسف راجع لو يقينك انطفى يبقى ربنا بيبعده عن بالك عشان مش رايد انه يرجعلك انما طول ماجواكى يقين بانه راجع فربنا بيصبرك باليقين دا لحد مايردهولك فى الوقت المناسب
http://el-lavender.blogspot.com/2012/09/blog-post_8063.html

إرسال تعليق