.

.

انجلينـــا يا مسكينة وحزينة  

Posted by: فاتيما









مصاء الخير 
عاوزة اتكلم ف موضوع مهم جدا 
و رغم الظروف العصيبة التى تمرو بيها البلاد 
الا انى مينفعش أسكت عنه 
عشان مبحبش اكتم ف نفسى ليجرالى حاجة 
انتوا عارفين ...




فيما يخص
موضوع الست انجلينا جولى وكدا 

ايه ... ؟

نعم ...؟

يعنى عاوزين ايه ؟


وايه فاصل الزعل الرهيب 
و النكد 
والنواح اللى اشتغل بالهبل دا 
اول ما اتنشر خبر العملية اللى عملتها 
عشان تستأصل الحاجات والمحتاجات ؟!!
طب انا بحبها ومع ذلك مزعلتش
 ولا اتهزتلى شعرة .. 
فيه ايه بقى ؟!!



وقبل ما تقولوا يا شوريرة 
يا قاسية 
يا متحجرة القلب  
يا منفسنة من حلاوتها 
و لاّ غيرانة منها على براد بيت 
ممكن طيب تهدوا شوية لحد ما أشرح 
لكم وجهة نظرى ؟




الست انجلينا عمرها مقارب لعمرى 
يعنى هتكلم من زاوية حريمية مشتركة 
وأكاد أجزم انى عارفة كويس 
 احتياجات الست ف المرحلة العمرية دى 
وعارفة نفسية الأنثى عموما 
اذا كنتوا موافقين انى أنثى يعنى ... !
:)


السؤال الذى يطرح نفسه بادىء ذى بدء
انتوا زعلانين ع البنية ليه ؟
عشان عشان مثلا 
شايفينها بتعانى و بتخسر ف حياتها ؟
طيب هوه الست مننا امتى تكون فعليا 
بتعانى وبتخسر .. ؟؟
أقولكم انا


الست .. الطبيعية مش البلاستيك 
المعطاءة مش الأنانية 
المتوازنة نفسيا مش السيكو يعنى 
عاااااادة 
مكاسبها ف الحياة بتتقاس 
بشكل مختلف عن الراجل 
يعنى هيا نجاحاتها الحقيقية ف الحياة 
بتتقاس بمدى وجود احباء حواليها 
الاحبة دول يعنى الزوج أو الحبيب 
يعنى الاولاد أو الاطفال 
يعنى الأصدقاء والأهل والمعارف 
يعنى شغل مستقر و متقدرة فيه 
يعنى صحة كويسة 
عشان تكون بخير و قوية 
و قادرة تدى وتخلى بالها  
وتقوم بالدور اللى يخليها مهمة 
عند كل اللى فاتوا دول ... 
دا باختصار تفكير نون النسوة 
ف معنى حياتهن .. وقيمتها  



قوم ببساطة الست أى ست طبيعية 
لما تفتقر الى عنصر او اتنين م الحاجات دى 
تبتدى تعانى شوية 
بس وجود عناصر اخرى بتعوضها 
بيخلى الدنيا حلوة ومعقولة وتتعاش 
نظرية ال24 قيراط اياها اللى انتوا عارفينها 
وان ربنا والدنيا مبتديش كل حاجة أكيد 




الست انجلينا بقى
 لو طبقنا عليها النظرية دى 
هتلاقوها ببساطة مش خسرانة الا قليلا 
يعنى عندها زوج بيعبدها ..
ومش أى زوج يعنى دا براد بيت حضرتكو !!




عندها أطفال من لحمها ودمها 
غير اللى اتبنتهم 
عندها عمل اجتماعى منغمسة فيه
 لأقصى درجة و ناجحة لأنها بتعمله بصدق 
عندها شبكة من الأصدقاء والمعارف 
والمعجبين لا حصر لها ف كل مكان ف العالم 
عندها فلوس وبيت واستقرار 
وعندها اللى يخليها تكمل ف الدنيا 
وهيا حاسة ان اللى بتخسره حاليا .. أقل القليل 





              مع احترامى الشديد لمعاناتها 
نيجى بقى للى خسرته 
هيا الصراحة احسن بكتييير من غيرها 
ع الاقل عندها امكانية انها اكتشفت الحالة مبكرا 
عشان تتفادى مأساة اكبر مستقبلا 
و دا شىء المفروض ف صالحها 
حاجة كمان 
هيا مجلهاش الكانسر 
دا احتماليات حدوثه اللى كانت عالية 
يعنى كان اشتباه 
وهيا خدت القرار الصح


والاهم بقى 
انها تملك الفلوس اللى تخليها
 تعمل عملية الاستئصال 
وتعمل كمان عملية اعادة بناء ثدى 
ودى من زاوية اخرى حاجة كويسة  
وأسألونى ليه 
اقولكم بمنتهى البساطة و بلا خجل 
ان فيه ستات كتير بتدفع الفلوس 
 عشان يبقى عندها (امكانيات )بنت العشرين
 من تانى و بتجرى ورا هكذا العمليات 
وتلاقى لوم ونظرة مجتمع مش اللى هيا
نظام انتى عاوزة ترجعى تتصابى   
اهو الست انجلينا دلوقتى 
تقدر تعمل العملية  
من غير ما حد يلومها 
او يقول ان عندها هوس بجسمها 
او عاوزة تصغر ف السن .. الخ الخ





ناهيك عن انها فنيا نضجت 
وعدت سن الأفلام الهبلة اياها  
يعنى عدت مرحلة انها تعمل افلام 
مبنية ع الشكل و الحجم والحركات دى  
ودلوقتى تملك فلوس تغنيها عن التنازل 
وتملك كمان شخصية تفرض بيها اختياراتها 
           فيعنى مش متضررة فعلا ف الشغل 
زائد انها لو حبت تغير الكارير كله 
وتكتفى بالعمل الانسانى 
هيكفيها وزيادة 
بس تلاقى وقت جنب تربية العيال !





مش عارفة ليه فجأة 
محسسنى ان انجلينا دى 
بت بشلن من الممثلات بتوع تحت السلم 
اللى حياتهم قايمة على الصدر و الورك  
ومعرفش ليه كمان محسسنى
 ان حياة الشابة انهارت 
وانها مش لاقية تمن العلاج 
وانها مهجورة 
ومحدش جنبها 
و بتتعذب نفسيا .. الخ الخ 




طب تسمحولى اقارن لثوانى 
بينها وبين أى واحدة بلاش ف مصر 
ف أى حتة ف العالم بتعانى من نفس الموقف 
ومعندهاش امكانية اكتشاف المرض مبكرا 
ولما بتكتشفه متأخر 
ازاى بيكون حالها لما تضطر تشيل صدرها 
وبعدين متملكش فلوس عملية التجمبل 
ولا عندها تامين صحى يوافق على كدا 
ومفيش داعى طبعا اتكلم 
على انها ممكن تخسر شغلها 
وكل تحويشة عمرها 
ويجيلها اكتئاب 
وممكن يطلع جوزها ندل 
او متبقاش لحقت تتجوز اصلا 
وممكن تنحرم من وجود أطفال 
لأنها هتشيل الرحم و متلحقش تخلف 
وممكن حاجات كتيييييير قوى تحصلها 
ومحصلتش للست انجلينا المحظوظة 
وانتوا منقهرين عليها 




الست اكتشفت الحالة بدرى 
ولسه ف ايدها قرارتها وشغلها وحياتها 
وعندها اطفال بالزوفة 
ومحبين ومعجبين بالملايين 
وعندها الأهم وهوه راجل بيحبها 
وبيساندها 
ومش بس كدا 
دى هتعمل عملية ترجعلها بنت عشرين  
يعنى الراجل هينبسط يا زينب
و بايضالك ف القفص 
يا براد يا بن أم براد  
فأيه عاوزين ايه ؟!!!





                    بس برضو .. دا لا يمنع
                      انى أحتقر وبشدة 
كل العيال الزبالة اللى قعدت تتريقأ عليها 
وتقول هتشيل الجواهر المكنونة و ما شابه 
      بس هما بيبصوا للست على انها حتة لحمة 
بينما هما كلاب و بيريلوا  فــ .. عادى
وانا بوعدهم لما يحصلهم ظرف مشابه 
هنبقى نتضامشن معاهم
 وهما بيشيلوا حاجاتهم برضو 
ونقولهم كل اللى فيه النصيب والقسمة !!




واخيرا أختم كلامى 
              برجاء انسانى حريمى بحت 
النبى ما تزعلوا روحكوا 
وبلااااش نكد 
و محدش يخرط على قلبنا بصل 
 و محدش يقعد يقول اصلها وفصلها
الست افلام حلوة  ومثلت 
وصور بالهبل لجسمها و جمالها و اتصورت 
و بعدين اشتباه ف المرض و اتعالجت 
وعمليات تجميل و تحسين وهتعمل 
 و معنويا و بتندعم 
و عن الحب فاتحبت و بتتحب لسه 
وخلفة وخلفت 
ومنحرمتشى م العيال  
واسرة كبيرة وعندها 
وشغل وعندها
وعمل اجتماعى وحياة صاخبة وعندها  
واصدقاء واحباب و عندها



و بالنوسبة لتأثير وضع على حياتها العاطفية
فهى عندها راجل بيعشقها 
ولو فكر يقل بأصله ف يوم مثلا وسابها
 فيغور مع السلامة  
و احنا هنجوزها سيد سيده .. 
هيا بالمختصر المفيد 
ف نهاية الأمر محظوظة 
وعندها جنب الخسارة مكاسب كتير 
تستحق تحمد ربنا عليها 




فخصيمكوا النبى بلاش تحسسونا 
 ان المحنة دى
 لما تعدى على انجلينا تحديدااااا  
هتتحول فجأة إلى بت مياصة  
لأنها ف الأصل ست مجدع و جامدة 
وشافت مآسى ف العالم 
و مهياش من نوعية البشر والحريم 
اللى بتنكسر بسهولة 
وشخصيتها واضحة لكل ذى عينين 
هيا فعلا امراءة قوية 




وانا شخصيا بنفسن عليها نفسنة السنين
    شوفوا بس الولا براد بيت بيبصلها بهيام ازاى
وغرقان ف حبها لشوشته ازاى 
و ان كان عنده حق الصراحة 
 :)




بس عشام تبقوا عارفين
المرض دا مجلهاش وراثة زى ما بيقول الخبر  
انتوا اللى عينيكوا وحشة 
و الست كانت زى الفل وشمعة منورة 
لحد ما باست البرادعى 
و نشيتوها العين المصرى التمام 
           و من ساعتها وهيا يا نضرى متدارية 
             لحد ما سمعنا القصة 
و محدش يقولى لأ 
ومش حقيقى
لأن العين عموما فلقت الحجر 
 فمش هتفلق صدر انجلينا المسكينة الحزينة ؟
أخص عليكم اخص 



و بعييين سؤال لابد منه
طب يا خويا لما انتوا حلوين كدا 
ما تركزوا بعينكو الحلوة دى مع مرسى شوية 
ولا مع شفيق شوية 
ولا مع العسكر شوية 
ولا مع ابو سماعين شوية 
و لا مع الداخلية
و كل الخونة المنتشرين بعموم مصر 
ولا هوه يعنى 
النق يعنى
مبينفعش يعنى
 الا مع البرادعى يعنى  
واللى باسوه يعنى ....  وبس ؟!!!

---------------------------------------
---------------------------------------------------- 

This entry was posted on السبت, مايو 18, 2013 .