الأربعاء، 13 مارس، 2013

يا بتـــوع الجـــيش








إيييييه دنيا 
أديلى مدة مش عاوزة أتكلم
 ف السياسة وقرفها 
بس هترجعونا للإجرام تانى 
أصل حوار الجيش ينزل الجيش يعود  دا 
عاملى خرم ف دماغى
 زى بتاع الأخت سبايدر 
و مش ممكن اللى بيحصل 
 شىء لا يسدقه عكل الصراحة .... !!



لما سمعت الدعوات دى

قولت مين اللى بيقول يا عيال
دول لازم الفلول
لقيتهم مش فلول وبس
دولا  طلع فيهم ناس م النوشتاااء آل 
و فيه شوية م اللى اسمها
 أبصر ايه النخبة 
و اسخاص لحد كام شهر فاتوا
كانوا بيهتفوا ف المسيرات 
لما اللوز بتاعتهم تبان من على بعد امتار 
يسقط يسقط حكم العسكر 
فإيه بقى النوظام  وايه اللى اتغير 
هوه الجيش إحلوّ فجأة
  عشان خسّ كام كيلو 
و ضرب الشعر أصفر ولبس عدسات 
وعمل نيولوك ولا ايه .. ؟




بصوا
 ف البداية 
قولت دى لازم كدبة ابريل 
بس هوه شهر اربعة جاى بدرى شوية!
أو دول اكيد بيهزروا معانا بس ايدهم تقيلة حبتين 
أو تلاقيهم يا عينى مخبوطين طازة
ف رخامة ترابيزة الصالون 
و عندهم ارتجاج مؤقت
و هيبقوا كويسين ان شاء الله 
أو على اسوأ الفروض
 حد حاططلهم حاجة أصفرة
 ف مج النسكافية
او كوباية الشاى
او ف الميرندا تفاح 
أو اكيييييد معمولهم عمل .. 
اهو المهم
أى تفسير  علمى منطقى مقبول 
يخلينى استوعب
 اللى بيتقال دا والسلام 
انما طلع دا كله مش حقيقى ... 
آخراشى !!!


بقى انتوا بجد عاوزين العسكر يرجع ؟!
بعد كل اللى عملوه معاكم
 ومعانا
ومع البلد 
من مهازل وكوارث ومصايب 
ترقى ف تداعياتها
 إلى مرتبة الخيانة العظمى .. ؟!!



الله !!!
هما مش دول اللى سلمّوا البلد للإخوان؟
وما هوبوش ناحية الداخلية
 بأى عقاب يذكر ؟



مش دول اللى طبطبوا على مبارك
وعياله ومراته و رجالته
 وهربوا بعضهم بالغنايم 
لحد ما كله بقى ف التمام والسليم 
ومحدش بقى قادر يدوسلهم على طرف؟



مش دول اللى طرمخوا ع الداخلية وسفالتها 
لحد ما القضايا باظت
والادلة انطمست 
وكله خرج براءة براءة براءة ... ؟



مش دول اللى سابوا المتهمين الامريكان
يخرجوا من مصر امنين 
بينما الالاف المعتقلين يقبعون ف السجون؟



مش دول اللى عكونا ف انتخابات 
و قالوا دستور لأ 
ومجلس رئاسى لأ 
و قانون غدر لأ 
وأى حاجة ف مصلحة البلد .. لأ 
وبعد ما ثبت انهم غلطانين 
معتذروش
ومحدش استجرى يحاسبهم ؟!!



مش دول اللى خلوا
ضباع الجماعات الأسلامية 
و قرود السلفية
وحازم ونسانيسه 
يتنططوا على كتافنا .. ؟!!



مش دول اللى انقتل ولادنا
ف ساعة مغربية
ف رمضان 
ومحدش خدلهم حقهم لحد النهاردة .. ؟



مش دول اللى عملوا كشوف العذرية
و اللى قبضوا على ضباط ابريل
و اللى دهسوا عيالنا قصاد ماسبيرو 
و تبولوا ع الناس ف مجلس الوزرا 
وعّروا ست البنات 
وسابوا الداخلية تقنص عيون الولاد 
وضربوا و سحلوا وسجنوا
 شباب الثورة
 طول الوقت ... ؟!!




قوام نسيتوا اللى جرى ؟!
بسرعة كدا الدم رخِص
و حق الشهدا و المصابين هان 
و القصاص من كل مجرم
بقى نسيا منسياً .. ؟!!
ايه يا جماعة مالكوا .. ؟!!




اللى هيقولى الكلام دا كان ف وقته 
وخلاص العسكر لما يرجع مش هيحكم 
وهيمشى بما يرضى الله بقى
ومش هيعيده ... 
انتوا مصدقين روحكم ولا بتشتغلوها ؟!!



طب واحدة واحدة
وبالعقل كدا 
احنا بنتكلم ف اللى حصل ف حد  ذاته 
ولا بنتكلم عن عقيدة المؤسسة العسكرية ذاتها ؟



يعنى 
العسكر عملوا كل اللى عملوه
 من اول يوم ثورة ليه ؟
هل لأنهم متخبطين زى ما بيشاع 
و لأنهم ملهمش ف السياسة
 والأفلام دى 



طيب ... فرضنا ذلك 



هوه المنطق دا مش علم و له أصول ؟
يعنى لما واحد يكون تفكيره
ان مبارك هوه قائدى وحبيبى 
وانا مكنتش عاوز ابنه آه
 لكن الوالد على راسى  
لكن ف نفس الوقت الشعب هيعاند 
والبلد هتفرط من ايدى
فـ ..  اعمل ايه ؟




حد يستجرى يقول
 ان الجيشمسبش الحكم (شكلا) 
غير بامر امريكا 
اللى يتديله المعونة 
وميقدرش يرفضلها طلب .... ؟!!



حد يقدر يقول ان التضحية بمبارك 
مكنش بمباركة من البيت الابيض
 ليس الا 
انما لو كان عليهم 
كانوا داسوا علينا بالدبابات
 ف التحرير ولا همهم عادى  .. !!



حد يقدر يقول
 ان سفر المتهمين الامريكان 
مكنش امر 
واتنفذ ؟



حد يقدر يقول ان حماية مبارك ف سجنه 
لحد النهاردة و ان ركوب الاخوان
 و ان الصمت المهين
على مدبحة رفح مكنش زى كل حاجة 
بأوامر عليا من ابانا ف البيت الأبيض ؟



اقول ايه ولا ايه .. ؟!!



كام مرة نقولها ونكررها 
كل رجال مبارك كانوا نقاوته 
لتنفيذ اوامره
اللى هيا اوامر ست الكل امريكا 
واصحاب البيادة كل اللى يعنيهم
تنفيذ الامر 
مش لشىء الا لأنه ...
يعنيهم مصالحهم ومشاريعهم 
واياكش أى حاجة بعد كدا تولع 



اللى يقرى المقالة دى 
يلمح وسط الكلام 
جملة بليغة مختصرة
  29 مليار جنيه 
اللى بيقول صاحب المقال
 ان القوات المسلحة 
ادتهم للشعب من لحمها الحى 
والست ضحت وسكتت
ولا نطقت
ولا قالت حاجة 
وكان عندها استعداد تضحى تانى 
ب 3 مليار زورار  لولاش الغدر ويحش !



وثوانى ... نقطة نظام 
وبغض النظر عن المشهد بتاع
 مورسى الخاين 
مانح القلادات و باتر القيادات
اللى تلاعب بالمشير البرىء الطيب 
حضرتكم ممكن اعرف 
الـ 29 مليار دول فلوس مين 
وجم منين  ؟




يعنى العسكر مثلا
حوشوهم من مصروفهم  
ولاّ اشتغلوا ف اجازة الصيف 
ولاّ يا ترى مات لهم عمة ف البرازيل وورثوها 
ولاّ يكونوش عملوا جمعية
و ادونا اول قبضية 
ولا ايه النظام يعنى ؟


 المؤسسة العسكرية حسبما ذُكر 
تقريباااا كدا حسب الوصف
بتجبى علينا 
واحنا اوغاد و مكنش عاجبنا
لأ و شتمناهم 
و قعدنا نقول ف الشوارع 
يسقط يسقط حكم العسكر .. !



الفلوس دى جت منين 
و مش مهم الإجابة 
لأن اللى يهمنى ما وراء الإجابة
 والكلام اللى متقلش



اللى ورا الكلام
ومتقلش بس يبدو لى واضحا 
ان العسكر اللى هما دولة جوا الدولة
 لن يقبلوا بأى شكل
ان حد يدوسلهم على طرف
وكون ان حاليا مصلحة الشعب 
جاية مع مصلحتهم
والعدو حاليا مشترك  
فدا أمر مؤقت ليس الا
وبكرة لما تتعارض المصالح 
هناخد كشعب بالبيادة ... وعادى



و كمان اللى ورا الكلام
 ومتقلش و ببساطة 
العسكر لا يعنيه بحق
اللى هيقعد ع الكرسى 
طالما هيسبيبه ف حاله 
يخلص مصلحته 
ومحدش يقرفه بمراقبة ميزانية 
و يحشر مناخيره ف المعونة والتسليخ
.. الخ الخ 



ف عز لهيب الثورة
امريكا بصت ف المشهد 
وقالت كله يشخشخ جيبه 
و يرمى بياضه
وهيا توزن مين الانسب لمصالحها 
مين اللى هيخلى كل شىء على قديمه 
ييجى بقى الاخوان
 السلفيين
زعيط معيط نطاط الحيط 
أى كلب معدى 
متفرقش 



والعسكر طالما محدش
بيبصله ف لقمته 
وامريكا موافقة
 يبقى بيس و قشطة 
 اى حد ييجى انشالله
 يكون قرد بصديرى و خيرت بيرقصّه 
وحا ... شى المرشد بيمشيه !



طيب 
اذا كنت موافقنى لحد الآن
على كل ما سبق ذكره 
ممكن بقى تجاوبنى
وتقولى 
ايه اللى اتغير ف العقلية العسكرية 
عشان نمشى وراها المرة دى
واحنا متطمنين 
انهم لن يخذلونا تانى
 ويبهدلونا تانى 
و ف عهدهم الميمون
و على رأى الله يمسيه بالخير البوب 
مش هننضرب تانى يا منى ؟!!!



يعنى ايه اللى اتغير ف طريقة التفكير ؟
ايه اللى فرق ف المنهج
اللى ماشى عليه العسكر 



ايه و النبى حد يقولى ... ؟




يعنى هل يتوقع احدكم
انهم صحيوا ف يوم كدا
 بعد ما شافوا منام 
لقوا نفسهم غلطانين
وقرروا يصلحوا غلطتهم
ويستروا ع الثورة الغلبانة دى 
اللى غرروا بها بليل و بعدين طفشوا 
زى نور الشريف و حسين فهمى ... ؟!!



الحوار بتاع بورسعيد كمثال 
انا طبعا مع اهل بورسعيد ف مصيبتهم
و بحتقر الالترس من كل قلبى
 على غبائهم 
و على كمان قسوة القلوب
 اللى كان مفترض تكون رحيمة 
بعد ما جربوا مرارة الظلم
و بشاعة الغدر 
وفقدان الاحبة ... 
لكن بغض النظر عن موقف كل طرف  
هل دا يخلينى أوافق على الحركة الزبالة 
بتاعت توكيلات الجيش دى ؟!!



يعنى انتا عشان تهرب
من قناص الداخلية 
ترجع تانى لبيادة العسكرى .. ؟
وما أسخم من سيدى الا ستى 
واحنا ليه دايما مضطرين نختار
ما بين زفت وقطران 
ليه يا مبارك يا الفوضى 
يا مورسى يا شفيق
يا مدنية يا دينية
يا داخلية يا عسكر 
وليه كما ذكر احد ظرفاء توتير 
هوه يا عسكر يا اخوان مفيش بفتيك ؟!!



ايه نظامكوا يا غجر 
دايما زانقينا زنقة الكلاب دى ليه ؟
و امتى هنبطل نفكر بالطريقة الغلط دى 
والتى تفتقر لأى منطق 
سوى ان الشعب يستسهل 
ويقول أى حد ييجى بس نخلص 



أه 
احنا بنخلص فعلا 
كل واحد بييجى يخلّص على شوية مننا 
لحد ما يبقى
مش فاضل غير اهله وعشيرته 
والكلام دا زى ما ينطبق ع الإخوان
اللى عاوزين اخونة 
ينطبق ع السلفيين اللى عاوزين سلفنة 
وينطبق ع العسكر كمان 
واخته الصغننة داخلية
 اللى عاوزة ترجع بشروطها
وتلبس الشعب كله طُرح 
وتقعده تانى ف البيوت 
و طبعا لا داعى
 لأنى أجيب سيرة جبهة الإنقاذ  
عشان الضرب ف الميت حرام
وملوش لازمة خسارة فيهم اكتب سطرين 



م الآخر يا عزيزى كلهم أوغاد
لا أستثنى احداااا
وطول ما فيه ناس
لسه بتفكر بالطريقة اياها
بتاعت ان الجيش عرف غلطته
 و هيبقى حبيبنا 
وينصرنا على مورسى وجماعته 
وهيروح بعد كدا معزز مكرم 
يبقوا بياخدوا اكبر مغرز ف حياتهم 
ومبيتعلموش م الدرس 



لا الجيش غير طريقته ومنهجه 
ولا معترف
وحاسس اصلا انه غلط ف حاجة 
ولا هينصر الشعب على جماعة الإخوان
اللهم الا بامر امريكا 
ولا هيمشوا معززين مكرمين 
الا لو احنا جبنالهم رئيس هزوء يطرمخ
على وضعهم الإقتصادى 
ويسيبلهم الميزانية والمليارات 
وميسألش من اين لكم هذا  
م الآخر يبقى رئيس طرطور و دهل 



و ايه ان شاء الله بقى
لهو كان مات الشهدا
و فُقد و اتسجن بشر ياما
واتصابوا 
عشان ف النهاية
 نشيل دهل و نجيب دهل 
و ثورة سعيدة
و شرفتونا .. آنستونا .. اومال ايه !!



محدش فكر لدقيقة
ف اهالى الشهدا
 اللى ماتوا اثناء حكم العسكر ؟
محدش فكر ف المصابين بعاهات
 وجروح لن تندمل ابدا ؟
محدش فكر ف المحابيس ما زالوا 
 ف سجون العسكر ؟
محدش فكر ف ست البنات
واخت مينا دانيال 
و مرات الشيخ عفت
وكل من ف نفس ظروفهم 
و منعرفش للأسف عنهم أى حاجة .. ؟



لأ غالبا محدش فكر 
فكرتوا بس ف مصالحكم
فكرتوا بس ف تكبير الدماغ
فكرتوا بس ف الانتقام من الداخلية 
فكرتوا بس ف الخلاص م الإخوان 
دون النظر لأنك بتجيب الديب بيتك 
عشان يقضى على الضبع
مطنشاً معرفش ازااااى
 انه هيتدور عليك بعد ما يخلص عليه



والمضحك المبكى
 انها مش اول مرة
دول عملوها من قبل سابق
والعرب قالوا زمان
كيف أعاودك و هذا أثر فأسك ؟
وفاس العسكر فاشخنا سنة ونص
 يعنى فـ عاوزين ايه تانى 
مزيداااا من الفشخ .... متعبتوش ؟!



انا مش عارفة أقولكم ايه فعلا 
هتلبسونا ف الحيطة تانى
وتالت وعاشر 
ولا حدش بيتعلم
و يا لهوى عليكى يا مصر 
يا غلبانة وموكوسة و متداسة كدا دايما 



طيب 
بصوا بقى 
انا تعبت هتاف
ضد العسكر والداخلية 
وضد الاخوان و المرشد و مورسي النحس 
انا عندى رجاء واحد
و مطلب وحيد 


يا بتوع الجيش 
قولوهم المرة دى .. يفشخونا بشويش
عشان هرمنا و تعبنا م الخوازيق  
و انشالله يعتبرونا زى مبارك 
ولاّ زى الإسرائيلين
ولا حتى م الإخوان 
احنا برضو شعبهم 
وهما قواتنا المسلحة
و يعنى حرام 
هما ايه .. ملهمش اخوات بنات 
أخص عليهم ميت مرة
و عيب قوى اللى حصل و بيحصل وهيحصل
و ميصحش كدا 
و ... 
حسبى الله
ونعم الوكيل فيك يا فخرى ! 


-------------------------
----------------------------------------


هناك 4 تعليقات:

Mahmoud Bahgat يقول...

مش عارف أقولك ايه بس فعلا مينفعش مع كلام عودة الجيش سكوت
و لازاما علينا جميعا ان نقف أمام هذه المطالب اللى بجد بجد فئوية
منتظرين منك المزيد بس بعيد بعيد خالص عن السياسة

مصطفى سيف الدين يقول...

بنعاني من فقر خيال سياسي
بنختصر الخيارات في حاجات متنفعش
علشان اصلا النخبة فقيرة
محتاجين حد فعلاا يكون قلبه على البلد و الشعب مش علشان الكرسي
الثورة محتاجة قائد منها يحس بالناس كلهم سواء و ميفرقش بين مؤيديها و معارضيها
على راي كاريوكي عايزين زعيم
النخبة العبيطة بترتكب ذنب عمرها لو قررت تأييد العسكر

عاشقه الرومانسيه يقول...

ان كنتوا نسيتوا اللى جرى هاتواالدفاتر تنقرا ياشعب مسخره

يا مراكبي يقول...

بيقولوا في الأمثال: ما عرفتش قيمة أمي إلا لما عشت مع زوجة أبويا

والمُقارنة هنا بقت بين سيء وأسوأ :-(

إلى أن يظهر الحق المُطلق مع طرف جديد مُخلص .. لعله يكون قريباً

إرسال تعليق

الكلمــة نــور .. وبعض الكلمــات قبــور .... عبدالرحمن الشرقاوى

♫ ♥ ♪ღ روح قلب ماما ღ♪♥ ♫ F M