.

.

سّــربنّـى شكــرا  

Posted by: فاتيما in











و "سربنىّ " دى كلمة كلاسيكية 
فى عالم القطط .. معروفة وشائعة 
و وصفة متجربة لكل من ربىّ قطة ف بيته
و زهق منها أو زهقّته و كان لازم يمشيها





   

قوم ببساطة يروح واخدها  هيلا بيلا
و شايلها غالبااااا ف شنطة الخضار 
عشان بتبقى قماش و فيها منفذ هوا
و يروح رايح على أبعد مطرح من بيته
و يطلع القطقوطة م الشنطة 
و يلقى عليها نظرة الوداع 
و يقولها مع السلامة يا بسبسة
فتبصله ببلاهة شوية و مهياش فاهمة 








بس بعدين بتفهم الفولة 
لما تلاقيه بيبعد خطوات .. ويفارقها 
انه خلاص عيشها عند صاحبها إنقطع
و عاشر يا بن بيسو مسيرك تفارق
و تبصلك بنظرات لوم و عتاب و نظام 
كدا تستغنوا عنى يا بشر  
و ترجعوا تقولوا آل القطط غدارة آل 
خلاص .. براحتك يا أمور 
و سل لا فى يا مونامور 
و نو نوون ناااو نييااو نو نو 
وكل دى برطمة م القطة و بتقولهالك 
 وانتا بتديها ضهرك 
وشكلها بيبقى تقريبا والله أعلم ... شتيمة





هذا المشهد يتكرر كثيرا 
و يعرفه كل اللى زى حالاتى و غاوى قطط
ومهووس بتفاصيلهم و تربيتهم
و ميعرفش يعيش ف بيت من غيرهم
ولما كان يوسف معايا لـ 8 سنين تقريبا
مكنش ينفع انه ميحبش القطط 
من حكاياتى و ذكرياتى عنهم 
و لما كبر حبة و بقى ينفع أجيبله قطة
و أثق انه هيتعامل معاها من غير قلق
ولا هيا تأذيه و لا هوه يقعد عليها يفطسها
اشترينا سوا انا و هوه أول قطة 
و وقفنا ف المحل ننقيها ولا أجدع عروسة



 



يوسف كان عاوزاها بنت 
بس انا قولت مالهم الولاد .. ؟!!
وتفاوضنا كالعادة و وصلنا لقرار  ... بأن 
اختار انا  ... و هوه يسميها
واشترينا قطقوط سيامى ولد 
و اسم النبى حارسه بقى ..... أوشة

 



 اوشة بقى دا مكنش يتخير عن يوسف
ف المحل كان باين انه ادب الدنيا واخلاقها 
ولما طلعناه م القفص كان كاشش 
ومبتئس و عامل ابن ناس والزمن جار عليه 
والملخص ...  كل غُلب الدنيا فيه 
قولت كويس .. 
أهو يعيش وميعملش مشاكل كتير 
مبحبش القطط اللبط أنا
بس على مييييين ؟؟؟
بعد الحموم و الأكل و النوم و الدلع 
هما يا دوب يومين و الشقاوة طلعت
و يوسف نفخ فيها وكبّرها باللعب والإجرام
والجوز عملوا عليا روبطية 
وكونوا تشكيل عصابى لا يقل 
فتكا و خطورة عن فريق ريا و سكينة وشركاه





 


و تعدى الأيام 
و سى اوشة يكبر و يبقى راجل
تتوطد صداقته مع يوسف 
و القط يصحى و ينام جنب صاحبه
لازقين ف بعض لازقة بغرا 
كنت مبسوطة طبعا انه بيسليه 
وبيعلمه معنى المسئولية و الأهتمام 
وكمان بيخلق ف قلبه م الصغر شوية رحمة 
و كل حاجة حلوة ... لكننننن 






يأتى هادم اللذات 
و مفرق القططات عن صحابها
 اوشة يمرض و شعره يقع ف كذا حتة
و نجرى بيه على محل القطط 
اللى يدلنا على دكتور بيطرى 
اللى يكشف عليه و يكتبله الدوا 
واسأل السؤال اللى كنت ف طفولتى 
لما بسمعه بتخض و أكتئب و افهم
علطول أن بعده النهاية 
لما تقول ماما
المرض دا معدى يا دكتور .... ؟!!!
فيرد  ...  أيوه 
و تبقى الكلمة الفصل اللى مفيش بعدها 
و القط مهما كان عزيز و غالى علينا 
فلازم يمشى م البيت يعنى لازم يمشى






و تلف السنين و ابقى مكان ماما 
و ألاقينى بعمل زيها بالحرف
و بسأل الراجل بكل جدية و قلق 
المرض دا معدى يا دكتور  .. ؟!!
فيرد : طبعا يا مدام








وأخرج من عنده بفكر ف طريقة
افهم بيها يسوفة ان القط مينفعش يقعد
انما كان صغير و صعب عليا أول قط ف حياته
نتخلى عنه بالشكل دا
فكان لزاما أحط خطة لتجاوز الموقف الزفت 
 و اوشة يمشى بيها من غير يوسف ما ينقهر 
........................
طب أعمل ايه 
أعمل ايه ؟؟!!!؟؟









عدينا ع الصيدلية واحنا مروحين 
واشترينا الدوا عاااادى جدا 
و لا كأن فيه حاجة و دخلنا الشقة 
ويوسف قعد يطيب ف خاطر اوشة
ويقوله متخفش و هتخف و يتكلموا مع بعض 
واتعشوا و لعبوا لحد ما تعبوا 
و نام الجوز  .. وانا فضلت سهرانة 





طلعت صورة لأوشة من الالبوم بتاعنا 
و لزقتها على ورقة و كتبت كلام 
مش فاكرة النص بتاعه بدقة 
بس اللى فاكراه
 انه كان جواب موجه من اوشة القط
 لصديقه العزيز يوسف 
بيبلغه فيه انه بيفكر يتجوز 
و قرر يسافر ف رحلة 
يدور فيها على قطة بنت حلال 
ولما يلاقيها هيجيبها و ييجى يزورنا 
واحتمال ميعرفش يرجع .. ولو دا حصل 
فمتزعلش يا يوسف
لأنى هكون مبسوط و عايش حياتى 
و خلى بالك من نفسك و من مامتك 
و انا هفتكرك علطول 
و .... الإمضاء : اوشة 





و رسمت نجوم و ورد وحطيت الجواب 
عند صندوق اللعب بتاع يوسف
واول ما النهار طلع .. 
شلت القط واتسحبت بشويش 
نزلت لبواب العمارة و شرحتله الموقف العصيب 
و كنت هجيب المصحف 
واحلفه انه يبقى سر بيننا ميطلعش لمخلوق 
وخد يا محمد اوشة وديه لمحل القطط
و اديته العنوان و فلوس التاكسى
وخد البواب القطقوط بكل همة ونشاط 
و رجعت انا البيت بكل زعل وأسى 
و دخلت بشويش خااالص .. وكملت نوم 






و صحى يوسف ... ملقيش اوشة جنبه
بسبسله كالعادة .. .. مجاش 
قام يدور عليه ف الشقة 
و بعدين صحانى بلهفة ..... يا ماماااااااا
قمنا ندور تانى و المرة دى 
يوسف انتبه 
للجواب اللى عند صندوق اللعب
و قالى دا أكيد من اوشة ... صورته أهى
وادانى الورقة أقراها 
فطبعا أنا قريتها و ابتدت الأسئلة ...





طب راح فين ... ؟
طب ليه مقلشى انه عاوزة يتجوز 
كنا جبناله احنا قطة
طب ازاى يمشى و هوه عيان .. ؟!!
طب كدا ميودعنيش .. ؟!!!

و بعد كل سؤال كنت أرد 
أكيد راح ف حتة فيها قطقوطات حلوة 
و يمكن أنكسف يقولك يا يوسف 
و متقلقش القطط بتعرف تخفف نفسها ..
 ربنا بيساعدها 
و اكيد مودعكش عشان خاف لتمنعه م السفر !!







وعملنا مؤتمر تباحثنا فيه ظاهرة 
مشيان اوشة و أثره ع المنطقة العربية
وانتهينا بإقتناع يوسف بما حدث 
وتمنياته لأوشة بحياة سعيدة 
مع قطة بنت حلال و يجيبوا عيال
وان بكرة ييجى يزورنا وكدهون

 





و زى ما يكون القط كان سامعنا ياربى
بعد كام يوم يوسف 
سمع نونوة عند باب الشقة 
و ندهنى الحقى يا ماما  الحقى
بفتح الباب لقيت مييييين .. ؟!!!
المزغود اوشة
 اللى البواب مفروووض سربه
واللى اول ما فتحنا الباب ما صدق 
و راح داخل جررررررررررى على جوا 


يادى النيلة و الوكسة الهباب 
طبعا كنت عاوزة امسك البواب اقتله
بس مسكت روحى 
 و واضح ان البيه راح سربه ف الشارع 
اللى ورانا استسهال
ومرحش بيه على محل القطط ولا نيلة 
والقط استخدم حاسته القططية 
ورجعلنا تانى ... !!!



 
طب و بعدييييين 
يعنى سربته عشان يتاخر ..
دا ايه الحظ المقندل دا  ؟؟؟!!
و طبعا أوشة راجع و حالته كان يرثى لها 
و جعان و متخانق و النُقر اللى ف شعره زادت 
و أضطريت بقى بعد المنظر المهبب دا 
إنى اشرح ليوسف حقائق الحياة
بكل المرار اللى فيها 
وان اوشة مينفعش يقعد معانا تانى 
لأنه كدا هينقلنا المرض ودا غلط 
واحنا نوديه للمحل يبعتوه مستشفى 
ونجيب قطة جديدة 
و الحمدلله يوسف تفهم واقتنع ورضخ 
والمرة دى نزل معايا بنفسه 
عشان نسربه احنا بمعرفتنا :)







ويرحل اول قطط يوسف بهدوء 
واحب أبشركم اننا بعده جبنا ييجى 
عشرتاشر قطة .. ولاد وبنات 
سيامى و رومى وشيرازى و بلدى
القمورة و الوحشة و ام دم خفيف والرزلة 
و اللى مبتسمعش و اللى مبتنطقش 
واللى مبتخلفش و اللى ديلها مقطوع 
وكل الاشكال الحقيقة عدت علينا 
و متحرمناش من حاجة
وكلهم مشيوا لأسباب شتى 
لكن والحمدلله 
من غير ما يوسف يزعل و قلبه ينكسر 






 

 و أجمل حاجة بقى 
وسط كل الحاجات الى جت على بال يوسف 
وقتها الا انه و الحمدلله و الشكر



و ربنا اللى عالم بالغلابة 
 خلى الواد ميسألنيش السؤال 
اللى كنت مرعوبة اسمعه
عشان مكنش عندى إجابته الا و هو ...


طب هوه ازاى القطط بتعرف 
تمسك قلم و تكتب جوابات زينا يا ماما ؟!!!


---------------------------------------

يارب تكون بخير 

------------------------------------------------


This entry was posted on الثلاثاء, سبتمبر 04, 2012 and is filed under . You can leave a response and follow any responses to this entry through the .

33 كــــلام بيطــبطـــب عـــلى قــــلبى و روحــــى

طبعاً

انا ضحكت ف الأخر بعد ما خلتينى ادمع طول البوست

اللى هو ضحك مع الدموع دة عارفه يا فاتيما

(:

عارفه انا البوست الجديد لسه كنت كاتب عن القطط

و كأنك برضه قرتينى ((:

.....

هو بخير يا فاتيما

(:

ربنا يحفظه


السلام عليكم
استمتعت جدًَا بقراءة هذه المذكرات
دمت بخير حال
مع تحياتى

بحب حكاياتك مع يوسف أوي أوي
يارب احفظ يوسف ومامة يوسف بحفظك :)

هههههههههه الحمد لله انك خرجتى من المزنق ده :)
باذن الله هيكون بخير
طول ماانتى بتدعى له هيكون بخير
بحبك
وبحب يوسف
وبحب القطط علشان خاطر عيونكم

انا بمووووووووووووووووووووت في القطط يا فاتيما بعشقها جدااااااااا فكرتيني بتيمور حبيب قلب ماما انا كنت معتبراه ابني

اول مرة اعرف اننا لما نعوز نسرب قطة نوديها لمحل القطط وممكن يبعتوها للمستشفى البيطرية تتعالج ... ممم ولا دي كانت اشتغالة ليوسف؟ ههههه

ربنا يخليلك يوسف ويحميه

لولا

مساء الغاردينيا ياروح قلبي
:)
انا ويوسف حنتفق انا بموت في القطط وربيت يجي ١٥ قط في وقت واحد في مرة كان قاللت لي ماما يابنتي دول لو يتفقوا عليكي حياكلوكي هههههه بموت فيهم وبحب عينيهم المبلمه دي وحاليا عندي قطه عسل لوشافها يوسف حيحبه "
؛؛
؛
لروحك عبق الغاردينيا
كانت هنا
Reemaasا

يوسف حِلم بصديق أمّور فكان أوشة
كانت الحياة بساتين بالحب مفروشة
وبعد أيام كتير كان الفراق بينهم
أصل المرض خلّاه شعراته منفوشة
وعـجـبـي
KING TOOOT

ان شاء الله لما يوسف يرجع هيجيب معاه قطقوطة جميلة بس المهم انتي وقتها متطمعيش في القطقوطة و تاخديها منه

واوشه يهون عليكو بردك

يلا براح بردو

:)


ربنا يارب يارك فيوسف
امين

وحشاني

قصة عاطفية ملحمية درامية فظيعة :)

Ramy
----

عارفاه يا رامى الموضوع دا
دا بتاع الناس الحساسة يا بنى
الناس الـ ر ر
رقيقة القلب يعنى
وبيأثر فيها ابسط الاشياء
وتشوف فيها جمال و نقاء
:)


وربنا يسمع منك
ويكون بألف خير
اصلى حلمت بيه حلم صعب
وصحيت مفزوعة وبعيط
وبعدين قولت يا رب
وهديت


وصحيت كتبت البوست
ومعرفش ليه افتكرت الواقعة دى فجأة

معرفش


المهم يا عم
نما إلى علمى انك جاى اسكنكرية
انتا عارف بنتجمع فين
والمعاد 7 ان شاء الله
واشوفك يومها بألف خير بقى

:)

habiba
------


الف شكر ليكى
ونورتى المدونة

إسمك حلو قوى

:)

Baskouta
--------


https://lh4.googleusercontent.com/-kAlj0ZJ7TKc/S6sXIi8uCXI/AAAAAAAAFGU/BEnxI_3hL-E/s500/child%2Ckiss%2Clove%2Cchildren%2Cart%2Cgirl-541cf7fc1c2ea44198a97e67bd7ebdc0_h.jpg

عاشقة الرومانسية
----------------


آه ربنا ستر يا دودو

بس بشوف الام لازم تتعلم تجاوب
و تتوقع الأسئلة المرعبة دى
وبعدين على فكرة
الفرجة ع الكارتون
بتساعدها
لأنها بتكتشف ان الولاد بيتفرجوا
على حاجات بتفتح دماغهم وتوسعها
وتخليهم مستعدين يقبلوا تفسيرات
نوعا ما خيالية ..بس مقبولة
ولما بعدين يكبروا شوية
ويعرفوا الحقايق الكاملة
ميبقوش زعلانين
ويحسوا انه تم الإستهزاء بعقولهم
وكدهون
:)


بوسات وحضونات
وقططات بقى

لولا وزهراء
----------

والله يا لولا
انا لما قط بيمرض عندنا
بوديه المحل فعلا وياخدوه ببلاش حتى
بس بقول هيعالجوه ويبيعوه تانى لأى حد
مش مهم ...

بيصعب عليا ارمى القط ف الشارع
ويتمرمط وخصوصا لما نكون جبناه صغير
وعمره من عاش ف الشارع
ومن بيت لبيت اتنقل وكبر ..


لما بيمرض قد بنوديه للمحل
كان فيه علاج والمرض مش معدى
اهلا وسهلا
المرض معدى
مع السلامة يا بسبس
ونجيب واحد تانى وخلاص


ومنحرمشى منك يا حبيبتى
:-*

ريمـــاس
-------


ههههههههههه
كلنا هذه السخصية يا ريما
انا كمان ماما بتقولى كدا
لما بقولهانجيب قطة كمان
او لما قطة تولد واقولها نخلى عيالها

فترد تقولى
اللى يطاوعك ييجى يعد سنين يلاقيكى
زى اللى بيطلعوا ف الأفلام دول
وبرامج الطرائف والعجائب
وعايشين مع 50 قطة .. !!

:)

احنا حاليا عندنا قط سيامى
اسمه ميزو
مكتئب علطول
وكل ما نجيبله قطة عشان يتجوزها
يحصلها مصيبة ومتقعدش


ومنحرمشى منك ولا من عبق الجاردينيا يا ريما يا جميلة

:-*

KING TOOOT
----------


يااااااااااااه يا وليد !!

كانت واحشنى الرباعيات الحلوة دى
ومجرب انتا قصة القطة والعيا
والمناقشات الفلسفية اياها
:)

وكنت بعتت مسج مذيل بطلب
لما تروقوا
ابقوا قولولى امتى وفين يناسب يعنى


:)

مصطفى سيف الدين
---------------


قصدك ايه يا مصطفى
هيجيب معاه قطقوطة قطة ..
ولا قطقوطة بنت ... ؟!!!

وش رافع حاجب شمال
ومستعجب جدا

:)))

sony2000
--------

والله يا سنسن وانا عيلة
كنت بعيط لماما عياط السنين
لما تمشى قطه


بس لما بقيت ف نفس موقفها
خدت نفس القرار
بس عملت ترضية
انى كنت واحنا ف المحل بنمشيها
بنشترى واحدة غيرها ...
عشان ميبقاش زعلان وقلبه مكسور
وينشغل بالقطة الجديدة واللعب معاها
ويبقى القديم ذكريات حلوة
مش حزينة


:)

وانتى وحشانى اكتر

مهندس مصرى
----------

هههههه

يخليـــك لأخـــتك يا غالى

:)

طبعا مجرب جدا يا فاتيما ولسه لغاية دلوقت بأتناقش المناقشات الفلسفية إياها ،
على فكرة
إحنا في إنتظارك في أي يوم الإسبوع الجاي ماعدا يوم السبت
تشرفي
وتآنسي
وتنوري بيتنا المتواضع
كلميني قبلها علشان أقول لك على العنوان
سلام يا خالة العيال و عمّتهم

يا عيني عليك يا اوشه
بقى كده معقول تعمل كده فاتيما معاك
وكمان تضحك على يوسف
هههههههههه
ربنا يخلي يوسف ليكي وتجيبي ليه قطط كتير وتلعبوا بيها سوا
تحياتي

إنتي أحلي أم في الدنيا ربنا يحفظلك يوسف .
كل حبي لكي ):

:)) فكرني ببنتي لما ماما بتقول لها العصفورة اخدت المقص وطارت
قالت لها ازاي طار والشباك مقفول وهي العصفورة لها ايدين تمسك المقص

مش بربي قطط علشان مابحبش الفراق

:-)

فكرتيني بمُغامراتي في تسريب القُط بتاعنا وأنا صغيّر برضه، ياما رجعلنا تاني بعد التسريب :-)

المهم نهاية البوست هي اللي مُفاجأة

ألا صحيح هو القُط بيعرف يكتب جوابات ازاي؟ القُط بتاعنا ما كانش بيعرف يعمل كده!!

وحشتينى يا أم يوسف

ماما كمان كانت تخصص تسريب قطط لأنها مكنتش بتحبهم

بس بصراحة كان عندها حق أصل أخوية الكبير كان عنده هواية إقتناء قطط الشوارع ... القطة تدخل البيت الصبح تتسرب الظهر على طول


عجبتنى فكرة الجواب أوى .. دماغ بصراحة هههههههههههههههه بس كويس انه مسألكيش

KING TOOOT
----------

منت عارفة يا ابو عمر وعلى
ولنا فى سيمبا خير مثال
:)

وبالنوسبة للمعاد
ان شاء الله هقولكم قبلها بيومين
عشان تكونوا مستعدين
ومبقاش بطي عليكو وكدا

انا عارفة انى اتأخرت
بس معلشى
:)
خالة العيال وعمتهم وآجى براحتى بقى
وتسامحونى كالعادة بقلبكم الطيب

:)))

eng_semsem
----------

شرقت يوم الجمعة يا باشمهندس
ولاّ مشرقتش ؟!!!

جبنا ف سيرتك
بالخير والنبى
وقولنا المرة الجاية تكون معانا
ان شاء الله


ومتزعلش على اوشة
انا علمت نفسى وعودت يوسف
منزعلشى قوى وننقهر
مرض القطط ومشاينها مكتوب بقى
عشان فيه قطة تانية ف مكان ما
منتظرانا نروح نجيبها تعيش معانا
وكدا
:)


تحياتى ليك اكتر
:)

ديدى
----


وانتى احلى وأحلى يا ديدى
:-* على جبينك يا حبيبتى

أم .. بوبه
----------

يختشى يا ام بوبه
انا ماما كانت وما زالت تعانى منى
ومن اخويا الصغير حاليا اللى بيشترك معايا ف مؤامرة الإبقاء ع القطة
ومبتبقاش عاوزة قطط من اصله
بس بترضخ ...
انما هما القطط اللى بيحصلهم مصايب ويمشوا
واقول للحاجة ام فاتيما
صفّى نفسيتك من ناحيتهم
عشان ربنا يبارك فيهم ويقعدوا
لا يمكن
تجيلهم أى حاجة ..ويمشوا

والحمدلله انه مسألشى فعلا
:)))


و ألف حمدلله ع السلامة

شمس النهار
----------


يا شموسة اصل القطط دى غية ومزاج
وتعود ومحبة تكلبش ف القلب
ومتطلعش منه


وبخصوص الفراق الواحد بيحاول يتكيف
ووجود قطة جديدة بديلة
بيخفف الزعل شوية
اخويا ماجد زيك كدا
يوم ما قطة تمشى يبقى يوم اسود
ومبيرضاش يروح معايا المحل نرجعها
وبعمل معاه اللى كنت هعمله مع يوسف
مبرجعشى الا بقطة جديدة ف ايدى
عشان ميزعلشى
:))

ربنا يخليلك البنات
والاحفاد يا رب


يا مراكبى
---------

طب الرد مجمع على كل اللى فات
انا كمان
:)



بخصوص سامح ..
أيوه هوه يا عم مراكبى
انا مندهشة انك لسه فاكر
انى قلتلك انك تشبهه قوى ...
:)
ربنا يديك طولة العمر ويخليك
اللهم آمين



موضوع الذبذبات
عارفة انا انك زى حالاتى
جيل ميكى وسمير وماجد ولاكى لوك
والناس الحلوة دى
:)
والذبذبات بتنفع عندى
لما أحاول اتحاشى الشخص نفسه
قبل ما ذبذباته تطلع عليا ...
بحاول يعنى وبتجيب نتيجة
لحد دلوقتى اهو
:))



بالنوسبة ليوم ابو الريش
فربنا ما يقطعلنا عادة
وتكون مرة معانا بالتواجدجسديا
زى منتا معانا ماديا ومعنويا وقلبيا
نفسى مرة تفطر معانا
وتحضر لمتنا ف المستشفى ..
وتكتب بوست متأكدة انه هيكون مختلف
وبعيونك انتا فيه شىء مش هنشوفه احنا وانتا هتلاحظه ..
بس هتكون حنين برضو لو شفت عيوب


اما عن الحاج صاحب البيت
فالحمدلله اليوم عدى على خير
بلا خساير تذكر
وربنا يهدينا كلنا للحق
ويبعدنا عن اللخبطة ..
ومعاك انها خطة كبرى بس الناس ليها دور لو قررت تشارك
واظن اليوم دا جاى .. قريب ان شاء الله



اما عن يوسف
فشفت الوقت بيجرى ازاى .. ؟!!!
وكل سنة وانتا والولاد مامتهم
بألف خير يا رب
واحنا خاطبين جنى لو تفتكر يهنى
والولد بينضج اهو وبقى راجل وكدهون
:)


واخيرا عن القطط
دو زى ما قولت لشمس النهار
غية ومزاج ...
وعشان كدا انتا طالع حنين يا نبع الحكمة ...
أصل القطط بتخلى الولاد فيهم طيبة ورحمة وقلة شقاوة عن العادى ...
ل بس انتا شبه باباك قوى ...
وطيب وراثة
:)
والقطط لها عامل
والقراية من الصغر
وكل حاجة بقى
:))


وربنا ... يخليك ليا
بفرح لما الاقيك مهتم كدا وبتقرى كل حاجة اكتبها ... ومبتزهقشى
مهما عدى الوقت


بجد
منحرمشى من طلتك عليا
ابدا يا رب

هههههههههههههه

سأل السؤال المنطقي بس متأخر جدا

شوفي هوا إختيا صعب لكنه منطقي ترتيب أولويات

عموما فيه دكتور في الزمالك يريحك من التسريب ده
يا بيستضيف القط المريض لحد ما يخف

يا بيريحه اخر حاجه

ملحوظه:

فهمت رغم التعتيم

إرسال تعليق