.

.

معجـــم المصطلحـــات اليـوســيفية 3  

Posted by: فاتيما in













وصلى ع النبى بس كدا و انا هقولك
انه أكم من ام عندها ولد و اسمه يوسف
الا فاتيما اللى عندها يوسفيه 
و حضرتكو تنطقوها على وزن
 "سيبويه" الجدع بتاع النحو
 و طبعا كلكو شطار أكيد و عارفينه 





فهل بت لما يوسف ابنى نطق
وابتدى يتعلم الكلام زى باقى العيال
بقى هوه اللى بيعلمنى .. مش أنا
و هوه اللى بيفهمنى .. مش أنا 
ويعّرفنى على مصطلحات 
جديدة نوفى و مكنتش عارفاها 
و مش عيب أعترف قصادكو بالحكاية دى
المثل بيقول يموت المعلم ولا يتعلم 
و ... خدوا فالكو و كمان كلامكو من عيالكوا 





وإذ انه كان طفلا متميزا جدا
فقد آل على نفسه 
الا انه يكون له معجماً خاصاً متفرداً
بطبعات مزيدة منقحة كمان 
وبعد سكوته اول كام شهر 
قضاها فى حالة ترقب لمن حوله
و أمضاها فى سماع هلفطات الكبار
وتسمياتهم التافهة العبيطة المعيوبة للأشياء




قرر العلامة يوسفيه 
فى لحظة فارقة وتاريخية 
الإنتهاء من وضع فصول و ابواب 
مختار عبمجيد يوسف أفندى الصحاح 
و دخل بعدها على مرحلة أكثر عمقاً
وضع فيها
 القواعد اليوسفية
ف علم الصرف و النحو و اللغة العربية




وانا بس هكتفى بإنى أديكو مثال 
لكيفية إستخدم حرف مكان الحرف 
و الدنيا ساعتها 
تبقى ماشية زى الحلاوة السبريد
ف العيش الفينو  و بيس و قشطة 



 و القاعدة اليوسفية يا مؤمن بتقولك
انك ممكن وببساطة تحط
الباء مكان الميم 
وتنقال و المعنى يمشى ومحدش ياخد باله 
و لا نفر يسألك ليه و كيفما ولربما و بما إن !



فمثلا  
السجاير بّضرة بالصحة يا عمّو 
(كان نهاره اغبر اللى يشرب سجاير قصاد يوسف)


و
قطتى بريضة 
(الدكاترة يوسف 3 ماجستير و2 دكتوراه)


و
مش هاكل سبك
(بلاش السمك طيب وكُل جمبرى ؟)

و
البكياج دا حلو يا ماما 
(مدرسة القرع المباشر اليوسفية بنين)

و
البشابك بتاعت الغسيل وقعت م البلكونة
 (وقعت لوحدها أظن ؟)


و

انتى جرحتى بشاعرى
(لأ .. سلامة بشاعرك يا خويا ! )


و
بعلش .. بعلش 
( ترمى البابشك ف الجنينة وتقولى بعلش ؟!)

و
بفيش فايدة 
(سعد زغلول وشه ف المخدة غالباااا وهوه بيموت  )


و
يادى البُصيبة 
(ازاى الاسرائيل الكلاب تحارب لبنان .... ؟ )




تسألونى ليه حصل كدا يا بنتى 
و يعنى احتمال المسألة مؤقتة
و اهى كل العيال وهيا بتكبر
بيبقى ليها حرف و لا اتنين واقعين
و لازم بس هوه كان عنده برد ساعتها
 و لاّ لحمّية و لا حاجة .. !!




فأرد اقولكم آه صحيح 
هوه يوسف كان ألدغ ف الراء 
و بيقولها ياء يعنى الكشرى كان كوشييي
و كنا صابرين وحامدين وشاكرين
 ومش معترضين 
انما تقولولى الواد كان عيان 
ابدااا و النيعمة و لا كان عنده إنفلونزا 
و لا بريض و لا بانخيره بسدودة
و بفيش أى حاجة كدا خالص
وليه جه ف بالكم  التفكير دا .... !!! 



دا هوه بس اللى حابب يقولها كدا 
وكل ما كنت أحاول أصلح له 
بيصّر ع نطقها برضو ... فسبته
 وقولت اهو بكرة يتعلم على مهله
 و مش لازم أغِصبه 
و أذى نفسيته 
دا الولا اللى حيلتشى
بعدين العصبية غلط و بضّرة بصحته ... ؟!!





بس طلعت غلطانة
 غلط فظيع شنيع مريع ... بشيع 
إذا انه بعد شوية لقيت الحروف
 بقت داخلة على بعض
وآل ايه يا خويا ابقى قاعدة كدا
وأبص الاقيلك حرف الميم بييجى
مكان حرف الباء 
والبوتجاز يتحول فجأتن إلى .. موتجاز 
و من غير سبب .. !!



واللى زاد وغطى بقى 
انه بعد شويتين سى يوسف خدته الجلالة 
فأستن قاعدة جديدة تمامااااااا 
الا و هى دمج الحرفين ف بعض فأصبح 
عمو دا عنده ... شمنب


و

انا هنام ع الكمنبة


و

العمنب دا طعمه لذيذ




و ليه كدا يا بنى
هوه انا عملت فيك حاجة ؟


لأ يا ماما  ... بعملتيش 


يا دى البُصيييييبة 


تعاليلى و الحقينى يامه !!!



لأ مش مصيبة
و لا يا لهوى و لا حاجة 
الحقيقة ان الحكاية كانت لطيفة جداااااا 
لأنها عملت بينى و بين ابنى
شىء مميز و يخصنا احنا الإتنين 
ومحدش تالت يفهمه معانا الا بصعوبة
و الا بعد ما أباصيله السر و بعد محايلة .. !



بقيت كمان أستمتع بتعبيرات الوشوش
و احنا ف الشارع او المواصلات
 او السوبر ماركت او بنزور ناس قرايبنا
و نتكلم انا و يوسف قصادهم بالشفرة 
فيبصولنا منذهليييين و هما مش عارفين 
ولا فاهمين بنتهبب نقول ايه 
وكأننا بنتكلم بالكورى أو بنشتمهم وكدا .. !!





وبقت الحكاية ألطف و ألطف
لما أعمل زعلانة من يوسف لأى سبب 
و أقلب لسانى ع اللغوة بتاعتنا
فـ يفهم علطول ان فيه حاجة و يسألنى 




 بالك ؟

أرد : بضّايقة

فيقول : بين اللى بزّعلك  .. ؟!!

أقول : واحد بُجرم ساكن معايا هنا 
اول حرف من اسمه ي
فيضحك
ومن غير ما يعرف لسه عمل ايه
 يسيب اللى ف إيده و ييجى يحضننى



و عشان يتأكد انه صالحنى كويس 
يقعد ربع ساعة و زيادة 
يدينى البوسة و بعدها يقول ... بعلّش 
البوسة و يقول بعلّش 
 بوسة و بعلّش

بوس كتير كتير قوى 
وبوتوا بغيظكم  
(وش بّطلع لسانه)


:)


------------------------------

--------------------------------------



الغنوة دى
 بتفكرّنى بآخر رمضان قضيناه سوا
يارب تكون لما بتسمعها صدفة .. بتفتكرنى  

--------------------------
-----------------------------------





-----------------------------------


This entry was posted on الاثنين, ديسمبر 03, 2012 and is filed under . You can leave a response and follow any responses to this entry through the .

14 كــــلام بيطــبطـــب عـــلى قــــلبى و روحــــى




بص
مش هقولك وحشتنى
عشان انتا معايا دايما
وطول الوقت ...


عارف
بيتهيألى ساعات
انك قصادى
وبكلمك
وبستخدم لسه القواعد النحوية بتاعتك
الجميلة اللذيذة دى



متهيألى لو كنت معايا
ف اول الثورة
كنا هنتريقأ للصبح
هنقول ع التحرير .. البيدان
وهنقول تحيا بصر ف الهتافات
هنقول البدرعة بتاعت الجيش راحت فين ؟
وهنهتف سوا ف التحرير
الشعب يريد اسقاط البُشير
كنا هنقول على شفيق ..
بليش فيه
ومفيش حاجة ف البتسابة
يا لهوى
دحنا كنا هنقول حاجات ياماااا
ونبص لبعض ونضحك قوووووووى

:))))

انا عارفة دلوقتى انك بتتكلم حلو
وكل حروفك تمام
بس مينمنعشى ان لغتك دى
كانت بتهون عليا كتير
وبحبها
زى ما بحب كل حاجة بتاعتك وتخصك
وصحيح تبان حاجة بسيطة
وكل اللى عندهم اطفال بيسمعوها
وعادى

بس لأ
مش عادى
أبسط الأشياء .. دى
هيا اللى بتخلى للدنيا البايخة
البشعة القاسية دى .. طعم مختلف
هيا اللى بتخلها مسخرة قوى
ف وقت كاتمة فيها على روحنا
هيا اللى بتخلى للماضى ذكرى
وروح
وجمال


انتا حبيب ماما
ولا أسكت الله لك حسا
ولا كلام
ولا ذكريات
ولا أى حاجة حلوة يا حبيبى



ماما

مش عارفه اقول ايه على اد ما ابتسمت من قلبى

بس ربنا يخليهولك ويكون قرة عين لك

اكيد لو قرأ كلامك عنه هيعرف ان عنده احلى ام فى الدنيا


دمت بخير

اممممممممممممممم

أنا عارف هو طالع لمين

أقول ؟؟؟؟؟؟؟؟؟

تصدقي بالله و ما ليكي عليا حلفان
كل الكلام و القواعد بتاعت يوسف فهمتها و الكلمة الوحيدة اللي مفهمتهاش في البوست هي كلمة حطاها بين قوسين على اساس يعني انك تفهمينا كلامه
يعني ايه (بابشك ) يا تانت :)

على العموم ماشي هافوت المرادي علشان خاطر عيون يوسف
ربنا يحفظه و يبارك فيه و يرده إليكِ ردا جميلا

البوست ده جانى فى وقته
كنت محتاجه حاجه تخلينى ابتسم :) ربنا يخلى لنا يوسف ومامة يوسف

صباح جميل يجي قريب تصحي ويوسف في حضنك

ربنا يراضيكي بكل ما تتمني

وعجبني القاموس علشان خصوصيته

قاموس ماينفعش غير بين يوسف ومامته

قاموس تم اصطلاحه بالحب أحلى حب

صباحك حب

صباح الغاردينيا ياروح قلبي
اقولك حاجة ومتتزعليش مني مش قادرة اكتب والله بعيط يمكن تقولي البت دي عبيطه والمفروض البوست دا اتكتب بإبتسامة يوسف ومعجم اليوسفيه النحوي بس في حته بين السطور وجعتني اوي فيه ام شايفاها بٌ قلبي حاساها وربنا يمكن كمان تقولي ايش عرفك ياريماس بإحساس الامومة هقولك الاحساس الي من القلب مش محتاج نترجمه ولا محتاج نمثل نفس الدور عشان نحسه انا بجد والله وحياة مامتي وحياة فارس حبيبي بعيط ونفسي بجد اخدك في حضني كل مرة بجي هنا بحس بجد قد ايه انتي انسان دافيا من جوا بتضحكي وتهزري وجواكي الم وحزن بتحاولي تغلبيه انا رغيت اوي ويمكن تجاوزت حدودي انا اسفه وممكن لو مش مريحك الكومنت احذفيه المهم عاوزة اقولك بحبك والله ربنا يريح قلبك ويجمعك بإبنك نفسي اقول ليوسف انت عندك اجمل واحن ماما في الدنيا "
؛؛
؛
لروحك عبق الغاردينيا
كانت هنا
Reemaas

طيب تصدقي بالله بقا انك رسمتي ابتسامه ع وشي ااااد كده كنت محتاجاهااوي
ربنا يكرمك و يفرحك و يريح قلبك يا فاتيما يا ام قلب ابيض كبير اااااد كدهو ويخليلك يوسف و يحميه و يجمعك بيه ع خير يارب
تحياتي :)

ربنا يبارك فيه
حمدا لله على سلامتك
كيف حال والدتك؟

إيه السكر دا ! ^_^

عموما حتى لو فضل الدغ- إحم- مش مشكلة على فكرة .. دى حتى بتبقى حاجة مميزة جدا ، وبيتجاب فى التليفون لو حد يشتغل حد على طول :))

ربنا يخليكم لبعض ...

الشعب يريد خطاريف بقى ;)

مش هقول وحشتينى لانى والله الشهور الا فاتت كنت بتكلم عليكى كتير هنا
فى ايه اطمنى فى كل خير
وحبيت ادخل اسلم واطمن عليكى
ويارب يارب ما يحرمنه ولا يحرمك منه ابدااا يوسف ابن قلبك

مش حأعرف أرد
قطعتيلي قلبي بصراحه

مساء الخير


انا بخير يا جماعة
وماما كمان بخير وأحسن عن الاول
انا أسفة انى مبردش على حد
بس مليش نفسِ لأى كلام
ومبعرفش أمثل عليكوا
ومبحبش أكتب تعليق مش حقيقى
وعارفة ان الحالة عامة
وكله قرفان ومتضايق

بس معلش
يا مصر هانت وبانت وكلها كام يوم

إرسال تعليق