.

.

ام طابور الامهات ....  

Posted by: فاتيما







قالك عملنا ثورة 
عشان نشيل مبارك
 قوم فلوله راحوا مسلمينا للعسكر 
و جه العسكر قام عاككّنا ف الإخوان 
و الاخوان حاليا هيلبسونا ف العسكر 
عشان العسكر يرمينا ف حجر الفلول 
من تانى 



وأمرا المماليك كالعادة بيتصارعوا  
و كل واحد فيهم بيلم جنده واتباعه والاضيشه
والشاطر اللى ميغلبش بالقوة 
 هيغلب باستمالة الحرافيش 
و البقاء للأوسخ والأكثر وضاعة 
و من عسكر لاخوان لفلول 
يا مصر لا تحزنى
اتغطى وانا هصوت عليكى بس 



و للامانة ..
 على قد كرهى للعسكر
لكن الاخوان اطلاقا مش صعبانين عليا 
لأنهم بالوساخة بتاعتهم 
رمونا للمصير الأسود و مهبب
و كفاية اننا لسه بعد ما نخلص منهم
هنبدأ شوط جديد مع ابو البيادة 



السيسى لعبها صح
و مقدرش ألومه 
اللى يلاقى بلد كدا لوزة مقشرة  
يبقى الف حمار لما يسيبها 
و مش صعبان عليا ف كل الفيلم دا 
الا الناس الغلابة ... الطيبة اللى نزلت 
و هيا فاكرة انها بترجع بلدها
اتاري بلطجى بيستغلها كالعادة 
عشان يخلص من بلطجى تانى 
و على رأى المثل متفرحوش ف اللى راح 
الا اما تشوفوا اللى جاى 
والجاى شيكله هيبقى هبااااااب




احنا غلابة قوى والنبى 
 كل ما حد يعمل علينا فيلم 
نصدقه و نفتكره وطنى
 و خايف يا نضرى ع البلد 
حقا .. احنا شعب لقطة ومفيش زينا 
قاعدين يلعبوا بينا 
دورى وكاس ودورات رمضانية 
ويا مصر طول عمرك كورة 
و الفراودة الأوغاد أكم



و شوية يقولوا ثورة 
و حبة يقولوا انقلاب 
و شوية يقولوا الخروف مرسى لازم يرجع 
وشوية يقولوا ادوا لمولانا السيسى
 صلى الله عليه وسلم التفويض يا ولاد 
و شوية يقولوا نعمل مصالحة مع الكلاب 
و شوية يقولوا لأ احنا نولع فيهم   
و شوية ف حزب طفوا النور 
يقولوا أصل الوزير دا مش مريحنى 
انا حاوز أقعد هناااااااااااك 
وشوية يقولوا لأ بقى الوزارة دى زى الفل 
 و حلوة جميلة يا عاطف




و قطعوا دول 
على دولا 
على دولم 
على دولهما 
الكل كليلة 
انا مش مضطرة انجس ايدى 
بدم حد لمجرد ان حد حاططنى عمدا 
ف حالة هلع 
مش متأكدة انها كلها من صنع طرف واحد 
 ومعلش محدش فجأة بيبقى ملاك
لا العسكر ولا الاخوان ولا الفلول ولا غيرهم 
 فعلى امهم يعنى كلهم مهروشين
واللى ربى خير م اللى إشترى 




و عشان ميجرليش حاجة 
واشيل ف نفسى بعدين أنام مقومشى 
 ملعون أبو جماعة الأخوان 
على ام كل اتباعهم الخرفان اللى مبتفكرش
 ع ام باقى الأسلامجية الاوساخ 
و ملعون أم العسكر 
على ام امريكا 
على ام التنظيم العالمى 
على ام المليارات اللى مش ببلاش 
على ام الداخلية البلطجية 
على ام كل البلطجية ف كل فصيل 
على ام البرادعى 
و ام حمدين و ام ابو الفتوح و ام موسى
وام كل الأحزاب 
و بتوع السياسة 
على ام الأعلام اليمين و الشمال
على أم كل نشطا السبوبة
على ام صندوق الانتخابات 
على ام الدستور 
على ام البرلمان  
على ام دى ثورة و لاّ انقلاب 
 على ام كل النظريات والمزايدات 
على ام البراءة و النقاء و مكنش قصدى 
على ام دى ثورة
 و على امى انا عشان فكرت ف يوم 
ان الناس لما هتعمل أى خطوة لقدام
ممكن فعلا حد يسيبها 
تغير أى حاجة ف .... ام البلد دى 


---------------------------------

خـــــطــاريـــف ..... 27  

Posted by: فاتيما in




إمتى الزمان يسمح يا جميل


عبد الوهاب



 الحب في كل زمان و في كل مكان

 ولكنه يشتد كثافة كلما اقترب من الموت

غابرييل غارسيا ماركييز




...............



أنا قطر الميري 

دماغي تشيط 
و نشيط 
في الخدمة و أومباشي
فوق كتفي شريطة و تحتي شريط
و يزيد الحمل .. لكن ماشي
ماشي على مدق .. لكن ماشي 
عضمي بيندق .. لكن ماشي 
و لا قولتش لأ .. لكن ماشي 
و لا قولتش ... آه
فوق القضبان ماشي اتطوح 
زي السكران الطاطورة 
معرفش أنا جاي و لا مروح 
لما بتسحبني المقطورة
صواميلي تفك .. لكن ماشي 
أربطها تحك .. لكن ماشي 
وانا ماشي بّزك ..لكن ماشي 
وكله على الله

محمد بهجت  


  



هذا زمان الحيرة 

و سيادة الشك و فناء اليقين

جمال الغيطانى - الزينى بركات



طب بجد جميل راتب طول عمره قمر





و سيبك م النهاردة و بكرة
و احكى يا شهرزاد  عن زمان 
و اللى كان 



 دور طاولة رئاسى  


إرجع يا زمان

 حِنْ يا ماضى
إيام الحب ما كان .. عادى 
ولا كان الشوق للناس تهمة 
ولا نظرة عين وحنين أزمة
ولا عقل الناس خاوى وفاضى 
حِنْ يا ماضى

لؤى



و السؤال



يا ترى اللى بيعيش الزمن احنا 
ولاّ الزمن هوه اللى بيعيشنا ؟؟!


على الحجار



الزمانُ مكانٌ سائلٌ و المكانُ زمانٌ متجمِّد



ابن عربى



كل حاجة ف الدنيا

 إنوجدت لسبب


مثل البحر 

مثل الزمــن
 فيكِ غَرِقَ كل شيء

بابلو نيرودا





 قدرها تكون عروسة بحر
متقدرش تعيش ف دنياه



ثأرها مع الزمان معضلة بلا حل 

رضوى عاشور - الطنطورية 




................





و بقيت أنسى المطلوب منى 
و أفتكر اللى مش عاوزة أفتكره أصلا

  
لقد حاولت أن لا أؤذي أحدًا
لكن الزمان كان مؤذيًا لنا جميعًا 

محمد المنسي قنديل- قمر على سمرقند




أَلَمْ أَقُلْ إِنَّكَ لَن تَسْتَطِيعَ مَعِيَ صَبْراً 

سورة الكهف



و قولت يا ريت
لا كنت كبرت ولا اتمنيت
وقولت يا رتنى فضلت صغير زى زمان 



لو ان الزمان لا يكون 

بهاء طاهر - الحب فى المنفى 



وحاسة انى كبرت قوى 


تعريف الاكتئاب :
أن يتوقف الزمن عن الحركة
 لتعش أنت في السجن 
الذي لا يراهُ الآخرون حياةً مؤبدة 

عمرو صبحي -يوميات كهل صغير السن


 إذا لم تكن لي و الزمان شرم برم
فلا خير فيك و الزمان ترللي

شاعر  مجهول






حتى ان لقيت ان بعادى 
راح يسعدك ... إبعد عنى




قَالَ أَلَمْ أَقُل لَّكَ
إِنَّكَ لَن تَسْتَطِيعَ مَعِي صَبْراً

سورة الكهف 


الوهم احيانا نعمة 



ربما كان الوهم أنفع من الحقيقة

 فلو أنّ الإنسان 
عاش على الحقيقة وحدها
لفني منذ زمان بعيد 

علي الوردى


يلى بتسأل ع الدفا

وحشك دفا أيام زمان
وقت الأمان
لما كان لسه الدفا
ماشى يخبط ع البيبان
سنين طويلة
وانت بتدور عليه
ولسه بردو مش لاقيه
اسمعنى بس هقولك ايه
عايز الدفا يرجع دفا
يملى البيوت والأرصفة
عمر الدفا ما كان بالهدوم ولا بالجيوب
الدفا مكانه الحقيقى فى القلوب

أحمد فايد - حالة ضبابية



و الست بتقولك



عايزنا نرجع زى زمان ؟

قول للزمان .. إرجع يا زمان 



يعنى رجّع زمانك 

يقوم كل ما راح يرجع
بسيطة خالص جدا أهو .. إيه ؟!



كل شيء يهون كما تهون المسافات

 الزمن يمشي على كل شيء

مصطفى محمود - عنبر7




كيف يمكن أن يكثف وجود إنسان ما

الزمن و الحياة لهذه الدرجة!

عزالدين شكري فشير - مقتل فخر الدين



ازاى بجد .. ؟!!



أحبك 
قبل أن أحبك
أحبك منذ أن كنت مجرد فكرة في هذا الكون
 أحبك خارج الزمن الذي يجمعنا
أحبك في زمن لم يعد لنا
 أحبك للأبد

محمد الأشعري - القوس والفراشة


في أحيان كثيرة يقودك الزمن إلى منعطفاته
 ويشبعك ركلاً
فلا تقوى على التألم

عبده خال - الأيام لا تخبئ احدا


 طب ينفع يخترعولنا حاجة لما
ندوس على زرايرها
 نسّرع ف اللحظات الزفت 
ونثبت لحظات الفرح و لو حبة صغننة !؟!



عاوزة انسى كل اللى وجعنى
و طلع ميستاهلش
انسى ناس و احداث واماكن
بس ...
مش عايزة انسى أى وجع منك إنتى 


كوني ما شئتِ
 ليمسخ الإهمال صورتك
 ليقس الضنا على محياك
 بل فليشوهك الزمن الذي لا يرحم
 فأنتِ أنتِ عندي آخر علمي
وذوقي 
ومنتهي تجربتى

يحيى حقي - قنديل أم هاشم


تسمحيلي أقطفك من جنينة زمان


أحمد حداد - دولاب الهدوم



أعتقد ان الجنة زمان و ليست مكان
هى زمان القرب من الله تعالى 
هذا هو مفهوم الجنة 

أحمد بهجت




بيتجاب منين .. ؟!!




قَالَ لآ تُؤَاخِذْنِي بِمَا نَسِيتُ
وَ لآ تُرْهِقْنِي مِنْ أَمْرِي عُسْراً

سورة الكهف 




أبوس الجدممممم



يا ناكر خيرى 

بكرة تعرف زمنى من زمن غيرى !

مثل عامى




لا تصالح

ولو وقفت ضد سيفك كل الشيوخ
والرجال التي ملأتها الشروخ
هؤلاء الذين يحبون طعم الثريد
وامتطاء العبيد
هؤلاء الذين تدلت عمائمهم فوق أعينهم
وسيوفهم العربية قد نسيت سنوات الشموخ
لا تصالح
فليس سوى أن تريد
أنت فارسُ هذا الزمان الوحيد
وسواك .. المسوخ! 

أمل دنقل  





كل جماعة لا تتطور
 ولا يعتريها تغيير في حدود الزمن
 تخرج بذلك من التحديد الجدلي لكلمة (مجتمع)

مالك بن نبي



و بكرة الدنيا هتبقى غير 



الزمن القادم ستصبح فيه قوة الفكرة
 أقوى من فكرة القوة

 أحمد عبد العليم 



زمان الضحك كان على الدقون
الآن الدقون بتضحك علينا

أمانى الحلاق




إلى حين ... بتضحك إلى حين



 هذا زمن الحق الضائع

لا يعرف فيه مقتول من قاتله و متى قتله

صلاح عبدالصبور




الله كاشف 

(اكتر كلمة قريتها من 30 يونيو لحد النهاردة)




من حكم عبد الله بن مسعود :
 يكون في أخر الزمان أقوام
أفضل أعمالهم التلاوم بينهم يسمون الأنتان
الأنتان : جمع نتن 

ابن قيم الجوزية - الفوائد



بص هقولك ... م الآخر

أنا عندي عربية
ماركبتهاش
و معايا فلوس مكسبتهاش
و جوزوني بنت حلوة محبتهاش
و إشتريت بدلة جديدة ملبستهاش
كسرت الحمام وغيرته
محستش بأي إنتعاش
خدت بعضي علي جنب
وكان يوم حر .. رطوبة
و قُلت لروحي إيه ياعم انتا طوبة !
قاللي لأ
يا صاحبي دي حسبة و محسوبة
أنا أصلي زمان
لمست قلبي
غنوة حب جميلة 
لكن يا خسارة محضنتهاش

على سلامة





 و دايما ف كل خرابات البلد دى 
يطلعلنا عفريت 
و دايما ف كل زمان يطلعلنا فرعون 



إذا أبصرنا مواضع الخطأ فى الماضى
 عرفنا كيف نتجنب
الانزلاق إليها فى المستقبل 

محمد الغزالي - تأملات في الدين والحياة




بس مين يعرف 

ومين يسمع 
ومين يشوف
ومين يقدر ... 
و الكل مشاريع فراعين قادمة بأمتياز ؟!!




نعيب زماننا والعيب فينا 
و ما لزماننا عيب سوانا
و نهجو ذا الزمان بغير ذنب 
و لو نطق الزمان لنا هجانا
و ليس الذئب يأكل لحم ذئب
 و يأكل بعضنا بعضا عيانا 

الإمام الشافعى




لماذا يقسو الزمن على الجميلات .. أكثر ! 

خالد الباتلي - ليتها تقرأ




ليه صحيح ؟



يعنى ايه نضجت ؟

يعني اللي كان بيحرق دمك زمان
دلوقتي بقيت شايفه عادي
ياسمين ثابت




و الواحد فعلا
بقى عاوز يقولها لحاجات كتيييير 




...............................


 تشوف نفسك بقى يا والدى - 
  أيوه أشوف نفسى -  
يعنى اعمل ايه يا سوسوووو ؟ 
يعنى تحجججج يا بابااااا -



بشوف افلام عن الدنيا و عن حكايات

لناس عاشت حاجات تانية
و عن حكايات لناس ماعاشوش
و بتأثر و بتحسر 
 ع كل اللى كان ممكن أكونه
 بس ما بقيتهوش

مصطفى ابراهيم - المانفيستو



معلش 




جمح الزمانُ فلا لذيذٌ خالص
 مما يشوب و لا سرورٌ كاملُ 

أبو الطيب المتنبي



يمكن ف يوم نعيش الحكايات دى
و الأرواح تتلاقى
و الزمن ميبقاش عائق ... مش يمكن ؟



إذا كان من الممكن

 أن يتراسل الناس عبر المسافات
فلماذا لا يتراسلون عبر الزمن كذلك؟ 

أهداف سويف (The Map of Love)




لو حصل و عملوا ترياق

عاوزة برضو أقابلك ف الزمن التانى 
و تبقالى فيه ... حبيبى و كل شىء


كأن الناس يصيرون عشاقا 
لحظة تعارفهم

ثم تتأكد تلك الحقيقة مع الزمن أو تتلاشى 

غادة السمان




و شكلى هفضل مش عارفة الحقيقة 




قلتَ لي يوماً :

أنتِ تعلقت بي لتكتشفي ماتجهلينه
 و أنا تعلقت بكِ ... لأنسى ما كنت أعرفه !

سناء البيسي - أموت وأفهم



الكلام لو يعبّر ع الحنان

كنت قولت انى بحبك .. من زمان

شيرين




يا وجع قلبى 

يا حبيب قلبى 
إخرج من قلبى 
عشان لما ينوجع قلبى 
متنوجعش معاه 



قَالَ هَذَا فِرَاقُ بَيْنِي وَبَيْنِكَ 
سورة الكهف





الاكثر وجعا هو ما امتلكناه برهة من الزمن
وسيظل ينقصنا إلى الأبد

احلام مستغانمى - الاسود يليق بك





...............



طب محدش ييجى 

ناحية البطاطساية دى بقى


ومنين بيجي الشجن
من إختلاف الزمن


من يمتلك خريطة لوقائع الزمان الآتي
 يعرف كيف يتفادي فخاخ العمر

 محمد المخزنجي- أوتار الماء




و مين بيعرف ؟!




تنحني لـ يمر الزمن فوق رأسها
دون أن يراها

سعدية مفرح




محتاجة اتعلم مقفش ضد الريح 

وأبطل عِندْ 




اصبر ... الفهم لا يتيسر إلا مع الزمن

نجيب محفوظ - ليالى ألف ليلة



وتقريبا الزمن و الصبر حاجة واحدة

و مينفعش نعدى بواحد فيهم
من غير ما ندوق التانى
و دى غالبا الحكمة 



يا حكمة زمان 

مافهمتهاش غير دلوقتي
و يا حكمة الآن 
هتبان ف يوم بعدين
لو كنت عارفك 
مكنش ضاع وقتي
و لا كنت أعيش ندمان 

نورا خشبة



زمان




زمان يعنى 




يعنى جدتى 

و الأمان ف حضنها
و الدلع و الحنان الصافى 



 يعنى حينا و حتتنا و منطقتنا

 و أول حب لأبن الجيران
و الجرى ف حوش المدرسة
و اول حرف وكلمة  ف كتاب القراءة

و تعليق الزينة كل سنة ف الفصل



يعنى الفرحة بأبسط الاشياء

و الزعل اللى بيروح بعد 3 ثوانى



يعنى شكل الشوارع و البيوت و المحلات 

و بهجة الأعياد و المناسبات 
و الرحلات و فسحة جنينة الحيوانات 
و مرواح الملاهى و السينمات



و مسرح العرايس :)




سينما الاطفال كل جمعة 

و بقلظ و شقاوته 
ميكى وسمير وماجد
و لاكى لوك واستريكيس واوبليكس وتان تان 



يعنى الكتب

 اللى هشتريها من معرض الكتاب
و لوحة الموناليزا المتعلقة ع الحيطة
و بشوفها من يوم ما وعيت ع الدنيا 



يعنى بنها 

و بلكونة ف بيت ستو اللى انولدت فيه
و يعنى اسكندرية ف الصيف و البحر 
و يعنى اسماعيلية و الهدوء و الشجر 
و مكتبة بابا المتروسة لحد السقف 



يعنى الأفلام و المسرحيات 

 الحوار و اللزمات و الكلمات و الأغنيات
و المشاهد و قصص الحب
اللى واحدة فيهم هتكون بتاعتى لما اكبر



يعنى سعاد

بعيونها و رشاقتها و جمالها 
و اغانيها و رقصها و فساتينها و جرأتها
و شقاوتها و حزنها و حكايات حبها 



و فوزى ... حبيبى ف زمن تانى




يعنى الاغانى 

اللى كل واحدة فيها ليها ذكرى
للحظة من عمرى راحت 
وبترجع ف ثوانى لما بسمع الغنوة 



يعنى حاجات مبقتش بتستخدم

  زى شرايط الكاسيت و الفيديو و الديسكات



يعنى لما تستنى ف جوابات 




يعنى لما ترفع السماعة 

و انتا متعرفش مين اللى ع الخط التانى  !



يعنى تتفرج على تليفزيون

 من غير ريموت 



و تحفظ صّم الاعلانات 

و تقعد مخصوص تستناها

 


يعنى و انتا بتسمع الحلقات 

و برامج الأذاعة و تبقى بتطير بجناح خيالك 
لحد ما تروح ف النوم




يعنى بابا 
و اللى معرفتوش الا متآخر 



يعنى ماما .. ماما ... ماما 

و يعنى هانى اخويا الكبير 
و أقدم صديق ليا



يعنى ماجد 

اللى هوه إبنى 
قبل ما يكون اخويا الصغير



يعنى يوسف 
يوم ولادته

و انا باخده ف حضنى 
و مكنتش أعرف أى حاجة ع اللى جاى 



زمان يعنى كل أصدقائى 

من ابتدائى لأعدادى لثانوى لجامعة
لشغلى لمدونتى لتوتير و حضنهم الوسيع 




يعنى كل الحاجات
وكل الوشوش اللى بتفكرنى بنفسى 
 لما كنت فاكرة ان بكرة
الدنيا هتبقى بين إيديا 



الذكريات هي الشيء الوحيد

 الذي يمكن أن يتغلب به البشر على الزمن
 لأنهم يؤكدون لأنفسهم بها
 أنهم لم يكونوا مجرد عابرين لهذه الحياة 

أبراهيم نصرالله




و يبدو ان غلاوة الذكريات 

سببه ف انها انتهت و بقت ماضى
 محدش هيقدر يغيره ابدا ف خيالنا 



الأحبة هاجروا

 أخذوا المكان و هاجروا 
أخذوا الزمان و هاجروا

محمود درويش




و الزمن عدى من قصادنا يا ولاد

و احنا مش أخدين بالنا و لاّ ايه .. ؟!!



و قعدنا نقول لقد هرمنا

هرمنا
 هرمنااااااااا 
لما هرمنا بجد و ... 



آه 



و بيكا ... روبابيكا 

اللى عاوز يشترى ذكريات قديمة للبيع



وحشتني ايام زمان

 ايام النشا والخيط 
وشوية اللخابيط مع حبة الألوان
ايام الورق في الحيط 
ونعلقه بتنطيط 
من بلكونة لبلكونة 
وبأفكارنا المجنونة 
نعمل زينة رمضان 
وف وسط الزينة فانوس 
 معمول بورق سلوفان 
منور كل البيوت 
 ومزين كل الحيطان 

إسلام جاويش




عندما يظفر قلبك بضالته

سيجد نفسه خارج أسوار الزمان والمكان 

نجيب محفوظ - الشحاذ




حاضر

أدينا بنحلم و بنصبر و نتحمل



يمكن نخرج يوما ما 

من حبسة الدنيا 
.... للحرية



عجبي عليك .. 
عجبي عليك يازمن
يا ابو البدع يا مُبكي عيني دماً
ازاي أنا اختار لروحي طريق
و أنا اللي داخل في الحياة مرغما

صلاح جاهين





كل سنة و انتوا طيبين

.....


دوس هنا  


.........................

----------------------------------------

الصور من عند shazouli
من صفحة بنات ع الفيس
من مواقع الجرايد الإلكترونية 
و النت و المدونات و طبعا تويتر 

---------------------------------------