الثلاثاء، 11 سبتمبر، 2012

حــــتــة قـمـــــــاش






زمــــان 
وقبــل الزمـــان .. بزمـــان 


 
يحكى أن مصر
 كانت أم الدنيـــا بحـق 


 
وكانت هيا الأصل
 اللى دايما تبتدى من عنده الأشياء




وبيقولوا علم كل بلد جت بعدنا
أصله كان من هنا .. من بلد النيل




أول علم كان شارة الملك مينا 
موحد القطرين وكان على شكل صقر
منقوش فى اللوحة دى وعلى جدران المعابد


والملكة حتشبسوت و علمها الجميل زيها
كان شكل المروحة وزّين جدران الدير البحرى


واخناتون بعلمه المكون 
 من لونين أخضر و أحمر




 وييجى الأسكندر مصر 
و يحكمها البطالمة و بعدهم الرومان 
وتبقى القاعدة كالآتى 
اللى هيحتل و هيحكم مصر
هيكون علم البلد من نفس شكل علمه






ويدخل عمرو بن العاص مصر 
براية الخلفاء الراشدين 
اللى هيا راية سيدنا النبى أشرف خلق الله
وكان لونها أسود وبيسموها "الُعقاب"





ومصر الواقعة تحت حكم الراشدين 
تنتقل بعد مقتل سيدنا على ... لحكم الامويين 
واللى يكون علمهم باللون الأبيض  

 

 
وبعدهم يحكم مصر ... العباسيين 
ويرجعوا للراية السودا 




وتفضل مصر برايتها السودة كرامة لبنى العباس
رغم استقلال بعض ولاتها عنهم وظهور دويلات قوية
زى الطولونية والأخشيدية




ومن بعيييييد يأتى الغازى الجديد 
ويدخل جوهر الصقلى لمصر 
فاتحاً ... بإسم الفاطميين 





اللى يشيلوا راية خضرا وكانوا بيحبوا اللون دا
 لأنه لون بردة سيدنا النبى 
اللى لبسها الأمام على بن ابى طالب بدل منه 
يوم ما نام ف سريره الطاهر وفداه بروحه 
 

الفاطميين اهتموا جدا بالأعلام 
سواء فى الحروب أو حتى فى المواكب 
يمكن عشان كدا من عهدهم
 و احنا ابتدينا نعلق زينة رمضان
اللى فيها فروع من الأعلام الملونة المبهجة


ويدخل صلاح الدين الأيوبى مصر 
شايل علم أصفر
ويبقى العلم الرسمى للبلاد 




ومن بعد زوال دولته ييجى المماليك
اللى انقلاباتهم وكترتها تخلى الأعلام تتوالى 
من اصفر لأسود لأحمر 
ويترسم عليها رموز تشيرلأصحابها 
و تميز عصرهم عن غيره بشكل ما زى نبات أوحيوان






و يدخل العثمانين مصر 



وبعد ما يشنقوا الغلبان طومان باى
على باب زويلة 




 
يثبتوا أقدامهم فى المحروسة 
ومن وقتها يبقى العلم المصرى عثمانى الهوية






كان علمهم أحمر قانى 
وفيه هلال ونجمة سداسية  الشكل





ولما حكم محمد على
 أراد لمصر أن تتميز وتتمرد 
فخلى العلم احمر بهلال بس بقت النجمة خماسية 






و من بعده
توالى سلسال الأسرة العلوية 
لحد ما وصلنا للخديوى اسماعيل 
اللى خلى العلم احمر بتلات أهلة وتلات نجوم





 كل هلال ونجمة تمثل منطقة بسط لنفوذه
مصر ..  النوبة  ..  السودان


ومن بعد اسماعيل يحكم ابنه توفيق 
وف عهده يدخل الاحتلال الانجليزى مصر
ويرجعوا العلم احمر بنجمة واحدة وهلال واحد



ويفضل كدا بشكله 
لحد الحرب العالمية ما تخلص 
وف سنة 1914 يرجع بالهلال والنجوم التلاتة 




و تقوم ثورة 1919 وينزل الناس جمعاء 
و يشيل الشعب علم جديد جنب العلم الرسمى
مرسوم عليه هلال و صليب
وتلات نجوم ترمز للمسلم والمسيحى واليهودى 





لحد سنة  1923 ولما يعلن استقلال مصر
 لتصبح دولة ملكية و يبقى علمنا أخضر
 بهلال و بتلات نجوم 





ويروح لقب الخديوى 
وييجى الملك 
ويمشى و ييجى اللى بعده  

 



ويفضل علمنا 
 بلونه و هلاله و نجومه






 لحد ما يخلص عهد فاروق 






وينتهى عصر الملكية  كلها
وتصبح جمهورية ... بقيام ثورة يوليو 1952



 
و لحد 1958 العلم يفضل زى ما هوه 
بدون أى تغيير






ويظهر على استحياء علم جديد 
و يسموه علم التحرير وكان بلا شعبية
وبيتعلق ف المناسبات وأعياد الثورة جنب العلم القديم





لحد ما نتوحد مع سوريا
ويتم تغيير العلم بشكل رسمى 
عشان يبقى تلات مستطيلات احمر وابيض واسود
وفى المساحة البيضا نجمتين خُضر






وتبقى مصر نجمة خضرا ف العلم 
وتكون سوريا هيا النجمة التانية
واللى تفضل محتفظة بالعلم داعشان 
يكون علم الجمهورية السورية  لحد النهاردة 

  


ويتعمل كيان ف اول السبعينيات و يسموه
 اتحاد الجمهوريات العربية 
يضم مصر ...  وسوريا ... وليبيا 


 
ويبقى علمنا اعتبارا من 1971 بنفس الألون
بس يشيلوا النجمتين
 ويحطوا ف قلبه صقر وباصص ناحية اليمين 




 وروح يا زمان وتعالى يا زمان 
وتتغير الاحوال و يتفرق الشمل و يتبدل العلم
سنة 1984 رسمياً والصقر ينقلب نسر
وباصص ناحية الشمال 


 
و يبقى شكله النهائى 
اللى احنا عارفينه بيه دلوقتى

  
العلم المصرى

اللى مبارك وعصره 
وكسنا و بهدلنا و خلانا 
وخلى نسر علمه ... أرنب خانع
ولما قرصنا تونس ف ركبتها
 

وحصلناها ف ثورتها



المصرى ثار ع الجار السو اخيرا
وصمم ليمشيه هوه وابنه ومراته وكل عيلته




نزلوا الشابات


والشباب

  
و .. الولاد



والبنات 



والكبار 


وقفوا بالأعلام قصاد النار 


و قصاد الخرطوش والرصاص


وقصاد خراطيم المية


 واتلفوا بيه 
والطوب جاى عليهم



وصلوا عليه


 
ودعوا ع البعيد .. يا رب يغور


وهوه مفيش دم


الدم كان بيسيل من الشعب .. وبس


اللى قعد و تربس 

 
و .... قال مش هنمشى 


لحد ما هوه ... يمشى



ويمشى أخيرا ..  فــ 11 فبراير




والنسر تتردله الكرامة
ويرفع راسه فووووق لأنه ع العلم المصرى




العلم اللى كان بيترفع
 ف ماتشات الكورة تشجيع وتفاريح مش اكتر




العلم اللى تحيته كانت بتاعت ناس بعينها 
وف طابور الصباح المدرسى مجرد روتين ممل





وصحيح كانوا بيفرحوا بيه العيال


ويلبسوه ساعات اقنعة 




ويرسموه ع الوشوش 


ويتباع طاقية وكوفية 

 
وتشيرت



والبنات تلبسه خاتم و عقد و انسيال 



 و يوصل لدرجة ان واحدة ترقص بيه
فى أقصى درجات الإبتذال



لكن رغم كل دا ..

 
 الثورة تيجى 
و تخلقله معنى تانى من جديد


 
حتة القماش



متبقاش مجرد .. نسيج ملون


تبقى الوان بتشد العين 
بتنطق و حية



تبقى تاج يزين جبين الصبايا 


وتتحول لسجادة صلاة 





وف شارع محمد محمود ترشد الأسود
 ف وسط دخان الغاز و تثبت قلبهم
وتبقى علم و راية بصليب وهلال
اسمها على أسم صاحبها ..  مينا دانيال




حتة القماش اللى إترفعت على أرض سينا 
فرفعنا معاه الراس


ومهما الزمن يمّر .. الحق يرجع


وثورة يناير 
تحيى أبطال مصر اللى بجد 

 

ويتلف الشاذلى بعلم بلاده 
اللى خرج منها حزين مكسور 
ويرجع يندفن ف أرضها معزز مكرم  بين أهله 




حتة القماش ....  اللى 


يمسكها الشيخ عماد عفت 
فـ .. تزيد بركــة 


 اللى تتشرّف بإنها تحضن الشهدا 
وتروح توصلهم ... للجنة



تفضل مع  ... علاء



و تطمن شباب الألتراس اللى اتاخدوا غدر


وتمشى مع شهدا رفح 
اللى نعرف أسمايهم


 وتوّنس كمان اللى دفناهم 
ولسه منعرفش لحد النهاردة هما مين  .. !


العلم ... اللى نسره كان قّرب 
يطفش خلاص
  


كان بيتطنط فخرا لما إترسم
على جدار بنوه عشان يحمى السفارة الإسرائيلية




و لما شاب من أرض البلد دى طلع 
وشال علم قتلة اولادنا وحط علمنا مكانه


حتة القماش اللى اتوصلت بين كنيسة القديسين 
وبين الجامع اللى قصادها قبل الثورة بيومين .. بس !




العلم اللى حضر العركة
 وكان راية النصر بتاعتنا على كوبرى قصر النيل 





العلم اللى عشان يرفرف بحرية 
مات ورد الجناين 





وراح اللى راح  فى ماسبيرو



ودفع نور عيونه
 و روحه ف محمد محمود 




العلم اللى فضل صامد 
يقول يسقط يسقط حكم العسكر 




وغير العسكر .... 



الطمعانين 
انهم يكوشوا عليها 
ويمسخوا هويتها ويبّدلوها 




اللى شوية عاوزين يغيروه

 
و يشيلوا النسر


وشوية عاوزين يبدلوا الشكل



ولو سكتنالهم و استنينا كمان
مش بعيد نلاقيهم حاطين رمز جماعتهم
ومعرفش هيحطولنا ايه تانى .. ؟!!



طب انشالله
 يحطولنا سبونج بوب
 


هنشّبعهم زى اللى قبلهم 
 تريقة وتجريس 



ونقول امتى هيفهموا ...




ان العينة كانت بيّنة 
و لما نقاوتهم حب يكتبله كلمتين


جه يكحلها ... عماها




وان اللى فاكرين الدم ..


 
 اللى ساهموا فى اهداره بخيانتهم  



عشان يقعدوا ع الكراسى 




هما وغيرهم ... خلاص كدا إتنسى ؟!!!




والناس قبلت بالظلم 



سكتت و خلاص يبقوا غلطانين

 
مصـــــرعـارفـــة و شـــايفـة و بتصـــبر
 لكنـهــــا فــي خــطفــة زمـــن تعـــبر 
و تســترد الإســـم و العنـــاويـن


وزى ما غوّرت اللى قبلهم ... هتغوّرهم




وتفضل هيا




مالكة القلب




 ساكناه ومدفياه 
ولمّة الكل حواليها ساعة الكرب





وزى ما ولادها دفعت الغالى 
 عشان مبارك يمشى 


وعشان عسكر مبارك وبطانته ... يمشوا

 
لسه مصحصحة ومركّزة وعارفة
العدو م الحبيب  



و لسه مستعدة تدفع تانى 
عشان يمشى والى عكا الخاين 
بايع أهله وناسه 

 
عشان يوصل و يحكم بإسم الدين 
و يقعد على تلها



ونقول 

ومش هيخرسونا 


مزهقناش ... متعبناش 



و ارفع كل ريات النصر 



ونموت احنا ... وتعيش



--------------------------------
----------------------------------------


---------------------------------------------


هناك 14 تعليقًا:

بـت خـيـخـة وأي كـلام يقول...

ازيك يا طمطومة

الصورة اللي انتى حاطاها في البوست
اللى هى عبارة عن مصر قاعدة على كرسي
وكل واحد بيرسمها من وجهة نظره
اللي بيرسمها انها كرسي سلطة
واللي بيرسمها انها واحدة منقبة
واللي بيرسمها انها خزنة فلوس
كل واحد بيرسمها حسب وجهة نظره
وهو شايفها ازاى
او هو نفسه يشوفها ازاى

الصورة دى فكرتنى ببوست انتى كنتى كاتباه زمان
لما الميس بتاعة الرسم بتاعتكم حطت فازة فيها وردة على الترابيزة قدامكم
وقالت كل واحد يرسم الفازة هو شايفها ازاى
وكان كل واحد منكم رسمها من منظور مختلف بيعتمد على المكان اللي قاعد فيه وشخصيته
فيه اللى رسمها بعيد وفيه اللى رسمها قريب واللى رسمها محطوطة على اليمين واللى رسمها محطوطة على الشمال
وهكذا
وكنتى انتى فاكرة ان الرسومات هتتشابه
واكتشفتى ان كل رسمة مختلفة تماما

كان هدفك من البوست تقريبا على ما اتذكر
ان الحقيقة ليها اكثر من وجه
وكل واحد بيشوف الموقف ازاى

المهم

لو جينا لمصر
وقلنا لكل واحد
ارسم مصر زى ما انت شايفها
لأ .. قصدى زي ما نفسك تشوفها

انا هارسم سوسن بدر ( طول عمرها سوسن بدرى فى خيالى هى رمز لمصر ملامحها بلون بشرتها بشعرها الاسود بعيونها السود الواسعة بطولها بتمثل بالنسبالى مصر ) هارسمها وهى لابسة فستان متصمم على شكل علم مصر
زى فستان شادية
فى اغنية يا حبيبتي يا مصر
هارسمها عملاقة اوى
طويلة جدااا
و راسها لامسة السما
هارسمها وهى فاتحة دراعاتها
وحاضنة كل المصريين بكل طوائفهم
هارسمها دايسة برجليها على كل انتهازى ومستغل
ايا كان شكله عامل ازاى
إذا كان لابس طاقية
او مربي دقنه
او لابس بدلة عسكرية
او معلق صليب
او مطول شعره وناكشهولنا

هارسمها وهى لابسة تاج
اللأليء بتوعه عبارة عن شهدائنا اللي ماتوا فى كل الحروب والثورات اللى هي خاضتها
هارسمها ام
العيال متشعبطين فيها
وماسكين فى ديل فستانها
ومتعلقين برقابتها

هارسم كفوفها كبيرة
علشان تقدر تحاوط على الكل
وهى بتقربهم اكتر من حضنها
خايفة عليهم يقعوا
خايفة حاجة تيجى تخبطهم
خايفة حد من اللى تحت رجليها يحاول يشد حد من عيالها ويوقعه معاه

هارسمها كاملة .. حلوة .. كبيرة .. عالية


بس خلاص

انا عارفة ان تعليقي قد يراه البعض
انه مالهوش علاقة بالبوست

بس البوست هو الفازة
وكل واحد هيعلق على البوست
زى ما هو شايف الفازة ازاى

:))

سلام
اختك خيخة

ابراهيم رزق يقول...

فاتيما
روح القلب الملائكية

فى بوستات كثير مش بعرف اعلق عليها
واقول كتبتها ازاى دى
وايه المجهود والارشفة دى
بصى يا فاتيما
ابحث عن الرمز
تيشيرت فيه ريحة عرق عماد عفت
اغلى مليون مرة من بدلة مرصعة بالالماظ للمخلوع
افتقدنا كثيرا الرمز
وفجاة بقى عندنا الاف الرموز
مينا دانيال رمز
عماد عفت رمز
احمد حرارة رمز
رضا عبد العزبز رمز
ماما خديجة رمز
عم محمد الراجل الطيب اللى كان بيلف فى التحرير شايل اليافطة ورجله وجعاه رمز
بلد فيها كل الرموز دى لن تسقط
بجد يا فاتيما استمتعت بالبوست ده جدا
واستمتعت بتعليق خيخة

سلام يا يا ام جو

عاشقه الرومانسيه يقول...

البوست حلو قوووووووووى
حسيت ان الوقت رجع بيا تانى للثوره ويوم 25 يناير
ويوم مبارك ما اتنحى وفرحتى وانابافرق شربات وازرغت
ويوم محمد محمود .. وكل يوم كنت باسمع فيه اخبار وابكى بحرقه ونهنهه على عيالنا اللى بيموتوا
عايزه اقولك زى ماانتى قلتى ان الحكايه مجرد وقت وزى ما غار غيرهم هيغوروا هما كمان
انانفسى البلد دى ترجع زى ايام سيدنا يوسف فيها خير وخيرها فايض على كل اللى حواليها
لكنها دوقتى خيرها للكبار وعيالها جعانين وعريانين
مش ذنبها انهم اغتصبوها وكل واحد بينهشها بطريقته .. مش هنسيب الضحيه ونمسك فى الجانى مش هنفضل نلعن فيها وهى مغلوبه على امرها
هتتعدل ومسيرها هتقف تانى على رجلها عندى ثقه ويقين انها هتقف تانى

re7ab.sale7 يقول...

مفيش حاجة اقولها يا فاتيما
مفيش كلام
بعد كل ده
مفيش كلام بعد الكلام الحلو ده

Ramy يقول...

(:

بس

مبقتش عارف اتكلم

صيدلانيه طالعه نازله يقول...

مينفعش يتقال كلام تانى

sony2000 يقول...

التدوينه

بالاغنيه
خلوني ابكي

الازهرى يقول...

البوست أكتر من رائع
لكن محتاج كلمة تتشال منه فورا

كانت

لأ هى مستمرة
وكل الأحداث دى فى التاريخ دليل على الحيوية والتغير
شعبنا عنده تاريخ
ونضال
واحتكاكات وخبرات
وعوالم كتير أثرت فيه وأثر فيها

أيوه أثرنا فيها

لما تروحى بريطانيا
هتلاقى حاجات كتير بيعتبروها مفخرة لهم
وهى من تعليمنا لهم فى العصور القديمة

فى فرنسا شفت بعينى
عادات فى الريف
سواء فى ليون أو تولوز تخليكى لو غمضتى عينيكى دقايق عن لبس الناس وأشكالهم تتخيلى إنك فى قرى مصر

إحنا التاريخ والأساس للحضارة فى العالم
ودا مش كلامنا

دا المؤرخين الأجانب هم اللى أثبتوا دا فى كتير جدا جدا جدا من كتبهم

وزى ما قلت لك قب كده

اللى مضيع الجيل ده
إنه فاكر إن مصر طول عمرها زى ما هو شايفها

إنما إحنا مجردلقطة فى كادر فى مشهد من حلقة من مسلسل طوييييييييييييييل

وبكرة جاى

ومصر هتتحول لشكل تانى
أحسن أو أوحش دا بإيدينا

ومش بإيد حد تانى
بكرة بتاعنا
وأى حد شابف التاريخ هيعرف إن نهضتنا حان وقتها
وإن حلم الشعب هيتحقق ومش هيقبل تأجيل أكتر من كده

بكرة هيبقى لمصر

مش لعسكر ولا إخوان ولا ليبراليين ولا علمانيين ولا أى نيلة تانية

بكرة لمصر أم الدنيا

وصدقينى لما أقول لك

هانت

Carol يقول...

حلوة كلماتك بتحرك حاجات جواية
قصة قماشة لأ قصة وطن
قصة شعب طيب القلب و الروح
قصة حكام و أحكام و تغيير مصير
تاريخ يبوح
و شعب ينوح و يبتسم
شفتي طيابة أكثر من كده !!

Mahmoud Bahgat يقول...

مش عارف ليه لما قريت البوست افتكرت اغنية مسلسل سر الارض "ارضك بتنده تعالى ما حد غيرك راويها"
مصر هى ارضنا اللى عايزه كل مصرى يبنى فيها و علمنا هو اسمنا اللى دايما رافعينه

يا مراكبي يقول...

بوست مُميَّز

رغم إن الحديث من اول لآخره عن العلم .. اللي مصنوع من قُماش، إلا إن البوست يُعتبر نوع من أنواع التأريخ

والجميل إن التأريخ ده بدأتيه من زمان قوي من عهد الفراعنة، مروراُ بالعصر الإسلامي وحتى العصر الحديث مع ختامه بتفاصيل ثورة يناير

حقيق بوست مميز بجد، رؤية جديدة

مهندس مصري يقول...

كالعادة بوست جميل قوي يا أم يوسف
حتى لو إختلفت معاه شوية صغنونة :)
اللي باظ في مصر في 60 سنة مش حيتصلح في 60 يوم
أنا شايف البلد بتتحسن و بتتقدم والله
صحيح مش بالمعدل اللي كتير مننا عايزينه و يمكن بترتيب أولويات مختلف عن اللي إحنا شايفينه صح بس بتتقدم مش بترجع للخلف

يعني دلوقت أحسن من حكم العسكر و أكيد أحسن من حكم مبارك
أنا بأعتبر حكم مرسي هو الفترة الإنتقالية الحقيقة لإن حكم العسكر كان فترة محاولة إجهاض الثورة

صدقيني يمكن تعتبريني متفائل قوي و مخدوع في مرسي و رغم إني عارف كل دقات النقص بتاعة الإخوان طول مسار الثورة بس حاسس ان البلد بتتقدم و حتتحسن إن شاء الله

مهندس مصري يقول...

صحيح تاريخ العلم و الصور اللي حاطاها روعة
تسلم إيدك :)

بـت خـيـخـة وأي كـلام يقول...

إزيك يا طمطومة


يا مصر يا حافظة قرآنك وأناجيلك
ولو تناديني مــ الغربة أنا جيلك
في وقت الشدة ادعيلك واناجيلك
ومهما تموت هنا أجيال أنا جيلك

مكتوبلي أغنيلك واغزل مواويلك
وان جف نبع الحب يرويه عسل نيلك



بحب الأغنية دى جدا
وبحب اوى اللعب بالالفاظ اللى موجود فى لفظة "أناجيلك" فى اول كوبليه
لانها فى كل سطر بتدى معنى مختلف

سمعتها امبارح
وحسيت انها تنفع مع البوست بتاعك
قلت اجى واجبهالك معايا

http://www.youtube.com/watch?v=FwacHztTwMs


بس خلاص

سلام
اختك خيخة

إرسال تعليق

الكلمــة نــور .. وبعض الكلمــات قبــور .... عبدالرحمن الشرقاوى

♥ ♪ღ روح قلب ماما ღ♪ ♥ F M