.

.

 

Posted by: فاتيما






هــذا القلـــب
الـذى يطلــب فجـأة مـا لا ينــال 
غريب هـذا القلـــب
 غـريب 

رضوى عاشور - ثلاثية غرناطة

الدمـــوع البيـــــضا  

Posted by: فاتيما








كانوا ف المطعم قاعدين 
هوه بيحكى ف أى حاجة
غير اللى محتاجة تسمعه منه 
وهيا يبان على وشها الضيق 
يسألها كل شوية 
- مالك ؟ 
متعرفش ترد عليه 
و تتخنق أكتر



تبص حواليها على مكان مناسب 
و تستأذن فجأة وتقوم
تدخل ع الحمام بسرعة وتلاقيه مشغول
فتقف ورا الباب مستنية
 اللى جواه تخرج 
بنتين قصاد المرايا كانوا واقفين بيتكلموا 
متقدرش تمسك نفسها 
فراحت معيطة
وسابت الدموع اللى كانت حايشها
 عشان متنزلشى  ... تنزل 



بنت م الواقفات تلمحها 
فتبص لصاحبتها و يسكتوا ثوانى 
و بعدين تسألها  
- بتعيطى ليه ؟؟!!!
مين مزعلك
جوزك .. خطيبك .. حبيبك 
حد ف الشغل .. حد من أهلك .. هاه ؟
تبصلها الباكية ف صمت مبتسمة
و تطلع المنديل من شنطتها
مش عشان تمسح الدمعات 
لكن عشان تخبى عيونها خجلا



البنت التانية تقول لصاحبتها
- أسكتى .. انتى متعرفيش ايه الموضوع ؟
وتبص للواقفة بحنان و تقولها
- متزعليش 



اللى جوا الحمام تطلع
بعد ما سمعت المحادثة كلها
و هيا بتغسل إيدها تعلى صوتها 
و تتحمق قائلة :
- بتعيطى ليه ؟!!!!
مفيش راجل اصلا يستاهل واحدة
تبكى عليه أو عشانه
المعيّطة تبقى عاوزة ترد و تقول
هوه مش مزعلنى 
و لأ .. فيه راجل يستاهل
 ينبكى عليه و عشانه و منه 
بس تحس ان السكوت أفضل
فتسكت 
و تتجه للحمام 
فتمسك المحموقة دراعها محذرة :
-  طب متعيطيش جوه 
العياط ف الحمام وحش !



تدخل صاحبتنا
و طبعا تكمل عياط 
وتخرج بعد شوية صغننة 
تلاقى التلاتة لسه واقفين
ف عينهم نظرة ترقب  
تغسل إيدها و تصلح مكياجها
وهما لسه واقفين بيتكلموا 
ويتريقوا ع المدير الرخم بتاعهم 
ويضحكوا و يحاولوا يضحكوها معاهم 
ويكرروا قصادها الحكمة القائلة
 ان الدنيا متستاهلش


    
تخلص و إحساس رهيب بالسكينة يلفها
و لما تقرب ناحية الباب تتلفت
عشان تشكرهم 
واحدة تطبطب على كتفها 
و الأتنين التانيين يقولولها ف نفس واحد 
- خلاص بقى متعيطيش


  
تخرج م المطرح ف حالة أحسن
ناسية الخنقة و الضيق 
و بتفكر ف ايه يا رب الطيبة 
اللى بتظهر ف البشر دى فجأة
و ايه الطبطبة ع القلب دى 
اللى بتحضر بلا مواعيد من ناس غرب عننا !



و على قد ما بيقولوا كلام كبير 
على قد ما هيا عارفة ف قرارة نفسها
 انهم متأكدين ان الدنيا تستاهل التعب 
وان كل واحدة فيهم متقدرش و بأختيارها
تستغنى عن الراجل اللى بتحبه 
لأنه مش احتياج أكتر ما هوه
رغبة ف اكتمال النقصاللى ربنا خلقنا بيه 
و لازم يكمل بالنص التانى ف يوم 



و تكتشف كدا فجأة
ازاى الهموم ف لحظة سودة
 الدموع ممكن تغسلها و تخليها بيضا 
و ف توقيت اللى مفروض تنوجع فيه 
فأذا بيه بقى مصدر للراحة 
و شكر للنعمة
لدرجة نسيان الزعل
والاحساس بالرغبة ف التوقف عن البكاء
بس عشان اللى قصادها ميزعلوش .. !



تخرج م الحمام
وترجع للترابيزة وتقعد من تانى قصاده
 فأول ما يبص ف وشها يسألها 
- كل دا ف الحمام ؟
 - معلش
- ايه دا كله ؟
- أصلى ... كنت بعيط 
- طب منا عارف 
ومش بسألك كنتى بتعملى إيه 
- طب عاوز ايه ؟
- عاوز أفهم .... بتعيطى ليه ؟؟!!


------------------------------
------------------------------------------

على الهامش :
1- الستات الجدعة لبعضيها 
2- الحمام أنسب مكان للعياط
3 - الدنيا تستاهل همها 
4- حتى البكا بسببك مستخبى فيه .. نعمة 

---------------------------------------------


جــبــــــال التـلج  

Posted by: فاتيما








لما يكون رجوعك للبرودة 
هوه علاج لأوجاعك
عشان هناك ف وسط جبال التلج 
محدش هيهتم بيك ولا بحالك
ولا هيسأل عنك و يفتقدك
ولا هيروحلك بالمشوار عشان يشوفك
و لا هتلاقيه فجأة ف يوم بيستناك  
و لا حد هيطلب منك أى حاجة
و لا ف يوم هيحس بيك 
فأنتا كمان تبطل تحس بأى حد و بأى حاجة
وتبطل تتمنى أى حد و أى حاجة 
و هتبطل تنشوى ف نارك و اللهيب
و هتكون والعدم واحد
وصدقنى وقتها 
هتكتشف ان القعدة ف جبال التلج
هيا فعلا الحل المثالى و الوحيد
لأن هناك أحسن
هناك أحسن

------------------------------------


إحـــــنا بتـــوع الأتــوبيــــــس  

Posted by: فاتيما in









فاكرين قصة زرقاء اليمامة ؟
الست ام عيون تجيب التايهة دى 
واللى شافت رجالة القبيلة اياهم
اللى منفسنين من قبيلتها 
و لمحتهم جايين متخفيين ورا فروع الشحر 
عشان  يهجموا عليهم 
وراحت حذرت اهلها فمحدش صدقها 
وبعدين جم الأخوة الزعلانين دول
طربقوها على دماغ قبيلة زرقاء اليمامة
 و اقتلعوا عيون الست الغلبانة 
 وكانت ليلة فحلوقى ... فاكرين ؟



أصل وانا ف اعدادى درست القصة دى
 ف منهج العربى
ولما المدرسة بتاعتى شرحتها و خلصت 
قالت كالعادة حد عنده أى سؤاااال ؟
فطبعا اختكم مقدرتشى تمسك نفسها 
و رحت رافعة ايدى !



- نعم ؟
- هوه حضرتك زرقاء اليمامة اتعمت صح  ؟
- صح !
- طب لما عارفة 
ان الاعداء جايين ليه مهربتشى ؟!!
- تهرب تروح فين ؟
- أى حتة معرفش 
- لكن هيا اختارت تقعد !
- أيوه بس دا ميعتبرش غباء ...  ؟!!




طبعا مفيش داعى أكملكم 
ازاى ردود أفعال زميلاتى ف الفصل
 انقسمت 
جزء مع المدرسة وكانوا بيبصولى
على انى قليلة الادب وبقاوح ف الميس
والجزء التانى بيبصلى نظام انجزى
ولخصى ف يومك  
زرقاء يمامة ايه ونيلة ايه 
اللى شاغلة نفسك بيها اياكش تولع !!!



والحقيقة 
ان المدرسة بتاعتى بعد الجرس ما ضرب
 ندهتنى و قالتلى رد صحيح معجبنيش وقتها 
بس دلوقتى اتمنى اشوفها
عشان ابوس جبينها 
واقولها سامحينى وكان عندك حق 
ومعلش 



المدرسة بتاعتى قالتلى ببساطة 
زرقاء اليمامة كان ممكن تهرب 
لكن هيا فضلت تقعد مع أهلها 
وتعيش الخطر و تواجه مصيرها للنهاية 
لعل وعسى يحصل أى خير
حتى لو كانت عارفة ان هناك شر قادم 
بس يا بنتى 
البنى آدم اختيار
و مينفعش ف لحظة يقرر يسيب اهله
 و وطنه ببساطة كدا 
وخصوصا وقت المحن والأزمات 
والا هيبقاله اسم منحبش نقوله !!




على فكرة وقتها الكلام برضو ما أقنعنيش
لأنى كنت ف مرحلة ما عمرية 
انا شخصيا
عاوزة اطفش من وش أهلى 
واروح آخر الدنيا شأنى شأن
كل المراهقين والمراهقات ف هذا العالم 
ثم انى سكتت لسبب تانى أوقع
و هو أنها - المدرسة بتاعتى- كانت فلسطينية 
ودا حسسنى انى بالنقاش معاها
بدوس على جرح 
مش بحكى ف موضوع عام 




وتروح الايام وتيجى 
و افكارى تتغير 
وحبى لهذا الوطن يكبر
 ولما على فترات اكتشف
انه بيبقى مع الحب سلاسل خفية 
 من حرير .. بتقيدنى 
وكل ما كانت تيجى فرصة لأنى
اطفش و امشى 
الاقى السلاسل دى تجرنى بكل رقة 
عشان تقولى مكانك هنا 
و لا مكان غيره 
رغم كل المغريات 
ورغم ان القيد بيخنق وبيوجع وبيدمى 



وفى خضم الاحداث العصيبة
اللى بتمر بيها البلاد للمرة الألف 
دايما اسمع جملة يلعن ابوها  بلد
واحنا عاوزين نطفش
 و نشوفلنا حتة عدلة 
و اشمعنى احنا اللى موكوسين
والبقاء يعتبر مازوخية و تعذيب .. الخ الخ 
وطبعا بحاول أقدّر اللى بيقول كدا
ف ثورة غضبه و حزنه على حالنا



بس اللى بيألمنى أكتر
هوه حكم البعض الموجع 
ونظرته لمحبينولعشاق البهية
اللى اسمها مصر 
و اللى رغم كل قرفها 
وهمها اللى ما تتلم
اهلها راضيين وقابلين ومستمرين
و البعض قد يعتبرهم مثيرين للشقفة 
لأنهم لسه بيحاولوا
و لسه ف وسط الحقارة المتفشية حاليا
.. باقى عندهم أمل  
و أبقى مستغربة وعاوزة أقولهم يا جماعة 
احنا زرقاء يمامة والله وشايفين 
بس احنا اللى مش عاوزين نسيبها 
ولا ينفع نتخلى عنها 
وعن بكرة بتاع عيالنا بلاش بتاعنا !



احنا زى ما نكون راكبين اتوبيس 
وصحيح الاتوبيس المذكور
انقض على كرسي سواقه
اخوان الغبرة بمساعدة امريكا
والجيش و السلفيين و الغلابة و عاصرى اللمون 
 لكن ... أهو دا اللى صار 
مش هتشنقونا ميت مرة بقى !



و صحيح الاتوبيس اللى بيسوقه 
شوية الرعاع
و مودينا ف سكة سودة اخرها جبل 
و يمكن هنقع منه هنتدشدش
بس احنا مينفعش نسيب الاتوبيس


و صحيح اننا راكبينه مش بخاطرنا 
لأننا اتولدنا فيه 
ورغم ان عندنا الفرصة ننزل 
زى كتير ما عملوا و طفشوا وباعوا القضية



وصحيح ان الحاصل دلوقتى
 ان السواق الاطبش بيجرى بينا
وناوى يلبسنا ف قطر 
لمجرد انه فهم واستوعب خلاص 
اننا عاوزين نقومه
من قصاد الدريكسيون بأى شكل 
وبالتالى بقى قراره الآن 
 فيها لأخفيها 
ويا نقعد .. يا ننط م الشباك ف آخر ثانية 



وصحيح وارد هنقع ف المحيط  ونموت 
بس ممكن كمان ف آخر لحظة
حد ابن حلال م الركاب 
وبمساعدة الباقيين
نتكاتف و نسيطر كلنا ع السواق 
و ع اللى راكبين معاه
وننقذ الاتوبيس بلى فيه من كل الاطراف 
و ساعتها 
وف الغالب
هنرجع لنقطة الصفر من تانى 



ممكن آه 
وممكن لأ 
ومنلحقش فنخش ف الحيطة 
كل الاحتمالات واردة
 ومعقولة 
لكن احنا لسه ف الاتوبيس
 ومكملين بإختيارنا مش غصب ولا غباء 
عشان شايفين 
ان هوه دا الصح
 ولو كان اختيار رومانسى ... ساذج ... عبيط 




واذا كان فيه قط متوحش عمال يدوس
 ف النمل تحت رجله 
والنمل صعبان عليكم انه بيموت فطيس 
فمعلش 
خلى النمل يفضل يقرص ف القط
ويزحف على كل حتة ف جسمه ويقرفه
ويعكنن عليه عيشته ويدخل ف طبق أكله 
و يزحف لحد ما يوصل لودانه
و لعينه و يوجعه فيها
فيغمضها ألما 
و يمكن ف لحظة عمى
تيجى دبابير و تقرصه القرصة الى هيا 
 و تشل حركته تماما
 ويضطر القط ساعتها انه ياخدله ركن
ويبطل بعد كدا يدوس على أى حد



أرجوكم
أدوا النمل فرصة 
و سيبوا لركاب الأتوبيس شوية أمل
و احترموا اختيار زرقاء اليمامة 
حتى لو مش عاجبكم 



وصدقا زى الأغلبية
معرفش يوم 30 يونيو هيكون شكله ازاى 
بس اللى اعرفه ان المعادلة اتغيرت 
وكل اللى كان موجود بعد يوم 11 فبراير
مبقاش موجود بنفس قوته دلوقتى 
لا القوى على اختلافها هي هياها 
ولا النخبة بنفس الشكل والتوزيعة 
ولا حد عاد ينخدع ف حد 
والوشوش انكشفت
مرشحى رياسة و ساسة واعلاميين وغيرهم 
وخلاص كدا وصلنا للمواجهة وش
ومبقاش فيه لا سلمية و لا طبطبة 
وكله وقت الجد هيتصرف
من غير ما يعمل حساب لحاجة
فقد هرمنا  



الوضع إختلف
والظروف اتغيرت 
والناس نضجت عن الأول 
 والمرة دى نتيجتها ممكن تكون ف صالحهم
بس هما يثقوا ف روحهم وقدرتهم 
على ازاحة السواق بجماعته 
والمرة دى يسوقوا هما
وميسبوش حد يقعد تانى غيرهم 
لا أبو البيادة ولا غيره 



والأكيد ان الداخلية والجيش 
مش مع الشعب مهما قالوا العكس  
و يمكن اللى لسه زى ما هوه
ان اللى نازلين على اختلافهم 
متفقين على هدف واحد
هو اسقاط مرسى وجماعته 
زى ما اتفقوا زمان
على اسقاط مبارك وجماعته 



و رغم ان قواعد المنطق بتقول
ان  المعطيات المتشابهة
تؤدى الى النتائج المتشابهة  
والمنظر بيحتم عدم التفاؤل 
الا ان تاريخ البلد دى يشهد
انها ف اوقات كتير 
بتخرج عن حدود المنطق و بتعدى الخيال 
و بيطلع منها اللى محدش يتصوره 
وخلينا متفائلين 
دا لولا فسحة الامل 


و انا وغيرى قاعدين ف كراسينا مش نازلين
 و لا ناويين ننزل غير 
يا إما العمر يخلص
يا إما نوصل لآخر الخط  
و ... احنا بتوع الأتوبيس يا إخواااااانا




------------------------------

وها أنا في ساعة الطعانْ
ساعةَ أن تخاذل الكماةُ .. والرماةُ .. والفرسانْ
دُعيت للميدان !
أنا الذي ما ذقتُ لحمَ الضأن 
أنا الذي لا حولَ لي أو شأن 
أنا الذي أقصيت عن مجالس الفتيان 
أدعى إلى الموت ولم أدع الى المجالسة !!
تكلمي أيتها النبية المقدسة
تكلمي .. تكلمي 
البكاء بين يدى زرقاء اليمامة

----------------------------