.

.

قميص يوسف  

Posted by: فاتيما


 





خبر عاااااااااااااااااااجل 
يوسف بن فاتيما رجع يا رجالة 
آه والله
 يوسف رجع يا عياااال
وهذا المانشيت الرئيسى
وبالأحمر العريض والتفاصيل داخل العدد
:)







وأصل أنا كنت قفلتها خلاص 
المدونة يعنى وقررت أجيب ضرفها من فترة 
عشان تعليق سخيف انكتبلى 
من حد قررت معرفوش تانى 
لأنه بسخافة كمّل على احساس عندى
 كان أسخف وأسخف بأن الدنيا
واللى فيها بقوا يسدوا النِفس
وكفاية اللى شوفناه ف البلد منها وفيها
الكام سنة اللى فاتوا 
وياه ع الناس اللى هوت 
وسقطت من العين والقلب والعقل
وبزيادة غربلة ف الهم ونخله 
وبزيادة اجترار للحزن اللى زاد عن حده 
وكل واحد فيه اللى مكفيه 
حسيت ان روح قلب ماما ممنهاش رجا 
 و الولد خلاص شكله مش راجع 
بزيادة بكاءاً  على الأطلال
لما زعلت اللى حواليا .. عليا 
خلينى واقعية وبلاها احلام 
فقفلتها وقولت هسكت 
واهو عندى مدونة الحكايات 
وشهرزاد يمكن تقول كلام يفيد أو يسّلى
وبس 








الصراحة .. 
كنت بعلم روحى أفقد الأمل 
واقنعتنى بأن أحب إتنين على قلبى 
فارقونى وكدا خلصت طب هستنى ايه ؟!
ومكنتش متخيلة انه هييجى اليوم 
اللى هرجع فيه واكتب هذه التدوينة 
هذا البوست الذى تخيلت انى 
لن أكتبه ابدااااااااا







ومش من كتر اليأس ...لا والله
لكن .. لأنى رغم كل عشمى ف الله 
ولأبعد حد 
 قررت أقفل باب الكلام 
عن يوسف وخليت التمنى بينى وبينه 
بينى وبين ربنا وبس والامنية بقت حقيقة 
يوسف رجع 
مكنتش متصورة انى هكتب الجملة دى 
يوسف رجع 




صحيح بعد سنيييييين وجع وفراق 
لكن ... يوسف رجع 
وألف مليون حمد وشكر يارب 
يوسف رجع زى ما تمنيته 
زى ما استنيته
وفاكرة زمان حد كتبلى تعليق فيه دعوة
حبيتها وخطفتنى ومسكت فيها وكلبشت 
ومبقتش أطلب من ربنا غيرها 
لما ف عز الحزن أقول 
يارب ردلى اللى بحبهم الرد الجميل
ردهم من غير هموم ومشاكل وألم 
ردهم لقلبى فيكونوا نوره اللى مينطفيش 
يارب .... ردا جميلا وإلا فلا 
كان سامعنى 
 ودا اللى حصل 



يوسف رجع زى ما كنت بستناه 
رجع حاببنى 
فاكرنى 
مش زعلان منى بالمرة 
ومكنتش محتاجة حتى انى اقريه 
أى بوست ف المدونة هنا ولا ف مدونته 
مكنتش محتاجة اشرحله وأبررله أى حاجة 
وبالعكس 
هوه متفهم قوى وعاقل قوى وحنين قوى 
واصلا اساسا طفشان من اهل أبوه
 ومعاملتهم القاسية ومش عاوزهم  تانى
واستقتل معايا ف المعركة الاخيرة دى 
عشان يرجعلى رغم كل اللى شافه هناك 
خصوصا اخر ايام قعدها معاهم لما قرفوه بزيادة
 لكن مع ذلك مش غضبان ولا عاتبنى
رجع جميل زى ما فارقنى
رجع مفيهوش شر ولا غل ولا طباع صعبة
وغالبا دا احد اسباب تخلي اهل ابوه عنه 
لأنه مش شبههم 
وانه كان عامل ازعاج 
وهما فقدوا الأمل فيه وزهقوا ..!




التفاصيل كتيييييييير
وصعب اكتبها كلها هنا
بس ملخصها ان طليقى واهله تعبوا 
ويبدو ان ربنا هدهم .. لحد دلوقت
يوسف بقى عبء عليهم 
زائد انهم مش عارفين ياخدوا مننا حاجة 
السخص اللى كان وصل الامانة باسمه
 .. ربنا افتكره
وطليقى متجوز واحدة مورياه الهنا كله 
ربنا يباركلها الصراحة ويقويها 
:)
زائد ان الامراض تكالبت عليه 
من سكر لضغط لقلب ومزنوق ماديا
جدة يوسف بيتخانق معاها طول الوقت 
وخلاص مش طايقهم 
والولد اصلا تم الـ 15 سنة 
ويبدو انهم استشعروا اننا ممكن ناخده
فحبوا تيجى منهم عشان اتنازل عن النفقة 
واصلا مش عاوزة من وشهم حاجة !
و غالبا ما صدقوا فعلا 
لأن طول المفاوضات الجارية الشهرين 
اللى فاتوا كانوا بيصلبوا رأيهم كتير 
بس لما أغلس 
وأصر اخده بورق رسمى ... ويبعدوه 
ويبتزونى عاطفيا 
واتماسك .. يقوموا يرجعوا تانى يرضخوا 
وبعد ملاوعة ونكد وحرقة دم 
اخيرا مضينا الورق ف المحكمة 
وبقى يوسف ف رعايتى
اخيراااااااااا .. ولحد دلوقت
بعد طول عذاب وانتظار 
وربنا يستر ف اللى جاى 
وميحصلش حاجة تانى بقى 



عارفة انى كان لازم اقولكم من بدرى
ومن اول المفاوضات وانا عاوزة اقولكم 
وأفرحكم بالاخبار الحلوة 
بس كل مرة كان يحصل تراجع 
انا كمان اتراجع واكتئب حبة وانزوى
لحين حدوث أى تغيير
وبعدين اقول ...  لأ 
المرة دى غير كل مرة 
هستنى لما يحصل بجد
كنت حاسة فعلا معرفش ازى وليه
انها المعركة الاخيرة 
... قلبى كان يحدثنى 
وبعدين قولت هكتب بوست 
والكل يقراه عشان اصلا لو بعتلكم 
واحد واحدة هاخدلى بتاع  7 سنين ع الأقل
:)






ولما حصل المراد من رب العباد 
ادينا بنكتب اهو 
ثم انى مدينة لـ ..  روح قلب ماما 
 مدينة ليها بإنى اكتب البوست الاخير 
ويكون حلو بعد كل هذا المرار والشجن
ومش كله ضرب ضرب مفيش شتيمة
وكفااااااية 
نكدت عليكم سنين يا عيال 
نفرحكوا مرة من نفسكو 



بصوا
انا مش مستوعبة لحد دلوقتى ما يحدث
عاملة زى اللى قايم من عملية وبيفوق 
مش عارفة افرح بشكل يتناسب 
ويتوافق مع الحدث الجلل 
معرفش يمكن السبب طول الانتظار ..؟
و لاّ عشان لسه قلقانة ومتوجسة خيفة
اهل طليقى أصلهم مبيحدفوش كتاكيت 
وببساطة كدا الحكاية لازم فيها إن ... 
ولهذا لسه متوترين انا واهلى 
لكن ربنا الحافظ ف كل حال 
وأنا اخر حد يخاف من الخسارة 
وأى كان القادم مش هيكون أسوأ 
ونواجهه ويوسف حضنى 
ارحم ما نواجهه ... وانا وهوه متفارقين 







بعترف انى اتغيرت الكام سنة اللى فاتوا
 وبقيت اخاف من نفسى ساعات
واحسن انى بقيت قاسية قوى
مريت باحداث خلتنى اقرر وبحسم 
انى معرفش حد يضايقنى تانى
ومضغطش على روحى عشان حد انانى
والعمر مبقاش فيه كتيرأضيعه
وفيه ناس بحبهم اولى بكل ذرة محبة عندى 
خفت دا يأثر على يوسف لما يرجع
لكن الحمدلله .. محصلش
انا لسه قادرة افرح زى الغنوة ما بتقول
بس المشكلة انى مش عارفة
 اوصف احساسى كفاية




عارفين الامتنان الرهيب الفظيع 
اللى يلكم دا
ويخلى الواحد ف تخمة عاطفية
 وميعرفش ينطق ولا يعبر كفاية .. ؟؟
انا هكذا مش عارفة اكتب وأشرح 
حتى التعامل مع يوسف تحسونى ملخبطة
ومش عارفة احضنه كتير زى زمان 
لأنى حاسة انه بقى راجل وكبر 
زائد انه كمان كسوفة قوى .. قوى 
بس شوية شوية ..
 انا وراه لحد ما هبوظله اخلاقه
والام مدرسة كما قال الشاعر 
وانتوا عارفين احوال التعليم والمدارس 
الأيام دى 
:)


 

حاسة انى لحد دلوقتى 
مش عارفة اقوله هوه وحشنى قد ايه 
بس بحاول بطرق مختلفة قد ما اقدر 
اصلا اصلا انا وهوه بنتعامل
وكأننا كنا مع بعض من اسبوع 
وهوه سافر ورجع .. وكأننا مبعدناش 



طلعلتله كل الحاجات اللى اشتريتهاله 
وهوه غايب .. اللعب وغيرها 
وطبعا كبر على أغلبها 
لكن فيه حاجات عجبته قوى وفرح بيها
وقبل ما يرجع بيتنا عملت حركة تغييرات 
ووضبتله اوضه مخصوص عشانه
وانا ماشية معاه ف الشارع 
بصراحة لحد دلوقتى مش مستوعبة 
انى مبجريش بيه 
وانا خايفة او قلقانة زى زمان
ولما بيندهنى يا ماما 
مبنتبهش ف أول كام ثانية 
وبتنح كدا قبل ما اركز ان النداء موجهة ليا 
وبعدين اخد بالى .. فأرد وأقول نعم
:)




بس برضو مش مستوعبة 
شبهى ازاى .. ؟
الواد - ماشاء الله - نبيه وذكى 
وذاكرته قوية ومش طالعلى خاااااالص 
والمضحك انه اطول منى
أطول حتى من خاله 
بقى بتاع 185 سم يا ثاااااااامح 
ماجد لقيته داخل عليا منفعلا فجأة 
وبيقولى :
 الواد دا يقولى ماجد بس ..  فاهمة
خالى دى مش نافعة بالمرة
خالى مين ... دا هوه اللى خالى .. !!
:) 
 وبيقولى تربيتك ف اسكندرية تمرت 
والولد مش طالع لأبوه ولا اهل ابوه 
طالعلنا احنا اكتر
 ومش واخد منهم غير الشكل
الصراحة موضوع رجوعه 
كان عامل قلق ف البيت 
والكل متوجسين لدرجة انى كنت بفكر جديا
 اخد شقة منفصلة ونقعد لوحدنا 
واجنبهم المشاكل لو ابتدت
 لكن بعد رجوع يوسف وقعاده معانا
الخوف والقلق راحوا .... وبالعكس 
ماما فرحانة بيه جدا وخلاص تقريبا اطمنت
الى حين ... 
ويا ما انتا كريم يارب 




عارفة انكم هتبقوا عاوزين تشوفوه 
وانا كمان عاوزاه يشوفكم 
بحكيله عنكم ف العموم 
لكن نفسى يشوف كل حد فيكم 
وانا مش كاتبة التدوينة دى 
عشان بس أبلغكم الخبر الحلو دا .. وشكرا 
لأ 
انا كتباه أصلا عشان اشكركم .. نفر نفر
لأنه بعد ربنا وكرمه 
بعد ما حاولنا نصبر لحد ما أن الاوان 
لكن فيه سبب تانى ومهم وكبير وعظيم 
هوه انتوا ...
كل حد فيكم دخل هنا ف يوم 
أو على توتير مؤخرا 
وكتبلى تعليق وكلام يشجعنى 
ويطبطب على قلبى 
ويقولى اجمدى يا ست 
ويوسف راجع 
وان شاء الله وهيحصل وهتشوفى







 انتوا 
انتوا ودعواتكم الطيبة 
اللى حفظتلى يوسف من كل شر
لحد ما رجعلى زى الفل وكويس
انتوا اللى اتوجعتوا عشانى وعشانه 
وفضلتوا متحملين الزعل
اللى كان مالى كل حتة ف المدونة
انتوا اللى لحد اخر لحظة بتدعوا 
وتسألوا عنى لما أغيب واجى على بالكم 
عاوزة اكتب اساميكوا كلها 
بس خايفة انسى حد فيزعل
سامحونى لو حصل ..
والألزهماير هيكون السبب 
 :)




كل اللى لما وقفوا قصاد الكعبة 
ورجعوا بعتوا يقولولى دعينالك
 انتوا عارفين روحكم
:)
اللى افتكرونى كل سنة ف عيد الأم
اللى ندهونى بماما  ف يوم
اللى ادونى وضعى ومكانتى وكبرونى 
وقدرونى وحبونى من قلبهم 
والسبب كان يوسف قبل أى حاجة تانية
اللى كتبوا تدوينات واشعار وخواطر ليوسف
ف مناسبات مختلفة
عشان يصبرونى ويربطوا على قلبى 
ويفكرونى انى مش لوحدى 
وانهم حاسين بيا وبيفكرونى دايما 
ان ربنا كريم وقادر وفرجه قريب .. بس الصبر
انتوا عارفين نفسكم 
وانا ممتنة لكل قلب طيب فيكم وقف جنبى
وطبطب عليا لحد ما رجع يوسف
والامهات .. امهاتكن الطيبات يا ولاد 
بوسة على جبين كل ام فيهم دعتلى







انتوا من اول ناس علقت هنا 
وخدت العلقة معايا من اولها ... لحد اخرها
ولحد ما بطلت كتابة  
الناس الحلوة اللى حضنونى
د.زين السبب ف دخولى عالم المدونات
ومنى نبضات الورد والمزيكا والجمال كله
الناس اللى حضرت م الاول 
وعمرى ما بنساهم مهما غابوا 
سيد سعد وارابيسك والاغلبية الصامتة
 وابراهيم معايا واحمد شقير وبستان الكاميليا 
خايف من الحقيقة وحازم شلبى الطيبين
احمد سلامة واحمد مهنى وكريم بهى
خمسة فضفضة ومعتز وجهة نظرى 
اسلام الله الوطن ام الخلول
 شفقة واحسان وغادة عبدالعال 
بطوط حبوب الجميل الشقاوة الحنين 





نيجرووووو حبيبى 
 والكلمة نور مالك الاجنحة 
عم مراكبى نبع الحكمة الصافية 
 ودودا ومى بهاء الشمس والقمر 
استاذ شيرين الرقى والرقة ف شخص 
عسقلانى الاخلاق والطيبة ف بنى آدم
عم فشكول واحمد عبدالعدل  الزمن الجميل
 واحوال الهوى وروفى
وليد عارفة مش عارف ليه ابو مهند
وزيانور ام زياد ونور وبنت القمر :-*
واحلى قهوة بالفانيليا ف النت كله 
شيماء على 


   
والبنات العسولات 
يوم جديد يم يم 
كركبة دماغ فاطومة الجميلة 
ونعكشة نعكوشتى و .... ازهرى 
وميرا وكيارا واسماء نبض اسكندرية 
ودعاء مواجهات واميرة على كوكب
وبنت قلبى وz-diva و غادة محسن 
 وكيكى عووو الشقاوة وميادة قاف ميم 
شيماء احتمال انا وريت يوسف
 اللوحة بتاعتك وازبهل ان دى صورته :)
وsony 2000 و طفلة مش عايزة تكبر
طفلة مش عايزة تكبر وسومة العاقلة جدا 
 وبسمة روح بوس بوس وافكار مبعثرة
منووش وهند مسلم ومبتسمة دايما
وباقى البنات البنات الطف الكائنات



وطابور الامهات اللى وجعت قلبهم
صبصب حبيبتى صبرنى يا رب
أم مالك الغالية وماما زيزى الحنينية
ومحاسن عاوزة اتطلق وريم سعيد
 سبهللة حبيبتى وأم بتول 
 وحماتى ملاك سحر غريب وآبى هانم 
دوبا وكلامها عن الشرنقة
اللى يوسف حبس روحه فيها وطلع صح !
وشاهى القلب وطالعله بنى آدمة 
ومفروسة جدا الليدى 
وشمس نهار المدونات المشرقة 
سكرة اللى ف الانشغال فضلت تسأل
وعاشقة النقاب نونو 
ونورهانتى صعبان عليا حالنا 
وياسمين انسانة ووندا نجمة م السما 



محمد غالية اللى نفسى يوسف يبقى زيه
والشباب الأخلاق اخواتى الصغننين
هيثم السايس وفولتا وشاب فقرى  
ومصطفى ريان ووليد الدوغرى وشريف
ومادو  وعامود نور ومواطن شجاع 
 وليد الدوغرى وخواطر خاطر 
وعمرو تشى جيفارا وعمرو أن نون
وانا الريس بسام ومونتانا ومحمد كمال
وحسنى الجميل الطيب ومحمد متولى 
ونور شريف .. آنوووور :)


وابو حميد الهندزة كلها
وابراهيم رزق بص انتا تعمل حسابك
 على قراية فاتحة اول ما اشوفك 
وساليازادة عروسة يوسف
 رسمى فهمى نظمى
وهانى نط ف الكوز الوتد واخف دم عرفته



اجواز العصافير حبايبى  
اللى حضرت حكاياتهم الحلوة من اولها
محمد الغرباوى وليساندرا سما الجميلة
وعمرو فكرى وريرى الأرق م النسيم
واخيرا محمود بهجت الطيب وسحر الحلوة


اهل الصعيد 
مروة مرمر وحتة الحلويات كاندى 
ومصطفى سيف الجمييل وقصر الرياسة
ودردشة عربى 
وآيوشة وعلا صيدلانية طالعة نازلة 


بابا أبو خالد وايناس نهر الحب 
وكل اهل بورسعيد الطيبة


 

أهل اسكندرية الماريا
اجدع ناس ف الكون 
هنودة راجعالك يا اسكندرية
قلب القطة مارو قطاقيطو
زهراء ولولا 
انجى على ملاك الكتابة الشفافة
لماضة الطف دكتورة ف مصر
والقدر وانا  والحب الجميل
وحنين القلب ام عمر القمر
وبدراوى ... 



خواطر شابة نوجا اطيب اهل المغرب
وريماس الجميلة  

هبة بوبو ارق مخلوقات الله
ووليد كنج توت الغالى
اللى عارفة انهم هيفرحوا قوى 
بالخبر دا 

ستيتة 
وجوايز الصبر .. وصلتنى خلاص 
يا ست السوتيتات 
والبوست اللى كتبتيه عن عمرو
 كأنه بيتحقق بحذافيره عن يوسف !!


خالد ياهمس الاحباب يا اعز أخ قابلته 

ليكتر .. يوسف رجع يا ليكتر 



مون مون موناليزا  وشيرين سامى
داليا ماى كورنر 
وهدى شقيقة الروح 
انتن فراشات وأرواح هايمة
وهتعرفوا من غير ما اضطر انطق بحرف 
اللى جوايا 



رااااااااااااااااااااااامى 
 مش عارفة اقولك أى كلام يوفيك حقك
بجد 



داليا قوس قزح 
انتى اكيد عارفة ان اللى ف قلبى ليكى

نور الدين .. يا غالى يا ريحة الحبايب

مينا :-* على جبينك الطيب
هترجع امتى بقى 
عشان تشوف ابن اختك لايف ؟

فيدو حفيدة عرابى 
والشباك اللى كانت بتقف فيه تكلم ربنا
وتدعى ليوسف وليا 
انا عاوزة افك الشباك دا على فكرة
واخده عشان لسه فاضلى امنية كمان 
ممكن ...  ؟
 :)
ومنار حتة السكر اللى وحشتنى
احضنيهالى قوى 
 

ايهاب .. طائرى الحزين الطيب 
الونس والطيابة الى ملهاش حل 
سنين وسنين وهوه فاكرنى
 وزى النسمة تهل عليا بالخير والمحبة




ومنونااااااااااا يا قلب الملايكة 
وسارة درويش
ويا ميوية يا جارة القمر
الفرح ممكن ييجى يا رقيقات القلوب 
ولو بعد انتظار ويأس .. بيحصل وممكن 

سالى رؤية :) و :-* وحضن

مهندس مصرى اخويا الغالى 
وسفير الدعوات الخالصة قصاد الكعبة 
من اول سنة معرفة :) 


رحاب صالح اللى مبطلتش تدعى ف الفجر 
ربنا يا حبيبتى استجاب :-*




وأتنين رغم البعاد معرفش اكتب البوست دا
من غير ما يكون اسمهم مكتوب
وليهم ف يوسف نايب 
أسامة الازهرى
وعادل البلد دى فيها حكومة 



وغايب تانى لكن علطول حاضر
ضياء 
يوسف رجع يا ضيا 
وبكرة تخرج بألف سلامة 
وربنا يفك أسرك ويفرج كربك 
وترجعلنا ونحتفل بيك وتحضن يوسف 
وزى ما هوه خرج من الجب 
والله لتخرج انتا كمان منصور 
واحسن م الاول
ويرد عنك الظلم ... اللهم آمين 
يارب 




حد كمان مقدرش انساه ف اللحظة دى 
الأستاذ راجى عين ف الجنة 
اللى قافل التعليقات عنده ومبعرفش اكتبله 
بس بدعيله وانا الدموع بتخنقنى 
لما اقرى كلامه عن ابنه 
ربنا يجمعهم ف الجنة بإذن الله
 وميبقاش فيه حزن ولا ألم ولا فراق تانى



أعز صديقات لعمرى من الكلية وأول شغل
اللى اتحملونى ولسه بيتحملوا تقلباتى
وعاداتى الغريبة بعد رجوعى من التغريبة
تغريد وعبير 
اللى مبطلوش يفتكرونى ويدعولى 
انا بحبكم واسفة على رخامتى معاكم 
ولأنى مش عارفة ارجع زى ما كنت 
بجد ... انتوا نعمة ف حياتى لا استحقها 



دودو .. عاشقة الرموانسية 
اللى لسه لحد دلوقتى 
لما بفتكر اول مرة شوفتها 
ازاى اترمت ف حضنى زى الطفلة الصغننة 
وكل مرة اشوفها او اكلمها
 احس ان اللحظة دى بتتكرر ومخلصتش
 وبالعكس بتزيد والمحبة تكبر
ربنا يفرح قلبك يا قطتى 


اما بسكوتة 
بسكى بسكت بساكيتو 
فهيا بنت عمرى 
اختى وصديقتى وساعات أمى
و مش هينفع اوفيها حقها بأى كلام 
بس هيا عارفة اللى ف قلبى وكفى
حبل المودة موصول علطول


يا كل  الناس اللى سابت التدوين 
بس فضلت تسأل عنى وعن يوسف  
والناس اللى دخلوا حياتى مؤخرا
 من توتير وميعرفوش المدونة ولا الحكاية
لكن وجودهم كان كفاية 
وصعب اكتب اساميهم كلهم هنا 
دول كدا هيعدوا الألف بالمستريح .. !



واخيرااااا
الناس اللى لولا وجودهم 
ف كل اللى فات مكنتش اتحملت أى حاجة 
 زى ما فريد شوقى (عم دياب)
قال كدا لبنته سعاد حسنى (زينب)
فى فيلم الكرنك بالحرف :

"اوعى تنقهرى .. البنى آدم لو انقهر
ينسلى زى الدبيحة فى الأزان .. "

انتوا أو بمعنى ادق .. انتا 
 لحقتنى م القهرة 
 ربنا ما يحرمنى منك
ولا م الدفا اللى شفته معاك يا حبيبى 
كل الوقت اللى فات
 ويارب يكونلى ف اللى جاى معاك .. نصيب



... وخلاص
 هنقفل روح قلب ماما 
قفلة الأفلام العربى القديمة
 برقص ومزيكا وأفراح 
ونروح لـ ... أحكى يا شهرزاد
وعودة للحكايات والاستقرار هناك 
وقطعت السياسة وقرفها 
اللى خلتنا ف كآبة وغم 
وفرقتنا رغم كل المحبة بيننا 



انا بحبكم قوى 
وبتمنالكم ربى يرزقكم بالخير كله 
ويسعدكم قد ما كل دعوة منكم 
كانت من نصيب يوسف ونصيبى 
والملايكة شالتها وصلتها لحد فووووق
عشان تتحقق
بجد
عاجزة عن شكركم 


 والمعركة كدا تقريبا شبه انتهت 
بإنتصار الطرف اللى أتمنى على الله 
انه كان يستحق
نروق بس من الهدوء الحذر 
الذى يلى وقف اطلاق النار بين الطرفين دا
واول لقاء تدوينى او فرصة متاحة 
هجيب يوسف 
واجى جرى عشان يشوفكم وتشوفوه 
ويااااااااااااه ياعبصمد .... !!!


ومن كام سنة لما اخترت بيتين الشعر
 اللى كتبهم ابراهيم ناجى 
وحطيتهم ف بروفايلى 
قولت دى اضغاث امنيات ومش هيحصل 
فإذا بيهم هيتحققوا بالحرف .. !

إنظر ذراعى اللذين هما .. قد طوقاك مخافة البين

أقسم انك عائد لهما ... انى لممـــدود الذراعين
 
حصل وان كان أخد وقت 
لكن من إمتى الفرحة ملهاش تمن 
والتمن دلوقتى بالنسبالى بقى ولا حاجة 
حاسة زى ما يكون العمر اللى فات 
كان حيطة عليها شخبطات وشتيمة وسواد
وفجأة حد جه بدهان ابيض وفرشة 
ولونها وجم ناس رسموا عليها ورد وقوس قزح
 وشمس بتضحك وعصافير بتزقزق 
كأن اللى فات كان ولا حاجة 
انا اصلا نسيته خلاص 
بعد ما شفت يوسف بخير 
واخيرا بقى ف حضنى 
أى حاجة فاتت مش فكراها ولا زعلانة عليها
فداه أى حاجة وكل حاجة






وف خضم الأيام السودة اللى عايشينها 
يطيب لى ومحدش يحدف طوب 
انى أقول 
تفائلوا يا عيال 
القصص الحزينة اوقات 
بتنختم بالنهايات السعيدة 
ومش احلام واوهام لأ دا واقع ويوسف دليل 
واهو خرج من غياهب الجب سالما 
وانشاله يكونله حظ من كل الخير
 اللى شافه 
اللى سميته على اسمه .. يارب 


وإذا جاز لى أن أنصح بعد كل الأفلام الهندى 
اللى شوفتها دى ويبقالى وش 
فنصيحتى هتكون 
الصبر آخرته خير مش كلام نظرى 
والزمن كفيل بحل أصعب المشكلات فعلا
حبوا من قلبكو لأخر مدى 
ومتندموش على حاجة اديتوها لحد
وطلع ميستاهلش
ادوا فرصة للأوغاد ولما يضيعوها بحماقة 
علموا عليهم وللأبد 
قبل ما تدهسوا مشاعر غيركم فكروا كويس
 وتريثوا كى لا تكونوا من القاسية قلوبهم
واخيرا اتعشموا ف الله .. تربحوا


وشوية ونستقر 
 مش استقرار من بتوع الاخوان والسيساوية
واجيب يوسف ونجيلكم ف اقرب معاد 
تشبعوا منه ويشوفكم
وحتى ساعته وتاريخه 
يوسف بسلم عليكم وانا زيه واكتر 
وبحبكم عن زمان أكتر
 و اكتر 
و اكترررررررررر
واعذرونى لو البوست ملخبط
ونسيت اسماء وحاجات .. معلش 
:)
بوسات وحضونات محملة بعطر اليوسفيات





 فَلَمَّا أَنْ جَاءَ الْبَشِيرُ أَلْقَاهُ عَلَى وَجْهِهِ
فَارْتَدَّ بَصِيرًا
 قَالَ أَلَمْ أَقُلْ لَكُمْ إِنِّي أَعْلَمُ مِنَ اللَّهِ
 مَا لَا تَعْلَمُونَ "


----------------------------
---------------------------------------

 المساء يبدل ثيابه ببطء
والقافلة تسير بقميص يوسف 
كان القميص مخبأ فى القمح 
كان مختلطاً بندى الحقول ورائحة الأرض الطيبة 
وعطر يوسف ودفء الشمس التى أنضجت القمح 
وتقترب القافلة من قرية الشيخ
والشيخ يدور فى غرفته
يصلى طويلاً ويرفع يديه إلى السماء ويعاود البكاء 
بينما القميص المندى بالشمس
 ورائحة يوسف فى طريقه إليه 
أحمد بهجت - مذكرات صائم


-----------------------------


داليا قوس قزح وش الخير  يوسف

بسمة بسبوسة روح بوسبوس   رجوع يوسف


دودو قطتى عروسة البحور  مين اللى ما يحبش فاطمة

مصطفى سيف  عن يوسف الذى بداخلى
sony2000  فاتيما
محمود بهجت  هى وصغيرها
فاطمة العبيدى  وعاد يوسف أخيرا
قلب القطة مارو قطاقيطو ورده إليها رداً جميلاً
ابراهيم رزق  يا فاتيما ما يهزك ريح 


----------------------------

This entry was posted on الجمعة, أكتوبر 17, 2014 . You can leave a response and follow any responses to this entry through the .

270 كــــلام بيطــبطـــب عـــلى قــــلبى و روحــــى

أنا بجد مش قادرة أبطل عياط
هكتب تعليق تاني هكتب كتير

يا فاتيما يا أم يوسف مش عارفه أقولك ايه عن احساسي وفرحتي بجد مفيش حاجة تعادلها..ده ابننا ورجعلنا وأنا مش هتنازل ابدا اني اشوفه في أقرب وقت لأني حاسه برجوعه ان جزء مني اترد..جزء راح بقى من يأسي من ضيقي من القدر الملخبط والناس المؤذية..والله ان رجوع يوسف رجعلي الأمل..و زاد من أملي في الله وثقتي في عدله..يا فاتيما انتي مثال صارخ للإنسانية وكنت دايما بحس ان حالك من حال البلد ورغم كده دايما عندك انتماء وصبر ودايما بتضحكي حتى لو قلبك بيعيط..كل كلمة بتكتبيها صاروخ ارض جو في قلوبنا..انا انهاردة حاسة ان كل مشاعري طلعت ع السطح..ربنا يكرمك يا فاتيما وينصرك دايما وتكوني مثل قوي لينا على الحب والعدل والجمال..ربنا مايفرقكوا ابدا ويجعل حياتكم كلها قرب وفرح وهنا ويبعد عنكم شياطين الانس والجن والناس اللي نش صادقة ومش ناس أصلا..أنا بحبك حتى لو بعدنا ومتكلمناش وانتي عارفه وحاسه أكيد..عيشي يا فاتيما كل لحظة ومتضيعيش اي وقت في ماضي لأن الحاضر بإذن الله أجمل.
أشوفكم قريب على خير
بوسااااات وحضوناااااات وحب كتير أوي :) :*

السلام عليكم
اللهم لك الحمد
عارفه يا فاتيما لما تفرحى لحد يفوق الدموع
هو دا حالنا لما عرفنا الخبر وقرأناه
مش عارف ابارك لك ازاى
ربنا يعوض صبرك بافضل مما تتمنين
ويرزقك بر ابنك ويرزقه برك ويملا حياتكم سعادة
كونوا دوما بخير

أم يوسف :)
ماما فاتيما سابقاً :)
ربنا يدسم عليكم اللقا و السعادة و تشوفي يوسف مالي الدنيا عليكي ،، أكيد أي كلام هايتقال هايكون أقل كتير من المقام ،،،
سلامنا ليوسف و تهانينا للأسرة :)

الناس فرحانه بجنون يا تيما فى ثورة على الفيس ههههههههععع اللللله اكببببببر

انا كتبتلك تعليق قبل دا وماعرفش وصل وﻻ ﻻء مش مهم انتى عارفة اللى فى قلبى كويس اوووووى

فاتيما خلتيني ابكي من كلامك
بس اكيد دموع فرح ليكي وليوسف
الحمدلله وحمدلله علي سلامة رجوعه

يارب يفضل جوه حضنك ديما ومايغيب ابدا عنك يارب
ويارب يزقك فرحة وسعادة تطول طول عمرك

حمد لله علي السلامه بجد
فرحنا فعلا في وقت الفرح بقي فيه عزيز
حمد لله علي سلامته
وعقبال ضيا ان شاء الله يرجع لاهله
ربنا كريم

ياااااااااااااااااااااااااااااااااااااااااه
كل الأمل وكل الفرح
كل الثقة في إن ربنا سبحانه وتعالى - مهما طال الزمن - هيطبب علينا في الآخر
والفرحة اللي في الآخر بتبقى أحلى وأجمل وأغلى فرحة
ألف ألف ألف مبروك
نهاية من أجمل ما يمكن لقصة طويلة حزينة عشناها معاكي من أول يوم
الحمد لله
الحمد لله
الحمد لله

رد مستر هانى حامد
" مبروك وعؤبال ما تخاويه يا طمطم بلغيها وهيا هتفهم "

يا خررررررتبى انا خامس مرة اقرا البوست يا دييييييينى يا فاتيما يا دييييينى اااااه يارب ااااه مش عارفة اتكلم الناس فى الفيس اللى ماتعرفكيش بتبعت تسألنى مين فاتيما ههههههههههه روحى يا شيخة ربنا يجبر خاطرك كمان وكمان وكمان ويريح قلبك وباللك ويحفظ حبيب قلبى

بابا عصام علام صاحب احوال الهوى

مبروك يا ام يوسف روح قلب ماما اللي اصبح روح قلبنا كلنا
مبروك عليك يا يوسف ام تملك حنية مالهاش حدود حسناها كلنا و عشنا وياها لغاية ما بقيت خال يوسف

انا فرحانة بقي بتنطط من الفرحة

ياااه .. الفرحة حلوة وانتي حلوة يا مامت يوسف
ألف مبروك، وتدوم فرحتكم <3

يحضرني الآن مشهد "هالة فاخر" في فيلم حين ميسرة وحلمها الرائع الذي تجسد في أغنية
"رضا جه يا أم رضا
رضا جه يا أم رضا"
:)
بس احنا هنا مش بنحلم هنا حلم السنين اتحقق يا مينز ويوسف رجع يا بشر :)
يوسف رجع يا فريال
فاكرة المشهد ده في المال والبنون
قالولها استشهد أو فقد وكانت من جواها خلاص مأقلمة أمورها أنه مش راجع
يقوم ربنا الكريم يرجعهولها :)
يوسف رجع يا أم يوسف
يوسف رجع يا طماطم وأحلى مافي رجوعه أنه زي ما اتمنيتي ويكون لسه فاكرك وحابك وحابب يرجع كمان :)
أنتي أم جميلة وحنانك الزائد والفائض كان لازم يروي يوسف طول السنين لحد مايرجع علشان تديله من حنانك أكتر وأكتر
تعب السنين ماراحش هدر
ولا الدعوات اتبخرت في الهوا
كان كل حاجة معمول حسابها
قد ايه كان ابتلاء عظيم
بس قد ايه ربنا كريم
"فرددناه إلى أمه كي تقر عينها ولا تحزن ولتعلم أن وعد الله حق"
حق يارب
كلامك كله حق يارب
الحمدلله :)
حمدالله على سلامتك يا أستاذ يوسف وجعتلنا قلبنا يا راجل على ماجيت
علشان تعرف بس قد ايه غلاوتك عندنا كلنا
بالنسبة بقى أن سيادتك طويل ووارد تعاملني معاملة أني قدك أو أصغر منك أحب أقولك أني غير خالك خالص
ومش هتنازل عن "خالتو موناليزا"
مفيش موناليزا لوحدها
مش هنهزر هنا
بحبك آه وابن اختي الغالي آه ووارد نلعب ونهزر عادي جدا برضه مفيش مشاكل
لكن نظام ناخد على بعض فتشيل الألقاب ده انساه خالص :)

معلش يا طماطم وماتقوليش أنتي حامية ع الواد كده ليه والجو ده
يوسف رجعلنا يعني لازم يتعود على طبايع معشر المدونين نفر نفر ^_^

ما هو أصل يا يوسف في غيابك كان لازم ربنا يبعت لماما حد يطبطب عليها وكده
وعلشان ربك كريم فأهل المدونين كلهم بقوا أهل طماطم اللي هي مامتك يعني
ويقينا كلنا لينا فيك
شوف بقى عندك كام خال وكام خالة دلؤقتي :)
ده غير أن حتى عروستك برضه مش غريبة.. بص احنا كلنا ماشاء الله يعني بقينا أهل في بعضينا فبكرة تاخد علينا كلنا بس اوعى تكون مابتحبش اللمة :)
هو احنا اه اتفرقنا عن بلوجر وفيه بعد من غير سبب بس لسه برضه اللي في القلب في القلب
يعني شوف وتابع التعليقات بنفسك وانا واثقة انك هتلاقي أسماء بتعلق هما نفسهم خدوا على ما افتكروا باسسورد حسابهم من طول ما بعدوا عن بلوجر

واد يا يوسف اوعى تقول على خالتك موناليزا رغاية
ده حب يا ابني ♥

سلام يا قلب ماما :)
وحمدالله ع السلامة ♥

طماطم :*
أنتي أكيد عارفة احساسي دلوقتي ومن غير ما اقول حاجة أكيد واصللك كل اللي عايزة أقوله)

ربنا يحميكم ويخليكم لبعض وماتبعدوش عن بعض تاني أبدا
♥ ♥ ♥

يا الله يا الله يا الله يا الله يا الله يا الله يا الله

مافيش كلام يوصف جلال الحدث

الحمد لله ... الحمد لله ملء السماوات و الأرض .. الحمد لله الحمد لله

ربنا يبارك فيكم و يبارك لك فيه و يضيكى عليه و يرضيه عنك ... و تفرحى بيه عريس قريب إن شاء الله

الحمد لله ... أخيرا حاجة حلوة حصلت من سنين .. الحمد لله

الحمد لله ....الله يحفظكم ويديم عليكم نعمه
الكلمات تعجز عن وصف الاحساس والشعور بالفرح لفرحتكِ الكبرى
دمتِ ويوسف بالف خير

Emtiaz Zourob

كيف ممكن الواحد يبارك لها ، هي قافلة المدونة ومفيش وسيلة تواصل معها للأسف ، عامة قولولها امتياز بتبارك لك وبتقولك ربنا ما يحرمك منه أبدا أبدا

اخيرا البوست اللى استنيته من 6 سنين من يوم ماعرفتك ♥
طب انا مش عارفه اوصف ولا احكى احساسى انا بس باعيط من الفرحه
وعارفه ان احساسى واصل لك
تليفونى مابطلش رن وكانه ابنى انا وناس كتير بتبارك وعايزنى اوصل لك رسايلهم ^_^ ربنا يسعدك زى ما دايما بتسعدينا

مش مصدقة.. ومصدقة
بكيت مع كلامك ومع استرجاع كل بوستات زمان واللي محفورة ف ذاكرتي
بكيت وانا بفتكر كل كلمات الطبطبة اللي كنتي بتقولهالي وانا بقراها ويقول ازاى بتطبطب صح اوي كدة و روحها مجروحة

وادي روحك رجعتلك يا فاتيما
ربنا ما يبعدكم عن بعض تاني ابدا
وعادي.. يا أهلا بأي حاجة تيجي.. صعب.. مشاكل.. فرح.. أيام قاسية.. أيام جميلة.. كله عادي.. كله في وجود يوسف سلام
انا حاسة بمنتهى السلام دلوقتي
فرحانة اوي
الف مبروك يا فاتيما.. ربك بيقولك تستاهلي الفرح يا ام يوسف.. صانهولك لحد ما رجعهولك مافهوش أي اختلاف عن اللي ربتيه

ياااااه يا فاتيما.. انت حكاية صبر تتحكي للناس ويتعلموها
ويوسف.. حبيبي يوسف.. فخورة بيه.. ابن فاتينا صحيح

غير كل الناس اللي كتبتيها دي
فيه ناس تانية كتيييير انت ماتعرفهومش انا وغيري اكيد حكولهم عنك وعن يوسف.. اتوجعوا معاكي ومنتظرين.. انا حاجري ع اللي أعرفهم واقولهايوسف رجع لفاتيما زي ما داليا كتبتها..
في قلوب كتير انت ماتعرفهومش مستنين.. الفرحة حلوة اوي

اللي صل نصا..اليوم..سبعة ونص مساءا ماهي سألتني: هو ابن فاتيما رجع لها؟ ..قلت لها: والله معرفش يا ماهي..يارب يرجع..ليه بتفكريني بوجع القلب..8 مساءا..دخلت عند مارو الفيس لقيتها بتقول فاتيما ويوسف..جيت..قرأت..انا كمان دلوقت مزبهلة شوية..ألف مبروك..اي كلام تقليدي لن يوفي زلزلة كياني الآن حقها..انا عارفة اني واثقة من الأول انه راجع..بس فيه حاجات في الحياة بتفرحنا لدرجة اللكمة "زي سد الحنك وعيش السرايا" لدرجة اننا شخصيا مش بنصدق اننا كنا مصدقين انها ها تحصل
الحمد لله..روحي لإبنك عوضي اللي فات واحلمي باللي جاي..ومتخافيش..متخافيش..بصي لما ابقى افوق ها ابقى اكتب..هو لسه فيه شيء مبهج ممكن يحصل في الدنيا دي؟ الحمد لله

ربنا استجاب لدعواتك و دعوتنا
النهاردة فرحة بتلف الفيس بوك الكل بيهني بعضه و يبارك لاصحابه و اختلطت الدموع مع الضحك انتي يا فاتيما بتملكي جزء من قلب كل شخص عرفك لانك اثرتي في الجميع بطيبتك و حنيتك و ابتسامتك اللي كلها صفاء و امل رغم كل الصعوبات اللي بتعشيها لسبب بسيط انك رميتي حمولك علي الله و صبرتي فكان الثواب و الجزاء فرحة هتفضل طول العمر
تحياتي ليوسف من خالو

الحمد لله رب العالمين
الحمد لله رب العالمين
الحمد لله رب العالمين
لا اجد أجمل منها جملة
اقولها لكى ولكل إنسان
الصبر طيب الصبر طيب
الصبر طيـــــــــــــــــــــــــب

رضا جه ياام رضا لولولولولولولوي :D يارب ما يحرمكم من بعض ابدا وتتعودي على كلمة ماما وتفضلي تسمعيها من يوسف طول عمرك ويباركلك فيه ويحفظهولك ويجعله فرحتك وسعدك في الدنيا والآخرة يارب :-*

حمد لله على سلامتكم أنتم الاتنين من مشوار الوجع ^_^

الف مبروك يا فاتيما

انا برقص وبعيط وبكتب في كل حتة وهيستريا..يا ولاد اللزينة..قلبي ها يقف

حبيبتى فاتينا
الف حمدالله على سلامه حبيبك ونور عينيكى وعمرك اللى جاى واللى راح متعرفيش فرحت اد ايه لما لما داليا قوس قزح كتبت الخبر على الفيس
الف حمدالله على سلامه وربنا مايحرمكم من بعض تانى ويفضل فى حضنك لغايه اخر العمر
وتفرحى بيه ياحبيبتى وتشوفيه عريس وتشيلى عياله وتتهنى فى حياتك كلها
انا سكره

الف مبروك ك ك ك ك ربنا يحفظكوا لبعض وما يفرقوا ابدا تاني ويفضل يوسف في حضنك لاخر العمر وتفرح دائما به وله وربنا يديم عليكي ايمانك القوي واملك الكبير بربنا ويسعدك ويفرحك بيوسف دائما

انت ماتتخيليش سعادتي دلوقتي بجد
ربنا يريح بالك ويسعد قلبك يافتوم
ويخليكم لبعش وماتفارقوش بعض تاني ابدا

الحمد لله يارب - الفرحة مليت قلوبنا
كنا فى انتظار هذه اللحظة من سنين
دعيت كثير وكثير برجوع الغالى
نفسى كنت اشوفك دلوقتى واخدك فى حضنى
وأحس بفرحة قلبك وتحسى بفرحة قلبى

عيشى الفرحة يابطة ومتفكريش فى اللى جاى
ربنا كريم وعنده كتير لسة وبشر الصابرين

افتكرتك نستينى لقيتك كاتبة اسمى ودموعى لاتتوقف
بس دموع الفرحة حلوة وحلوة قوى كمان ربنا مايحرمنا منها
ودايما تملا عيونا بحبك ياأغلى فاتيما

أم مالك

مبروك مبروك مبروك مبروووووووووووووك
ربنا يارب يغرح قلبك دايما ويقر عينك بيه وتشوفيه احلي الناس
افرحوا كتيييييييييير عوضوا ال7 سنين عجاف
ربنا يفرح قلبكوا ويسعدكوا يارب

بوسات كتير ليوسف ولام يوسف
:* :* :* :*

نونو عاشقة النقاب
مبرووووووووووووووووووووووك
حبيبة قلبي
انا فرحانة فرح السنينننننننننننننننننين
ربنا يقرعينك بيه ويفرحك يا رب ويعوضك الخير كله يا رب حبيبتي

انا طايرة من الفرحة و السعادة و كل حاجه كل حاجه ... مبروك يا فاتيما مبروك عوضك و ابنك و ربنا يديم عليكى سعادتك ... ربنا يكمل فرحتك باللى قلبك بيحبه

فى تعليق وصاية من انجى بما انها مزنوقة فى شقتها ومش عارفة تدخل نت ... بتقولك مبروووووووووك و انها اول ما عرفت كلمت مامتها و مامتها بكت من فرحتها

مبروك يا فاتيما ... و يارب زى ما رد لك يوسف يرد لى حبيبى ... يارب رد لى حبيبى يارب


مى / جارة القمر

بصراحة أنا عمري ما تابعتك، بس كنت بلاحظ الناس دائماً بتابعك و مدونتاك ضمن المفضلات عندهم.. النهاردة لقيت خبر عنك منتشر بين الناس في تويتر و غيره ان ابنك رجع و دورت على مدونتك و قريت كلامك.. تدوينة حلوة و الأحلى الروح اللي فيها و الفرحة الجميلة.. ربنا يسعد حالك و يتم لك دائماً فرحك على خير.

ألف مبروك فاتيما ...
جميل الدعاء بيقين وثقة بالله
وجميلة الفرحة .. بادعيلك يديمها عليكم

انا مش عارف اكتب حاجة حاسس ان القلم مش هيوصف الفرحة اللي حاسس بيها
انا حاسس كأن يوسف ده حتة مننا اتشكلت جوانا تعرفي لما تلاقي جزء منك كل الكلام اللي كنتي بتكتبيه هنا كان بيدخل جوانا ويبقى يوسف
تعرفي انتي لما تلاقي نفسك ايه اللي بقوله ده اعذريني بس مش مصدق
رغم اني كنت واثق ان ربنا هيبعتلك فرحة كبيرة وكنت بكررهالك والفرحة دي هتفرحنا معاكي
الحمدلله رجع يوسف وشاف ازاي ان في امم وناس كتير من كل البلاد طايرة من الفرح
ربنا يسعده ويهنيه والحمدلله حمدا كثيرا طيبا
ده اسعد خبر سمعته من سنين طويلة ورجعلي ثقتي في ان الدنيا لسه فيها اخبار حلوة

انا رادوه اليك
صدق الله العظيم
الحمد لله كل شوية افتحه واقراه بجد مش مصدقه نفسي من الفرحه يارب يدومها عليكي وما يحركمكم من بعض ابدا
رجوعك مفرحش ماما بس يا سي يوسف ده عمل ثورة في المدونات وفرحنا كلنا ده ولا يوم التنحي
خلي بالك من ماما عشان هي بتحبك اوي فوق ما تتخيل وعشان انا كمان بحب اقولها يا ماما
ربنا يفرح قلبك دايما يارب زي ما فرحتينا

السلام عليكم ,, طبعا أنا كنت من الناس اللي حرقوا دمك بسبب والله مش فاكراه بس هو أكيد كان نقد عنيف مني وفاكرة إنك رديتي الهجوم بضربة قاضية :D لكن بجد مش فاكرة السبب , وانقطعت الأخبار من ساعتها واتقطعت أنا عن الكتابة لفترة طويلة لكن اليوم لما سمعت عن خبر رجوع يوسف لحضنك فرحت جدا وقلت لازم أبارك لك , ربنا ما يحرمك منه أبدا وتفرحي بأولاد ولاده

مبروووووووووووووووووك يا حبيبة قلبى...فرحت وبكيت ..ربنا كبير وكريم أوي أوى يا فاتيما
كتير كنت ادخل مدونتك أطمن والاقيكى قافلها...لحد ما منى نبضات قالتلي النهاردة...ودخلت المدونة وقريت الخبر ..وروحت متصلة بدكتورة تغريد وأد إيه هي فرحت هي كمان...وقالت هتصلي ركعتين شكر...
مبروووووووووووووك يا فاتيما...عمرك ما روحتى عن بالي

التدوينه دي مفروض نطبعها وتتوزع على الناس حتى اللي متعرفش تدوين وحياة المدون احلامه واوجاعه.. الحمد لله على سلامة ورجوع يوسف وربنا يكرمك بيه وتفرحي بيه وتحققي فيه احلامك واحلامه.. بجد من اروع اللحظات
ربنا يرزقكم الفرحه دايما
:)))

بعد كل الفرحة والسعادة اللي الواحد حس بيها بعد التدوينة والخبر الرائع ده مش عارف أرد غير بآية من أحب الآيات لقلبي ومش فاكر كتبتهالك قبل كده في تدوينة ولا لأ يا فاتيما يا مامة يوسف
فرددناه إلى أمه كي تقر عينها ولا تحزن ولتعلم أن وعد الله حق

ربنا يقر عينيكم ببعض ويارب لك الحمد كما ينبغي لجلال وجهك وعظيم سلطانك ما خذلتنا أبداً في رجاء فلك الحمد ‎:)‎

أم يوسف لازم تدخلي فيس بوك النهاردة :)
فرحة الناس ماتتوصفش ما شاء الله ،،، باحمل لحضرتك تهنئة من حد المفروض انكم احتديتم على بعض من فترة بتقول انها " بتبارك لك وبتدعيلك ربنا ما يحرمك منه أبدا " :)
ربنا يديم المعروف و يجازيكي خير على كم الفرحة اللى قلوب الناس فرحته النهاردة :)

الحمدلله

لالنا يباركلك فيه ويباركله فيكي يارب

عرفت من الفيس بوك الناس فرحانة :)
من داليا وشيماء
ربنا يفرحك يارب :)

روح قلب الملايكة
يااااااااه
بقالى كتير مقلتش روح قلب الملايكة
و الله العظيم مش قادر امسك نفسى من الدموع
انا عايز انزل الشارع و اعمل زى عبحليم حافظ و هو بيقول
يــا عيني يـا قلبــي جـرى إيـــــــه الـدنيــا احـلـوت كــده ليــــــــــه
يــا اصحابـي يا أهلي يا جيرانــي أنـا عـايـز اخـدكـو بـأحضانـي
مـش قـادر علـى فـرحـة قـلبــــي مش قادر أبـداً يــا حبـايبـــي
اخيرا ربنا فرح قلبك زى ما فرحتى قلوب ناس كتير
الخير و الحب اللى فى قلبك ربنا وصله ليوسف
اصل العملية كمياء
الحب و الخير و الطيبة لما يتفاعلوا مع بعض لازم الناتج هيكون فرحة و خير
و فاكرة لما قلتلك عبد الوهاب مطاوع و كلمته جوائز السماء للصابرين
ربنا بعتلك احلى جايزة
يوسف
اجدع سلام ليوسف لبن فاتيما
سلام حاير طاير ليوسف و فاتيما
فاتيما يعنى
الشهامة
يعنى
المجدعة
يعنى
الطيبة
يعنى
الخير
يعنى
الملائكية
يعنى
النقاء
يعنى
حماة ساليناز
يعنى
اجمل اخت
ربنا يفرحك كمان و كمان يا ام جو
و بقول يا ام جو بالصوت العالى
مش على استحياء
افرحى يا ام جو
رجاء اخير
مدومنتك دى الام اللى جمعتنا دلوقتى
و النبى متسبيهاش يا ام جو

مش لاقية كلام اقوله ياحبيبتي مش لاقية
اي كلام مش هيوصف فرحتي بيكي وبرجوع يوسف ليكي
الحمد لله الحمد لله
عايزة اجيلك جري احضنك انتي وهو
الحمد لله
وبشر الصابرين
ربنا يبارك فيه ويبقا قرة عين ليكي وسندك اللي ربنا بعتهولك لأخر العمر الجميل وتجوزيه وتفرحي بيه وتشيلي عياله
ان شاء الله نتقابل علي خير وحجزاه لسما حفيدتي اه انتي جيتي السبوع وعاينتي القمر بنفسك
والنابوليا علينا والخلاط عليكم
دعواتي ليكي بالفرح والاستقرار والامان

الف مليون مبروك عليكي و علينا

مبروك.. ليس لدي غيرها وهي احساس قبل ان تكون كلمات
مبروك رجوع يوسف لحضنك ورجوع يوسف لكي
ألف مليون مبروك يافاتيما
أبكتني ايمان فوزي وهي تقول لي الخبر

كوني على اتصال دائم

زين عبد الهادي

كل شئ تحت السموات وقت
فحان الوقت لكى يمسح الله دموعك ويكللها بابتسامه وفرح وسعاده
ربنا يفرح قلبك ديما

الحمد لله الحمد لله يا فاتيما
ربنا يبارك فيه يارب ومتتفرقوش ابدا
ربنا كريم اوي
فرحانة لك جدا ربنا يعلم
التدوينة دي جمعت شمل اهل التدوين القدماء :D
اسماء رمضان المدونخانة


الحمممممممممممممممممممممممممممممممممممممد لله
مش هاقدر اقول غيرها دموعى تنهمر منى منذ ان علمت الخبر
كل اللى هاقدر اعمله انى هاصلى ركعتين شكر لك يا ارحم الراحمين يا من قلت وقولك الحق ادعونى استجب لكم
حضضضضضضضن كبير لك ياروح قلب تغريد وبوسة كبيرة على جبين يوسف لحد ما اجيله واشوفه

" فَإِذَا خِفْتِ عَلَيْهِ فَأَلْقِيهِ فِي الْيَمِّ وَلَا تَخَافِي وَلَا تَحْزَنِي إِنَّا رَادُّوهُ إِلَيْكِ "

:)
:)
:)

حمدلله ع سلامتكم انتوا الاتنين يا فاتيما ..
ربنا يباركلك فيه ويديم عليكم السعادة :) (f)

حبيبتى حمدالله على سلامة يوسف وربنا يسعدك ويسعده ويخليه ليكى
بجد فرحت جدا بالخبر ده مش قادرة أقولك حاسه بإيه دلوقتى
الحمدلله نهاية الصبر حلوة وانتى صبرتى واتعذبتى كتير والحمدلله ربنا كرمك
ويارب تكمل فرحتك على خير وما يبقاش فيه أى قلق تانى ويفضل يوسف فى حضنك للأبد

ايوا بقاااااااا .. اخيرا حاجة تفرح وسط العتمة
الحمدلله رب العالمين يا ماما رجعوه لحضنك

ألف مليون مبروك يا أم يوسف
ربنا يعوض صبرك خير
و يفرحكم دايما يارب

والله ما عارفة امسك دموعى من كتر الفرحة
ياااااااااااااه يا فاتيما
ربنا كبير اوى عوض صبرك وحرمانك ووجع قلبك وقلقك وخوفك
وبعدك عن حته منك مستحيل تقدرى تعيشى بعيد عنها ثانيه مش سنين
ربنا بيحبك اوى يا فاتيما ودليل على كده حب الناس دى كلها وفرحتها بيكى وبرجوع يوسف
انتى والله اطيب انسانة قابلتها فى حياتى وتستاهلى خير الدنيا كله
ربنا ما يحرمك منه يا رب وتشوفيه عريس وتشيلى عياله وعيال عياله كمان ويفضل فى حضنك دايما
على فكرة انا سميت يوسف على اسمه وبعت ليكى وقولتلك علشان يبقى عندك 2 يوسف
ربنا يحميهم لينا ويحفظهم ولا يحرم اى ام من حضن ضناها ابدااااااااا
بحبك والله كتيييييييييييييييييييييييييييييييييييييييييييييييييييير اوى
حنين القلب ام عمر ويوسف

أيه دا!!!!
مش معقووووووووول
انا أسمى مكتوووووووووب
(ونورهانتى صعبان عليا حالنا)
ماشفتهووووووش أول مرة شفته
لما رجعت اقرأ باستمتااااااااااع
تسلمى وتعيشى وتفرحى يارب
ويرد كل حبيب لحبيبه يارب

يعنى هو انا ببكى دلوقتى وفرحان وكل حاجة متلغبطة جوايا , بس الحمدلله ربنا ديما كريم , وبيحبنا , ربنا بيحبنا قوى والاوقلت دى هى العلامات ياااااااااااااااااه فى امل , ويارب ضياء يرجع عشان وحشنى جدا

مش عارف اقول غير الف مبروك! كلمه تافهه بس مش عارف اقول غيرها من كتر ماجوايا كلام كتير عاوز اقوله
محمد حمدي. مدونه لكم دماغكم ولي دماغي

لا تعليق يوازي فرحتنا اللهم أقر عينك به

انا بطلت تدوين و بقالى حوالى 4 سنين مش بعلق عند اى حد و دا اول تعليق و رغم انى نسيت الباسورد و كل حاجه تخص مدونتى الا ان انا لازم كنت اعلق بقى بأى شكل
اولا الف الف الف مبروك على رجوع يوسف ربنا يباركلك فيه و يجعله سند ليكى يا رب
ثانيا حمدالله على السلامه و الله الواحد مفتقد ايام التدوين عشان الناس اللى زيك
ثالثا اعملى فيسبوك عشان يبقى في تواصل

الحمد لله حمداً كثيراً طيباً مباركاً فيه
ألف حمد وشكر ليك يا رب
ألف ألف ألف مليون مبروك يا أم يوسف وألف ألف ألف مليون حمداً لله على سلامة يوسف
نورت الدنيا كلها يا يوسف وفرحت قلوب الناس كلها ولميت الشمل من تاني برجوعك يا غالي
ربنا يا رب يبارك لك في يوسف ويفرح قلبك بيه وتشوفيه أحسن ما تتمني ويحفظهولك من كل شر وسوء اللهم آمين
:)))))))))))))))))

حمد الله على سلامة يوسف...ربنا ما يحرمكوا من بعض يا احن ام...واجمل فاتيما...بحبكوا اوى :)

الحمدلله حاجة تفرح على الصبح
ربنا يخليلك يوسف في حضنك دايما يارب

أنا عرفت الخبر من الفيسبوك عند عسقول
فرحتي ملهاش حدود
فرحان لك جداً جداً جداً
ربنا إستجاب الدعوات و رجعه لحضنك
ربنا يهنيكم و يفرحكم و يسعدكم دايماً علطول
سلامي ليوسف و كل الأسرة :)

ربنا ما يحرمكم من بعض أبدا و يعوضك عن كل اللى فات و يكون لك كل حاجة فى دنيتك الابن و الاخ و الحبيب
و بجد التدوينة دى هى الأروع و التعليقات برده روعة بجد أراها تذكرة من الله بقصة يوسف و كيف ان الصبر ليس للأنبياء فقط و ان الجزاء على قدر الصبر
بجد السعادة و الفرح النهاردة قليلين عليك و ارسلى ليوسف قبلات و احضان شوق لابن أختى فاتيما
ده تانى تعليق اكتبه واضح ان المدونة بتهيس من الاقبال التاريخى النهاردة :)

يااااااااااااااااااااااااااااااااااااااااااااااااااااااااااااااااااااه
يوسف رجع والحلم اتحقق
مبروك يافاتيما مبروك دفا حضنك بيوسف
كنتى صح بيقينك وثقتك وانتظارك وصبرك انتى صح ويقينك ان يوسف راجع لحضنك اتحقق
إِنَّا رَادُّوهُ إِلَيْكِ
يوسف

الحمد لله الحمد لله الحمد لله - ألف ألف مبروك - وفي انتظار الاحتفال بعودته إن شاء الله

مليون مبروك يافاتيما
ربنا يسعد قلوبكم يارب ويجبر كسر كل الى فات

انا مبسوط بجد


محمد غالية

يااااه فعلا يا طمطم :)
بساطة الدنيا دي أبلغ في التعقيد من قدرتنا على فهمها.
القانون الالهي ليها مباشر و صريح, بس من كتر البلا بلا بلا بلا بلا بلا بلا اللي احنا مالينها بيه مش قادرين نستوعبه.
انت نموذج يا فاتيما. ترجمة حية للمعادلة اللي أبداً عمرها ما بتجيب نتيجة غلط.
ربنا يباركلك في يوسف يا أم يوسف :) و يجعله بار بيكِ كما أنت تستحقين.
تمت.

برغم اني قفلت المدونه زي كتير من المدونين
انما خبر زي ده لازم يخلينا افتحها
وابارك ليكي عودة ابنك ربنا ما يحركمش من بعد ابدا
حقيقي انا سعيد ليكي وليوسف
ربنا يملى ايامكم سعاده

انا عيطت
انا بحبك
بوسيهولي واحضنهولي
ربنا مايفرقكم لحظه تاني ابدا

وكما الهبله اول ما شوفت الخبر عند داليا قوس قزح قعدت اقول بصوت عاااااااااالي يااااااه يوسف رجع ورضا يقولي يوسف مين اقوله يوسف رجع لفاتيما وهو مش مركز ويقولي مييييييين وانا مش عارفه ومش لاحقه افهمه وافكره ..:D
مبروك يا فاتيما يا حبيبتي ربنا يقر عينك بيه يارب ويصلح حاله ويفرحك بيه يارب ويبقى احسن الناس بوساااااااات وحضونااااااااااات بالعبيط ليكي وليوسف يا جميلة القلب الروح والضحكه والوش وكل الحاجات

ياطمطم مش عارفه اكتب ياطمطم انا قلبي بيزغرط
انا كنت بدعيلك وانا بسجد انتي ويوسف
يافاطيما افرحوا وعيشوا واتهنوا وايدي بتترعش مش عارفه افتح بقي :)

الف مبروك ويارب يكتر من افراحكم ويسعدكم كمان وكمان ويحققلكم كل امانيكم ويحفظكم لبعض ومايفرقوش تانى عن بعض ويرزقكم بسنوات سعاده وبهجه وامل

حمدلله علي سلامة ربنا يفرح قلبك ويملاه فرح وسعاده واطمئنان وراحه
مبرووووك والف مبروك
ربنا يخليكم لبعض وميحرمكوش من بعض

حمدا لله علي سلامته

وتحيتي لكي وتهنئتي ياطيبة القلب

ربنا يحفظك ليه ويحفظه ليكي ويجعله ذلك الولد الصالح الذي ينفعك في دنياكي واخرتك

مبروووك وتحيتي

يا الله يا الله الحمد لله الحمد لله
ربنا كريييييييم الله حنّان منّان
الف مبروووووووووووووك رجوع يوسف لحضنك
ربنا يبارلك فيه يا رب ويبارك له فيكي
وربي يتمم فرحتك ويكملها باللي في قلبك يا رب
ربنا يارب يفرح قلبك بيه دايما وتقر عينك بيه
حنان- تونس

الحمد لله عالسلامة .. وربنا يكرمك وتشوفيه عريس كبير وفى احسن المراكز باذن الله .. أكيد فاته الكثير كما فاتك لكن كل شئ يتعوض ..

يااااااااااااااااااااااااااااااااااااااه بقالى اد ايه باحاول اسجل دخول وانا ناسيه الباس بتاع المدونه اللى مدخلتهاش من تلت سنين داخله بس احضنك واقولك شوفتى الصبر نتيجته حلوة ازاى ربنا يخليه ويبارك فيه وتشوفيه احلى عريس يا حبيبتى بجد فرحه مفرحتهاش من زمان ياااااااااااااااااااه بجد
احنا بنحبك اوى يا فاتيما وفرحانين اوى اوى وتعالى شوفى الفيس مزقطط ازاى بيكى وبيوسف
يااااااااااااااااارب ديمه عليكى ويديمك عليه نعمه
على فكرة انا اتجوزت ومعايا يويو عروسه زى القمر تقدرى تحجزيها ليوسف وحامل ممكن لو جتت بنوته تبقى تختارى براحتك بقى
فرحاااااااااااااانه يا ناس وفرحانه انك حركتينا احنا المدونين وجبتينا بلوجر علشان نشاركك فرحتك

على مدار سنوات التدوين اللي فاتت جت علينا أوقات فرح كتير ،، وكنا فعلا بنبقى فرحانين
بس بجد الفرحة برجوع يوسف .. هي الفرحة الكبيرة

الفرحة اللي مالية كل عيون وقلوب المدوين واللي بتقول بجد بجد احنا عيلة كبيرة كبيرة اوووووي

ومش ممكن انسى لما شوفتي مهند في ابو الريش وسالتيه على سنه وقالك 11 سنة .. ساعتها حضنتيه اوووي وقولتي اد يوسف .. لحظتها شوفت احتياجك لحضن يوسف .. أكتر من احتياج يوسف لحضنك .


" فَإِذَا خِفْتِ عَلَيْهِ فَأَلْقِيهِ فِي الْيَمِّ وَلَا تَخَافِي وَلَا تَحْزَنِي إِنَّا رَادُّوهُ إِلَيْكِ "

والحمد لله ربنا رده لك زي ما اتمنتيه
الف حمد وشكر لك يا رب


عارفة ..

التدوين من غير فاتيما .. زي مصر من غير الهرم


ألف ألف الحمدلله على سلامته يارب
أنا إعتزلت التدوين لكن من صفحة شيرين سامي عرفت باللي صار
وللصدقه كنت عم بفكر فيكي بوقتها
وكت عم بدعيلك
أه والله :(

حبيبتي يا فاتيما,, التمام على خير يارب وبشكر ربنا اللي فرحني فيكي قبل ما يختفي النت ههههه

إم عمر - الأردن

انا كتبت تعليق امبارح كبير راح فين :(

وحشتينى يا طمطم ومبروك رجوع يوسف باشا
وان شاء الله نتقابل على خير

رجعتينا كلنا لهنا من تانى وفعلا الفرحة امبارح والنهاردة بيكم لا توصف
متقفليش المدونة دى يا فاتيما بالله عليكى دى لم الشمل بتاعنا ونقطة تجمعنا وحبنا

بوسات وحضونات ليوسف وليكى
كل الحب
هبة

ربنا يقر عينك بيه وبحمية ويبارك فيه على قد صبرك
والحمد لله انه ربنا ردهولك رد جميل
ربنا يسعد قلبك وقلبه ويفرحكم على قد الفرح اللى من إمبارح منتشر فى كل حتة من إمبارح
والمدونة اللى اتقلبت بستان محبة

أى كلام مش هيساوى اللى اى حد بيدخل المدونة بيحسه
ولا يساوى شعورى بالإمتنان ان رغم البعض والتقصير لاقيت اسمى هنا مكتوب

ميرا

مش عارفه أقولك ايه بس هي الفرحه اكبر من لما اقول يارب يسعدك ويهنيكي بيه ياست الكل ويبعد عنك اي شر بحق صبرك وبحق كرمه يارب الحمد لله ان العسر يسرا ربنا كريم الحمد لله يارب علي رجوعه زي مااتمنتية عن الفرحه من غير ميعاد

ألف ألف مبروووووك رجوع يوسفك بالسلامة يا فاتيما
بجد مش عارفة اقولك انا فرحانة اد ايه
عودة يوسف امل تحقق لكل المدونين وحسسهم ان لسا في امل في حاجات كتيرات مهما طال الوقت
ربنا يفرح قلبك بيه يارب وتطمنى بيه وعليه دايماً
عندى مشاعر مش عارفه اوصفها حقيقي بس اللى عارفه اقوله ان انا فرحانة اوي

سلامي وبوساتى الكتيرات ليوسف لحد ما اشوفه ان شاء الله ولمامة يوسف لحد ما اشوفها بردو

مش عارفة انا كتبت تعليق وراح فين
المهم اننا امبارح كان الاستيتيس بتاع الفيس بوك كله عن فاتيما ويوسف
وهاشتاج فاتيما كان شغال يجنن
وكلنا كتبنا تدوينات عنك
بمحبك وبنحب يوسف وخلاص عاملنا ايفينت نتقابل فيه كلنا
وحشتيني اووي وبوسات وحضونات لغاية ما نشوفك ونعملها بجد

بارك الله لك فيه وحفظه وبلغ أشده
أسعد الله قلبيكما ورد كل غائب لأهله

مش مستوعبة اى حاجة
انا بحبك
اوى
وازاى مش ناسية حد كدة
يا الله يا كريم
انا مش عارفة اكتب والله
احنا اللى دخلنا التدوين عشان نخرج الحروف
مش لاقية حروف تساوى اى حاجة ليكى يا فاتيما
ابطل عياط وارجعلك
او اشوفك ع الحقيقة بقا
وهرسمله صور احلى واحلى
واللى يحبه كله

السلام عليكم
كبف حالك اخت فاطمة ..
الف الف الف مبروك ..
لله الحمد من قبل ومن بعد ..
ربنا ما يفرقكم عن بعض تاني ..
ويقر به عيناكي دائما ..

الحمد لله انوا رجع بالسلامه وربنا يطرح لك فيه الخير ليعوضك عن سنوات الحرمان والدموع والياس الذى سببه لك شخص كنت على وشك فقدان الامل الحمد لله مازال الامل موجود ان الله لا حقا ابدا

أنا عيطت من الفرحة وواصلني كل اللغبطة اللي انتي حساها رغم إني ما عشتش كل دا !
فرحانة كأن أنا اللي انتصرت :)
يارب يديمه عليكي فرحة ودايمًا يكون مصدر بهجتك وأمانك، ويبقى سندك الجميل.. ومين عارف يمكن سنين البعد دي ربنا قسمها عشان تعرفوا إنكوا سند بعض وبس.. وتحسوا كل يوم (وهو أكتر) بقيمة كل لحظة يعيشها معاكي
ربنا يفرحك يا فاتيما، وياريت لو المدونة دي وقفت ما تتقفلش... خليها يمكن أي أم تستقوى بيها في معركتها مين عارف :)

أنا مش مصدقة ان بلوجر وتويتر بيعاندونى من امبارح ومش عارفة انشر تعليقانتى ...بس عموما انا مكنتش عارفة اتكلم ياطمطم ومازلت برضه مش عارفة اتكلم ....انتى تستاهلى الفرحة دى ياحبيبتى ..ومش عارفة أقولك غير الحمد لله صاحب المن والفضل اللى أنعم عليك وعلينا برجوعه لحضنك ...رجوع يوسف وفى الوقت ده مش بس طبطبة ربانية على قلبك الصابر لكن شعلة أمل أراد ربنا يبقى ده وقتها اللى تنور لنا فيه طريقنا ...حاسة انى رجعت رشا المثابرة اللى كانت مؤمنة ان اليأس خيانة وانى بترجعلى من امبارح طاقة العناد الطيب اللى بتخلينى قادرة اعافر مع الدنيا ...كنا محتاجين والله كلنا من ربنا طاقة الأمل والدرس البليغ ده ..ربنا يحفظك يايوسف ويحميك ياحبيبى ويصلح حالك ويجعلك من الصالحين ..ماتسيبش حضن ماما ولا حتى معنويا ياروح قلبها ....يمكن بعد شوية اعرف اوصف لك فرحتى برجوعك قد ايه


انا عرفت امبارح من عند سمراء النيل "انجى" ان يوسف روح قلبك رجع الحمد الله ربنا ميحرمكوا من بعض دائما ويفضل مفرحك وسندك فلا الدنيا والاخرة طوووول العمر امين
ربنا يفرحك واللىى بيصبر ينول فعلا .. ربنا يكرمكوا ان شاء الله
متتخيليش رغم انك مش عارفانى بس الخبر ده فرحنى اوى اوى :))

كل شئ تحت السما له وقت
للفرح وقت
للقا وقت
ربنا يفرح قلبك بيه
نفسى ابوسك واحضن حضنك الدافى
يارب تفتكرينى
"أمانى"

ألف ألف ألف مبروك ربنا يجعله قرة عين لك ويسعد قلبك بيوسف يا رب
اللهم لك ألف حمد وشكر

ربنا يفرح قلبك وما تشوفى الحزن تانى ويفضل يوسف معاكى لاخر العمر

يا جماعة انا عاجزة عن الرد على كل الكلام الحلو دا
وعاوزة ارد عليكم واحد واحدة ...
أروق بس ان شاء الله
واكتبلكم كل واحد وأرد على الكلام الحلو اللى انتوا كتبتوه
واللى مكتبتهوش وانا حساه ولمساه وعارفاه ...
بس وحياة يوسف عندى وانتوا عارفين غلاوته
انا ما حسيت بالفرحة الا بيكم ومعاكم ...
وانتوا بعد ربنا سبحانه وتعالى السبب .. ف انى عرفت اعدى كل اللى فات
بجد
مش كلام
ومش فاتيما اللى بتحب الحب اللزج المبالغ فيه دا وبتقول حاجات دوشة وبتاع
انا بتكلم جد
وعن تجربة اهو
لولا انكم معايا كل السنين اللى فاتت بالدعا والطبطبة
ولا كنت صمدت يوم واحد
اوتحملت أى حاجة
ولا كنت كملت واتعشمت ووانتظرت لحد ما وصلت لليوم دا ...

ربنا يخليــــــــــــــــــــــــــــــــــــــــــــــــــــــــــــــــــــكم ليا
..
ولنا عودة للرد ع التعليقات كلها ان شاء الله
:-*
بحبكم

أزال المؤلف هذا التعليق.


https://www.facebook.com/ashikatalromancia.dodo/posts/816802201704509 فى حب يوسف

ياااااااه يا طمطم ... مهما اوصف لك غرحتي برجوع يوسف مش هاقدر اوصف.. دموعي مغرقاني من الفرحة
رجوع يوسف رجع لنا الفرحة والامل .
مبروك يا يزسف .. الف الف مبروك يا حبيبتي.
وربنا أبدا ما يحرمك منه تاني ابدا ابدا.
وان شاء الله لما انزل مصر لازم اشوفه باذن الله .

http://fritend.blogspot.com/2014/10/blog-post_18.html


:)

أخيراااااا وصلت للبوست و البركة فى أخى الرائع أسامه الأزهرى ربنا يبارك فيه يا رب . . ألف مبرووووووك و مليون و أكثر كمان مبروك حبيبتى .. متعرفيش فرحتى أد أيه بجد برجوع يوسف ليكى خصوصا أنه رجع فى أيام محتاجة فيها أحس بالأمل و حسيت أنها رسالة من ربنا أن مهما طال الألم جاى الفرج .. الله يفرح قلبك يا رب و يسعدك حبيبتى و يعوضك عن كل لحظة ألم و يا رب يحفظ يوسف و يحفظك له و ما تفترقوا أبداااا .. بـحبك كثير أنتى و يـوسف و يا رب يكتب لى أشوفكم على خير و فى أقرب فرصة ..

أنا قريت المانشيت بس، والله العظيم فرحت جدا جدا جدا، فجريت أكتب مبروووووووووووووووووووووووووووك بحجم الكون كله، وبعدين هاروح اقرا التفاصيل.
حمد لله على السلامة يا يوسف
قلب مصرى

ألف مليون مبروك على عودة يوسف
وانا متاكد إن فرحتك دلوقتى لا تستطيع أى أقلام أن توصفها ولا تستطيع اى عقول أن تسعها
ربنا يحفظه ليكى ولا يغادر أحضانك مره أخرى ويبارك فيه
أنا أول مره أدخل المدونة هنا . ولم أكن أعلم بالقصه لولا تدوينات الكثير والكثير من المدونين
ولكنى سعيد جدا بعودة إبنك العزيز وأتمنى من الله أن يكون قرة عين لكى

تحياتى لحضرتك ويوسف

مبرووووووك يافاطيما وصباح معطر باحلى الورود وحضن كبير اووووى بحاول اوصلك بقالى يومين النت وحش اوى وبلغك سلامى روفى وعاليا حليم لانهم مش عارفين يدخلوا المدونات وفرحتهم بالخبر ولازم نحتفل بيكى ونتجمع فى يوم ....الحمد لله كثيرا ...بجد اسعد خبر والكل فرحان ليكى كثير يافاطيما ...ربنا يخليهولك ويبارك فيه وتشوفيه زى مابتتمنى واتمنى اراكى قريبا عشان احضنك حضن كبير اووووى ...

▲♥ ◊●♪ღ◊●♪◐°◣»Shereen Samy «◢°◑ღ♥▲
حبيبتى يا شوشو انتى
:-*
وانا بكتب البوست انتى جيتى على بالى كتير
والفقرة اللى انتى حطيتها عندك ع الفيس سبحان الله
انتى اخدتيها وكأنك عارفة انها ليكى ولكل الناس الحلوة اللى زيك
اللى بينجرحوا ويخافوا ويفقدوا الامل ويتعبوا
لكن لازم يعافروا
عشان اللى زيك لو ملوش مكان ف الدنيا وبصمة
اومال مين اللى يستحق ..؟
ان شاء الله تشوفوا يوسف وتحضنوه
وتفرحوا بيه
وربنا يا حبيبتى يسعدلك كل أيامك
:-* وألف حضن


▲♥ ◊●♪ღ◊●♪◐°◣» مدونة رحلة حياة «◢°◑ღ♥▲

وعليكم السلام يا محمد
الف مليون حمد وشكر يارب
وعارفة احساس يا عزيزى انا فيه حاليا واكتر
وعاجزة عن اى وصف او كلام يوف الحالة ..
ربنا ما يحرمنى منكم
وتفرحوا دايما
يارب


▲♥ ◊●♪ღ◊●♪◐°◣»Ahmed Abdeladl «◢°◑ღ♥▲

دخلت يا أحمد
:)
البت دودو عاشقة الرومانسية ادتنى اللينك
ودخلت قريت البوستات متجمعة
وفرحت معاكم وكأنى اول مرة افرح ..!
ربنا يخليكم ليا
وبعدين يوسف دا ابنكو برضو
كل واحد فيكم له فيه نصيب على قد المحبة والدعا والأنتظار ...والطبطبة عليا
ربنا يفرح قلوبكم دايما يارب
ويرزقكم المحبة والخير اصعاف اضعاف يارب

▲♥ ◊●♪ღ◊●♪◐°◣»richardCatheart «◢°◑ღ♥▲

ههههههههههههههههه قريت يا مارو وشوفت يا حبيبتى وفرحت معاكو
وكأنى لسه بسمع الخبر اول مرة والله
:)
انتى بتقولى فيها ثورة والله اكبر وكدا
طب بجد انتوا محسسنى انى عديت خط بارليف والنيعمة
:)
انا شفت صورتك ع الفيس وتنحت شويتين
ايه الحلاوة دى
معرفتكيش ف الاول وافتكرتك حاطة صورة نجمة سونمائية ولا حاجة
وبعدين قولت لأ انا عارفها الست دى .. مين يا طمطم مين يا فاتيما
وبعدين اما ركزت
لقيتها انتى
:)
بوسات وحضونات وتفعيصات لحد ما حضرتك تيجى
وتاخديهم بقى
:-*

▲♥ ◊●♪ღ◊●♪◐°◣» زهرة الجنة «◢°◑ღ♥▲

الله يباركلى ف عمرك يارب
وتعيشى وتسلمى
ولك مثل ما دعيتى اصعاف اضعاف يارب
:-*

▲♥ ◊●♪ღ◊●♪◐°◣» Moustafa A.Hakeem «◢°◑ღ♥▲

الله يسلمك يارب
ويسمع منك ربنا
ويرجع ضيا لحضن اهله وحضننا
ويفك أسر كل مطلوم يارب
رجوع يوسف ادانى امل ان ضيا يخرج قريب ان شاء الله
يارب
يارب

▲♥ღ●♪◊●◐° يا مراكبى °◑◊●♪ღ♥▲

آه .. شفت يا نبع الحكمة
:))))
اكتر حاجة مفرحانى جنب رجوع يوسف
ان حبل العشم اللى منقطعش بينى وبين ربنا
الحمدلله اتحقق وانا عايشة وشفت نتيجته
كنت دايما اقول لروحى
ولسوف يعطيط ربك فترضى
بس كنت بخاف اللى حواليا خصوصا ف اخر الأيام اللى فاتت
يقول انى بقول كلام ف الهوا اصبر بيه نفسى لكن مش هيجصل
كان عندى ييقين
كتير اعتبروه اضغاث احلام
لكن انا كنت بتمنى على الله يتحقق
واشوفه
والمسه
وتشوفوه معايا عشان يفضل دايما فيه امل ..
امل بالله وكفى

انتا كنت من الناس اللى ديما تصبرنى
وتقولى استنى بس وهتشوفى
فاكر
:)
ربنا ما يحرمنى منك ابدااااا يا نبع الحكمة الصافى
يارب
وتشوف الفرح طول العمر

بس على فكرة كان عندى يقين انه راجع مش مجرد كلام كنا بنصبر نفسنا فيه
الصبر جميل فعلا والاجمل عودة الحق لصاحبه
ربنا يسعدكم ويديم عليكم محبته

مبروووك رجوع يوسف .. ربنا ما يحرمكم من بعض أبدًا

الحمد لله كما ينبغى لجلال وجهه وعظيم سلطانه ربنا يفرح قلبك وقلب يوسف دايما ويغوضكم بكرمه عن كل اللى فاتت يارب ميحرمش ام من روحها
اسعدتينى حتى البكاء
منى احاسيس

فاتيما أختى الغالية
مش عارف أكتب و ﻻ أتكلم
انت عارفة
و ربنا عارف

أنا فرحان بطريقة غريبة
:)

مش عارف أوصفها

أنا رامى

لسه قلبي بيرقص ولسه بعيط ولسه بحكي عنك ولسه بدعيلك والأغنية اللي انتي حطاها :) آه من الأغنية دي
هو السبت ده مش هيجي بقى :))))

▲♥ ◊●♪ღ◊●♪◐°◣» kiara mulln «◢°◑ღ♥▲

طيب بالنوسبة لهانى الغالى ..
فقوليله الله يبارك ف عمرك يا رب
ودايما ساندنى وحاسة انك جنبى ومعايا ف أى وقت اقول بس يا جزر
:)
ثم انه موضوع المخاوية الصراحة الراجل ما جصّر يعنى وقالى نخطف المذكور
عشان واضح انه مش هييجى بالذوق
انما انا قولتله بلاش يا هانى
احنا برضو عندنا اخوات ولاد وعندنا ولاد ولاد وميصحش نعمل كدا ف ولاد الناس
والشرف غالى وبقى بكام دلوقتى واللى انكسر يتصلح وربنا حليم ستار ..
فوزية رأفت سك على بنتك

:))

اما بالنوسبة لدكتور عصام فهرد عليه ف تعليقه ان شاء الله
اما انتى بقى
فاتنططى م الفرحة عشانى وعشان يوسف
وعشانك انتى كمان
واعرفى ان أى خسارة ربنا هيجبر بخاطرك ويردهالك خير كتييييير
بس الصبر
ولسوف يعطيط ربك فترضى
دى حقيقة اهى ومفيهاش جدال
:-* وحضن كبير

▲♥ ◊●♪ღ◊●♪◐°◣» richardcatheart «◢°◑ღ♥▲

حبيبتى يا قطاقيطو والنيعمة
:-* وحضن وتفعيصة

▲♥ ◊●♪ღ◊●♪◐°◣»Lobna Ahmed «◢°◑ღ♥▲

الفرحة هيا يوسف وانتوا يا لبنى
:-*
الله يبارك فيكى يا مفردة ومتفردة
:-*

▲♥ ◊●♪ღ◐°◣(موناليزا )◢°◑ღ◊●♪♥▲

انتى وياسمين انسانة قولتم نفس التعبير يا مون مون
بتاع رضا وكأنكم متفقين
:)
مش عارفة أرد على كلامك
انتى من الناس اللى كانوا من البدايات ف الحدوتة دى
ومش عاوزة اقولك انى اوقات كنت بدعى ربنا انه بلاش عشان خاطرى خالص
بس يجبر بخاطر يوسف طيب ..
ويجبر بخاطر كل الناس اللى بتحبه وبتحبنى ومستنية الفرحة دى
والحمدلله كرمه واسع وغمرنا كلنا من اوسع باب
عقبال ما أفرحلك ف كل حاجة جاية يارب
وما تشوفيش لحظة حزن تانى ابدااااااااااا
يارب
وخالتو خالتو براحتك بس انا بحنذرك انك هتنصودمى لما تشوفيه
وانتى اللى هتقوليله يا خالو
:)
بوسات وحضونااااااااات لحد ما أشوفك

▲♥ ◊●♪ღ◐°◣(ابن حجر العسقلانى )◢°◑ღ◊●♪♥▲

يستاهل ألف مليون حمد وشكر يا عسقول
انا فرحتى مصروبة ف ألف والله بسببكم وبسبب فرحتكم دى
ربنا ما يحرمنى منكم
الواد دماغه كويسة وشاطر ما شاء الله
وعاوز يطلع دكاتور او منهدزززز ..
متخيلاه شايل شنطة على ضهره فيها المراجع بتاعتك اللى كنت بتشيلها دى
وبضحككككككككك
:)

▲♥ ◊●♪ღ◐°◣(yosef)◢°◑ღ◊●♪♥▲


تسلملى يارب
ألف شكر ليك
:)

▲♥ ◊●♪ღ◐°◣(Emtiaz Zourob )◢°◑ღ◊●♪♥▲

ميرسى يا امتياز
الله يبارك فيكى وربنا ما يحرمنى من ذوقك أبدا أبدا
:)

▲♥ ◊●♪ღ◐°◣( عاشقة الرومانسية )◢°◑ღ◊●♪♥▲

هااااااااحييييييح يا دودو
اهو جه اليوم اهو وألف مليون حمد وشكر
انتوا الصحبة اللى هونت عليا الرحلة القاسية دى ..
ربنا يخليكم ليا
وميرسىىىىىىى جد ع البوست اللى كتبتيه
وميرسى جدا ع الأيفينت وع الهاشتاج واللينكات اللى بتبعتهالى داميا وتخلينى احس وكأنى معاكم
وميرسى على كل حاجة
ولو ان المحبة محدش بيشكر عليها ..
مبينفعش اصلا
بس انتى عارفة ومش محتاجة اقولك وانا ف الحالة اللى انا فيها دى
وبلملم ف الكلام ومش عارفة من كتر التوتر والخضة والأمتناااااااااااااان
والمحبة

انتى عروسة بحورى انا الحلوة
:-* ــات وحضونات بعدد موج بحركم

▲♥ ◊●♪ღ◐°◣(Hannoda )◢°◑ღ◊●♪♥▲

يا حبيبتى يا هنودة يا أحلى قمراية اسكندرانية
فاكرة ؟
بصى ..
انا تخيلت زمان انى هكتب البوست دا
بس مكنتش متخيلة انه هيكون بعد سنين طوال كدا ...
كنت فاكرة يوسف راجع بسرعة ...
متصورتش انى هستنى كل دا وف وسط السكة اليأس يحاوطنى كتير واقاوم
لكن ف النهاية جاتلى حالة سكينة
الناس تصورت انها احباط
لكن الحقيقة ان السياسة وحال البلد هما اللى سدوا نفسى
لكن عمرى ما قطعت حبل العشم بالله ان اللى اتمنيته يحصل
ولو كان معجزة وخيال ... ومش واقعى ولا منطقى
لكن ربنا فوق كل حاجة وكل حد ...
الحمدلله بعدد حبات الرمل ونجوم السما وكل مخلوقاته من اول الكون ما انوجد لحد يوم الساعة ..
عقبال ما افرحلك كتييييييير وقريب بكل اللى تتمنيه واحلى
ياااااارب
:-* وحضن وسع البحر

▲♥ ◊●♪ღ◐°◣(ستيتة )◢°◑ღ◊●♪♥▲

عارفة كل اللى بتقوليه يا ستوتة
دى حالتى بالحرف والله
متخمة كدا وممتنة لدرجة الأزبهلال شويتين تلاتة ..
البت مانوسة دى عسولة ومكشوف عنها الحجاب
:-*
بوسيهالى واحضنيلى عفرتو حبيبى
وف الروقان هبقى اخلى يوسف يقرى البوست اياه اللى طبطب عليا
وكنت كل ما ابقى على شفا حفرة من اليأس اجرى عليه واقراه
واسند روحى بالامل
ربنا يخليكى ليا ومنحرمش منك ابداااا
بوسات وحضونات بالعبييييط بقى
:-*
:-*
:-*

▲♥ ◊●♪ღ◐°◣( أحوال الهوى )◢°◑ღ◊●♪♥▲

قريت يا دكتور وشفت وفرحت معاكم قوى قوى
ربنا يخليكو ليا
وبعدين فعلا انتوا ليكم ف يوسف نصيب
انتم اخواتى واهلى اللى أخترتهم .. وربنا ما يحرمنى منكم ابداااا

▲♥ ◊●♪ღ◐°◣( norahaty mo )◢°◑ღ◊●♪♥▲

فعلا يا نورهانتى
الصبر مفيش أطيب منه
ومفيش زيه يحل أعقد مشكلة
:-*

▲♥ ◊●♪ღ◐°◣( yasmina faisal )◢°◑ღ◊●♪♥▲

ياخراشى ع الزغروطة الفُللى
تسلميلى يا ام أنس الغالى
ولك من دعواتك ليا زيها واكتر ألف مرة يا حبيبتى
:-*

▲♥ ◊●♪ღ◐°◣(مذكرات كشكول المورق )◢°◑ღ◊●♪♥▲

الله يسلمك يا عزيزتى
انا سعيدة جداااااا بالتعليق دا وبالفولو على توتير كمان
:)
كلك ذوق وتسلميلى يارب

▲♥ ◊●♪ღ◐°◣(ahmed rageh )◢°◑ღ◊●♪♥▲

الله يبارك فيك يا رااااااااااااااااجح
:)
شوية بس واروق وارجع توتير ان شاء الله
معلش بقى
:))

▲♥ ◊●♪ღ◐°◣(ستيتة )◢°◑ღ◊●♪♥▲

ألف سلامة على قلبك
:)

▲♥ ◊●♪ღ◐°◣( سكرة )◢°◑ღ◊●♪♥▲

ياااااااااااااااااااااه يا سكرة
اخيرا قريت تعليق ليكى بعد كل الغياب
:)
بس انا كنت دايما بسال وبطمن عليكى من بسكوتة
وبتوصلى سلامك ودعواتك
ربنا دايما يطمنى عليكى يا حبيبتى
ومش هقولك شكرا على أى حاجة ...
انتى أحلى من كل السكر اصلا
:-*

▲♥ ◊●♪ღ◐°◣(أيناس لطفى دنيا محيرانى)◢°◑ღ◊●♪♥▲

الله يباركلى فيكى يا أنوسة
متتصورييش فرحانة قد بأنى بشوف اساميكم وتعليقاكتم واسماء مدوناتكم
وبحس وكأنى رجعت لزمان اول ما دخلت التدوين
واحساس الدفا دا .. اللى ميتوصفش بكلام

ميرسى يا حبيبتى جداااااااااااااااااااا انكم لسه فاكرينى انا ويوسف
وانكم هنا

▲♥ ◊●♪ღ◐°◣(Esraa Fehead )◢°◑ღ◊●♪♥▲

ميرسى يا إسرو
منحرمشى
:-*

▲♥ ◊●♪ღ◐°◣(أم مالك )◢°◑ღ◊●♪♥▲

وانا معقول أنساكى يا غااااالية
دايما دودو عاشقة الرومانسية تطمنى عليكى
انا مقصرة ف حقك معلش
بس عارفة انك مش زعلانة
:-* والف حضن
ومش محتاجة اكون قصادك عشان يوصلونى واحس بالمحبة والغلاوة
اومال انتى وكل الناس الحلوة كنتو قاعدين بتعملوا ايه كل السنين اللى فاتت دى ..!
:))
يارب تكونى دايما ف احسن حال
والولاد ف ألف أحسن حال
يارب

▲♥ ◊●♪ღ◐°◣(خمسة فضفضة)◢°◑ღ◊●♪♥▲

الله يبارك فيكى يا فضفوضتى
تسلميلى يا حبيبتى
ومنحرمشىىىىىى منك ابدااااا

▲♥ ◊●♪ღ◐°◣(عاشقة النقاب )◢°◑ღ◊●♪♥▲

الله يبارك فيكى يا نونو
دى بركة دعاكم الطيب يا اطيب الناس
:-*

▲♥ ◊●♪ღ◐°◣(جارة القمر)◢°◑ღ◊●♪♥▲

الله يبارك فيكى يا ميوية
وعارفة يا حبيبتى اللى ف قلبك
وعقبال ما انتى كمان تفرحى
ويقر قلبك وعينك
انا لن اتنازل عن مجييك يوم السبت لو سمحتى ..
مينفعش متجيش ف يوم زى دا
ولو تقصدى انجى هات م الآخر .. تكتب تحكى
فهيا حبيبتى
ومامتها دى ست الكل وياما دعت ليوسف وليا
ربنا يخليها ويبارك فيها
ويفرح انجى دايما يارب
وانتى كمان
:-* وحضن ومستنياكى

▲♥ ◊●♪ღ◐°◣(mona el dawakhly )◢°◑ღ◊●♪♥▲

يا ستى تعرفينى ولا لأ ولا يهمك
المهم انك هنا وف مناسبة حلوة جدااااا وغالية
وانتى شرفتى المطرح كله
واهلا بيكى
وميرسى على ذوقك
:)

▲♥ ◊●♪ღ◐°◣(jana)◢°◑ღ◊●♪♥▲

الله يبارك فيكى يا جانا
ميرسى يا حبيبتى
وانتوا ليكوا حتة ف الفرحة دى .. بطعم السكر والشيكولاتة
:-*

اول ما كيارا بعتتلي بالخبر علواتس
انا تقريبا لقيت دموعي نزلت
محستشي بنفسي
دموعي لقتها كدا لوحدها
تقريبا الخبر من الفرحه قعد معايا لتاني يوم
انا عملت حادثه ومحستشي اصلا غير بعدها بيوم
مشاعر كتير حسيت بيها
الحمد لله انه رجع بلسلامه
ويارب تشوفيه احسن حد فلدنيا
واحنا الي هنجهزه للجواز ونعمله احلي فرح فلدنيا :)

حبيبتى .. يااااااااااااااااااااه احلى خبر
انا فى الشعل وماسكة نفسى بالعافية .. حاسة انى عايزة اقوم ازعرد واقول للاكاونت كله يوسف رجع
ربنا كريم قووووووووووووووووووووووووى .. قوى لمالا نهاية
انا كنت قربت افقد الامل والله ليكى .. بس ربنا اكبر من اى حاجة
ياريتنى كنت عارفة بيتك .. كنت جيتلك وحضنتك قووووووى

يوسف رجع زى ما كنت بستناه
رجع حاببنى
فاكرنى
الجملة دى حلوة قوى .. من احلى ماكتبتى .. ولما قريتها فرحت قوووووووووى
انه رجع وفاكرك زى زمان .. بس مش شايف انك حد جديد فى حياته

صورته ماشاء الله راجل .. هو ده اللى هيقفلك بعد كده ..
وهو ده اللى هيخدك فى حضنه ويطبطب عليكى
هيعوضك عن كل اللى فات
هيعوضك عن كل اللى فات
هيعوضك عن كل اللى فات
انا فرحانة قوى والله
يمكن موضوع الاحساس زاد عندى كمان عشان هبقى كمان كام شهر أم :)

ربنا يخليهولك ويحميه يارب ويعوضك عن كل اللى فات
الحمد لله

▲♥ ◊●♪ღ◐°◣(مصطفى سيف الدين )◢°◑ღ◊●♪♥▲

مش عارف تكتب ايه بس يا مصطفى
اومال البوست اللى قريته عندك دا ايه
دا من اجمل ما قريت
ربنا يخليك لأختك
وترجعلنا بألف سلامة سالم غانم مجبور الخاطر
كان نفسى تكون موجود ..
بس حسك معانا وان شاء الله اول اجازة ونزولة للقاهرة
هجيبهولك تشوفه وتقعد معاه وتتملى منه
:)
وربنا يفرح قلبك ويسمعنى عنك دايما كل خير
:)))

▲♥ ◊●♪ღ◐°◣( marwa amer)◢°◑ღ◊●♪♥▲

لمااااااضة يا عثل
شوفتى يا مرمرة اهو يسوفة رجع
الواد عاوز يبقى ضاكتور .. الحقينىىىىى واديله عصارة خبرتك
وعاوزاكى لما تشوفيه تخليه يغير رايه بقى
او اخليه يقرى مدونتك ويفطس م الضحك ع المهنة
وغالبا هيتشبث اكتر ويقولى م الدكترة بتخلى الناس دمها شربات اهو
:-*
ربنا يخليكوا ليا وتفرحوا كمان وكمان
وافرحلكم يارب طول العمر
بوسات وحضونات كتييييير قوى قوى بقى

▲♥ ◊●♪ღ◐°◣(إيمان شخابيط)◢°◑ღ◊●♪♥▲

الله يباركلى ف عمرك يا إيمو
:-* :-* :-* واحضان بالهبللللل
تصدقى بالله
اخر ورة شفت منى نبضات ف حقل الاحتفال بزهرات التدوين وستاته الحلوة .. جبنا سيرتك كتير
وتوتو كمان دايما تقولى انك فكرانى
ربنا ما يحرمنى من رقة قلبك يارب
وعقبال ما افرحلك علطول وطول الوقت
فرحات تليق بقلبك الطيب الجميل دا يارب
:-* وألف حضن يا احلى شخابيط ف الدنيااااااااااااااااااااااااااااااا

▲♥ ◊●♪ღ◐°◣( قلم رصاص )◢°◑ღ◊●♪♥▲

تسلملى يا رب على كل الكلام الحلو اللى انا مش قده دا
منحرمشى منكم ابدا
:))

▲♥ ◊●♪ღ◐°◣( sakayar )◢°◑ღ◊●♪♥▲

يا شيخ قول والله
:)
انا منشكحة جداااااااااا بالتعليق دا يا سكاير يا جميل
انتا مختفى من توتير وانا مبرضاش أغلس واقولك انتا فين
عشان عارفة ان الكل مقريف
بس متتصورش فرحانة قد ايه بتعليقك هنا
منحرمش منك ولا من دعواتك يارب
:))

▲♥ ◊●♪ღ◐°◣(Ahmed Abdeladl )◢°◑ღ◊●♪♥▲

دخلت وعرفت تقصد مين يا احمد
وهرد عليها لأنها كانت أكرم
ودخلت علقت عندى بعدك ...
ميرسى يا حمامة السلام والمودة
:))

▲♥ ◊●♪ღ◐°◣( soooo )◢°◑ღ◊●♪♥▲

الله يبارك عمرك يا فنان
يا اخف دم ف عالم التدوين
:)
ميرسى جداااااااااااااا
وعقبال ما نفرحلك دايما يارب

▲♥ ◊●♪ღ◐°◣( eman )◢°◑ღ◊●♪♥▲

الله يبارك فيكى
انتى ايمان اللى م المنصورة .. صح ؟

▲♥ ◊●♪ღ◐°◣ ( ابراهيم رزق ) ◢°◑ღ◊●♪♥▲

الله يخليك يا أبو سالينازة العسل
مين يشهد للعريس وأم العريس بقى
:)
منحرمشى منك ابداااا يارب
وطبعا مفيش داعى أقولك انى منتظرة ساليناز تيجى
عشان أحضنها حضن المرة دى هيكون غير كل مرة

▲♥ ◊●♪ღ◐°◣( شمس النهار )◢°◑ღ◊●♪♥▲

يا خراشى يا شموسة نابوليا ايه وبتاع ايه دنتى تاخديه بكل ما يملك هوه وامه ونتاقل العروسة بالدهب والألماظ
بس المشكلة انى اديت كلمة لأبراهيم بعدين يزعل
بصى
انتى اتفقى معاه واللى تشوفوه ماشى
وملكوش دعوة بيوسف
انا معنديش ولاد تقول رأيها ف الجوااااز
:-*
والاحضان حوشيها لحد ما تشوفينا ان شاء الله


لسه فاكرة اول مرة اتقابلنا انا وانتى ..
وقولتيلى كلام عن يوسف .. فكراه
ساعتها زى ما تكونى جبتى تلج وحطيته على النار اللى ف قلبى .. بردتيها
وخلتينى أحس انى قادرة اتحمل واصبر وربنا الحافظ ف كل وقت
كلامك عمرى ما بنساه ولا هنساه
وهفضل أقوله لغيرى
وربنا ما يحط حد ف أى موقف كدا ويحرمه من اللى بيحبهم
بس حقيقى
ربنا الحافظ واللى مكتوبله حاجة هيشوفها
وف النهاية ربنا اسمه العدل والحق
عقبال يارب ما نتلم اللمة دى عشان ضيا لما نحتفل بخروجه
هوه وكل اللى مظلوم زيه يارب
يااااااارب

أشوفك على الف خير

▲♥ ◊●♪ღ◐°◣( كركايب عادل ) ◢°◑ღ◊●♪♥▲

الله يبارك فيك
تسلملى يارب
:))))

▲♥ ◊●♪ღ◐°◣( tarek momkenl )◢°◑ღ◊●♪♥▲

اله يبارك ف عمرك يارب
وحاليا انا حاسة انه مبروك عليكم انتم الاول
وبعدين انا بعدكم
:)))
ربنا يخليكم ليا

▲♥ ◊●♪ღ◐°◣( Zain Hady )◢°◑ღ◊●♪♥▲

ياااااااااااااااااه يا دكتور
متتصورش تعليقك دا فرحنى ازاى
مش متخيلة اصلا
اسمك والصورة رجعونى 7 سنين لورا لما عملت المدونة
كنت حضرتك السبب
فاكر ؟
وفاكر لما كنت تقابلنى صدفة وكل ما تشوفنى تقولى ان لازم انشرلك التدوينات دى
وانتى بتكتبى حلو وكدا
:)
والرواية اللى بتحكى عن الطفل الصغنن
اللى حسيت انه شبه يوسف ف حاجات كتيييير
انا عاجزة عن انى أوفى حضرتك حقك من الشكر والامتنان
عاشان بسبب معرفتك الطيبة انفتحلى باب على عالم جميل
شفت فيه خير كتييييير قوى
وشر قليل
لولاه ولولا ناسه الحلوة والمتميزة .. مكنتش اتحملت كل اللى فات
لحد ما وصلت للحظة دى
كنت ف الاول وحيدة
ولوقتى بقالى اهل واسرة وعالم واسع جميل وساحر وطيب ...

ربنا يخلى حضرتك لينا
ودايما وشك خير على كل اللى تعرفهم يارب
وعقبال ما نفرح بتسابيح وتجوز ولادها يارب
:))

والشكر موصول لايمان الغالية عشان هيا وصلة الخير دايما
:-*

▲♥ ◊●♪ღ◐°◣( mrmr )◢°◑ღ◊●♪♥▲

فعلا يا مرمر
الجملة دى صح جداااا
كل حاجة ليها وقت وربنا محددها
بس احنا نروحله ...
ونصبر ف السكة
ميرسى يا حبيبتى خالص
وربنا ما يحرمنى من طيبة قلبك
:-*

▲♥ ◊●♪ღ◐°◣( اسماء رمضان - المدونخانة )◢°◑ღ◊●♪♥▲

ميرسى يا اسماء جدااا
وانا فرحانة والله لما لقيت الجمع الحلو دا
احنا كنا محتاجينه فعلا
والحمدلله ان السبب كان حلو
:)

▲♥ ◊●♪ღ◐°◣( تغريد توتو حبيبتى )◢°◑ღ◊●♪♥▲

انا مش عارفة اكتب هنا أى حاجة
ومش هعرف الا لما اشوفك واحضنك
وانتى تشوفى يوسف وتحضنيه
هستنى تقوليلى ع المعاد المناسب
واجيبهولك لحد عندك ان شاء الله
عشان انتى وسارة واسماء وطنط وحازم وكل الحبايب يشوفوه
واهم الناس بقى وأعز الناس
احمد ومعاذ
:-*
بوسيهمولى لحد ما أشوفكم كلكم على ألف خير
وبألف فرحة يارب متنقطعش أبدا

بحبك

▲♥ ◊●♪ღ◐°◣( Sarah... )◢°◑ღ◊●♪♥▲

الله يبارك ف عمرك يا سارة
ميرسى يا حبيبتى جداااااااااااا

الحمد لله ملء السماوات و الارض.. و ما بينهما....
الحمدلله كما ينبغي لجلال وجهه و عظيم سلطانه...
الحمد لله حمدا كثيرا لا ريب فيه
اللهم لك الحمد حتى ترضى..اللهم لك الحمد حتى ترضى..اللهم لك الحمد حتى ترضى

من ٦ سنين و في ليلة حزينة ولادي كانوا بعيد عني..و ربنا بعتلي مدونتك و قريتها..و على قد ما بكيت..على قد ما حسيت بقوة و صبر استمدتهم منك..الحمدلله ولادي رجعولي بعدها و دايما كان عندي يقين انه مهما طال الوقت يوسف حيرجع..و ان الاختبار طال عشان ربنا بيختبر عباده اللي بيحبهم اكتر ..و في وسط دوامة الحياة دايما كان اسمك و اسم يوسف في قلبي و على لساني في اي دعوة و كانهم بقوا من الادعية المحفوظة...

يقيني في الله ان يوسف راجع ممنعش القشعريرة اللي ملتني اول ما قريت جملة "يوسف رجع"..و لقتني بزرغط الساعة ٨ الصبح و انا بعيط !!!
الفرحة حلوة قوي يا رب..انت كبير و جميل قوي يا رب
يا رب متحرمهمش من بعض و عوضها بيه عن كل وجع و عوضه بيها عن كل تعب
مبروووووك يا روح قلبي..بوسيلي يوسف و احضنهولي من قلبك

الف مبروك
يا ام يوسف
ربنا يبارك لك فيه يا رب
و يعوض صبركم خير

ربنا ما يفرقكم تانى ابدا والجاى كلة يكون فرح..

ماذا اقول و قد قالوا كل ما يقال و اكثر
ربنا يهبك من السعادة وراحة البال بعودة ابنك الي حضنك بقدر ما نشر محبتك في كل هذه القلوب التي قيل فيها الحديث القدسي عن الله جل جلاله :وسعني قلب عبدي

ايه بقى يا عم يوسف
ده تالت مرة ابعتلك اسلم عليك و الكومنت هوب يختفى :( :(
حمدلله على رجوعك و سلامتك حمدلله

حنان ام رودينا  

الف الف مبروك يافاتيما على رجوع يوسف لحضنك ودايما يارب فرحانه بيه
صدقينى انا مش لاقيه كلام يوصف سعادتى بالخبر من ساعه ما عرفت من دودو
سامحينى مش عارفه اكتب تعليق يليق بيكى وبيوسف
رودينا بتسلم عليكى ومنتظره تشوف يوسف زى بالضبط :)
:* ♥

يا الله .. مش ممكن يا طمطم.. يوميا بدخل اقرا التدوينة واقرا التعليقات كلها واسح دموع .. انا تقريبا حفظتها :)
مش ممكن الفرحة دي .. انا فرحانة لك بشكل لا تتخيليه..
ومن هنا ورايح مافيش طمطم ولا فيه فاتيما . فيه ام يوسف وبس
بوسيلي يوسف يا ام يوسف ويارب ما تتفرقوا تاتي أبدا

فاطيمة
صديقة التدوين العزيزة
كم أسعدني واللهي وكم فرحت من كل قلبي عندما قرأت الخبر عند شمس النهار برجوع يوسف فكان لازاما عليا وعلى نفسي وعلى عشرة التدوين مع كل من شاركتهم وشاركوني فيها من الفرح والهم والحزن والأمل سنوات من التدوين الجميل أجمل فيها للكل هي المشاركات التي كانت بيننا جميعا تحمل معنى انسانيا جميلاً بعيدا عن اي مقابل أو ثمن فكانت المحبة بين الجميع لله وكانت الدعوات بيننا جميعا من القلب وصادقة تنتظر أجر من الله سوى الاستجابة للدعاء لما فيه خير لصاحب المشكلة و الهم والحزن
أعيد وأكرر هذا الخبر من الأخبار الجميلة جداً التي سمعتها في حياتي وتمنيتها فأعتقد أنه ليس هناك أجمل من طفل يعود لحضن أمه وليس أجمل من حضن أم يعود اليه وليدها وفلذة كبدها....
فاطيما صديقة التديون العزيزة
كان هذا إبتلاء من الله والإبتلاء من الله يكون لعبده الذي يحبه وكيف يصبر على ابتلاءه، وقد كنتي بحمد الله عند حسن ظن الله بكي فأبتليتي وصبرتي وجاهدتي وكافحتي وحمدتي ربكي على السراء والضراء فكانت مكافئتك عند اللع عظيمة وهي رجوع الحق لكي رجوع يوسف لكي بفضل كبير من الله ورضاءه عليكي فاستمري بحمده وحافظي على نعمه عليكي ولأن شكرتم لأذيدنكم... صدق الله العظيم
تحياتي
حسن أرابيسك

▲♥ ◊●♪ღ◐°◣( bos bos )◢°◑ღ◊●♪♥▲

الله يسلمك يا بسبوسة
:-*
وعقبال ما افرحلك يارب دايما ف الخير
انتى م الناس الحلوة بتاعت زمان وليكى ف يوسف نصيب برضو
:))
ميرسى يا حبيبتى جداااا

▲♥ ◊●♪ღ◐°◣( wafaa )◢°◑ღ◊●♪♥▲

:)))
تسلميلى يارب
:-*

▲♥ ◊●♪ღ◐°◣( محمد قنديل )◢°◑ღ◊●♪♥▲

الله يبارك فيك يا محمد ويباركلى ف قلبك الطيب
وعقبال ما أقولهالك ف كل المناسبات الحلوة اللى ربنا يرزقك بيها كتير كتير قوى
وعقبال ما نقولها لبعض كلنا لما ضيا يخرج بالف سلامة
هوه وكل مظلوم يارب
يارب

ربنا يخليك لأختك-+
9وربنا ما يحرمنى انا ويوسف ابدا من دعواتك

ومن غير (ى) خلاص يا محمد
يعوض مش محتاجة (ى)
خلاص كدا وألف حمد وشكرا
:))

▲♥ ◊●♪ღ◐°◣( حنين القلب )◢°◑ღ◊●♪♥▲

الله يبارك فيكى يا حنونة
عارفة اللى ف قلبك والله ومن غير ما تنطقى بحرف
انا فرحانة اصلا انى حضرت معاكى كل الحاجات الحلوة دى
فاكرة لما كنا مستنيين أى حاجة
وعرفت منك خبر الحمل ..!
وبعدين خبر مجى عمر
ولما شيلته بين ايديا
وشفته بيكبر
واتطمنت عليكى
والحمدلله
وعقبال يوسف الكبير ما يشوف يسوفة الصغنن
ويقعدوا سوا ف ركن الياسفيف مع بعض
:)

الدعوة اللى انتى قولتيها والكل بيدعيها
هيا اهم حاجة بجد

ربنا ما يحرم ام من ابنها
ولا يحرم ابن من حضن امه

ويرد كل غايب يارب بألف سلامة


بوسات وحضونات ويوسفيات حدانا وحداكم
:)))

▲♥ ◊●♪ღ◐°◣(norahaty mo )◢°◑ღ◊●♪♥▲


:))))

▲♥ ◊●♪ღ◐°◣( mohamed nasa )◢°◑ღ◊●♪♥▲

يارب دايما تبقى دموع الفرحة وبس
:)
وربنا يسمع منك ومننا ف الايام المفترجة دى
ويرد ضيا ويخرج أقوى مما كان
يارب ببركة كل الدعا اللى ف قلوبنا
يارب

▲♥ ◊●♪ღ◐°◣( mohmed hamdy )◢°◑ღ◊●♪♥▲

مش تافهة ولا حاجة يا محمد
وبالعكس انا فاهمة قصدك
فيه حاجات بتبقى دايما اكبر م الكلام
بس انا حاسة بفرحتكم والله
من غير أى حاجة

ربنا يخليكم ليا
:)

▲♥ ◊●♪ღ◐°◣( الطائر الحزين )◢°◑ღ◊●♪♥▲

عارفة يا إيهاب
عارفة يا طائرى الحزين الطيب ...
انتا خاله وياما قولت ف غيابه .. مش محتاج تقولى حاجة دلوقت خالص
:)

▲♥ ◊●♪ღ◐°◣( مواطن مصرى نايم -اسلام )◢°◑ღ◊●♪♥▲

:)))
شرف ليوسف ولروح قلب ماما اننا نكون السبب ف رجوعك للتدوين
انتا وكل الناس الحلوة الى كانت غايبة
ولو ليوم واحد حتى

الله يسلمك ويفرح قلبك ويطمن بالك دايما
ومعلش مليش ف الفيس
انا على توتير ومش لاقية وقت اشاسا
بس متابعاكو عن طريق عاشقة الرومانسية
وربنا ما يحرمنى منكم ولا من دعاكم ولا من فرحتكم ابداااا

▲♥ ◊●♪ღ◐°◣( P A S H A )◢°◑ღ◊●♪♥▲


الله يبارك فيك يا شريف
:))))
عقبال ما داميا نجيلك ف الفرح والخير
ميرسى جدااااااااااا

▲♥ ◊●♪ღ◐°◣( story pain )◢°◑ღ◊●♪♥▲

الله يسلمك يا حدوتة
:-*
ميرسى يا حبيبتى قوى قوى قوى

▲♥ ◊●♪ღ◐°◣( ميمى الحامد )◢°◑ღ◊●♪♥▲

ربنا يفرح قلبك دايما
ميرسى
:)

▲♥ ◊●♪ღ◐°◣( محمد قنديل )◢°◑ღ◊●♪♥▲

:)
تانى هقولهالك
ودايما ...
ربنا يخليك لاختك

▲♥ ◊●♪ღ◐°◣( mahmoud bahgat )◢°◑ღ◊●♪♥▲

ربنا يسعد أيامك كلها يا محمود
قعدنا نأجل ف المواعيد لحد ما ربنا يريد بأذن الله نتقابل ف مناسبة ولا احلى من كدا
عشان تشوف يوسف بنفسك جاى معايا
على فكرة
فيه منك ومن محمد غالية ..
معرفش ايه ..
بس فيه طيبة كدا وسنة خجل بسيطة وتهذيب ..
بس مش عاوز يبقى مهندس عاوز يبقى دكتور
:)

هستنى بقى لما تشوفه بنفسك وتقولى انطباعاتك ..
ابن اختك بقى وتسيطر اخر سيطرة وبراحتك
:)

سلامى لسحورة لحين يوم السبت ما ييجى

▲♥ ◊●♪ღ◐°◣( مها العباسى )◢°◑ღ◊●♪♥▲

الله يبارك فيكى يا مها
:-*
ربنا كبير وهوه الكريم
واللى يتعشم فيه ميندمش ولا يخسر
ربنا يرد كل غايب لأحبابه ...
ومنحرمشى منك
:)))

▲♥ ◊●♪ღ◐°◣( moataz farouk )◢°◑ღ◊●♪♥▲

الله يبارك فيك
وميرسى قوى
:)

▲♥ ◊●♪ღ◐°◣( محمد غالية)◢°◑ღ◊●♪♥▲

غالية يا غالى
يوسف رجع
:))

مليون يباركلى ف عمرك
ويا أرب اشوفه زيك .. حلو كدا وطيب واخلاق والكل بيحلف بيه
:)
وعقبال ما أشيل عيالك بقى
خلصونااااا
:)))

▲♥ ◊●♪ღ◐°◣( nigro )◢°◑ღ◊●♪♥▲


بص انتا قولت جملة ف الأاول ربكتنى شوية
بس على ما فهمتها كنت استوعبت قصدك
:)
فعلا
الدنيا بسيطة بس البعض بيعقدها وياخد وقت على ما يفك خيوط الصوف اللى اتلعبكت دى
عشان يكتشف ف الأخر
انه الله .. ما كان م الاول !!!!
بس معلش
متبقاش الدنيا الا اذا كانت كدا
متبقاش دنيا الا اذا تعبتنا عشان ف الآخر نلاقى الراحة
والسكينة
والرضا

قريت الجملة دى زمان وعجبتنى قوى
وكتير حاولت اطبقها خصوصا ف حكايتى مع يوسف
واهى نفعت ...

بتقول ايه بقى
بتقولك يا سيدى

الرضا نص المسافة

ودى حقيقة انا لمستها ف حاجات كتير
الرضا بيوفر كتير م التعب والضغوط والأحساس بالهزيمة لو يهاجمك ..

ربنا يفرح كل قلب مكسور
ويرد كل غايب لأحبابه
وربنا ما يحرمنى منك يا أبو قلب طيب

▲♥ ◊●♪ღ◐°◣( eng_semsem )◢°◑ღ◊●♪♥▲

معلش تعبناك يا باشمهندس
بس نورت المطرح
وف أحلى مناسبة
الله يبارك فيك
وعقبال ما تفرح انتا كمان
:))

▲♥ ◊●♪ღ◐°◣( nona146 )◢°◑ღ◊●♪♥▲

متقوليش حاجة يا نوشا
عارفة اللى ف قلبك
وربنا يفرحك ويجبر بخاطرك انتى كمان
ومن أوسع باب انشالله
وعن الاحضان والبوس بقى
فمتوصينيييييييش
انا مش سايبة ف نيفسى حاجة
:))

▲♥ ◊●♪ღ◐°◣( shimaa elkholy )◢°◑ღ◊●♪♥▲

ههههههههههههههه
متخيلاكى يا صبصب
متخيلة فرحتك والتنطيط والهوليلة
ومتخيلة استاذ رضا واندهاشه
الراجل الطيب دا ازبهل معانا كتير والله
:)
ربنا يخليكو ليا ويحفظلك العيال يارب
ومنحرمش منك
انتى م الناس اللى كلامهم دايما كان بلسم ع الجرح
عمرك ما قولتيلى كلمة توجعنى او تحاسبنى او تلومنى ...
ام بقى
ومش أى أم ...
انتى الحنية كلها والجعدنة
وخلاص كدا بقى من هنا ورايح
مش هدخل المنصورة الا ويوسف معايا
عشان يشوف جمال وجمال اهلها وطيبة قلبهم اللى متتوصفش
:-* وألف مليون حضن
لحد ما اشوفك انا ويوسف
:)

▲♥ ◊●♪ღ◐°◣( عمرو يسرى )◢°◑ღ◊●♪♥▲

الله يبارك فيك يا عمر
:))
والواد برج الأسد
يعنى دُفعة وزميل
:))))

▲♥ ◊●♪ღ◐°◣( حروف )◢°◑ღ◊●♪♥▲

ياااااااااه يا فوفو
كلك ذوق ورقة كمالعادة ولسه فكرانى .. !
ميرسى يا حبيبتى ومنحرمش منك
وربنا يباركلى فيكى يارب
:-* وحضن كبير قوى

▲♥ ◊●♪ღ◐°◣( سواح فى ملك الله )◢°◑ღ◊●♪♥▲

فيك الخير كله يا سواح
متوقعتش التعليق
لكن توقعت الحركة الشياكة
وانتا دايما سباق بالخير
منحرلامش منك ولا من دعواتك
والله يبارك فيك ويسلمك من كل شر يا رب

▲♥ ◊●♪ღ◐°◣( حنان - تونس )◢°◑ღ◊●♪♥▲

:))))
يا رب يخليكى يا حنان
ميرسى يا حبيبتى جدااااا
متتصوريش فرحانة ازاى ان كل الحبايب اللى بعدوا عن التدوين
لسه فاكرينى وفاكرين يوسف
وبيدخلوا باساميهم او حتى من تعليق غير معرف
عشان يباركوا ..
ربنا يباركلى ف عمركو ومنحرمش منكم ابدااااااااااااا
بوسات وحضونات رهيبات وكثيرات بقى
:-*
:-*
:-*

▲♥ ◊●♪ღ◐°◣(Hello )◢°◑ღ◊●♪♥▲

الله يسلمك
ميرسى قوى
وان شاء الله كل حاجة تتعوض ما دام ف حضنى
:)

انت عارف يعني ايه يوسف رجع ل ‫فاتيما‬ يعني أعظم حدث بالنسبة ليه في الخمس سنين اللي فاتوا .. يعني الحزن اللي الكلعاشة مع كل كلمة لفاتيما علي المدونة بتاعتها راح في لحظة وانقلب سعادة.. يعني لازم الحق ينتصر في الأخر والطير يرجع لحضن أمه ..يعني زكريات أجمل أيام .. ربنا يسعدك ويفرحك يافاتيما بيوسف ونحضر فرحه انا كتبت علي هشتاج #فاتيما يارب تكوني شفتيه ..للأسف نسيت باسورد المدونة رامي الشمارقة

إرسال تعليق