.

.

لو كنت  

Posted by: فاتيما






لو كنت ف مكان البلتاجى
كنت هتمنى أفضل فى وهمى 
كنت هفضل مصّر انى الصح
و كنت هرفض أرضخ لقناعات أخرى  
و لا هصدق أى  حد 


لو كنت مكان البلتاجى 
كنت هدعى ربنا طول الوقت 
يخلينى ف ضلالى 
و ميفوقنيش 
عشان لو فقت 
و فكرت هلاقينى أدركت
هعرف انى جّريت مئات الأبرياء ورايا 
وسوقتهم للدبح على ايد جزارين 
انا عارف كويس انهم كانوا منتظرين اللحظة دى 
لكن مهتمش و مفكرتش 
مبصتش كويس غير لنفسى 
و خدتنى اوهام الزعامة و شهوة السلطة 
و موقفتش انهار الدم 
ورويت بيها عطش كل الوحوش 


لو كنت مكان البلتاجى
كنت هدعى اكون تايه ف ملكوتى 
عشان لو صحيت  
هلاقينى ارتكبت ابشع جريمة
و قتلت أعز الناس على قلبى 
كنت هلاقى دم أسماء مغّرق ايديا 
لأن زى ما القناصة قتلها 
انا كمان هكتشف انى ساعدته 
 لما خلتها تكون ف مرمى نيرانه 
 و ضحيت بيها عشان اصرارى وعنادى


لو كنت مكان البلتاجى  
كنت ف لحظة ما هكتشف كدا 
 هلاقى قصادى حاجة من تلاتة 
يا أتجنن و تجينى لوثة 
.. يا أنتحر عشان معرفتتش اتجنن 
.. يا هجبن انى اموتنى و هضطر اعيش 
و ساعتها 
هبقى مش عارف أعمل ايه ف نفسى 
ولا هبص ف وش امها واخواتها والناس ازاى 
مش شدةالعذاب 



ربنا يرحم أسماء
ومثواها الجنة بإذن الله  
هيا و مئات الأبرياء اللى زيها
و ربنا ما يفوق البلتاجى  
 و الحمدلله ...... انى مش ف مكانه

-------------------------

الدم لعنة يا اخوان 
 الدم لعنة يا عسكر 
 الدم لعنة يا داخلية 
 الدم لعنة يا اعلام 
 الدم لعنة يا ساسة
 الدم لعنة يا كل واحد 
حرض برىء أعزل على نزول 

-----------------------------------------  

This entry was posted on السبت, أغسطس 17, 2013 . You can leave a response and follow any responses to this entry through the .

13 كــــلام بيطــبطـــب عـــلى قــــلبى و روحــــى



و السؤال



كام واحد قدر
وهيقدر الأيام دى
يبقى زى احمد سبع الليل
لما عرف الحقيقة
بعد ما كان مغسوله دماغه
فيقرر بعد الفوقان
انه ميبقاش وحش أو خروف
وأداة للقتل
ولعبة ف إيد القيادات
و الناس بتدور على سلطة
ومناصب هنا ولاّ هناك
وبس ..
كام واحد قدر
وهيقدر يبقى نضيف للأخر
ويحافظ على نقائه
وميموتش هباء
كام ... ؟



الله يرحم أسماء
ويرحم كل برىء ف هذا الوطن




السؤال
مين صح
مين غلط
مين ظالم
مين مظلوم
مين له حق
مين له دين
مين فينا داين
مين فين مديون
مين الي قال انا مش مسؤال
مين قال انا عايز كرسي ومش مهم كام واحد يموت
مين قال أنا وبس ومن بعدي الطوفان ياخد ولادي
مين قال مش مهم ولادي...؟!
مين قال مش مهم بلد
مين قال مش مهم دين
مين قال ان ده صدق
مين قال انه كدب
مين قال انها الحقيقة ....
مين قال ان في بلدنا وبلدهم
مين قال ان مصر ممكن تكون ....جزء ..وجزء مفقود
مين قال ان مصر ليهم مش لينا
مين قال مصر ممكن تكون
عراق تاني
ايران تاني
سوريا تاني
فلسطين تاني
مين قال ....؟؟؟
الله يرحم جميع موتانا
والله يستر علي مصر
بدعيها بكل صلاة وكل وقت

فاتيما

روح القلب الملائكية

منك لله يا فاتيما
قلبتى عليا المواجع

مبقاش منظر الدم يهمنى
مبقتش صور القتلى تهزنى
خلاص علمتونى البلادة والتطرف
اقدم لكم نفسى حيوان واتشرف

:(
و المطلوب إننا نستسلم ببساطة للإنقلاب لمجرد إن السيسي هو اللي معاه السلاح
لا والله لن نستسلم
أنا ليا ناس أعرفهم شخصياً استشهدوا و غيرهم اصيبوا و غيرهم معتقلين و مع كده مكملين
واله ثم والله لن يحكم السيسي مصر سوى فوق جثثنا فإن إستطاع أن يبيد الملايين المعارضة للإنقلاب فليفعل
منها نكون استشهدنا و خلصنا من الدنيا و قرفها و منها هو يرتاح من المعارضة و يحكم في بلد العبيد الباقيين على قيد الحياة براحته

الشئ الوحيد اللي قاهرني إني مش في مصر و مش حأقدر أنزل قبل العيد الكبير
عايز أموت
أنا مش أفضل من كل اللي استشهدوا
مش حينفع أعيش عبد تحت بيادة السيسي
أنا مش مخلوق للعبودية
يارب يا إما تنصرنا على السيسي يا إما تكتب لي الشهادة بطلقة قناص تآخد روحي في ثانية واحدة

رحاب صالح
--------

المشهد واضح للى عاوز يشوفه يا رحاب
بس كل واحد بيشوف اللى عايز يشوفه وبس

ربنا يرحم كل الأموات
ويقتص من القتلة
ويخرجنا من بينهم سالمين
يا رب

ابراهيم رزق
-----------


طب خدنى معاك يا ابراهيم
انا يشرفنى اكون مطرح القط بتاعى
ولاّ أى كلب ف شارع
ماشى ف حاله
ويا دوب لو داخل ف خناقة
يعور كلب تانى
ويمشى
الحيوانات ف ظروف زى بتاعتنا دى
قد يكون أرقى من الأنسان يا بنى والله


محمد قنديل
---------

مش حينفع أعيش عبد تحت بيادة السيسي
أنا مش مخلوق للعبودية


الله يفتح عليك يا محمد
ويارب
تقول نفس الجملة دى
وبدل بيادة السيسى
تحط كلمة

المرشد والجماعة وكل اللى همه نفسه
قبل البلد
وعاوز يا يحكمها يا يطربقها
على دماغ اللى مش عاجبه افكار
وتوجهات الخونة المسلمين


ربنا يحغظك من كل شر
مش ناقصة أتفجع فيك انتا كمان
كفاية اللى ماتوا غدر
عشان جماعة من الكلاب الخونة
بتتشدق بالدين والمبادىء
وهم الباطل نفسه
ولا يقلوا دناءة
عن العسكر والسلطة



مكناش عبيد عند المرشد اللي ابنه مات يوم الجمعة بطلقتين قناصة في غمرة على فكرة
الشهيد/عمار محمد بديع
مرسي كان جاي بإنتخابات ديموقراطية و كان حيمشي بعد ما مدته الدستورية تنتهي
كان الشعب هو اللي بيحكم من خلال ممثليه المنتخبين
المشكلة كان إن الاقلية المعارضة أم 49 % بتاعة شفيق ما إستسلمتش لحكم الأغلبية أم 51% بتاعة مرسي
و ده ضد الديموقراطية
و قعدوا يتظاهروا و يخربوا و يستدعوا الجيش المتآمر هو المخابرات ضد السلطات المنتخبة
الدستور مر بأغلبية 63% و برضه أصروا إنه لا يمثل أغلبية شعب مصر

كفرهم بحكم الأغلبية و إصرارهم على شئ لزج مستحيل إسمه التوافق بين الجميع هو اللي دمر كل شئ

بصي لكل ديموقراطيات العالم و أتحدى إنك تلاقي حاجة اسمها توافق
فيه حاجة اسمها حكم الأغلية و لو محدش جاب أغلبية فوق 50% بيبقى فيه إئتلاف بين حزبين أو أكتر للحصول على الاغلبية
و الاقلية بتنقاد لحكم الاغلبية و تعارض بشكل قانوني و دسوري مش تسعى لقلب نظام الحكم المنتخب

أنا قلتها من شهرين فاتوا
الاثنين، يونيو 24، 2013

رأيي في الوضع الحالي قبل 30-6
موقفي باختصار يا جماعة أنا معارض لأخطاء مرسي و لن انتخب أبداً حزب الحرية و العدالة تاني في أي انتخابات و غالباً سأنتخب الوسط او الراية
و مرسي لن اقيمه إلا بعد نهاية الـ 4 سنين و على حسب انجازاته و على حسب برامج المرشحين قصاده وقتها حأحدد اختياري
أنا مع إجراء انتخابات مجلس الشعب و الشورى و المحليات بأقصى سرعة للخروج من الدوامة الزفت اللي المحكمة الدستورية الواطية زنقانا فيها
لكن انا ضد خلعه قبل انتهاء مدته لأن كده البلد حتبقى فوضى و المكسب الوحيد اللي كسبناه من الثورة ( الانتخابات النزيهة ) حيضيع و مش حيرجع تاني
و ساعتها حنلبس في حاجة من3
1- ثورة اسلامية جهادية متطرفة
2- حرب اهلية طويلة أكبر من الجزائر و العراق و لبنان
3- سيطرة علمانية مستبدة مع اعتقال كل الإسلاميين و مؤيديهم في السجون و عودة مباحث امن الدولة و التعذيب و التنكيل بالمعارضة و عودة الاستبداد أسوء مما كان

و ساعتها تبقى الثورة ضاعت و ضاع معاها الأمل في العدل و الإصلاح و التقدم بالبلد

فيه 3 وسائل دستورية و قانونية لخلع مرسي أمام المعارضة
1- تكسب أكتر من نصف البرلمان و ترفض تشكيل الحكومة 3 مرات متتالية فيضطر يعمل استفتاء على حل مجلس الشعب فالشعب اللي انتخبها يرفض فساعتها يجبر مرسي دستورياً على الاستقالة
2- تكسب اكتر من ثلثين البرلمان و ساعتها تحاكم مرسي طبقاً للدستور و يعزل من منصبه مؤقتاً حتى نهاية المحاكمة و يحل محله رئيس الوزراء اللي هي حتعينه من الأغلبية بتاعتها
3- تنتظر نهاية مدة مرسي بعد 3 سنين و تهزمه في الانتخابات الرئاسية و بعد ما يخسر و يبقى مواطن عادي تحاكمه على كل ما تتهمه به في الـ 4 سنين بتوع حكمه

غير كده يبقى عايزين البلد تبقى فوضى و تولع حريقة

لكن محدش بيسمع و لا بيفهم و صمموا يدخلوا الجيش في المعادلة و أهو الجيش شغال ذبح في الكل


السبت، يونيو 29، 2013

التوافق :(
عرض مرسي منصب نائب الرئيس على حمدين صباحي و رفض
عرض منصب رئاسة الوزراء على أيمن نور و رفض بعد رفض العديدين للعمل معه كوزراء لمرسي
عرض منصب وزير الشباب على أحمد ماهر مؤسس حركة 6 ابريل و رفض
عرض هشام قنديل على العديدين من المعارضة العمل كوزراء معه و رفضوا
وافقت المعارضة على تشكيل الجمعية التأسيسية الثانية للدستور بل ووقع ممثليهم على الصيغة التوافقية لمواد الخلافية في الدستور بما في ذلك الكنيسة و الأحزاب الليبرالية و اليسارية و القومية ثم لما لم يبق على نهاية عمل الجمعية التأسيسية سوى 3 أسابيع انسحبوا منها بعد أن عملوا بها أكثر من 5 شهور و مع ذلك لم يتم تغيير حرف في اي مادة كان قد تم التوافق عليها قبل انسحابهم
يفرضون شروط لحوار تفرغ أي حوار من مضمونه و جدواه لأنها شروط إذعان و ليست شروط حوار فلو أن مرسي استجاب لكل طلباتهم قبل الحوار فما فائدة الحوار بعدها ؟
إنها معارضة تخريبية تتحالف مع فلول النظام المخلوع و لا تتظاهر سوى بالبلطجة و الخرطوش و المولوتوف و تكثر بمليونياتها حالات التحرش الجنسي بل و الاغتصاب :(

لا فائدة في التوافق مع من يريدون إلغاء إرادة الشعب التي يعبر عنها في صناديق الانتخابات و الاستفتاءات تحت اسم التوافق :)

التوافق عندهم هو أن تحكم الاقلية الخاسرة في الانتخابات و تفرض إراداتها على الاغلبية الفائزة في كل انتخابات

محمد قنديل
--------


متتعبش نفسك يا محمد ف الكتابة
مش هقرى تعليقاتك
ولا اناقشك ف اى سطر فيها
لأنى عارفة انك متحيز لفريق بعينه
وبتنقل عنه كل اخبارك
ومشاعرك
ورأيك
وبتعمل اللى عاوزينه منك
من غير ما تقصد
الحمدلله انى اعرفك شخصيا
وعارفة قد ايه انتا انسان نضيف
بس للأسف
ف وسط مستنقع
وشايفه بستان ...
بس
انتا حر ف توجهاتك اكيد

و مهما حصل
عشان دى تحليلى من زمان
الاخوان أوساخ
لا يقلوا دناءة عن العسكر
ولا كل كلام الدنيا اللى هتكتبه
هيخلينى أغير رأيى يا صديقى ...


نقطة

فاتيما
الحمد لله إننا مش مكانه
أكيد وجعه مش هيظهر دلوقتي
لأنه فاهم إن القضية أكبر
لكن لما يفوق هيكتشف إن القضية في اسماء و اللي زيها..في أمل مصر اللي بيموت بسبب تطرف و أنانية و سفاح الدم مالوش تمن عنده..
ربنا يعديها
نفسي أتفاءل
بس مش قادرة
الجيل اللي مقتول منه آلفات من وقت ثورة يناير لحد إنهارده و أكيد بُكره برصاص جمهورية مصر العربية..تفتكري إنتماءه هيبقى عامل إزاي؟!

شيرين سامى
---------

انا لو مكانك اتفائل يا شوشو
الناس دى بتتكنس
مصر بتلمهم وبترميهم دلوقتى
ف ازبل مقلب
بكرة بتاع ولادنا
احنا بننضفلهم المطرح
وغصب عننا بيطلعلنا تعابين وعقارب
وابشع خلق الله
معلش
كانوا موجودين
بس مكناش بنواجههم
وكان لازم يحصل
لسه فاضل اللى قصادهم
والحرب جولات
ولسخ مخلصتش
نتعب قد ما نتعب
ناخد جنب ونرتاح وهدنة
ونعيد القتال تانى
لحد ما نشوفلها آخر نتمناه
او نموت وضميرنا مستريح
اننا عملنا اللى علينا
اعتبرى الأبرياء دول
ضحايا الحرب
اللى لازم يموتوا عشان يفكرونا بخسة عدونا واننا لازم نكمل
ومنسلمش
ونجيب حقهم

انا شخصيا بعتبر دم اسماء
واللى زيها
ف رقبتى زى دم كل الشهدا
هيا شهيدة البراءة والنقاء
وتصديق التعابين والمشى وراهم عميانى
ربنا يرحمها
ويرحم كل موتانا
وبكرة احلى مهما كان فيه دم
الكواكبى بيقول
الحرية شجرة الخلد
وسقياها قطرات من الدم المسفوك

دم الأبرياء نور ف جبينا
وهنقتص لهم ان شاء الله

http://www.shorouknews.com/columns/view.aspx?cdate=26012014&id=2fceba1d-b989-4213-8687-280b68c130a3
:-((((

إرسال تعليق